August

Fwikijenu chakoleli njita nichazeyeliwu amashidika awaIsarela alombweliwu kudi Nsompeshi Gideyona hakuzuña nawayilumbu jawu. Gideyona nawantu jindi ahañili aMidiyani niantu jawu wufuku wejima hadi makilomita 32. Awa ayilumbu ayiyandishili aIsarela hadi yaaka yayivulu, dichaletesheli atwalekuhu kuyihaña. Dichi, Gideyona nawantu jindi atwalekeluhu kuhaña ayilumbu jawu sampu nichashindiliwu. (Ansomp. 7:22; 8:4, 10, 28.) Ninetu tunakuzuña njita yakola nawa yakuzeyesha. Satana, kaayi kindi nikubula kuwanina diwu ayilumbu jetu. Etu amakwawu tunazuñi nanawa ayilumbu hadi yaaka yayivulu. Tunashindi njita yayivulu nawukwashu waYehova. Hela chochu, kanda tushindi njita yakukumishaku. Mpinji yikwawu twazeyaña iku tunakuzuña. Tunateli kuzeya nakuhembelela kukuma kwakanu kaayi. Yesu watusoñamishili nindi tukamona kukala kweneni nimakabi munanu mafuku akukuminina. Ilaña wahosheli cheñi nindi neyi tuumika, tukushinda.—Luka 21:19. w16.04 2:1, 2

Hakupompa, twadizaña Bayibolu nikudizila kudi Yehova chitwatela kwila nichakushakama. (Isa. 30:20, 21) Niantu abula kwikala aYinsahu jaYehova neyi aya nakupompa, elukaña nawu Nzambi nakutulombola. (1 Kor. 14:23-25) Yehova walombolaña kupompa kwetu naspiritu yindi yajila, nawa diyi watudizishaña. Dichi neyi tunayi nakupompa, twatiyililaña chinakuhoshayi Yehova, twelukaña chatukeñayi nawa twakundamaña kwakwihi nayena. Yesu, Mutu wachipompelu wahosheli nindi: “Kunapompi hela ayedi hela asatu mwijina dami, diku kunidi mukachi kawu.” (Mat. 18:20) Bayibolu yahoshaña cheñi nawu Yesu “wendaña mukachi” kayipompelu. (Chim. 1:20–2:1) Mwamweni, Yehova niYesu adi nanetu nawa atukoleshaña hakupompa. Munakutoñojoka nenu Yehova watiyaña ñahi neyi yamona munakufwila kukundama kwakwihi nayena niMwanindi? w16.04 3:13, 14

Muhela wemushili amanakwetu ayedi. Ilaña manakwetu wumu wahilili nachamwimushiliwu kudi muhela. Chayiliyi muhela, manakwetu wahilili watachikili kutoba hadi muhela. Ilaña, manakwetu mukwawu wamulejeli nindi iwu muhela namukalakeli Yehova nakashinshi hadi yaaka 40 hela chakwila wamonaña kukala. Iwu manakwetu welukili nindi muhela wakeñeleña wanyi kumuneñesha. Indi manakwetu wahilili welili ñahi? Wahosheli nindi, “Muwunahoshi dimu.” Dichi wadiwili yuma yamwekeni. Tunateli kudizila kwodi kunichi chuma chamwekeni? Neyi muntu yatuhilisha, tunateli kufuukula chitukwila. Muntu wukweti kukeña wanakenaña. (Yish. 10:12; 1 Pet. 4:8.) Neyi ‘tudiwula mwanatuvulumuniwu,’ Yehova wukutiya kuwaha. (Yish. 19:11) Neyi muntu yakahosha hela kwila yuma yikayineñesha, kadihulenu nenu: ‘Natela kudiwulaku? Natela kutwaleka kutoñojokahu?’ w16.05 1:8, 9

Anyi anakushimwina nsañu yayiwahi yaWanta makonu? A Yinsahu jaYehova hohu. Tuneluki ñahi? Muloña tunakushimwina nsañu yalala, nsañu yayiwahi yaWanta. Tunakuzatisha njila yayiwahi yakushimwina muloña twakeñakeñaña antu. Twashimwinaña muloña twamukeña Yehova niantu. Mudimu wetu wakushimwina wunashiki kwejima muloña twashimwinaña kudi antu akunyunza yejima nimumadimi ejima. Nawa tukutwalekahu kushimwina nsañu yayiwahi yaWanta nichakenza kukuma. Mudimu wakushimwina nsañu yayiwahi wunakuzatawu antu jaYehova munanu mafuku akukuminina wakuhayamisha. Hanu dinu tunakutwesha ñahi kuzata iwu mudimu? Kapostolu Pawulu wahosheli mazu adi munsona yefuku dalelu. Yehova yatwalekuhu kutukolesha kulonda tuzateña hakumina ñovu jetu mumudimu wakushimwina nsañu yayiwahi!—2 Tim. 4:5. w16.05 2:17, 18

Yehova watwinka wuswa wakudifuukwila. Watwiteja kuditondela etu aweni kumwovwahila hela nehi. Neyi tutonda kumwovwahila nikuzata nañovu kulonda twileña nkeñelu yindi, tukumwekesha netu twamukeña nawa tunakufwila kumutiyisha kuwaha. Satana wahoshaña nindi Yehova wudana wuswa wakuyuula. Ilaña neyi tumwovwahila Yehova, tukumwekesha netu tunakukeña Nzambi kwikala Nyuuli yetu. Nawa tukukuhwelela netu Tata yetu wukweti kukeña walemesha chitwazataña nañovu hakwila nawu tumwovwahili. (Yoba 2:3-5; Yish. 27:11) Neyi tukuzata nañovu kulonda tushindi kuzeya-zeya kwetu hela chakwila chakala kwila mwenimu, tukumwovwahilaña Yehova nawa tukumwekeshaña netu tunakukeña yekali Nyuuli yetu. Yehova watulejaña nindi twatela kuzata nañovu hakwila nawu twimbujoli yilwilu yindi. (Kol. 3:12; 2 Pet. 1:5-7.) Wakeñaña cheñi nindi tuzateña nañovu kulonda tutoñojokeña yuma yayiwahi nikuleka kufwila yuma yatama. (Rom. 8:5) Neyi tuzata nañovu netu tuhimpi nawa mwalala tuhimpa, twatiyaña kuwaha. w16.05 4:12, 13

Yehova, Kañemi ketu, watwiluka chiwahi. Weluka kuzeya zeya kwetu, weluka yuma yitukutwesha kwila niyitukukañanya kwila nawa welukaña chitunakuzata dichi watwiwumbaña kwesekeja nachatwilukayi. (Mas. 103:10-14.) Tunateli kwiluka chatumonañayi Yehova neyi tushinshika cheliliyi Yesu nawatumbanji twindi hiyaluwañesheleñawu. Mpinji yikwawu, apostolu aditadikishileña nawu wabadika hinyi. Neyi mwadiñaku, mwadi kumona ñahi yilwilu yawapostolu? Hadaha mwadi kutoñojoka nenu hiyadiña neyi ndambu yayovuku. Ilaña, Yesu welukili nindi nateli kuyiwumba neyi chakwila atiyilila kukufumba kwindi nikwikala adizoza neyi yena. (Maku 9:33-37; 10:37, 41-45; Luka 22:24-27) Chasañukiliyi Yesu, apostolu atambwilili spiritu yaNzambi nawa alekeli kutoñojoka hadi wadiña mukulumpi. Ashili maana hamudimu wayinkeliyi Yesu.—Yil. 5:42. w16.06 1:10

Yehova diyi Nzambi walala hohu nawa kwosi nzambi wudi neyi yena. (2 Sam. 7:22) Dichi mazu aMosi ayanukishileña aIsarela nawu atela kudifukula kudi Yehova hohu. Hiyateleli kwimbujola antu ashakamineñawu nawu adifukwileña kudi anzambi akutwambaku. Ana antu akuhweleleli nawu anzambi jawu adiña nañovu yakuyuula yileñaleña. Chakutalilahu, aEjipitu adifukwileña kudi nzambi wamutena Ra, nzambi waluzwizu Nut, nzambi weseki Geb, nzambi wakaloña Nile Hapi, kushilahu niatunyama. Yehova wamwekesheli nindi wabadika awa anzambi akutwamba hampinji yaleteliyi Yipupu 10. Nzambi walemesheliwu nankashi aKenani wadiña Bayali, nzambi wakutwamba akuhweleleliwu nawu diyi waleñeli wumi. Akuhweleleli cheñi nawu diyi nzambi waluzwizu, wanvula ninvula yampepela. Mumaluña amavulu, antu amukuhweleleli Bayali kuyikiña. (Kuchi. 25:3) A Isarela ateleleli kwiluka nawu Nzambi yawu, ‘Nzambi walala,’ wadimena. “HiYehova wumu hohu.”—Kuhit. 4:35, 39. w16.06 3:4, 5

Chuma cheliliyi Yesu chatudizishaña kwikala ashinshika kudi Yehova niantu jindi. Dichi twatela kumwimbujola. Mwalala Yehova nakulombola ambuñindi munanu mafuku akukumina. Nakuyikwasha kushimwina chalala mukaayi kejima nawa diwu hohu anakuzata iwu mudimu. Cheñi, anuñañana nawa adi namuzañalu muloña wayuma yinakuyidizishayi Yehova. Yehova wahosheli haIsaya 65:14 nindi: “Tiyenu, ambuñami akembaña tumina twachiseki mumuchima.” Tudi namuzañalu muloña Yehova nakutulombola nikutukwasha kwila yuma yayiwahi. Ilaña, antu mukaayi kaSatana hiyakweti muzañalu nikuchiñeja kwalalaku. Twatela kwikala ashinshika kudi Yehova nikulondela wunlomboli windi. w16.06 4:10-12

Tunateli kudizila kudi antu akushankulu kutalisha hakulema kwakwikala atona. Hayina mpinji, nyisumba yamaneni chidi neyi Yerusalema, ayituñili nampwembu jajilehi. Iji mpwembu jakiñileña antu kudi ayilumbu jawu nawa jakwashileña antu kumona yuma yinakumwekana hahalehi. Atulama ashakamineña hewulu dampwembu nihayisu mwaana niwufuku. Asoñamishileña antu mumusumba neyi kudi ayilumbu anakwinza. (Isa. 62:6) Neyi atulama kusoñama nikusha maana kumudimu wawu nehi, antu akwikala muwubanji. (Ezek. 33:6) Mukwakushimuna nsañu yakunyaka hadi aYudeya Josephus wahosheli nindi, mashidika awaRoma atwesheli kutambula musumba waAntonia mu 70 C.E., nawa ahumwini mpwembu jaYerusalema muloña atulama adiña mutulu. Dichi, aRoma eñilili mutembeli nakuyocha, dihatachikili lukadi lwasweja lwabulili kumonawu dehi muYerusalema nimudi aYudeya. w16.07 2:2, 7, 8

Hela chakwila twatambwilaña nkisu jajivulu kufuma kudi Yehova muloña waluwi lwindi, bayi tutoñojoka netu wetejaña yilwilu yejimaku. Hakachi kawakwaKristu akusambila, hadiña amakwawu akeñeleña ‘kubalumuna luwi lwaNzambi kwikala kubajama.’ (Yuda 4) Awa akwaKristu abula kushinshika hadaha atoñojokeleña nawu anateli kukoña nshidi nawa Yehova wukuyanakena. Atachikili cheñi kukokola amanakwetu kulonda adibombi nawu hamu mukwila yuma yatama. Nimakonu, muntu wukwila mwenimu ‘nasawuli spiritu yaluwi.’ (Heb. 10:29) Makonu, Satana nakudimba akwaKristu amakwawu kutoñojoka nawu chineli Nzambi wukweti luwi, anateli kukoña nshidi chakubula kuyibabesha. Hela chakwila Yehova nateli kutwanakena neyi tubalumuka, wakeñaña nindi tuzateña nañovu kulonda tubuleña kwila nshidi. w16.07 3:16, 17

Kudiseña kwakubula muloña wawuvumbi kukukwojeja muntu kubula kusumbula hela kusumbuka namuntu wacheñi. Hela chochu, muntu nateli kutondahu kwamwanakena mwinikwindi wunavulumuni neyi cheliliyi kaprofwetu Hoseya wanakeneni ñodindi chivumbi, Gomeri. Munjila yoyimu, Yehova wayitiyilili luwi aIsarela abalumukili munyichima hanyima yakwila wuvumbi wakuspiritu. (Hos. 3:1-5) Kubombelahu, neyi muntu neluki nindi mwinikwindi neli wuvumbi ilaña yakama nindi, dikwila nawu namwanakeni nawa wukuzatisha wanyi Nsona jahosha hakuseña. Hanyima yakuhosha mazu adi munsona yefuku dalelu, Yesu wahosheli cheñi kutalisha hadi ‘enkawu chawana’ chakushakama wujiki. Wabombelelihu nindi: “Yowu natweshi kutambula, atambuli.” (Mat. 19:10-12) Amavulu atondahu kushakama wujiki kulonda amukalakeli Yehova chakadi yuma yakuyiluwañesha. Twatela kuyihameka. w16.08 1:15, 16

Atwansi akweti ñovu yakukoña yuma yayivulu mumudimu waYehova. (Yish. 20:29.) Atwansi amakwawu haBeteli azataña mudimu wakupulinta maBayibolu ninyikanda yashindamena haBayibolu. Amanakwetu niahela amavulu achinyiki azataña mudimu wakutuña nikuwahisha Matala aWanta. Neyi kunamwekani wubanji wadimwekenaña waweni, atwansi amavulu azatilaña hamu nawaYinsahu akuluka yitembi kukwasha adi muwumbanji. Nawa apayiniya amavulu achinyiki atwalaña nsañu yayiwahi kumatuña acheñi nimumaluña mwahoshañawu madimi acheñi. Ñimbi yamasamu wembili nindi: “Amukeñakeñaña Yehova hiyakabula chuma chachiwahi nichimuku.” (Mas. 34:10.) Mwalala, Yehova hakatiyisha nsonyi antu amukalakelaña neyenaku. Chitwazataña nañovu jetu jejima mumudimu windi, ‘twatompaña nakutiya chawahayi Yehova.’ Nawa neyi tudifukulaña kudi Nzambi nawumi wetu wejima, tukwikalaña namuzañalu weneni. w16.08 3:5, 8

Yehova nateli nawa wafwilaña kutukolesha kuzatisha spiritu yindi yajila. (1 Kushi. 29:12) Chalema kushindamena haniyi spiritu kulonda yitukwashi kushinda kukala kwejima kwatuletelañayi Satana nikaayi kindi katama. (Mas. 18:39; 1 Kor. 10:13) Cheñi, twatela kusakilila muloña tukweti Izu daNzambi, dasonekeliwu kuzatisha spiritu yajila. Toñojokenu cheñi hayakuda yakuspiritu yashindamena haBayibolu yitwatambwilaña kakweji nikakweji. Mazu ekala haZekariya 8:9, 13 ayihosheli hampinji yadiña nakutuñululawu tembeli muYerusalema, nawa awa mazu amawahi nikudi etu. Atukoleshaña cheñi kuhitila munshimbi jitwatambwilaña hakupompa kwetu kwawakwaKristu, kupompa kwanyanya, kupompa kweneni, nimumashikola etu awakwakushimwina. Iku kudizisha kwatukwashaña kwikala nayilwilu yayiwahi, kwimika yikonkwanyi yakuspiritu nikuzata chiwahi nyidimu yetu yawakwaKristu. (Mas. 119:32) Komana mwafwilaña kwikala nañovu kuhitila mushikola yamuchidiwu? w16.09 1:10, 11

Nshimbi jaNzambi jayinkeliwu aIsarela, jamwekesheleña Yehova chaheleliyi yakuvwala yabulileña kumwekesha chaambu hakachi keyala namumbanda, yinakutenawu munanu mafuku etu nawu yakuvwala yamuntu wudi wejima, chili weyala hela wamumbanda. (Kuhit. 22:5) Kwesekeja nanshimbi jahaniniyi Nzambi kutalisha hayakuvwala, tunamoni chikupu netu Nzambi hatiyaña kuwaha nanyitapu yayakuvwala yaleñelaña iyala yamwekaneña neyi himumbanda, mumbanda niyena yamwekaneña neyi hiiyala hela yaleñelaña chikali kwiluka chaambu chidi hakachi keyala namumbanda. Mwizu daNzambi mwekala yishina yakwashaña akwaKristu kufuukula chiwahi hansañu yakuvwala. Hichikweti muloña neluña kwashakamañawu, chekala chisemwa chawu hela chekala chihandilu kunodu iluñaku. Hitwatela kusoneka ndandanda yayakuvwala yatelela niyakuvwala yabula kutelelaku. Ilaña, yishina yamuNsona diyatukwashaña kutonda yakuvwala yitwatela kuvwala. w16.09 3:3, 4

Shinshikenu hakuhamuka nikashinshi kadiña nawantu asonekeli Bayibolu. Ansoneki amavulu akushankulu ahamekeleña anlomboli jawu nikulemesha mawanta awu. Hela chochu, atuprofwetu aYehova mpinji yejima ahosheleña walala. Ashimwineña yiluwa yakoñeleñawu antu jawu kushilahu nianyanta jawu. (2 Kushi. 16:9, 10; 24:18-22) Nawa ashimwini hatooka yiluwa yawu niyawambuña amakwawu aNzambi. (2 Sam. 12:1-14) Antu amavulu akuhwelela chikupu nawu Bayibolu ayoneneni kudi Nzambi muloña wayishina yekalamu yalombolaña antu. (Mas. 19:7-11) Yishina yamuBayibolu yatukiñaña kuntañishilu yakutwamba nikukupesha kuneñiji antu amavulu muwuduñu. (Mas. 115:3-8) Ntañishilu yamuchidiwu yakwila nawu yuma yadileñeli yayeni, kafwampi chidi neyi abalumunaña yileñaleña kwikala nzambi yawu nikuyinka ñovu yekala naYehova hohu. Antu akuhwelela nawu kwekala Nzambi wanyi ahoshaña nawu chihandilu chetu chakumbidi chashindamena hadi etu aweni. Antu amuchidiwu hiyakweti kuchiñeja kwalala kwakumbidiku.—Mas. 146:3, 4. w16.09 4:10, 11

Bowazi wamwakameneni Luti nichihandilu chindi hakwikala ñiinza. Chatachi, wamulejeli kulonda yashakami nawakwawu ambanda kulonda abuli kumwila chatama kudi amayala adiña nakuzata mwiha. Wamulejeli cheñi nindi watela kusenda yakuda yashikila nimenji amavulu, neyi chasendeleñawu akwakuzata. Kubombelahu, Bowazi wamusawili wanyi iwu mumbanda ñiinza, ilaña wamukolesheli. (Luti 2:8-10, 13, 14) Bayi neyi Bowazi wamukeñeli Luti muloña wakwila Luti wakeñeli mukuwindi wamumbanda Nawomi hohuku, ilaña watiyili kuwaha muloña wekalili mukwakudifukula waYehova. Kukeña kwamwekesheliyi Bowazi kwamwekesheli kukeña kwaYehova kwakeñeliyi mumbanda wenjili nakukeña ‘kubatama mumpuula jaNzambi yawaIsarela.’ (Luti 2:12, 20; Yish. 19:17) Munjila yoyimu, makonu yilwilu yetu yakukeña yinateli kukwasha “antu ejima” kwiluka chalala nikwiluka chasweja kuyikeñayi Yehova.—1 Tim. 2:3, 4. w16.10 1:10-12

Ninetu nawa tunateli kumulejamu Yehova yuma yejima yidi kumuchima wetu, nakukuhwelela netu wukututiya nawa wukutukwasha kuumika. Nawa neyi kulomba kwetu akwakula, chikuhwelelu chetu chikukola. (1 Yow. 5:14, 15.) Chineli chikuhwelelu himukabu waspiritu, twatela ‘kutwalekahu kulomba’ spiritu yaNzambi neyi chatulejeliyi Yesu. (Luka 11:9, 13) Hela chochu, hitwatela kulomba hohu netu Nzambi yatukwashiku. Tunateli kumuhameka Yehova hefuku-hefuku muloña ‘wanyidimu yindi yakuhayama yakukañanya kuchinda’ yatwililayi. (Mas. 40:5) Cheñi, neyi tunakulomba twatela kulombelaku ‘adi mutuleya neyi kwiji atukasila hamu nawu.’ Nawa twatela kulombelaku amanakwetu mukaayi kejima, sweje-e ‘anakulombola mukachi ketu.’ Twazañalalaña neyi tumona Yehova naakuli kulomba kwetu kwakwikala anuñañana.—Heb. 13:3, 7. w16.10 3:8, 9

Makonu, antu jaYehova anatwalekihu kukuhwelela muWanta waNzambi waloñeshayi. Chinafumimu, antu jaYehova kubadika ha 8 miliyoni mukaayi kejima adi muparadisa yakuspiritu. Hiiluña mwenzala nyikabu yaspiritu yaNzambi. (Ŋal. 5:22, 23) Chakadi nikujina, akwaKristu alala anakumwekesha chikuhwelelu nikukeña. Kwosi muntu wunatweshi kwila mwenimuku. Nzambi yetu diyi wunazati mudimu wejimiwu. Iwu mudimu wawuwahi wunakuleta ‘mpuhu hejina daYehova, nichinjikijilu chakwiluka nachu haya nyaka.’ (Isa. 55:13) Paradisa yetu yakuspiritu yikutwalekahu kutohelaku sampu iseki dejima dinenzali nawantu awanina, aloña nawa amuzañalu kulonda akahameki ijina daYehova. Dichi, tutwalekenuhu kukuhwelela muyikaninu yaYehova. w16.10 4:18, 19

Twatela kulondela kufumba kwamuBayibolu kutwatambwilaña kudi aeluda. Anukenu kufumba kwaPawulu kutalisha hadi antu abulaña kulondela nshimbi muchipompelu. Antu amakwawu ‘adiña nakudiñija munsañu yabula kuyikundama.’ Chakadi nikujina ayifumbili kudi aeluda ilaña atwalekelihu kukaana mwayifumbiliwu. Indi chipompelu chelileña ñahi nawantu amuchidiwu? Pawulu wafumbili nindi: “Mushinshikenu, bayi mushakama ninduku.” Hela chochu antu hiyatela kumumona neyi kwiji hichilumbuku. (2 Tesa. 3:11-15) Makonu aeluda anateli kuhana mpanji kutalisha hadi muntu wunakutwalekahu kwila yuma yinateli kutamisha chipompelu, yidi neyi kudiiluka namuntu wabula kwikala Chinsahu. (1 Kor. 7:39) Mwelaña ñahi neyi aeluda ayifumba? Neyi munelukihu muntu wudi nayilwilu yinakuhoshawu muniyi mpanji, mukuleka kudikunda nindi? Kukeña kumukumwekesha nichimukufuukula kukuletesha muntu kuleka yilwilu yindi yatama. w16.11 2:13

Hefuku daPentekosta 33 C.E., aYudeya amavulu niantu abalumukili kwikala aYudeya ayiwayishili naspiritu yajila. Awa akwaKristu amaha ekalili “muchidi watondewa, atupristu awanta, muza wajila, antu elishawu kwikala iheta dadimena.” (1 Pet. 2:9, 10.) Apostolu atwalekelihu kuhemba chiwahi yipompelu yawantu jaNzambi. Hela chochu, hanyima yakwila apostolu anafwi dehi kwekalili antu ahosheleña “yuma yaheña” kulonda ‘akadikokeli atumbanji awenawu.’ (2 Tesa. 2:6-8) Awa amayala adiña nayifulu yayivulu muchipompelu, yidi neyi wukulumpi ‘niwubishopu.’ Hela chakwila Yesu wahosheli nindi: “Wejima wenu ivumu denu dimu” ilaña adiña nashikola yawakulumpi jansakililu. (Mat. 23:8) Antu aya mpuhu adizili chikupu nsañu yasonekeliwu aAristotle niPlato diwu aleteli ntañishilu yansakililu yakutwamba, atachikili kufumishamu chovu-chovu nsañu yalala yaMwizu daNzambi. w16.11 4:8

Henohu kanda twikali akwaKristu, twavulumwineña, hadaha chakubula kwiluka chatiyileñayi Nzambi nanshidi jetu. Twadiña “anduñu yawuzondu nijakuluwa.” Tunateli kuhosha netu twadiña “anduñu janshidi.” (Rom. 6:19, 20) Ilaña twelukili chalala chamuBayibolu, twahimpili chihandilu chetu, twadihanini kudi Nzambi nawa twapapatisheweli. ‘Atwifumishili muwuduñu’ nawa ‘twekalili anduñu jakuloña.’ (Rom. 6:17, 18) Ilaña, tunateli ‘kwiteja nshidi kutwiyuula’ neyi twila yuma yakeñaña mujimba wetu kwila. Chineli tunateli ‘kwiteja’ hela kukaana nshidi kutwiyuula, twatela kudihula netu, Chumanyi chinakukeña muchima wami? Dihulenu nenu: ‘Komana netejaña mujimba wami niyitoñojoka yami yabula kuwanini kwila yuma yatama? Tahindi nafwa kunshidi? Dichi twatela kusakilila chikupu haluwi lwasweja lwaNzambi lwamwekesheliyi hakutwanakena. w16.12 1:11, 12

Njila yimu yakuletelamu kuwunda hikufwila kuleta kuwunda nawataña jetu niamanakwetu nihela muchipompelu. Tweluka netu wejima wetu twawanina wanyi. Dichi mpinji yikwawu kukala kwenzaña, ilaña twatela kulondela kufumba kwaYesu kwakwila nawu: ‘Tiyañanaku namana kweyi.’ (Mat. 5:24) Chumichi chikutupelela neyi twanuka netu manakwetu hela muhela niyena nakumukalakela ‘Nzambi wahanaña kuwunda.’ (Rom. 15:33; 16:20) Kudi kuwunda kukwawu kwasweja kulema. Twekalaña mukuwunda naNleñi yetu neyi ‘tutoñojokaña hayuma yakuspiritu.’ Isaya wasonekeli mazu ashikijeweli hayina mpinji, nawa anakushikijewa chikupu makonu akwila nawu: “Muntu wukweti yitoñojoka yashindamena hadeyi [Yehova] wakamuhemba, wakatula muchima windi mwivumu hi-i nanochu chakukuhwelelayi eyi.”—Isa. 26:3; Rom. 5:1. w16.12 2:5, 18, 19

Nimunanu mafuku akukuminina akaayi kaSatana katama, Yehova nakukiswila antu jindi. Wenkaña akwakudifukula indi yakuda yayivulu yakuspiritu. (Isa. 54:13) Neyi chochashiikiliyi Yesu, Yehova nakutukiswila makonu kuhitila mutwiteja kwikala muchisaka chakuspiritu chawamanakwetu niahela mukaayi kejima. (Maku 10:29, 30) Kubombelahu, antu ejima amukeñakeñaña Nzambi ayikiswilaña kuhitila mukuyinka yitoñojoka yakuwunda, kumona yuma yikwetiwu nawu yinawanini nimuzañalu. (Fwi. 4:4-7) Ilukenu nenu neyi “muneli dehi muchima waNzambi mwakatambula chikaninu.” (Heb. 10:35, 36) Dichi tutwalekenuhu kukolesha chikuhwelelu chetu nikumukalakela Yehova nawumi wetu wejima. Tunateli kwila mwennimu muloña tuneluki netu Yehova wakatusomona hampinji yatelela.—Kol. 3:23, 24. w16.12 4:17, 20

Neyi muntu wudi nachawaana chakudifuukwila ilaña chakuminamu, komana wasubuka chikupu? Eña. Muloñadi? Kwikala nawuswa wukweti hakukumina kwayikiñaña antu. Chakutalilahu, tunateli kufuukulahu kuya kwiluña dadilehi namotoka. Mukutiya kuwaha kwenda mumukwakwa mwabulaña kulondelawu añendeshi nshimbi, muyendeshañawu nyotoka lufuchi nawa mwendeshelañawu kukabadi kejima kanakeñiyi muntu? Inehi. Kwikala nahakukumina kwakuwahi hakwila tudiluñishi kukasunuka kwalala. Tushinshikenu hadi Adama kulonda tumoni kuwaha kwafumaña mukuzatisha wuswa wetu wakufuukula kwesekeja nachakeñañayi Yehova. Wafuukwilihu kubula kulondela lushimbi lwamwinkeliyi Nzambi lwakubula kuda kumukabu wamukaanishiliwu. Chineli wazatishili iwu wuswa chatama, anyana kaAdama adi mukukala kweneni. (Rom. 5:12) Twatela kuzatisha chiwahi ichi chawaana kwesekeja namwakukumina mwatwinkayi Yehova muloña tuneluki yuma yatama yinafumi mukufuukula kwaAdama. w17.01 2:6, 8

Neyi tunatambwili mudimu wawuha, kulomba nikwiluka nyidimu yitunakuzata kukutukwasha kwiluka nyidimu yitukutwesha kuzata nawa hakumina ñovu jetu. Kudikehesha kukuletesha tukaani nyidimu yikwawu. Hela chochu, neyi twiteja kuzata mudimu wawuha, chakutalilahu chaGideyona chatwanukishaña nawu tukutwesha kuzata chiwahi nawukwashu niwunlomboli waYehova. Wejima wetu atwileja “kwenda naNzambi nakudikehesha!” (Mika 6:8, NWT.) Dichi mpinji yejima yitukutambwilaña nyidimu yayiha, twatela kumulomba Yehova kulonda twiluki chinakutulejayi Mwizu dindi nimukuloñesha kwindi. Twatela kudikehesha kulonda tutweshi kwila yuma yanakukeñayi Yehova. Twanukeña netu ‘twalema’ muloña wakudizoza kwaYehova. (Mas. 18:35) Neyi tudikehesha kudi Nzambi chikutukwasha kubula kutoñojoka netu twalema kubadika amakwawu hela netu tudi amukunkulwayi. w17.01 3:17, 18

Yesu welukili nindi mudimu windi wahamaseki wukamana nawa amakwawu akatwalekahu kuwuzata. Hela chakwila atumbanji twindi adiña awanina wanyi, wayikuhweleleli nakuyileja nindi akazata nyidimu yamaneni kubadika yazatiliyi. (Yow. 14:12) Wayidizishili chikupu nawa atandishili nsañu yayiwahi mukayi hayina mpinji. (Kol. 1:23) Hanyima yakuhana wumi windi neyi mulambu, Yesu amusañwili nakuya mwiwulu mwamwinkeliwu nyidimu yayivulu niñovu ‘yabadika chikupu jinfulumendi jejima, wuswa wejima, ñovu jejima, mawanta antuumba ejima.’ (Efwes. 1:19-21) Neyi tufwa ashinshika henohu Amagedoni kanda, akatusañula nakwiñila mwituña dadiha dakuloña mukekala nyidimu yayivulu yayiwahi. Ilaña chayinu mpinji, kudi mudimu walema wutwatela kuzata, dikwila nawu kushimwina nsañu yayiwahi nikwilisha atumbanji. Dichi wejima wetu, atwansi niakulumpi, tutwalekihu ‘kwikala nayuma yayivulu yakuzata mumudimu waMwanta.’—1 Kor. 15:58. w17.01 5:17, 18

Ifutu danyiloña adifwetela haya nyaaka. (Heb. 9:24-26) Dafumishahu kutama kwejima kutwaswana kudi Adama. Twasakililaña hamulambu waKristu, muloña watufumisha kuwuduñu wakaayi kaSatana nawa hitwachiinaña kufwaku. (Heb. 2:14, 15) Yikaninu yaNzambi yalala. Neyi chochabulaña kukañanya nshimbi jindi jayuulaña yileñaleña, Yehova hamba kakañanyaku. Wahimpaña wanyi. Yehova watwinka chawaana chawumi niyuma yikwawu yayivulu. Watwinka kukeña kwindi. “Tuneluki nikwiteja kukeña kwatukeñayi Nzambi. Nzambi hikukeña.” (1 Yow. 4:16) Iseki dejima dakekala paradisa mwakekala yuma yayiwahi nawa muntu wejima wakamwekeshaña kukeña kwaNzambi. Dichi tudibombenu nayileñaleña yaNzambi yashinshika yamwiwulu nakuhosha netu: “Kudi Nzambi yetu kwiikali kuhameka, kulema, maana, kusakilila, kalemesha, ñovu niwuswa haya nyaaka nanyaaka. Ameni.”—Chim. 7:12. w17.02 2:16, 17

Kaposhi Kakutalila kaJune 1 1973 kehwili lwihu nawu: “Komana. . . antu achidi kunwa makanya atelela kupapatishewa?” Ñakwilu yadiña nawu: “Nsona yamwekeshaña nawu ashikilamu wanyi kupapatishewa.” Hanyima yakushimuna nsona jajivulu jahosha haniyi nsañu, Kaposhi Kakutalila kalumbulwili nawu muntu wuchidi kunwa makanya atela kumuhaña muchipompelu. (1 Kor. 5:7) Kahosheli nawu: “Chumichi chamwekeshaña nawu nabalumuki wanyi mumuchima. Iyi nshimbi yafuma kudi Nzambi, wayihana kuhitila Mwizu dindi dasonekayi.” Mukanda wasonekawu katataka kutalisha hansakililu muUnited States wahosha nawu: “Akulumpi jansakililu anahimpi ntañishilu yawu kulonda yesakani nayuma yakuhwelelawu hakwila abuli kuyishiya kudi amamembala awu.” Nduñu wakashinshi namwekeshi chikupu chikuhwelelu kuhitila mukukwasha mudimu wakutandisha nsañu yayiwahi yaWanta. Komana mudi hakachi kawanyikoku acheñi anakukwasha awayishewa muniwu mudimu walema? Mwakatiya kuwaha chakahoshayi Nlomboli yenu, Yesu nindi: “Yuma yejima yimwakoñeleli wumu hakachi kanawa anakwami akehelamu, dikwila nawu mwankoñeleli ami.” (Mat. 25:34-40) Yesu chafuntiliyi mwiwulu, watwalekelihu kukwasha atumbanji twindi. (Mat. 28:20) Welukili spiritu yajila, añelu niIzu daNzambi chidamukwashili kulombola hampinji yadiñayi hamaseki. Dichi, makonu nakwashi nduñu washinshika nawukwashu wowumu. AkwaKristu awayishewa ekala munidi izanvu “alondelaña Mwana kaMukoku kwejima kwayañayi.” (Chim. 14:4) Dichi neyi tunakulondela mwatulejañawu, dikwila nawu tunakulondela Nlomboli yetu, Yesu. Katataka yatulomboli kuwumi wahaya nyaaka. (Chim. 7:14-17) Nawa kwosi nlomboli wawuntu wunateli kutushiika mwenimu! w17.02 4:15

Chineli ekala adizoza, aeluda akaanaña kuyilemesha neyi chalemeshañawu antu aya mpuhu muyisela. Ichi chaletesha ambuki nawakulumpi jansakililu amakonu ninawakulumpi jansakililu ateneniyi Yesu muyaaka yawapostolu nindi: “Akeñaña kushakama mumaluña alema hakuda yakuda yamelela, mumasinagogi nimwena akeñaña kushakama hayitwamu yakumbidi nawa akeñaña nawu ayimusheña muyisankanu.” (Mat. 23:6, 7) Atubiña alala akwaKristu adizoza alondelaña mazu aYesu akwila nawu: “Bayi ayitena kudi antu nawu Rabiku, muloña Ntañishi yenu wumu hohu nawa wejima wenu mudi amanakwamuntu. Cheñi nawa, bayi mutena muntu wejima hanu hamaseki nenu tata yenuku, muloña Tata yenu wumu hohu, Yowu wekala mwiwulu. Nawa bayi ayitena nawu anlomboliku, muloña Nlomboli yenu wumu hohu, yowu Kristu. Dichi, wabadika hakachi kenu watela kwikala mukwakuyizatila.” (Mat. 23:8-12) Ichi dichaleteshaña aeluda amuyipompelu yejima yamukaayi ayikeñi, kuyinka kavumbi nikalemesha kudi akwawu aYinsahu. w17.03 1:14, 15

Chidi kudi etu aweni kufuukula nikutonda mwamaana, nawa tunateli kufuukula chiwahi neyi tushindamena haNsona. Hitwatela kwinka muntu wacheñi mudimu wakutufuukwilaku. Ilaña twatela kwiluka etu aweni yuma yayiwahi yakeñañayi Nzambi nikutondahu kuyila. Tunateli kwikala ñahi mukukala neyi twiteja antu acheñi kutufuukwila? Ikakeja dawakwetu dinateli kuletesha tufuukuli mwaluwa. (Yish. 1:10, 15) Hela chakwila akwetu akutukakeja chamuchidinyi, etu mudimu wetu wakulondela chinleji chetu chadizishewa naBayibolu. Neyi twiteja antu acheñi kutufuukwila, dikwila nawu tunafuukulihu ‘kuyilondeja.’ Hikufuukula kwetu, ilaña munateli kufuma yuma yatama. Kapostolu Pawulu wayisoñamishili akwaÑalija hakukala kwafumaña mukwiteja antu amakwawu kuyifuukwila. (Ñal. 4:17.) Antu amakwawu muchipompelu akeñeleña kufuukwila akwawu kulonda abuli kulondela apostolu. w17.03 2:8-10

Kufwana Yosiya, atwansi atela kutachika kumukeñakeña Yehova kufuma kuwansi wawu. Mwanta Manase wabalumukili mumuchima hadaha diyi wamulejeli Yosiya haluwi lwaNzambi. Enu atwansi, dikundenu nawantaña jenu niantu amuchipompelu akula dehi ashinshika kulonda mudizili kudi wena chinayikwashiyi Yehova. Cheñi, anukenu nenu kutaña Nsona dikwamushikili Yosiya hamuchima nawa dichamuletesheli kwilahu chuma. Neyi mutañaña Izu daNzambi dikuyisañumuna kwila yuma yinateli kuyiletela muzañalu nikukolesha wubwambu wenu naNzambi nikukwasha amakwawu kumukeñekeña Nzambi. (2 Kushi. 34:18, 19) Kudiza Bayibolu kunateli cheñi kuyikwasha kumona njila yimunateli kuzatilahu hakwila nawu mumukalakeli Nzambi chiwahi. Neyi kudi yuma yimwatela kuzatilahu, imbujolenu Yosiya. w17.03 3:18, 19