December

Chilwilu chimu chatutiyishaña kuwaha chekala naYesu chidi chakwila nawu weluka kukala kutwamonaña chineli twawanina wanyi. Yesu hadiñayi hamaseki, wadiña ‘nakuzañalela hamu nawantu azañalalaña’ nawa wadiña ‘nakudilila hamu nawantu adilaña.’ (Rom. 12:15) Chakutalilahu, atumbanji twindi 70 chafuntiliwu iku anazañalali muloña wakwila antu amavulu etejeli nsañu yayiwahi, Yesu niyena ‘wazañaleli nankashi.’ (Luka 10:17-21) Cheñi, chamweniyi antu amukeñeli Lazaru ananeñi muloña wakufwa kwindi, Yesu niyena “wadishishimwini nikudineña nankashi.” (Yow. 11:33) Chumanyi chamukwashili kwila mwenimu? Chatachi, Yesu wakeñeli antu. Watiyileña “kuwaha nawanyana kawantu.” (Yish. 8:31) Iku kukeña kwamukwashili kwiluka chatoñojokañawu antu. Kapostolu Yowanu walumbulwili nindi: “Welukili jadiña munyichima yawantu.”—Yow. 2:25. w19.03 20 ¶1-2

Satana wamukisilili Yoba yuma yindi yejima, wamujahilili añamba jindi nikutamisha ijina dindi. Walukukili chisaka chaYoba, wamujahilili anyanindi 10. Kuhiñahu wamukatishili Yoba namahuti akata mujimba wejima, kufuma kumadatilu kushika nikumutu. Ñoda Yoba waneñeli nawa wamulejeli nfumwindi nindi yamutuki Nzambi kulonda yadifwili kwindi. Yoba yomwenindi wakeñeleña nindi yafwi, ilaña watwalekelihu kuhemba kashinshi kindi. Dichi Satana wesekeli njila yikwawu yakumwesekelamu. Wazatishili amayala asatu adiña amabwambu jaYoba. Awa amayala amuhempwili Yoba hadi mafuku antesha, ilaña amukundejeli wanyi. Chatela amukundeji ilaña amwinkeli nyiloña. Ahosheli nawu Nzambi diyi wamuleteleleña kukala nawa hashili maana hakashinshi kindiku. Ahosheli cheñi nawu Yoba wadiña muntu watama dimuloña waletesheli amubabeshi.—Yoba 1:13-22; 2:7-11; 15:4, 5; 22:3-6; 25:4-6. w19.02 4 ¶7-8

Woma wukwawu wekala wawuwahi. Chakutalilahu, twatela kwikala nawoma wakubula kwila yuma yinateli kumuneñesha Yehova. Neyi aAdama naEva adiña nawoma wamuchidiwu kachi adikañili wanyi naYehova. Ilaña adikañili. Chadikañiliwu naNzambi, mesu awu atoneni nawa elukili nawu tunekali dehi akwanshidi. Asambwishili anyanawu nshidi nikufwa. Chineli elukili nawu anafumpi nshimbi jaNzambi, atiyili nsonyi muloña elukili nawu adiña nzekesi nawa adibutili. (Kutach. 3:7, 21) Twatela kwikala nawoma wakubula kumuneñesha Yehova, bayi tusweja kutiya woma wakufwaku. Yehova waloñesha njila yinateli kutukwasha kutambwila wumi wahaya nyaaka. Neyi tukoña nshidi nawa tubalumuka mumuchima, Yehova wukutwanakena. Wukutwanakena muloña twakuhwelela mwifutu danyiloña daMwanindi. Njila yimu yitwamwekeshelañamu chikuhwelelu, hikudihana kudi Nzambi nikupapatishewa.—1 Pet. 3:21. w19.03 5-6 ¶12-13

A Isarela ateleleli kusakilila muloña ayililili yuma yayivulu. Ayifumishili muwuduñu hampinji yaleteliyi Yehova Yipupu 10 muEjipitu. Kuhiñahu, Nzambi wayipulwishili kudi amashidika añovu amuEjipitu ajilumwiniyi haKaluñalwiji Kachinana. A Isarela azañaleli nawa embili kamina kakushinda kakumushimeka Yehova. Komana atwalekelihu kumusakilila? A Isarela chamweniwu kukala, avulameneni yuma yayiwahi yejima yayilililiyi Yehova. Dichi amwekesheli nawu adiña nakusakilila wanyi. (Mas. 106:7) Munjilanyi? “Chipompelu chejima chawanyana kaIsarela chayitobeleli aMosi naAroni,” munjila yikwawu adiña nakumutobela Yehova. (Kwid. 16:2, 8) Nzambi watiyili kutama muloña antu jindi asakilili wanyi. Dichi wahosheli nindi muza waIsarela wejima wakajilumukila muchinkalampata kufumishaku hohu aYoshuwa naKalebi.—Kuch. 14:22-24. w19.02 17 ¶12-13

Yesu hashili muchima hakudilemesha yomweni nakuloñesha yuma yayivulu yakwanakana kufwa kwindiku. Ilaña wayilejeli atumbanji twindi nindi atela kumwanakanaña kamu hachaaka kuzatisha yuma yantesha. (Yow. 13:15; 1 Kor. 11:23-25) Yesu wamwekesheli nindi wadiña wadizoza chaloñesheliyi chawija chalema munjila yapela. Twatela kwiluka netu kudizoza hichilwilu chimu chekala naMwanta wetu wamwiwulu. (Fwi. 2:5-8) Tunateli kwimbujola ñahi kudizoza kwaYesu? Tunateli kumwimbujola neyi tutwamijaku yuma yinakukeñawu akwetu. (Fwi. 2:3, 4) Toñojokenu cheñi yuma yamwekeni hefuku dakukumisha dakufwa kwaYesu. Yesu welukili nindi keña yafwi, kufwa kwayeña; hela chochu, wayakameneni apostolu indi ashinshika, akushala nachineñi. Wachishili wufuku wejima nakuyidizisha, kuyikolesha chikupu. (Yow. 14:25-31) Yesu wadiña nakutoñojokelaku nikwakamena yuma yakeñeleñawu antu amakwawu kubadika yomweni. Wamwekesheli chuma chachiwahi chitwatela kwila. w19.01 21 ¶5-6

Komana muchima wenu wetaña neyi munakukeña kwimika chikasa kulonda mwakulihu? Neyi muchima wenu wetaña, himudi nkawenuku. Walala wudi wakwila nawu wejima wetu twatiyaña woma neyi tunakukeña kwakulahu. Chidi hohu chiwahi kutiya woma, muloña chamwekeshaña nawu mwekala adizoza nawa mwamonaña akwenu nenu ayibadika. Yehova wakeña antu adizoza. (Mas. 138:6; Fwi. 2:3) Yehova wakeñaña cheñi nindi mumushimekeña nawa mukolesheña amanakwetu niahela hakupompa. (1 Tesa. 5:11) Wayikeña nawa wukuyikwashaña kwikala ahamuka. Shinshikenu chahosha Nsona. Bayibolu yashimuna nawu wejima wetu twaluwañeshaña munhoshelu yetu. (Yak. 3:2) Yehova, amanakwetu kushilahu tuhu niahela eluka nawu twaluwañeshaña. (Mas. 103:12-14) Twekala nawu muchisaka chimu nawa atukeña. (Maku 10:29, 30; Yow. 13:35) Eluka nawu mpinji yikwawu twaluwañeshaña hakwakula. w19.01 8 ¶3; 10-11 ¶10-11

Chumichi chapela wanyi mukanu kaayi kamakonu. Hela chochu, kwila mukañanya nehi. Yehova nakukeña nindi mwikali nachihandilu chachiwahi nawa chamuzañalu. Nawukwashu waNzambi, munateli kutwesha, bayi neyi himuchidi atwansi hohuku, ilaña muchihandilu chenu chejima. Chakutalilahu, shinshikenu chuma chitunateli kudizila kudi aIsarela ayileña nakulwa kulonda atambuli Ituña daChikaninu. A Isarela chashikiliwu kwakwihi Netuña daChikaninu, Nzambi hayilejelihu chakuzatisha yitwa yanjita hela chakuzuña njitaku. (Kuhit. 28:1, 2) Ilaña, wayilejeli nindi atela kwovwahila nshimbi jindi nikumukuhwelela. (Yosh. 1:7-9) Kwesekeja nayitoñojoka yawantu, iyi nshimbi yamwekeneña neyi yamukunkulwayi. Ilaña, yadiña nshimbi yayiwahi, muloña Yehova wayikwashili antu jindi kuyishinda aKenani hanjita yejima yazuñileñawu. (Yosh. 24:11-13) Hakwila nawu tumwovwahileña Nzambi, twatela kwikala nachikuhwelelu, chikuhwelelu chatukwashaña mpinji yejima kwikala nachihandilu chachiwahi. Hela chakwila mukuhita mpinji yeneni, ichi chalala chahimpaña wanyi. Chichidi kuzatika nimakonu neyi chichazatikileña kunyima. w18.12 25 ¶3-4

Amakwawu atuntukili muloña wantiyishishilu yayiha yansañu yekala muBayibolu. Amakwawu adibombeli nawakwakusekesha niakwankunyi netu adimbululaña yuma yitwakuhwelela. Chafuminimu, amakwawu anatachiki ‘kusenuka nakufuma’ kudi Yehova nimuchipompelu. (Heb. 3:12-14) Chadi kuwaha nankashi neyi atwalekelihu kwikala nachikuhwelelu nikumushindamena Yesu neyi cheliliyi kapostolu Petulu! Amakwawu afumineña muchalala chovu-chovu, hadaha chakadi nikwiluka yuma yamwekeneña. Muntu wafumaña muchalala chovu-chovu wudi neyi watu wunakukumpuka chovu-chovu kufuma kuchikumu. Bayibolu yashimuna iku kuhimpika nawu “kuluwankana.” (Heb. 2:1) Kwambukaku namuntu wafumaña muchalala iku neluki, muntu wunaluwankani welilañamu wanyi. Hela chochu, muntu wamuchidiwu walekaña kusha maana hawubwambu windi naYehova nawa mukuhita kwampinji nateli kuwujimbesha. w18.11 9 ¶5-6

Komana mwakeñaña kuyidizisha kulonda mwiluki chakuzata nyidimu yaYehova? Neyi mwiteja kuyidizisha, munashikihu kuya kuShikola Yawakwakushimwina Nsañu Yayiwahi yaWanta. Iyi shikola yadizishaña amayala nawambanda adi mumudimu wampinji yejima kulonda adikiteña chiwahi nyidimu yaWanta. Ejima asonekeshaña kuya kuniyi shikola, atela kwikala namuchima wakwiteja mudimu wejima wukayinkawu hanyima yakumanisha shikola. Komana kwila mudihana kulonda muzati nyidimu yayivulu nehi? (1 Kor. 9:23) Etu antu jaYehova twatela kwikala nachisambu, luwi, kukeña nikudakamena wumu namukwawu. Neyi twila mwenimu, tukwikala namuzañalu nikuwunda. (Ñal. 5:22, 23) Hichikweti muloña nachidi chihandilu chenuku, munateli kwikala namuzañalu kuhitila mukwimbujola chisambu chaYehova nikwikala akwakukalakala hamu nindi alemeshayi.—Yish. 3:9, 10. w18.08 27 ¶16-18

Amakwawu anateli kwihula nawu, ‘Kudihu muloña watela kumuletesha mukwaKristu kuseñana nawa yasumbula cheñi?’ Yesu wahosheli chamonañayi kudiseña nindi: “Muntu wejima wukuseña ñodindi nakusumbula wacheñi, neli dehi wujila nawa hadi washinshika kudi ñodindi watachiku, nawa neyi mumbanda yaseña nfumwindi nakusumbuka neyala wacheñi, neli wujila.” (Maku 10:11, 12; Luka 16:18) Mwamweni, Yesu walemesheli wulu nawa wakeñaña nindi antu ejima alemesheña wulu. Neyi iyala yaseña ñodindi washinshika (hela mumbanda yaseña nfumwindi washinshika) nakusumbula hela kusumbuka namuntu wacheñi wadiña hiwuvumbi. Dimu, muloña kudiseña hikwamanishaña wuluku. Nzambi wuchidi kuyimona nindi achidi “mujimba wumu.” Hela chochu, Yesu wahosheli nindi iyala wukuseña ñodindi washinshika chakadi muloña wukuletesha ñodindi kwila wuvumbi. Munjilanyi? Kunyima, mumbanda anaseñiwu wafwilileña kusumbuka cheñi kulonda amwakameneña muyuma yakeñekaña kumujimba. Neyi nasumbuki dikwila nawu neli wuvumbi. w18.12 11 ¶8-9

Habakuki chahanjekeliyi naYehova, muchima windi wawundili. Wafuukwilihu kumuchiñilila Yehova kulonda yamanishi kukala. Tuneluki chumichi muloña watwalekelihu kuhosha nindi wukutwalekahu “nakuchiñilila ifuku dayihuñu.” (Hab. 3:16) Habakuki wafuukwilihu kwila chumanyi? Chatachi, bayi tuleka kumulomba Yehova hela chakwila tudi mukwesekaku. Chamuchiyedi, twatela kutiyililaña kuyuma yatulejañayi Yehova Mwizu dindi nimukuloñesha kwindi. Chamuchisatu, twatela kumuchiñilila Yehova nikumukuhwelela chikupu netu wakamanisha yihuñu yetu mumpinji yatoñolayi. Neyi tutwalekahu kuhosha naYehova nikumutiyilila nakuhembelela neyi cheliliyi Habakuki, ninetu nyichima yetu yakawunda, chuma chakatukwasha kutwalekahu kuumika. Kuchiñeja kwetu kwakatukwasha kudiwunjika, chuma chakatukwasha kwikala namuzañalu hela chakwila tunakumona kukala kwakuvulu. Kuchiñeja kwatukwashaña kukuhwelela netu Tata yetu wamwiwulu wukamanisha kukala.—Rom. 12:12. w18.11 15-16 ¶11-12

Nzambi wamonaña ñahi muntu wahukeshaña akwawu? Yesu wahosheli nindi: “Muntu wejima wukuhukesha wumu wahadi awa akehelamu akweti chikuhwelelu, chikuwaha neyi owu muntu akumukasila ilola dakuhalilaku munshiñu danyeñumunañayi chimbulu nakumunatila mukaluñalwiji.” (Maku 9:42) Awa mazu amwekeshaña nawu kuhukesha muntu kwatama! Chineli Yesu wamwekesheli yilwilu yekala naTata yindi, twatela kwiluka netu Yehova wahela muntu wabulaña kwakama nindi nakuhukesha muntu wumu wahadi akwakumulonda Yesu. (Yow. 14:9) Komana twamonaña yuma neyi chayimonañayi Yehova niYesu? Tunakutoñojoka neyi chatoñojokañawu wena? Yilwilu yenu yamwekeshañadi? Chakutalilahu, hadaha twavwalaña yakuvwala yahukeshaña antu amakwawu muchipompelu hela yasañumuna antu kutachika kutoñojoka hawuvumbi. Komana kukeña kutwakeña akwetu akwakwitiya kukutuletesha kuleka kuvwala yakuvwala yahukeshaña akwetu? w18.11 25 ¶9-10

Kashinshi kalemenadi kudi wejima wetu? Mwatela kwikala nakashinshi muloña Satana wamwinkaña Yehova nyiloña nawa ninenu wayinkaña nyiloña. Iwu kañelu wadikañili watamishili ijina daYehova nakumutwambila nindi Nzambi watama, wadikeña yomweni nawa nindi hiNyuuli wabula kushinshika. Chawushona, aAdama naEva ayili kukabadi kaSatana, adikañili naYehova. (Kutach. 3:1-6) Adiña nakukooleka kwakukolesha wubwambu wawu naYehova muEdeni. Ilaña chelili Satana yayiluwañeshi, kukeña kwawu kwaluwankeni nawa kwamanini. Antu atachikili kudihula nawu: Kwakekalahu muntu wukatwalekahu kwikala washinshika kudi Yehova Nzambi muloña wakumukeña? Hela nawu, komana antu anateli kwikala ashinshika? Ilu lwihu lwenjili hansañu yaYoba. (Yoba 1:8-11) Wadiña wawanina wanyi neyi chitwekala ninetu. Waluwañesheleña. Hela chochu, Yehova wamukeñeli Yoba muloña wakashinshi kindi. w19.02 3-4 ¶6-7

Hakwila nawu Yesu yalumbululi kulema kwachalala chaWanta waNzambi kudi antu anachiwani, wayilejeli hadi mukwakulanda nakulandulula wadiña nakukeñakeña mperola yayiwahi. Wawanini yimu yadiña yalema chakwila “hohenohu wayili nakulandisha” yuma yejima yadiñayi nayu kulonda yayilandi. (Mat. 13:45, 46) Munjila yoyimu, chalala chitwadizili, chalala chaWanta waNzambi hela chitwadizili Mwizu daNzambi chalema nankashi chakwila twashikeneni kuleka yuma yikwawu yakeñekeleña hakuchilanda. Neyi tulemesha chalala, kwila ‘tuchilandisha nehi.’ (Yish. 23:23) Hela chochu, chawushona antu jaNzambi amakwawu hiyanamoni kulema kwachalala chiyalandiliwuku nawa anachilandishi. Bayi chuma chamuchidiwu chitumwekenaku! Hakwila nawu tumwekeshi netu twalemesha chalala nawa netu tukachilandisha wanyi, twatela kulondelaña chahosha Bayibolu nawu: ‘Twalekenuhu kwenda muchalala.’ (3 Yow. 2-4) Kwenda muchalala, kwatalisha mukusambila kutwamijaku Wanta muchihandilu chetu chejima nikuzatisha yuma yitunadizi. w18.11 9 ¶3

A Isarela ayikaanishili kulukuka Yeriku ilaña ayilejeli nawu ayeña nakunyeñumuka musumba hefuku kamu hadi mafuku 6 nawa ayilejeli kunyeñumuka kapampa 7 hefuku damu 7. Mashidika amakwawu atela atoñojokeli nawu, ‘Hikumanisha hohu mpinji niñovu!’ Ilaña Nlomboli wawaIsarela wabulaña kumwekana, Yehova, welukili chuma chadiña nakwilayi. Njila yazatishiliyi yakolesheli chikuhwelelu chawaIsarela nawa yayikwashili kubula kuzuña namashidika añovu akuYeriku. (Yosh. 6:2-5) Yumanyi yitunateli kudizila kuniyi nsañu? Mpinji yikwawu tunateli kutiyishisha wanyi chuma chacheni chinaleteshi ahimpi yuma mukuloñesha. Chakutalilahu, hadaha hakusambila twajinokeleña kuzatisha yozelu yidi neyi matabuleti nimafoni hakudiza kwankawetu, mumudimu wakushimwina nihakupompa. Ichi tuneluki netu iyi yozelu yayiwahi kuzatisha. Neyi tumona yuma yayiwahi yafumaña muniku kuhimpika hela chakwila twadiña nakujinoka, chikuhwelelu chetu chakolaña nawa twekalaña anuñañana. w18.10 23 ¶8-9

Yuma yakuhweleleliwu hadi Mesiya yidi neyi yuma yatiyiliwu atumbanji twaYesu, yaletesheli antu amuÑaliliya akeñi nawu Yesu yekali mwanta wawu. Atoñojokeleña nawu Yesu watela kwikala nlomboli wamuwahi, muloña wadiña ntañishi wamuwahi, wookileña antu akata nawa wadishiileña antu adiña nanzala. Yesu chelili yadiishi antu akushika ku 5,000, washikeneni kwiluka yitoñojoka yadiña mudi antu. “Yesu chelukiliyi nindi akeñeleña kwinza nakumukwata kulonda amwilishi kwikala mwanta, wafuminiku kwenoku nakuya cheñi kumpidi kwakankawindi.” (Yow. 6:10-15) Ifuku dalondelelihu kwishinadi daKaluñalwiji kaÑaliliya, iyena dadiña nawantu amakwawu dakeheli. Dichi Yesu wayilumbulwilili antu mudimu windi. Wenjili nakuleta maheta akuspiritu bayi maheta akumujimba kunyuzaku. Wayilejeli nindi: “Bayi muzatila yakuda yakisikañaku, ilaña zatilenu yakuda yashakamaña haya nyaaka.”—Yow. 6:25-27. w18.06 4 ¶4-5

Yesu welukili chatiyileñawu antu adiña neyi Iteti dachikeka hela wanda wudi nakufwinda wishi wunakukeña kujima. Chafuminimu, wadiña nakuyitoñojokelaku, kuyitiyila luwi nikudiwunjika. (Maku 10:14) Hela chochu, hitukweti maana niwuswa wakutañisha neyi Yesuku. Ilaña tunateli kutoñojokelaku antu amwiluña detu dakushimwina. Mukutoñojokelaku antu munabombeli chitwahanjekaña nawu, mpinji yitwahanjekaña nawu nikuleha kwampinji yitwahanjekaña nawu. Makonu antu amavulu ‘ayikabishaña nikuyidiwula’ kudi akwakuselujola abula luwi, akwamapolitiki nianlomboli amunsakililu. (Mat. 9:36) Hamuloña wachumichi, antu amavulu hiyakweti chikuhwelelu nikuchiñejaku. Dichi mazu ninhoshelu yetu yatela kwikala yaluwi niwushona. Bayi neyi antu amavulu etejaña nsañu yetu muloña wakwiluka Bayibolu nichitwayilumbululañaku, ilaña muloña wakuyikeña nikuyitoñojokelaku. w18.09 31-32 ¶13-14

Twamwekeshaña ñahi netu twakeñaña kudiza hadi Nzambi? Twelaña mwenimu neyi tutwalekahu kuda yakuda yakuspiritu, kuyilemesha chikupu nikutwamijaku kudifukula kwetu kutwadifukulaña kudi Nzambi wamuzañalu. Neyi twilaña yumiyi, muzañalu wetu wukuswejelaku. Tukukolesha chikuhwelelu chetu muyikaninu yaNzambi. (Tit. 2:13) Neyi tunakukeña kwikala namuzañalu wahaya nyaaka, twatela kwikala nawubwambu wakola naYehova. Kapostolu Pawulu amoneneni kusoneka nawu: “Zañalelenuña mudi Mwanta [Yehova] mpinji yejima. Nukuhosha cheñi nami, Zañalalenuña.” (Fwi. 4:4) Hakwila nawu twikala nawubwambu wawuwahi naNzambi, twatela kukeñakeña maana indi. (Yish. 3:13, 18) Neyi tunakukeña kwikala namuzañalu wahaya nyaaka, twatela kutañaña izu daNzambi nikuzatisha yuma yitunakudiza. Hakumwekesha kulema kwakuzatisha yuma yitunakudiza, Yesu washimwini nindi: “Neyi [mwiluka] yumiyi, mudi namuzañalu neyi muyikoña.” (Yow. 13:17; Yak. 1:25) Ichi dichuma chinateli kuyikwasha kwikala nawubwambu wakola naNzambi nikwikala namuzañalu wahaya nyaaka. w18.09 18 ¶4-6

Epafwarasa wayilukili chiwahi amanakwetu nawa wayakameneneña nankashi. Hela chakwila ‘amukasilili hamu naPawulu mukaleya’ halekeli kuyakamena akwawu kuspirituku. (Fwil. 23) Wakoñelihu chuma chimu. Komana chumichi chinakumwekesha wanyi nawu wadiña nakwakamena akwawu? Neyi tuyilombelañaku akwetu ambuña aYehova anateli kukola, sweje-e neyi tuyanukaña nikuyitena hamajina mukulomba. (2 Kor. 1:11; Yak. 5:16) Anukenuñahu antu imunateli kutena majinawu mukulomba. Kufwana Epafwarasa, amanakwetu niahela amavulu alombelañaku antu amakwawu muyipompelu yawu, yisaka yikweti nyidimu yayivulu niantu anakumona kukala kwasweja hela anakuhita mukweseka kweneni. Kubombelahu, twatela cheñi kwanuka antu afwisha antaña jawu, antu anapuluki muwubanji wadimwekenaña, anapuluki munjita niejima anakuhita mukukala kwamali. Mwamweni, tukweti amanakwetu niahela amavulu anakukeñeka kuyilombelaku. w18.09 5-6 ¶12-13

Pawulu hatalishili hohu mukuhana yumaku, ilaña watalishili cheñi mukuyikolesha, kuyilombola nikuyikwasha antu anakaankili. (Yil. 20:31-35) Mazu ahosheliyi niyuma yeliliyi kapostolu Pawulu, amwekeshaña nawu twatela kuzatisha mpinji yetu, ñovu kukwasha antu, kuyitiyilila nikuyikeña. Akwakusandujola hachihandilu chawantu niwena anawani nawu kuhana kwaletaña muzañalu. Chibaaba chimu chashimwini nawu, “antu ashimwini muzañalu watiyiliwu hanyima yakukwasha akwawu.” Akwakusandujola ahoshaña nawu kukwasha antu “dichuma chalema muchihandilu chawantu” muloña kuhana “kwakwashaña antu munakaankiliwu.” Antu adiza ahoshaña nawu antu adihanaña kuzataku nyidimu kulonda ekali namuzañalu muchihandilu chawu. Chumichi chatuhayamishaña wanyi etu tweluka netu Bayibolu himukanda watwinkawu kudi Nleñi yetu, Yehova.—2 Tim. 3:16, 17. w18.08 22 ¶17-18

Kuhitila muwuprofwetu windi kutalisha hadi Mwanta wetu Yesu Kristu, Isaya watukolesheli nikutukwasha kuchiñeja. Isaya washimwineñahu dehi nindi Yesu “hakasompesha chakumona kwanamesu hohuku; hakahoshela chakutiya kwanamatu hohuku” ilaña “wakasompesha atuzweñi mwaloña.” (Isa. 11:3, 4) Chumichi chinatukoleshi chikupu muloña tunakushakama mukaayi munenzali chaambu nawa mudi antu asompaña mwaheña. Wejima wetu tunakuhembelela nsompeshi waloña wakabula kusompesha muntu kwesekeja nachinakumwekanayi. Ifuku nifuku twasompeshaña akwetu. Ilaña, chineli hitwawaninaku, hitunateli kusompesha antu mwaloña neyi chatela kusompeshayi Yesuku. Twasompeshaña kwesekeja nachinakumwekanayi muntu. Hela chochu, hampinji yadiñayi Yesu heseki, watulejeli kuleka kusompesha “kwesekeja nachinakumwekanayi muntu,” ilaña kusompesha “mwaloña.” Yesu nakukeña nindi twikali neyi yena kulonda tubuleña kusompesha akwetu kwesekeja nachinakumwekanawu. w18.08 8 ¶1-2

Hela chochu, hitwamutiyaña Nzambi nakuhosha nanetu mwiwuluku. Ilaña watwinka Izu dindi, Bayibolu, mwatwinkelañayi nshimbi. Kubombelahu, spiritu yaYehova yakwashaña “ñamba washinshika” kutwalekahu kwinka ambuña indi yakuda. (Luka 12:42) Tukweti nyikanda yayivulu yakupulinta niyahaintaneti kushilahu mavidiyo, ninyikanda yakukwata mumazu yinateli kutukwasha kukolesha chikuhwelelu chetu. Mazu aNzambi asonekawu muBayibolu, anatukwashi kumukuhwelela chikupu netu Yehova wukweti ñovu hayuma yejima nawa wakawahisha yuma yejima yaletayi Satana nikaayi kindi katama hadi etu. Dichi tutiyilileña chikupu kwizu daYehova. Neyi twila mwenimu, tukutwesha kuumika kukala kwejima kutunakumona chayinu mpinji nikutukamona kumbidi. Bayibolu yatwanukishaña nawu: “Enu munakukeñeka kuumika, kulonda neyi munamanishi dehi kwila nkeñelu yaNzambi, mutweshi kutambwila yuma yakaniniyi.”—Heb. 10:36. w19.03 13 ¶17-18

Chineli Mosi wayilombweli aIsarela yaaka yayivulu, Yoshuwa watela wadakameneni neyi chakwila antu jaNzambi akumwiteja kwikala nlomboli yawu. (Kuhit. 34:8, 10-12) Mukanda wumu wahosha haBayibolu, washimuna hadi Yoshuwa 1:1, 2 nawu: “Kufuma tuhu kunyima kushika nimakonu, mpinji yakala nawa yekalañawu antu muwubanji himpinji yakuhimpa nlomboli mwituña.” Kudi chuma chamuleñeleli Yoshuwa yatiyi woma, ilaña chimwahitili mafuku antesha, wakoñelihu chuma chimu. (Yosh. 1:9-11) Walekeli wanyi kumukuhwelela Nzambi. Neyi chashimuna Bayibolu, Yehova wamulombweli Yoshuwa niantu Jindi, aIsarela kuzatisha kañelu. Chidi hohu chiwahi kutoñojoka netu iwu kañelu wadiña Izu, Mwana kaNzambi wawedi. (Kwid. 23:20-23; Yow. 1:1) Yehova wayikwashili aIsarela kumwiteja Yoshuwa wamuswanini Mosi kwikala nlomboli yawu. w18.10 22-23 ¶1-4

Yehova welukaña antu ejima amuzatilaña mukudikeñela nawa wasonekaña majinawu “[mumukanda] wakwanukaña nachu.” Neyi tunakukeña netu majina etu ayisoneki “[mumukanda] wakwanukaña nachu” waYehova, twatela kwilahu chuma chimu. Malaki washimwini nindi twatela ‘kumutiya Yehova woma nikutoñojoka hejina dindi.’ Neyi tutachika kudifukula kudi muntu wacheñi hela kuchuma chacheñi, ijina detu akudifumisha mumukanda waYehova wawumi wachifwikija. (Kwid. 32:33; Mas. 69:28) Kudihana kwetu kudi Yehova mwabombela yuma yayivulu kubadika hohu kumukana nawu nakelaña nkeñelu yindi nikupapatishewa mumenji. Iyi yuma yakapinji kantesha hohu nawa yahitaña nakwikala yakunyima. Kwikala kukabadi kaYehova nakwikala antu jindi kwakeñekaña kutwalekahu kumwovwahila yinu mpinji nikumbidi, chakala hohu tuchidi kuhanda.—1 Pet. 4:1, 2. w18.07 23-24 ¶7-9

Chumichi hichadinjilaña chacheniku. Twatela ‘kuchifwila’ hela kuzata nañovu. Kupaminaku kwabombelamu kusweja kwiluka nikashinshi. Dichuma chacheni chatukonkomwenañawu kutwalekahu kutaña Bayibolu mafuku ejima. (Mas. 1:1-3) Komana dichimwafwilaña? Neyi mutañaña Bayibolu mafuku ejima chikuyikwasha kwikala nakashinshi kakwiluka nshimbi jaYehova, yishina nikwiluka chikupu Izu daNzambi. Lushimbi lwasweja kulema hadi akwaKristu hilushimbi lwakukeña. Yesu walejeli atumbanji twindi nindi: “Neyi mukeñañana, dihu hakuyilukilawu kudi antu ejima nawu mudi atumbanji twami.” (Yow. 13:35) ManakwaYesu wakuwanamu Yakoba wateneni kukeña nindi “lushimbi lwawanta.” (Yak. 2:8) Pawulu wahosheli nindi: “Kukeña dikwashikijaña nshimbi.” (Rom. 13:10) Hitunateli kuhayama nanichi chakonkomweneniwu hakukeñaku, muloña Bayibolu yatulejaña nawu “Nzambi hikukeña.”—1 Yow. 4:8. w18.06 19 ¶14-15

Hela chakwila aIsarela amuvulokeli Yehova, ilaña Mosi diyi wahilili. Kubula kudihemba kwamuletesheli yahoshi chatama nakubula kutoñojoka kukala kwadi kufumamu. Mosi wetejeli yilwilu yawakwawu kumukañesha kutwalekahu kushinshika kudi Yehova. Mosi wamanishili chiwahi kukala kwatachi. (Kwid. 7:6) Kubombelahu, hanyima yakuyilombola aIsarela akwakudikaña hadi yaaka yayivulu, wazeyeli nawa waneñeli. Komana Mosi wadiña nakutoñojoka nankashi hachatiyileñayi chatela yatoñojokeña hakumulemesha Yehova? Neyi kaprofwetu washinshika wudi neyi Mosi yaluwankana nawa yadimbuka, dikwila nawu ninetu chinateli kutumwekena. Kufwana Mosi, ninetu tudi kwakwihi nakwiñila mwituña dadiha datukanayi Yehova dadifwanaku nadaKenani. (2 Pet. 3:13) Kwosi wunakukeña kubula kwiñila mwituña dadihaku. Hela chochu, hakwila nawu tukeñilimu, twatela kutwalekahu kutala mesu etu kudi Yehova, mpinji yejima tufwileña kwila nkeñelu yindi.—1 Yow. 2:17. w18.07 15 ¶14-16

Satana hakanjikijaña antu kwila yuma yinakubula kukeñawuku. (Yak. 1:14) Antu amavulu elaña nkeñelu yaSatana chakubula kwiluka. Ilaña neyi anadizi dehi chalala, afuukulañahu awenawu muntu iyatela kukalakelawu. (Yil. 3:17; 17:30) Neyi tunafuukulihu kwila nkeñelu yaNzambi, kwosi chuma chinateli kwilayi Satana chikuletesha tufumpi kashinshi ketuku. (Yoba 2:3; 27:5) Satana niandemoni ekala namwakukumina. Chakutalilahu, hosi hashimunawu muNsona nawu anateli kwiluka yitoñojoka yamuntu hela yuma yidi mumuchima wamuntuku. Yehova niYesu hohu diwu ekala naniwu wuswa. (1 Sam. 16:7; Maku 2:8) Neyi tuzata nañovu kuhosha nikwila yuma kwesekeja nankeñelu yaNzambi, twatela kukuhwelela chikupu netu Yehova hakwiteja Diyabolu kutukatisha haya nyaakaku. (Mas. 34:7) Twatela kwiluka chilumbu chetu, ilaña hitwatela kumuchinaku. Nawukwashu waYehova, tunateli kumushinda Satana hela chakwila hitwawaninaku. Neyi tudikaña nindi, niyena wukututemuka.—Yak. 4:7; 1 Pet. 5:9. w18.05 26 ¶15-17

Fwikijenu munakukeña kuya nakwila yuma yalema kutawuni yidi kwakulehi. Hakwila muyi kunidi iluña mwatela kuzatisha basi. Chimwashika hasitesheni, mukuwana mabasi amavulu. Chachiwahi kwilukila chadimu kumunakuya, muloña chikuyikwasha kukandama basi yinakuya kunodu iluña. Neyi mukandama basi yinakuya kwacheñi, yikuyitwala kwacheñi. Atwansi niwena adi neyi antu anakukandama basi. Atumpululu adi halwendu lwalulehi, bayi lwakwenda nabasiku ilaña lwendu lwamuchihandilu chawu. Mpinji yikwawu anateli kuluwankana muloña wayuma yikumonañawu niyuma yikufuukulañawu muchihandilu. Enu atwansi, munateli kudipeleshela yuma neyi mwilukila chadimu yuma yimukela muchihandilu. Komana mukusha maana muchihandilu chenu hayuma yikumuzañaleshaña Yehova? Dikwila nawu kumutwamijaku Yehova muyuma yejima muchihandilu, yidi neyi kutaña shikola, kwiñila mudimu, kukwasha chisaka niyuma yikwawu. Nawa mwabombela kuzataku nyidimu yakuspiritu. Atwansi neyi asha maana hakumuzatila Yehova, nateli kuyikiswila muyuma yejima yikwilañawu muchihandilu chawu. w18.04 25 ¶1-3

Yefwata washikijili mwakaniniyi nawa wamutwalili mwanindi wamumbanda wabulahu dehi kubulakana neyala kuShilo kulonda yakakalakeleña hatabanaka mukuhanda kwindi kwejima. (Ansomp. 11:30-35) Hela chakwila chamukalilili Yefwata, ilaña chaswejeli kumukalila nankashi mwanindi wamumbanda, wadihanini kulonda yashikiji mwakaniniyi tata yindi. (Ansomp. 11:36, 37) Dichi wadi kusumbuka wanyi, kuvwala anyana nikukiña ijina dachisaka niwuswana. Wakeñekeleña kumukundeja nikumukolesha chikupu. Bayibolu yashimunaña nawu: “Chelili chijila muIsarela, anyana awambanda aIsarela hiyakuya hamwaka hamwaka nakumudila mwana kaYefwata wakuGileyadi mafuku awana hamwaka.” (Ansomp. 11:39, 40) Komana kwila tuyihameka nikuyikolesha akwaKristu ajiki anakuzatisha wujiki wawu muloña “[wakwakamena] yuma yaMwanta” nehi?—1 Kor. 7:32-35. w18.04 17 ¶10-11

Añelu amavulu adikañili nakudibomba naSatana. Henohu Dibaji kanda, Satana wadimbili amakwawu hakachi kawu kwila wuvumbi nawanyana kawantu awambanda. Bayibolu yamwekesha iyi nsañu kuhitila mukumumwekesha chanzañombi muchifwikija nakukoka chibalu chamuchisatu chatutumbwa twamwiwulu hampinji yaholokeleñayi. (Kutach. 6:1-4; Chim. 12:3, 4) Chelili ana añelu ambuuki muchisaka chaNzambi, aditwalili aweni kudi Satana kulonda yayiyuuleña. Hela chochu, bayi neyi awa akwakudikaña akojejaña hohu kukalaku. Satana washaku wanta wadifwana naWanta waNzambi nawa wadilisha yomweni kwikala mwanta. Muchiyuulu chindi chabulaña kumwekana, Satana wayilisha andemoni kwikala mujinfulumendi, wayinka wuswa nikuyilisha kwikala anyuuli amukaayi. (Efwe. 6:12) Satana wazatishaña spiritu yindi kulonda yilomboleña nfulumendi yawantu yejima. w18.05 23 ¶5-6

Mpinji yikwawu Nzambi wamwekeshaña nindi watukeña chatufumbañayi neyi chafumbaña tata yawantu anyanindi. Davidi wetejeli mwamufumbiliwu. Watoñojokeli chikupu hayitoñojoka yaNzambi, kuzatisha yitoñojoka yaNzambi nikwiteja yitoñojoka yaNzambi kumuwumba. Neyi mwikala nachikuhwelelu, ninenu mukumukeña Nzambi nawa mukumwovwahilaña. Cheñi, mukwikala mukwaKristu wapama kuspiritu. Muhela Christin wahosheli nindi: “Neyi nisandujola nikutoñojoka chikupu hansañu yinnatañi, natiyaña neyi Yehova wansonekeleli ami iyi nsañu.” Neyi mupama kuspiritu mukumonaña kaayi niyuma yikakimwekena kumbidi neyi chamonañayi Nzambi. Muloñadi Nzambi chayinkelañayi awa maana nikashinshi? Wakeñaña nindi mutondihu chiwahi yuma yimukutwamijañaku muchihandilu chenu, kufuukulahu chiwahi nikuchiñeja yuma yakumbidi nachikuhwelelu.—Isa. 26:3. w18.12 26 ¶9-10