Buiswalo bwa Mina Bu Be Teñi mi Ili ka Buñata

“Kwa tumelo ya mina mu ekeze . . . buiswalo.—2 PITROSI 1:5, 6.

1. Ki mwa muinelo ufi o si wa kamita m’o Mukreste n’a kana a fa bupaki?

JESU n’a bulezi kuli: “Mu ka isiwa kwa babusisi ni kwa malena, kabakala ka, kuli ibe bupaki ku bona ni kwa macaba.” (Mateu 10:18) Haiba ne mu ka bizezwa ku mubusisi, muatuli, kamba ku prezidenti, ne mu ka y’o bulela ka za nto mañi? Mwendi pili ka za libaka ha mu fumanehile teñi k’o, ili litaba ze mu tamilwe ka zona. Moya wa Mulimu ne u ka mi tusa ku eza cwalo. (Luka 12:11, 12) Kono kana mwa kona ku nahana ku bulela ka za buiswalo? Kana m’u nga seo ku ba kalulo ye butokwa ya lushango lwa luna lwa Sikreste?

2, 3. (a) Ne ku ezahalile cwañi kuli Paulusi n’a kona ku fa bupaki ku Felikisi ni Drusila? (b) Ki kabakalañi buiswalo ha bu li taba ye ne i swanela ya kuli Paulusi a bulele ka za bona mwa muinelo w’ani?

² M’u nge mutala wa se ne si kile sa ezahala luli. Yo muñwi wa Lipaki za Jehova n’a tamilwe ni ku zekiswa. Ha n’a filwe sibaka sa ku bulela, n’a bata ku talusa litumelo za hae ka ku ba Mukreste, ka ku ba paki. Mwa kona ku tatuba se si ñozwi sa taba yeo mi mu ka fumana kuli n’a file bupaki bo bu utwahala hande “ka za ku luka, ni buiswalo, ni Katulo ye sa taha.” Lu ama ku sa n’a ipumani ku sona muapositola Paulusi h’a nza li mwa Sesarea. Ne ku bile ni ku zekisiwa kwa makalelo. “Ha ku se ku fitile mazazi a mañwi, Felikisi a taha ni Drusila, mufumahali wa hae, wa Mujuda; a biza Paulusi mi a mu utwa h’a talusa za ku lumela ku Kreste.” (Likezo 24:24) Taba ya kwamulaho i bonisa kuli Felikisi “n’a eza mufuta kamukana wa situhu ni takazo, a sebelisa m’ata a mulena ka tulemeno kamukana twa mutanga.” N’a s’a bile mwa linyalo ni basali ba babeli ha n’a shongile Drusila kuli a lelekane ni munn’a hae (ili ku loba mulao wa Mulimu) ni ku ba musal’a hae wa bulalu. Mwendi ne li Drusila ya na bata ku utwa ka za bulapeli bo bunca b’o, Bukreste.

³ Paulusi n’a zwezipili ku bulela “ka za ku luka, ni buiswalo, ni Katulo ye sa taha.” (Likezo 24:25) Seo ne si ka be si bonisize shutano ye mwahal’a lipimo za Mulimu za ku luka ni situhu ni ku tokwa katulo ye nde k’o Felikisi ni Drusila ne ba li kalulo ya kona. Mwendi Paulusi n’a bile ni sepo ya ku susueza Felikisi kuli a bonise katulo ye lukile mwa taba yeo. Kono ki kabakalañi ha n’a bulezi ka za “buiswalo, ni Katulo ye sa taha”? Bona ba babeli bao ba ba na ni muzamao o maswe ne ba buza ka za seo “ku lumela ku Kreste” ku ama. Kacwalo ne ba tokwa ku ziba kuli ku mu latelela ku tokwa ku iswala mwa mihupulo, lipulelo, ni likezo, ili seo buiswalo bu talusa. Batu kaufela ba na ni ku ikalabela ku Mulimu kwa neku la minahano, manzwi, ni likezo za bona. Kacwalo, ku Paulusi katulo yeo mubusisi ni musal’a hae ne ba talimani ni yona fapil’a Mulimu ne li nto ye butokwa hahulu ku fita katulo ifi kamba ifi ye zwelela ku Felikisi. (Likezo 17:30, 31; Maroma 14:10-12) Ka ku utwahala luli, ha s’a utwile lushango lwa Paulusi, “Felikisi a swalwa ki ku saba.”

Ki Bwa Butokwa Kono Haki Ko Ku Bunolo

4. Ki kabakalañi buiswalo ha bu li kalulo ye butokwa ya Bukreste bwa niti?

⁴ Muapositola Paulusi n’a lemuhile kuli buiswalo ki kalulo ye butokwa hahulu ya Bukreste. Muapositola Pitrosi, yo muñwi wa balikani ba batuna ba Jesu, n’a kutezi ku tiisa taba yeo. Ha n’a ñolela bao ba ne ba libelela kuli ba “fumane kabelo ku s’a li sona Mulimu” mwa lihalimu, Pitrosi n’a susuelize ku bonisa tulemeno to tuñwi to tu swanela, to tu cwale ka tumelo, lilato, ni buiswalo. Kacwalo, buiswalo ne bu amilwe mwa sepiso ye tiile ye: “Zeo ha li li teñi ku mina, mi ili ka buñata, li ka mi tokwisa buzwa ni ku palelwa, mwa ku beya miselo mwa zibo ya Mulen’a luna Jesu Kreste.”—2 Pitrosi 1:1, 4-8.

5. Ki kabakalañi ha lu swanela ku ba ni mamelelo hahulu sihulu ka za buiswalo?

⁵ Nihakulicwalo, mwa ziba kuli ki ko ku bunolo ku bulela kuli lu swanela ku bonisa buiswalo ku fita mo ku inezi luli ku bu sebelisa mwa bupilo bwa luna bwa ka zazi ni zazi. Libaka le liñwi ki la kuli buiswalo haki kalemeno ka ka atile. Kwa 2 Timotea 3:1-5 Paulusi u talusa mibonelo ye neikaba teñi mwa linako za luna, mwa “mazazi a maungulelo.” Tengamo ye ñwi ye ne i ka bonisa linako za luna ki ya kuli ba bañata ne ba ka ba “ba ba sa koni ku iswala.” Lu bona buniti bwa seo mwa miinelo kaufela ye lu potolohile, nji cwañi?

6. Ku s’a ba ni buiswalo ku boniswa cwañi kacenu?

⁶ Batu ba bañata ba lumela kuli ka mutomo ki ko ku tusa buikangulo “ku eza lika mutakafululele” kamba “ku bopa.” Mibonelo ya bona i tiiswa ki ba ba zibahala hahulu ba b’a ngiwa ki nyangela kuli ba swanelwa ku likanyiswa ili bao ba bonahala ku kasheza kwatuko mufuta ufi kamba ufi wa buiswalo, mi ka bunolo fela ba eza za litakazo za bona. Ka ku fa swanisezo: Ba bañata ba ba lata lipapali za buc’aziba ba fitile fa ku twaela ku boniswa kwa maikuto kwa ka bunyemi bo butuna, mane ni mabifi a’ mifilifili. Kana ha mu koni ku hupula, nihaiba ku zwelela fela ku ze hasanya litaba, linako ze ñwi ku zeo lindwa ze situhu kamba siyongili sa mifilifili si bile teñi kwa papali ye ñwi? Nihakulicwalo, sisupo sa luna hasi tokwi kuli lu neele nako ye ñata kwa ku lundulula mitala ya ku s’a ba ni buiswalo. Ne mu ka kolokisa likalulo ze ñata mo lu tokwa ku bonisa buiswalo—mwa ku ca ni ku nwa kwa luna, mwa muzamao wa luna ni ba silama si sili, ni nako ni mali ze lu itusisa ku za ku itabisa. Kono mwa sibaka sa ku bala ka bubebe ze ñata za zeo, ha lu tatubeñi kalulo i liñwi ye mutomo yeo lu lukela ku bonisa buiswalo ku yona.

Buiswalo kwa Neku la Maikuto a Luna

7. Ki kalulo mañi ya buiswalo ye swanelwa ku fiwa mamelelo ye ipitezi?

⁷ Buñata bwa luna lu fitile fa ku kondisa lika ka mukwa o utwahala mwa ku zamaisa kamba ku tibela likezo za luna. Ha lu uzw’angi, ku ituhelela kwa muzamao o maswe, kamba ku bulaya batu; lwa ziba seo mulao wa Mulimu u li sona ka za lifoso ze cwalo. Nihakulicwalo, lu kondisa cwañi lika mwa ku zamaisa maikuto a luna? Nako ha i nze i ya, bao ba ba palelwa ku tahisa buiswalo bwa mwa maikuto hañata ba latehelwa ki buiswalo ka ku ama kwa likezo za bona. Kacwalo ha lu tomeñi mamelelo fa maikuto a luna.

8. Ki sifi seo Jehova a libelela ku luna ka ku ama kwa maikuto a luna?

⁸ Jehova Mulimu ha lu libeleli ku ba inge lipangaliko fela, kuli lu si ke lwa ba ni maikuto kamba ku a bonisa. Kwa libita la Lazaro, Jesu “a tabeha mwa pilu mi a sisimuha.” Mi hamulaho “Jesu a lila.” (Joani 11:32-38) N’a bonisize maikuto a’ fapahana ku ao muta, ka ku ba ni ku zamaisa likezo za hae ko ku petehile, n’a lelekile bacinci ba mali mwa tempele. (Mateu 21:12, 13; Joani 2:14-17) Balutiwa ba hae ba ba sepahala ni bona ne ba bonisize maikuto a’ tungile. (Luka 10:17; 24:41; Joani 16:20-22; Likezo 11:23; 12:12-14; 20:36-38; 3 Joani 4) Niteñi, ne ba lemuhile tokwahalo ya buiswalo ilikuli maikuto a bona a si ke a isa kwa sibi. Maefese 4:26 i bonisa hande-nde seo kuli: “Niha mu ka halifa mu si ke mwa eza sibi; mu si ke mwa likelelwa ki lizazi mu nze mu halifile.”

9. Ki kabakalañi ku zamaisa maikuto a luna ha ku li kwa butokwa cwalo?

⁹ Ku na ni but’ata bwa kuli Mukreste n’a kana a bonahala ku bonisa buiswalo hailif’o, ka mo ku inezi fela, maikuto a hae n’a ka fita fa ku tula tikanyo. Mu hupule se ne si zwile mwateñi muta Mulimu n’a lumezi sitabelo sa Abele: “Kaine a halifa hahulu, mi pata ya hae ya fetuha ye swabile. [Jehova, NW] a li ku Kaine: Kiñi s’o halifile? mi s’o sosobani pata kiñi? Ha u eza hande, kana u si ke wa lumelelwa? Kanti ha u sa ezi hande, sibi si ku lalezi fa munyako, mi litakazo za sona li libile ku wena.” (Genese 4:5-7) Kaine n’a palezwi ku zamaisa maikuto a hae, ili nto ye ne i mu isize kwa ku bulaya Abele. Ku s’a zamaisa maikuto ne ku isize kwa kezo ya mutakafululele.

10. Ki sifi se mu ituta ku zwelela kwa mutala wa Hamani?

¹⁰ Mu nyakisise, hape, mutala o muñwi wa mwa mazazi a Morodekai ni Estere. Likwambuyu ya n’a bizwa Hamani n’a nyemiswa hahulu ki taba ya kuli Morodekai na s’a mu kubameli. Hamulaho Hamani ka mafosisa n’a nahanile kuli n’a ka shemubiwa. “Ka lizazi lona leo, Hamani a zwa a tabile, pilu ya hae inz’e iketile; kono Hamani h’a bona Morodekai a li fa munyako wa mulena, a sa yemi, a sa mu suteli nzila, a halifela Morodekai. Kono Hamani a iswala; mi [a] fita kwa ndu ya hae.” (Estere 5:9, 10) Niteñi n’a akufile ku ba ni maikuto a tabo. Kono hape n’a akufile ku ikutwa buhali kabakala ku bona fela mutu y’o a bulukezi lutimbo. Kana mu nahana kuli Bibele ha i bulela kuli Hamani “a iswala” ne ku talusa kuli n’a li ya fa mutala o munde mwa buiswalo? Ku tokwa. Ka nakonyana fela, Hamani n’a zamaisize likezo za hae ni ku bonahaza muinelo ufi kamba ufi wa maikuto a hae, kono n’a palezwi ku zamaisa buhali bwa hae bo bu na ni muna. Maikuto a hae n’a mu isize kwa ku lela ku bulaya.

11. Mwa puteho ya kwa Filipi, ki but’ata bufi bo ne bu bile teñi mi ki nto mañi ye neikana i bu tahisize?

¹¹ Ka ku swana, ku s’a zamaisa maikuto kacenu ku kona ku holofaza hahulu Bakreste. Ba bañwi ne ba kana ba ikutwa kuli ‘Ehe, but’ata b’o ne bu si ke bwa ba teñi mwa puteho.’ Kono se bu bile teñi. Bakreste ba babeli ba ba tozizwe mwa Filipi ne ba na ni fapahano ye tuna, ili yeo Bibele i s’a talusi. M’u nge kuli mwendi se ne si ezahalile ki se: Evodia n’a memile mizwale ni likaizeli ba bañwi kwa ku ba ni sico kamba ku kopana hamoho ko kuñwi kwa ku itabisa. Sintike n’a si ka memiwa, mi n’a ikutwile ku swaba hahulu. Mwendi n’a ngile muhato ka ku s’a mema Evodia ka nako ye ñwi. Mi cwale bubeli bwa bona ba kalisa ku batisisa bufokoli bwa yo muñwi ku yo muñwi; nako ha inze i ya, ba tuhela ku bulelisana. Mwa muinelo o cwalo, kana but’ata bo bu mutomo ne bu ka ba ku s’a memiwa kwa sico? Ku tokwa. Yeo neikaba fela nto ye swana ni ku tumbuka kwa kalilonyana. Likaizeli ba babeli ba ba tozizwe bao ha ne ba palezwi ku zamaisa maikuto a bona, kalilonyana kao ka fita fa ku ba mulilo wa mwa mushitu. But’ata b’o bwa zwelapili mi bwa hula ku fitela muapositola ha n’a ngile muhato ka za taba yeo.—Mafilipi 4:2, 3.

Maikuto a Mina ni Mizwale ba Mina

12. Ki kabakalañi Mulimu h’a lu fa kelezo ye fumaneha kwa Muekelesia 7:9?

¹² Ka buniti fela, haki ko ku bunolo ku mutu ku zamaisa maikuto a hae haiba a ikutwa ku nyazisezwa, ku holofazwa mwa maikuto, kamba ku ketululwa. Jehova wa ziba seo, kakuli u boni liswalisano za batu ku zwa kwa makalelo a mutu. Mulimu u lu eleza kuli: “U si ke wa halifa kapili, kakuli buhali bu ina mwa lipilu za matanya.” (Muekelesia 7:9) Mu lemuhe kuli Mulimu u fa mamelelo pili kwa maikuto mi isiñi kwa likezo. (Liproverbia 14:17; 16:32; Jakobo 1:19) Mu ipuze kuli, ‘Kana ni swanela ku fa mamelelo ye tuna ni ku fita kwa ku zamaisa maikuto a ka?’

13, 14. (a) Mwa lifasi, ki lika mañi hañata ze ezahala ku zwelela fa ku palelwa ku zamaisa maikuto? (b) Ki lika mañi ze ne li kana za isa Bakreste kwa ku buluka lutimbo?

¹³ Batu ba bañata mwa lifasi ba ba palelwa ku zamaisa maikuto a bona ba kalis’anga litela ze tuna—ili lifapahano ze maswe hahulu, mi mane ni ze na ni mifilifili ye tiswa ki bufosi bwa luli kamba bwa ku ikupulela fela bo bu ezizwe ku bona kamba ku wahabo bona yo muñwi. Muta maikuto a s’a zamaiswi, a kona ku ba ni kukuezo ya ona ye holofaza ka nako ye telele. (Mu bapanye Genese 34:1-7, 25-27; 49:5-7; 2 Samuele 2:17-23; 3:23-30; Liproverbia 26:24-26.) Ka buniti fela Bakreste, ku si na taba ni simuluho ya bona ya mushobo kamba sizo, ba swanela ku bona lifapahanotuna zeo ni lutimbo sina lika ze fosahezi, ze maswe, ze na ni ku tokolomohiwa. (Livitike 19:17) Kana m’u nga ku pima lutimbo sina kalulo ya buiswalo bwa mina mwa maikuto?

¹⁴ Sina mo ne ku inezi fela ku Evodia ni Sintike, ku palelwa ku zamaisa maikuto ne ku ka isa kwa but’ata cwale. Kaizeli n’a kana a ikutwa ku nyazisezwa ka ku s’a memiwa kwa mukiti wa linyalo. Kamba mwendi neikaba mwan’a hae kamba mwanahabo ya n’a si ka memiwa. Kamba mwendi muzwale n’a lekile motikala ye se i sebelize kale ku Mukreste sina yena, mi ku si ka fita nako ye telele ya shwa. Ku si na taba kuli libaka ki lifi, seo ne si tisize ku ikutwa ku fosezwa, maikuto ne a si ka zamaiswa, mi ba ne ba amilwe ne ba fitile fa ku ba ni nongosi. Cwale kwa ezahala nto mañi?

15. (a) Ki ze swabisa lifi ze zwile mwa lutimbo lwa mwahal’a Bakreste? (b) Ki kelezo mañi ya mwa Bibele ye ama tengamo ya ku ba ni lutimbo?

¹⁵ Haiba mutu ya na ni nongosi h’a sebelezi fa ku zamaisa maikuto a hae ni ku ba mwa kozo ni muzwale wa hae, lutimbo ne lu ka taha. Se ku bile ni likezahalo ze ñwi m’o Paki a kupile ku s’a isiwa kwa sibaka se siñwi sa Tuto ya Buka ya Puteho bakeñisa kuli n’a s’a “lati” Mukreste yo muñwi kamba lubasi lo luñwi lo lu fumaneha k’o. Seo ki se si swabisa cwañi! Bibele i bulela kuli neikaba bufokoli bo butuna hahulu Bakreste ha ne ba ka isana kwa likuta za silifasi, kono kana ne bu si ke bwa ba bufokoli bo butuna ka mukwa o swana ha ne lu ka tokolomoha muzwale kabakala fosonyana ya mwa linako za kwamulaho ya n’a foselize luna kamba bahabo luna ba bañwi? Kana maikuto a luna a bonisa kuli l’u nga swalisano ya sipepo ku ba ya butokwa ku fita ku ba mwa kozo ni mizwale kamba likaizeli ba luna? Kana lu bulela kuli ne lu ka tabela ku shwela kaizel’a luna, kono maikuto a luna a lu susumeza hahulu kuli mane cwale ha lu s’a bulel’anga ni yena? (Mu bapanye Joani 15:13.) Mulimu u lu bulelela ka ku nonga fa taba kuli: “Mu si ke mwa kutisa bumaswe ka bumaswe; . . . Ha ku konahala, mi haili ka mina, mu pilisane mwa kozo ni batu kaufela. Balatiwa, mu si ke mwa kutisa bumaswe ili mina, kono mu fe buhali sibaka.”—Maroma 12:17-19; 1 Makorinte 6:7.

16. Abrahama n’a file mutala ufi o munde ka za ku sebelisana ni maikuto?

¹⁶ Muhato kwa ku fumana sinca tamaiso ya maikuto a luna ikaba wa ku tahisa kozo kamba ku tatulula muinelo o tisa lipilaelo, mwa sibaka sa ku tuhelela sitoyo si zwelapili. Mu hupule muta naha ne i sa koni ku buluka hande limunanu ze ñata za Abrahama hamohocwalo ni za Lota, mi kacwalo babeleki ba bona ba kalisa ku omana. Kana Abrahama n’a tuhelezi maikuto a hae ku mu koma? Kamba kana n’a bonisize buiswalo? Ka ku babazeha luli, n’a akalelize ku ba ni tatululo ya ka kozo kwa fapahano yeo ye ama za sifumu; ya kuli yo muñwi ni yo muñwi a be ni kalulo ya hae ya naha. Mi n’a file Lota ku iketela pili. Ku bonisa kuli Abrahama n’a si ka bifa kamba ku buluka lutimbo, hamulaho n’a ile kwa ndwa ku y’o lwanela Lota.—Genese 13:5-12; 14:13-16.

17. Paulusi ni Barnabasi ne ba palezwi cwañi fa kezahalo ye ñwi, kono ki sika mañi se ne si latelezi hamulaho?

¹⁷ Hape lu kona ku ituta ka za buiswalo ku zwelela kwa taba ye ama Paulusi ni Barnabasi. Hamulaho wa ku sebeza hamoho ka lilimo ze ñata, ne ba fitile fa ku s’a lumelelana mwa taba ya haiba ne ba ka ya ni Mareka kamba ku tokwa fa musipili o muñwi. “Fohe fapano ye tuna ya taha, ye konile mane ku ba kauhanya. Barnabasi a nga Mareka, mi a silela kwa Sipera.” (Likezo 15:39) Taba ya kuli bona banna ba ba hulile kwa moya bao ne ba palezwi ku zamaisa maikuto a bona fa kezahalo yeo i swanela ku lu fa temuso. Haiba nto ye cwalo ne i kona ku ezahala ku bona, ya kona ku ezahala ni ku luna. Nihakulicwalo, ne ba si ka lumeleza kuli ba be ni fapahano ya ku ya ku ile kamba kuli sitoyo si hule. Ze ñozwi li bonisa kuli mizwale ba ba amilwe ne ba fumani sinca tamaiso ya maikuto a bona mi hamulaho ne ba sebelize hamoho ka kozo.—Makolose 4:10; 2 Timotea 4:11.

18. Haiba maikuto a holofazwa, ki sifi seo Mukreste ya hulile kwa moya a kona ku eza?

¹⁸ Lwa kona ku libelela kuli ne ku kana kwa ba ni maikuto a’ holofezi, mane ni lutimbo, mwahal’a batu ba Mulimu. N’a bile teñi mwa linako za Maheberu ni mwa mazazi a baapositola. Hape a ezahezi mwahal’a batanga ba Jehova mwa linako za luna, kakuli kaufel’a luna ha lu si ka petahala. (Jakobo 3:2) Jesu n’a susuelize balateleli ba hae k’u nga muhato ka bubebe mwa ku tatulula but’ata bo bu cwalo mwahal’a mizwale. (Mateu 5:23-25) Kono ki nto ye nde ni ku fita kuli lu bu tibele bu si ka ezahala kale ka ku zwisezapili buiswalo bwa luna. Haiba mu ikutwa ku nyazisezwa kamba ku fosezwa ka nto ye nyinyani hahulu yeo muzwale kamba kaizel’a mina n’a bulezi kamba ku eza, ki kabakalañi ha mu sa zamaisi fela maikuto a mina ni ku libala ka za ku fosezwa k’o? Kana luli ki ko ku tokwahala ku atumela mutu yo muñwi y’o, inge kuli ha mu na ku ikutwa hande konji h’a ka itumelela ku ba mwa bufosi? Ki ka sipimo mañi luli mu zamaisa maikuto a mina?

Kw’a Konahala!

19. Ki kabakalañi ha ku li ko ku swanela kuli puhisano ya luna ne i tomile fa ku zamaisa maikuto a luna?

¹⁹ Ka mutomo lu talimile kalulo i liñwi ya buiswalo, ili ya ku zamaisa maikuto a luna. Mi yeo ki kalulo ye butokwa hahulu kabakala kuli ku palelwa ku zamaisa maikuto a luna ku kona ku isa kwa ku s’a zamaisa lilimi la luna, litakazo za luna za tobali, micelo ya luna, ni likalulo ze ñwi ze ñata za bupilo zeo lu lukela ku bonisa buiswalo ku zona. (1 Makorinte 7:8, 9; Jakobo 3:5-10) Nihakulicwalo, mu ndumebe, kakuli mwa kona ku zwelapili mwa ku buluka buiswalo.

20. Lu kona ku ikolwisa cwañi kuli ku eza zwelopili kw’a konahala?

²⁰ Jehova u tabela ku lu tusa. Lu kona ku ikolwisa cwañi ka za seo? Kihona, buiswalo ki o muñwi wa miselo ya moya wa hae. (Magalata 5:22, 23) Kacwalo, ka sipimo seo lu sebeleza ku ba mwa mayemo a ku kona ku amuhela ni ku fumana moya o kenile ku Jehova mi ni ku bonisa muselo wa ona, ki ka sipimo seo lu kona ku libelela ku ba ni buiswalo ni ku fita. Ni kamuta mu si ke mwa libala sepiso ya Jesu ya kuli: “Ndate ya kwa lihalimu u ka . . . fa Moya o Kenile ku ba ba u kupa ku yena”!—Luka 11:13; 1 Joani 5:14, 15.

21. Ki sifi se mu ikatulezi ku eza mwa nako ya kwapili ka za buiswalo ni maikuto a mina?

²¹ Mu si ke mwa hupula kuli ku ka ba ko ku bunolo. Mi ku kana kw’a ba t’ata ni ku fita ku ba bañwi ba ba hulezi mwahal’a batu ba ne ba tuhelela maikuto a bona mutakafululele, ku ba bañwi ba maikuto a’ nyangumunwa ka bunolo, kamba ku ba bañwi bao ni kamuta ne ba si ka lika ku bonisa buiswalo. Ku Mukreste ya cwalo, ku tuhela kuli buiswalo bu be teñi mi ili ka buñata ne ku kana kw’a ba likulutendano luli. Niteñi kwa konahala. (1 Makorinte 9:24-27) Ha lu nze lu zwelapili ku ba bukaufi ni mafelelezo a muinelo wo wa linto, lipilaelo ni lisineneketo li ka ekezeha. Lu ka tokwa buiswalo bo butuna, bo butuna hahulu, mi isiñi bo bunyinyani! Mu itatube ka ku ama kwa buiswalo bwa mina. Haiba mu bona likalulo m’o mu tokwa ku eza zwelopili, mu sebeleze ku seo. (Samu 139:23, 24) Mu kupe Mulimu moya wa hae o’ ekezehile ni ku fita. U ka mi utwa mi u ka mi tusa kuli buiswalo bwa mina bu be teñi mi ili ka buñata.—2 Pitrosi 1:5-8.

Lisupo za ku Nahanisisa

◻ Ki kabakalañi ku zamaisa maikuto a mina ha ku li kwa butokwa cwalo?

◻ Ki sifi se mu itutile kwa mitala ya Hamani ni ya Evodia ni Sintike?

◻ Ki sifi seo ka busepahali mu ka lika ku eza haiba ku ba ni kezahalo ye mi foseza?

◻ Buiswalo bu kona ku mi tusa cwañi ku pima ku ba ni lutimbo lufi kamba lufi?

[Siswaniso se si fa likepe 25]

Ha n’a li fapil’a Felikisi ni Drusila, Paulusi n’a bulezi ka za ku luka ni buiswalo