Mukanda wamuBayibolu Naambala 47—2 Akorinda
Nsoneki: Pawulu
Awisonekeleli: muMasidoniya
Awimanishili Kuwusoneka: Kwakwihi na 55 C.E.
HADAHA kwadiña kukamwihi namayinza hela ntachikilu yakukuma kwa 55 C.E. Muchipompelu chawakwaKristu chakuKorinda mwadiña nyiloña yikwawu yadiña nakumwakamesha kapostolu Pawulu. Mwahitili hohu tukweji twanti nampinji yasonekeliyi mukanda windi watachi kudi Akorinda. Kufuma tuhu yina mpinji Titusa amutemesheli kuKorinda nakukwasha kutambula yawana yawantu ajila muYudeya hadaha nikutala chiyeliluwu Akorinda namukanda watachi wasonekeluwu. (2 Kor. 8:1-6; 2:13) Indi mukanda weniwu awumweni ñahi? Pawulu watiyili muzañalu muloña welukili nindi mukanda weniwu wayileñeleli kwikala nachineñi nikubalumuka munyichima yawu. Titusa wafuntili nawunsahu wawuwahi kuMasidoniya kwadiñayi Pawulu, nawa kapostolu watiyili kuwaha kumuchima nawana kwindi akakwitiya akeñewa amuKorinda.—7:5-7; 6:11.
2 Dichi Pawulu wayisonekeleli cheñi Akorinda. Iwu mukanda wamuchiyedi wamazu akuzañalesha nawa wañovu awisonekeleleli kuMasidoniya nawa hadaha awutemesheli naTitusa. (9:2, 4; 8:16-18, 22-24) Chuma chimu chakameneniyi Pawulu chamuletesheli kuyisonekela ‘hiyapostolu asweja kulema,’ adiña muchipompelu chawaKorinda yalumbulwiliyi cheñi nindi “hiyapostolu akutwamba, hiyakwakukalakala akudimbana.” (11:5, 13, 14) Wuspiritu wachipompelu chanyanya wadiña muwubanji, nawa ñovu jaPawulu jakukalakala hamu neyi kapostolu jadiña mukukala. Dichi mukanda wamuchiyedi wayisonekeleliyi Akorinda wenzeli nayuma yayivulu yakeñekeleña.
3 Chinateli kwilukewa nawu Pawulu wahosheli nindi: “Yami nukwinza kudenu owu, kapampa kamuchisatu.” (2 Kor. 12:14; 13:1) Wafuukwiluhu kuyihempula kamuchiyedi hampinji yasonekeliyi mukanda windi watachi, hela chakwila wadiloñesheli ‘kuhempula kwamuchiyedi kwakuleta muzañalu’ hikwazatikiluku. (1 Kor. 16:5; 2 Kor. 1:15) Kafwampi Pawulu wayili kwenakuna kamu mu 50-52 C.E., hadi tukweji 18 hampinji yatachikiluwu chipompelu chawakwaKristu muKorinda. (Yil. 18:1-18) Hela chochu, Pawulu wanukili kushikija mazu ahosheliyi akuhempula Akorinda cheñi. Hampinji yadiñayi muGreece hadaha mu 56 C.E., wamanishilili mpinji yeneni muKorinda, nawa diku kwayisonekeleliyi Aroma mukanda.—Rom. 16:1, 23; 1 Kor. 1:14.
4 Mukanda waAkorinda wamuchiyedi mpinji yejima awuchindilaña hamu naAkorinda wamuchimu ninyikanda yikwawu yasonekeliyi Pawulu hamu neyi nyikanda yalala yamuBayibolu yetejawu. Tudi nañovu yakushinshika cheñi mukachi kachipompelu chakuKorinda nikuhetela mumazu aPawulu onenewa ahosheliyi kulonda kuyikonkomwena hamu ninetu.
CHIWAWAHILA
18 Pawulu wakolesheli nikuhameka mudimu wakushimwina wawakwaKristu neyi chinamwekeshiyi muAkorinda wamuChiyedi. Twatela kumona mukanda weniwu neyi chawumweniyi Pawulu. MukwaKristu nawa mukwakukalakala wadizishawu kudi Nzambi bayi neyi himukwakushimwina Izu daNzambi hohuku ilaña wakalakalaña nakashinshi. Yuma yamuhamekeluwu hiyadiña hayuma yasonekeliyuku, ilaña nyikabu yafumini mumudimu wakushimwina. Hela chakwila mudimu wakushimwina wekala wawuwahi, chumichi hichamuleñeleli kuditiyaku. Ambuña aNzambi abula kumaninina alemesha mudimu weniwu neyi chonzelu chabula kukola, nawu ñovu jikali jaNzambi. Dichi chumichi chakeñekaña kudikehesha hakwila nawu twiteji mudimu wawuwahi wakwikala akwakukalakala aNzambi, nawa Nzambi watwitiyilaña luwi lwabadika hakukalakala hamu neyi ‘atuñanda twaKristu.’ Kukonkomwena kwaPawulu kwadiña kwashikila hakwila nindi, “hitukuyilembelela netu, bayi mutambula luwi lwaNzambi chamukunkulwayiku.”—2:14-17; 3:1-5; 4:7; 5:18-20; 6:1.
19 Pawulu wemikili chakutalilahu chachiwahi chatela kwimbujolawu akwakukalakala aKristu. Cheñi nawa, Pawulu walemesheli nikudiza Nyikanda yachiHeberu, nikuyisombojola kakavulu nikujizatisha. (2 Kor. 6:2, 16-18; 7:1; 8:15; 9:9; 13:1; Isa. 49:8; Lev. 26:12; Isa. 52:11; Ezek. 20:41; 2 Sam. 7:14; Hos. 1:10) Kubombelahu, hamu neyi nkoñi, wakameneni chikupu anyikoku nawa wahosheli nindi: “Nukutiya kuwaha nankashi kudikisañana, hela kudihana ami aweni kukoola wumi wenu.” Wadihanini chikupu kukoola amana kwindi, neyi chinamwekeshi nsañu. (2 Kor. 12:15; 6:3-10) Wakalakeli mudimu windi nañovu nawa chakubula kuleka hampinji yadizishileñayi, wakolesheli, nikwolola yuma muchipompelu chakuKorinda. Wakonkomweneni chakadi kuhita mumbadi hakubula kudikunda namwidima, nawa walejeli Akorinda nindi: “Bayi mudibombaña nawabula kwitiya mumpanda yoyimuku.” Hamuloña wakukeña kwayikeñeliyi, hakeñeli kumona yitoñojoka yawu kuluwankanaku “neyi chamudimbiluwu Evu kudi kapela namaanindi,” dichi wayikonkomweneni chikupu nindi: “Desekenu ntahi, mutali neyi mudi mukwitiya kwakukuhwelela; dishinshikenu.” Wayikolesheli kwikala nachililu chawakwaKristu chakuhana, nikuyilumbulwila nindi “Nzambi wakeña muntu wahanaña nakuseha,” nawa yomwenindi wahamekeli Nzambi chikupu hawaana Windi wakubula kutwesha kulumbulula. Chalala Pawulu wayisonekeleli amana kwindi akuKorinda nakukeña kwakufuma mumuchima windi, nawa kudihana kwindi mumudimu kulonda kuyikwasha kwadiña muyuma yejima kwamwekesheli chinjikijilu chakwikala namuzañalu, nikwikala nkoñi watona chikupu. Ichi hichakutalilahu chachiwahi chitwatela kulondela makonu!—2 Kor. 6:14; 11:3; 13:5; 9:7, 15; 3:2.
20 Kapostolu Pawulu walombweli yitoñojoka yetu munjila yayiwahi hakushimuna nindi “Tata wavulishaña luwi, Nzambi wakukundeja kwejima” hamu neyi nsulu yañovu yalala mumpinji yamakabi. Diyi “watukundejaña mulukadi lwetu lwejima” hakwila nawu tutweshi kuumika kulonda tukapuluki nakwiñila mwituña dadiha. Pawulu wahosheli cheñi hakuchiñeja kwakuwahi kwakwikala ‘netala dakutuña kudi Nzambi, dakadi kutuña namakasa, dahaya nyaka mumawulu,’ nawa wahosheli nindi: “Dichi muntu wudi mudi Kristu, anamuleñi dehi chachiha; yuma yayikulu yinahiti dehi, komana yuma yejima yinabalumuki dehi yayiha.” Chalala mukanda waAkorinda wamuchiyedi wekala namazu amawahi akanawu antu adi neyi Pawulu akaswana Wanta wamwiwulu.—1:3, 4; 5:1, 17.