Kwijiva Muchano haChihande chaMwono Chapwa Chachilemu
“Muchano namukautachikiza, kaha muchano naukamilingisa kupwa muvana vavisemi.”—YOWANO 8:32.
1. Mwomwo ika chapwila chachilemu kukekesa vyuma twafwelela hamwono nakufwa?
VYUMA vafwelela vatu hakufwa naKuyoya chaKulutwe vyafuma mukwitava chavatu navisemwa. Ngana mutunamono lyehi, vyaputukila kukunangula chakuvuluka nge mwono weji kuhetanga kuze uli nakuya hakusemwojoka kakavulu, kaha nawa ngwavo kuyoya chamutu chimwe kaha chikiko cheji kusololanga omu kuyoya chamakumishilo nachikapwa. Ngocho mutu umwe nahase kufwelela ngwenyi jino mwakawana kuyoya chamwaza nge nafu, mukwavo nahase kufwelela kukapwa muNirvana, kaha nawa weka nahase kufwelela kukatambula wana mwilu. Jino aha muchano ulihi? Hakuwana nge vyuma twafwelela vikiko vyakwata havilinga, navyuma tweji kusakulanga kulinga, kutala katwatela kusaka kuwana kukumbulula kuchihula kanako nyi?
2, 3. (a) Mwomwo ika twatela kufwelela vyuma Mbimbiliya yahanjika hamwono? (b) Ngana muvalumbununa muMbimbiliya, mwono wapwa chuma chika?
2 Mukanda wamwaka chikuma mukaye, Mbimbiliya, walumbununa chihande chakushikulu chakutenga mwono wamutu wakulivanga. Kunangula chayo kavachipihisa kumangana autu navisemwa vyavatuko. Mbimbiliya yalumbununa muchano hamwono: Ove yove vene mwono, vafu kaveshi vavatonyiko, kaha vaze eji kwanukanga Kalunga mwakavasangula halwola lwenyi lwakutamo. Kwijiva chinyingi kanechi nachilumbununa ika kuli yenu?
3 Yesu Kulishitu ambile kuli tumbaji twenyi ngwenyi: “Muchano namukautachikiza, kaha muchano naukamilingisa kupwa muvana vavisemi.” (Yowano 8:32) Eyo, muchano weji kusokola. Jino kwijiva muchano hamwono nachikatusokola kuvyuma vika?
Kusokoka kuWoma naKuhona Lutalililo
4, 5. (a) Woma muka weji kukumanga hakwijiva kanawa muwapwa mwono? (b) Lutalililo lwakusanguka lwakolezezele ngachilihi kanyike apwile nakuviza musongo wakulyana?
4 The World Book Encyclopedia ngwayo: “Vatu vavavulu kufwa vachivwa woma kaha kavasaka nakuchishinganyekako.” Alinangula vyakushikulu umwe ambile ngwenyi: “Mumafuchi akumulauko lizu ‘kufwa’ kavalivulwojoka chikumako.” Kaha muvisemwa vimwe mazu akufwana nge “natuseze” “natoko” akiko vazachisa chikuma hakulumbununa mutu uze nafu. Ou woma kana wakuchina kufwa wapwa hiwoma wakuchina chuma chakuhona kwijiva, mwomwo vatu vavavulu kufwa kachavalumbunukilako. Shikaho kwijiva muchano wavyuma vyeji kusolokanga hakufwa chinahase kufumisaho woma kana.
5 Chakutalilaho, achishinganyeke mwevwile Michaelyn kanyike wamyaka 15. Avijile musongo waleukemia (musongo wakasa yamumanyinga) kaha afwile. Naye Paula eji kwanukanga ngwenyi: “Michaelyn ahanjikilenga ngwenyi, kalizakaminyine kufwako mwomwo ejivile ngwenyi kufwa chapwa chakatando kakandende kaha. Twahanjikilenga vyalifuchi lyaKalunga lyalihya navosena vaze navakasangukilamo. Michaelyn afwelelele chikuma muli Yehova Kalunga namukusanguka—kahuhwasanyineko.” Lutalililo lwakusanguka lwamusokwele uno kanyike kapwevo kuchiwomawoma chakufwa.
6, 7. Kwijiva kanawa mwono cheji kutusokola kufuma kukulizakamina vyuma muka? Lumbununa.
6 Muchano wavakafwile ngachilihi visemi jaMichaelyn? Ise Jeff ambile ngwenyi: “Kakwapwile chuma chatukolele kumichima chikuma nge kufwa chamwanetuko. Oloze twafwelela chikupu lushiko lwaYehova lwakusanguka kaha nawa tuli nakuvandamina likumbi lize natukakwata cheka mwanetu twazanga Michaelyn mumavoko. Ocho kuwaha kana chakukaliwana cheka vayaya!”
7 Enga, mutu nge mwejiva muchano wakuvuluka mwono, kaha eji kusokokanga kumuzuzu wakulizakamina ngwenyi, omu mwafwa kausoko kenyi kunahu keshi akamumone chekako. Eyo, nachimwe chinahase kufumisaho kukola naushona wosena tweji kwivwanga nge wetu twazanga nafu chauchi. Oloze lutalililo lwakusanguka lweji kuvendejekanga hakulishona kaha nawa lweji kukehesangako kukola kumuchima.
8, 9. Muchano wakwijiva kanawa omu vapwa vafu weji kutusokola kuwoma wamuyachi muka?
8 Muchano wamuVisoneka wakuvuluka muvapwa vatu naukiko nawa weji kutusokola kuwoma wavafu. Hakulilongesa muchanou, vavavulu vaze vakakachililile kuvisemwa vyavakulu kaveshi cheka nawoma wakuvangula, wavishima, mikalo namasakuko kaha nawa kaveshi kuhana mawana akwivwisa vafu kuwaha kuchina ngwavo navakinduluka nakuvayanjisako. Eyo, hakuwana nge vafu “kavatachikiza chumako” vijiliso kana vyapwa vyamavokovoko.—Muka-kwambulula 9:5.
9 Muchano wamuMbimbiliya hamwono, wapwa chikupu vene uka-kusokola kaha nawa twatela kuufwelela. Jino achishinganyekenu halutalililo lwakulipwila luze Mbimbiliya yamifwelelesa.
[Mukuku wavasona velava uli mukachi kamazu halifwo 29]
Kwijiva muchano wamwono cheji kutusokolanga kuwoma wakufwa, wavafu nakumuzuzu wakulizakamina ngwetu, omu nafu kausoko ketu kunahu katweshi tukamumone chekako