June

Awa mazu atela ayikolesheli nankashi apostolu! Hela chakwila atiyishishili wanyi mwatalishiliyi, Mwanta wawu wadiña kwakwihi nakufwa, dichi hadi kuyishiya chakubula wukwashuku. Yehova wadiña wadiloñesha kwakula kulomba kwawu nikuyikwasha hampinji yinakushimwinawu nsañu yaWanta. Mwamweni, hashimbwili wanyi, amweni Yehova chakwiliyi kulomba kwawu. (Yil. 4:29, 31) Niyinu mpinji wuchidi kutwakula. Neyi tutwalekahu kuumika hampinji yitunakusoña nyikabu, tukutwalekahu kwikala amabwambu jaYesu. Kubombelahu, twatela kukuhwelela netu Yehova wadiloñesha kwakula kulomba kwetu kwakushinda kukala kutunateli kuwana hampinji yitunakushimwina nsañu yayiwahi yaWanta. (Fwi. 4:13) Twatiyaña kuwaha muloña Nzambi wakulaña kulomba kwetu nawa Yesu hibwambu detu! Iyi yawaana yatwinkañayi Yehova yatukwashaña kutwalekahu kusoña nyikabu.—Yak. 1:17. w18.05 21 ¶17-18

Muyaaka yitanu hohu, akwaKristu aYudeya ashakamineña muYerusalema amweni “ifuku daYehova” chidaswinineña kwakwihi nawa amweni yinjikijilu yayilejeliyi Yesu nindi neyi yinamwekani akafumi munona musumba kulonda akapuluki. (Yil. 2:19, 20; Luka 21:20-22) Idi ifuku daYehova dashikili mu 70 C.E. hashikijiliwu aRoma wunsompeshi waYehova kuhitila mukujilumuna Yerusalema. Makonu, tukweti wunsahu wawuvulu watukwashaña kwiluka netu ifuku daYehova didi kwakwihi “dakutiya woma nankashi.” (Yoweli 2:11) Kaprofwetu Zefwaniya wahosheli nindi: “Ifuku daYehova deneni didi kwakwihi, didi kwakwihi, didi nakunyakala nankashi.” (Zef. 1:14) Iku kusoñamisha kuchidi kuzatika nimuyinu mpinji. Hahosheleñayi hakuswina kwefuku daYehova, Pawulu watuleja nindi “tuditoñojokeleña, wumu namukwawu kumwekesha kukeña nikukoña nyidimu yayiwahi.” (Heb.10:24, tth) Dichi, twatela kusweja kukeña amanakwetu kulonda tuyikolesheña mpinji yejima. w18.04 20 ¶1-2

Yehova wamukolesheli Yoshuwa chikupu henohu kanda yayilomboli antu Jindi Mwituña Dachikaninu! Yehova hakoleshaña hohu muntu nkawindiku, ilaña wayikoleshaña cheñi hamu neyi izanvu. Yehova wahosheli mumazu indi awuprofwetu nakuyikolesha aYudeya akwatiliwu muwunkoli muBabiloni nindi: “Bayi wutiyaña womaku, ami nidi neyi. Bayi wuyeñashanaku, ami yami Nzambi yeyi, nakakwinkaña ñovu; chalala nakakukwashañaku; chalala nakakukwataña chachiwahi nachikasa chami chachidiilu chakuloña.” (Isa. 41:10) AkwaKristu akusambila ayikolesheleña nawa niantu jaNzambi makonu ayikoleshaña. (2 Kor 1:3, 4) Yesu niyena amukolesheli kudi Tata yindi. Hamupapatishileñawu, Yesu watiyili izu kufuma mwiwulu nawu: “Iwu diyi Mwanami, inakeña, inatiyaña kuwaha.” (Mat. 3:17) Awa mazu amukolesheli Yesu hampinji yadiña nakushimwinayi hamaseki! w18.04 16 ¶3-5

Antu amavulu neyi anakutaña lushimbi lwaYehova lwamwinkeliyi Adama, ahoshaña nawu Adama wadiña wasubuka wanyi kwila yuma yakeñeleñayi. Kuhosha muniyi njila kwamwekeshaña nawu eluka wanyi chaambu chekala hawuswa wakudifuukwila nawuswa wakutonda yuma yayiwahi niyatama. Adama naEva adiña nawuswa wakutondahu kumwovwahila Nzambi hela nehi. Hela chochu, “mutondu wakwiluka nachu niyayiwahi niyatama” wadiña mwitempa daEdeni, wamwekeshaña nawu Yehova hohu nkawindi diyi wukweti wuswa wakwiluka yuma yayiwahi niyatama. (Kutach. 2:9) Yehova chayinkeliyi aAdama naEva lushimbi, wayilejeleña chakuzatisha chiwahi kusubuka kwalala. Kuhosha hohu walala, hitwelukaña yuma yejima yafumaña muyuma yitwatondañaku, nawa hitwelukaña neyi mukufumaña yuma yayiwahi hela yatamaku. w18.04 5-6 ¶9-12

Yehova watiyilaña wushona ambuña indi akabakanaña, nawa wayikwashaña. Chakutalilahu, mpinji yakabakeneñawu aIsarela muwuduñu muEjipitu, Yehova wamweni yihuñu yawu, dichi wayikwashili. Yehova wamulejeli Mosi nindi: “Chalala namoni antu ami . . . chakumonawu ihuñu, natiyi chakudilawu . . . , ami neluki chakabañawu. Nasuluki dehi munu niyipulwishi kudi aEjipitu.” (Kwid. 3:7, 8) Muloña wakwila Yehova wayitiyilili antu jindi wushona, wayifumishili muwuduñu. Chimwahitili yaaka, hampinji yadiñawu Mwituña daChikaninu, aIsarela atachikili kuyilukuka kudi ayilumbu jawu. Yehova welili ñahi? “Muloña muchima waYehova wamufutumukili chaabiluwu nawena ayikabishili, ayimwesheli yihuñu.” Yehova wayitiyilili cheñi antu jindi wushona nawa wayikwashili. Watumini ansompeshi kulonda ayipulwishi aIsarela kudi ayilumbu jawu.—Ansomp. 2:16, 18. w19.03 15 ¶4-5

Nshimbi jiyedi jatachi jekala haNshimbi 10 jahosheleña nawu aIsarela ateleleli kudifukula hohu kudi Yehova nawa ayikaanishili kudifukula kudi ankishi. (Kwid. 20:3-6) Bayi neyi Yehova washiliku iji nshimbi kulonda jimukwasheña yenaku, ilaña jikwasheña antu jindi. Antu jindi ashakamineña chiwahi neyi amwovwahila. Ilaña adiña nakumona yihuñu neyi atachika kudifukula kudi anzambi acheñi. Ilaña Yehova wayikiswilileña antu jindi neyi ekala ashinshika kudi yena nawa aleka kudikabisha wumu namukwawu. (1 Anya. 10:4-9) Yehova watukeña nawa wamonaña neyi anakutukabisha. Watiyaña kutama kubadika chatiyañayi mama yawantu neyi mwanindi nakukabakana. Hela chakwila hanateli kukañesha yuma yamuchidiwu kumwekanaku, ilaña kudi mpinji yakayisompeshayi antu abulaña kubalumuka mumuchima akabishaña akwawu. w19.02 22 ¶13-15

Munyilungu yakwila Chanukishu kanda, kupompa kwetu kwahoshaña hachakutalilahu chaYesu nikudizoza kwamwekesheliyi hakuhana wumi windi kwikala ifutu danyiloña. Chatuleñelaña kwimbujola chilwilu chindi chakudizoza nikwila nkeñelu yaYehova hela chakwila chinateli kutukalila. Twatoñojokaña hakuhamuka kwamwekesheliyi mafuku akwila kanda yafwi. Welukili chikupu nindi ayilumbu jindi akumusawula, akumweta nikumujaha. (Mat. 20:17-19) Ilaña hatiyili woma kufwaku. Chashikili mpinji, wayilejeli apostolu indi ashinshika adiñayi nawu muÑesemani nindi “Nyamukenu, tuyenu. Talenu! Mukwakunfukejela nashiki dehi kwakwihi.” (Mat. 26:36, 46) Mpinji yenjili izanvu dawamashidika nakumukwata, waswinini kwakwihi nakudilumbulula yomweni nawa wayilejeli amashidika nindi alekiku apostolu indi kulonda adiyili. (Yow. 18:3-8) Yesu wamwekesheli kuhamuka chikupu! Makonu, akwaKristu awayishewa nianyikoku amakwawu azataña nañovu kulonda amwekesheña kuhamuka neyi Yesu. w19.01 27-28 ¶7-8

Neyi chazatishañayi mukwakuleña nyevulu wulombu washiyashana hakwila mwevulu wumwekani lubanji, ninetu twatela kwikala nayilwilu yayiwahi yayivulu hakwila nawu twikali adizoza. Iyi yilwilu munadibombeli kudikehesha, kwovwaha, kuwunda nikuhamuka. Antu adikehesha hohu diwu ovwahilaña mwayilejañayi Nzambi. Chuma chimu chakeñañayi Nzambi, hikwikala amwovu. (Mat. 5:5; Ñal. 5:23) Satana wahilaña neyi twila yuma yakeñañayi Nzambi. Hela chakwila twekala adizoza nawa awunda, antu amavulu mukanu kaayi kaSatana atuhela. (Yow. 15:18, 19) Dichi, twatela kwikala ahamuka hakwila nawu tudikañi naSatana. Muntu wabula kudizoza himuntu wadivwimba, wazuwa nawa wabulaña kumwovwahila Yehova. Satana niyena dichekalayi. Dichaletesha yaheli antu adizoza muloña asawulaña yilwilu yindi yatama. Sweje-e dinu, amusololaña nawu hisakutwamba. Muloñadi? Hakutwesha kuyilekesha antu adizoza kumukalakela Yehovaku hela chakwila wukuzata nañovu yamuchidinyi muyuma yahoshañayi niyelañayi!—Yoba 2:3-5. w19.02 8-9 ¶3-5

Yehova welukili nindi antu amuBabiloni akatiya woma. Musumba waBabiloni ayileña nakuwulukuka kudi amashidika añovu aMediya naPeresi. Yehova wayileña nakuzatisha awa amashidika kulonda yafumishi antu jindi adiña muwunkoli muBabiloni. (Isa. 41:2-4) Antu amuBabiloni niakumatuña acheñi chelukiliwu nawu ayilumbu jawu adi kwakwihi nakuyilukuka, adilejeli wumu namukwawu nawu: “Dikoleshi.” Atuñili cheñi ankishi amavulu muloña atoñojokeleña nawu akuyikiña. (Isa. 41:5-7) Dichi Yehova wayikolesheli aYudeya adiña muwunkoli nindi: ‘Eyi Isarela [kwambukaku nawantuñi neyi] eyi ñamba yami . . . Bayi wakamaku ami yami Nzambi yeyi.’ (Isa. 41:8-10) Talenu chahosheliyi Yehova nindi: “Ami yami Nzambi yeyi.” Yehova chahosheliyi awa mazu wadiña nakuyikolesha antu adifukwileña kudi yena nindi wayijimbeli wanyi, nawa nindi adiña antu jindi. Wayilejeli nindi: ‘Nukuyelekaña . . . nikuyipulwisha.’ Chakadi nikujina, awa mazu ayikolesheli aYudeya adiña muwunkoli.—Isa. 46:3, 4. w19.01 4 ¶8

Maku 1:9-11 yashimuna mpinji yatachi yahosheliyi Yehova kapampa kasatu kufuma mwiwulu. Yehova wahosheli nindi: “Yeyi Mwanami, inakeña; inatiyaña kuwaha.” Yesu watiyili kuwaha hakutiya Tata yindi nakumuleja nindi wamukeña nawa wamukuhwelela. Mazu aYehova amwekeshaña yuma yisatu yalema hadi Yesu. Chatachi, Yesu hiMwanindi. Chamuchiyedi, Yehova wamukeña Mwanindi. Nawa chamuchisatu, Yehova wamutiyaña Mwanindi kuwaha. Yehova chahosheliyi mazu akwila nawu “Yeyi Mwanami,” wamwekesheli nindi Yesu wekalili Mwanindi munjila yambukaku. Yesu hadiñayi mwiwulu, wadiña Mwana kaNzambi wakuspiritu. Ilaña hamupapatishileñawu amuwayishili naspiritu yajila. Haniyi mpinji, Nzambi wamumwekesheli Yesu nindi hiMwanindi wawayishiliyi wekalili nakuchiñeja kwakufunta mwiwulu kulonda amutondi kudi Nzambi kwikala Mwanta nawa Kapristu Muneni. (Luka 1:31-33; Heb. 1:8, 9; 2:17) Dimuloña waweni waletesheli Tata yindi kuhosha hampinji yamupapatishileñawu Yesu nindi: “Yeyi Mwanami.”—Luka 3:22. w19.03 8 ¶3-4

Wukwashu watama watachikili dehi kufuma kuyaaka yakunyima. Satana diyi muntu watachikili kuhana wukwashu watama. Muntu wadivwimba nawa waditondeli yomweni kwikala mukwakukwasha akwawu, wamulejeli Eva ninfumwindi nindi akwikala namuzañalu neyi adifuukwilaña yuma awenawu. (Kutach. 3:1-6) Hela chochu, kuhosha hohu walala, Satana wamwekesheli yilwilu yakuditiyisha kuwaha. Wakeñeleña nindi aAdama naEva kushilahu nianyanawu akavwalawu kumbidi amwovwahileña nikudifukula kudi yena chatela adifukuleña kudi Yehova. Ilaña, Yehova diyi wayinkeli yuma yejima, kuyisumbwisha, kuyinka itempa dadiwahi ninyijimba yawu yawanina yinateli kushakama haya nyaaka. Chawushona, aAdama naEva adikañili naNzambi nawa adambwili kudi yena. Neyi chitweluka, mwafumini yuma yatama. Neyi chomaña nkenu yinafumishiwu kumutondu, niwena atachikili kukota chovu-chovu nawa afwili. Anyanawu niwena akabakeni nawa ninetu twakabakanaña muloña weshiñu dafumini kunshidi. (Rom. 5:12) Hela chochu, antu amakwawu akaanaña kumwovwahila Nzambi. Akeñaña kudihandila awenawu. (Efwe. 2:1-3) Yuma yafumañamu yinakumwekesha yuma yidi munsona yalelu. w18.12 20 ¶3-4

Kapostolu Pawulu wadiña muntu wadiza nawa wadiña weluka madimi ayedi. (Yil. 5:34; 21:37, 39; 22:2, 3) Wakaanini yitoñojoka nimaana amukaayi muloña wakuzatisha yishina yamuBayibolu. Wazatishileña Nsona hakufuukula. (Yil. 17:2; 1 Kor. 2:6, 7) Chafuminimu, Pawulu wazatili chiwahi mudimu wakushimwina nawa watambwilili nkisu jahaya nyaaka. (2 Tim. 4:8) Mwamweni, yitoñojoka yaNzambi yabadika yitoñojoka yidi mukaayi. Neyi tulondela mwatulejañayi Nzambi tukwikala namuzañalu nichihandilu chachiwahi. Ilaña Yehova hatukanjikijaña kutoñojoka neyi chatoñojokañayiku. “Nduñu wamaana nikashinshi” niakulumpi hiyafuukwilaña antuku. (Mat. 24:45; 2 Kor. 1:24) Ilaña mukwaKristu wejima wudi nawuswa wakudifuukwila yomweni kumona yuma neyi chayimonañayi Nzambi. w18.11 20-21 ¶12-13

Nzambi washimwineñahu dehi kuhitila mudi Isaya nindi neyi antu Jindi anafunti dehi kumukala wawu, kwosi wukayikabishaña, hiyakatiyaña woma yuma yafwana, kuyilukuka kudi atunyama hela antu adi neyi anyama ayisumiku. Atwansi niakulumpi akekala akiñewa. (Isa.11:6-9; 35:5-10; 51:3) Wuprofwetu waIsaya wahosheli cheñi nawu iseki dejima, bayi neyi muza waIsarela hohuku, “dakawanina kumwiluka Yehova, neyi chabutaña meji hakaluñalwiji.” Isaya washimwineñahu dehi cheñi nawu antu akafunta hiyakayitiyishaña woma kudi atunyama hela antuku. Mumukala wawu mwakasoña nyikabu yayivulu muloña wamenji amavulu akekalamu neyi adiña mwitempa daEdeni. (Kutach. 2:10-14; Yere. 31:12) Komana iwu wuprofwetu wadi kushikijewa hohu mumpinji yawa Isarela? Kwosi wunsahu wunakumwekesha nawu antu afuntili kufuma muwunkoli ayuukili muchihayamishaku. Chakutalilahu, amputamesu hiyatachikili kumonaku. Dichi, Nzambi wamwekesheleña nindi wakamanisha yikatu yejima kumbidi. w18.12 5 ¶11-12

Kwenda muchalala kwakumaña wanyi nawa hichuma chitwafwilaña kwila haya nyaaka. Tunateli kutwalekahu ñahi kwenda muchalala? Twalekenuhu kudiza chalala chalema chaMwizu daNzambi nikutoñojokahu chikupu. Landenu chalala kuhitila mukwikala nampinji yakutaña chalala chalema chaMwizu daNzambi. Neyi mwila mwenimu, mukusweja kukeña chalala nawa mukuchilandisha wanyi. Kubombela hakulanda chalala, Yishimu 23:23 yatulejaña nawu twatela kulanda cheñi ‘maana, kufumbewa nikashinshi.’ Bayi tukumina hohu dakwiluka chalalaku, ilaña twatela kuchizatishaña muchihandilu chetu. Kashinshi katukwashaña kuhemba yuma yitwadiza dehi niyuma yinakutulejayi Yehova. Maana atukwashaña kwila yuma yitweluka. Chalala chatufumbaña nikutuleja yuma yitunateli kuhimpa. Mpinji yejima twitejeña iku kufumba. Kufumba kwalema kubadika siliva.—Yish. 8:10. w18.11 9 ¶3; 11 ¶13-14

Chumanyi chasweja kulema chimukweti? Komana munateli kuchihimpa nachuma chapela wuseya? Ñakwilu yanawa malwihu yapela kudi ambuña aYehova adihana. Chuma chasweja kulema chitukweti hiwubwambu wutukweti naYehova nawa kwila tuwulandisha nachuma chidi chejima nehi. Twalemesha cheñi chalala chamuBayibolu chatukwashaña kuswina kwakwihi naTata yetu wamwiwulu. (Kol. 1:9, 10) Toñojokenu hayuma yatudizishañayi Ntañishi Wabadika Mwizu dindi, Bayibolu! Watulejaña chalala hakulema kwejina dindi niyilwilu yindi yayiwahi. Watulejaña nindi watukeña chatwinkeliyi Mwanindi wakeñayi, Yesu, kwikala ifutu danyiloña. Yehova watulejaña cheñi haWanta wawuMesiya nikuchiñeja kwakushakama hamaseki muParadisa. Watudizishaña chitunateli kushakama. Twalemesha ichi chalala muloña chatukwashaña kuswina kwakwihi naNleñi yetu. Chatukwashaña kwiluka netu chihandilu chikweti nkeñelu. w18.11 3 ¶1-2

Antu amuchidiwu hiyanateli kumusweka Yehova yuma yejima yelañawuku, muloña “yuma yejima yidi nzekesi nawa yidi hatooka” kudi yena. (Heb. 4:13) Chakutalilahu, Ananiya naSafwira akwatili kafuta mumuchima wawu nakudimba apostolu. Awa adisumbula akeñeleña kudimwekesha neyi amawahi kuchipompelu, neyi kwiji adiña nachisambu nankashi hakuhana chawaana. Ilaña Yehova wamweni chuma cheliliwu nawa wayibabesheli. (Yil. 5:1-10) Yehova wamutiyaña ñahi muntu watwambaña? Satana niantu ejima abulaña kubalumuka mumuchima nawa atwambaña kutwamba kwahamesu bwi-i keña ayumbili “mwijiya dakesi.” (Chim. 20:10; 21:8; Mas. 5:6) Tweluka netu Yehova “Nzambi himuntuku mwaka atwambi.” Mwamweni, “Nzambi hanateli kutwambaku.” (Kuch. 23:19; Heb. 6:18) ‘Yehova wahela . . . idimi datwambaña.’ (Yish. 6:16, 17) Hakwila nawu yatutiyi kuwaha, twatela kuhoshaña walala mpinji yejima. w18.10 8 ¶10-13

Mukwila ñahi neyi mukulumpi wayiñija mudimu yayileja nindi muhaniku mali akukwasha chidika munadibombeli nsakililu yakutwamba? Chatela muhembeleleña chuma chamuchidiwu chikayimwekeni, kwila mutoñojokela chadimu hachuma chamuchidiwu neyi chatoñojokañayi Yehova nehi? Neyi chuma chamuchidiwu chiyimwekena, chikwikala chaswayi kwila nikuhosha yuma yaloña neyi cheliliwu aHeberu asatu. Kutoñojokela chadimu hakubula kufumpa kashinshi ketu kudi Nzambi, kunateli kutukwasha neyi anakutuuka yikatu. Chineli twakaanaña kutwisha mashi hela nyichidi yejima yiwana yamashi, jinjila jikwawu jakuukilamu munabombeli mashi jakeñekaña muntu yomweni kufuukulahu kushindamena hayishina yamuBayibolu yamwekeshaña chatoñojokañayi Yehova. (Yil. 15:28, 29) Mwamweni, bayi neyi twatela kufuukula hampinji yitudi muchipatelaku, muloña haniyi mpinji twatiyaña kukata chakwila kwila tutwesha kufuukula chiwahi nehi. Ayinu diyi mpinji yimwatela kusandujola, kufwachika kaadi yamashi nikuhanjeka nandotolu. w18.11 24 ¶5; 26 ¶15-16

Yehova hikabiña wamuwahi wahembaña antu indi munjila yayiwahi. Wayakamenaña antu jindi nikuyikiña kudi ayilumbu jawu. Chumichi chatukundejaña hampinji yitunakuswina kukukuma kwanshakaminu yamakonu, Yehova wukutwalekahu kwila mwenimu sampu mpinji yalukadi lweneni lunakwinza. (Chim. 7:9, 10) Dichi, hela hiyatwansi hela akulumpi, akola kumujimba hela ayifwayi, antu jaNzambi hiyakatiya woma hela kuzaala hampinji yalukadi lweneniku. Dichi, akela chuma chambukaku. Akanuka awa mazu aYesu Kristu akwila nawu: “Mwakemani zululu-u nakubandula nyitu yenu kwiwulu, muloña wamwinu wenu wunakuswina kwakwihi.” (Luka 21:28) Akatwalekahu kwikala nanichi chikuhwelelu nihampinji yakayilukukawu kudi Gogi, kudibomba kwanyuza yasweja ñovu. (Ezek. 38:2, 14-16) Muloñadi antu jaNzambi chiyakatwalekelawu kwikala nachikuhwelelu? Muloña eluka nawu Yehova hahimpañaku. Wakadimwekesha mpinji yejima nindi wakamenaña nawa hiChamwinu watoñojokelañaku.—Isa. 26:20. w18.09 26 ¶15-16

A Isarela azañaleli chikupu hakutiya mazu aYehova adi munsona yalelu. Chineli mudi ambuña aYehova mwatela kwiluka nenu Yehova wayikeña chikupu nikuyilemesha. Izu daNzambi dayikana antu akeña kudifukula kwalala nawu: “[Chineli] Hichilobu wemikaña mushindu. Wakakuzañalela eyi nakutiya kuwaha.” (Zef. 3:16, 17) Hela chakwila antu jindi akumona kukala kwamuchidinyi, Yehova wayishiika nindi wukuyikwashaña nikuyikolesha. “Mwakaamwa akayipakata mumbavu akayisha hamanuñu. Mwakundejañawu muntu kudi mama yindi dimu nakayikundejami.” (Isa. 66:12, 13) Mwana wanyanya wekala wakiñewa chikupu nawa watiyaña kuwaha neyi amweleka hela amulela hanyendu kudi mama yindi. Munjila yoyimu, Yehova niyena dichelañayi nawakwakudifukula indi alala. Mwatela kwiluka nenu Yehova wayilemesha nawa wayikeña nankashi.—Yere. 31:3. w18.09 13 ¶6-7

Hampinji yimu kunyima, aIsarela adihanineña. (Kwid. 36:2; Nehe. 11:2) Makonu, ninenu mukweti kukooleka kwakudihana kuzatisha mpinji yenu, yuma yenu nikuzata nyidimu yimweluka kukwasha amanakwenu niahela. Mukwikala namuzañalu chikupu nawa mukutambwila nkisu kuhitila mukukwasha akwenu. Antu adihanaña kuzataku nyidimu yaWanta yakutuña ekalaña nawamabwambu amaha. Shinshikenu muhela Margie wunakalakali mudimu wakutuña Matala aWanta hadi yaaka 18. Hadi yaaka yayivulu nadizishi ahela atwansi mudimu. Weluka nindi hinjila yayiwahi yakudikoleshelamu wumu namukwawu kuspiritu. (Rom. 1:12) Hampinji yamweneñayi kukala, Margie amukolesheleña kudi amabwambu jindi adiñayi nawu mumudimu wakutuña. Komana mwadihanahu dehi kuzataku mumudimu wakutuña? w18.08 25 ¶9, 11

Hampinji yasonekeliyi Pawulu awa mazu, hadaha Timotewu wadiña hohu nayaaka yamuma 30. Haniyi mpinji, Pawulu wamwinkeli nyidimu yalema. Chikuma chidi chakwila nawu, bayi tusompeshaña amanakwetu atwansi kushindamena hayaaka yikwetiwuku. Twatela kwanuka netu niMwanta wetu Yesu wazatili mudimu windi wakushimwina hamaseki hampinji yadiñayi nayaaka yamuma 30. Hadaha twafuma kuchisemwa chabulaña kulemesha atwansi awamayala. Neyi dimu, aeluda muchipompelu anateli kushintajala kuhameka manakwetu wakansi wunashikihu kwikala nkoñi wakuzatila hela eluda. Aeluda atela kwanukaña nawu Nsona hiyashimunahu yaaka yinateli kumutondelahu muntu kwikala nkoñi wakuzatila hela eludaku.—1 Tim. 3:1-10, 12, 13; Tit. 1:5-9. w18.08 11-12 ¶15-16

Hakwila tukunkululi chiwahi, twatela kwiluka wunsahu walala. Dichi, twatela kwikala asoñama chikupu hakusakula nsañu yitwatela kutaña. (Fwi. 4:8, 9) Bayi tumanishaña mpinji nakutala nsañu hamawebusayiti abula kushikilamu hela kutaña nyijimbu yakutwamba yatemeshañawu hamaemeluku. Sweje-e twatela kutondolwela kuyaña hamawebusayiti awakwakusekesha. Wena afwilaña kuluwañesha antu jaNzambi nikuluwañesha chalala. Nsañu yimunabuli kwilukisha yaleñelaña kukunkulula mwaluwa. Mwatela kwiluka nenu nsañu yakutwamba yinateli kuyiluwañesha. Shinshikenu chuma chamwekeni mumafuku aMosi hatemesheliwu akwakwendesha ituña 12 kuya nakwendesha Ituña daChikaninu, adi 10 aleteli wunsahu watama. (Kuch. 13:25-33) Wunsahu wawu watama nawa wakutiyisha woma, waletesheli antu jaYehova kutiya woma. (Kuch. 14:1-4, 6-10) Chatela eteji wunsahu walala nikumukuhwelela Yehova, akuhweleleli wunsahu wakutwamba. w18.08 4 ¶4-5

Antu amavulu ekala nayilwilu yayiwahi. Nawa antu amavulu abula kwikala muchipompelu hiyakoñaña yuma yatama mpinji yejimaku. Neyi dichekalawu amabwambu jenu, komana chinayi mukwila nawu hiyamabwambu amawahi? Dihulenu nenu, anateli kunkwasha kuwahisha wubwambu wami naYehova? Yumanyi yidi munyichima yawu? Chakutalilahu, ahoshaña hayumanyi, ahoshaña hayakuvwala yinediki, hamali, hamafoni, hayisela indi kwiji hakufwila yuma yakumujimba? Nhoshelu yawu yamasensi atama hela yakutuñula akwawu? Yesu wasoñamishili nindi: “Yuma yidi mumuchima diyi yahoshañayi muntu.” (Mat. 12:34) Neyi mumona nenu amabwambu jenu anateli kuluwañesha wubwambu wenu naYehova, zatilenuhu swayi kuhitila mukuleka kudikunda nawu, neyi chinatwesheki, manishenu wubwambu wenu.—Yish. 13:20. w18.07 19 ¶11

Mosi chashikijiliyi yaaka 80, Yehova wamwinkeli mudimu wakufumisha aIsarela muwuduñu muEjipitu. (Kwid. 3:10). Ilaña Yehova wadiwunjikili. Wamwinkeli Mosi ñovu yakukoña yihayamisha. (Kwid. 4:2-9, 21) Wadi kumuchinisha Mosi kulonda yamwovwahili. Ilaña Yehova wadiwunjikili nikumutiyila wushona, nawa watwalekelihu nakumuleja kambuñindi wadizoza nindi wukumukwasha. Komana iku kumutoñojokelaku kwazatikili? Kwazatikili. Mosi wekalili nlomboli wamuwahi wadiwunjikili nawakwawu nawa watoñojokeleleñaku akwawu neyi chamutoñojokeleliku kudi Yehova. Neyi dimu, mukweti wuswa mwatela kumwimbujola Yehova kuhitila mukutoñojokelaku, kwikala naluwi nawa adiwunjika nawantu imwakamenaña. (Kol. 3:19-21; 1 Pet. 5:1-3) Neyi muzata nañovu nakumwimbujola Yehova niMosi Muneni, Yesu Kristu, mukwikala antu aswayi kusolomoka nawa mukukoleshaña akwenu.—Mat. 11:28, 29. w18.09 24-25 ¶7-10

Zatenuña nañovu kulonda mwikali nayilwilu yayiwahi nikuleta kunuñañana hakachi kawamanakwetu niahela. Neyi dichimwelaña, tunayisakilili. Kwila ‘mutoheshaku kukeña kwenu’ dikwila nawu, kuzata hakumina ñovu nikutwalekahu nehi? (2 Kor. 6:11-13, tth) Kwila muzata nañovu kulonda mwitejeña chejeji chachalala chamuBayibolu chitoñekeña mwiluña mumwashakamaña nehi? Nhoshelu yenu niyilwilu yayiwahi yinateli kuleñela antu imwashakamaña nawu kwiteja chalala. Dihulenu nenu: ‘Antu amwiluña detu añiluka nawu nekala nayilwilu yamuchidinyi? Nahembaña hetala niyuma yami nawunyonji, yikuletesha antuñi nami ammoneña nawu nekala nayilwilu yayiwahi? Komana nakwashaña amakwawu?’ Neyi munakuhanjeka nawaYinsahu amakwawu, kwila muyihameka haluwi niyilwilu yawu yayiwahi chiyinakwashi antaña jawu, antuñi nawu, akwawu muyatilañawu hela akwawu akashikola nehi? Mukutiya yuma yayiwahi yinadiluñishiwu.—Efwe. 5:9. w18.06 24 ¶13-14

Iku kusoñamisha kwamwekeni kudi antu amujahili kambanji Stefwanu, nawa chumichi dichamwekanaña nikudi antu amakwawu adi neyi wena. (Yil. 6:8, 12; 7:54-60) Awa akwansakililu afumpileña nshimbi yaMuntu iyelileñawu nawu adifukwileñaku kuhitila mukwila yuma yatama yidi neyi kujahañana. (Kwid. 20:13) Mwamweni, yinleji yawu diyayidimbaña! Tunateli kukiña ñahi chinleji chetu kulonda chibuli kufwa? Nshimbi niyishina yekala Mwizu daNzambi “yawahila kudizisha nachu, kuzuwila nachu, kwolola nachu, nikubabesha nachu munjila yakuloña.” (2 Tim. 3:16) Dichi, kuhitila mukudiza Bayibolu mafuku ejima, kutoñojoka chikupu chiyahosha nikuyizatisha muchihandilu chetu, kunateli kudizisha chinleji chetu kulonda chitukwasheña kutoñojoka neyi chatoñojokañayi Nzambi nawa chitulomboleña. w18.06 16-17 ¶3-4

Mpoku yakabali yazatishileña mashidika awaRoma hampinji yasonekeleñayi Pawulu, yadiña yayilehi masentimita 50 nawa yadiña yakuzuña nachu njita mukamwihi nayitwa yakumakasa. Chuma chayikwashileña mashidika awaRoma kuzuña chiwahi, adiña nakuzatisha yitwa yawu ifuku dejima. Pawulu wesekejeli mpoku yakabali Nezu daNzambi datwinkayi Yehova. Twatela kwiluka chakudizatisha chiwahi hakuhakwilaku yuma yitwakuhwelela hela neyi tunakukeña kuhimpa yilwilu yetu. (2 Kor. 10:4, 5; 2 Tim. 2:15) Hitwatela kumuchina Satana niandemoniku. Anateli kututiyisha woma ilaña hiyanateli kutwetaku. Nawa hiyakatwalekahu kuhandaku. Kumatachikilu aKuyuula kwaYaaka Ikombakaji daKristu, akayikasa hiyakekala nañovuku, nkumininaku akayijilumuna haya nyaaka. (Chim. 20:1-3, 7-10) Twamwiluka chilumbu chetu, tufuta twindi niyuma yafwilañayi. Nawukwashu waYehova, tunateli kumushinda! w18.05 30 ¶15; 31 ¶19-21

Adama welukili chikupu nindi kapela kahoshaña wanyi. Dichi watela watoñojokeli nindi chileñaleña chakuspiritu dichahosheli naEva kuhitila mudi kapela. (Kutach. 3:1-6) Adama naEva hiyamwilukili iwu chileñaleña hela chanteshaku. Hela chakwila chadiña muniyi njila, Adama wafuukwilihu kumufutalela Tata yindi wamwiwulu wukweti kukeña nakulondela muntu wabuliliyi nikwiluka kulonda yadikañi nankeñelu yaNzambi. (1 Tim. 2:14) Kufuma hayoyina mpinji, Yehova watachikili kusolola chekala iwu chilumbu wayiluwañesheli aAdama naEva nawa washiikili nindi ona muntu watama akamujilumuna. Ilaña Yehova wasoñamishili cheñi nindi, iwu chileñaleña wakuspiritu wahosheleli mudi kapela wakazuñañeshaña antu amukeña Nzambi. (Kutach. 3:15) Hamuloña wamaana indi, Yehova hatuleja ijina dadeni danona kañelu wadikañili nindiku. Nawa kufuma hampinji yakudikaña kwatachi, hahitili yaaka 2,500 hakwila nawu Nzambi yatachiki kutena ijina dalumbulula chekalayi iwu chilumbu.—Yoba 1:6. w18.05 22 ¶1-2

Neyi mwaneñahu dehi hampinji yimwashimwinineña mwiluña mwabulañawu antu kwiteja chalala, mukuhosha neyi chahosheliyi kapostolu Pawulu. Wakwashili antu amavulu kwikala atumbanji twaKristu mumudimu windi wakushimwina wazatiliyi yaaka kwakwihi na 30. (Yil. 14:21; 2 Kor. 3:2, 3) Hela chochu, hatwesheli kukwasha aYudeya ejima kwikala akwakudifukula alalaku. Ilaña amavulu amukaanini Pawulu nawa amakwawu amukabishili. (Yil. 14:19; 17:1, 4, 5, 13) Pawulu watiyili ñahi nayuma yeliliwu aYudeya? Wahosheli hatooka nindi: “Inakuhosha chalala mudi Kristu . . . [nami] nikweti chineñi cheneni nikukata kwabulaña kumana mumuchima wami.” (Rom. 9:1-3) Muloñadi Pawulu chatiyililiyi muniyi njila? Washili muchima hamudimu wakushimwina. Wayishimwinineña aYudeya muloña wayakameneni. Dichi Pawulu watiyili kutama hakumona anakukaana luwi lwaNzambi lwayimwekesheleliwu. Kufwana Pawulu, ninetu twayishimwinaña antu muloña twayakamenaña.—Mat. 22:39; 1 Kor. 11:1. w18.05 13 ¶4-5

Pawulu wamwekesheli nindi nimuntu wakoleshaña akwawu wakeñekaña kumukolesha. Wayisonekeleli akwaKristu ashakamineña muRoma nindi: “Inakufwila chikupu kuyimona, nakayinki yawaana yakuspiritu kulonda mwakakoli mbe-e; hela nami twakadikoleshi, muntu-himuntu nachikuhwelelu chamukwawu, dikwila nawu chenwenu nichamami.” (Rom. 1:11, 12) Eña, Pawulu wakolesheleña akwawu ilaña mpinji yikwawu niyena wakeñekeleña kumukolesha. (Rom. 15:30-32) Antu adihanaña akeñekaña kuyikolesha. Amanakwetu niahela anatwalekihu kushakama wujiki muloña wakulondela kufumba kwakusumbula hela kusumbukila “chiña hohu mudi Mwanta,” niwena akeñekaña kuyikolesha. (1 Kor. 7:39) AkwaKristu omikaña makabisha hela yikatu niwena akeñekaña kuyikolesha.—2 Tes. 1:3-5. w18.04 21 ¶3-5