Ki Kabakalañi Lipaki za Jehova Habasa Alabangi Batu Kaufela Baba Batameleza Litaba?
Lipaki za Jehova balatelela kelezo yeñozwi mwa Bibele ya kusaalaba mutu kaufela yabatameleza litaba kamba kubasheununa. Ka mutala, lishitanguti leliñwi la mwa Bibele libulela kuli: “Yahakulula musheununi uipatela maswabi.” (Liproverbia 9:7, 8; 26:4) Mwa sibaka sa kukananisana ni batu ni kuisa hahulu pilu kwa litaba za buhata zeba lutameleza, sa butokwa ku luna ki kutabisa Mulimu.—Samu 119:69.
Niteñi, kunani “nako ya kukuza ni nako ya kubulela.” (Muekelesia 3:7) Lualabanga batu babatabela kuziba niti, kono halutabelangi kukananisana ni batu mwa litaba zesatusi. Ka kueza cwalo, lulatelela lituto ni mutala wa Jesu ni Bakreste ba kwa makalelo.
Jesu naasika alaba batu hane bamutamelelize litaba za buhata fapilaa Pilato. (Mateu 27:11-14; 1 Pitrosi 2:21-23) Mi hape Jesu naasika alaba batu bane bamutamelelize kuli neli cakolwa ni wa micomibi. Kono naatuhelezi kuli batu bazibe niti ka kubona likezo zahae, ili kulumelelana ni sikuka sesili: “Butali bupakwa kuli bulukile ka misebezi yabona.” (Mateu 11:19) Kono hane kutokwahala kuli aalabe, naaalabanga ka bundume batu bane bamusawana.—Mateu 15:1-3; Mareka 3:22-30.
Jesu naalutile balateleli bahae kuli basike bazwafiswa ki litaba za buhata zene batamelezwa. Naabulezi kuli: “Tabo ki yamina, batu haba mishubula ni kuminyandisa ni kumitameleza bumaswe bwa mifuta kaufela kabakala ka.” (Mateu 5:11, 12) Kono Jesu hape naataluselize balateleli bahae kuli hane kukatokwahala kuli baalabe batu bane babatameleza litaba, ili kutahisa kuli bafe bupaki, naakataleleza sepiso yahae yeli: “Nika mifa manzwi ni butali zebasike bakona kulwanisa kamba kukananisa balwanisi bamina kaufelaa bona.”—Luka 21:12-15.
Muapositola Paulusi naaelelize Bakreste kuli basike bakanana ni batu bane babalwanisa, ka kutalusa kuli likañi zecwalo “halitusi sesiñwi mi ki za mbango.”—Tite 3:9; Maroma 16:17, 18.
Muapositola Pitrosi naasusuelize Bakreste kuikalabela ka za tumelo yabona haiba kutokwahala kueza cwalo. (1 Pitrosi 3:15) Kono naalemuhile kuli hañata, nzila yende hahulu ya kueza cwalo ka yona, ki ka likezo, isi ka manzwi. Naañozi kuli: “Ka kueza hande, mukone kukuzisa batu babasina kutwisiso bababulela litaba za butoto.”—1 Pitrosi 2:12-15.