September

MuBayibolu, kuumika hikwatalisha hohu kukudiwula hela kwiteja kukalaku. Kwabombelamu chitwatoñojokaña nichitwatiyaña neyi tudi mukweseka. Kuumika kwatukwashaña kwikala ahamuka, ashinshika nawa adiwunjika. Mukanda wumu wahosha nawu kuumika hichilwilu chimu chakwashaña muntu kuchiñeja kulonda yabuli kuzeya neyi wudi mukweseka. Kwatukwashaña kwikala ahamuka nawa akola mukweseka kwasweja. Nawa kwatukwashaña kushinda iku kweseka nikusha maana hakumuzatila Nzambi bayi hakukala kutunakumonaku.Kukeña kwatukwashaña kuumika. (1 Kor. 13:4, 7) Munjilanyi? Kumukeña Yehova kwatukwashaña kuumika chuma chejima chetejañayi kumwekana. (Luka 22:41, 42) Kukeña kutwakeña amanakwetu kwatukwasha kuumika neyi anatuvulumuni. (1 Pet.4:8) Kukeña kutwakeña enikwetu kwatukwashaña kuumika “yihuñu” yamonañawu niantu ekala muwulu wamuzañalu nawa kwakoleshaña wulu wetu.—1 Kor. 7:28. w16.04 2:3, 4

Alekeli wanyi kupompa hela chakwila ayikabishileña kudi nfulumendi yawaRoma nianlomboli ansakililu yawaYudeya. Hela chakwila yuma yakalili, atwalekelihu kupompa. Makonu, ambuña aYehova niwena atiyaña kuwaha kuya nakupompa. A George Gangas, adiña amembala aMwizanvu Dalombolaña kubadika hadi yaaka 22 ahosheli nawu: “Kupompa hamu nawamanakwami dichuma chantiyishaña kuwaha muwumi wami nawa nakoleshewaña.” Ahosheli cheñi nawu: “Nafwilaña kuya nakupompa mpinji yejima.” Ninenu dichimwatiyaña hansañu yakudifukula kudi Yehova? Neyi dichimwatiyaña, twalekenuhu kuzata hakumina ñovu jenu kwikala nawamanakwenu hakupompa, nimumpinji yakala. Mwekeshenu kudi Yehova nenu munafwani Mwanta Davidi wahosheli nindi: “Eyi Yehova, ami nakeñi kushakama kwitala deyi.”—Mas. 26:8. w16.04 3:16-18

Neyi mwiluka nenu manakwenu wahilili nachimwahosheli hela chimwelili, munateli kwila ñahi? Hoshenu namanakwenu. Neyi muhosha nindi, mwatela kufwila kuleta kuwunda. Mwatela kwiteja nenu mwaluwañesha nawa bayi mumufwisha namuloñaku. Kwikala mukuwunda nawamanakwetu kwalema nankashi. Shinshikenu Abarahama namwiha windi Loti adiña nayimuna yayivulu, atubiña twawu atachikili kutoboka muloña iluña dakeheli. Chineli Abarahama wakeñeleña kuleta kuwunda, wamwitejeli Loti kutonda iluña dadiwahi. (Kutach. 13:1, 2, 5-9) Twatela kumwimbujola. Abarahama wakabakeni chineli wetejeli Loti kutonda iluña dadiwahi? Inehi. Hashimbwili wanyi, Yehova wakanini kumwinka Abarahama yuma yejima yajimbesheliyi. (Kutach. 13:14-17) Tunakudizilaku kwodi? Hela chakwila tukukabakana muloña wakufwila kuleta kuwunda, Yehova wukutukiswila neyi tumanisha kukala munjila yakukeña. w16.05 1:11, 12

Yehova watwinka nshimbi jekala muBayibolu jatulejaña yuma yakeñañayi nindi twileña. Chakutalilahu, watuleja nindi twatela wanyi kudifukula kudi ankishi, kwiya, kusheta, hela kwila wuvumbi. (1 Kor 6:9, 10) Nawa Mwana kaYehova, Yesu, walejeli atumbanji twindi nindi: ‘Mwakelishi atumbanji munyuza yejima, mwakayipapatishi mwijina daTata, nidaMwana, nidaspiritu yajila. Mwakayileji kuhemba yuma yejima yinayilejenu; tiyenu, ami nidi nenu mafuku ejima nikwakakumina nyaka.’ (Mat. 28:19, 20) Yuma yejima yatulejañawu kudi Yehova naYesu yatukwashaña. Nshimbi jaYehova jatulejaña chakudihemba nikuhemba chisaka chetu nawa yatukwashaña kwiluka chakwikala akola kumujimba nikwikala namuzañalu. Ilaña chuma chalema, neyi tukwovwahila nshimbi jaYehova, kushilahu tuhu nilushimbi lwakushimwina, watiyaña kuwaha nawa wukutukiswila. w16.05 3:1

Neyi twila mwenimu, Yehova wukutukwasha kwiluka yuma yamutiyishaña kuwaha nawa tukutachika kutoñojoka neyi chatoñojokañayi. Chikufumamu, yitoñojoka yetu, nhoshelu niyilwilu yetu yikumutiyishaña Yehova kuwaha nawa tukwiluka chakushinda kuzeya-zeya kwetu. (Luka 11:13; Ŋal. 5:22, 23) Hela chochu, twatela kutwalekahu kulwisha nañovu. (Yish. 4:23) Hahitaña mpinji hakwila nawu mwikali nayilwilu neyi yaYehova. Dichi neyi munamoni nenu kudi yilwilu yimuchidi kanda muhimpi, bayi muneñaku. Hakusambila, mwatela kuzata nañovu hakwila nawu mwileña kwesekeja nachahosha Bayibolu. Ilaña neyi mutoñojokaña nikwila yuma kwesekeja nachinakukeñayi Yehova, chikuyipelela kutoñojoka neyi chatoñojokañayi nikwila yuma yaloña.—Mas. 37:31; Yish. 23:12; Ŋal. 5:16, 17. w16.05 4:14, 16

Yehova wazatishaña Bayibolu, spiritu yindi yajila nichipompelu hakutuwumba. Bayibolu yinateli kutuwumba ñahi? Twatela kutaña Bayibolu, kutoñojoka hansañu yitunakutaña nikumulomba Yehova yatukwashi kuzatisha yuma yitunadizi. Mwanta Davidi wasonekeli nindi: ‘Nukukwanukaña hakadidi kami nakukutoñojoka hawulama wawufuku.’ (Mas. 63:6) Wasonekeli cheñi nindi: “Nukumukiswila Yehova nkisu, diyi nanleji maana: chalala muchima wami wanlejaña kashinshi nawufuku.” (Mas. 16:7) Mwalala, Davidi watoñojokeli hakufumba kwaYehova nawa wetejeli kuwumbi yitoñojoka yindi hela chakwila chadiña chakala kwiteja. (2 Sam. 12:1-13) Davidi wadiña wadizoza nawa wovwahila, dichi twatela kumwimbujola. Dihulenu nenu: Neyi inakutaña Bayibolu, natoñojokañahu nikwiteja kufumba kwaNzambi kufumbi yitoñojoka yami? Kwila nitoñojoka kubadika aha nehi?’—Mas. 1:3. w16.06 1:11

Twatela kwiluka netu wejima wetu twawanina wanyi nawa twaluwañeshaña. Dichi tunateli kukuhwelela netu amanakwetu niwena akuluwañeshaña. Nawa tukuluwañesha neyi tukutoñojokaña hayiluwa yawu. Neyi tukutoñojokaña hayiluwa yawakwetu tukumukalakelaña wanyi Yehova namuzañalu. Ilaña chuma chikusweja kutama, chikuhwelelu chetu chikuzeya nawa tunateli nikufuma mukuloñesha kwaYehova. Kuhiñahu, tukuleka kumukalakela Yehova nikubula kwikala nakuchiñeja kwakushakama mwituña dadiha. Hanu dinu, mukutwalekahu ñahi kumukalakela Yehova namuzañalu neyi amanakwenu niahela ela yuma yatama? Mwanukeña mazu akukundeja ahosheliyi Nzambi nindi: “Tiyenu, hinukuleña mawulu amaha, nimaseki amaha, yuma yakusambila hiyakayanuka nawaku, hiyakenza nikumuchimaku.” (Isa. 65:17; 2 Pet. 3:13) Yehova wukayinka iji nkisu neyi mukutwalekahu kwikala ashinshika. w16.06 4:13, 14

Izu dakwila nawu “wumu” mumazu akwila nawu “Yehova wumu hohu” dalumbuluka nawu welaña mwejima mwafuukulañayi. Yehova hiNzambi wakuluwañeshaku nawa wahimpaña wanyi. Wekala washinshika mpinji yejima, wahimpaña wanyi nawa walala. Chakutalilahu, wamukanini Abarahama nindi anyanindi akashakama Mwituña daChikaninu. Nawa Yehova wakoñeli yihayamisha yayivulu hakwila yashikiji chikaninu chindi. Chimwahitili yaaka 430, Yehova wahimpili wanyi mwakaniniyi. (Kutach. 12:1, 2, 7; Kwid. 12:40, 41) Chimwahitili yaaka yayivulu, Yehova wateneni aIsarela nindi ayinsahu jindi nawa wayilejeli nindi: “Yami diyi. Kwosi Nzambi asambililuwu kuwumba, ami nikumininaku, hikwamba kekala nawa wakanlondelaku.” Yehova wamwekesheli hatooka nindi wahimpaña wanyi mwafuukulañayi chahosheliyi nindi: “Yami watachi yami wankumininaku.” (Isa. 43:10, 13; 44:6; 48:12) A Isarela adiña nakukooleka kwakukalakela Nzambi washinshika nawa wabulaña kuhimpa. Ninetu tukweti kukoleka kokumu makonu.—Mal. 3:6; Yak. 1:17. w16.06 3:6, 7

Matuña amavulu makonu akweti “atulama” nimakamela atalaña mujiñinza. Atalaña yuma yinateli kwiñila mwituña dawu nakuluwañesha kuwunda. Hela chochu, awa “atulama” amonaña hohu wubanji wafumaña kunfulumendi jawantu hela kudi antu. Eluka wanyi nfulumendi yaWanta waNzambi yekala mwiwulu niyuma yiwunakwila kuzatisha Kristu nawa niyuma yiwukela hakusompesha kunakwinza kwanyuza yejima. (Isa. 9:6, 7; 56:10; Dan. 2:44) Twatela kwikala asoñama nawa atona kuspiritu kulonda tudiloñeshi kwinza kwefuku dakusompesha. (Mas. 130:6) Chinateli kutukalila kutwalekahu kutona chineli kukuma kwakanu kaayi kamakonu kudi mukamwihi. Tukafwa neyi tubula kwikala atona! w16.07 2:2, 9, 10

Pawulu welukili chikupu nindi hatambwilili hela hateleleli luwi lwaNzambi lwaswejaku, muloña wadiña mukwakukabisha akwaKristu. Pawulu henohu kanda yafwi, wamusonekeleli Timotewu wazatileñayi nindi nindi: “Nasakilili Kristu Yesu, Mwanta wetu, wanyinkeli ñovu, nanochu chanmweniyi kushinshika, hakunkunjika kumudimu windi.” (1 Tim. 1:12-14) Mudimwinyi? Pawulu walejeli aeluda amuchipompelu chamu Efwesesa iwu mudimu chahosheliyi nindi: ‘Wumi wami hinawumoni kulemaku mwaka niwukeñi; chakala nakamanishi njila yami, nimudimu wanyinkeliyi Mwanta Yesu kukalakala, wakushimwina nsañu yayiwahi yaluwi lwaNzambi yayiwahi.’ (Yil 20:24) Pawulu wazatili mudimu wakushimwina neyena, dichi twatela kumwimbujola etu kwaKristu ayinu mpinji nikumwekesha nawu luwi lwaNzambi lwasweja lwamumwekesheleliwu “hilunayi mwamukunkuluku.” w16.07 4:1-3

Yehova wakwashaña ambuñindi ashinshika hela chakwila wukuyiteja kuchiñilila kukoleka kwakumbidi. Wamukanini kumwinka Abarahama mwana, dichi wakuhwelela nikudiwunjika. (Heb. 6:12-15) Hela chakwila wahembeleli hadi yaaka yayivulu hakwila nawu Isaka yavwaliki, Abarahama wakuhweleleli nawa Yehova wamutiyishili nsonyi wanyi. (Kutach. 15:3, 4; 21:5) Kuchiñilila kwakala. (Yish. 13:12) Neyi tukutoñojokaña hakukala kutudi naku, tukukañanya kuchiñilila. Ilaña twatela kuzatisha mpinji yetu kulonda tumwekeshi yilwilu yakuspiritu. Kutaña Izu daNzambi nikutoñojokahu kukutukwasha kwikala nayilwilu yidi neyi, maana, wuñaji wawuwahi, kwiluka, kutoñojokela mwakashinshi, nikuwundisha mumesu. Mpinji yejima, twamonaña kukala kudi neyi yisela, nvwalilu nimwekenu, chakuhemba mali nichakuhanda nawakwetu. Neyi tukuzatisha yuma yitwadizaña muBayibolu, tukwila yuma yikumutiyisha Yehova kuwaha. w16.08 3:9-11

Yehova wakwashili aIsarela kushinda aAmaleki niaEtiyopiya nawa wenkeli Nehemiya niakwawu ñovu yakumanisha mudimu wakutuñulula. Nzambi wukutwinka ninetu ñovu yakuumika neyi anakutudimbulula, anakutudiwula nawa neyi tunakwakama kulonda tutwalekihu namudimu wetu wakushimwina. (1 Pet. 5:10) Yehova hakumanisha kukala kwetu muchihayamishaku. Ilaña, twatela kuzata nañovu. Mukuzata nañovu mwabombela kutaña Izu daNzambi mafuku ejima, kuloñesha nikuya nakupompa mulungu nimulungu, mpinji yejima twatela kwikalaña nakudiza kwahalwetu nikudifukula kwachisaka nikushindamena hadi Yehova mukulomba. Bayi twiteja yuma yitwafwilaña ninyidimu yikañeshi njila mwatwinkelañayi Yehova ñovu nikutukoleshaku. Neyi mutiya nenu makasenu anazeyi, chakwila munakukañanya kwila yumiyi, lombenu wukwashi kudi Nzambi. Mukumona spiritu yindi ‘chiyikuyikolesha kuhitila mukuyinka muchima wakufwila kukoña yuma niñovu yakwilamu.’ w16.09 1:12

Kapostolu Pawulu wahamekeli wujiki; ilaña wahosheli mazu adi hewulu. Pawulu wahosheli cheñi nindi: “Neyi hiyakutwesha kudihembaku, asumbuli tuhu. Chinawahi kusumbuka, hichinawahi kuha kesuku.” Kusumbula hela kusumbuka kunateli kukwasha muntu kubula kwikala nachaaku chakudichuka hela kwila wuvumbi. Hela chochu antu atela kushinshika hayaaka, kapostolu Pawulu wahosheli nindi: “Neyi hadi iyala natoñojoki nindi hadi nakumwila mujiki windi chachiwahuku, niyena hakusweja kukula, hela hanatweshi kudihembaku, akumini dakwila mwakeñayi, asumbuki tuhu; hanavulumunuku.” (1 Kor. 7:9, 36; 1 Tim. 4:1-3) Ilaña, bayi muntu yasumbula hela kusumbuka muloña wawuvumbi wenzaña muwukwenziku. Hadaha nashikilimu wanyi kwiñila muwulu. w16.08 1:17

Antu amavulu atutoñojokelaña yuma yashiyashana kushindamena hayuma ‘yamonañawu namesu.’ (1 Sam. 16:7) Dichi, hamu neyi akwakukalakala aNzambi, tweluka netu hitwakuminaña dakuvwala yakuvwala yitunakeñiku. Yishina yitweluka yekala Mwizu daNzambi yatela kutukojeja kutondolwela kuvwala yakuvwala yinakulamata chikupu hamujimba, yinakumwekesha mwejima munahiti yiidi yamujimba hela yinateli kusañumuna muntu kwila wuvumbi. Chumichi chinatalishi mukubula kuvwala yakuvwala yinakumwekesha hatooka yiidi yetu yamujimba yakujinda. Kwosi muntu niwumu watela kutiya kutama hela kumuletesha yatali kwacheñi neyi yamona chitunavwaliku. Neyi tunakumwekana wutotombu, akadi majilu, tunavwali chiwahi nawa tunadiwahishi chiwahi, antu anateli kutulemesha nawa anateli kwinza kudi Nzambi wutwadifukulañaku. Cheñi nawa, nvwalilu yetu yatelela yikuleta kalemesha hakuloñesha kutwemenañaku. Chikufumamu, antu amakwawu akukeñesha chikupu kutiyilila kunsañu yakupulwisha wumi. w16.09 3:5, 6

Bayi munyakala kutoñojoka nenu mweluka yuma yakuhwelelawu antuku. Antu amakwawu ahoshaña nawu akuhwelela nawu yuma yadileñeli yayeni, ilaña atoñojokaña cheñi nawu Nzambi wekala kwoku. Atoñojokaña nawu Nzambi wakojejeli yuma yitachiki kudileña yayeni. Amakwawu ahoshaña nawu akuhwelela nawu yuma yadileñeli yayeni muloña atoñojokaña nawu neyi chalala yuma hiyadileñeli yayeniku, hiyadi kuyitañishaña mumashikolaku. Amakwawu alekaña kukuhwelela Nzambi muloña aneñaña nayilwilu yamunsakililu. Dichi neyi munakuhanjeka namuntu hansañu yakuleña, chalema nankashi kusambila kumwihula malwihu. Ilukenu yuma yakuhwelelayi muntu. Neyi mukwikala nakashinshi nawa mufwila kutiyilila, nateli kuyitiyilila. Neyi muntu nakumwekena neyi nakuyisupisha muloña wakubula kukuhwelela nawu yuma yadileñeli yayeni, munateli kumwihula yalumbululi chatachikili wumi chakadi Nleñi. Hakwila nawu chileñaleña chawumi chatachi chitwalekihu kwikalaku, chatelela kusema kulonda chisemununi. Nkuluñaña wumu wadiza nankashi kemesitili wahosheli nindi: “Muntu wahayamaña chatachikaña wumi kufuma kukachuma kanyanya.” w16.09 4:12, 13

Hela chakwila hitunateli kwiluka antu ateneniyi Pawuluku, ilaña antu adi neyi, Naboti niZekariya, ayijahili namalola muloña wakwovwahila Nzambi nikwila nkeñelu yindi. (1 Anya. 21:3, 15; 2 Kushi. 24:20, 21) Chakadi nikujina, Danyeli nialunda nindi adiña nakukooleka ‘kwakuyuumbaku’ neyi chakwila alekeli kwikala ashinshika. Ilaña, kukuhwelela muñovu jaNzambi, munjila yikwawu chidi neyi dikwayikwashili kujika ‘tunwa twanyitupa, nikujima kesi kadiña nakubidima.’ (Heb. 11:33, 34; Dan. 3:16-18, 20, 28; 6:13, 16, 21-23) Muloña wachikuhwelelu chawu, atuprofwetu adi neyi Mikaya niYeremiya ‘ayesekeli kuhitila mukuyisupisha nikuyikasa mutuleya.’ Amakwawu adi neyi Elija, “akimbokelaña nakululuta mwakadi meji, nihamapidi, nakwiñela mumayeñu nimumena amumaseki.” Wejima wawu omikili muloña ‘elukili nawu yuma yachiñejeleñawu yadiña kwoku.’—Heb. 11:1, 36-38; 1 Anya. 18:13; 22:24-27; Yere. 20:1, 2; 28:10, 11; 32:2. w16.10 3:10, 11

Tunateli kumwekesha kukeña kudi antu amaha anafumi kwacheñi kuhitila mukuyimusha nachisambu Hetala daWanta. Kakavulu antu amaha anafumi kwituña dacheñi mpinji jikwawu atiyaña nsonyi nawa akeñaña kushakama nkawawu. Muloña wankulilu yawu hela nshakaminu yawu, anateli kudimona nawu amukunkulwayi kudi antu akumuza wacheñi. Dichi twatela kuzata nañovu kulonda tuyimwekesheleña kukeña. Neyi mukweti JW Language app mwidimi denu, yinateli kuyikwasha kwiluka chimunateli kwimusha amaha mwidimi dawu. (Fwil. 2:4) Munateli kutiya wudi kwimusha antu anafumi kuyisemwa yacheñi. Hakwila nawu mushindi iku kukala, munateli kuyileja chimwahandaña. Neyi mukwila mwenimu, mukwiluka nenu mukweti yuma yadifwanaku kubadika yimwadiña nakutoñojoka nawa mukwiluka cheñi nenu chisemwa chejima chikweti hichawahila nihichatamina. w16.10 1:13, 14

Tunateli kwilisha chipompelu kwikala chakadi majilu kuhitila mukulondela kufumba kwaMwizu daNzambi. Shinshikenu yuma yayimwekenini muKorinda. Pawulu wadihanini kushimwina mumusumba nawa wakeñeli akwawu “akwakujila” adiñamu. (1 Kor. 1:1, 2) Chatela chamukalilili kuhosha hansañu yawuvumbi wadiña nakwilawu antu amuchipompelu. Pawulu walejeli aeluda kuhana muntu wuneli wuvumbi kudi Satana, dikwila nawu kumuhaña muchipompelu. Hakwila nawu chipompelu chikali chakadi majilu, aeluda ateleleli kufumishamu “iluñi.” (1 Kor. 5:5, 6, 12) Neyi tukulondela kufuukula kwawaeluda kwakuhaña muntu wunavulumuni wunabuli kubalumuka mumuchima, tukukwasha chipompelu kwikala chakadi majilu nawa iwu muntu nateli kubalumuka nakulomba kwanakena kudi Yehova. w16.11 2:14

Mazu akukolesha atiyishaña muntu kuwaha. Rubén wahosheli nindi: “Nadimweneña kwikala wamukunkulwayi hadi yaaka yayivulu. Ilaña ifuku dimu, nadiña nakushimwina naeluda wammweni nindi nidi nakukala. Wantiyilili nakanañachima chinamulejeleña kukala kunadiña naku. Dichi wanlejeli yuma yayiwahi yinelileña. Wanlejeli cheñi mazu aYesu akwila nawu ejima wetu twalema kubadika anzwimba. Nanukaña iyi nsona mpinji yejima nawa yankoleshaña. Mazu anlejeliyi iwu eluda ankolesheli chikupu.” (Mat. 10:31) Twatela kuhayama wanyi chaleteshaña Bayibolu yikonkomweneña hakukolesha akwetu mpinji yejima. Kapostolu Pawulu wayisonekeleli akwaKristu aHeberu nindi: “Chiña kudikonkomwena hefuku hefuku, . . . mwinenu wumu wakenda kachinchika nakudimbana kwanshidi.” (Heb. 3:13) Munateli kwiluka kulema kwakudikolesha wumu namukwawu neyi mwanuka chimwatiyili hampinji yayikolesheliwu. w16.11 1:2, 3

Mu 313 C.E., Nyuuli wawaRoma Constantine wetejeli awa “akwaKristu” kudifukula. Hanyima yakwila Chota chaNicaea, Constantine, wadiñaku hayina mpinji muchota, washili kapristu wantadi, Arius, muwunkoli muloña Arius wakanini kwiteja nindi Yesu hiNzambi. Kuhiñahu, muChiyuulu chaTheodosius I (379-395 C.E.), diyi mpinji yelukiliwu nawu aKatolika niwena hiyakwaKristu akutwamba, nawa diyi nsakililu yashindameneni Wanta wawaRoma. Akakusandujola nsañu yanyaaka ahosheli hadi akwakusekesha amuRoma “Atachikili” muyaaka yakunyima. Chikuma chidi chakwila nawu, hayina mpinji akwaKristu akutwamba adibombeli mwizanvu dawakwakusekesha daWanta wawaRoma nakwikala amamembala amuBabiloni Muneni. Hela chochu, kadizanvu kanyanya kawawayishewa kadiña neyi tidiku kazatila nañovu kulonda adifukuleña kudi Nzambi, ilaña ayikañesheli.—Mat. 13:24, 25, 37-39. w16.11 4:8, 9

Tunakushakama mumpinji yakala. Satana Diyabolu nazuwi chikupu nawa ‘nakutambatamba nakukeñakeña akudayi, neyi mutupa wabulumaña.’ (1 Pet. 5:8; Chim. 12:17) Dichi, ninetu ambuña aNzambi twakamaña mpinji yikwawu. Kunyima, ambuña aYehova adi neyi Mwanta Davidi, mpinji yikwawu ‘akamineña.’ (Mas. 13:2) Anukenu cheñi nenu, kapostolu Pawulu ‘wakameni yipompelu yejima.’ (2 Kor. 11:28) Ilaña tunateli kwila ñahi neyi tunakwakama? Tata yetu wukweti kukeña wekala mwiwulu wakwashili ambuñindi kunyima nawa watukwashaña nimakonu kulonda tubuleña kwakama. Munjilañyi? Kuhitila mukulomba chakufuma hamuchima, kutaña Izu daNzambi nikutoñojokahu, kulomba spiritu yaYehova yajila nikuhanjeka namuntu imwakuhwelela. w16.12 3:1, 2

Antu jaYehova analeki kusoña ‘nyikabu yasoñeleñawu hayina mpinji’ henohu kanda eluki kumukeña nikumukalakela Nzambi. Yuma yelileñawu kunyima yabombelamu ‘yuma yinakuyitiyisha nsonyi hayinu mpinji’ nawa yadikuyiletesha kufwa. (Rom. 6:21) Dichi ahimpili. Dicheliliwu antu amavulu adiña muKorinda asonekeleliyi Pawulu. Amakwawu adiña akwakupesha, ayivumbi, aditamishaña nawakwawu amayala, amakombi niakwakusheta. Ilaña, “ayiwelesheli, ayijilikili.” (1 Kor. 6:9-11) Antu adiña muchipompelu chakuRoma niwena ayiwelesheli nikuyijilika. Pawulu amoneneni kusoneka nawu: “Hela yidi yenu yamujimba, bayi muyilubula kunshidi yiikali yakukoña nachu nyidimu yaheñaku. Chiña mudilubuli kudi Nzambi, nenu muyantu anasañuki dehi mukufwa; mulubuli yidi yenu yiikali yakumukalakelaña Nzambi nyidimu yaloña.” (Rom. 6:13) Pawulu welukili chikupu nindi akutwalekahu kwikala atooka kuspiritu nikuhetela muluwi lwaNzambi lwasweja. w16.12 1:13

Yehova waleñeli antu nawuswa wawuwahi. Watuleñeli nawuswa wakutoñojoka kulonda twilukeña chakumanisha kukala nikufuukula yuma yitukela kumbidi. (Yish. 2:11) Watwinka ñovu yakwila yuma yitunafuukuli nikuzata nañovu kushikija mutunakukeña kwila. (Fwi. 2:13) Watuleña cheñi nachinleji chamuchima chatukwashaña kwiluka yuma yayiwahi niyatama kulonda tubuleña kwila yuma yatama nikuzatilahu neyi tuluwañesha. (Rom. 2:15) Yehova watulejaña kuzatisha wuswa wetu munjila yayiwahi kuhitila Mwizu dindi. Chakutalilahu, muNsona yachiHeberu twatañañamu netu: “Yitoñojoka yamukwakudikita yatwala kwamukuvulisha hohu”; nawa “yuma yejima yinawani chikasa cheyi kwila, ilaku nañovu jeyi.” (Yish. 21:5; Mukwa. 9:10) Nsona yachiGiriki niyena yahosha nawu: “Neyi twikala nampinji yakwila mwenimu, dichi tukoñeña yuma yayiwahi kudi antu ejima”; nawa “kwesekeja nachawaana chatambulayi muntu-himuntu, yachizatisheña hakudikalakela wumu namukwawu.” (Ñal. 6:10; 1 Pet. 4:10) Mwamweni, Yehova nakukeña nindi twileña yuma yikutukwasha nawa yikukwasha amakwawu. w17.01 1:1, 2

Anyana kaAdama naEva aswana kubula kuwanina nikufwa kudi anvwali jawu adikañili. Hela chochu, atwalekelihu nanichi chawaana chakudifuukwila. Tuneluki mwenimu kwesekeja nachayihembeliwu aIsarela kudi Nzambi. Kuhitila mudi kambuñindi Mosi, Yehova wayinkeli antu wuswa wakwiteja hela kukaana kukooleka kwakwikala chuma Chindi chalema. (Kwid. 19:3-6) Ahosheli nawudi? Aditejeleli aweni kuhemba nshimbi yakundama kukwikala antu ejina daNzambi nawa wonsu wawu ahosheli nawu: “Mwejima mwanahoshiyi Yehova tukwilamu.” (Kwid. 19:8) Chawushona, mukuhita kwamafuku, iwu muza watachikili kuzatisha ichi chawaana munjila yatama nawa wafumpili chikaninu. Dichi tudizilenu kuyuma yamwekeni nawa tulemesheña ichi chawaana chakudifuukwila kuhitila mukukundama kudi Yehova nikwovwahila nshimbi jindi jaloña. w17.01 2:9

Mumafuku adiña nakuyuula Mwanta Yerobowami, Yehova watemesheli kaprofwetu kufuma kuYuda kulonda yashimuni nsañu yawunsompeshi kudi mwanta wawaIsarela wakasekesha. Ona kaprofwetu wadizoza washimwini mazu aNzambi, Yehova wakiñili ambuñindi kukuzuwa kwaYerobowami. (1 Anya. 13:1-10) Chafuntileñayi, iwu kaprofwetu wadibulakeni nakashinakaji wakuBeteli. Iwu muntu watwambili nindi niyena hikaprofwetu kaYehova. Wamudimbili kubula kwovwahila nshimbi jaYehova jakubula ‘kudya yakudya hela kunwa menji hela kufunta njila yenjililiyi.’ Yehova watiyili kutama. Dichi, chafuntileñayi, mutupa wamuwanini hanjila nakujaha kaprofwetu kaYehova. (1 Anya. 13:11-24) Muloñadi kaprofwetu wadiña wadikehesha chadinkeliyi wanta nakwila mwamulejeliwu kudi ona kashinakaji? Bayibolu yashimuna wanyi. Ilaña wajimbeli chikupu nindi watela ‘kwenda naNzambi yindi nakudikehesha.’ w17.01 4:1-3

Mazu akutachikilahu muBayibolu apela ilaña alema akwila nawu: “Hatachi Nzambi waleñeli nimawulu nimaseki.” (Kutach. 1:1) Hayuma yayivulu yaleñayi Nzambi, twamona hohu yuma yantesha nawa yuma yitweluka yidi neyi luzwizu, chejeji niñovu yakokaña hitwayiluka chikupuku. (Mukwa. 3:11) Ilaña, Yehova watuleja chuma chaletesheli yaleñi iseki niantu. Iseki adileñeli kulonda mushakameña amayala nawambanda aleñeliwu muchinfwana chaNzambi. (Kutach. 1:26) Adi kwikala anyanindi nawa Yehova wadi kwikala Tata yawu. Nkeñelu yaYehova yaluwankeni neyi chalumbululawu mukapetulu kamuchisatu kamukanda waKutachika. (Kutach. 3:1-7) Hela chochu, iku kukala kwadiña kweneni wanyi kwadi kukañanyayi kumanisha. Kwosi muntu wunateli kumukañesha Yehova. (Isa. 46:10, 11; 55:11) Dichi, tunateli kukuhwelela netu nkeñelu yaYehova yikashikijewa hampinji yatoñolayi! w17.02 1:1, 2

Chineli spiritu yajila yamwekanaña wanyi, aIsarela adikwiluka ñahi nawu yadiña mudi Mosi? Spiritu yajila yamukwashili Mosi kwila yihayamisha nikutiyakesha ijina daNzambi kudi Fwaro. (Kwid. 7:1-3) Spiritu yajila yamukwashili Mosi kwikala nayilwilu yayiwahi yamukwashili kulombola aIsarela yidi neyi, kukeña, kwovwaha nikudiwunjika. Wambukiliku chikupu nawanlomboli amakwawu adiña azuwa nawa abulileña kwakamena antu jawu. (Kwid. 5:2, 6-9) Wunsahu wamwekeni hatooka nawu: Yehova watondeli Mosi kulonda yalomboli antu Jindi. Kuhiñahu, spiritu yaYehova yadiña hadi amayala amakwawu atondeliyi kulombola antu jindi. “Mwana kaNuni Yoshuwa wenzeli spiritu yamaana.” (Kuhit. 34:9) ‘Spiritu yaYehova yenjili hadi Gideyona.’ (Ansomp. 6:34) Nawa ‘spiritu yaYehova yamwinkeli ñovu Davidi.’ (1 Sam. 16:13) Awa amayala ejima ashindameneni hawukwashu waspiritu yaNzambi, nawa spiritu yayikwashili kuzata nyidimu yadi kukañanyawu kuzata nañovu jawu.—Yosh. 11:16, 17; Ansomp. 7:7, 22; 1 Sam.17:37, 50. w17.02 3:3-5

Pawulu washili chakutalilahu chachiwahi chakulemesha wuswa wawamanakwindi wakudifuukwila. Makonu, aeluda neyi anakufumba amanakwawu kutalisha hayuma yatela kuditondelawu aweni, atela kulondela ichi chakutalilahu. Alejaña amanakwawu nsañu yekala muBayibolu. Hela chochu, aeluda atela kubabala kulonda abuleña kufuukwila amanakwawu niahela. Kwila mwenimu kwalema muloña muntu nimuntu wakadisendela chiteli chindi. Chikuma chacheni chidi chakwila nawu: Tunateli kumwekesha netu tunakukeña kuyikwasha amakwawu kuhitila mukuyileja yishina hela kufumba kwamuNsona. Ilaña, aweni diwu akweti wuswa nimudimu wakudifuukwila. Akuhetelamu neyi afuukula mwamaana. Dichi, twatela kutondolwela yitoñojoka yakwila nawu tukweti wuswa wakufuukwila amanakwetu niahela. w17.03 2:11

Nduñu wakashinshi namwekeshi chikupu chikuhwelelu kuhitila mukukwasha mudimu wakutandisha nsañu yayiwahi yaWanta. Komana mudi hakachi kawanyikoku acheñi anakukwasha awayishewa muniwu mudimu walema? Mwakatiya kuwaha chakahoshayi Nlomboli yenu, Yesu nindi: “Yuma yejima yimwakoñeleli wumu hakachi kanawa anakwami akehelamu, dikwila nawu mwankoñeleli ami.” (Mat. 25:34-40) Yesu chafuntiliyi mwiwulu, watwalekelihu kukwasha atumbanji twindi. (Mat. 28:20) Welukili spiritu yajila, añelu niIzu daNzambi chidamukwashili kulombola hampinji yadiñayi hamaseki. Dichi, makonu nakwashi nduñu washinshika nawukwashu wowumu. AkwaKristu awayishewa ekala munidi izanvu “alondelaña Mwana kaMukoku kwejima kwayañayi.” (Chim. 14:4) Dichi neyi tunakulondela mwatulejañawu, dikwila nawu tunakulondela Nlomboli yetu, Yesu. Katataka yatulomboli kuwumi waha nyaaka. (Chim. 7:14-17) Nawa kwosi nlomboli wawuntu wunateli kutushiika mwenimu! w17.02 4:17-19

Neyi tunamoni kukala kutunamoni netu tukutwesha wanyi kukwimanisha, twatela kushindamena hadi Yehova. Hanu dinu tukwila ñahi neyi tumona kukala kutwamonaña muchihandilu? Komana twashindamenaña hamaana awantu nakukwimanisha munjila yitunakeñi? Tahindi twamwekeshaña nawu twashindamena hadi Yehova netu wukutumanishila kukala kwetu kuhitila mukusandujola nikuzatisha yishina yamuBayibolu? Chakutalilahu, mpinji yikwawu chisaka chenu chinateli kuyikañesha kuya nakupompa kupompa kwachipompelu hela kwañinza. Mulombenu Yehova kulonda yayilomboli nikuyikwasha kwiluka njila yayiwahi yakumanishilamu kukala. Mukwila ñahi neyi ayihaña mudimu nawa mukañanya kuwana wacheñi? Neyi munakuhosha namuntu wunakukeña kuyiñija mudimu, komana mukumuleja nenu mukuyaña nakupompa ifuku dimu mukachi kamulungu mpinji yejima? Hichidi namuloña nakukala kutukumonaku, twatela kulondela mazu añimbi yamasamu wahosheli mazu adi munsona yefuku dalelu. w17.03 4:6