Mukanda WamuMbimbiliya Wakusokesa 64—WaYowano 3
Ausonekele: Kaposetolo Yowano
Kuvausonekelele: Efwesu, chipwe kwakamwihi naEfwesu
Vakumishile Kuusoneka: Kafwe mu 98 C.E.
OU MUKANDA vausonekelele muka-Kulishitu wakushishika Ngayu uze vazangile chikuma kuli Yowano. Vatu vavavulu muvikungulwilo vyakulivanga valilukilenga eli lijina lyaNgayu. Lyasoloka mapapa kawana muMazu-vasoneka achiHelase, hakuvuluka malunga vatatu nyi pamo kwapwile nawa wamuchiwana uze alilukile lijina kana. (Vili. 19:29; 20:4; Loma 16:23; Koli. 1, 1:14) Kavatulweza Ngayu umwe ulihi hali ava wawana uze Yowano asonekelele mukanda wenyiko. Oloze twejiva ngwetu ou Ngayu asonekelele apwile sepa lyaYowano muchikungulwilo chavaka-Kulishitu. Hakusoneka mukanda kana, Yowano azachisa lizu “ove” lize lyasolola nge asonekelele kaha Ngayu ukawenyi.
2 Hakuwana nge mazu akumeneka akuputukilako nawaze akukumishilako amumukanda kanou alifwana nawaze amuli WaYowano Wamuchivali, kaha nawa muka-kusoneka alivuluka ivene ngwenyi “Ami mukulwane,” hiunjiho wasolola nge Yowano chikupu ikiye asonekele namukanda kana. (Yowa. 2, 1) Jila vausonekelamo namijimbu yatwamamo yalifwana nayize yamumikanda yikwavo yivali, ngachize chasoloka nge naukiko vausonekelele muEfwesu chipwe kwakamwihi nachihela kana kafwe mu 98 C.E. Hakupwa wapwa wawihi, kakavulu vaka-kusoneka vakushikulu kavanungulwilenga chikuma mazu atwamamoko. Chipwe ngocho, mukanda kana nauze Wamuchivali yatwama mumikanda yakushikulu muze vasoneka mikanda yize vetavila kupwa yamuMazu-vasoneka vahwima.
3 Mumukanda wenyi, Yowano asangejekele Ngayu hamuchima apwile nawo wakuzumbulanga vandumbwenyi vaze vatambukililenga vikungulwilo. Kaha avulukamo nawa naNdeyotelefwe uze apwile namuchima wakufwila luheto. Ndemetelyu atela ikiye anehele ou mukanda kuli Ngayu, kaha chasoloka nge vamutumine kuli Yowano. Ngocho Ngayu atelele kumutambula kanawa ngana muze vasonekele muli uze mukanda. Ngana mwaNgayu, visoneka kavyatulweza mijimbu yayivulu yaNdeyotelefwe naNdemetelyuko. Oloze mukanda waYowano watulweza omu vaka-Kulishitu vakulivanga valikachile chikuma mukaye kosena. Kaha nawa vatambwilenga nakuzumbula vaka-kutambwojoka vaze “vakatukile haLijina,” numba tuhu vamwe kavavejivileko.—Vesi 7.
OVYO WAPWILA WANGANYO
5 Twima yakaposetolo Yowano yakufwila kukinga chikungulwilo kuvilinga vyavipi yamusolola nge apwile kalama uze ahanyine chakutalilaho chamwaza. Zangi nazumbu vasolwelenga vatu muchikungulwilo yapwile yamwenemwene chikupu, kaha vatelele kutwalaho lika kusolola muchima kanou mangana vandumbwavo vamuchikungulwilo ‘navangeji’ (vatu kavejivile kuli vaka-Kulishitu vakungalila kana) vaze vejilenga vapwenga jino ‘vakwavo muvazachila hamuchano.’ (Vesi 5, 8) Yehova ahunga vatu vakulivwimba. Ndeyotelefwe apwile mutu wakulivwimba kaha nawa kavumbikilenga kunoneka chateokalasi nakulingulula vyuma ahanjikilenga kaposetolo Yowano. (Vishi. 6:16, 17) Atangwilenga vaka-chikungulwilo mangana vahone kusolola zumbu kuli vakwavo vaka-Kulishitu. Ngachize, Yowano ahanjikile hatoma omu vyapihya vilinga kanevi, nakusangejeka vaka-Kulishitu vamwenemwene vaze vasolwelenga zangi muchikungulwilo. Makumbi ano, twatela kukilikita numba tulinyise nakutambuka mumuchano, nakusolola zangi nazumbu mangana tukavangize mazu aYowano akwamba ngwenyi: “Muka-kulinga mwamwenemwene apwa mutu waKalunga, oloze muka-kulinga mwamupi kamumwene Kalungako.”—Yowa. 3, 11.