“Kuteka Ndataho ni Maho”

Jesu hanaali fa lifasi, naakoñomekile hahulu taelo yeli: “Kuteka ndataho ni maho.” (Exo. 20:12; Mat. 15:4) Jesu naakona kubulela taba yeo ka kulukuluha, kakuli hanaasali mwanana, ‘naazwezipili kuutwa’ bashemi bahae. (Luka 2:51, litaluso ze kwatasi.) Jesu hasaa hulile, naaezize mwanaakonela kaufela kuli bo mahe bababalelwe nihaiba hamulaho wa lifu lahae.—Joa. 19:26, 27.

Ni mwa linako zaluna, babanca babali Bakreste habautwa bashemi babona ni kuambola ni bona hande, babonisa kuli babakuteka. Mane taelo ya kuli lukuteke bashemi baluna ki ya kamita. Bashemi baluna niha sebahulile ni kusupala, luswanela kuzwelapili kubakuteka ilikuli lukone kutusiwa ki butali bwabona. (Liprov. 23:22) Hape lukuteka bashemi baluna base basupezi ka kubababalela kwa mubili ni mwa maikuto. (1 Tim. 5:8) Ibe kuli lu banana kamba luhulile, luswanela kuzwelapili kuambolanga hande ni bashemi baluna, mi kueza cwalo kukalutusa kubakuteka.

MUBUHISE VIDIO YA MASWANISO A KUSWANISA YELI, NIKONA KUAMBOLA CWAÑI NI BASHEMI BAKA? KIHONA MUKAALABA LIPUZO ZELATELELA:

• Ki kabakalañi hakukona kumibela taata kuambola ni bashemi bamina?

• Mukona kukuteka cwañi bashemi bamina hamuambola ni bona?

  

• Ki kabakalañi kuambola ni bashemi bamina hakuli kwa butokwa? (Liprov. 15:22)