May

Hadi yaaka yinahitihu, mumatuña amavulu munahwili antu anakutemuka njita mumatuña awu. Kwila mudiza chakwimusha mwidimi dahoshañawu awa antu anenzi mwiluña denu nehi? Kubombelahu, kwila mudizaku chakuhosha nyikuku yantesha mwidimi dawu kulonda muyikokoli nachu nehi? Mwatela cheñi kuyilombola ha jw.org nakuyileja mavidiyo ashiyashana ninyikanda yamwidimi dawu. Yehova watuloñeshela Chihandilu niMudimu kulonda tushimwineña chachiwahi mwiha. Yuma yitwadizaña haniku kupompa yatukwashaña kwikala ahamuka hakufuntila nikuyidizisha antu Bayibolu. Enu anvwali, kwashenuña anyanenu atoñekeña chejeji chawu kuhitila mukuyidizisha chakwakula mumazu awu. Mazu ahoshañawu chakufuma hamuchima anakwashi antu amaha kwiluka chalala.—1 Kor. 14:25. w18.06 22-23 ¶7-9

Twatela kwanuka netu mpinji yimu ninetu twadiña ‘antu acheñi,’ hela akumatuña acheñi, abulili kumwiluka Nzambi. (Efwe. 2:12) Ilaña Yehova watukokeleli kudi yena “[nanyonji] yakukeña.” (Hos. 11:4; Yow. 6:44) Nawa Kristu watutambwilili. Munjila yikwawu, watwenzunwinini chiisu kulonda twikali antu amuchisaka chaNzambi. Chineli Yesu watutambwilili hela chakwila twawanina wanyi, chikwikala chaluwa kukaana muntu wudi wejima! Kudambula, chaambu ninkunyi jikuswejelañaku mukaayi chineli tunakuswina kukukuma kwanshakaminu yatama yamakonu. (Ñal. 5:19-21; 2 Tim. 3:13) Etu ambuña aYehova, twalombaña maana afumaña mwiwulu atukwashaña kubula kwikala nachaambu nawa atukwashaña kwikala nakuwunda. (Yak. 3:17, 18) Twatiyaña kuwaha kukwata wubwambu nawantu akumatuña acheñi, twadiwulaña wanyi yisemwa yawantu amakwawu nawa neyi chinatwesheki tunateli nikudiza madimi acheñi. Neyi twila mwenimu, kuwunda kwetu kwenzalaña neyi menji mukaloña nawa wuñaji wabwankañilaña neyi mankanda amukaluñalwiji.—Isa. 48:17, 18. w18.06 12 ¶18-19

Neyi mushidika wawaRoma navwali nkwabilu wanyi, dikwila nawu hanadiloñeshi kwasa njitaku. Nkwabilu jindi ajituñili nanyidita yisatu yakukasa nanyiya yachitembi yamukiñileña kunyendu. Iji nkwabilu ajituñili chachiwahi nawa jadiña jakola. Chineli nkwabilu javwalileñawu mashidika awaRoma jayikwashileña munjita, munjila yoyimu nkwabilu jachifwikija javwalaña akwaKristu jayikwashaña kushimwina nsañu yakuwunda. (Isa. 52:7; Rom. 10:15) Hela chochu, twatela kwikala ahamuka hakwila nawu tushimwini neyi tunawani antu. Bo wudi nayaaka 20, wahosheli nindi: “Natiyileña woma kuyishimwina akwetu akashikola.” Ilaña wahosheli cheñi nindi: “Natiyili nsonyi. Chinanuka, nakañanyaña kwiluka chuma chaletesheleña. Ichi natiyaña kuwaha kuyishimwina akwetu.” Atwansi amavulu neyi anadiloñeshi chikupu kushimwina nsañu yayiwahi atiyaña kuwaha. w18.05 29 ¶9-11

Yesu walejeli apostolu indi nindi: “Nayinki kuwunda kwami.” (Yow. 14:27) Ichi chawaana chakuwunda kwindi chatukwashaña ñahi kusoña nyikabu? Chitukuumikaña, tukumonaña kuwunda kwenzaña hakwikala amabwambu jaYehova niYesu. (Mas. 149:4; Rom. 5:3, 4; Kol. 3:15) Hanyima yakwila Yesu nayileji apostolu indi nindi akekala namuzañalu “chikupu,” wayilumbulwililili chichawahila kumwekesha kukeña kwakudihana. (Yow. 15:11-13) Kuhiñahu wayilejeli nindi: “Nayiteni nami amabwambu jami.” Kwikala ibwambu daYesu hichaawana chabadika! Apostolu ateleleli kwiladi hakwila atwalekihu kwikala amabwambu jindi? Ateleleli ‘kuya nakusoña nyikabu.’ (Yow. 15:14-16) Henohu kunashali yaaka yiyedi, Yesu walejeli apostolu indi nindi: “Dichi chimukuyaña, shimwinenuña nenu: ‘Wanta wamwiwulu wunaswini dehi kwakwihi.’” (Mat. 10:7) Dichi hawuna wufuku wakukumishaku, wayilejeli nindi omikeña mumudimu wuyatachikili kuzatawu.—Mat. 24:13; Maku 3:14. w18.05 20-21 ¶15-16

Enu atwansi shenu muchima hakumukalakela Yehova muchihandilu chenu. Dikwila nawu mwatela kutwamijaku yuma yakuspiritu. Akwenu atwansi amavulu asha maana hakwila yuma yakuditiyisha aweni kuwaha, dichi anateli kutachika kuyileja nawu muyimbujoleña. Mwatela kumwekesha kuhamuka hakwila mutwalekihu kwila yuma yimunafuukuli. Bayi ayiluwañesha kudi akwenuku. Kudi njila jajivulu jimunateli kushindilamu ikakeja dawakwenu. Chakutalilahu, mwatela kwikala asoñama kulonda mubuleña kwila yuma yatama. (Yish. 22:3) Nawa mwatela kutoñojokaña hayuma yatama yafumaña mukudikunda nawantu akweti yilwilu yatama. Chuma chikwawu chikuyikwasha hikutiyilila neyi anayikwashi. Mwatela kwikala adizoza kulonda mutiyilileña kufumba kwawanvwali nikwawantu apama kuspiritu muchipompelu. (1 Pet. 5:5, 6) Komana mwadizoza chikupu kutambwila wukwashu? w18.04 28-29 ¶14-16

Yesu watemesheli mazu akuhameka akwakumulondela adiña muyipompelu yikwawu muAsia Minor hamudimu wazatiliwu. Chakutalilahu, wasambilili kuleja chipompelu chakuTiyatira nindi: “Neluka nyidimu yeyi, kukeña kweyi, chikuhwelelu cheyi, nimudimu weyi iwakalakalaña nikuumika kweyi, nawa neluka nami nyidimu yiwunakukalakala chayinu mpinji, yinabadiki chikupu yiwadiña nakukalakala hakusambila.” (Chim. 2:19) Yesu wayihamekeli hanyidimu yazatileñawu nihayilwilu yaletesheli akoñi nyidimu yayiwahi. Hakufumba antu amakwawu muTiyatira, Yesu watachikili namazu akuyikolesha nawa wakunkulwili cheñi namazu akuyikolesha. (Chim. 2:27, 28) Yesu wukweti wuswa chikupu chineli diyi mutu wayipompelu yejima. Dichi, hatela kutusakilila hanyidimu yitwamuzatilañaku. Hela chochu, watusakililaña. Akulumpi niwena atela kumwimbujola Yesu. w19.02 16 ¶10

Izanvu dalombweleña mumafuku awapostolu dadiña nakukolesha akwaKristu adiña nakulombola niakwaKristu ejima. Datemesheli amamembala ayedi, Petulu niYowanu, kuya nakuyilombelaku awa antu etiyili kulonda atambwili spiritu yajila. (Yil. 8:5, 14-17) Fwilipu hamu niantu akwashiliyi kwikala akwaKristu akolesheweli chayikwashiliwu kudi izanvu dalombolaña. Makonu Izanvu Dalombolaña dawaYinsahu jaYehova dakoleshaña amamembala amuchisaka chaBeteli, azataña mudimu wakushimwina wampinji yejima kushilahu niamanakwetu akwaKristu amukaayi kejima. Akoleshewaña neyi chayikolesheliwu akwaKristu akusambila, azañalalaña nankashi nanochu chayikoleshañawu. Kubombelahu, mu 2015 Izanvu Dalombolaña dedishili buloshuwa yaFuntenu kudi Yehova, nawa iyi buloshuwa yinakoleshi antu amavulu nankashi kunyeñumuka kaayi kejima. w18.04 19 ¶18-20

Antu amakwawu atoñojokaña nawu neyi ekala asubuka chikupu akushakamaña chachiwahi, ilaña walala wudi wakwila nawu neyi kusubuka kwetu kubula mwakukumina, himpoku yakabali yawumwemu kuyedi. Kusubuka kwakuwahi munjila yikwawu; ilaña toñojokenu chadi kwikala kaayi neyi kusubuka kwadiña wanyi namwakukumina. Dihafuma mukanda waThe World Book Encyclopedia kuhosha nawu: “Mumatuña atuñaña nshimbi jakala jaleteshaña antu kukañanya kwiluka neyi asubuka hela nehi.” Mwamweni jekala “jakala.” Toñojokenu kuvula kwanyikanda yanshimbi yasonekawu antu, ansompeshi nimahaku hohu diwu anateli kujishimuna nikujilumbulula. Yesu washimwini yuma yiyedi yitwatela kwila hakwila twikali asubuka chikupu: Chatachi, kwiteja chalala chatañishileñayi, chamuchiyedi, kwikala kambanji kindi. Neyi twila mwenimu tukwikala asubuka chikupu. Hanu tukusubuka kuyumanyi? Yesu watwalekelihu cheñi nindi: “Muntu wejima wakoñaña nshidi, hinduñu yanshidi. . . . Neyi Mwana yayifumisha muwuduñu, mwakafuma muwuduñu chikupu.”—Yow. 8:34, 36. w18.04 6-7 ¶13-14

Twatiyaña kuwaha neyi tunakushakama nawantu atwakamenaña. Afwilaña kwiluka yuma yitunakutoñojoka nichitunakutiya. Elukaña yuma yitunakukeña nawa atukwashaña henohu kanda tuyileji kukala kutukweti. Twayitiyaña kuwaha nikuyisakilila antu ‘atwakamenaña.’ Etu akwaKristu twakeñaña kumwekesha wushona hela kudakamena. Hela chochu, twatela kuzata nañovu kulonda tumwekesheña wushona nikwakamena akwetu. Muloñadi? Muloña twawanina wanyi. (Rom. 3:23) Kakavulu twatoñojokaña hayuma yitwakeñaña etu aweni. Dichi twatela kuzata nañovu kulonda tutoñojokeleñaku akwetu. Nawa etu amakwawu chatukalilaña kutiyila antu wushona muloña wanochu chatukulishawu hela muloña wayuma yatumwekeneni kunyima. Hadaha, tunateli kuluwankana nayilwilu yawantu itwashakamaña nawu. Munanu mafuku akukuminina, antu amavulu hiyakamenaña akwawuku. Ilaña “[adikeña] awenawu.” (2 Tim. 3:1, 2) Neyi tumwimbujola Yehova niMwanindi, Yesu Kristu, tukuyakamenaña akwetu chikupu. w19.03 14 ¶1-3

Nshimbi yakukumishaku hanshimbi 10, yakaanishili lwisu hela kufwila chuma chamukwenu. (Kuhit. 5:21; Rom. 7:7) Yehova wahanini iyi nshimbi kulonda antu jindi ahembeña muchima niyitoñojoka yawu. Weluka nindi yuma yatama yatachikilaña mumuchima nimuyitoñojoka. Mwanta Davidi welili chuma chamuchidiwu. Wadiña muntu wamuwahi, ilaña ifuku dimu wafwilili ñoda mukwawu. Kufwila kwindi kwatama kwamuleñeleli kukoña nshidi. (Yak. 1:14, 15) Davidi welili wujila, wesekeli kumudimba mwini mumbanda, nkumininaku wamujahili. (2 Sam. 11:2-4; 12:7-11) Bayi neyi Yehova wamonaña muntu kumesu hohuku, ilaña wamonaña mukachi kamuchima wetu. (1 Sam. 16:7) Yuma yejima yitwatoñojokaña niyitwelaña yidi nzekesi kumesu indi. Wamonaña yuma yayiwahi mudi etu nawa watukoleshaña kutwalekahu kwila yuma yayiwahi. Ilaña wakeñaña nindi twilukeña nikutondolwela yitoñojoka yatama henohu kanda tukoñi yuma yatama.—2 Kushi. 16:9; Mat. 5:27-30. w19.02 21 ¶9; 22 ¶11

Bayibolu yamutena Mosi nawu “wadiñi mwovu nankashi, kubadika amayala ejima ekala heseki dejima.” (Kuch. 12:3) Komana chinayi mukwila nawu wadiña wazeya, watiyileña woma hakufuukula nawa wadiña wahamuka wanyi neyi antu anakumudimbulula? Antu amakwawu dichinateli kumulumbululawu muntu wadizoza. Ilaña dimu wanyi. Mosi wadiña kambuña aNzambi wakola, wahamuka nawa wadiña nakufuukula chakadi woma. Yehova wamukwashili kuya nakudimona namwanta wañovu wakuEjipitu, hadaha walombweli antu akushika ku 3,000,000 muchinkalampata nawa wakwashili muza waIsarela kushinda ayilumbu jawu. Hitwamonaña kukala neyi kwamweniyi Mosiku, ilaña mafuku ejima twawanikaña nawantu hela twamonaña yuma yatuleñelaña kubula kudizoza. Ilaña kudi chuma chacheni chatuleñelaña kwikala nanichi chilwilu. Yehova wakana nindi “akwakudizoza akaswana ituña.” (Mas. 37:11) Komana mwadimonaña nenu mwadizoza? Komana antu amakwawu anateli kuhosha nawu mwadizoza? w19.02 8 ¶1-2

Muntu wekala nachinleji kufuma tuhu mpinji yamuleñeliwu. Chelili aAdama naEva afumpi lushimbi lwaYehova, aswamini. Chumichi chamwekeshaña nawu chinleji chawu chayikabishileña. Antu abulaña kudizisha chinleji chawu tunateli kuyesekeja nambopolu yikweti kampasi kafwa. Kwenda lwendu nakampasi kafwa munateli kufuma wubanji. Mpepela nimankanda ahakaluñalwiji anateli kutwala mbopolu kwacheñi. Kampasi kanakuzata chiwahi kanateli kukwasha ñendeshi wambopolu kwenda chiwahi nakuya kwiluña kunakuyayi. Chinleji chetu tunateli kuchesekeja nakampasi kamuyitoñojoka yetu. Himaana akwiluka nachu yayiwahi niyatama anateli kutulombola munjila yaloña. Ilaña hakwila nawu chinleji chetu chizatikeña chiwahi, chatela kwikala chadizishewa hela chakufumba chiwahi. Neyi chinleji chamuntu chakudizisha chiwahi wanyi, hichinateli kumukwasha kutondolwela yuma yatamaku. (1 Tim. 4:1, 2) Chinleji chamuchidiwu chinateli kutuleja yuma “yatama nawu yayiwahi.” w18.06 16 ¶1-3

Tukwila chiwahi neyi twiluka nikukaana yitoñojoka yamukaayi yamwekanaña neyi yinateli kutuluwañesha wanyi. Chakutalilahu, nsañu jikwawu anateli kujitiyakesha nakuhakwilaku izanvu dimu damapolitiki. Atiyakeshaña cheñi nsañu yakuwahishaku yuma mukaayi nikuwahishaku nshakaminu yawantu. Mafwilimu ninyikanda yikwawu yatiyakeshaña nsañu yakwila nawu “yuma yayiwahi yatela kusambila kwikala yami nichisaka chami” nakumwekesha neyi hiyilwilu yayiwahi nawa yaloña. Yitoñojoka yamuchidiwu yadiwulaña chahosha Bayibolu nawu, etu nichisaka chetu tukwikala namuzañalu neyi tumukalakelaña Yehova. (Mat. 22:36-39) Ilaña chatama wanyi kudiluñisha yisela yayiwahi. Hela chochu, twatela kudihula netu: ‘Komana twelukaña ntañishilu yamukaayi hela chakwila anakuyitandisha munjila yitunateli kubula kwiluka? Komana twadikiñaña etu aweni nianyanetu kumaprogiramu amakwawu aha TV hela kutaña nyikanda yikwawu? Komana twakwashaña anyanetu kumona yuma yamukaayi yatiyañawu hela yamonañawu neyi chayimonañayi Yehova?’ w18.11 22 ¶18-19

Yehova wamwekeshaña nindi wudi nanetu chatwakamenañayi nikutumwekeshela kukeña. Talenu chamwekeshañayi nindi watwakamenaña nawa nindi watukeña. Yehova watulejaña nindi: “Chiwasweja wuseya kumesu ami, walema nawa nakukeña.” (Isa. 43:4) Kwosi ñovu mukuleña kwejima yinateli kumukañesha Yehova kukeña antu amukalakelañaku; watwalekañahu kutukwasha. (Isa. 54:10) Yehova wakana wanyi nindi wukufumishahu kukala kutukumonaña muchihandilu, ilaña haketeja kukala kudi neyi ‘tuloña’ kutukañesha kumukalakela hela kukala kudi neyi ‘mulañi’ kutwalekahu haya nyaakaku. Watukana nindi wukwikalaña nanetu, wukutukwashaña kumanisha kukala kwejima ‘kutukuhitañamu.’ Yehova wukutukwashaña ñahi? Wukutukwashaña kubula kwikala nawoma kulonda tutwalekihu kwikala ashinshika kudi yena hela chakwila tukufwa. (Isa. 41:13; 43:2) Neyi tukuhwelela muchikaninu chaNzambi chakwila nawu: “Nukwikalaña neyi,” ninetu tukwikalaña ahamuka nawa akola hampinji yitukumonaña kukala. w19.01 3 ¶4-6

Mudi atwansi, chakadi nikujina, ayikwashahu dehi kudi antu amavulu antañishi, akwakufumba hela antu amakwawu ayilejahu nawu mukatañi shikola yahewulu nikwiñila nyidimu yamali. Ilaña Yehova nakuyileja nindi mwili chuma chambukaku. Kuhosha hohu walala, wakeñaña nindi muzateña nañovu himuchidi kushikola kulonda mukatweshi kudihemba nikudikwasha muyuma yakeñekaña kumujimba. (Kol. 3:23) Hampinji yimunakutonda yuma yimunakufwila kwila muchihandilu chenu, wayikoleshaña kuzatisha yishina yikuyikwasha kwila yuma yamutiyishaña kuwaha muyinu mpinji yakukuminina. (Mat. 24:14) Anukenu nenu Yehova wamonaña yuma yejima. Weluka yuma yikamwekana kumbidi nawa neluki adinu ituña chididi kwakwihi nakukuma. (Isa. 46:10; Mat. 24:3, 36) Watwiluka chikupu, weluka yuma yinateli kutukwasha nikutuletela muzañalu chikupu nawa weluka yuma yinateli kutuletela kukala nichineñi. Dichi, hela chakwila muntu nateli kutukwasha ñahi, neyi wukwashu windi wunakwendela hamu wanyi nayishina yaMwizu daNzambi, himaanaku. w18.12 19 ¶1-2

Ilaña “akwakudizoza akaswana ituña, akatiya kuwaha nankashi nakushakama chachiwahi chamwena.” Davidi amoneneni cheñi kushimuna yuma yakumbidi nawu: “Akwakuloña akaswana ituña, akashakamamu haya nyaka.” (Mas. 37:11, 29; 2 Sam. 23:2) Munakutoñojoka nenu iyi yikaninu yayikwashili ñahi antu akeñeleña kwila nkeñelu yaNzambi? Awa antu atela adiña nawunsahu wawuvulu wayileñeleli akuhweleli nawu neyi akwakuloña hohu diwu akashakamaña heseki, mukuhita kwampinji iseki akadifuntisha kwikala paradisa neyi chadiña itempa daEdeni. Chimwahitili mpinji, aIsarela amakwawu ahosheleña nawu adifukulaña kudi Yehova amufutaleleli Yehova nawa alekeli kudifukula kwalala. Dichi, Nzambi wetejeli antu jindi kuyishinda kudi aBabiloni, kujilumuna mukala wawu nawa amavulu ayitwalili muwunkoli. (2 Kushi. 36:15-21; Yere. 4:22-27) Hela chochu, atuprofwetu jaNzambi ashimwineñahu dehi nawu neyi munahiti dehi yaaka 70, antu jaNzambi akafunta kumukala wawu. Iwu wuprofwetu washikijeweli. Ilaña iwu wuprofwetu wunakundami nikudetu, paradisa yikekalaku heseki. w18.12 4 ¶9-10

Yitoñojoka yayivulu yidi mukaayi yambukaku chikupu nachahosha Nsona. Komana iyi yuma yinateli kutukwasha makonu? Yesu wahosheli nindi: “Yuma yaloña yelañayi muntu, diyamwekeshaña nawu wukweti maana.” (Mat. 11:19) Kaayi kanakuyilaku hambidi mujakutuñatuña. Hela chochu, kanakañanyi kumanisha kukala kweneni kunakuletesha antu kubula kwikala namuzañalu, kukala kudi neyi njita, chaambu chekowa nimadombu. Indi yilwilu yawuvumbi, ayimonaña ñahi? Antu amavulu anawani nawu iyi yitoñojoka yinakumanisha wanyi kukala, ilaña yinakuletesha antu kudiseña, yikatu nikukala kukwawu. Kwambukaku, akwaKristu amonaña yuma neyi chayimonañayi Nzambi ekala namuzañalu muyisaka yawu, akola kumujimba muloña wayilwilu yayiwahi nawa adi nakuwunda nawakwawu akwakwitiya mukaayi kejima. (Isa. 2:4; Yil. 10:34, 35; 1 Kor. 6:9-11) Komana chumichi hichinakumwekesha nawu yitoñojoka yaYehova yabadika yitoñojoka yamukaayiku? w18.11 20 ¶8-10

Hela chakwila tunakufwila kudikunda nawantaña jetu nikuyilila yuma yayiwahi, twatela kwikala ababala kulonda tubuli kudiwula chalala muloña wakukeña kuyizañalesha. Hampinji yitunakutwalekahu kuzata nañovu kudikunda nawantaña jetu,ilaña twatela kudikunda hohu nawantu amukeña Yehova. Antu ejima endaña muchalala atela kwikala ajila. (Isa. 35:8; 1 Pet. 1:14-16) Hampinji yitwatachikili kudiza chalala, wejima wetu twahimpili nakutachika kulondela chahoshaña Bayibolu. Amakwawu aleka yuma yayivulu. Hela chochu, twatela kwikala asoñama kulonda tubuli kulandisha yilwilu yetu yajila yakadi majilu nayilwilu yamajilu yidi mukaayi. Chumanyi chinateli kutukwasha kutondolwela kwila yuma yatama? Hikutoñojoka hawuseya wabadika wahaniniyi Yehova hakwila nawu etu twikali ajila, mashi alema aMwanindi, Yesu Kristu. (1 Pet. 1:18, 19) Hakwila tutwalekihu kwikala awunyonji kumesu aYehova, twatela kutwalekahu kutoñojoka hakulema kwamulambu wefutu danyiloña daYesu. w18.11 11 ¶10-11

Amanakwetu amavulu ekala mumudimu wampinji yejima anateli kuyileja nawu kusha muchima hakushimwina kunayikwashi kwikala namuzañalu hela chakwila yuma yinahimpiki. Neyi chinamwekeshi yakutalilahu yawu, neyi tuzata nañovu hakukala kutukweti nawa tumuchiñilila Yehova, tukutwalekahu kwikala nakuwunda kwamuyitoñojoka. Tunateli kwiluka cheñi netu wubwambu wetu naNzambi wunakoli chikupu muloña wayuma yinahimpiki muchihandilu chetu. Neyi kudi yuma yinahimpiki muchihandilu mukukasumwisha, chidi neyi nyidimu yitwazataña mukuloñesha kwetu, yikatu hela kwakamena chisaka, ilukenu nenu Yehova wayakamenaña nawa wukuyikwashaña hampinji yatelela. (Heb. 4:16; 1 Pet. 5:6, 7) Chayinu mpinji zatenu nañovu kwesekeja nakukala kumunakuhitamu. Swinenu kwakwihi naTata yenu wamwiwulu mukulomba nawa shindamenenuña hadi yena. Neyi mwila mwenimu, ninenu mukutwalekahu kwikala nakuwunda kwamuyitoñojoka hela chakwila yuma yinahimpiki. w18.10 30 ¶17; 31 ¶19, 22

MuBayibolu mwekala yakutalilahu yayivulu yamwekeshaña Yehova chatoñojokeleleñaku ambuña indi. Shinshikenu Nzambi chamutoñojokeleliku kansi Samweli nakumukwasha kushimuna mazu awunsompeshi kudi Kapristu Muneni Eli neyi chinashimuniwu ha 1 Samweli 3:1-18. Nshimbi yaYehova yashimwini nawu atwansi atela kulemesha akulumpi, sweje-e anyuli. (Kwid. 22:28; Lev. 19:32) Komana Samweli wamwekesheli kuhamuka hakuya nakumuleja Eli mazu awunsompeshi waNzambi nantetemena? Inehi! Chakadi nikujina Bayibolu yashimuna nawu Samweli “watiyili woma wakumuleja Eli chimwenu chamweniyi.” Hela chochu, Nzambi wamwekesheli hatooka kudi Eli nindi wadiña nakumutambika Samweli. Dichi, Eli wamulejeli Samweli kushimuna yuma yamulejeliwu. Wamulejeli nindi: “Bayi [wunjindaku]; yuma yejima yahoshayi Yehova naneyi.”Samweli wovwahilili nawa “wamulejeli mwejima to-o.” mazu amulejeliwu kudi Samweli, esekeni namazu amulejeliwu hakusambila. (1 Sam. 2:27-36) Nsañu yaSamweli yinakumwekesha hatooka nawu Yehova watoñojokelañaku nawa wukweti maana. w18.09 23 ¶2; 24 ¶4-5

Makonu, kutwamba kunasweji chikupu muchituñilu, nawa bayi neyi antu akweti ñovu hohu diwu adimbaña akwawuku. Neyi chashimunawu muchibaaba chinakwila nawu “Chitwatwambilaña” (“Why We Lie”) chasonekeliyi Y. Bhattacharjee, chahosha nawu “kutwamba kunekali neyi hichaaku kumuchidi wamuntu.” Kakavulu antu atwambaña kulonda adikiñi hela kudinka yifulu. Atwambaña kulonda asweki yiluwa yawu niyuma yatama yinakoñiwu hela kukeña kuheta nikuditiyisha aweni kuwaha. Ichi chibaaba chashimwini nawu, kudi antu “atwambaña chakadi kutiya kukala, muyuma yamaneni niyanyanya, kudi antu abula kwilukawu, akwawu mwazatilañawu, amabwambu jawu niantaña jawu.” Yumanyi yafumaña muniku kutwamba? Antu alekaña kudikuhwelela nawa wubwambu wamanaña. Ñimbi yaMasamu Davidi walombeli kudi Yehova nindi: ‘Watiyaña kuwaha nansañu yalala yekela mumuchima wamuntu.’ (Mas. 51:6) Davidi welukili nindi walala wafumaña mukachi kamuchima wetu. AkwaKristu ‘ahoshaña yalala muntu namukwawu’ muchihandilu chawu chejima.—Zek. 8:16. w18.10 7 ¶4; 8 ¶9-10; 10 ¶19

A Isarela hiyafumineñawu muEjipitu mu 1513 B.C.E., atela abadikili ha 3 miliyoni. Haniwu mukanka hadiña mazanvu asatu hela awana, atwansi, akulumpi, akata hela ayifwayi. Chakeñekeleña nlomboli watoñojokelañaku nawa wakamenaña hakwila yafumishi awa antu amavulu muEjipitu. Yehova, wadimwekesheli kwikala nlomboli wamuchidiwu kuhitila mudi Mosi. Dichi aIsarela hiyatiyili kukala kushiya mukala wawu welukiliwuku. (Mas. 78:52) Indi Yehova welili ñahi hakwila nawu antu jindi ekali akiñewa nikubula woma? Chuma chatachi, wayifumishili muEjipitu “nakwenda munyisululu.” (Kwid. 13:18) Iku kuloñesha kwayileñeleli aIsarela kwiluka nawu Yehova diyi wadiña nakuyilombola. Cheñi, Yehova “namwaana wayilombwelaña nevu, nawufuku wejima wayilombwelaña nachejeji chakesi.” (Mas. 78:14) Munjila yikwawu Yehova wayilejeleña nindi: “Bayi mutiya womaku. Ami nidi nanenu nikuyilombolaña nawa nikuyikiñaña.” w18.09 26 ¶11-12

Ambuña aNzambi ashinshika akunyima azeyeleña nakukala kwamweneñawu chakwila akeñeleña nawu adifwili tuhu kwawu. Chakutalilahu, Yoba wamweni yihuñu chikupu chakwila wahosheli nindi: “Wumi wami nakumini dakuwuhela, hinakeñi [kutwalekahu kuhandaku].” (Yoba 7:16) Yona waneñeli chelili yuma yihimpiki mumudimu wamwinkeliwu. Dichi wahosheli nindi: “Eyi Yehova, antambuli mwani wumi wami. Muloña chinawahi ami kufwa hohu, hichinawahi kuhandaku.” (Yona 4:3) Kaprofwetu washinshika Elija niyena waneñeli nakukala kwamweniyi chakwila wakeñeleña nindi yafwi. Wahosheli nindi: “Jinahu! Ichi dinu eyi Yehova fumishaku wumi wami muloña ami hinabadika ankakulula jamuku.” (1 Anya. 19:4) Hela chochu, Yehova wayikeñeli awa antu adihanini nawa hakeñeleña nindi afwiku. Chatela yayizuwili, ilaña wayikwashili kumanisha yitoñojoka yawu yakukeña nawu afwi nawa wayituñili mukukeña kwindi kulonda atwalekihu kumukalakela nakashinshi. w18.09 13 ¶4

Antu akalakelaña hamu naNzambi ayilukilaña kuchisambu. MuNsona jawakwaKristu jachiGiriki, izu dabalumunawu nawu “chisambu” dalumbuluka nawu ‘kutiyila enyi luwi.’ (Heb. 13:2; tth.) Izu daNzambi dashimuna nsañu yatukwashaña kumwekesha kukeña. (Kutach. 18:1-5) Twatela kuwanañaku mpinji yakukwasha antu amakwawu mpinji yejima, hela “akwetu akwakwitiya” hela abula kwitiya. (Ñal. 6:10) Kwila mukalakela hamu naNzambi kuhitila mukumwekesha chisambu, kuya nakuyihempula antu ashinshika adi mumudimu wampinji yejima nehi? (3 Yow. 5, 8) Mpinji yamuchidiwu yatukwashaña ‘kudikolesha muntu-himuntu.’ (Rom. 1:11, 12) Izu daNzambi dakoleshaña amayala amuchipompelu kuzatila hamu naYehova kuhitila mukudihana kuzataku nyidimu nikulombola. (1 Tim. 3:1, 8, 9; 1 Pet. 5:2, 3) Antu ejima adihanaña akeñaña kukwasha akwawu kumujimba nikuspiritu. (Yil. 6:1-4) Nawa amanakwetu azataña iyi nyidimu yachipompelu akuyileja nawu ekalaña namuzañalu muloña wakukwasha antu amakwawu. w18.08 24 ¶6-7; 25 ¶10

Hela chakwila Timotewu wadiña nawuswa hadi awa amanakwindi, wateleleli kuyitiyila wushona nikuyilemesha. Hanu dinu, tunateli kuzatisha ñahi ichi chishina? Chakutalilahu, komana twatela kumutiya mukulumpi woma neyi nakukoña nshidi hela nakwila yuma yamuneñeshaña Yehova? Yehova hakasompesha kwesekeja nachinakumwekanayi muntuku nawa hakaleka muntu wunakukoña nshidi muloña wakukulaku. HaIsaya 65:20 hekala chishina chakwila nawu: ‘Mukwanshidi wakashiñewa hela chakwila nashiki dehi munyaka nkulakaji.’ Chishina chamuchidiwu achilumbulula cheñi muchimwenu chaEzekeli. (Ezek. 9:5-7) Chikuma chidi chakwila nawu mpinji yejima twatela kulemesha Muntu Wakunyaka nanyaka, Yehova Nzambi. (Dan. 7:9, 10, 13, 14) Neyi twila mwenimu, tukutiyaña woma wanyi kufumba muntu wunaluwañeshi hichikweti muloña nayaaka yikwetiyiku.—Ñal. 6:1. w18.08 11 ¶13-14

AkwaKristu alala, twatela kuzata nañovu kulonda tuwaneña wunsahu walala hakwila nawu tukunkululeña mwaloña. (Yish. 3:21-23; 8:4, 5) Neyi tubula kuzata nañovu, Satana nikaayi kindi anateli kuluwañesha yitoñojoka yetu. (Efwe. 5:6; Kol. 2:8) Tunateli hohu kukunkulula mwaloña neyi twiluka wunsahu walala. Antu makonu anakuyiluwañesha nansañu yayivulu. Nsañu yeniyi anakutwalekahu kuyitiyakesha hamaintaneti, haTV nihayikunzulemba. Antu amavulu ayitemeshelaña maemelu, mameseji ninsañu yikwawu kudi amabwambu jawu niantu amakwawu iyadiluka nawu. Chineli antu anasweji kutandisha nsañu yakutwamba nikuluwañesha wunsahu walala, dichi twatela kwikala asoñama nikutoñojoka hansañu yitwatiyaña. w18.08 3 ¶1, 3

Chashikili mpinji yakusemuka kwaMwana kaNzambi muwuntu, Yehova watondeli mumbanda wabulahu dehi kukama neyala, Mariya kwikala mama yamwana walema. Mariya washakamineña mumusumba wakehelamu waNazareta, wadiña hahalehi naYerusalema mwadiña tembeli yalubanji. (Luka 1:26-33) Mariya wamwekesheli chamukeñayi Nzambi chelili yahoshi nantaña yindi Elizabeta. (Luka 1:46-55) Yehova wadiña nakumushinshika Mariya, nawa wamwinkeli iku kukooleka muloña wakashinshi kindi. Chelili Mariya yavwali Yesu, Yehova wayilejeli wanyi akulumpi hela anlomboli amuYelusalema nimuBetelemi yuma yamwekeni. Añelu amwekeni kudi atubiña akehelamu adiña nakuhemba nyikoku mumasaña hanji yaBetelemi. (Luka 2:8-14) Kuhiñahu, awa atubiña ayili nakutala mwana wasemukili. (Luka 2:15-17) Mariya naYosefu atela atiyili kuwaha hakumona chamulemesheliwu Yesu muyina njila. w18.07 9-10 ¶11-12

Muloñadi Yehova chamuzuwililiyi Solomoni? Bayibolu yashimuna nawu: “[Muloña] muchima windi hiwukufuma kudi Yehova . . . , wamumwekeneni kayedi wamulejeli chena chumichi chakubula kulondela akishi; yena kwindi kuhemba mwamulejeliyi Yehova nehi.” Chafuminimu, Yehova wadambwili kudi yena nawa walekeli kumukwasha. Answana jaSolomoni hiyatwalekelihu kuyuula muIsarela yejimaku nawa amweni yihuñu yayivulu mumakiñu awu ahiñileñahu. (1 Anya. 11:9-13) Neyi chichamumwekeneni Solomoni, chuma chinateli kutuletesha kujimbesha wubwambu wetu naNzambi, hikudikunda nawantu abulaña kwovwahila nikulemesha nshimbi jaYehova. Amakwawu anateli kwikala antu amuchipompelu ilaña azeya kuspiritu. Amakwawu anateli kwikala antaña, antu itwashakama nawu, akwetu mutwazatilaña hela itwatañaña nawu abulaña kudifukula kudi Yehova. Neyi antu itwadikundaña nawu alemeshaña wanyi nshimbi jaYehova, mukuhita kwampinji anateli kuluwañesha wubwambu wetu naNzambi. w18.07 19 ¶9-10

Satana wazatishaña mafwilimu nimaprogiramu aha TV kulonda yatandisheña yitoñojoka yindi. Weluka nindi bayi neyi yatuzañaleshaña hohuku ilaña yatudizishaña chakutoñojoka nikwila yuma. Yesu wazatishileña chiwahi iyi njila hakutañisha. Chakutalilahu, wazatishili chishimu chakaSamariya wamuwahi nichishimu chamwana wajimbeli. (Mat. 13:34; Luka 10:29-37; 15:11-32) Hela chochu, antu aluwañeshawu nayitoñojoka yaSatana anateli kuzatisha nsañu yamumafwilimu niyaha TV kulonda atuluwañeshi. Twatela kwikala namaana. Mafwilimu nimaprogiramu aha TV anateli kutudizisha nikutuzañalesha chakubula kutamisha yitoñojoka yetu. Ilaña twatela kusoñama. Neyi tunakutonda yisela, twatela kudihula netu: ‘Komana iyi fwilimu hela nsañu yidi ha TV yinakundizisha kufwila yuma yakumujimba?’ (Ñal. 5:19-21; Efwes. 2:1-3) Mukwila ñahi neyi mwiluka nenu progilamu yidihu yinakutiyakesha yitoñojoka yaSatana? Yitondolwelenu neyi chimunateli kudikiña kuchikatu chafwana. w19.01 15-16 ¶6-7

Neyi chochakiñaña itepa woñu wamushidika, “itepa dakuchiñeja dawamwinu” dakiñaña yitoñojoka yetu. (1 Tes. 5:8; Yish. 3:21) Satana nateli kutukojeja ñahi kusubula itepa detu? Talenu chamwililiyi Yesu. Satana welukili nindi Yesu wachiñejeleña kuyuula muchidi wamuntu kumbidi. Ilaña Yesu wateleleli kuhembelela sampu mpinji yatoñweliyi Yehova yinashiki. Nawa henohu kanda, wateleleli kukabakana nikufwa. Ilaña Satana wamulejeli Yesu kwikala mwanta henohu mpinji yamutoñweleliwu kanda yishiki. Satana wahosheli nindi neyi Yesu yadifukula kamu hohu, wukumwinka mawanta ejima hayoyenoyu mpinji chakadi kuhembelela. (Luka 4:5-7) Munjila yoyimu, Satana weluka nindi Yehova wakatwinka maheta mwituña dadiha dinakwinza. Ilaña chayinu mpinji twatela kuhembelela nawa twatela kukabakana. Dichi Satana watwesekaña kulonda tudiluñisheña makonu. Wakeñaña nindi tutwamijiku maheta nawa tudiluñisheña yinu mpinji. Satana watukakejaña nindi tubuleña kusambila kukeña Wanta.—Mat. 6:31-33. w18.05 30-31 ¶15-17

Mwamweni, Yehova nakukeña enu atwansi ejima muzañalaleña nankashi. Neyi mutachika kutoñojoka hayumiyi himuchidi atwansi, Yehova wukuyikwasha, wukuyikiña nawa wukuyikiswila. Toñojokenuña hakufumba kwekala Mwizu daNzambi nawa ovwahilenuña kufumba kwakwila nawu: “Anukaña nawa Nleñi yeyi mumafuku awukwenzi weyi.” (Mukwa. 12:1) Muchipompelu akeñekaña kuyihameka chikupu muloña amonaña kukala ilaña atwalekañahu kumukalakela Yehova muchihandilu chawu. Atwansi elaña mwenimu kuhitila mukwila yuma yakuspiritu yafuukulawu nikutwamijaku mudimu wakushimwina. Kubombelahu, hiyaluwankanaña nayuma yamukaayiku. Enu atwansi, ilukenu nenu nyidimu yimunakukalakala yalema. Ilukenu nenu amanakwenu niahela akuyikwashaña nawa neyi mutwamijaku Yehova, yuma yejima yimunakufuukula kwila muchihandilu yikwendaña hohu chiwahi. w18.04 29 ¶17, 19