Mu Be Baezi—Isi Bautwi Fela

¹ Bakreste ba niti kacenu ba singanyeka kelezo ya Bibele ya ku ba baezi ba linzwi, isi bautwi fela. (Jak. 1:22) Seo si ba fapahanya hahulu ku bao, niha ba ipala ku ba Bakreste, ba fa Mulimu sebelezo ya ka mulomo fela. (Isa. 29:13) Jesu n’a bulezi fo ku sweu kuli ki ba ba eza fela tato ya Mulimu ba ba ka piliswa.—Mat. 7:21.

² Bulapeli bo bu si na misebezi ya silumeli ki bwa mbwashula. (Jak. 2:26) Kacwalo lu swanela ku ipuza kuli, ‘Misebezi ya ka i paka cwañi kuli tumelo ya ka ki ya niti? Ki sifi se si bonisa kuli luli ni pila ka ku ya ka se ni lumela? Ni kona ku likanyisa cwañi Jesu ka ku tala?’ Likalabo ze buniti kwa lipuzo ze li ka lu tusa ku bona zwelopili ye lu ezize kamba ye lu sa tokwa ku eza mwa ku peta tato ya Mulimu.

³ Ka ku ba balateleli ba Jesu, lu lukela ku ba ni sikonkwani se situna mwa bupilo se si swana ni sa n’a bulezi walisamu, kuli: “Lu nze lu itumba ka Mulimu lizazi kaufela, mi lu ka na lu lumba Libizo la hao, ku ya ku ile.” (Samu 44:8) Bukreste ki mupilelo o iponelwa ka zazi ni ku zote ze lu eza. Ki tabo kwa butuna ye lu fumana ha lu nze lu bonisa takazo ya luna ye buniti ya ku lumbeka Jehova mwa misebezi ya luna kaufela!—Mafil. 1:11.

⁴ Ku Lumbeka Jehova ku Ama ze Fita Fela ku Pila ka ku Luka: Kambe Mulimu n’a tokwa fela muzamao o munde, ne lu ka landalala fela fa ku shemuna butu bwa luna. Nihakulicwalo, bulapeli bwa luna hape bu ama ku zibahaza ze nde za Jehova ni ku paka libizo la hae!—Maheb. 13:15; 1 Pit. 2:9.

⁵ Ku kutaza taba ye nde ki o muñwi wa misebezi ya butokwa hahulu ye lu eza. Jesu n’a ifanile ku eza musebezi wo kakuli n’a ziba kuli ne u ka tahiseza ba ne ba ka utwa bupilo bo bu sa feli. (Joa. 17:3) Kacenu “sebelezo ya Linzwi” ki ya butokwa cwalo; ki yona fela nzila inosi yeo batu ba konwa ku piliswa ka yona. (Lik. 6:4; Maro. 10:13) Ka ku ziba lituso ze tuna hahulu ze zwa mwateñi, lwa kona ku itebuha libaka Paulusi ha lu file kelezo ya ku “bulela Linzwi” ni ku li ‘tiiseza.’—2 Tim. 4:2.

⁶ Ku lumbeka Jehova ku swanela ku ba ni kabelo ye kuma kai mwa bupilo bwa luna? Walisamu n’a bulezi kuli ne ku li mwa munahano wa hae lizazi mukatumbi. Kana ha lu ikutwi cwalo ka za kona? Ee, mi lu k’a nga nako kaufela ye lu kopana ni mutu yo muñwi ku ba kolo ye nde ya ku bulela ka za libizo la Jehova. Lu ka bata nako ye swanela ya ku libisa lingambolo za luna kwa litaba za kwa moya. Hape lu ka lika ka mo lu konela kaufela ku abana kamita mwa sebelezo ya mwa simu ye lukisizwe ki puteho. Ba miinelo ye konisa ba kona ku singanyeka ku eza bupaina, kakuli seo si lu tusa ku beya musebezi wa ku kutaza ku ba ona wa pili mwa bupilo bwa luna ka zazi. Linzwi la Mulimu li lu kolwisa kuli ha lu ba baezi ba ba tundamena ba tato ya Mulimu, lu ka ba ni tabo.—Jak. 1:25.