‘ Mubuluke Buñwi Bwa Moya’
Muapositola Paulusi naaelelize Bakreste ba mwa Efese kuli bazwelepili ‘kuswalelana ka lilato, banze balika ka taata kubuluka buñwi bwa moya ka kozo yetamahanya.’—Maef. 4:2, 3.
“Buñwi” boluikola ki “bwa moya” ili kutalusa swalisano yeluikola mwa kopano. Taba yeo italusa kuli ki kalulo ya muselo wa moya wa Mulimu. Nihakulicwalo, sina mwanaabulelezi Paulusi, buñwi bwaluna buswanela kubukelezwa. Ki bo mañi babaswanela kububukeleza? Niti ki kuli, Mukreste kaufela uswanela kulika ka taata “kubuluka buñwi bwa moya.”
Ka mutala, luungeñi kuli mutu yomuñwi umifile mota yenca. Ki mañi yanani buikalabelo bwa kuibabalela? Kalabo yazibahala. Haiba ishwa kabakala kuli hamusika ibabalela, hamuswaneli kunyaza yamifile yona.
Ka mukwa oswana, nihaike kuli swalisano yeluikola ka kuba Bakreste ki mpo yalufile Mulimu, mañi ni mañi waluna unani buikalabelo bwa kuibukeleza. Haiba lushelani ni muzwale kamba kaizeli, luswanela kuipuza kuli, ‘Kana nieza monikonela kaufela kubuluka buñwi bwa moya ka kutatulula butata?’
‘MULIKE KA TAATA’ KUBULUKA BUÑWI
Sina mwanaataluselize Paulusi, ka linako zeñwi lutokwa kubeleka ka taata kuli lubuluke buñwi bwa moya. Kukona kuba cwalo sihulu haiba lufoselizwe ki muzwale kamba kaizeli. Kana kubuluka buñwi kutalusa kuli nako kaufela luswanela kuikambotanga ni batu bolushelani ni bona kuli lutatulule butata? Batili. Muipuze kuli, ‘Kana kuikambota ka za taba ye kukafelisa butaata kamba kukatahisa feela kuli butata buzwelepili?’ Ka linako zeñwi lutokwa feela kusaisa pilu kwateñi kamba kuswalela.—Liprov. 19:11; Mare. 11:25.
Muipuze kuli, ‘Kana kuikambota ka za taba ye kukafelisa butata kamba kukatahisa feela kuli butata buzwelepili?’
Sina mwanaañolezi muapositola Paulusi, haike luzwelepili ‘kuswalelana ka lilato.’ (Maef. 4:2) Hatiso yeñwi neibulezi kuli pulelo yeo ikona kutalusa “kubaanga ka mobainezi.” Taba yeo italusa kuli luswanela kulemuha kuli mizwale ni likaizeli baluna ki baezalibi sina luna. Ki niti kuli lusweli kuikataza “kuapala butu bobunca.” (Maef. 4:23, 24) Nihakulicwalo, hakuna yakona kueza cwalo ka kutala. (Maro. 3:23) Haiba lulumela taba yeo, kuka lubela hahulu bunolo kuswalela babañwi ni “kubuluka buñwi bwa moya.”
Haiba luswalela babañwi ni kulibala lika zeba lufoselize, mwa puteho kukaba ni “kozo yetamahanya.” Linzwi la Sigerike lelitolokilwe kuli “kozo yetamahanya” kwa Maefese 4:3, litolokilwe kuli “misifa” kwa Makolose 2:19. Misifa ki nama yetiile yeswalisanisa masapo. Ka nzila yeswana, kuba ni kozo ni kulata mizwale baluna kwakona kulutusa kuzwelapili kuswalisana kusina taba ni kusalumelelana kokukona kuba teñi mwahalaa luna.
Kacwalo, haiba muzwale kamba kaizeli amifoseza, kuminyemisa kamba kumiutwisa butuku, mulike kumubonisa sishemo kufita kuisa hahulu pilu kwa mafosisa ahae. (Makolo. 3:12) Bakeñisa kuli batu kaufela habasika petahala, mwendi ni mina mukile mwafoseza mutu yomuñwi ka nako yeñwi. Kuhupula taba yeo kwakona kumitusa kueza momukonela kaufela “kubuluka buñwi bwa moya.”