“Kuchina Namwingila Mukumyeseka”
“Tonenunga, lombenunga, kuchina namwingila mukumyeseka.”—MATEU 26:41.
OMU Yesu Kulishitu MwanaKalunga apwile kwakamwihi nakufwa, amwene cheseko chachinene chikuma chize chahambakanyine havyeseko vyosena. Ngocho ejivile ngwenyi kalinwomu vamukase, nakumujiha chakuhona mulonga, nakumusukika hachitondo chakuyanjishila. Yesu ejivile nawa ngwenyi vyuma mwasakula kulinga navilinga vyenyi vinahase kuneha kuwaha chipwe kupihya halijina lyaIse. Yesu atachikijile cheka ngwenyi kuyoya chakulutwe chamuyachi wavatu chapendaminyine hali ikiye. Jino Yesu alingile vyuma muka hakumushinyinyika chosenechi?
2 Yesu ayile kulitepa lyaNgetesemane natumbaji twenyi. Azangilenga chikuma kuya kuchihela kana. Omu vahetele kuze, asele tumbaji twenyi nakuya kwaukawenyi. Ngocho omu apwile uka wenyi, alombele kuli Ise wamwilu mangana amuhane ngolo, amulwezele vyuma vyosena vyapwile mumuchima wenyi—kalombele kamwe kahako oloze mapapa katatu. Numba tuhu apwile wakukupuka mwosena, oloze kapendaminyine hangolo jenyiko.—Mateu 26:36-44.
3 Makumbi ano, nayetu nawa tunalitalasana navyeseko vyavinene. Kumaputukilo ambuloshuwa yino, twakekesanga unjiho wakusolola nge tuli mumakumbi akukuminyina atulingilo tuno twatupi. Ngocho vyeseko naukalu wakaye kano kaSatana vili nakuvulilako lika. Shikaho etu twalivuluka ngwetu tuvaka-kuzachila Kalunga wamuchano, vyuma natusakula kulinga navilinga vyetu vinahase kuneha kupihya chipwe kuwaha halijina lyaKalunga. Kaha nawa vinahase kukwata halutalililo lwetu lwakukayoya mulifuchi lyenyi lyalihya. Chipwe ngocho, etu twamuzanga Yehova. Twafwila nawa ‘kumika nakusongo’—kusongo yakuyoya chetu chaholyapwa chipwe kusongo yatulingilo tuno, kala cheshocho nachilivanga kwiza. (Mateu 24:13) Ngachize, natuhasa ngachilihi kupwa namuchima wakwanguhwa nakupwa vakutona nawa?
4 Yesu hakwijiva ngwenyi tumbaji twenyi vakunyima navaze valelo navakamona vyeseko, ngachize avalweza ngwenyi: “Tonenunga, lombenunga, kuchina namwingila mukumyeseka.” (Mateu 26:41) Uno mazu kana alumbunukila mulihi makumbi ano? Vyeseko muka weji kumonanga? Kaha unahase ngachilihi kupwa ‘wakutona.’
Vyeseko Vyakulinga Vyuma Muka?
5 Tuvosena tweji kuliwananga nacheseko chakufwa “mumuheto waLiyavolo.” (WaChimoteu 2, 2:26) Mbimbiliya yatuhuhumuna ngwayo Satana asaka kuhungumwisa chikumanyi vaka-kulemesa Yehova. (WaPetulu 1, 5:8; Kusoloka 12:12, 17) Mwomwo yaka? Keshi nge asaka kutujihako, nduma. Satana nachimwe mwandaho chauchi nge natufwa vakushishika kuli Kalunga. Satana ejiva ngwenyi Yehova mwakafumisako kufwa hakusangula vatu mulwola atongola yavene.—Luka 20:37, 38.
6 Satana asaka kwenyeka chuma chachilemu chikuma kuhambakana kuyoya chetu—chuma kana shina kulonga chetu kuli Kalunga. Satana afwila kusolola ngwenyi akwechi ngolo jakutulingisa tulitwamina kuzachila Yehova. Ngocho nge mwatuhonesa kupwa vakushishika—nakulitwamina kwambulula mujimbu wamwaza chipwe kuhona kukavangiza jishimbi javaka-Kulishitu—kaha Satana natufungulula chikupu! (Wavaka-Efwesu 6:11-13) Shikaho kumana “Muka-kweseka” eji kutunehelanga vyeseko.—Mateu 4:3.
7 Satana eji kuzachisanga “tufuta” twakulisezaseza. (Wavaka-Efwesu 6:11, Jewish New Testament) Nahase kutushinjikila kuluheto, kuwoma, kukuhuhwasana havyuma vimwe, chipwe kufwila viseke. Oloze kafuta kangolo ali nakuzachisa chikuma Satana shina kuhomba. Hakupwa muka-kwonga, atachikiza ngwenyi kuhomba chinahase kutuzeyesa kushipilitu nakutulingisa tuhone kumika muvyeseko. (Vishimo 24:10) Chachinenenyi nge ‘tunachikika chikuma’ mumichima, kaha eji kutweseka mangana twechenga kuzachila Kalunga.—Samu 38:8.
8 Omu tuli kwakamwihi nakukuma chatulingilo tuno, chasoloka nge vyuma vyakutulingisa tuhombe navivulilako lika, kaha katweshi vakulihehwa kuvyuma kanako. (Tala lipwata lyakwamba ngwavo “Vyuma Vinahase Kuneha Kuhomba.”) Kuli vyuma vyavivulu vinahase kuneha kuhomba, kaha chinahase kutuzeyesa. ‘Kulilanjila tando’ yakulinga vyuma vyakushipilitu—vyakufwana nge kulinangula Mbimbiliya, kupwanga kukukunguluka chavaka-Kulishitu, nakwazana mumulimo wakwambulula—chinahase kupwa chachikalu nge tunazeye kumujimba, namuvishinganyeka, namumuchima. (Wavaka-Efwesu 5:15, 16) Anuka ngwove Muka-kutweseka asaka etu tulitwamine. Oloze elu keshi lwola lwakuhiluka munyima chipwe kuhona kupwa namuchima wakwanguhwa kupandama kumakumbi ano tuli nakuyoyelamoko! (Luka 21:34-36) Jino muhasa ngachilihi kuhonesa vyeseko nakupwa wakutona? Kekesa vyuma viwana vize vinahase kukukafwa.
‘Lombanga’
9 Pandama kuli Yehova mukulomba. Anuka chakutalilaho chaYesu mulitepa lyaNgetesemane. Vyuma muka alingile omu alizakaminyine chikuma? Alombele Yehova amukafwe ngocho “mavule enyi alingile kupwa nge mamata amanyinga amanene nakusotokela hamavu.” (Luka 22:44) Achilihulike nakushinganyeka hachuma kanechi. Yesu amwijivile chikuma Satana. Omu Yesu apwile mwilu, amwenenga vyeseko vize Satana esekelenga vangamba jaKalunga. Chipwe ngocho, Yesu kashinganyekele ngwenyi mwahasa kuhonesa vyeseko vyosena mwamweseka Satana mungolo jenyiko. Kachi nge MwanaKalunga wakukupuka mwosena alombele kuli Kalunga mangana amukafwe nakumuhana ngolo, chikupu vene etunyi twatela kulomba chikuma vatukafwe.—WaPetulu 1, 2:21.
10 Anuka nawa ngwove Yesu hakukumisa kulweza tumbaji twenyi ngwenyi vatela ‘kulombanga,’ ahanjikile ngwenyi: “Shipilitu yamutu yinazange vene, oloze chisemwa chahamavu [chipwe mujimba] chinahehela.” (Mateu 26:41) Chisemwa muka chahamavu chipwe ngwetu mujimba muka atalishileko Yesu? Katalishile kumujimba wenyiko; mwomwo mujimba wenyi wapwile wakukupuka mwosena. (WaPetulu 1, 2:22) Oloze mijimba yatumbaji twenyi yalihandunwine namujimba wenyi. Mwomwo tumbaji twenyi kavapwile vakukupuka mwosenako kaha nawa vaka-kuvulumuna shili, chikumanyi vasakiwile kuvakafwa mangana vahase kuhonesa vyeseko. (Wavaka-Loma 7:21-24) Shikaho avahuhumwine—kuhakilako navaka-Kulishitu vamuchano vaze vakavangijileho—kulombanga mangana vavakafwe nge vali muvyeseko. (Mateu 6:13) Yehova eji kukumbululanga kulomba kana. (Samu 65:2) Mujila muka? Kafwe mujijila jivali.
11 Chakavanga Kalunga eji kutukafwanga tutachikize vyeseko kana. Vyeseko vyaSatana vyafwana nge miheto yize vanate mujila muli milima. Kachi nge kawamwene miheto kana, unahase kufwamo. Oloze Yehova eji kumunyikanga haze hali miheto yaSatana kuzachisa Mbimbiliya namikanda yahanjika haMbimbiliya, ngocho kutulingisa tulihende kuvyeseko kana. Hamyaka yayivulu, mikanda yahanjika haMbimbiliya, navihande vyahakukunguluka chalifuchi nachechi chachihanda vinatwanunanga haukalu unahase kwiza mwomwo yawoma wakuchina vatu, uvumbi, luheto, navyeseko vyeka eji kunehanga Satana. (Vishimo 29:25; Wavaka-Kolinde 1, 10:8-11; WaChimoteu 1, 6:9, 10) Chikupu vene twatela kusakwilila Yehova hakutulweza tufuta ali nakuzachisa Satana. (Wavaka-Kolinde 2, 2:11) Vyuma vyosenevi atulweza Kalunga vyapwa hikukumbulula kukulomba chetu tunalombonga chakusaka vatukafwe tuhonese vyeseko.
12 Chamuchivali, Yehova eji kukumbululanga kulomba chetu hakutuhana ngolo jakumika vyeseko. Mazwenyi ngwawo: “Kalunga . . . keshi kwitava vamyeseke kuhambakanomu munahashila, oloze hamwe nakweseka kana mwamisela kuulovokelo mangana muchihase.” (Wavaka-Kolinde 1, 10:13) Kalunga keshi kwecha vatweseke kuhambakana hakumina ngolo jetu jakushipilitu jakuhasa kuhonesa vyesekoko—chikalu kaha tunapendamina hali ikiye. Uno eji ‘kutusela ngachilihi kuulovokelo’? Eji ‘kuhananga shipilitu yenyi yajila kuli ava veji kumulombangayo.’ (Luka 11:13) Shipilitu kana yeji kutukafwanga twanuke jishimbi jamuMbimbiliya jize jinahase kutuhana ngolo jakufwila kulinga vyuma vyakwoloka nakutukafwa tusakule vyuma vyamwaza vyakulinga. (Yowano 14:26; WaYakova 1:5, 6) Yinahase nawa kutukafwa tusolole vilinga vyamwaza vize vinahase kutulingisa tuhunge vyuma vyavipi. (Wavaka-Ngalesha 5:22, 23) Shipilitu yaKalunga yinahase nawa kulingisa vakwetu vaka-kwitava vapwenga ‘vaka-kutuvendejeka.’ (Wavaka-Kolose 4:11) Uno kaweshi kusakwilila ngwove Yehova eji kukumbululanga kulomba chove chakulomba mangana vakukafwe nyi?
Kanda Ushinganyeka Ngwove Mukingiwa muVyuma Vyosenako
13 Hakusaka tupwenga vakutona, twatela kwijiva ngwetu kaveshi kukatukinga muvyuma vyosenako. Mwomwo yakutushinyinyika mukuyoya, tuvosena tweji kuhombanga lwola lumwe. Oloze twatela kwijiva ngwetu Kalunga katufwelelesa ngwenyi natukayoya chakuhona ukalu mutulingilo tuno twavyumako. Numba vene mushimbu yaMbimbiliya, vangamba jaKalunga vamwenenga vihuli, luyanjisa, vapwile muuhutu, vahombelenga, kaha nawa vavijilenga.—Vilinga 8:1; Wavaka-Kolinde 2, 8:1, 2; Wavaka-Tesolonyika 1, 5:14; WaChimoteu 1, 5:23.
14 Namakumbi ano nawa tuvosena tweji kumonanga ukalu. Tunahase kumona luyanjisa, kupwa muuhutu wajimbongo, kuhomba, kukola, chipwe kumona ukalu weka nawa. Kachi nge Yehova mwatukinganga mwakukomwesa kuukalu kanou, kaha echi chinahase kulingisanga Satana atombenga Yehova. (Vishimo 27:11) Yehova eji kwechelela vangamba jenyi vaveseke kuli vaka-kole javo chipwe vene kuvajiha washi.—Yowano 16:2.
15 Chipwe ngocho, Yehova atufwelelesa ika? Nganomu tunavuluka lyehi helu, atufwelelesa kutuhana ngolo jakuhonesa vyeseko natuliwana navyo chikalu kaha tunamufwelela chikuma. (Vishimo 3:5, 6) Kalunga eji kutukinganga kushipilitu kuhichila muMazwenyi, nashipilitu yenyi, namuliuka lyenyi mangana tuhase kulama usoko wetu naikiye. Nge usoko wetu naupwa wakuzama lika mbe, numba vene tunafu, kaha tunafukila chikupu. Kakweshi chuma chimwe—numba vene kufwa—chinahase kuhonesa Kalunga kufweta vangamba jenyi vakushishikako. (WavaHepeleu 11:6) Kaha nawa mulifuchi lyalihya lize lili jino mwakamwihi, Yehova mwakatesamo chikupu jishiko jenyi josena jize ashika vatu vaze vamuzanga.—Samu 145:16.
Twatela Kwanuka Vihande Vyavilemu
16 Hakusaka tumike nakusongo, twatela kwanuka vihande vyavilemu vize vyalingisa Kalunga etavise upi hano hamavu. Kachi nge lwola lumwe tuli muukalu waunene kaha tuli mucheseko chakusaka twechenga kuzachila Kalunga, nachiwaha nge natwanuka ngwetu Satana aleunwine wata waYehova wakwoloka. Muka-kutuhungumwisa ahanjika cheka ngwenyi vaka-kulemesa Kalunga kaveshi kuhasa kutwalaho lika kumuzachila Kalunga nakupwa vakulongako. (Yopa 1:8-11; 2:3, 4) Vihande kanevi nomu Yehova azata mangana avikumise chapwa hichuma chachilemu kuhambakana kuyoya chetu. Uno chapwa ngachilihi ngocho?
17 Kalunga hakwitavisa ukalu utwalilileho, chinalingisa vatu veka vatachikize muchano. Achishinganyeke hachuma kanechi: Yesu ayanjile mangana etu tukawane kuyoya. (Yowano 3:16) Kutala katweshi kusakwilila chuma kanako nyi? Kutala tunahase kumika vyeseko numba vene chindende mangana vakwetu vakawanyineho kuyoya tahi? Hakusaka tumike nakusongo, twatela kwijiva ngwetu, mangana aYehova apwa akujindama kuhambakana ayetu. (Isaya 55:9) Kalunga mwakakumisa vilinga vyakuhuka vyosena halwola lwakutamo nakukakumisa chikupu vihande kana haya myaka yosena, ngocho nachikatunganyalisa nayetu nawa haya myaka yosena. Eyi hijila yamwaza yize mwakakumishilamo vihande kanevi. Kalunga keshi kuhengesako!—Wavaka-Loma 9:14-24.
‘Pandama Kuli Kalunga’
18 Hakusaka tupwenga namuchima wakwanguhwa, twatela kupandama kuli Yehova. Kanda muvulyama ngwove Satana ali nakuzata nangolo jenyi josena mangana akumise usoko wetu wamwaza naYehova. Satana asaka etu tufwelele ngwetu kukuma kacheshi kukezako kaha nawa kwambulula mujimbu wamwaza chipwe kuyoya mwaya jishimbi jaMbimbiliya chapwa kulishina kaha. Oloze apwa “muka-kwonga, ikiye ise yacho.” (Yowano 8:44) Ngachize, twatela kufwila ‘kumwimanyina liyavolo.’ Usoko wetu naYehova hichuma chize katwatela kuzelendendako. Mbimbiliya yatulweza ngwayo: “Pandamenu kuli Kalunga, kaha mwapandama kuli enu.” (WaYakova 4:7, 8) Jino muhasa ngachilihi kupandama kuli Yehova?
19 Watela kulihulikanga nakushinganyeka havyuma vyavilemu. Kachi nge uli mucheseko chachinene, kaha watela kumulweza Yehova vyuma vyosena vili mumuchima wove. Nge muvuluka chuma uli nakusaka mumuchima wove, kaha nachipwa chachashi kuli Kalunga kukumbulula kulomba chove. Vyuma mwakumbulula Yehova pamo kavyeshi vilitote navize uli nakusakako, oloze nge mufwila kumuhana kavumbi nakutwalaho kupwa wakulonga, kaha mwakakukafwa mangana ukomike mucheseko kana. (WaYowano 1, 5:14) Kaha hakumona vyuma ali nakukukafwa Kalunga mukuyoya chove, echi nachikulingisa upandame kuli ikiye. Chapwa chachilemu nawa kutanganga nakushinganyeka havilinga najijila jaYehova nganomu vavisolola muMbimbiliya. Kushinganyeka havyuma kana nachikukafwa umutachikize chikuma; nakulingisa muchima wove kumuzanga chikuma. (Samu 19:14) Kaha zangi kaneyi yapwa yayilemu hakukukafwa uhonese vyeseko nakupwa nawa wakutona.—WaYowano 1, 5:3.
20 Chapwa chachilemu nawa kupandama kuli vakwetu vaka-kwitava hakusaka tupandame kuli Yehova. Chishina kanechi natuchishimutwila muchihanda chamakumishilo chambuloshuwa yino.
VIHULA VYACHILONGESA
• Vyuma muka alingile Yesu omu apwile muukalu waunene kwakamwihi nakukuma chakuyoya chenyi chahano hamavu, kaha vyuma muka alwezele tumbaji twenyi valingenga? (Pala. 1-4)
• Mwomwo ika Satana ali nakuyanjisa chikuma vaka-kulemesa Yehova, kaha mujijila muka eji kutwesekanga? (Pala. 5-8)
• Mwomwo ika twatela kulombanga lwola lwosena hakusaka kuhonesa vyeseko (Pala. 9-12), nakwijiva ngwetu kaveshi kukatukinga muvyuma vyosenako (Pala. 13-15), nakwanukanga vihande vyavilemu (Pala. 16-17), ‘nakupandama kuli Kalunga’ (Pala. 18-20)?
[Lipwata halifwo 25]
Vyuma Vinahase Kuneha Kuhomba
Kulikangula chamujimba chipwe kushinakajiwa. Nge twaviza musongo waunene chipwe nge ushinakaji uli nakutuhonesa kulinga vyuma vimwe, echi chinahase kutulingisa tuhombe mwomwo katweshi nakulinga vyavivulu mumulimo waKalungako.—WavaHepeleu 6:10.
Kwivwa kupihya. Tunahase kwivwa kupihya kumuchima nge kuli vatu vavandende kaha vali nakwivwilila kumujimbu wetu wamuMazu aKalunga.—Vishimo 13:12.
Kulivwa wamokomoko. Mwomwo yakumona luyanjisa hamyaka yayivulu, mutu nahase kulivwa ngwenyi vakwavo vatu kavamuzangako, chipwe vene Yehova kamuzangako.—WaYowano 1, 3:19, 20.
Matoto. Nge mutu umwe vanamwivwisa kupihya kuli mukwavo muka-kwitava, echi chinahase kumunehela matoto nakupwa mucheseko chakulitwamina kuyanga kukukunguluka chavaka-Kulishitu chipwe kwazana mumulimo wamuwande.—Luka 17:1.
Luyanjisa. Vatu vaze kavafwelela vyuma wafwelelako vanahase kukwimanyina nakole, kukuyanjisa chipwe kukutoleka.—WaChimoteu 2, 3:12; WaPetulu 2, 3:3, 4.
[Muvwimbimbi halifwo 26]
Yesu atulwezele ‘tulombenga’ mangana tuhase kuhonesa vyeseko