Lipina za Mubuso Lilutusa Kuba ni Bundume

Paulusi ni Silasi nebalumbekile Mulimu ka kumuopelela lipina hane bali mwa tolongo. (Lik. 16:25) Mwa linako zaluna, Bakreste babañwi nebaopezi lipina za Mubuso hane bali mwa munganda wa tukufazo wa Sachsenhausen one ufumehana mwa Germany yeneezamaiswa ki ba Nazi, ni hane baisizwe mwa buhapiwa kwa Siberia. Mitala ye, ibonisa maata elinani ona lipina a kutusa Bakreste babakopana ni miliko kuba ni bundume.

Hona cwale-cwale fa, lipuo zeñwi zeñata likaba ni buka ya lipina yenca yenani toho ya taba yeli, Muopelele Jehova ka Tabo. Lusaamuhela feela kopi yaluna, lwakona kupeta manzwi a lipina zeo ka kuitutanga zona ka nako ya kulapela sina lubasi. (Maef. 5:19) Haluka eza cwalo, moya okenile uka luhupulisa lipina zeo muta luipumana mwa miliko. Lipina za Mubuso zakona kulutusa kuisa pilu kwa sepo yaluna. Zakona kulutiisa halukopana ni miliko. Mi niha lutabile, manzwi asusueza a lipina zeo aka lutusa ‘kuopela ka tabo’ kabakala buiketo bwa lipilu zaluna. (1 Makol. 15:16; Samu 33:1-3) Kacwalo, haike lueze ka molukonela kaufela kuitusisa hande lipina zaluna za Mubuso!

MUBUHE VIDIO YELI, PINA YENETIISIZE BANE BALI MWA TOLONGO, MI HASAMULAHO MUALABE LIPUZO ZELATELELA:

• Ki miinelo mañi yenetahisize kuli Muzwale Frost añole pina?

• Pina yeo neitiisize cwañi mizwale bane bali mwa munganda wa tukufazo wa Sachsenhausen?

• Ki mwa miinelo mañi ya ka zazi ni zazi mo lipina za Mubuso likona kumitiisa?

• Ki lifi lipina za Mubuso zemubata kupeta?