Ka mo lu Kona ku Kaulelwa Lusebo lo lu Holofaza
“[Jehova, “NW”], u beye mulibeleli fa mulomo wa ka; U libelele fa munyako wa milomo ya ka.”—LISAMU 141:3.
1. Ki buikoneli bufi b’o booko bo lu filwe ki Mulimu bu na ni bona?
JEHOVA u lu file booko, mi ki bo bu makaza hakalo! Buka ye bizwa The Incredible Machine (Mushini o mbwetukisa) i talusa kuli: “Nihaiba likompyuta ze tatezani hahulu ze ne lu kana lwa hupula ha li na mayemo ni a makana ha li bapanywa ni ku tatezana ni buikoneli ze bat’o ba ze si na maciñekelo za booko bwa mutu . . . Lisupo ze fita ku bolule-lule ze fita mwa booko bwa mina ka nako kaufela li lwezi mushimbo o mutuna wa litaba. Li tisa piho ka za maino a mubili wa mina a mwahali ni a kwande . . . Lisupo ze ñwi li talima ni ku tatubisisa litaba, li tahisa maikuto a mañwi, ku hupula, minahano, kamba litukiso ze isa kwa ku eza keto. Ibata iba hamulahonyana fela a f’o, lisupo ze zwelela kwa booko bwa mina li taluseza likalulo ze ñwi za mubili wa mina sa ku eza . . . Ka nako ye swana booko bwa mina bu zamaisa ku buyela kwa mina, maino a mali, mufutumala, ni misebezi ye miñwi ye mu sa lemuhi.”—Likepe 326.
2. Ki puzo ifi ye tokwa mamelelo cwale?
2 Kaniti luli, mpo ya mufuta o cwalo ye zwelela ku Mulimu ni kamuta ha i swaneli ku itusiswa sina mungomo wa matakala kamba singongolo sa ze masila. Niteñi, lwa kona ku itusisa booko ka mafosisa ka ku teeleza ni ku hasanya lusebo lo lu holofaza. Lu kona ku pima ngambolo ya mufuta o cwalo kamukwaufi ni ku tusa ba bañwi kuli ba si ke ba ikenya teñi?
Mu Itebuhe M’ata a Munahano a’ mi File Mulimu
3. Ki kabakalañi Bakreste ba niti ha ne ba si ke ba ikenya mwa ngambolo ye holofaza?
3 Buitebuho kwa neku la m’ata a munahano a’ lu file Mulimu bu ka lu konisa ku pima ku teeleza kwa lusebo lo lu holofaza ni ku lu hasanya. Moya wa Jehova ne u si ke wa susueza mutu ufi kamba ufi kuli a taze m’ata a munahano wa hae ka mihupulo ya mufuta o cwalo ni ku itusisa lilimi la hae mwa ku holofaza ba bañwi. Ka ku fapahana, Linzwi la Mulimu li talusa kuli: “Ya maswe a tuhele nzila ya hae, mi ya si na niti a tuhele mihupulo ya hae.” (Isaya 55:7) M’ata a munahano wa mutu ya maswe a tezi mihupulo ye maswe, mi ki wa kazatu mwa ku sawana ba ba lukile. Kono ni kamuta ne lu si ke lwa libelela lipulelo ze cwalo ku zwelela ku bao ba ba itebuha m’ata a bona a munahano a’ ba file Mulimu.
4. Haiba lu itebuha booko bwa luna ni buikoneli bwa luna bwa ku bulela, lu ka itusisa cwañi m’ata a luna a munahano ni lilimi la luna?
4 Buitebuho bo bu lukile bu ka lu tusa ku pima ku itusisa m’ata a luna a munahano ni lilimi la luna mwa ku taleleza milelo ya kwa nama ili ya sibi. Ka ku fapahana, lu ka buluka ku nahana ni ku bulela kwa luna fa sipimo se si pahami. Lwa kona ku pima lusebo lo lu holofaza ka ku itinga ka tapelo ku Yena y’o y’a na ni mihupulo ye pahami ku fita ya luna. Muapositola Paulusi n’a elelize kuli: “Linto kaufela ze li za niti [ze si za buhata kamba za busawana], kaufela ze kutekeha [isiñi ze si na mayemo], kaufela ze lukile [ze si ze maswe ni ku holofaza], kaufela ze kenile [isiñi busawana bo bu si ka kena kamba ku sa sepa mutu ili ko ku maswe], kaufela ze na ni libubo le linde [isiñi za sitoyo kamba za ku nyaziseza], kaufela ze na ni swanelo [isiñi ze shwaula mutu], [sipimo se sinde kaufela, NW] [isiñi se si maswe], ni ze lukela ku lumbwa [isiñi ze nyaziwa], ibe zona ze mu nze mu hupula.”—Mafilipi 4:8.
5. Ki sifi seo balumeli ba bañwi ne ba si boni ni ku si utwa ka ku ama ku Paulusi?
5 Paulusi n’a ekelize kuli: “Ze mu lutilwe ki na, mwa li amuhela, mwa li utwa, ni ze mu boni ku na, ibe zona ze mu eza; mi Mulimu wa kozo u ka ba ni mina.” (Mafilipi 4:9) Ki lika lifi ze ne ba boni ba bañwi ni ku li utwa ka ku ama ku Paulusi? Lika ze kenile ni ze yahisa kwa moya. N’a si ka taza lizebe za bona ka lusebo lwa litaba ze nca ka za Lidia kamba Timotea. Mu kona ku ba ni buniti bwa kuli Paulusi n’a si ka teeleza kamba ku hasanya mabulatwi a ama banna-bahulu mwa Jerusalema.a Kacwalo, likute kwa m’ata a hae a munahano a n’a filwe ki Mulimu ne li mu tusize ku pima ku ikenya mwa lusebo lo lu holofaza. Lu ka likanyisa mutala wa hae haiba lwa itebuha luli m’ata a munahano ni lilimi za lu file Jehova.
Mu Kuteke Mulimu ni Linzwi la Hae
6, 7. (a) Jakobo na bonisize cwañi ze zwa mwa lilimi le li si ka tapiswa? (b) Ki sifi se ne si si ke sa ezahala haiba lu kuteka Mulimu ni Linzwi la hae?
6 Likute le li zwelela kwa pilu ku Mulimu ni Linzwi la hae le li kenile hape li ka lu tusa ku kaula lusebo lo lu holofaza. Ee luli, likute la mufuta o cwalo li ka lu konisa ku utwa kelezo ya mulutiwa Jakobo, ya n’a nyazize hahulu lilimi. (Jakobo 3:2-12) Haiba mutu n’a ka kona ku zamaisa lilimi la hae, n’a ka kona hape ku zamaisa mubili wa hae kaufela, sina mane tumo ya mwa mulomo wa pizi ha i kona ku zamaisa yona folofolo yeo. Sina kalilo ka kanyinyani ha ka kona ku cisa mushitu kaufela, kacwalo lilimi le li nyinyani li kona ku yakisa muzamao wa bupilo mulilo. Mutu u kona ku tapisa libatana za mwa naheñi, linyunywani, ni ze zamaya ka mba, ni ze pila mwa liwate, “kono lilimi, ha ku na mutu ya kona ku li tapisa,” ko na mwa na bulelezi Jakobo. Niteñi, seo ha si fi mutu nzila ya ku s’a nga muhato wa ku kaula lusebo lo lu holofaza.
7 Jakobo n’a bulezi hape kuli lilimi li fa mbuyoti ni sikuto ku zwelela mwa mulomo o swana. Yeo haki nto ye lukile, kakuli siliba hasi koni ku welaukisa mezi a’ munati hamohocwalo ni a baba. Kota ya feiga ha i koni ku tahisa olive, mi mezi a lizwai h’a koni ku tahisa mezi a’ munati. Ka mo ku inezi fela, bakeñisa kuli Bakreste ha ba si ka petahala, lilimi ha li na ku ba le li tapisizwe ka nzila ye petehile. Seo si swanela ku lu ezisa ku ba ni mukekecima kwa lifosi ze bakile, niteñi hasi lumelezi lusebo lo lu holofaza. Ka ku toma kwa neku la luna, ku itusiswa maswe kwa lilimi ko ku holofaza ko ku cwalo ha ku na ku zwelapili ku ezahala haiba kaniti luli lu kuteka Mulimu ni Linzwi la hae.
Ka m’o Tapelo i Kona ku Tuseza
8. Tapelo i kona ku lu tusa cwañi mwa ku kaula lusebo lo lu holofaza?
8 Muliko wa ku teeleza kwa lusebo lo lu holofaza mi cwale ni ku lu hasanya u kona ku ba o tiile hahulu. Kacwalo haiba se mu wezi mwa muliko o cwalo kwamulaho, kana ha mu swaneli ku kupa swalelo ni tuso ya Mulimu? Jesu n’a lu lutile ku lapela kuli: “U si ke wa lu kenya mwa muliko, kono u lu lamulele ku ya maswe.” (Mateu 6:13) Bakreste ba ba lapela kuli Mulimu a si ke a ba tuhelela mwa ku likiwa ko ku cwalo mwa ngambolo ye maswe ha ba na ku wela ku lona lilaba le la Satani; ba ka lukululwa ku musawani yo mutuna.
9. Haiba lu ba mwa muliko wa ku sawana mutu ufi kamba ufi, ne lu kana lwa lapela cwañi?
9 Haiba lu ba mwa muliko wa ku sawana mutu ufi kamba ufi, ne lu kana lwa lapela kuli: “[Jehova, NW], u beye mulibeleli fa mulomo wa ka; U libelele fa munyako wa milomo ya ka.” (Lisamu 141:3) Ne lu kana lwa sinya litibelelo za luna za bupilo bwa kamita ka ku komiwa ki muliko ni ku likanyisa Diabulosi sina musawani ya situhu, lihata, y’a li mubulai. (Joani 8:44) Muapositola Joani n’a ñozi kuli: “Mutu ni mutu ya toile mwanahabo ki mubulai; mi mwa ziba kuli ha ku na mubulai y’o bupilo bo bu sa feli bu inzi ku yena.”—1 Joani 3:15.
Lilato li Lundula Lusebo
10. Mwa sibaka sa ku seba ba bañwi, ki sifi se lu ba kolotezi?
10 Kaufel’a luna lu na ni se siñwi se lu kolotezi ba bañwi, kono ha lu si ka kolotela ba bañwi sitoyo se si tahisa lusebo lo lu holofaza. “Mu si ke mwa ba ni sikoloti ku mutu, konji ku latana,” ko na mwa n’a ñolezi Paulusi. (Maroma 13:8) Lu swanela ku lifa sona sikoloti seo ka zazi ni zazi mwa sibaka sa ku bulela ka ku lwanisa ba bañwi ni ku sinya mayemo a bona. Haiba lu bulela kuli lu lata Jehova, ha lu koni ku sawana mulapeli sina luna, kakuli “ya toile mwanahabo ye a bona, h’a koni ku lata Mulimu ye a sa boni.”—1 Joani 4:20.
11. Swanisezo ya Jesu ya lingu ni lipuli ne i kana ya lu fa taba ya ku nahana teñi ka za lusebo lo lu holofaza kamukwaufi?
11 A mu nahane ka za nguli ya Jesu ya lingu ni lipuli. Ba ba swana sina lipuli ne ba taluselizwe kuli se ne ba ezize kwa banyani ba Kreste ne si balwa kuli ne si ezizwe ku yena. Kana ne mu ka sawana Kreste? Haiba ne mu si ke mwa bulela ka ku lwanisa Mulena ni Mubusi wa mina, mu si ke mwa nga banyani ba hae ba ba tozizwe ka nzila ye cwalo. Mu si ke mwa eza mafosisa sina mo ne li ezelize lipuli, ze “ka ya mwa [ku timezwa, NW] ko ku sa feli.” Haiba mwa lata banyani ba Jesu, mu bonise seo ka ze mu bulela kwa neku la bona.—Mateu 25:31-46.
12. Ki sifi sisupo sa Liproverbia 16:2, mi si swanela ku ama cwañi mihupulo, likezo, ni lipulelo za luna?
12 Bakeñisa kuli kaufel’a luna lu baezalibi mi lu tokwa sitabelo sa tiululo sa Jesu, haiba mutu yo muñwi u bata ku fa maikuto a’ si a mande kwa neku la luna, u ka fumana ze ñata za ku bulela teñi. (1 Joani 2:1, 2) Ka mo ku inezi fela, ne lu kana lwa hupula kuli lu eza hande hahulu. “Mikwa kaufela ya mutu i kenile mwa meto a hae; Kono [Jehova, NW] ki Yena ya likanyisa lipilu fa sikala.” Sikala sa Mulimu hasi wisiwi ki sobozi kamba ka ku keta batu. (Liproverbia 16:2; Likezo 10:34, 35) U beya moya wa luna fa sikala, ku lemuha maikuto ni milelo ye lu susueza ku nahana, ku nga muhato, ni ku bulela. Kaniti luli, kcwalohe, ne lu si ke lwa bata kuli Mulimu a fumane kuli ka mafosisa ne lu hupula kuli lu kenile ni kuli ba bañwi bona ba ipumbile mwa maluli ni kuli ba swanelwa ki lipulelo ze holofaza. Ka ku swana ni Jehova, lu lukela ku sa ba ni sobozi, lu be ni mukekecima, ni lilato.
13. (a) Sisupo sa kuli “lilato li na ni pilu-telele, li na ni musa” si ka lu tusa kamukwaufi mwa ku kaula lusebo lo lu holofaza? (b) Ki sifi se si ka lu konisa ku pima ku bulela ka ku lwanisa mutu ya amuhela tohonolo ya sebelezo ye lu si na yona?
13 Ku sebelisa seo Paulusi n’a si bulezi kwa 1 Makorinte 13:4-8 si kona ku lu tusa ku kaula lusebo lo lu holofaza. N’a ñozi kuli: “Lilato li na ni pilu-telele, li na ni musa.” Kaizeli y’a mwa nyandiso ya mwa lubasi lo lu aluhani n’a kana a lu lumelisa ka ku tokwa tabo. Kamba mutu yo muñwi n’a kana a ba y’a bunya kwa mubili, mwendi bakeñisa ku sa iketa hande mwa mubili. Kana lilato ha li swaneli ku lu ezisa kuli lu be ni pilu-telele ni musa kwa neku la batu ka buñwi ba ba cwalo mwa sibaka sa ku ba seba ko ku maswe? ‘Lilato ha li na pilu seta, ha li ikankabeki, ha li ikuhumusi.’ Kacwalo, haiba Mukreste yo muñwi a amuhela tohonolo ya sebelezo ye lu si na yona, lilato li ka lu konisa ku pima ku bulela ka ku mu lwanisa ni ku akaleza kuli h’a swaneli fa musebezi o cwalo. Lilato hape li ka lu konisa ku pima ku itumbaeta ka za buikoneli bwa luna, lipulelo ze kona ku bilaeza bao ba ba si na matohonolo a cwalo.
14. Ki sifi hape se si li teñi ka za lilato se si ka ama seo lu si bulela ka za ba bañwi?
14 Paulusi hape n’a bulezi kuli ‘lilato ha li ezi ze swabisa, ha li yemi fa litukelo za lona, ha li konwi ku halifiswa, ha li kakanyi bumaswe.’ Mwa sibaka sa ku bulela lika ze swabisa ze si za sikreste, lu swanela ku tuhelela lilato kuli li lu konise ku bulela ze nde ka za ba bañwi ni ku fa mamelelo kwa licisehelo za bona. Li lu konisa ku sa fita fa ku halifa ni ku bulela ka ku lwanisa batu ku zwelela fa lifoso ka sibili kamba lika zeo lu nahana fela kuli ba lu foselize. Bakeñisa kuli ‘lilato ha li tabeli ze si ka luka kono li tabela ze na ni niti,’ li lu konisa ku pima ku ikenya mwa lusebo lo lu holofaza nihaiba ka za balwanisi ba ba ipumana mwa bumai.
15. (a) Lu swanela ku amiwa kamukwaufi ki sisupo sa kuli ‘lilato li na ni tumelo ni sepo mwa linto kaufela’? (b) Ki likalulo lifi za lilato ze kona ku lu tusa ku kumalela kwa kopano ya Jehova niha neikaba kuli ba bañwi ba bulela ka ku i lwanisa?
15 Lilato ‘li na ni tumelo ni sepo mwa linto kaufela’ ze fumanwa mwa Linzwi la Mulimu mi li lu susueza ku itebuha sico sa kwa moya se si fiwa ka sitopa sa ‘mutanga ya sepahala,’ mwa sibaka sa ku teeleza kwa litaba za busawana za bakwenuheli. (Mateu 24:45-47; 1 Joani 2:18-21) Bakeñisa kuli ‘lilato li itiisa mwa linto kaufela mi ha li na ku fela ni kamuta,’ li lu tusa hape mwa ku siyala inze lu sepahala kwa kopano ya Mulimu niha neikaba kuli “balumeli ba buhata” kamba ba bañwi ne ba ka bulela ka ku i lwanisa kamba ku lwanisa lilama za yona.—Magalata 2:4.
Likute li Tibela Lusebo
16. Paulusi n’a ngilwe cwañi ki balumeli ba buhata mwa Korinte?
16 Likute kwa neku la balumeli sina luna hape li lu tusa ku kaula lusebo lo lu holofaza. Bakeñisa kuli b’a amuheleha ku Mulimu, kaniti luli ha lu swaneli ku bulela lika ze maswe ka za bona. Ni kamuta lu si ke lwa ba sina “balumeli ba buhata” bao Paulusi n’a katani ni bona. Ku si na ku kakanya, ne ba bulezi lika ze maswe kwa neku la hae. (2 Makorinte 11:26) Bakwenuheli ni bona hape ne ba bulezi lika ze maswe kwa neku la hae. (Mu bapanye Juda 3, 4.) Mwa Korinte batu ba bañwi ne ba bulezi kuli: “Mañolo a hae a na ni buima ni mata; kono yena h’a li teñi ka mubili, ki mutu ya fokozi, mi ku bulela kwa hae ki nto ye nyazahala.” (2 Makorinte 10:10) Batu ha ba ezi lipulelo ze cwalo ku bao ba lata.
17. Ki manzwi a mufuta mañi a n’a bulela Diotrefi ka za muapositola Joani?
17 A mu nahane ka za muapositola Joani, ili y’o n’a bulezwi maswe ki Diotrefi. “Ni ñolezi [puteho, NW],” ko na mwa na bulelezi Joani, “kono Diotrefi ya lata ku ipeya kwapili h’a lu amuheli. Cwale, ha ni taha, ni ka mi hupulisa misebezi ya hae, y’a eza h’a lu sebanga ka manzwi a’ na ni lunya.” (3 Joani 9, 10) Ku seba ko ku cwalo ne li nto ye tuna luli, mi haiba lu teeleza kamba ku hasanya taba ye swana ya mufuta o cwalo kacenu, lu swanela ku tuhela ku eza nto yeo ka bubebe.
18. Demetriusi n’a fapahana cwañi ni Diotrefi, mi yona fapahano yeo ne i kana ya ama cwañi muzamao wa luna?
18 Ka ku susueza likute kwa batu ba ba lukile, Joani n’a taluselize Gayusi kuli: “U si ke wa likanyisa bumaswe, kono bunde. Ya eza hande ki wa Mulimu, mi ya eza maswe h’a si ka bona Mulimu. Demetriusi u pakwa hande ki batu kaufela, mi ki yona niti. Ni luna lwa mu paka, mi wa ziba kuli bupaki bwa luna ki bwa niti.” (3 Joani 1, 11, 12) Yo muñwi ni yo muñwi wa ku luna n’a kana a ipuza ili yena kuli: Kana na ni Diotrefi ya li musebi, kamba kana ni Demetriusi ya sepahala? Haiba lu kuteka balumeli sina luna, ha lu na ku fa maikuto a maswe ka za bona, ni ku fa ba bañwi mubonelo wa ku lu nga sina basebi.
19. Mizwale ba buhata ne ba batile ku sinya libizo la C. T. Russell kamukwaufi?
19 Mizwale ba buhata ne ba si ka fumaneha fela mwa lilimo za mwanda wa pili. Mwahal’a bo ma 1890, batu ka buñwi ba ba si na mulao ni o mukana ba ne ba swalisana ni kopano ya Mulimu ne ba likile ku nga tamaiso ya Watch Tower Sosaiti. Ba fita fa ku ba ni mulelo wa ku lwanisa Charles Taze Russell, ili kuli ba mu zwise fa buikalabelo bwa ku ba prezidenti wa pili wa Sosaiti. Hamulaho wa ku shasheka ona mulelo wo ka lilimo ze bat’o ba ze peli, wa fita fa ku tumbuka ka 1894. Litamilikezo za buhata ne li tomile sihulu fa maikuto a’ twi kuti Russell n’a sa sepahali mwa musebezi. Litamilikezo ze ñwi za bulyangu za fita fa ku beya mulelo wa batamilikezi fa ngandaleza—wa ku sinya libizo la C. T. Russell. Bakreste ba ne ba si na sobozi ba tatubisa taba mi ba mu fumana kuli u mwa mayemo a nepahezi. Ka yona nzila ye, ona mulelo wo wa ku “zungiseza mwa mbyumbyulu Mutompehi Russell ni musebezi wa hae” wa fita fa ku ba mapalelwi a matuna. Kacwalo, ka ku swana sina Paulusi, Muzwale Russell n’a lwanisizwe ki mizwale ba buhata, kono yona tiko yeo ne i lemuhilwe kuli ne li mulelo wa Satani. Baabani ba mwa mulelo o cwalo hamulaho ne ba fumanwi kuli ne ba sa swaneli ku ikola silikani sa Sikreste.
Misebezi ye Minde i Paleliswa Lusebo lo li Holofaza
20. Ki bufokoli mañi bwa n’a fumani Paulusi kwa likalibe ba ne ba li limbelwa?
20 Paulusi n’a ziba kuli lusebo lo lu holofaza hañata lu zamaelela ni ku tokwa sa ku eza, ku tokwa misebezi ye minde ye miñata. Na si ka tabiswa ki libaka la kuli likalibe ba bañwi ba ne ba li limbelwa ne ba itutile ku ba ba ba “si na sa ku eza inze ba pota-pota mwa mandu, isiñi fela ba ba si na sa ku eza kono hape ki basebi ni ba ba ikenya mwa litaba za ba bañwi, ku bulela ze ne ba sa swaneli ku bulela.” Ki sifi se ne si li mulyani? Musebezi o munde. Kacwalo, Paulusi n’a ñozi kuli: “Ni tabela kuli likalibe ba nyalwe, ba pepe bana, ku buluka ndu, ni ku sa fa sila munyako ufi kamba ufi wa ku bulela maswe.”—1 Timotea 5:11-14, Byington.
21. 1 Makorinte 15:58 i ama cwañi ku pima malaba a lusebo lo lu holofaza?
21 Haiba basali ba babalela lubasi, ku luta bana ka ku ya ka lipimo za Mulimu, ni ku abana mwa lindongwamo ze ñwi ze nde, ba ka ba ni nako ye nyinyani hahulu ya ku abana mwa ngambolo ya fela-fela ili ye kona ku isa kwa lusebo lo lu holofaza. Banna ni bona hape ba ka ba ni nako ye nyinyani hahulu ya litaba ze cwalo haiba ba patehile mwa misebezi ye minde. Ku “tiisa kamita musebezi wa Mulena” ku ka lu tusa kaufel’a luna mwa ku pima malaba a lusebo lo lu holofaza. (1 Makorinte 15:58) Sihulu ku abana ka pilu kaufela mwa bukombwa bwa Sikreste, mikopano ya mwa puteho, ni lindongwamo ze ñwi za bumulimu li ka buluka m’ata a luna a munahano fa litaba za kwa moya ili kuli lu si ke lwa fita fa ku ba basebi ba ba si na sa ku eza ni ba ba ikenya mwa litaba za ba bañwi.
22. Liproverbia 6:16-19 i talusañi ka za mubonelo wa Mulimu kwa neku la basawani?
22 Haiba lu pateha mwa misebezi ya bumulimu ni ku bata ku fuy’ola ba bañwi kwa moya, lu ka ba balikani ba ba sepahala, isiñi babihi ba makande ba ba sa sepahali. (Liproverbia 17:17) Mi haiba lu pima lusebo lo lu holofaza, lu ka ba ni Mulikani yo munde ka ku fitisisa—Jehova Mulimu. Ha lu hupuleñi kuli lika ze supile ze nyenyisa ku yena ki “meto a’ talima ka buikuhumuso; ki lilimi le li puma; Ki mazoho a’ sulula mali a’ si na mulatu; Ki pilu ye lela milelo ye maswe; Ki mautu a lubilo a’ matela kwa ku y’o sinya; Ki paki ya buhata, ye bulela lishano, Ni mutu ya tisa lifapahano kwa batu ba ndu i li ñwi.” (Liproverbia 6:16-19) Batu ba lusebo ba shangela ni ku kopamisa lika, mi basawani ba na ni lilimi le li buhata. Manzwi a bona a tahisa kuli mautu a bao ba ba tabela ku shimba litaba a landamane. Ibata iba mwa miinelo kaufela, lifapahano ki zona ze zwa mwateni. Kono haiba lu toya seo Mulimu a toile, lu ka pima lusebo lo lu holofaza lo lu kona ku tisa kolofalo ku ba ba lukile ni ku tisa lumenyo ku musawani yo mutuna, Satani Diabulosi.
23. Ka ku ama kwa lipulelo za luna, lu kona ku tabisa cwañi pilu ya Jehova?
23 Kacwalohe, ha lu tabiseñi pilu ya Jehova. (Liproverbia 27:11) Ha lu pimeñi lipulelo za toile, ku hana ku teeleza ku lisawana, ni ku eza ka mo lu konela kaufela mwa ku kaula lusebo lo lu holofaza. Kaniti luli, lwa kona ku eza cwalo ka tuso ya Mulimu wa luna ya kenile, Jehova.
[Litaluso za kwatasi]
a Nihaiba kacenu ha ku lumelezwi kuli mu teeleze ni ku hasanya mabulatwi a tabisa ka ku fitelela tikanyo (hañata h’a si ka toma fa litaba za niti) ka za seo lilama za Sitopa se si Busa kamba bayemeli ba bona ba akalezwa kuli ne ba si bulezi kamba ku si eza.
Ne Mu Ka Alaba Cwañi?
◻ Tapelo i kona ku lu tusa cwañi mwa ku pima ku sawana ba bañwi?
◻ Ku sebelisa 1 Makorinte 13:4-8 ku kona ku lu tusa cwañi mwa ku kaula lusebo lo lu holofaza?
◻ Likute la ka butu li kona ku lu tusa cwañi mwa ku tibela muliko wa ku seba balumeli sina luna?
◻ 1 Makorinte 15:58 i ama cwañi ku pima malaba a lusebo lo lu holofaza?
[Manzwi a bañi ba siswaniso fa likepe 17]
U.S. Forest Service photo