Mu Tuse ka Lilato Bao Ba Ba Bonisa Cisehelo

¹ Ku yaha ndu ku tokwa ku ba ni buitukisezo bwa ka tokomelo ni buikatazo bwa ka mamelelo. Ndu ha se i singanyekilwe, sibaka sa muyaho si swanelwa ku bakanyiwa hande mi mutomo o tiile wa tomiwa. Muyaho u hula ka ku zwelapili ku fitela u felelela. Ka ku swana, lu lukela ku tusa batu ba ba swana sina lingu ku zwelapili ku ituta niti. Lu lika ka mo lu konela kaufela ku nyangumuna cisehelo fa ku pota kwa pili. Hamulaho wa seo, lu eza misipili ya makutisezo, ku toma mutomo ka ku luta liniti ze mutomo ka za Mulimu ni mulelo wa hae kwa mufuta wa mutu.—Luk. 6:48.

² Nihakulicwalo, pili mutomo u si ka tomiwa kale, lu lukela ku lukisa hande sibaka sa muyaho, ka mubulelelo o muñwi, ili ku beya mwa munahano miinelo ya muñ’a ndu. Ki taba mañi ye ne i buhisanwi ka nako ye felile? Ki mañolo afi a na itusisizwe? Ki muhato ufi o ne u’ ngilwe? Ki hatiso ifi ye ne i siilwe? Ha mu kutela teñi, mu be ni lisupo tenyene mwa munahano, mi ka ku zwelapili mu tome mutomo. Mwa mupotelo ni mupotelo zibo ya muñ’a ndu ya hula mi tumelo ya hae ku Mulimu ya ekezeha.

³ Haiba ne mu buhisani ka za butokwa bwa ku teeleza ku Mubupi wa lubasi fa ku pota kwa mina kwa pili, mu kalise ngambolo, ka ku bulela kuli:

◼ “Ba bañwi ba ikutwa kuli kelezo ya Bibele haki ye sebeza mwa nako ya luna ya cwale. Mu ikutwa cwañi ka za seo? [Mu libelele kalabo.] Kana ne mu si ke mwa lumela kuli buka ye fa kelezo ye utwahala ye kona ku lu konisa ku ba ni bupilo bwa tabo bwa lubasi ki ye luta? [Mu libelele maikuto.] Mihupulo ni miezezo ye ama bupilo bwa lubasi li cincize, mi ze zwa mwateñi ze lu bona kacenu haki ze nde . Kono mabasi ao a itusisa seo Bibele i si bulela ki a iketile ni a tabile luli.” Mu bale Makolose 3:18-21. Mwa kona ku bala hape mibamba ye mibeli ya mafelelezo ya palagilafu 9, fa likepe 185 la buka ya Bupilo bwa Lubasi. Mu taluse kuli lwa fa tuto ya Bibele ye si na tifo.

⁴ “Ba ka utwa cwañi, mubuleli h’a li siyo?” (Maro. 10:14) Kaniti, ba ka utwa cwañi taluso ya niti konji haiba lu eza misipili ya makutisezo ye buanyu? Ku pota kufi kamba kufi fo ne lu konile ku ambolisana ni muñ’a ndu ka za lushango lwa Mubuso ku swanelwa ki musipili wa makutisezo. Kweli ye ne lu kana lwa kona ku latelela ka ku tala puhisano ya luna ya pili ka mihupulo ye ekelizwe ya mañolo ku zwelela mwa buka ya Bupilo bwa Lubasi, kamba hatiso ifi kamba ifi ye ne lu siile, mi ili yeo ne i ka isa hande kwa tuto ya Bibele.

⁵ Muta mu eza musipili wa makutisezo hamulaho wa ku siya buka ya “Ku Eza Bupilo bwa Lubasi lwa Mina ku ba bwa Tabo” ne mu kana mwa kalisa ka ku bonisa siswaniso se si fa likepe 189 mi hape ni ku buza lipuzo sina cwana:

◼ “Mu nahana kuli ne ku ka ba cwañi ku pila mwa lifasi le li petehile? [Mu utwe maikuto a muñ’a ndu.] Se mu bona mwa siswaniso mo haki sa ku inahanela fela; si tomile fa lisepiso za niti ze ñozwi mwa Bibele. [Mu bale Sinulo 21:4 ni Samu 37:11, 29.] Ne ni ka tabela ku talusa ka mo mina ni lubasi lwa mina mu kona ku ikolela mbuyoti ye. Ne lu kana lwa kalisa ka ku buhisana ‘kauhanyo ye li ye kateleha ka ku fitisisa ku mina ni kwa lubasi lwa mina.’” Haiba muñ’a ndu a bonisa cisehelo, mu zwisezepili puhisano, mi mu fe tuto ya Bibele.

⁶ Ha lu fumana batu ba ba buniti ba ba sweli ku bata niti, lu bonisa lilato la luna le li buniti ka ku kutela ku yo ba tusa kuli ba nge muhato ku ze ba utwile. Lu itusisa liniti ze kenile ze filwe ku luna kwa neku la limbuyoti ze sa feli ku luna ni ku bao ba ba utwa.—1 Tim. 4:16.