January

Timotewu welukili nindi yuma yakuhweleleliyi dichalala muloña wakuswina kwakwihi naYehova. Ninenu mwatela kutoñojokaña chikupu hayuma yimunakudiza muBayibolu kutalisha hadi Yehova kulonda mumoni neyi dichalala. Chatachi, mwatela kukuhwelela ntahi yuma yisatu yashindamena hachalala. Chuma chatachi, mwatela kukuhwelela chikupu nenu Yehova Nzambi diyi Nleñi wayuma yejima. (Kwid. 3:14, 15; Heb. 3:4; Chim. 4:11) Chamuchiyedi mwatela kukuhwelela nenu Bayibolu himazu aNzambi onenewa asonekelawu antu. (2 Tim. 3:16, 17) Nawa chamuchisatu, mwatela kwiluka nenu Yehova wukweti kuloñesha mudi antu anakudifukula kudi yena kuhitila muwunlomboli waKristu nawa nenu awa antu hiyaYinsahu jaYehova. (Isa. 43:10-12; Yow. 14:6; Yilw. 15:14) Hichinakukeñeka kwiluka yuma yejima yekala muBayiboluku. Ilaña mwatela kuzatisha “[wuswa] wenu wakutoñojoka” kulonda chiyikwashi kukuhwelela chikupu nenu yuma yimunakudiza dichalala.—Rom. 12:1. w20.07 10 ¶8-9

Iwu wuprofwetu wayilumbulula awa atuboola nawu kumesu awu kudi neyi kumesu awantu ‘niyuma yamwekeneña neyi yibaaba yawuru’ hanyitu yawu. (Chim. 9:7) Akabishaña “hohu antu [ayilumbu jaNzambi] abula chilamiku chaNzambi hamahama awu” hadi tukweji tutanu, dikwila nawu mafuku akuhanda kwatu. (Chim. 9:4) Ichi chinjikijilu chakwilukilaku nachu ambuña aYehova awayishewa. Ashimwinaña nakuhamuka wunsompeshi waNzambi wakaletayi hadi kanu kaayi katama nikukojeja akahakwilañaku kutiya woma chikupu. Komana hadi chaambu hakachi ‘kawatuboola’ ashimunawu haYoweli 2:7-9 niatuboola ashimunawu mumukanda waChimwekeshu? Eña. MuBayibolu, mpinji yikwawu chuma chimu chinateli kutalisha kuchuma chambukaku neyi achizatisha munjila yacheñi. Chakutalilahu, haChimwekeshu 5:5, Yesu amutena nawu “Mutupa wakumuchidi waYuda,” ilaña ha 1 Petulu 5:8, Diyabolu amulumbulula nawu “mutupa wunakubuluma.” w20.04 3 ¶8; 5 ¶10

Haga ñamba yaSarayi welili mwawusupi chelili Sarayi yamuhani kudi Abarama nindi ekali ñodindi. Haga wemitili nawa chemitiliyi watachikili kudiwula nkaka yindi Sarayi wadiña nshinta. Yuma yatamini chikupu chakwila Sarayi wamuhañili Haga. (Kutach. 16:4-6) Chineli twawanina wanyi, tunateli kutoñojoka netu Haga wadiña watama nawa netu chamukabishiliwu chateleleli. Ilaña Yehova dichatoñojokeliyi wanyi. Wamutemesheleli kañelu kindi. Kañelu chamuwaniniyi Haga, wamulejeli kuhimpa yilwilu yindi nawa wamukiswilili. Haga welukili nindi Yehova wadiña nakumumona nawa welukili kukala kwindi kwejima. Watiyili kuwaha chakwila wamuteneni nindi: “Nzambi wamonaña, . . . yena wanmonaña.” (Kutach. 16:7-13) Yumanyi yamweniyi Yehova mudi Haga? Welukili chadiña chihandilu chindi kunyima niyuma yejima yahitileñamu. Yehova welukili nindi Haga waluwañesheli hakumudiwula Sarayi. Ilaña welukili chadiña chihandilu chaHaga, dichi wamutiyilili wushona. w20.04 16 ¶8-9

Kapostolu Pawulu wahosheli nindi akwaKristu alala ejima adi mulufuchi. (Heb. 12:1) Nawa wejima wetu, chili tudi atwansi hela akulumpi, twakola hela twazeya, twatela kuumika kushika nikunsa hakwila nawu tukatambwili wuloku watukanayi Yehova. (Mat. 24:13) Pawulu wadiña wakasunuka kuhosha muloña ‘watemukili lufuchi ndo-o nikumufunda.’ (2 Tim. 4:7, 8) Hanu dinu, lufuchi lwamuchidinyi lwateneneñayi Pawulu? Mpinji yikwawu Pawulu wazatishileña yuma yadiña muyisela yahemeneñawu muGreece yakushankulu kulonda yadizishi nachu antu nsañu yalema. (1 Kor. 9:25-27; 2 Tim. 2:5) Kakavulu wesekejeleña chihandilu chamukwaKristu nakutemuka lufuchi. (1 Kor. 9:24; Ñal. 2:2; Fwi. 2:16) Muntu watachikaña kutemuka ilu “lufuchi” neyi yadihana kudi Yehova nawa yapapatishewa. (1 Pet. 3:21) Washikaña kumufunda neyi Yehova yamwinka wuloku wakutambwila wumi wahaya nyaaka.—Mat. 25:31-34, 46; 2 Tim. 4:8. w20.04 26 ¶1-3

“Mwanta washinshika nawa wakayikolesha enu nikuyikiña kudi muntu watama.” (2 Tes. 3:3) Yehova watukiñaña ñahi? Yehova watwinka yitwa yanjita yejima yinateli kutukiña neyi chakwila Satana natulukuki. (Efwe. 6:13-17) Iyi yitwa yanjita yakuspiritu yakola nawa yatukwashaña. Ilaña yinateli kutukiña neyi chakwila tuvwala yitwa yanjita yejima nikuyizatisha. Chakutalilahu, mushipi wachalala wemenañaku chalala chekala mwiIzu daNzambi, Bayibolu. Muloñadi chitwatela kuvwalila iwu mushipi? Muloña Satana “diyi tata yakutwamba.” (Yow. 8:44) Natwambi hadi yaaka yayivulu nawa naluwañeshi “antu ashakama hamaseki hejima.” (Chim. 12:9) Ilaña chalala chekala muBayibolu chatukiñaña kulonda yabuli kutudimba. Twavwalaña ñahi iwu mushipi wachifwikija? Twawuvwalaña kuhitila mukudiza chalala chahosha hadi Yehova, kudifukula kudi yena “muspiritu nimuwalala,” nikwikala ashinshika muyuma yejima.—Yow. 4:24; Efwe. 4:25; Heb. 13:18. w21.03 26-27 ¶3-5

Chuma chaletesheli idi ituña kwikala dalubanji himuloña wakwila dimwadiña kudifukula kwalala. Kufuma tuhu haPentekosta 33 C.E., idi ‘ituña’ dekala dachifwikija, muloña antu jaYehova anatandi mumatuña amboka-mboka mwahita iseki. Hela chochu, idi ‘ituña dalubanji’ makonu dinakwimenaku mudimu waWanta wazatañawu antu jaYehova munabombeli kudifukula kudi Yehova kuhitila mukupompa nikushimwina. Munanu mafuku akuminina mwanta wakukabeta kakuchimunswa natwalekihu kwiñila “mwituña dalubanji” kapampa kakavulu. Chakutalilahu, chelili nfulumendi yaNazi muGermany yikali mwanta wakukabeta kakuchimunswa, sweje-e hanjita yakaayi yamuchiyedi, iwu mwanta weñilili “mwituña dalubanji” kuhitila mukukabisha nikujaha antu jaNzambi. Hanyima yaNjita Yakaayi Yamuchiyedi chelili nfulumendi yaSoviet Union yikali mwanta wakukabeta kakuchimunswa, iwu mwanta niyena weñilili “mwituña dalubanji” kuhitila mukuyikabisha antu jaNzambi nikuyitwala muwunkoli. w20.05 13 ¶7-8

Shinshikenu hadi antu amakwawu akunyima ekalili amabwambu jaNzambi. Abarahama wadiña nachikuhwelelu chakola. Chimwahitili yaaka kubadika ha 1,000 nahafwiliyi Abarahama, Yehova wamuteneni nindi ‘ibwambu dami.’ (Isa. 41:8) Dichi hela kufwa hikunateli kumanisha wubwambu waYehova nawantuku. Yehova wuchidi kumwanuka Abarahama. (Luka 20:37, 38) Muntu mukwawu hiYoba. Yehova wamuhamekeli Yoba hampinji yapompeli añelu ejima mwiwulu. Yehova wamuteneni nindi “iyala walala woloka, muntu waakama Nzambi, waambuka kuyuma yatama.” (Yoba 1:6-8) Indi Yehova wamumweneña ñahi Danyeli, wamukalakeleli Nzambi nakashinshi mwituña dawasenji hadi yaaka yakushika ku 80? Mapampa asatu Añelu amulejeli iwu kashinakaji nawu wadiña “wasweja kukeñewa” kudi Nzambi. (Dan. 9:23; 10:11, 19) Twatela kukuhwelela chikupu netu Yehova wafwilaña kusañula amabwambu jindi afwa dehi.—Yoba 14:15. w20.05 26-27 ¶3-4

Kadizi nateli kwiluka nshimbi jaNzambi nikujikeña nankashi. Komana kadizi wukumwovwahilaña Yehova muloña wakumukeña? Anukenu nenu, Evu welukili nshimbi jaNzambi, ilaña hamukeñeli chikupu Mukwakuhana nshimbiku; kushilahu tuhu niAdama. (Kutach. 3:1-6) Dichi twatela kuyidizisha atudizi yuma yayivulu kubombela hayuma yakeñañayi Nzambi ninshimbi jindi. Yuma yakeñañayi Yehova ninshimbi jindi jajiwahi nawa jatukwashaña. (Mas. 119:97, 111, 112) Ilaña atudizi etu aBayibolu hiyanateli kwiluka chumichiku sampu anamoni yuma yayiwahi yafumaña munshimbi. Dichi tunateli kuyihula atudizi etu aBayibolu netu: “Muloñadi Yehova chalejelañayi ambuñindi kwilichi hela kubula kwilichi? Chumichi chinakutuleja nawu hiMuntu wamuchidinyi?” Neyi tukwasha atudizi etu aBayibolu kutoñojoka hadi Yehova nikukeña chikupu ijina dindi dabadika, tukuyishika hamuchima. Atudizi etu akumukeña Nzambi ninshimbi jindi. Chikuhwelelu chawu chikakola nawa chikayikwasha kuumika kweseka.—1 Kor. 3:12-15. w20.06 10 ¶10-11

Hahitaña mpinji hakwila nawu muntu yafunti kudi Nzambi, dichi twatela kwikala adiwunjika. Antu amakwawu azeyelihu ahoshaña nawu ayendeleli mapampa amavulu kudi akulumpi niamakwawu muchipompelu hakwila afunti kudi Nzambi. Muhela Nancy wakuAsia, wasonekeli nindi: “Ibwambu dami wamuchipompelu wankwashili chikupu. Wankeñeli tuhu neyi twasemuka ivumu dimu. Wañanukishileña yuma yitwelilileña hamu. Neyi inakulumbulula chinakutiya, wadiwunjikileña nikunkwasha. Wadiña ibwambu wamuwahi nawa wankwashileña mpinji yejima.” Wushona wudi neyi yitumbu, wunateli kuuka muntu wudi nachineñi. Amakwawu azeya anatwalekihu kwikala nachineñi muloña wachuma chatama chayikoñeliwu kudi muntu wamuchipompelu. Muloña wanichi chineñi, akeñaña kufunta kudi Yehova wanyi. Hadaha amakwawu atoñojokaña nawu ayilili chatama. Akeñekaña muntu watela kuyitiyilila nikwiluka chinakutiyawu. w20.06 26 ¶10-11

Neyi mutondolwela kweseka, chikwikala chaswayi kwila yuma yayiwahi. Anukenuña cheñi nenu yitoñojoka yawantu kutalisha hawuvumbi yafumaña kudi Satana. Neyi mukaana yitoñojoka yawantu amukaayi, ‘mukumwimika watama mushindu.” Tweluka netu Yehova wukweti wuswa wakuhosha nindi iyi hinshidi. Nawa twazataña nañovu kulonda tubuli kukoña nshidi. Ilaña neyi tukoña nshidi, twashimunaña kudi Yehova mukulomba. (1 Yow. 1:9) Nawa neyi tukoña nshidi yeneni, twalombaña wukwashu kudi akulumpi atondawu kudi Yehova nindi atwakameneña. (Yak. 5:14-16) Hela chochu, bayi tudinkaña nyiloña hanshidi yitwakoñeli kunyimaku. Muloñadi? Muloña Tata yetu wukweti kukeña wahanini mulambu wefutu danyiloña daMwanindi kulonda atwanakeni nshidi jetu. Neyi Yehova yahosha nindi wukwanakena akwanshidi anabalumuki, wayanakenaña. Kwosi chuma chinateli kutukañesha kumukalakela Yehova nachinleji chitookaku.—1 Yow. 2:1, 2, 12; 3:19, 20. w20.07 22-23 ¶9-10

Mpinji yimu Yehova wadiña kankawindi. Ilaña watiyileña wudi wanyi. Wadiña nayuma yejima yakumutiyisha kuwaha. Hela chochu, wakeñeleña nindi yileñaleña niyena yikaliku nawa yidiluñisheña. Dichi kukeña kwamuletesheli Yehova kutachika kuleña. (1 Yow. 4:19) Chatachi, Yehova waleñeli mwanindi, Yesu. Dichi kuhitila mudi Mwanindi, “dimwaleñeleliwu yuma yejima” kushilahu niañelu. (Kol. 1:16) Yesu wazañaleli kuzatila hamu naTata yindi. (Yish. 8:30) Añelu niwena azañaleli. Adiña kwoku mpinji yaleñeleñayi Yehova niMukalawenu windi, Yesu, mawulu nimaseki. Añelu elili ñahi? Chelili aleñi maseki “hiyakudikuwa nakuzañalala” nawa chakadi nikujina, atwalekelihu kumushimeka Yehova hayuma yaleñeliyi kushilahu tuhu niantu. (Yoba 38:6; Yish. 8:31) Yileñaleña yejimiyi yamwekeshaña nawu Yehova wukweti kukeña nimaana.—Mas. 104:24; Rom. 1:20. w20.08 14 ¶1-2

Yehova watuleña munjila yakwila tukeñi antu amakwawu nawa niwena atukeñi. Dichi neyi muntu yatuhela, chatukataña nawa hadaha twatiyaña niwoma. Manakwetu wasonekeli nindi: “Chelili amashidika añeti, antukoli nawa antiyishi woma hamuloña wakwikala Chinsahu chaYehova, natiyili woma nawa namweni nami anansawuli.” Neyi anatuheli chatukataña, ilaña hitwahayamañaku. Yesu washimwineñahu dehi nindi akatuhela. Muloñadi akwakumulondela Kristu chayihelelawu kudi kaayi? Muloña neyi chochadiñayi Yesu, ‘hitwekala amukaayiku.’ (Yow. 15:17-19) Dichi hela chakwila twalemesha nfulumendi, twakaanaña kudifukula kudi wena hela kuyifwikija yemenañaku jinfulumendi. Twadifukulaña hohu kudi Yehova. Twamuhakwilañaku Nzambi netu diyi watela kuyuula antu ejima, chuma chatadikishañayi Satana ‘nianyanindi.’ (Kutach. 3:1-5, 15) Twashimwinaña netu Wanta waNzambi hohu diwunateli kumanisha kukala kwawantu ejima nawa katataka yajilumuni antu ejima adikañaña naWanta windi. (Dan. 2:44; Chim. 19:19-21) Akwakudizoza akeña iyi nsañu, ilaña antu atama ayihela. w21.03 20 ¶1-2

Yehova wayilemesha ahela akwaKristu kuhitila mukuyinka mudimu walema muchipompelu. Akweti maana, chikuhwelelu, iyena, kuhamuka, achisambu nawa azataña nyidimu yayiwahi. (Luka 8:2, 3; Yilw. 16:14, 15; Rom. 16:3, 6; Fwi. 4:3; Heb. 11:11, 31, 35) Tudi namuzañalu hakwikala nawatushinakaji muchipompelu. Anakukabakana nayikatu yenzaña muloña wakukula kumujimba. Hela chochu, awa atushinakaji adikitaña chikupu mumudimu wakushimwina nawa azataña hanakumini ñovu yawu kukolesha nikudizisha amakwawu. Yuma yatulejañawu yatukoleshaña. Yehova wayilemesha ninetu nawa twayilemesha. (Yish. 16:31) Toñojokenu cheñi hadi atwansi. Amonaña kukala kwakuvulu chinakukulawu mukanu kaayi katama kadi mumakasa aSatana Diyabolu niyitoñojoka yindi yatama. Hela chochu, atukoleshaña nañakwilu yawu hakupompa, kushimwina nichiyahakwilañaku yuma yakuhwelelawu. Enu atwansi mukweti mudimu walema muchipompelu chaYehova.—Mas. 8:2. w20.08 21-22 ¶9-11

Neyi tutachika kushimwina nawa tudilumbulula netu tudi aYinsahu jaYehova tunateli kumona kukala kudi neyi “mpepela yasweja,” chidi neyi ikañesha dafumaña muchisaka, kutuseha kudi akwetu niantu kukaana kutiyilila kunsañu yitwashimwinaña. Ilaña hitwahayamañaku. Yesu wayisoñamishili akwakumulondela nindi inakuyitemesha mudi akwakudimbulula. Munateli kwikala ñahi ahamuka? Chatachi, mwatela kukuhwelela nenu Yesu natwalekihu kulombola mudimu wakushimwina iku wudi mwiwulu. (Yow. 16:33; Chim. 14:14-16) Chamuchiyedi, kuhwelelenu chikupu muchikaninu chaYehova chakwila nawu wukuyakamenaña. (Mat. 6:32-34) Neyi mwikala nachikuhwelelu chakola, mukwikala ahamuka. Mwamwekesheli chikuhwelelu chakola chimwalejeli amabwambu jenu niantaña jenu nenu munatachiki kudiza Bayibolu nawaYinsahu jaYehova nikupompa nawu. Chakadi nikujina munahimpi yilwilu nichihandilu chenu kulonda mulondeleña nshimbi jaYehova. Mwelili mwenimu muloña wachikuhwelelu nikuhamuka. Neyi mutwalekahu kwikala ahamuka, mukukuhwelela chikupu nenu ‘Yehova Nzambi yenu wudi nanenu mwejima mumukuya.’—Yosh. 1:7-9. w20.09 5 ¶11-12

Mwanta Asa himuntu wamushindameneni chikupu Yehova wutwatela kwimbujola. Wamukalakeleli Yehova mumpinji jakala nimumpinji jakuwunda. Kufuma tuhu hakusambila, “muchima waAsa wayili chikupu kudi Yehova.” (1 Anya. 15:14) Njila yimu mwamwekesheleliyi Asa nindi wadihanini kudi Yehova hikufumisha kudifukula kwakutwamba muYuda. Bayibolu yahosha nawu “wafumishiluku tumeña twawantu acheñi, niyinañanaña, wahumwini nituposhi twakupeshela, watemeni ninyiyombu.” (2 Kushi. 14:3, 5) Wamufumishili ninkaaka yindi Mayaka hachifulu chalema muwanta. Muloñadi? Muloña walejeleña antu kudifukula kudi mukishi. (1 Anya. 15:11-13) Asa hakuminini dakafumishahu kudifukula kwakutwambaku. Watiyakesheleña kudifukula kwalala, nikukwasha antu amuYuda kufunta kudi Yehova. Yehova wamukiswilili Asa niaIsarela kuhitila mukuyinka mpinji yakuwunda. Hadi yaaka 10 muchiyuulu chaAsa, “ituña damweneni zo-o.”—2 Kushi. 14:1, 4, 6. w20.09 14 ¶2-3

Kakavulu twenkaña antu amakwawu yuma yetu yalema wuseya kutuhembelaku. Chakutalilahu, tunateli kusha mali munyambawulu. Neyi tuneli dehi mwenimu, twakuhwelelaña netu mali etu akuyihemba chiwahi, akuyiya hela kujimbala wanyi. Kapostolu Pawulu wamwanukishilimu Timotewu nindi watambwilili yuma yalema, dikwila nawu kwiluka kwalala kwankeñelu yaNzambi hadi antu. Timotewu amwinkeli cheñi mudimu ‘wakushimwina mazu nikukalakala mudimu wamukwakushimwina.’ (2 Tim. 4:2, 5) Pawulu wamukonkomweneni Timotewu kuhemba chuma chamukunjikiliwu. Kufwana Timotewu, atukunjika yuma yalema. Yehova watwinka kwiluka kwalala kwachalala chalema chekala Mwizu dindi, Bayibolu. Ichi chalala chalema muloña chatudizishaña chakwikala nawubwambu wawuwahi naYehova nichitunateli kwikala namuzañalu waweni muchihandilu. Neyi twiteja ichi chalala nikuchizatisha muchihandilu chetu, tukusubuka kuwuduñu wantañishilu yakutwamba nikwila yuma yatama.—1 Kor. 6:9-11. w20.09 26 ¶1-3

Kadizi watela kumona nindi mwakeña nawa mwakuhwelela chalala chamuBayibolu. Chumichi chikumukwasha kukeña yuma yinakudizayi. Neyi chinatwesheki, mulejenu Bayibolu chiyinayikwashi muchihandilu chenu. Nkumininaku wukwiluka nindi Bayibolu yikweti yuma yalema yayivulu yinateli kumukwasha niyena. Hampinji yimunakudiza, mulejenu kadizi wenu yakutalilahu yawantu adiña nakukala kunesekani nakwindi nichakushindiliwu. Munateli kusendaku muntu wamuchipompelu wukweti chakutalilahu chinateli kumukwasha kadizi. Mukwashenu kadizi yamoni chichalemena kuzatisha yishina yamuBayibolu muchihandilu chindi. Neyi kadizi wasumbula hela wasumbuka, komana mwinikwindi niyena nakudiza? Neyi wadizaña wanyi, mutambikenu kulonda niyena yawanikiku mpinji yimunakudiza. Mukoleshenu kadizi wenu yalejeñaku chisaka chindi hela amabwambu jindi yuma yinakudizayi.—Yowanu 1:40-45. w20.10 16 ¶7-9

Anvwali jaYesu amukwashili kwikala iyala wakeñewa kudi Yehova muloña wakwila anvwali jindi adiña nakumwovwahila Yehova. (Kuhit. 6:6, 7) Yosefu naMariya amukeñeli nankashi Yehova nawa chuma chalema chafwilileñawu hikukolesha anyanawu kumukeña Yehova. Yosefu naMariya atondelihu kudifukula kudi Yehova hamu nichisaka chawu mpinji yejima. Chakadi nikujina, ayileña mulungu nimulungu nakupompa kusinagogi yamuNazareta, kushilahu nikuya kuChipandakenu muYerusalema chaaka nichaaka. (Luka 2:41; 4:16) Hadaha hampinji yayileñawu kuYerusalema neyi chisaka, diyi mpinji yamudizishileñawu Yesu nianyiki jindi nsañu yakunyaaka yahosha hadi antu jaYehova, hekwawu mpinji yayileñawu adiña ninakuhempula maluña atenawu muNsona. Chekaliliwu nanyana yayivulu, chinamwekani neyi chayipeleleli wanyi aYosefu naMariya kudifukula kudi Yehova mpinji yejima. Ilaña talenu yuma yayiwahi yafuminimu. Chineli atwamijiliku kudifukula kudi Yehova, chisaka chawu chadiña chakola kuspiritu. w20.10 28 ¶8-9

Neyi mukwenu yayila nindi mwakamutwaliku nakudizsha kadizi windi waBayibolu chikuwaha neyi mukuloñesha dimu nsañu yakadizishañayi. Manakwetu Dorin payiniya wadimena wahosheli nindi: “Natiyaña kuwaha neyi mukwetu inakuzata nindi yaloñeshela chadimu nsañu yinakuya nakudizisha. Muloña nsañu yikubombelañahu yikukwashana.” Kadizi wukwiluka nindi wejima wenu mwaloñesha chiwahi, nawa chikumuletesha niyena yaloñesheña. Hela neyi mukutwesha wanyi kuloñesha nsañu yejima, wanenuku mpinji yakuloñesha yikuma yamaneni yidi munoku kudiza. Kulomba hichibalu chalema hakudizisha Bayibolu, dichi loñeshelenu chadimu mazu imukuhosha neyi anayinki kulomba. Neyi tuloñeshela chadimu tukulomba kwesekeja nayuma yinakukeñeka. (Mas. 141:2) Muhela Hanae washakamaña muJapan, wuchidi kwanuka kulomba kwalombeleñayi muhela wenjileña nantañishi yindi. Wahosheli nindi: “Nelukili nami wadiña nawubwambu wakola naYehova, ninami nakeñeleña kwikala neyi yena. Cheñi nelukili nami ankeña chanteneneñayi hejina mukulomba.” w21.03 9-10 ¶7-8

Yesu wamulejeli kapostolu Pawulu nindi wakashika muRoma. Hela chochu, aYudeya amakwawu muYerusalema amukwatilili Pawulu kafuta nawu amubalameni kulonda amujahi. Ilaña chelili mukulumpi wawamashidika akuRoma Kaludusa Lisiya yeluki aka kafuta, wamupulwishili Pawulu. Chakadi nikunata mpinji Kaludusa walejeli amashidika kumukiña Pawulu nikumutwala kuKesareya hadiña makilomita 105 kufuma kuYerusalema. Kweniku Nguvulu Felikisi wahanini lushimbi nindi Pawulu “amuhembeli muchipañu chaHerodi.” Pawulu hiyatwesheli kumujaha kudi ayilumbu jindiku. (Yilw. 23:12-35) Ilaña Nguvulu wakeñeleña “nindi aYudeya amutiyi kuwaha” wamwihwili Pawulu nindi: “Wunakukeña wukanduki nakuya kuYerusalema kulonda akakusompesheliku hamesu ami kutalisha hayumiyi tahindi?” Pawulu welukili nindi akumujahila kuYerusalema. Wahosheli nindi: “Nemani kuchitwamu chakusompela chaKesari.” Fesitusi wamulejeli Pawulu nindi: “Chineli wunalombi neyi iwu muloña weyi akawusompi kudi Kesari, dichi wunakuya kudi Kesari.” Hashimbwili wanyi, Pawulu washikili muRoma kwakulehi nawaYudeya akeñeleña kumujaha.—Yilw. 25:6-12. w20.11 12 ¶4; 14 ¶8-10

Mpinji yikwawu twadinkaña nyiloña. Chakutalilahu, antu amakwawu adinkaña nyiloña muloña wayuma yeliliwu henohu kanda adizi chalala. Amakwawu niwena adinkaña nyiloña muloña wayiluwa yakoñeliwu hanyima yakupapatishewa. Amavulu dichatiyañawu. (Rom. 3:23) Mwamweni, twafwilaña kwila yuma yayiwahi. Ilaña “wejima wetu twahukanaña kakavulu.” (Yak. 3:2; Rom. 7:21-23) Hela chakwila hitwatiyaña kuwaha kudinka nyiloñaku, chumichi chinateli kutukwasha. Muloñadi? Muloña kudinka nyiloña kunateli kutukwasha kuhimpa yilwilu yetu nawa tukufwilaña kubula kufuntishahu chiluwa chochimu. (Heb. 12:12, 13) Kwambukaku, chinateli kwikala chaswayi kusweja kudinka nyiloña, dikwila nawu kutwalekahu kudinka nyiloña nihanyima yakubalumuka mumuchima nawa Yehova natwanakeni. Kudinka nyiloña muniyi njila kwatama. (Mas. 31:10; 38:3, 4) Twatela kuleka kusweja kudinka nyiloña. Satana nateli kuzañalala neyi tuleka kumukalakela Yehova hela chakwila Yehova watwanakena dehi.—Esekejenu 2 Akorinda 2:5-7, 11. w20.11 27 ¶12-13

Nsoneki waMasamu watachikili kutiyila ichima antu atama nawa adivwimba bayi neyi hamuloña wayuma yatama yelileñawuku, ilaña hamuloña wamaheta awu. (Mas. 73:2-9, 11-14) Amwekeneña neyi adiña nayuma yejima, maheta, chihandilu chachiwahi nawa hiyadiña nakwakamaku. kaLevi wateleli kumona yuma neyi chayimonañayi Yehova. Chatachikiliyi kumona yuma neyi chayimonañayi Yehova, wekalili mukuwunda nawa namuzañalu. Wahosheli nindi: “Hanu hamaseki kwosi wacheñi inukukeñaku, chiña [Yehova] hohu.” (Mas. 73:25) Ninetu bayi tutiyilaña ichima antu atama akweti mahetaku. (Mukwa. 8:12, 13) Neyi tuyitiyilaña ichima, tukuneñaña nawa tunateli nikujimbesha wubwambu wetu naYehova. Dichi neyi mutachika kutiyila ichima antu atama akweti maheta, ilenu neyi cheliliyi kaLevi. Ovwahilenuña mwatulejañayi Nzambi nawa dikundenuña nawantu elaña nkeñelu yindi. Neyi mumukeña Yehova kubadika yuma yejima, mukwikala namuzañalu chikupu. Nawa mukwikala munjila yaya “kuwumi walala.”—1 Tim. 6:19. w20.12 19 ¶14-16

Hampinji yimunakumulejamu Yehova yuma yidi kumuchima wenu, bayi muvulamenaña kumusakililaku. Twatela cheñi kutoñojoka hayuma yayiwahi yatwinkañayi hela chakwila tunakumona kukala kwakuvulu. Neyi mpinji jikwawu chatukalilaña kuwana mazu amawahi akuhosha mukulomba, twatela kwanukaña netu Yehova wakulaña kulomba hela tukulomba hohu netu ‘Mwani nkwashenu.’ (2 Kushi. 18:31) Shindamenenuña hamaana aYehova bayi enuku. Mumafuku akaprofwetu Isaya, antu amuYuda atiyili woma wakuyilukuka kudi aSiriya. Chineli achiinineña kuyilukuka kudi aSiriya, aYuda ayili nakulomba wukwashu kudi aEjipitu. (Isa. 30:1, 2) Yehova wayisoñamishili nindi neyi ayishindamena aEjipitu, mwakafuma kukala. (Isa. 30:7, 12, 13) Yehova wayilejeli kuhitila mudi Isaya chinateli kwilawu hakwila ekali akiñewa chikupu. Wahosheli nindi: “Ñovu jenu yowu kudiwunjika zo-o nakukuhwelela” mudi Yehova.—Isa. 30:15b. w21.01 3-4 ¶8-9

Hamuloña wakwikala ashinshika, amana kwaKristu awayishewa akekala anyanta nawa atupristu hamu nindi mwiwulu. (Chim. 20:6) Ejima ekala muchisaka chaNzambi chamwiwulu akatiya kuwaha kumona a 144,000 awayishewa anatambwili wuloku wawu wamwiwulu. Chelili kapostolu Yowanu nahoshi dehi hadi awa anyanta a 144,000 niatupristu, wamweni chuma chakuhayamisha, “izaza deneni” dikapuluka hanjita yaAmagedoni. Kwambukaku nezanvu datachi, idi izanvu damuchiyedi deneni nawa dakadi kutwesha kuchinda. (Chim. 7: 9, 10) Anavwali nyinkukumba yitooka nakumwekesha nawu adaambula “kuyuma yatama” yamukaayi kaSatana nawa anatwalekihu kwikala ashinshika kudi Nzambi nikudi Kristu. (Yak. 1:27) Abidikaña nawu ayamwini hamuloña wachuma cheliliyi Yehova niYesu, Mukoku waNzambi. Cheñi anakwati nyitayi yanyitondu yanyikoma kumakasa awu chinakumwekesha nawu anazañalali muloña Yesu amutonda kudi Yehova kwikala Mwanta.—Esekejenu Yowanu 12:12, 13. w21.01 15-16 ¶6-7

Iyala nateli kwikala mutu wachisaka wamuwahi neyi yamwimbujolaña Yehova niYesu chazatishañawu wuswa wawu. Chakutalilahu shinshikenu hachilwilu chakudizoza. Yehova wukweti maana kubadika muntu wudi wejima, ilaña watiyililaña niyitoñojoka yawambuña indi. (Kutach. 18:23, 24, 32) Yehova wawanina, ilaña hakuhwelelaña nindi twikali awaninaku. Dichi wakwashaña antu abula kuwanina amukalakelaña kulonda azateña chiwahi. (Mas. 113:6, 7) Nawa Bayibolu yamutena Yehova nawu “nkwashi.” (Mas. 27:9; Heb. 13:6) Mwanta Davidi wahosheli nindi watwesheli kuzata nyidimu yamaneni muloña wakwila Yehova wadizozeli nakumukwasha. Talenu cheliliyi Yesu. Hela chakwila wadiña Mwanta wawatumbanji twindi, wayiwelesheli kunyendu. Yesu yomweni wahosheli nindi: “Ami nayileji chakutalilahu, kulonda ninenu nawa mwileña neyi chochinnayilili enu.” (Yow. 13:12-17) Hela chakwila wadiña nañovu chikupu, Yesu hakeñeleña nindi amukalakeleñaku. Ilaña wayikalakeleleña akwawu.—Mat. 20:28. w21.02 3-4 ¶8-10

Enu amanakwetu akwenzi, kudi nyidimu yayivulu yimwatela kuzataku muchipompelu. Enu amavulu mwakola nawa mudi nañovu. Mwazataña nyidimu yayivulu muchipompelu. Nawa hadaha munakutalila mpinji yakayitondawu kwila nkoñi wakuzatila. Hela chochu, hekwawu mwatoñojokaña nenu amakwawu ayimonaña nawu muchidi atwansi chikupu, kwosi jimweluka munashikilumu nawa wanyi kuyinka nyidimu yalema. Hela muchidi atwansi, kudi nyidimu yimunateli kuzata chayinu mpinji hakwila nawu ayikuhweleli nikuyilemesha kudi amanakwenu muchipompelu. Komana enu akwenzi kudihu yuma yimweluka yimunateli kuzatisha hakwila muyikwashi amanakwenu muchipompelu? Enu amavulu kudi yuma yimweluka. Chakutalilahu, atushinakaji amavulu asakililaña chimwayikwashaña kwiluka chakuzatisha matabuleti niyozelu yawu yikwawu hakudiza kwankawawu nihakupompa. Munateli kuyikwasha awa atushinakaji muloña iji jakutuñatuña muneluki chakujizatisha. Mutiyishenuña Tata yenu wamwiwulu kuwaha muyuma yejima yimwelaña. w21.03 2 ¶1, 3; 7 ¶18

Hela chakwila mumbanda wataña kubadika nfumwindi iyala diyi wukweti mudimu wakulombola kudifukula kwachisaka ninyidimu yikwawu yakundama kukudifukula. (Efwe. 6:4) Mumbanda watela kumwovwahilaña nfumwindi, ilaña watela kukoleshaña chikuhwelelu chindi yomwenindi. Hakwila yeli mwenimu watela kwikalaña nampinji yakudiza kwankawindi nikutoñojokahu chikupu. Chumichi chinateli kumukwasha kutwalekahu kumukeña nikumulemesha Yehova nawa wukumwovwahilaña nfumwindi. Ambanda ovwahilaña anfumujawu muloña wakumukeña Yehova akwikalaña namuzañalu kubadika ana adikañaña nantanjikilu yaYehova yakwila nawu kwikali mutu. Ilaña yuma yayiwahi yatela kwimbujolawu atwansi awambanda niawamayala. Nawa aletaña kuwunda nimuzañalu muchisaka nimuchipompelu. (Tit 2:3-5) Hakachi kawantu anakumukalakela Yehova amavulu hiyambanda ashinshika.—Mas. 68:11. w21.02 13 ¶21-23)

Kapostolu Pawulu wadiña wahamuka nawa womikili. Mpinji yikwawu wazeyeleña. Ilaña womikili muloña wamushindameneni Yehova kulonda yamukwashi. (2 Kor. 12:8-10; Fwi. 4:13) Hakwila twikali akola nawa ahamuka twatela kumulomba Yehova kulonda yatukwashi. (Yak. 4:10) Twatela kwiluka chikupu netu Yehova hazatishaña kukala hela kweseka kulonda yatubabeshiku. Kambanji Yakoba wahosheli nindi: “Muntu wunakuhita mukweseka, bayi yahosha nindi: ‘Anakuñeseka kudi Nzambiku.’ Muloña Nzambi hiyamwesekaña nayuma yatamaku, hela yena yomweni hesekaña muntu hela wumuku.” (Yak. 1:13) Neyi twiluka chikumichi, tukuswina kwakwihi naTata yetu wamwiwulu. Yehova ‘habalumokañaku.’ (Yak. 1:17) Wayikwashili akwaKristu akusambila mukukala kwejima kwamweneñawu, ninetu wukutukwashaña. Mulombenu Yehova kulonda yayinki maana, chikuhwelelu nawa yayikwashi kwikala ahamuka. Wukwakula kulomba kwenu. w21.02 31 ¶19-21

Munateli kumukolesha kadizi wenu waBayibolu wapompaña kuhitila mukumwekesha nenu mwamukeña. (Fwili. 2:4) Munateli kumuleja nenu munatiyi kuwaha chinakuyilaku hambidi, mwihulenu hayuma yinakudizayi, chisaka chindi nimudimu, ilaña bayi mumwihula yuma yikumutiyisha nsonyiku. Kuhanjeka nsañu yamuchidiwu kukuletesha mudikundi. Neyi mwikala ibwambu dakadizi mukumukwasha kuyilaku hambidi nakupapatishewa. Neyi kadizi nakuyilaku hambidi nawa nakuhimpa, mukwashenu kulonda yadikundeña nawantu muchipompelu. Mumwekeshelenuña chisambu. (Heb. 13:2) Neyi kadizi nekali mukwakushimwina, yenuña nindi mumudimu wakushimwina. Diego, mukwakushimwina wamuBrazil, wahosheli nindi: “Amanakwetu amavulu ansendeleñaku mumudimu wakushimwina. Chumichi chankwashili kuyiluka chikupu. Hampinji yinazatileña nawu nadizililiku yuma yayivulu nawa naswinineña kwakwihi naYehova niYesu.” w21.03 12 ¶15-16

Yesu wayilejeli akwakumulondela nindi akeñi ayilumbu jawu. (Mat. 5:44, 45) Komana chumichi chaswayi? Chaswayi wanyi. Ilaña tunateli nawukwashi waspiritu yajila yaNzambi. Nyikabu yaspiritu yaNzambi mwabombela kukeña, kudiwunjika, luwi, kuwunda, kwovwaha nikudihemba. (Ñal. 5:22, 23) Iyi yilwilu yatukwashaña kuumika hela chakwila anatuheli. Akwankunyi netu amavulu ahimpa yilwilu yawu hamuloña wakwila iyala, mumbanda, mwana hela ntuñi nawu wayimwekesheleli yilwilu yayiwahi. Awa akwankunyi amavulu ichi ekala dehi amanakwetu niahela. Neyi chayikalilaña kuyimwekeshela kukeña awa antu ayihela hamuloña wakwila mwamukalakelaña Yehova, lombenu spiritu yajila. (Luka 11:13) Dichi ilukenu chikupu nenu kumwovwahila Nzambi mpinji yejima dichuma chabadika kuwaha chitwatela kwila. (Yish. 3:5-7) Neyi anatuheli chatukataña nawa chatuneñeshaña, ilaña kukeña kukweti ñovu chikupu kubadika yumiyi. Neyi tuyikeñaña antu, hadaha anateli kubalumuka. Chumichi chamuzañaleshaña Yehova. Hela chakwila akwankunyi netu akutwalekahu kutuhela, etu tukuzañalalaña. w21.03 23 ¶13; 24 ¶15, 17

Kaprofwetu Yoweli, wateneneña kulukuka kwawamashidika. (Yoweli 2:1, 8, 11) Yehova wahosheli nindi wukazatisha ‘amashidika asweja ñovu’ (mashidika aweniBabiloni) kubabesha aIsarela adikañileña. (Yoweli 2:25) Awa amashidika anakulukuka ayiteneneña nawu “antu akukabeta kakuchimunswa” muloña aBabiloni alukukilili aIsarela kukabeta kakuchimunswa. (Yoweli 2:20) Awa amashidika anayesekeji nawatuboola anakulukuka. Yoweli wahosheli kutalisha hadi awa amashidika nindi: “[Amashidika] adimakenaña iwu nahindi, iwu nahindi. . . . Hiyakulotokela mukala. . . hiyakukandama mumatala; hiyakwiñila munjanina neyi chelaña ikombi.” (Yoweli 2:8, 9) Fwikijenu chumichi. Amashidika ananyeñumuki kwejima. Kwosi kwakuswamaku. Nawa kwosi muntu hela wumu wukutwesha kuyitemuka mashidika awaBabiloniku! Neyi chalukukaña atuboola, eniBabiloni (hela aKaladeya) alukukili musumba waYerusalema mu 607 B.C.E. Bayibolu yashimuna nayu: “Mwanta wawaKaladeya . . . . hela mukwenzi hela chañadima hela kashinakaji hela ipala dadeni kumutiyila wushona nehi.”—2 Kushi. 36:17. w20.04 5 ¶11-12