October

Yehova ‘hiNzambi wakuumika nikukundeja.’ (Rom. 15:5) Diyi hohu weluka chitwekala, chitwatiyaña nichitachi chetu. Dichi weluka yuma yitwakankilaña kulonda tuumiki. Nzambi wukwakula ñahi kulomba kwetu kulonda twikali nañovu yakuumika? Neyi tumulomba Yehova netu yatukwashi, watukana “kubuzilaku njila yakupulukila.” (1 Kor. 10:13) Wabuzaña ñahi? Mpinji yikwawu watufumishaña mukweseka. Ilaña kakavulu, watwinkaña ñovu kulonda ‘tuumiki nakudiwunjika nimuzañalu.’ (Kol. 1:11) Chineli Yehova weluka chikupu kuzeyazeya kwetu kwakumujimba, muyitoñojoka, wetejaña wanyi kukala kusweji nankashi chakwila kutukañeshi kwikala ashinshika. w16.04 2:5, 6

Bayibolu yatulejaña kwovwahila nfulumendi yawantu, ilaña yatuleja cheñi nawu twatela kwovwahila Nzambi kubadika antu. (Yil. 5:29; Tit. 3:1) Tunateli kwila ñahi mwenimu? Yesu walumbulwili chishina chatukwashaña kwiluka itwatela kwovwahila. Wahosheli mazu adi munsona yefuku dalelu. Twahanaña yuma ‘yaKesari kudi Kesari’ neyi twovwahila nshimbi janfulumendi, tulemesha akulumpi janfulumendi nikufweta nyisonku. (Rom. 13:7) Ilaña neyi nfulumendi yituleja kwila yuma yabulaña kukeñayi Nzambi nindi twileña, twakanaña nawa nakalemesha. Twadiñijaña wanyi munsañu jamatuña. (Isa. 2:4) Chineli Yehova weteja nfulumendi yawantu kuyuula, twayovwahilaña. Cheñi hitwadiñijaña munsañu jakuhameka ituñaku. (Rom. 13:1, 2) Twakeñaña wanyi kuhimpa jinfulumendi hela kuluwañesha akapolitiki nawa hitwavotaña hela kwikala apolitishaniku. w16.04 4:1, 2

Kukala kwakuvulu kwamwekanaña hakachi kawakwaKristu ayedi atela kukwimanisha mwayedi wawu. Hela chochu, mpinji yikwawu chakala kwila mwenimu. Kukala kukwawu kwakeñekaña wukwashu kudi antu amakwawu neyi chahosha Nsona. (Mat. 18:15-17) ‘Kuvulumuna’ kwateneniyi Yesu hikwadiña tuyiluwa twanyanya twekalaña hakachi kawakwaKristuku. Tuneluki ñahi? Yesu wahosheli nindi neyi muntu wunavulumuni yakaana kubalumuka hanyima yakuhanjeka namanakwindi, hamesu awayinsahu niamanakwetu ashikahu, atela kumumona neyi “kaJentili, hela neyi nsonkeshi.” Makonu, awa mazu atalisha mukwila nawu watela kuhañewa muchipompelu. Iku ‘kuvulumuna’ kwabombelamu wupwapoki nimatuñu, ilaña kwabombelamu wanyi nshidi yidi neyi wujila, wuvumbi weyala neyala, kasekesha hela kupesha. Muloña kuvulumuna kwamuchidiwu aeluda diwu atela kukwimanisha. w16.05 1:14

Bayibolu yatwinka wanyi nshimbi muyuma yejima. Chakutalilahu, muBayibolu mwekala wanyi nshimbi yahosha hachitwatela kuvwala. Chumichi chinakumwekesha nawu Yehova wukweti maana. Hela chakwila antu mukaayi kejima anakuvwala yakuvwala yashiyashana nawa yakuvwala yinakuhimpa mpinji yejima, ilaña mazu amuBayibolu ahimpaña wanyi. Cheñi, yekala wanyi nanshimbi yayivulu yahosha hamudimu wutwatela kwiñila, hayisela yitwatela kutonda hela yuma yitwatela kwila kulonda twikali akola kumujimba. Neyi Bayibolu yahosha wanyi chitwatela kwila, tunateli kufuukula ñahi chiwahi? Chatela twili mutunakukeña, twatela kutoñojoka chiwahi nikufuukula njila yinateli kumutiyisha Yehova kuwaha. Tukukuhwelela chikupu netu Nzambi wukutukwasha.—Mas. 37:5. w16.05 3:2, 6

Wejima wetu kudi yibaluyimu yamuBayibolu yitwakeña. Antu amakwawu akeña nyikanda yaNsañu Yayiwahi muloña yamwekesheña chekalayi Yehova kuhitila mudi Yesu. (Yow. 14:9) Amakwawu akeña nyikanda yawuprofwetu yidi neyi Chimwekeshu, yatulejaña ‘yuma yikukeña kumwekana katataka.’ (Chim. 1:1) Amakwawu mukanda waMasamu wayikundejaña neyi awutaña nawa amakwawu kufumba kwekala mumukanda waYishimu kwayikoleshaña. Mwamweni, antu ejima anateli kuhetela muBayibolu. Chineli twalemesha Bayibolu, twalemesha ninyikanda yetu yashindamena Hezu daNzambi. Nyikanda yejima yidi neyi mabuloshuwa, magazini ninyikanda yikwawu yitwatambulaña yafuma kudi Yehova. Yatukwashaña kukundama kwakwihi nayena nikukolesha chikuhwelelu chetu.—Tit 2:2. w16.05 5:1-3

Spiritu yajila yinateli kutuwumba munjila jajivulu. Chakutalilahu, yinateli kutukwasha kwiluka chakwimbujola yilwilu yaYesu, nikumwekesha nyikabu yashiyashana yaspiritu. Kukeña kwekala haniyi nyikabu. Twamukeña Nzambi nawa twakeñaña kumwovwahila nikutuwumba kudi yena muloña tweluka netu nshimbi jindi jatukwashaña. Kubombelahu, spiritu yajila yinateli kutwinka ñovu kulonda tukaani kutuwumba kudi kanu kaayi katama. (Efwes. 2:2) Kapostolu Pawulu hadiñayi kansi, welileña yuma yelileñawu akulumpi jansakililu yawaYudeya adiña adivwimba. Ilaña spiritu yajila yamukwashili kuhimpa. Wasonekeli nindi: “Natweshi kwila yuma yejima mudi Kristu wankoleshaña.” (Fwil. 4:13) Ninetu twatela kulomba spiritu yajila, muloña tuneluki netu Yehova wukwakula kulomba kwetu kwakufuma hamuchima.—Mas. 10:17. w16.06 1:12

Yehova diyi Nzambi yetu wumu hohu. Twamulemeshaña neyi tudifukula kudi yena hohu. Twatela kudifukula kudi anzambi acheñi wanyi hela kwiteja ntañishilu yakutwamba neyi tunakudifukula kudi Yehova. Wabadika anzambi ejima nawa wayibadika ñovu. Diyi Nzambi walala. Dichi twatela kudifukula kudi Yehova hohu. Twatela kutwamijaku Yehova muchihandilu chetu. Neyi tunakukeña netu tudifukuleña kudi yena hohu, hitwatela kwiteja yuma yacheñi yituluwañeshiku. Hiyumanyi yeniyi? MuNshimbi Ikumi, Yehova wahosheli nindi antu jindi hiyatela kudifukula kudi anzambi acheñiku. Hiyatela kwila yuma yejima yakundama kukupeshaku. (Kuhit. 5:6-10) Makonu, kudi yuma yayivulu yakundama kukupesha nawa yuma yikwawu yakala kuyiluka. Ilaña Yehova wahimpa wanyi nshimbi jindi. Wuchidi ‘Yehova wumu hohu.’—Mak 12:29. w16.06 3:10, 12

Petulu chamwihwiliyi Yesu neyi twatela kwanakena “mapampa katanu nakayedi,” Yesu wamwakwili nindi: “Kakashiki mumakumi atanu nayedi, mapampa katanu nakayedi.” Yesu watulejeli nindi twatela kwanakenaña akwetu mpinji yejima. (Mat. 6:14, 15; 18:21, 22) Twatela kwiluka netu chineli wejima wetu twaluwañeshaña, ninetu nawa tunateli kuneñesha akwetu. Dichi neyi twiluka nenu tunaneñeshi mukwetu, twatela kulondela kufumba kwamuBayibolu. Lombenu kwanakena nawa tufwilenu kuleta kuwunda. (Mat. 5:23, 24.) Twatiyaña kuwaha neyi atwanakena. Dichi ninetu twatela kwanakenaña. (1 Kor. 13. 13:5; Kol. 3:13) Nawa neyi tukwanakenaña akwetu, Yehova niyena wukatwanakena. Dichi neyi akwetu anakoñi chiluwa, twatela kuyitiyila luwi neyi chatutiyilañayi luwi Tata yetu Yehova.—Mas. 103:12-14. w16.06 4:15, 17

Munanu mafuku akukuminina, antu jaYehova ayinka mudimu wakushimwina “nsañu yaWanta yayiwahi . . . mwahita matuña ejima mwashakamawu antu, kulonda yakayilili nyuza yejima wunsahu.” (Mat. 24:14) Hakachi kansañu yitwashimwinaña hekala kutiyakesha ‘nsañu yayiwahi yaluwi lwaNzambi lwasweja’ muloña nkisu jejima jitwachiñejaña kutambwila neyi Wanta wunakuyuula yakenza kuhitila muluwi lwaYehova lwamwekesheliyi mudi Kristu. (Yilw. 20:24; Efwes. 1:3) Twasakililaña hamuntu nimuntu neyi cheliliyi Pawulu haluwi lwaYehova lwasweja kuhitila mukushimwina mumudimu neyena? (Rom. 1:14,15) Etu akwanshidi twahetelaña muluwi lwaYehova lwasweja munjila jajivulu. Tudi namukudi kudi antu ejima wakuyileja Yehova chinakumwekeshayi luwi lwindi lwasweja nichiyanateli kuhetelamu hamuntu himuntu. w16.07 4:4, 5

Kukamwihi nakufwa kwindi, Yesu wasoñamishili atumbanji twindi mapampa kasatu hadi “mwanta wayulaña mpata yamunu mwishina.” (Yow. 12:31; 14:30; 16:11) Yesu welukili nindi Diyabolu wukaluwañesha yitoñojoka yawantu kulonda akabuli kwiluka mpinji yakashikija wuprofwetu waNzambi wahosha hayuma chiyakekala kumbidi. (Zefwa. 1:14) Satana nakuzatisha nsakililu yakutwamba yamukaayi kulonda yaputishi mesu ayitoñojoka yawantu. Neyi munakuhanjeka nawantu, ahoshaña nawudi? Diyabolu ‘hanaputishi mesu ayitoñojoka yawantu abula kwitiya’ hakukuma kwanyaaka yamakonu nikwiluka nawu Kristu nakuyuula Wanta waNzambiku? (2 Kor. 4:3-6) Kakavulu, antu atiyaña kutama neyi tuyileja netu kanu kaayi keña akijilumuni. Bayi mwiteja antu ayidiwulaña ayikañeshi kwikala atonaku. Mweluka chikupu. w16.07 2:11, 12

Neyi nsumbuki nadiwani nansumbuli hefuku dachawija, atiyaña muzañalu nankashi. Mwizu daNzambi mwekala kufumba kwahosha hadi antu anakukeña kwiñila muwulu, muloña Watachikili wulu wakeñaña nindi adisumbula ekaleña namuzañalu muwulu wawu. (Yish. 18:22) Ilaña, Nsona jamwekeshaña hatooka to-o nawu antu abula kuwanina akwiñila muwulu, “akamona yihuñu mumujimba.” (1 Kor. 7:28) Iyi yihuñu anateli kuyikeheshaku ñahi? Nawa chumanyi chinateli kukwasha wulu wawakwaKristu kwikala wakola? Bayibolu yahoshaña nawu kukeña kwalema nankashi. Adisumbula atela kwikala nakukeña (muchiGriki phi·liʹa). Atela kwikala cheñi nakukeña kwekalaña muwulu (eʹros) kwaletaña muzañalu, nikukeña kwamuchisaka (stor·geʹ) nawa neyi akweti anyana atela kwikala nakukeña kwamuchisaka. Ilaña, kukeña kwashindamena hanshimbi jamuBayibolu (a·gaʹpe) dikwaleteshaña wulu kwikala wakola. w16.08 2:1, 2

Pawulu wakolesheli Timotewu nindi: “Shaku muchima kukutañila amakwawu nikukukonkomwena, nikukuleja.” Timotewu wadiña weluka dehi mudimu wakushimwina. Hela chochu, mudimu windi wakushimwina wukwikala chiwahi neyi ‘wukuhemba’ kuleja kwindi. Wakuhweleleli wanyi nindi antu akwiteja yuma yayilejeliyi. Hakwila nawu yayishiki hanyichima, watela kuhimpa ntañishilu yindi kwesekeja nayuma yakeñeleñawu. Chineli tudi akwakushimwina aWanta, twatela kwila mwomumu. Kakavulu twawanaña wanyi antu hamatala neyi tunakushimwina kwitala nikwitala. Mumaluña amakwawu, twatweshaña wanyi kwiñila mumatala amakwawu hela mujimpwembu. Neyi chumichi chamwekanaña mwiluña denu, kwila muzatishaku njila yacheñi yakushimwinamu nsañu yayiwahi nehi? Kushimwina kudi antu amavulu hinjila yimu yayiwahi yakutandishilamu nsañu yayiwahi. A Yinsahu amavulu anakushimwina kuzatisha iyi njila. Ekalaña nampinji yakushimwina antu kuyitesheni yamasuwa niyamabasi, kuyisankanu, kwahembelañawu atunyama nikumaluña amakwawu kwawanikaña antu amavulu. w16.08 3:14-16

Yehova watwinka anakwetu mukaayi kejima akwakudifukula atukoleshaña. (Heb. 12:12, 13) Antu amavulu muyaaka nkulakaji yakusambila ayikolesheli kuspiritu muniyi njila. Chochimu nimakonu. Tunateli kwila ñahi? Toñojokenu hadi Aroni niHuri akolesheli makasa aMosi hampinji yanjita. (Kwid. 17:8-13) Tunateli kukeña njila mwakukoleshela nikukwashila amakwawu. Antu amuchidinyi? Hiyantu anakukabakana muloña wakukala kwenzaña muloña wawushinakaji, abula kukola kumujimba, anakukabishawu kudi chisaka chawu, anakukabakana muloña wakwikala nkawawu hela anafwishi antu akeñawu. Tunateli cheñi kukolesha atwansi anakumona ikañesha dakukeña kudibomba muyuma yatama hela anakufwila kwikala nachihandilu chachiwahi mukanu kaayi kuhitila mukutaña mashikola ahewulu nikwikala namali amavulu hela kukuluka yitembi munsañu yanyidimu. (1 Tesa. 3:1-3; 5:11, 14) Wanenu njila yakwilukilamu chinakuhandawu akwenu neyi mudi Hetala daWanta, mumudimu wakushimwina, neyi munakudiila hamu hela neyi munakuhanjeka hatelefoni. w16.09 1:13, 14

Nzambi yetu wajila, amanakwetu niahela akuspiritu kushilahu niantu amwiluña mutwashimwinaña, anateli kutiya kuwaha nanvwalilu yetu hela nehi. Dichi nvwalilu yetu yatela kulemesha Yehova ninsañu yitwashimwinaña. (Rom. 13:8-10) Twatela kwila mwenimu sweje-e neyi tudi munyidimu yawakwaKristu, yidi neyi tunakuya nakupompa hela neyi tunakuya mumudimu wakushimwina. Twatela kuvwala yakuvwala “yatelela [antu] adishimunaña nawu twaakamaña Nzambi.” (1 Tim. 2:10) Hela chochu, yakuvwala yikwawu kwiluña dimu yatelela, ilaña kwiluña dikwawu hiyatelelaku. Dichi, antu jaYehova mukaayi kejima alemesha yisemwa yamwiluña dawu kulonda abuli kuneñesha antu nanvwalilu yawu. Neyi tudi kukupompa kwanyanya nikwamaneni, twatela kuvwala yakuvwala yatelela nawa yayiwahi chatela twimbujoleña nvwalilu yinavuli mukaayi. Neyi twila mwenimu, tukwikala amuzañalu kuditena netu tudi aYinsahu jaYehova. Mwamweni, tukwikala akasunuka kushimwina mpinji yejima. w16.09 3:7, 8

Kuhanjeka namuntu muniyi njila kwapela nawa kwakwashanaña. Mwalala, yuma yawumi yakuhayamisha nankashi yikweti wayitoñojokeli nawa wayileñeli. Munateli kuzatisha yishina yoyimu yapela neyi munakuhanjeka namuntu wajinokaña Bayibolu. Mwihulenu yashimuni yuma yakuhwelelayi ninsañu yamutiyishaña kuwaha. (Yish. 18:13) Neyi watiyaña kuwaha nsañu yasayansi, nateli kwiteja neyi muhosha hayikuma yamwekeshaña nawu nsañu yahosha Bayibolu hasayansi yoloka. Antu amakwawu anateli kwiteja neyi muyileja yakutalilahu yamwekeshaña nawa muBayibolu mwekala wuprofwetu ninsañu yalala yakunyaaka. Hela munateli kumuleja yishina yamuBayibolu yalombolaña antu yidi neyi yekala muMpanji yahaMpidi. Ilukenu nenu, nkeñelu yenu yakukokola nyichima yawantu, bayi kutaadekaku. Dichi, mwatela kutiyilila nakanañachima. Ihulenu malwihu amawahi, mulejenu mukuwunda nawa nakalemesha, sweje-e dinu neyi munakuhanjeka namukulumpi. Neyi mwila mwenimu, chakadi nikujina akulemesha yuma yimunakuyileja. w16.09 4:14-16

Hakwila nawu mukwashi amakwawu afuma kuyitachi yashiyashana ekali akasunuka muchipompelu, dihulenu nenu, ‘Neyi nadiña mwituña dacheñi, nadi kukeña akwetu antambwili ñahi?’ (Mat. 7:12) Yiwundishilenu nyichima antu anakufwila kwinjilila chihandilu chamwituña munenziwu. Hakutachika, hitunateli kwiluka chikupu chatoñojokañawu hela chelañawuku. Ilaña, chatela tutoñojoki netu akutiya kuwaha nachisemwa chetu, komana kwila tutiya kuwaha nachekalawu wena nehi? Neyi tukwiluka iluña nichisemwa chawu, chikutukwasha kudikunda nawu. Hakudifukula kwachisaka tunateli kushiyaku mpinji yakusandujola hachihandilu chawantu amuchipompelu hela amwiluña mutwashimwinaña itunabuli kwiluka. Njila yikwawu yakudikundilamu nawantu anafumi kuyisemwa yacheñi, hikuyitambika kwitala detu nakudila hamu. Chineli Yehova ‘nenzulwili aJentili chenzelu chakukuhwelela,’ kwila twenzulwila yinsu yetu enyi ‘akwetu akwakwitiya’ nehi?—Yil. 14:27; Ŋal. 6:10; Yoba 31:32. w16.10 1:15, 16

Hanyima yakutena amayala niambanda ashiyashana ashinshika, Pawulu wahosheli hachakutalilahu chabadika chikupu, chaMwanta wetu Yesu Kristu. Mukanda waaHeberu 12:2 wahosha nawu, ‘Yena hansañu yamuzañalu wamushililuwu kumesu indi hakuumikila hamutondu wakuyandishila, hakudiwula nsonyi, nashakami kuchikasa chachidiilu chetanda daNzambi dawanta tenta-a.’ Mwamweni, twatela ‘kutoñojoka chikupu’ hachakutalilahu chaYesu chakwikala nachikuhwelelu neyi tunakumona kweseka kweneni. Kufwana Yesu, akwaKristu akusambila ajahiliwu muloña wachikuhwelelu chawu, adi neyi kambanji Antipasi, atwalekelihu kwikala ashinshika. (Chim. 2:13) Akekala nakukooleka kwakusañukila kuwumi mwiwulu, “kusañuka kwabadika kuwaha” kwadiña nakutalilawu amayala akushankulu adiña nachikuhwelelu. (Heb. 11:35) Chihahitili mpinji hanyima yakwila Wanta wunavwaliki dehi mu 1914, awayishewa ejima ashinshika akaamini mutulu twakufwa, ayisañwilili kuwumi wakuspiritu mwiwulu kulonda akayuuli antu hamu naYesu.—Chim. 20:4. w16.10 3:12

Anvwali amakwawu hiyahamekaña anyanawuku muloña adiña anvwali jawu hiyayikolesheleñaku. Akwanyidimu ayihamekaña wanyi, dichi abaña nawu hiyayikoleshañaku hamudimu hazatañawu. Kukolesha kwabombelamu kuhameka muntu yuma yayiwahi yineliyi. Twatela kukolesha amakwawu kuhitila mukuyileja netu adi nayilwilu yayiwahi hela ‘kukundeja antu ananeñi.’ (1 Tesa. 5:14) Izu dachiGiriki dabalumunawu nawu “kukolesha” daya mukwila nawu “kutambika muntu kulonda yakukundeji.” Chitukuzataña nawamanakwetu niahela, diyi mpinji yakuhosha mazu akukolesha. (Mukwa. 4:9, 10.) Komana twazatishaña mpinji yatelela kulonda eluki muloña chitwayikeñela nichitwayihamekelaña? Henohu kanda twakuli ilu lwihu, twatela kutoñojoka ntahi hanichi chishimu: “Izu dakuhoshela hadu hidinateleli o chidawaha!”—Yish. 15:23. w16.11 1:3-5

Nzambi wahosheli kutalisha hayuma yikayimwekena antu jindi nindi: “Nakayisha hamu neyi nyikoku yakuBozira.” (Mika 2:12) Kubombelahu, Yehova washimwineñahu dehi kuhitila mudi kaprofwetu Zefwaniya nindi: “Nakabalumuna madimi anyuza akekali idimi ditooka [dachalala chamuNsona], kulonda wejima wawu akatambikaña ijina daYehova, kulonda akamukalakelaña namuchima wawu wumu [dikwila nawu kudifukula kudi yena mukunuñañana.]” (Zef. 3:9) Twatiyaña kuwaha kudifukula kudi Yehova mukunuñañana. Chinamwekani hatooka to-o nawu kufumba kwonenewa kwekala Mwizu daNzambi kwakwashili akwaKristu atachi amuKorinda niakumaluña amakwawu kwikala akadi majilu, awunda nawa anuñañana muchipompelu. (1 Kor. 1:10; Efwes. 4:11-13; 1 Pet. 3:8) Makonu, nsañu yakwiluka nkeñelu yaNzambi anakuyishimwina mwahita iseki dejima muloña wakwila antu ekala mukuloñesha kwanuñañana kwashimwinaña. w16.11 2:16, 18

Hela chochu, kumatachikilu aYaaka yaMakonu, antu amavulu adiña nakutaña Bayibolu muchiGriki hela muchiLatini. Dichi atachikili kwesekeja nsañu yaMwizu daNzambi natushidikilu twamuchechi. Kwesekeja nayuma yadiziliwu muBayibolu, amakwawu akaanini kukuhwelela tushidikilu twamuchechi nawa chayikalili kuhosha chumichi hatooka. Mukuhita kwampinji, antu alekeli kuzatisha nsañu yamuBayibolu nawa chechi yakanishili antu kutuntulula Izu daNzambi mumadimi amakwawu adiña nakuhoshawu hayina mpinji. Muntu wejima wakanineña yuma yejima yadizileñawu kuchechi amubabesheleña. Ambuña aNzambi awayishewa ashinshika apompeleña mumazanvu mukuswamujoka neyi chinatwesheki. ‘Atupristu awanta’ awayishewa adiña nakuzata chiwahi wanyi. Antu adiña nakukabakana nankashi muBabiloni Muneni. w16.11 4:8, 10, 11

Twatela kuleka kwila nshidi yahamesu bwi-i yelileñawu akwaKorinda. Kwila mwenimu kwalema hakwila nawu tumwekeshi netu twamusakililaña Nzambi haluwi lwindi lwasweja nawa tukwilisha wanyi ‘nshidi kwikala mwanta hadi etu.’ Hela chochu, komana tunakufwila ‘kwovwahila munyichima yetu’ kuhitila mukuleka kwila nshidi yamwekanaña neyi yanyanya? (Rom. 6:14, 17) Toñojokenu hadi kapostolu Pawulu. Tuneluki chikupu netu welileña wanyi nshidi yahamesu bwi-i yatenawu ha 1 Akorinda 6:9-11. Hela chochu, wahosheli nindi wadiña nanshidi. Wasonekeli nindi: “Ami nidi wachisemwa chaheseki, anlanda dehi kuwuduñu wanshidi. Munelaña hineluka mwokuku. Munakeñaña kwila hinelaña mwokuku, munahelaña dimu nelaña.” (Rom. 7:14, 15) Awa mazu anakumwekesha nawu kudi yuma yikwawu yamweneñayi Pawulu nindi hinshidi nawa walwishileña kulonda yashindi. (Rom. 7:21-23.) Dichitwatela kwila ninetu hampinji yitunakufwila kwikala ‘ovwahila munyichima yetu.’ w16.12 1:15, 16

Neyi mudi mukukala kunateli kuyiletesha kwakama, mwatela kumuleja Tata yenu wamwiwulu wukweti kukeña. Neyi munazati dehi nañovu kumanisha kukala kwenu, kulomba kwakufuma hamuchima kukuyikwasha kubula kwakama. (Mas. 94:18, 19) Neyi chinakumwekesha Afwilipi 4:6, 7, Yehova nateli kwakula kulomba kwetu kwakufuma hamuchima nakulembelela. Munjilanyi? Nateli kutukwasha kwikala nakuwunda kwamuyitoñojoka nimumuchima kulonda tubuleña kwakama. Antu amavulu anateli kwiteja chumichi, kwesekeja nachayikwashiliyi. Nzambi wayikwashili, kwikala mukuwunda hampinji yadiñawu mukwakama kwasweja. Ninenu dichi munateli kutiya. Dichi “kuwunda kwaNzambi” kunateli kushinda kukala kwejima kumunateli kumona. Mwatela kumukuhwelela chikupu Yehova chayishiikayi nindi: “Bayi wuyeñashanaku, ami yami Nzambi yeyi, nakakwinkaña ñovu; chalala nakakukwashañaku.”—Isa. 41:10. w16.12 3:3, 4

Mosi wakaanini maheta amuEjipitu, “watondelihu kukabakena hamu nawantu jaNzambi kubadika kudiluñisha chiseki chanshidi chahakapinji kantesha.” (Heb. 11:25, 26) Twimbujoleña chikuhwelelu chanawa antu akushankulu kuhitila mukulemesha chawaana chakudifuukwila nikuchizatisha hakwila nkeñelu yaNzambi. Hela chakwila muntu nateli kutufuukwila, kwila mwenimu kunateli kutukañesha kutambwila chuma chafumaña mukudifuukwila. Ichi chuma achishimuna haKuhituluka 30:19, 20. Vasi 19 yashimunaña wuswa wayinkeliwu aIsarela kudi Nzambi. Vasi 20 twatañaña nsañu yahosha hachayinkeliyi Yehova kukooleka kwakumwekesha yuma yadiña munyichima yawu. Ninetu tunateli kutondahu kudifukula kudi Yehova. Kwosi chuma chikwawu chitwatela kuzatisha kumwekeshelamu kukeña nikumulemesha Nzambi chabadika chawaana chatwinkayi chawuswa wakudifuukwila. w17.01 2:10, 11

Yehova wakeñaña nindi tuzatisheña ñovu jetu jatwinkayi. Muloñadi? Muloña watukeña nawa weluka nindi twekalaña namuzañalu neyi tuzatisha iyi yawaana. Hampinji yoyimu, Yehova weluka nindi antu adana ñovu yakwila yuma yejima. Tudana ñovu yakufumishahu kubula kuwanina, nshidi nikufwa nawa kwila tuleja antu chatela kwilawu nehi, muloña niwena akweti wuswa wakudifuukwila. (1 Anya. 8:46) Hela chakwila tukwiluka yuma yayivulu, tunateli kwesekana wanyi naYehova. (Isa. 55:9) Muyuma yejima, twatela kushindamena hawunlomboli waYehova, kumukuhwelela netu wukutukwasha nikutwilila yuma yitukukañanya kwila. Hampinji yoyimu, twatela kuzata nañovu kumanisha kukala nikukwasha amakwawu. Munjila yikwawu, twatela ‘kumukuhwelela Yehova nawa twileña yayiwahi’; nawa twatela kwikala ‘ashinshika.’ w17.01 1:2-4

Bazilayi wakaanini. Muloñadi? Muloña wawushinakaji, wamulejeli Davidi nindi hakeñeleña kumwinka mwanta chiteliku. Bazilayi wamulejeli nindi mwanta yasendelimu Chimihami, hadaha wadiña mwanindi. (2 Sam. 19:31-37) Kudikehesha kwamukwashili Bazilayi kufuukula chiwahi. Wakaanini kuya naDavidi muloña wakeñeleña kushakama kwamwena muwushinakaji bayi neyi hadi kutwesha kuzataku. Welukili nawa wetejeli nindi wazeya dehi muloña wakukula. Hakeñeleña kwikala nanyidimu yayivulu yadi kukañanyayi kwilaku. (Ŋal. 6:4, 5.) Ilaña neyi tukukinka manuñu hachifulu, mpuhu hela kutuumbakana, tukutachika kudivwimba, kwikala nayilwilu yakudibecha nawa mukuhita kwampinji chakatuneñesha. (Ŋal. 5:26) Ilaña, antu adikehesha etejaña akwawu kuyikwasha kulonda amulemeshi Nzambi nawa adishañaku kulonda akwashi akwawu.—1 Kor. 10:31. w17.01 4:5, 6

Yehova hiNleñi wabadika. Yuma yejima yaleñayi yakuhayamisha. (Yere. 10:12) Neyi chamwekeshaña yileñaleña, yelaña yuma kwesekeja nachayileñayi Yehova. Wenkaku nshimbi kulonda yuma yejima yizateña munjila yayiwahi. (Mas. 19:7-9) Hela chochu, yileñaleña yejima yekala neluña dayu nimudimu wuyazataña kwesekeja nanshimbi munkeñelu yaNzambi. Yehova washimuna nshimbi jakwashaña yileñaleña yindi kuzatila hamu. Dichi, nshimbi yekala nañovu yakokaña yakwata mpepela kwakwihi neseki, yayuulaña tuluñalwiji nawa yakwashaña yuma yejima yekala hamaseki. Yileñaleña yejima kubombelahu niantu yendaña nikwila yuma kwesekeja nachayileñawu. Mwamweni, iyi yuma chayishawu mundonda chamwekeshaña nawu Nzambi wekala nankeñelu kutalisha kwiseki niantu. Neyi tudi mumudimu wakushimwina, kwila tulejaku antu Waleñeli iyi yuma nehi?—Chim. 4:11. w17.02 1:4, 5

Chelili Mosi yafwi, amuswanini kudi Yoshuwa, amukolesheli kudi “mukulumpi wanjita yaYehova” kulonda yalomboli antu jaNzambi hakuzuña njita nawaKenani nawa aIsarela ashindili. (Yosh. 5:13-15; 6:2, 21) Kuhiñahu, Mwanta Hezekiya wamweni kukala nawamashidika awaAshuri akeñeleña kujilumuna Yerusalema. Muwufuku wumu hohu, “kañelu kaYehova hakwidika, hakutapa antu makombakaji nkulakaji, namakombakaji makumi atanu nasatu namakombakaji atanu.” (2 Anya. 19:35) Hela chakwila añelu adiña awanina, antu akwashileñawu adiña awanina wanyi. Mpinji yimu, Mosi wakañenyi kujilika ijina daYehova. (Kuch. 20:12) Yoshuwa wakwatili chitiyañenu naweni Gibeyoni henohu kanda yamwihuli Nzambi. (Yosh. 9:14, 15) Hakapinji kantesha, Hezekiya, “wadinkeli wanta mumuchima windi.” (2 Kushi. 32:25, 26) Hela chakwila awa amayala adiña awanina wanyi, aIsarela ateleleli kulondela wunlomboli wawu. Yehova wadiña nakukwasha awa amayala kuzatisha añelu. Mwamweni, Yehova walombweleña antu jindi. w17.02 3:7-9

Kulemesha muntu kwatalisha mukumutiyilila chikupu nikumwinka kavumbi. Tunateli kumutiyilila chikupu nikumwinka kavumbi neyi neli chuma chachiwahi chatela kumulemeshelahu hela neyi wudi nachifulu cheneni. Dichi tunateli kudihula netu, Hinyi itwatela kulemesha nawa muloñadi chitwatela kumulemeshela? Chimwekeshu 5:13, yamwekeshaña nawu ‘Owu washakama hetanda niMwana kaMukoku’ atelela kulemeshewa. Kapetulu 4 kamukanda wowumu wamuBayibolu kashimuna chuma chacheni chitwatela kumulemeshela Yehova. Yileñaleña yalema yamwiwulu yakwitanda yabidikaña nakumuhameka Yehova nawu, “Owu wahandaña haya nyaaka nanyaaka. Yehova Nzambi yetu, watelela kutambwila kulema, kalemesha niñovu, muloña yeyi waleñeli yuma yejima nawa muloña wankeñelu yeyi, dichiyekalililiku nawa dichiwayileñeleli.”—Chim. 4:9-11. w17.03 1:1, 2

Antu amavulu ahoshaña nawu: Ilaku munakuleji muchima weyi. Ilaña kwila mwenimu kunateli kuleta kukala. Nawa kulondela iyi nhoshelu kwamunsona wanyi. Bayibolu yatusoñamishaña kubula kulondela nyichima yetu yabula kuwanina hela nhoshelu yawuntu neyi tunakufuukula. Nsañu yekala muBayibolu yamwekeshaña yuma yatama yafumaña mukulondela nyichima yetu. Kukala kudi kwakwila nawu antu abula kuwanina, ‘nyichima yawu yasweja kudimbana, yadimbanaña chakubadika yuma yejima, yasweja nikukata.’ (Yere. 3:17; 13:10; 17:9; 1 Anya. 11:9) Hanu dinu, yumanyi yikufumamu neyi tulondela nyichima yetu kuyuula yitoñojoka niyilwilu yetu? Chakutalilahu, chumanyi chinateli kufumamu neyi tufuukula iku tunahili? Neyi twafukuulahu dehi iku tunahili, tuneluki yuma yafumañamu. (Yish. 14:17; 29:22) Indi neyi tufuukula iku tunaneñi, yumanyi yikufumamu? (Kuch. 32:6-12; Yish. 24:10) Chakadi nikujina, tunateli kufuukula mwaluwa neyi twiteja chitunakutiya kutuyuula hampinji yitunakufuukula hayuma yalema. w17.03 2:12, 13

Wejima wetu twaluwañeshaña muloña twawanina wanyi. Hela chochu, twamusakililaña Yehova muloña watwilaña wanyi ‘kwesekeja nakuluwa kwetu,’ chakala hohu tubalumuka mumuchima nikumukuhwelela nakudizoza kushindamena hamulambu wefutu danyiloña daYesu. (Mas. 103:10) Dichi, neyi chamulejeliwu Solomoni kudi Davidi, hakwila nawu Yehova yeteji kudifukula kwetu, twatela “kumukalakela namuchima wejima.” (1 Kushi. 28:9, NWT.) Kumukalakela Nzambi “namuchima wejima” kwakeñekaña kudihana chikupu chakadi kuleka. MuBayibolu, izu dakwila nawu “muchima” kakavulu datalisha kumuntu wamukachi. Mwabombela yuma yitwakeñaña, yitoñojoka, yitwakamenaña, yilwilu yetu, wuswa niyuma yitwafwilaña kwila. Dichi muntu wamukalakelaña Yehova namuchima wejima wazataña wanyi nyidimu yawunfwikiji. Nawa hadifukulaña kudi Yehova neyi chaaku hohuku. Indi etu? Neyi etu antu abula kuwanina tukutwalekahu kudifuukula kudi Nzambi chakadi wunfwikiji, tukutwalekahu kumukalakela Nzambi namuchima wejima.—2 Kushi. 19:9. w17.03 3:1, 3

Neyi tuzata chuma munjila yayiwahi, komana chinatalishi mukwila nawu Yehova ‘natushiyi nkawetu kulonda yatweseki,’ hakwila nawu tumwekeshi yuma yidi mumuchima wetu? Chakutalilahu, manakwetu nateli kuzata nañovu kuloñesha mpanji kulonda yakahani kudi antu amavulu. Anateli kumuhameka chinahaniyi mpanji yindi. Nateli kwila ñahi naniku kuhameka? Neyi anatuhameki, tukwila chiwahi neyi tulondela mazu aYesu akwila nawu: “Neyi muzata nyidimu yinayinkiwu, hoshenu nenu: ‘Tudi hohu anduñu amukunkulwayi. Yuma yitunakoñi diyi yitwatela kwila.’” (Luka 17:10) Tunateli kudizilaku cheñi chikuma chikwawu kudi Hezekiya. Chilwilu chakudinka wanta chamwekesheli nawu ‘wasakililili wanyi hayuma yayiwahi yamwilililiwu.’ (2 Kushi. 32:24-27, 31) Neyi tutoñojokañahu chikupu hayuma yinatwililiyi Nzambi chikutukwasha kutondolwela yilwilu yahelayi Yehova. Tunateli kumusakilila Yehova wakwashaña antu jindi. w17.03 4:12-14