October

Hitwamonaña munyichima yawantu neyi chamonañayi Yehova niYesuku. Hela chochu, tunateli kweseka kutiya chinakutiyawu antu amakwawu niyuma yakeñañawu. (2 Kor. 11:29) Kwambukaku nawantu adikeña amukaayi, twafwilaña “yuma bayi [yatutiyishaña] kuwaha [etu] aweni hohuku, chiña yuma yatiyishaña kuwaha [niakwetu].” (Fwi. 2:4) Sweje-e akulumpi muchipompelu atela kuyakamenaña antu amakwawu. Eluka nawu akalumbulula hamudimu wayinkawu wakwakamena nyikoku yaYehova. (Heb. 13:17) Akulumpi neyi anakukwasha akwawu akwakwitiya, atela kwikala nawushona. Akulumpi anateli kuyakamena ñahi akwawu? Mukulumpi wukweti wushona wekalaña nampinji yakuhanjeka nawamanakwindi akwaKristu niahela. Wayihulaña malwihu nikuyitiyilila nakanañachima nawa wadiwunjikaña neyi anakulumbulula. Chumichi chalema nankashi sweje-e neyi mukoku wumu nakukeña kuhosha yuma yidi kumuchima ilaña chinakumukalila kuhosha. (Yish. 20:5) Neyi mukulumpi yekalaña nampinji yakuhanjeka nawamanakwindi, anateli kumukuhwelela, akwikala nawubwambu wakola nawa akwikala adikeña mukachi kawu.—Yil. 20:37. w19.03 17 ¶14-17

Kusakilila kudi neyi yakuda yayiwahi, yinateli kuwaha neyi muyidiila hamu nawakwenu. Twatiyaña kuwaha neyi akwetu atusakilila. Neyi tuyisakililaña akwetu, niwena atiyaña kuwaha. Neyi tumusakilila muntu, wukwiluka nindi ñovu yindi yazatishayi hakutukwasha hela kutwinka chuma yaya mumenji wanyi. Chikufumamu, wubwambu wetu nayena wukukola. Neyi chinashimuniwu muNsona yalelu, kusakilila kwalema nankashi. Mabula akutuña nawulu anashiwu mwibañu dasiliva amwekanaña lubanji. Toñojokenu chalemawu wuseya! Mukutiya ñahi neyi ayinka chawaana chamuchidiwu? Munjila yoyimu, mazu akuhameka imukuyihameka nachu akwenu anateli kwikala neyi chuma chalema wuseya. Chakutalilahu: Mabula akutuña nawuru anateli kushakama yaaka yayivulu. Munjila yoyimu, neyi mumusakilila muntu, mazu enu nateli kuyilemesha nawa wukuyanukaña mpinji yejima. w19.02 15 ¶5-6

Chelili aAdama naEva adi mukabu wakumutondu wakwiluka nachu yuma yayiwahi niyatama, amwekesheli nawu: Hiyamukuhweleleli Yehova ninshimbi jindiku. Afuukwilihu kudituñila aweni nshimbi hayuma yayiwahi niyatama. Ajimbesheli wubwambu wawu naYehova, kukooleka kwakushakama haya nyaaka nawa asambwishili anyanawu nshidi nikufwa. (Rom. 5:12) Chuma chafuukwiliwu aAdama naEva chaleta yihuñu. Adama naEva elili chuma chambukaku nachuma cheliliyi ntuñu wakuEtiyopiya chamushimwininiwu kudi Fwilipu. Iwu ntuñu walemesheli chuma chamwililiwu kudi Yehova niYesu chakwila washikeneni kupapatishewa. (Yil. 8:34-38) Neyi tudihana kudi Nzambi nikupapatishewa neyi cheliliyi ona ntuñu, tukumwekesha hatooka netu twasakililaña hayuma yatwililayi Yehova niYesu. Twamwekeshaña cheñi netu twamukuhwelela Yehova nawa tweluka netu diyi watela kushaku nshimbi hayuma yayiwahi niyatama. w19.03 2 ¶1-2

Ambuña aNzambi amwekeshaña ñahi kashinshi? Amwekeshaña kashinshi hakumukeña Yehova namuchima wawu wejima nawa chafumañamu, mpinji yejima elaña yuma yamutiyishaña Yehova kuwaha. Shinshikenu izu dakashinshi chadizatishawu muBayibolu. MuBayibolu, Izu dachiHeberu dakwila nawu “kashinshi” daya mukwila nawu kukola, kuwaha hela kubula ihuji. Chakutalilahu, aIsarela alambwileña nyilambu yawanyama kudi Yehova nawa Nshimbi yahosheli nawu atunyama ateleleli kwikala amawahi. (Lev. 22:21, 22) Antu jaNzambi hiyayitejeleña kulambula kanyama wabula mwendu, itu, disu hela wakataku. Yehova wakeñeleña nindi amulambuleña kanyama wakola, wamuwahi hela wabula wufwayi. (Mal. 1:6-9) Tunateli kwiluka muloña waweni chakeñelañayi Yehova yuma yayiwahi hela yakadi wufwayi. Neyi tunakulanda chuma chidi chejima, chidi neyi mukabu, mukanda hela chozelu, hitwalandaña mukabu wakisika, mukanda watabuka hela chozelu chafwaku. Twakeñaña chuma chachiwahi, chakola hela chakadi wufwayi. Dichuma chakeñañayi Yehova kudi etu, wakeñaña nindi tumukeñi chikupu nikwikala ashinshika. w19.02 3 ¶3

Hakwila nawu tuhembi muchima wetu hitwatela kutondolwela hohu yuma yatamaku, ilaña twatela cheñi kwiteja yitoñojoka yayiwahi. Kunyima munyisumba yidi mumpwembu, mukwakuhemba kuchiisu washinkileña chiisu kuchina ayilumbu jawu akenda keñila, ilaña mpinji yikwawu washinkwileña kuchiisu kulonda eñiji yakuda niyuma yikwawu yakeñekeleña. Neyi chakwila yiisu abulileña kuyishinkula, antu amumusumba adi kufwa nanzala. Munjila yoyimu, twatela kwenzununa muchima wetu nakwiteja yitoñojoka yaNzambi yitukwashi. MuBayibolu mwekala yitoñojoka yaYehova, dichi hampinji yitunakuyitaña, twatela kwiteja yitoñojoka yaYehova kulonda yihimpi yitoñojoka yetu, chitwatiyaña niyilwilu yetu. Tunateli kutiyishisha ñahi yuma yitunakutaña muBayibolu? Kulomba kwalema, kwatukwashaña ‘kumona yuma yakuhayamisha’ yidi Mwizu dindi. (Mas. 119:18) Twatela cheñi kutoñojoka chikupu nsañu yitunakutaña. Neyi tunakulomba, kutaña nikutoñojokahu chikupu, Izu daNzambi dashikaña “mukachi kamuchima [wetu].”—Yish. 4:20-22. w19.01 18 ¶14-15

Yehova weluka nindi twashiyashana nawa walemeshaña nyilambu yetu yitwamulambulaña. Toñojokenu nyilambu yamulambwileñawu kudi aIsarela. A Isarela amakwawu alambwileña mwana kamukoku hela mpembi. Ilaña aIsarela adiña atuzweñi alambwileña “tutela tuyedi, hela anyana katupompa ayedi.” Neyi kaIsarela yakañanya kulambula tutela tuyedi hela tupompa, Yehova wadiña nakutambwila yamwikumi, ibañu “dawuña walembuluka.” (Lev. 5:7, 11) Wuña wadiña nawuseya wanyi, ilaña Yehova wadiña nakulemesha iwu mulambu chakala hohu ‘hiwuña walembuluka.’ Nimakonu, Nzambi dichelañayi. Neyi tunakuhana ñakwilu, hakeñaña nindi wejima wetu tuhosheña neyi chahosheleñayi Apolosi hela Pawuluku. (Yil. 18:24; 26:28) Yehova wakeñaña nindi tuhaneña ñakwilu yayiwahi yituneluki. Anukenu mumbanda nfwila wahanini tumawayawaya twanyanya tuyedi. Amulemesheli kudi Yehova muloña wahanini kwesekeja nahakuminini ñovu yindi.—Luka 21:1-4. w19.01 8-9 ¶3-5

Chineli tudi akwakumulondela Kristu, akutuhelaña kudi antu. Yesu washimwineñahu dehi nindi mumafuku akukuminina, atumbanji twindi akayikabisha. (Mat. 24:9; Yow. 15:20) Wuprofwetu waIsaya watusoñamishaña nawu ayilumbu jetu hiyakatuhela hohuku; ilaña akazatishaña yitwa yamboka mboka hakutuyandisha. Ayilumbu jetu anateli kutuleja nsañu yakutwamba nawa tunateli kukuhwelela netu yalala, cheñi anateli kututwambila hela kutukabisha. (Mat. 5:11) Yehova wukuyilekesha wanyi ayilumbu jetu kuzatisha yitwa hakuzuña nanetu. (Efwe. 6:12; Chim. 12:17) Ilaña hitunateli kutiya womaku. Yehova wahosheli nindi, “hikwakekala chitwa” chakazatishawu nawu atukatishi nachu, “chakakolaku.” (Isa. 54:17) Neyi chochatukiñaña mbañu kunvula yampepela, Yehova watukiñaña kudi ‘antu atutiyishaña woma.’ (Isa. 25:4, 5) Ayilumbu jetu hiyakatwalekahu kutukabishaku. (Isa. 65:17) Ayilumbu jawantu aNzambi ejima “akekala neyi hikudi nichumaku, akanoña.”—Isa. 41:11, 12. w19.01 6-7 ¶13-16

Enu atwansi, Yehova wakeña kusubuka nawa washa iku kukeña munyichima yenu. Hela chochu, nakukeña nindi muzatisheña kusubuka kwenu chiwahi kulonda mwikali akiñewa. Hadaha mwelukahu amakwawu atalaña nyevulu yanzekesi hela elaña wuvumbi, ahemaña yisela yakusha wumi muwubanji hela azatishaña yitumbu chatama nikusheta walwa. Kuhosha hohu walala, anateli kudiluñisha nikwikala namuzañalu wakampinji kantesha hohu. Ilaña, kakavulu mwafumaña yuma yatama yidi neyi nyisoñu, kuteñuka nikufwa. (Ñal. 6:7, 8) “Kusubuka” kwawu kwalala wanyi. (Tit. 3:3) Antu añahi imweluka akatahu dehi muloña wakulondela nshimbi jamuBayibolu? Kumwovwahila Yehova kwakuwahi nawa kwatukwashaña kwikala asubuka chikupu. (Mas. 19:7-11) Chuma chasweja kulema neyi muzatishaña kusubuka kwenu chiwahi, dikwila nawu kulondela nshimbi jaNzambi jaloña nikuzatisha yishina, akuyikuhwelela kudi Nzambi nianvwali jenu nawa mukwikala asubuka.—Rom. 8:21. w18.12 22-23 ¶16-17

Muloña wanshidi yaAdama, yuma yahimpikili. Kuhimpika kwatachi hikufwa. Tunateli kuwana iku kuhimpika mumazu asonekeliyi kapostolu Pawulu halumbulwileñayi nindi akwaKristu hiyekala muNshimbi jaMosiku. Wamwekesheli nindi kufwa dikwamanishaña wulu nawa muntu wunashali wakasunuka kusumbula hela kusumbuka cheñi. (Rom. 7:1-3) Nshimbi yayinkeliwu aIsarela kudi Nzambi yashimwini nsañu yikwawu hawulu. Yetejeli kusubula ambanda amavulu, chuma chelileñawu nihampinji yadiñayi Nzambi kanda yayinki aIsarela Nshimbi. Hela chochu, nshimbi yakiñileña ambanda nianyana kubula kuyikabisha. Chakutalilahu neyi kaIsarela yasumbula nduñu, kuhiñahu yasumbula cheñi mumbanda mukwawu, halekeleña kumulandila mumbanda watachi yakuda, yakuvwala hela kudikisha yuma yekeñekaña muwuluku. Nzambi wakeñeleña nindi iyala yakiñeña nikwakamena ñodindi. (Kwid. 21:9, 10) Hitwekala muNshimbiku, ilaña tunateli kulemesha wulu neyi chawulemeshayi Yehova. Komana chumichi kwila chiyikwasha kulemesha wulu nehi? w18.12 10 ¶3; 11 ¶5-6

Hanyima yakwila namuleji dehi Yehova kwakama kwindi, hadaha Habakuki wadiña nakutoñojoka chadi kwilayi Yehova. Chineli hiTata wakundejaña nawa watoñojokelañaku, Yehova hazuwili namazu ahosheliyi Habakukiku. Nzambi welukili nindi Habakuki wakeñeleña wukwashu. Mazu ahosheliyi Yehova hachuma chakayilayi aYudeya, Yehova wamulejeli Habakuki chuma chikayimwekena kumbidi. Hadaha Habakuki diyi muntu watachi alejeliwu kudi Yehova nawu kukuma kwanshakaminu yawu kwadiña mukamwihi. Yehova wamulejeli Habakuki nindi keña yayibabeshi. Kujilumuka kwanidi ikiñu datama nawa dasweja madombu kwadiña kwakwihi. Mumazu akwila nawu “mumafuku enu,” Yehova wamwekesheleña nindi wunsompeshi wanawa antu wukekalaku mumpinji yaniwu kaprofwetu hela mumpinji yawantu amwikiñu dindi. Yehova welili yuma munjila yambukaku nachatoñojokeleñayi Habakuki. Komana dichuma chakeñeleñayi Habakuki? Chuma chamulejeliwu kudi Yehova chamwekesheleña nawu makabi akasweja muYuda. w18.11 15 ¶7-8

Mwayimonaña ñahi antu achidi kanda adizi chalala? Hela chakwila kapostolu Pawulu washimwinineña aYudeya amwilukili Nzambi musinagogi, ilaña halekeli kushimwina cheñi antu adifukwileña kudi anzambi akutwambaku. Pawulu hadiñayi halwendu lwindi lwatachi lwawumishonali, antu amuLikoniya atachikili kuyitena aPawulu naBaranaba nawu anzambi jawu aZewusi naHeremisi. Komana aPawulu naBaranaba akeñeleña kuya mpuhu? Komana amweni neyi anakuyikolesha muloña wakwila afumini nakuyikabisha munyisumba yiyedi yendeleliwu? Komana atoñojokeli nawu chuma chamwekeni chikuyikwasha kushimwina nsañu yayiwahi? Inehi! Hohenohu ashikeneni kutabula yakuvwala yawu nawa alundumukilili mwizaza dawantu nakubidika nawu: “Enu antu, munakukoñeladi yuma yamuchidiwu? Ninetu tudi antu atiyaña neyi chimwatiyaña enu.”—Yil. 14:8-15. w18.09 4-5 ¶8-9

Neyi tudiza chalala nawa tutachika kulondela chahosha Bayibolu, twatela kuleka yitoñojoka niyilwilu yatama. Shinshikenu chasonekeliyi Petulu haniku kuhimpika nindi: “Hakwikala anyana ovwahilaña, lekenu kwiteja kufwila kumwadiña naku kunyima kumwafwilileña mukubula kwiluka kuyiluwañeshiku, ilaña ikalenu ajila muyilwilu yenu yejima.” (1 Pet. 1:14, 15) Antu ashakamineña mumusumba waKorinda mwenzeli yilwilu yatama, ahimpili yilwilu yawu chelili adizi chalala. Antu amavulu makonu niwena analeki yilwilu yawu yatama hanyima yakudiza chalala. Petulu wayilejeli cheñi akwaKristu amumafuku indi nindi: “Mpinji yakwila mwaya nkeñelu yawakwanyuza yinahiti dehi, yimwakoñeleña yilwilu yawukapwa nsonyi, kufwila yuma yatama, kusweja kunwa walwa, yidika yamapumba, kusheta nikupesha kwakufumpa nshimbi.”—1 Pet. 4:3. w18.11 6 ¶13

Tunateli kwiluka ñahi antu adi “nanyichima yashinshika yakukeña kwikala nawumi wahaya nyaaka”? Neyi chelileñawu mumafuku awapostolu, hakwila nawu tuwani antu amuchidiwu chiña tushimwinaña. Dichi, twatela kwila mwatulejeliyi Yesu nindi: “Mumusumba wejima hela mumukala mumukwiñila, keñakeñenumu muntu wunateleli.” (Mat. 10:11) Hitwatela kukuhwelela antu adinkaña wanta hela abulaña kukeña kumwiluka Nzambi netu akutambwila nsañu yayiwahiku. Twakeñakeñaña antu akweti nyichima yayovu, adizoza nawa akeñaña kudiza chalala. Iku kukeñakeña tunateli kukwesekeja nachuma chelileñayi Yesu hadiñayi mukwakusoña, watela wakeñakeñeleña nyitondu yayiwahi yakusoña yitwamu, yenzelu, mpaanda hela yuma yikwawu. Neyi nawani mutondu wawuwahi, wasendeleña chikasha chindi chayozelu yakuzatisha, wazatileña mudimu windi nakutuña chuma chidi chejima. Ninetu twatela kwila mwomumu hampinji yitunakwilisha antu akweti nyichima yayovu kwikala atumbanji.—Mat. 28:19, 20. w18.10 12 ¶3-4

Fwilipi mukwakushimwina wamwekesheli chakutalilahu chachiwahi chamuntu watwalekelihu kusha muchima hamudimu wakushimwina hela chakwila yuma yahimpikili muchihandilu. AkwaKristu muYerusalema atachikili kuyikabisha nawa chaletesheli Stefwanu amujahi. Haniyi mpinji Fwilipi wadiña nakudiluñisha mudimu wazatileñayi. (Yil. 6:1-6) Ilaña hampinji yapalañeniwu akwakumulonda Kristu, Fwilipi hashakamini hohuku. Wayili nakushimwina kuSamariya, musumba weneni mwabulili kushimwinawu nsañu yayiwahi hayina mpinji. (Mat. 10:5; Yil. 8:1) Fwilipi wadiloñesheli kuya kwejima kukumulombola spiritu yaNzambi, dichi Yehova wamuzatishili kuya nakushimwina mumaluña mwabulawu dehi kushimwina. A Samariya ayidiwili kudi aYudeya, ilaña Fwilipi wadiña nachaambu wanyi nawa wayishimwinineña nsañu yayiwahi. Dichaletesheli izaza dawantu ditiyilili “namuchima wumu”! (Yil. 8:6-8) Fwilipi washili muchima hakushimwina nawa Yehova wamukiswilili nichisaka chindi.—Yil. 21:8, 9. w18.10 30 ¶14-16

Mpinji yimu Yesu hadiñayi munkambi yaDekapoli, antu “amuleteleli iyala wajika matu wakabakeneña hakuhosha.” (Maku 7:31-35) Chatela yamuukili mwizaza, Yesu “wamutwalili owu iyala kwakankawindi” nawa wamuukili. Muloñadi? Wufwayi waniwu iyala wadi kumuleñela kutiya nsonyi kumuukila mwizaza. Hadaha Yesu chelukiliyi chumichi, dichaletesheli yayi nakumuukila kumbadi. Hela chochu, hitunateli kuuka antu muchihayamishaku. Ilaña twatela kuyitoñojokelaku akwetu akwakudifukula chinakutiyawu. Yesu welukili chatiyileñayi iyala wajika matu nawa wamutoñojokeleliku. Dichi ninetu twatela kuyitoñojokelenuñaku atushinakaji niayifwayi. Chipompelu chawakwaKristu hiyachilukilaña kunyidimuku, ilaña achilukilaña kukukeña. (Yow. 13:34, 35) Iku kukeña kwatuleñelaña kuya nakukwasha amanakwetu akula dehi niayifwayi kulonda ayi kukupompa kwawakwaKristu nikuya nakushimwina. Twayikwashaña hela chakwila anateli kuzataku nyidimu yikwawu muñovu jawu.—Mat. 13:23. w18.09 29-30 ¶7-8

Nyikoku yaYehova yejima yalema kumesu indi nikumesu aYesu, wahanini ifutu danyiloña. (Ñal. 2:20) Twayikeña nankashi amanakwetu niahela. Nawa tunakukeña kuyakamena nikuyikeña chikupu. Hakwila nawu tuyikundejeña, “tufwileña yuma yaletaña kuwunda niyuma yatuleñelaña kudikolesha wumu namukwawu.” (Rom. 14:19) Tunakutalila mpinji yitwakekala muParadisa mukabula yuma yinateli kutuneñesha! Hikwakekala yikatu, majita, kufwa kutwaswana, kutukabisha, kukala kwamuchisaka nikuneñaku. Neyi Ikombakaji daYaaka daKuyuula kwaYesu dinamani dehi, antu ejima akekala awanina. Ejima akahita hakweseka kwakukumishaku, Yehova Nzambi wakayilisha kwikala anyanindi ahamaseki “nakwikala [asubuka] mukulema kwawanyana kaNzambi.” (Rom. 8:21) Tutwalekihu kumwekesha kukeña kwatuñaña nikudikwasha wumu namukwawu kulonda tukatambwili wumi muParadisa. w18.09 14 ¶10; 16 ¶18

Bayi neyi kudiza Izu daNzambi hikutaña nakufunda ñakwilu hohuku. Neyi tunakudiza, twashinshikaña nsañu chiyinakutuleja hadi Yehova, njila jindi nichatoñojokañayi. Twafwilaña kwiluka muloña waweni Nzambi chetejelayi yuma yikwawu nichakaanishilayi yuma yikwawu. Twatoñojokaña hayuma yitunateli kuhimpa muchihandilu chetu nimuyitoñojoka yetu. Hela chakwila chinateli kwikala chapela wanyi kutoñojoka hayikuma yejima yitukudiza, twatela kuzatisha mpinji, hadaha kuzatisha chikunku champinji yakudiza kulonda tutoñojoki chikupu hansañu yitunatañi. (1 Tim. 4:15) Neyi tunakutoñojoka mpinji yejima Hezu daNzambi, twelukaña’ chikupu netu yitoñojoka yaYehova yaloña. Twatachikaña kumona yuma neyi chayimonañayi nawa twazatishaña yitoñojoka yindi. ‘Twahimpaña yitoñojoka’ yetu nawa twatachikaña kutoñojoka munjila yambukaku. (Rom. 12:2) Mukuhita kwampinji, twatachikaña kwikala nayitoñojoka neyi yaNzambi. w18.11 24 ¶5-6

Mumafuku awapostolu, Pawulu waditeneni yomweni niakwawu muyadiña nakukalakela nindi “tudi akwakukalakala hamu naNzambi” muloña adiña namudimu wakushimwina antu chalala. (1 Kor. 3:6) Ninetu tunateli kwikala “akwakukalakala hamu naNzambi” kuhitila mukuzatisha mpinji yetu, yuma yitukweti niñovu yetu mumudimu waWanta wakushimwina. Iku hikukooleka chikupu! Kuzatisha mpinji niñovu yetu mumudimu wakwilisha atumbanji nikushimwina kwaletaña muzañalu chikupu. Neyi mwihula antu anatwalekihu kudizisha atudizi aBayibolu, akuyileja nawu adiluñishaña chikupu. Twazañalalaña neyi tumona muntu itwadizishili yahimpa yilwilu yindi nawa yatachika kulejaku antu amakwawu nsañu yayiwahi. Yesu niyena wazañaleli hakumona atumbanji 70 atemesheliyi nakushimwina “afuntili iku anazañalali” muloña wakwila antu etejeli nsañu yayiwahi.—Luka 10:17-21. w18.08 20 ¶11-12

Chinateli kwikala muhetu neyi tutachika kushindamena hakashinshi ketu etu aweni. Tunateli kutachika kutoñojoka netu tukumanisha kukala hela chakwila hitukweti wunsahu walalaku. Cheñi, chinateli kwikala chakala kuwana wunsahu walala hadi manakwetu itwabulaña kutiyañana nindi muchipompelu. Neyi tusweja kutoñojoka nankashi hakubula kutiyañana namanakwetu, chikutuleñela kumuhembela nkunyi. Nawa neyi tutiya nsañu yatama hadi iwu manakwetu, hadaha tukushikena kwiteja netu dimu. Yumanyi yitukudizilaku? Kuhembela amanakwetu nkunyi kunateli kuletesha kuyinka nyiloña hansañu yitunabuli kwilukisha wunsahu walala. (1 Tim. 6:4, 5) Twatela kutondolwela lwisu niichima kutanda mudetu kulonda tukunkululeña mwaloña. Chatela twitejeña iyi yilwilu yatama kutanda mudetu, twanukeña lushimbi lwakukeña amanakwetu nikuyanakena chakufuma hamuchima.—Kol. 3:12-14. w18.08 6 ¶15; 7 ¶18

Chineli yena diyi waleñeli antu, antu ejima ambala aYehova. (Mas. 100:3; Chim. 4:11) Muchihandilu chawantu chejima, Nzambi natondi mazanvu awantu amu kwikala antu jindi munjila yadimena. Chakutalilahu, Masamu 135 yatena akwakudifukula aYehova ashinshika, aIsarela akushankulu nawu ‘chozelu chindi.’ (Mas. 135:4) Cheñi mukanda waHoseya washimwineñahu dehi nawu antu abulili kwikala aIsarela akekala antu jaYehova. (Hos. 2:23) Wuprofwetu waHoseya washikijeweli mpinji yelili Yehova yabombelihu antu abulili kwikala aYudeya kwikala nakuchiñeja kwakuyuula hamu naKristu. (Yil. 10:45; Rom. 9:23-26) Iwu “muza wajila” “hiheta dadimena” daYehova munjila yakuhayamisha, antu ekalamu ayiwayisha dehi naspiritu yajila nawa ayitonda kuya nakushakama mwiwulu. (1 Pet. 2:9, 10) Indi akwaKristu ashinshika akweti kuchiñeja kwakushakama hamaseki? Yehova wayitenaña niwena nindi “antu” jindi nawa ‘atondayi.’—Isa. 65:22. w18.07 22 ¶1-2

AkwaKristu alala amwimbujolaña Kristu wamwekesheli chitunateli kwikala nachisambu. (Mat.20:28) Wejima wetu twatela kudihula netu, ‘Komana nateli kumwimbujola Yesu kubadika chinnakwila chayinu mpinji?’ (1 Pet. 2:21) Tunateli kudiluñisha nkisu jaYehova kuhitila mukumwimbujola yena niKristu, kutoñojokelaku akwetu nikukeña njila mutunateli kuyikwashila muyuma yinakaankiliwu. Mwamweni, Yesu wamwekesheli hatooka muchishimu chakaSamariya nindi akwakumulonda ejima atela kukwashaña amakwawu, kushilahu niantu afuma kumaluña ashiyashana. (Luka 10:29-37) Munakwanuka lwihu lwehwiliyi kaYudeya lwaletesheli Yesu yahoshi hachishimu chakaSamariya? Wehwili nindi: “Indi mukwetu hinyi?” Ñakwilu yaYesu yamwekeshaña nawu kufwana ona kaSamariya, twatela kuyimwekeshelaña antu chisambu hakwila tudiluñisheña nkisu jaNzambi. w18.08 19 ¶5-6

Komana Yehova watwalekelihu kumwiluka Mariya muloña wakwakamena nikukulisha Mwanindi nakashinshi? Eña watwalekelihu. Nzambi wasonekeli yilwilu yindi nimazu indi muBayibolu. Chinamwekani neyi, Mariya halondeleleña kwejima kwayileñayi Yesu hadi yaaka yisatu nachikunku yazatiliyi mumudimu windi wakushimwinaku. Hadaha chineli Mariya wadiña nfwila, watela washakamineña muNazareta. Hela chakwila washalilihu kukooleka kwakuvulu, ilaña hampinji yafwileñayi Yesu wadiña hohu. (Yow. 19:26) Hela chochu, chimwahitili mpinji, Mariya wadiña hamu nawatumbanji hamafuku akutwala kuPentakosta hayichililiwu antu spiritu yajila. (Yil. 1:13, 14) Hamwaha niyena amuwayishilili hamu nawantu apompeli. Neyi dimu, dikwila nawu amwinkeli kukooleka kwakwikala hamu naYesu mwiwulu haya nyaaka. Amukiswilili muloña wakashinshi kindi. w18.07 9 ¶11; 10 ¶14

Mumudimu windi wakushimwina wejima, Yesu wadizishileña chalala chapela kulonda yakwashi atumbanji twindi kwiluka kukala kwafumaña muyilwilu yikwawu hela mukwila yuma. Chakutalilahu, wadizishili nindi ndulu yinateli kuleta ndombu nawa kufwila yuma yatama kunateli kuleñela muntu kwila wuvumbi. (Mat. 5:21, 22, 27, 28) Hakwila nawu twikali nachinleji chakudizisha chiwahi, twatela kwiteja yishina yaNzambi kutulombola nawa chumichi chikuletesha kumulemesha Nzambi. Hansañu jikwawu, akwaKristu ayedi akweti yinleji yadizishewa naBayibolu anateli kukunkulula mwambuka. Shinshikenu hakunwa walwa. Bayibolu yakaanisha wanyi kunwa walwa nakwesekeja. Ilaña yakaanisha kusweja kunwa nikusheta. (Yish. 20:1; 1 Tim. 3:8) Komana chinatalishi mukwila nawu mukwaKristu nateli kushinshikahu wanyi yuma yikwawu chakala hohu nakunwa walwa mukwesekeja? Hichinatalishi imuku. Hela chakwila chinleji chindi chikumukabisha wanyi, mukwaKristu watela kutoñojokelaku yinleji yawakwawu. w18.06 18 ¶10-11

Yesu wayisoñamishili atumbanji twindi kubula kusha maana kuntañishilu hela kwiluñi danawa mazanvu asatu. (Mat. 16:6, 12) Yesu watachikili kuyileja iyi nsañu kufuma hakeñeleñawu antu kumwilisha mwanta. Neyi nsakililu yidibomba mujipolitikisi, ndombu yashimbulaña wanyi nakuvulumuka. Yesu walejeli atumbanji twindi nindi hiyatela kudiñija munsañu jamapolitikisiku. Dichuma chaletesheli mukulumpi wawatupristu niAfwarisi kumukasila Yesu mpuña yakumujiha. Amweneña nawu wukuyitambula yifulu yawu mumapolitikisi nimunsakililu. Ahosheli nawu: “Neyi tukumuleka yeleña chochichi, antu ejima akumukuhwelela, nawa aRoma akwinza nakututambula iluña detu nimuza wetu.” (Yow. 11:48) Dichi, Kayafwasi Kapristu Muneni diyi waletesheli antu amujahi Yesu.—Yow. 11:49-53; 18:14. w18.06 6-7 ¶12-13

Ndisha yikwawu yazatishañayi Satana hikukeña kwiluka nsañu yakupanda. Makonu, hazatishaña hohu andemoni munsakililu yakutwambaku, ilaña nimumakampani ayisela. Mafilimu, yisela yahavidiyo nimaTV amwekeshaña neyi kupanda kwakuwahi. Twatela kwiladi hakwila tubuli kufwa muniwu muhetu? Bayi tutoñojoka netu kuloñesha kwaNzambi kukutusonekela ndandanda yayisela yayiwahi niyatamaku. Wejima wetu twatela kudizisha chinleji chetu kulonda chitukwasheña kwila yuma kwesekeja nanshimbi jaNzambi. (Heb. 5:14) Hela chochu, tunateli kufuukula chiwahi neyi tulondela kufumba kwonenawu kwakapostolu Pawulu kudi hewulu. Tunateli kudihula etu aweni netu: ‘Komana yisela yinatondaña yanleteshaña nimwekaneña neyi nidi nfwikiji? Neyi atudizi ami aBayibolu hela antu inafuntilaña amona yisela yinakeña, komana akumona nawu nelaña yuma yinatañishaña?’ Neyi yuma yitwahoshaña yesekanaña nayuma yitwelaña, hitukufwa munyihetu yaSatanaku.—1 Yow. 3:18. w18.05 25 ¶13

Tunateli kumwimbujola ñahi Pawulu? Chatachi, twatela kuzata nañovu kulonda tuwani antu atelela adi “nanyichima yashinshika yakukeña kwikala nawumi wahaya nyaaka.” Chamuchiyedi, twatela kumulembelelaña Yehova mukulomba netu yenzununi nyichima yawantu itukuwana. (Yil. 13:48; 16:14) Silvana, wunazati wupayiniya yaaka kwakwihi na 30, wahosheli nindi: “Henonu kanda niyi nakushimwina kwitala didi mwiluña dami dakushimwina, nalombaña kudi Yehova kulonda yankwashi kumona yilwilu yayiwahi mudi antu.” Ninetu twamulombaña Nzambi kulonda yatemeshi añelu atukwashi kuwana antu anakukeña kudiza chalala. (Mat. 10:11-13; Chim. 14:6) Robert wunazati wupayiniya yaaka kubadika ha 30, wahosheli nindi: “Chatuzañaleshaña kuzatila hamu nawañelu eluka chinakuhandawu eni matala.” Chamuchisatu, twatela kwiluka netu antu anateli kubalumuka. Carl eluda, wahosheli nindi, “Namonaña tuyuma twanyanya mudi muntu twamwekeshaña nawu nakukeña kudiza, chidi neyi kutumba chimwemweta, chinakuntalayi hela neyi yehula lwihu lunakukeñeshayi kwiluka ñakwilu.” Mwamweni, kufwana Pawulu, twatela kuumika hampinji yitunakusoña nyikabu. w18.05 15 ¶13; 16 ¶15

Twakoleshewaña chikupu neyi tutiya nawu antu itwakwashili kunyima anatwalekihu kwikala ashinshika, neyi chatiyiliyi kapostolu Yowanu wasonekeli nindi: “Kwosi chuma chikwawu chanzañaleshaña chikupu kubadika ichi chakutiya nawu: anyanami anatwalekihu kwenda muchalala.” (3 Yow. 4) Apayiniya amavulu atiyaña kuwaha neyi atiya nawu antu iyadizishiliwu chalala kunyima anatwalekihu kwikala ashinshika nawa hadaha amakwawu hiyapayiniya. Neyi tumwanukisha payiniya wunazeyi muzañalu wadiñayi nawu kunyima nateli kukoleshewa. Ankoñi añinza amavulu hamu niañodijawu ashimunaña chakoleshewañawu neyi atambwila mukanda wakuyisakilila chiyendeleleliwu chipompelu. Dichatiyañawu niaeluda, amishonali, apayiniya niamamembala amuchisaka chaBeteli neyi ayisakilila hanyidimu yawu yazatañawu nakashinshi. w18.04 23 ¶14-15

Solomoni wadikañili, nkumininaku wasumbwili ambanda 700. Wabombelelihu cheñi antombu (ambanda awujila) 300. (1 Anya. 11:3) Añodi jindi amavulu hiyadiña aIsarelaku, adifukwileña kudi anzambi akutwamba. Dichi, Solomoni wafumpili nshimbi yaNzambi yakubula kusumbula ambanda akumatuña acheñi. (Kuhit. 7:3, 4) Solomoni wadambwileña kudi Yehova chovu-chovu, nkumininaku wakoñeli nshidi yeneni. Solomoni watuñili kameña kanzambi wamumbanda Ashitoreti nawa watuñili cheñi kameña kanzambi wakutwamba Kemoshi. Kweniku wadibombeli hamu nawañodi jindi nakudifukula kudi ankishi. Watuñili twenitu tumeña kumaluña ejima, kumpidi yadiña kumbidi yaYerusalema, kwatuñililiyi tembeli yaYehova. (1 Anya.11:5-8; 2 Anya. 23:13) Hadaha Solomoni wadidimbileña yomweni nakutoñojoka nindi Yehova wukudiwula yiluwa yindi chakala hohu yatwalekahu kuhana nyilambu mutembeli. Yehova hadiwulaña nshidiku. w18.07 18-19 ¶7-9

“Nyivu yakesi” yikwawu yinateli kuyasayi Satana hinsañu yakutwamba yahoshañayi hadi Yehova, yakwila nawu hayakamenañaku nawa wayikeña wanyi. Ida wudi nayaaka 19 wadimweneña nindi washikilamu wanyi. Dichi, wahosheli nindi: “Natoñojokeleña nami Yehova hekala kwakwihi nanamiku nawa hakeñaña kwikala Ibwambu damiku.” Wamanishili ñahi iku kukala? Ida wahosheli nindi: “Kupompa dikwankwashili kukolesha chikuhwelelu chami. Neyi tunakupompa nakwileñahu wanyi muloña natoñojokeleña nami kwosi wukutiya chinukuhosha. Ilaña chayinu mpinji nadiloñeshaña nawa nakulañahu kapampa kayedi hela kasatu hakupompa.” Kukala kwamweniyi Ida kunakumwekesha nsañu yalema: Nkebu yamwinkeleñawu mushidika yadiña yakupima chiwahi, ilaña chipimu chankebu yetu yachikuhwelelu chinateli kukeha hela kutoha. Hichuma chitwatela kuditondelahu etu aweni. (Mat. 14:31; 2 Tes. 1:3) Dichi chalema nankashi kukolesha chikuhwelelu chetu! w18.05 29-30 ¶12-14

Mukwakuhemba kaleya wabalumukili mumuchima nikulomba wukwashu hanyima yamutentashi. (Yil. 16:25-34) Munjila yoyimu, antu amakwawu akaanaña nsañu yamuBayibolu makonu anateli kubalumuka mumuchima nikulomba wukwashu neyi kwiluña dawu kunaholokeli mutentanshi. Hadaha antu amakwawu mwiluña detu dakushimwina anayihañi mudimu chakubula kwiluka nawa ananeñi. Amakwawu ananeñi muloña wayikatu hela hamuloña wakufwisha muntu iyakeña nankashi. Neyi yuma yamuchidiwu yinamwekani, antu adi muniku kukala anateli kwihula malwihu kutalisha hawumi, nsañu yabuliliwu kushaku maana hakusambila. Hadaha anateli nikutoñojoka nawu: ‘Yumanyi yinatela kwila hakwila akañamwini?’ Neyi tuyiwana, anateli kwikala nampwila yakutiyilila katachi muchihandilu chawu kunsañu yetu yakuchiñeja. Dichi, neyi tutwalekahu kushimwina nakashinshi, tunateli kuyikundeja antu hampinji yakakeñawu kwiteja nsañu yetu.—Isa. 61:1. w18.05 19-20 ¶10-12

Makonu, antu amavulu ayiputisha mesu kudi nzambi yanshakaminu yamakonu nawa eluka wanyi nawu adi muwuduñu wakudifukula kwakutwamba, wakufwila yuma yakumujimba nimapolitikisi. (2 Kor. 4:4) Twatela kumulondela Yesu kuhitila mukukwasha antu kulonda amwiluki nawa adifukuleña kudi Yehova, Nzambi wakusubuka. (Mat. 28:19, 20) Iwu mudimu wapela wanyi nawa mudi kukala kwakuvulu. Kumaluña amakwawu antu akalisha nawa amakwawu azuwa. Dichi wejima wetu twatela kudihula netu, ‘Kwila nizatisha kusubuka kwami kulonda nikwashi mudimu waWanta nehi?’ Twatiyaña kuwaha nankashi hakumona antu amavulu aneluki mpinji yitunashikimu nawa anapeleshiku yihandilu yawu kulonda azateña chikupu mudimu wakushimwina. (1 Kor. 9:19, 23) Amakwawu azatilaña mumaluña mwashakamañawu; amakwawu ayaña kudi kukaankila. Antu amavulu anakuzatisha chiwahi kusubuka kwawu kumukalakela Yehova!—Mas. 110:3. w18.04 11-12 ¶13-14