Mu Sebeleze Jehova ka ku Sepahala

Ku ya [sepahala, NW], Wena [Jehova], u iponahalisa ya [sepahala, NW].—2 SAMUELE 22:26.

1. Jehova u’ nga cwañi muhato kwa neku la bao ba ba sepahala ku yena?

JEHOVA h’a konwi ku lifiwa ka zeo kaufela a ezeza batu ba hae. (Samu 116:12) Limpo za hae za kwa mubili ni za kwa moya ni mukekecima wa hae ki ze makaza hakalo! Mulena Davida wa mwa Isilaele wa kwaikale n’a ziba kuli Mulimu hape n’a eza ka busepahali ku ba ba sepahala ku yena. Davida n’a bulezi cwalo mwa pina ya n’a opezi “[Jehova, NW] h’a s’a [mu] lamulezi . . . mwa mazoho a lila za hae kaufela, ni mwa mazoho a [Mulena] Saule.”—2 Samuele 22:1.

2. Ki lisupo lifi ze ñwi ze bonisizwe mwa pina ya Davida ye ñozwi kwa 2 Samuele kauhanyo 22?

² Davida n’a kalile pina ya hae (ye zamaelela ni Samu 18) ka ku lumba Jehova sina “mulamuleli” mwa ku alaba tapelo. (2 Samuele 22:2-7) Ku zwelela mwa tempele ya hae ya kwa lihalimu, Mulimu n’a ngile muhato wa ku lukulula mutang’a hae ya sepahala ku zwa kwa lila ze tiile. (Litimana 8-19) Davida kacwalo n’a filwe mupuzo kabakala ku ndongwama nzila ye lukile ni ku buluka linzila za Jehova. (Litimana 20-27) Ze tatami ku kolohanyiwa ne li likezo ze ne li ezizwe ka mata a’ filwe ki Mulimu. (Litimana 28-43) Ka ku feleleza, Davida n’a bonisize ku lukululwa ku zwa kwa babatisisi ba milatu habo yena ni kwa lila ze mwa linaha li sili mi n’a file tumbo ku Jehova sina Yena “ya lamulela mulen’a hae kwa butata bo butuna, ya bonahalisa sishemo sa hae ku mutoziwa wa hae.” (Litimana 44-51) Jehova u kona ku lu lukulula ni luna haiba lu ndongwama nzila ye lukile ni ku itinga ku yena kwa neku la m’ata.

Seo ku Ba ya Sepahala ku Talusa

3. Ka mubonelo wa mwa Mañolo, ki sifi seo ku ba ya sepahala ku talusa?

³ Pina ya Davida ya ku lukululwa i lu fa buikolwiso bo bu omba-omba bo: “Ku ya [sepahala], Wena [Jehova], u iponahalisa ya [sepahala].” (2 Samuele 22:26) Ki linzwi la Siheberu le li tolongosha muinelo wa sika la cha·sidhʹ le li talusa “ya sepahala,” kamba “ya na ni lilato la sishemo.” (Samu 18:25, NW, litaluso za kwatasi) Linzwi le li talusa sika cheʹsedh li na ni muhupulo wa sishemo se si ipeya kwa nto ye ñwi ka lilato ku fitela mulelo wa sona ku seo u talelezwa. Jehova u bonisa mufuta w’o wa sishemo kwa batanga ba hae, mane sina bona mo ba si boniseza ku yena. Bona busepahali b’o bo bu kenile, bo bu lukile bu tolokilwe sina “sishemo se si lilato” (NW) ni ‘ku eza hande’ [lilato le li sepahala, NW]. (Genese 20:13; 21:23) Mwa Mañolo a Sigerike, “busepahali” bu na ni muhupulo wa ku kena ni ku kutekeha hahulu, o’ boniswa mwa linzwi le li talusa sika la ho·si·oʹtes ni le li talusa muinelo wa sika la hoʹsi·os. Busepahali bo bu cwalo bu kopanyeleza muinelo wa ku kumalela ka ku tiya ni buipeyo mi bu talusa ku ba ya buniti ni ya eza misebezi kamukana ku Mulimu ka tokomelo. Ku ba ya sepahala ku Jehova ku talusa ku kumalela ku yena ka buipeyo bo bu tiile hahulu kuli mane bu sebeza sina lingongwe le li m’ata.

4. Busepahali bwa Jehova bu boniswa cwañi?

⁴ Busepahali bwa Jehova yena ka sibili bu boniswa ka linzila ze ñata. Sina ka mutala, u’ nga muhato wa buatuli ka ku lwanisa ba ba maswe bakeñisa lilato le li sepahala kwa batu ba hae ni busepahali kwa katulo ye lukile ni ku luka. (Sinulo 15:3, 4; 16:5) Busepahali kwa bulikani bwa hae ni Abrahama ne bu mu susuelize ku ba ya na ni pilu-telele kwa Maisilaele. (2 Mulena 13:23) Bao ba ba sepahala ku Mulimu ba kona ku libelela tuso ya hae ku isa kwa mafelelezo a nzila ya bona ye sepahala mi ba kona ku ikolwisa kuli u ka ba hupula. (Samu 37:27, 28; 97:10) Jesu n’a tiisizwe ki ku ziba kuli yena ka ku ba “ya kenile” [ya sepahala, NW] ka ku fitisisa wa Mulimu, moyo wa hae ne u si ke wa siiwa mwa Sheol.—Samu 16:10; Likezo 2:25, 27.

5. Bakeñisa kuli Jehova wa sepahala, ki sifi s’a tokwa kwa batanga ba hae, mi ki puzo mañi ye lu ka fa nyakisiso?

⁵ Bakeñisa kuli Jehova Mulimu wa sepahala, u tokwa busepahali kwa batanga ba hae. (Maefese 4:24) Sina ka mutala, banna ba swanela ku sepahala kuli ba fite ku ze konisa za ku ketiwa sina maeluda ba mwa puteho. (Tite 1:8) Ki litaba mañi ze swanela ku susueza batu ba Jehova ku mu sebeleza ka ku sepahala?

Buitebuho kwa Neku la Lika ze Itutilwe

6. Lu swanela ku ikutwa cwañi ka za lika za mwa Mañolo ze lu itutile, mi lu swanela ku hupula sika mañi ka za zibo ye cwalo?

⁶ Buitumelo kwa neku la lika za mwa Mañolo ze lu itutile bu swanela ku lu susueza ku sebeleza Jehova ka busepahali. Muapositola Paulusi n’a susuelize Timotea kuli: “U tiyele ku z’o itutile, ze ku kolisize, u nz’o ziba y’o itutile zona ku yena. Ku zwa kwa bwanana u ziba Mañolo a kenile, a’ kona ku ku talifisa kuli u piliswe ka ku lumela ku Jesu Kreste.” (2 Timotea 3:14, 15) Mu hupule kuli zibo ye cwalo ne i zwile ku Mulimu ka “mutanga ya sepahala, ya na ni kutwisiso.”—Mateu 24:45-47.

7. Maeluda ba swanela ku ikutwa cwañi ka za sico sa kwa moya se si fiwa ki Mulimu ka mutanga ya sepahala?

⁷ Sihulu maeluda ba ba ketilwe ba swanela ku itebuha sico sa kwa moya se si fepehisa se si fiwa ki Mulimu ka mutanga ya sepahala. Lilimo-limo kwamulaho k’o maeluda ba sikai ne ba si na buitebuho bo bu cwalo. Mushalimeli yo muñwi n’a talusize kuli banna bao “ne ba nyaza-nyaza litaba ze mwa Tora ya ku Libelela, ili ku s’a bata ku i amuhela sina . . . sikuka sa Mulimu sa niti, ba nze ba lika kamita ku kukueza ba bañwi mwa nzila ya minahano ya bona.” Nihakulicwalo, maeluda ba ba sepahala ni kamuta ha ba liki ku kukueza ba bañwi ku hana sifi kamba sifi sa sico sa kwa moya se si fiwa ka mutanga ya sepahala.

8. Ku cwañi haiba ha lu itebuhi ka ku tala sisupo sa mwa Mañolo se siñwi se si tahisizwe ki mutanga ya sepahala ni ya na ni kutwisiso?

⁸ Sina Lipaki ba ba ineezi ba Jehova, kaufel’a luna lu lukela ku sepahala ku yena ni kwa kopano ya hae. Mane ni kamuta ha lu swaneli ku nahana ka za ku zwa kwa liseli la Mulimu le li komokisa, ili ku ndongwama nzila ya bukwenuheli ye kona ku isa kwa lifu la kwa moya cwale mi ni sinyeho kwa mafelelezo. (Jeremia 17:13) Kono ku cwañi haiba ku t’ata ku luna ku amuhela kamba ku itebuha ka ku tala sisupo se siñwi sa mwa Mañolo se si tahiswa ki mutanga ya sepahala? Ka buikokobezo he haike lu lemuhe ko ne lu itutile niti ni ku lapelela butali bwa ku sebelisana ni tiko yeo ku fitela i fita kwa mafelelezo ka ku hatiswa kwa taba ye ñwi ye utwahaza hande litaba zeo.—Jakobo 1:5-8.

Mu Itebuhe Sizwale sa Sikreste

9. 1 Joani 1:3-6 i bonisa cwañi kuli Bakreste ba lukela ku ba ni kalemeno ka silikani?

⁹ Buitebuho bwa ka pilu kaufela kwa neku la kalemeno ka silikani ka ka fumaneha mwahal’a sizwale sa luna sa Sikreste bu fa nto ye ñwi ye susueza ku sebeleza Jehova ka ku sepahala. Ka buniti fela, swalisano ya luna ni Mulimu ni Kreste ha i koni ku ba ye kondile kwa moya ha ku si na kalemeno kao. Muapositola Joani n’a bulelezi Bakreste ba ba tozizwe kuli: “Se lu boni ni se lu utwile ki sona se lu mi bulelela, kuli ni mina mu be ni kopano [“silikani,” Diaglott] ni luna. Mi kopano ya luna, lu na ni yona ni Ndate, ni Mwan’a hae Jesu Kreste. . . . Ha lu bulela kuli lu na ni kopano ni Yena, bo lu zamaya mwa lififi, fo lu na ni lishano, mi ha lu ezi niti.” (1 Joani 1:3-6) Sikuka seo si sebeza kwa Bakreste kamukana, sepo ya bona nihaili ya kwa lihalimu kamba fa lifasi-mubu.

10. Nihailikuli Evodia ni Sintike ka mo ku bonahalela fela ne ba bile ni bupalelwi mwa ku tatulula but’ata bwa ka butu, Paulusi n’a nga cwañi basali bao?

¹⁰ Buikatazo bwa tokwahala mwa ku bukeleza kalemeno ka silikani. Sina ka mutala, basali ba Sikreste bo Evodia ni Sintike ka mo ku bonahalela fela ne ba bile ni bupalelwi mwa ku tatulula but’ata bo buñwi mwahal’a bona. Paulusi kacwalo n’a ba elelize ka ku tiya “kuli ba be ni pilu i liñwi ku Mulena.” N’a ekelize kuli: “Ni kupa wena, mulikan’a ka wa niti ya kwa coko ni na, kuli u tuse basali bao ba ba sebelize ni na mwa Evangeli, hamoho ni Klementi ni batusi ba bañwi, be mabizo a bona a ñozwi mwa buka ya bupilo.” (Mafilipi 4:2, 3) Basali bao ba ba zamaya ka bumulimu ne ba ezize ka t’ata mwa ku sebelisana hamoho ni Paulusi ni ba bañwi “mwa Evangeli,” mi n’a na ni buikolwiso bwa kuli ne ba li mwahal’a bao ‘mabizo a bona n’a ñozwi mwa buka ya bupilo.’

11. Haiba Mukreste ya sepahala a fumana but’ata bwa kwa moya, ki sifi se ne si ka swanelwa ku beiwa mwa muhanano?

¹¹ Bakreste ha ba tin’angi mendulu ye bonisa seo ba bile ni tohonolo ya ku si eza mwa kopano ya Jehova ni ka m’o ba sebelelize ka ku sepahala. Haiba ba na ni but’ata bwa kwa moya, neikaba ku tokwa lilato cwañi ku kasheza kwatuko lilimo za bona za sebelezo ye sepahala ku Jehova! Ka mo ku kana kwa bela fela, ya n’a bizizwe “mulikan’a ka wa niti ya kwa coko ni na” n’a li muzwale ya sepahala ya tukufalelwa ku tusa ba bañwi. Haiba mu maeluda, kana mu ‘mulikani wa niti ya kwa coko ni ba bañwi,’ y’a it’ekezi ku tusa ka nzila ya mukekecima? Haike kaufel’a luna lu nahanisise bunde bo bu ezizwe ki balumeli sina luna, sina fela Mulimu mw’a ezeza, mi ka lilato lu ba tuse ku lwala milwalo ya bona.—Magalata 6:2; Maheberu 6:10.

Ha ku na ko Kuñwi kwa ku Ya

12. Muta lipulelo za Jesu ne li tahiselize ‘ba bañata kwa balutiwa ku kutela mwamulaho,’ ki mayemo afi ao Pitrosi n’a ngile?

¹² Lu ka susuezwa ku sebeleza Jehova ni kopano ya hae ka busepahali haiba lu hupula kuli ha ku na ko kuñwi ku sili ko lu kona ku ya kwa neku la bupilo bwa kamita. Muta lipulelo za Jesu ne li tahiselize ‘ba bañata kwa balutiwa ku kutela mwamulaho,’ n’a buzize baapositola ba hae kuli: “Mina bo, kikuli ha mu lati ku ikela ni mina?” Pitrosi a alaba a li: “Mulena, lu ka ya ku mañi? U na ni manzwi a bupilo bo bu sa feli, Mi luna lu lumezi mi lu zibile kuli ki Wena Kreste, Ya-Kenile wa Mulimu.”—Joani 6:66-69.

13, 14. (a) Ki kabakalañi bulapeli bwa Sijuda bwa mwa lilimo za mwanda wa pili ha ne bu si na kemelo ya bumulimu? (b) Ki sifi seo Paki yo muñwi wa Jehova ya s’a bile cwalo ka nako ye telele n’a bulezi ka za kopano ya Mulimu ye bonahala?

¹³ “Manzwi a bupilo bo bu sa feli” n’a s’a fumanehi mwa bulapeli bwa Sijuda bwa mwa lilimo za mwa mwanda wa pili C.E. Sibi sa bona se situna ka ku fitisisa ne li sa ku hana Jesu sina Mesiya. Ha ku na ni o mukana wa mifuta ya bulapeli bwa Sijuda o ne u tomile ka ku tala fa Mañolo a Siheberu. Basaduki ne ba yaya ku ba teñi kwa mangeloi mi ne ba s’a lumeli mwa zuho. Nihailikuli Bafalisi ne ba s’a lumelelani ni bona mwa litaba zeo, ka mukwa wa sibi bona ne ba felisa Linzwi la Mulimu kabakala la lizo za bona ze si za mwa Mañolo. (Mateu 15:1-11; Likezo 23:6-9) Zona lizo zeo ne li beya Majuda mwa butanga mi ne li tahisa kuli ku be ko ku t’ata ku ba bañata ku amuhela Jesu Kreste. (Makolose 2:8) Ku tukufalelwa hahulu mwa ‘mikwa ye zwile ku bokuku a hae’ ne ku tahiselize Saule (Paulusi) mwa ku s’a ziba kwa hae ku ba munyandisi ya maswe wa balateleli ba Kreste.—Magalata 1:13, 14, 23.

¹⁴ Bulapeli bwa Sijuda ne bu si na kemelo ya Mulimu, kono Jehova n’a fuyauzi kopano ya balateleli ba Mwan’a hae—‘sicaba se si tukufalelwa misebezi ye minde.’ (Tite 2:14) Kopano yeo isali teñi, mi ka za yona Paki yo muñwi wa Jehova ya s’a bile cwalo ka nako ye telele n’a bulezi kuli: “Haiba nto ye ñwi i bile ya butokwa ka ku fitisisa ku na, i bile taba ya ku ba bukaufi ni kopano ya Jehova ye bonahala. Ze bonwi za ka za kwa makalelo ne li ni lutile ka mo ku bezi ko ku si na butali ku itinga fa minahano ya butu. Munahano wa ka ha ne u ezize katulo fa sisupo seo, ne ni ikatulezi ka ku tiya ku ba hamoho ni kopano ye sepahala ye. Ki kamukwaufi o muñwi hape mutu a kona ku fumana kemelo ni mbuyoti ya Jehova?” Ha ku na ko kuñwi hape kwa ku ya kwa neku la kemelo ya bumulimu ni bupilo bwa kamita.

15. Ki kabakalañi ha lu swanela ku swalisana ni kopano ya Jehova ye bonahala ni bao ba ba na ni buikalabelo mwahal’a yona?

¹⁵ Lipilu za luna li swanela ku lu susueza ku swalisana ni kopano ya Jehova kakuli lu ziba kuli ki yona fela ye zamaiswa ka moya wa hae mi i zibahaza libizo la hae ni milelo ya hae. Ka mo ku inezi fela, ba ba na ni buikalabelo mwahal’a yona ki ba ba si ka petahala. (Maroma 5:12) Kono “buhali bwa [Jehova, NW] bwa . . . tukela” Aruni ni Miriame ha ne ba tong’okile hahulu ka za Mushe ni ku libala kuli yena, isiñi bona, n’a na ni buikalabelo bo bu filwe ki Mulimu. (Numere 12:7-9) Kacenu, Bakreste ba ba sepahala ba swalisana ni “bazamaisi” kakuli seo ki sona s’a tokwa Jehova. (Maheberu 13:7, 17) Bupaki bwa busepahali bwa luna bu kopanyeleza ku fumaneha kwa mikopano ya Sikreste hañata ni ku fa likalabo ze tisa ku ‘susumezana mwa lilato ni mwa misebezi ye minde.’—Maheberu 10:24, 25.

Mu be ba ba Yahisa

16. Ki takazo ya ku eza nto mañi ku ba bañwi yeo ye swanela ku lu susueza ni luna ku sebeleza Jehova ka busepahali?

¹⁶ Takazo ya ku yahisa ba bañwi hape i swanela ku lu susumeza ku sebeleza Jehova ka busepahali. Paulusi n’a ñozi kuli: “Zibo i tahisa buikuhumuso, kanti lilato la yahisa.” (1 Makorinte 8:1) Bakeñisa kuli mufuta o muñwi wa zibo ne u tahisa buikuhumuso ku ba ne ba na ni yona, ku lukela ku ba kuli Paulusi n’a talusa kuli lilato hape li yahisa ba ba bonisa kalemeno kao. Buka ye ñozwi ki boc’aziba bo Weiss ni English i bulela kuli: “Mutu ya na ni buikoneli bwa ku lata hañata wa latiwa ni yena. Buikoneli bwa ku sebelisa maikuto a sishemo ni nahanisiso mwa muinelo kamukana wa bupilo . . . bu tahisize ku ama ko ku yahisa ku mutu y’a fa maikuto a’ cwalo hamohocwalo ni mutu ya a amuhela mi kacwalo bu tahisa munyaka kwa bubeli bwa bona.” Ka ku bonisa lilato, lu yaha ba bañwi ni ku icaha ili luna, sina mo ku boniselizwe mwa manzwi a Jesu a’ li: “Ku na ni mbuyoti mwa ku fana, ye fita ye mwa ku fiwa.”—Likezo 20:35.

17. Lilato li yahisa cwañi, mi li ka lu tibela ku eza nto mañi?

¹⁷ Kwa 1 Makorinte 8:1, Paulusi n’a itusisize linzwi la Sigerike la a·gaʹpe, le li talusa lilato la ka sikuka. L’a yahisa, kakuli li na ni pilu-telele mi li na ni sishemo, la itiisa ni ku tiyela lika kamukana, mi ni kamuta ha li feli. Lona lilato leo li zwisa teñi maikuto a’ holofaza, a’ cwale ka buikuhumuso ni muna. (1 Makorinte 13:4-8) Lilato le li cwalo li ka lu zwisa kwa ku tong’oka ka za mizwale ba luna, bao ili ba ba si ka petahala sina luna. Li ka lu tibela kwa ku ba sina “batu ba ba si na bulapeli” ba ne ba “izwakile” mwahal’a Bakreste ba niti ba mwa lilimo za mwanda wa pili. Batu bao ne ba “shwaula bulena, mi ba nyefula ba ba kanya,” ka mo ku bonahalela fela ne ba munjula batu ka buñwi ba ba cwalo ka baokameli ba Sikreste ba ba tozizwe ba ne ba filwe kanya ya mufuta o muñwi. (Juda 3, 4, 8) Ka busepahali ku Jehova, ni kamuta haike lu si ke lwa komiwa ki muliko wa ku eza nto ifi kamba ifi ye swana.

Mu Lwanise Diabulosi!

18. Ki sika mañi seo Satani n’a ka tabela ku eza kwa batu ba Jehova, kono ki kabakalañi h’a sa koni ku eza cwalo?

¹⁸ Zibo ya kuli Satani u bata ku sinya swalisano ya luna sina batu ba Mulimu i swanela ku ekeza kwa ku tiya kwa katulo ya luna ya ku sebeleza Jehova ka ku sepahala. Satani mane n’a ka lata ku zwisa teñi batu ba Mulimu kamukana, mi batanga ba Diabulosi ba fa lifasi-mubu ka linako ze ñwi b’a bulay’anga balapeli ba niti. Kono Mulimu h’a na ku lumeleza Satani ku ba yundisa kaufel’a bona. Jesu n’a shwile kuli “a felise ya sweli mubuso wa lifu mwa mata a hae, yena Diabulosi.” (Maheberu 2:14) Liluko la m’ata a Satani li kusufalizwe hahulu sihulu haisali ku zwiwa fa ku lundulwa kwa hae mwa lihalimu hamulaho wa ku ba Mulena kwa Kreste ka 1914. Mi ka nako ye swanela ya Jehova, Jesu u ka sinya Satani ni kopano ya hae.

19. (a) Lilimo ze ñata kwamulaho k’o, ki temuso mañi ka za buikatazo bwa Satani yeo magazini ye ne i file? (b) Kuli lu pime malaba a Satani, ki tokomelo mañi ye lu swanela ku sebelisa mwa ku sebelisana ni balumeli ba bañwi?

¹⁹ Magazini ye ka nako ye ñwi ne i kile ya lemusa kuli: “Haiba Satani, Diabulosi, u kona ku tisa muinelo o’ si na tukiso hande mwahal’a batu ba Mulimu, u kona ku ba ezisa ku ikomanisa ni ku itwanisa, kamba ku bonisa ni ku tahisa mubonelo wa buitati o ne u ka isa kwa ku sinyeha kwa lilato kwa neku la mizwale, kacwalo n’a ka kondisa mwa ku ba fenya.” (The Watch Tower, May 1, 1921, likepe 134) Haike lu si ke lwa lumeleza Diabulosi ku sinya swalisano ya luna, mwendi ka ku lu tahiseza ku sebana, kamba ku lwanisana. (Livitike 19:16) Haike Satani a si ke a lu biula ka mukwa wa kuli mane luna ka butu lu holofaze ba ba sebeleza Jehova ka busepahali kamba ku ba tatafaliseza hahulu bupilo. (Mu bapanye 2 Makorinte 2:10, 11.) Ka ku fapahana, haike lu sebelise manzwi a Pitrosi a’ li: “Mu n’o iswala, mu libelele. Diabulosi, sila sa mina u nz’a zamaya sina tau ye lila ye bata ye i ka ca; Mu hane ku yena ka ku tiya mwa tumelo.” (1 Pit 5:8, 9) Ka ku tiya mwa ku lwanisa Satani, lwa kona ku buluka swalisano ya luna ye fuyauzwi ka ku ba batu ba Jehova.—Samu 133:1-3.

Mu Itinge ku Mulimu ka Mukwa o Buniti

20, 21. Ku itinga ku Jehova ka mukwa o buniti ku swalisani cwañi ni ku mu sebeleza ka ku sepahala?

²⁰ Ku itinga ku Mulimu ka mukwa o buniti ku ka lu tusa ku zwelapili ku sebeleza Jehova ka ku sepahala. Ha lu bona kuli wa alaba litapelo za luna, kamita lu hohelwa mwa mayemo a ku ba bukaufi hahulu ni yena. Ku itinga ku Jehova Mulimu ka mukwa o buniti ne ku susuelizwe muta muapositola Paulusi n’a ñozi kuli: “Ni lata kuli banna ba lapele mwa mabaka kaufela, inze ba yemisa mazoho a kenile, ku si na buhali ni likañi.” (1 Timotea 2:8) Sina ka mutala, ki ko ku butokwa hakalo kuli maeluda ba itinge ku Mulimu ka mukwa o buniti! Poniso ye cwalo ya busepahali ku Jehova muta mu kopana ku buhisana litaba za puteho i ka tusa ku tibela likananisano ze s’a feli ni ku bulela ka buhali ko ku kona ku ba teñi.

²¹ Ku itinga ku Jehova ka mukwa o buniti ku lu tusa ku babalela matohonolo mwa sebelezo ya hae. Munna yo muñwi ya n’a sebelelize Jehova ka busepahali ka mashumi-shumi a lilimo n’a kona ku bulela kuli: “Ku amuhela kwa luna ka ku tabela kalulo ifi kamba ifi ye lu fiwa mwa kopano ya Mulimu ya mwa lifasi kamukana, ni ku siyala cwalo mwa kalulo ye lu filwe, lu s’a zikinyehi, ku tisa lumenyo lwa Mulimu lwa tumelezo fahalimu a buikatazo bwa luna bo bu buniti. Mane nihaiba kuli musebezi o’ filwe ne u ka bonahala ku ba o’ s’a tabisi, hañata ku fitiwa fa ku boniwa kuli haiba u s’a eziwi ka busepahali misebezi ye miñwi ye butokwa ha i konwi ku eziwa. Kacwalo haiba lu na ni buikokobezo ni cisehelo ye nongile mwa ku lumbeka libizo la Jehova mi isiñi la luna, lwa kona ku ikolwisa kuli kamita lu ka ‘tiya, lu s’a zikinyehi, lu tiisa kamita musebezi wa Mulimu.’—1 Makorinte 15:58.

22. Limbuyoti ze ñata za Jehova li swanela ku ama cwañi busepahali bwa luna?

²² Ku si na taba ni se lu eza mwa sebelezo ya Jehova, ka mo ku inezi fela, ha lu koni ku mu lifela z’a lu ezeza. Lu ba ba iketile hakalo mwa kopano ya Mulimu, lu potolohilwe ki bao ba ba li balikani ba hae! (Jakobo 2:23) Jehova u lu fuyauzi ka swalisano ye zwelela kwa lilato la sizwale le li tomile hahulu ka ku tiya kuli mane Satani yena ka sibili h’a koni ku li kumula. Kacwalo haike lu kumalele ku Ndat’a luna wa kwa lihalimu y’a sepahala mi lu sebeze hamoho sina batu ba hae. Cwale ni mwa nako kaufela ya ku ya ku ile, haike lu sebeleze Jehova ka ku sepahala.

Ne Mu ka Alaba Cwañi?

◻ Ku sepahala ku talusañi?

◻ Ki litaba mañi ze ñwi ze swanela ku lu susueza ku sebeleza Jehova ka ku sepahala?

◻ Ki kabakalañi ha lu swanela ku lwanisa Diabulosi?

◻ Tapelo i kona ku lu tusa cwañi ku ba batanga ba Jehova ba ba sepahala?