February

Yilukenu amanakwenu niahela chiwahi. Hanjekenuña nawu henohu kanda mutachiki kupompa nihanyima yakupompa, shimwinenuña nawu nawa neyi chinatwesheki yitambikenuña kulonda mudi nawu yakuda. Neyi mwila mwenimu, mukwiluka nenu nsonyi diyaleteshaña muhela kubula kudikunda nawakwawu. Nawa manakwetu imwamonaña nenu wukweti mali amavulu, hakweti maliku ilaña wekala hohu nachisambu. Hela chisaka chavula kulaba kukupompa chinakuumika ikañesha. (Yoba 6:29) Hela chochu, hitwatela kwikala “akwakudiñija munsañu [jawakwetuku].” (1 Tim. 5:13) Ilaña twatela kuyiluka amanakwetu niahela nikukala kunakumonawu muchihandilu chawu. Neyi mwiluka nkulilu yamukwenu mukwaKristu wayitiyishaña kutama, mukutachika kumutiyila wushona. Mwatela kuzata nañovu hakwila muyiluki chiwahi amanakwenu niahela. Munjila yoyimu, neyi mulondela kufumba kwamuBayibolu kwakwikala akasunuka, mukumwimbujola Yehova wakeña “antu ejima.”—1 Tim. 2:3, 4; 2 Kor. 6:11-13. w20.04 16-17 ¶10-12

Hawufuku wakukumishaku henohu Yesu kanda yofwi, wayilejeli atumbanji twindi kudikeña wumu namukwawu. Welukili nindi neyi adikeña chikupu, akwikala anuñañana nawa akuumikaña hela chakwila kaayi kanayiheli. Talenu chuma chamwekeneni chipompelu chamuTesalonika. Kufuma hachituñiliwu antu amunichi chipompelu ayikabishileña. Hela chochu, amanakwetu niahela munichi chipompelu omikili nawa adiña adikeña wumu namukwawu. (1 Tes. 1:3, 6, 7) Pawulu wayikolesheli kumwekeshaña kukeña nikutwalekahu “kwila mwenimu chikupu.” (1 Tes. 4:9, 10) Kukeña kwayikwashili kukundeja antu ananeñi nikukolesha azeya. (1 Tes. 5:14) Azatishili kufumba kwaPawulu muloña mumukanda windi wamuchiyedi, wasonekeliyi hanyima yakwila munahiti chaaka, Pawulu wahosheli nindi: “Kukeña kwenu wejima wenu kwakudikeña wumu namukwawu kunakuswejelaku.” (2 Tes. 1:3-5) Kukeña kwawu kwayikwashili kuumika yihuñu nimakabisha. w21.03 22 ¶11

Neyi tunakukeña kutambwila wuloku wawumi wahaya nyaaka, twatela kwila yuma yelañawu akwaKristu hela kuhanda neyi chahandañawu akwaKristu. (Yilw. 20:24; 1 Pet. 2:21) Hela chochu, Satana niantu jindi akeñaña nawu tuyimbujoleña; anakukeña nawu ‘tutemukileña nawu hamu.’ (1 Pet. 4:4) Adiwulaña kutemuka kutwatemukaña nawa ahoshaña nawu lufuchi lwawu dilwaluwahi, nawu lwaleteshaña muntu kwikala wasubuka. Ilaña mwahoshañawu dimu wanyi. (2 Pet. 2:19) Dichi, chalema kutondahu njila yayiwahi yakulondela. Satana nakukeña nindi tubuleña kutemukila munjila yanyanya “yatwalaña kuwumi” ilaña nindi tuyi munjila yeneni munakutemukila antu amavulu mukaayi. Iyi njila ayiluka kudi antu amavulu nawa yaswayi kutemukilamu. Ilaña “yatwalaña kukujilumuka.” (Mat. 7:13, 14) Hakwila nawu tutwalekihu kwendela munjila yatelela nawa tubuli kuheñuka, twatela kumukuhwelela Yehova nikumutiyilila. w20.04 26 ¶1; 27 ¶5, 7

Muyaaka yantesha yinafumihu, nfulumendi yaRussia nimatuña azatañayi nawu aneñili “mwituña dalubanji.” (Dan. 11:41) Munjilanyi? Mu 2017, iwu mwanta wakukabeta kakuchimunswa walekesheli mudimu wawantu jaYehova nikumbila amanakwetu niahela amakwawu mukaleya. Walekesheli cheñi nyikanda yetu, kushilahu tuhu niBayibolu yaNew World Translation. Kubombelahu, watambwili kasanji ketu kamutayi kamuRussia, Matala aWanta niMatala Akupompelamu Kupompa Kwamaneni. Hanyima yayumiyi, mu 2018 Izanvu Dalombolaña dahosheli nawu Russia nimatuña azataña nindi diyi mwanta wakukabeta kakuchimunswa. Hela chakwila, antu jaYehova anakuyikabisha chikupu kudiyi nfulumendi, hiyadiñijaña munsañu jamatuña nachiyuulu kulonda ahimpi nfulumendiku. Ilaña, alondelaña kufumba kwamuBayibolu kwakulombelaku “niantu ejima akweti yifulu yalema” sweje-e neyi anakufuukula yuma yinakundami hawuswa wetu wakudifukula. w20.05 14 ¶9

Anvwali neyi munakukeña anyanenu akuhweleli nawu ichi dichalala, atela kwikala amabwambu jaNzambi nikukuhwelela chikupu yuma yatañishaña Bayibolu. Neyi munakufwila kudizisha anyanenu chalala kutalisha hadi Nzambi, mwatela kudizaña Bayibolu. Mwatela kwikala nampinji yakutoñojoka chikupu hayuma yimunakudiza. Dihu dinu himukukwasha anyanenu kwila chochimu. Mwatela kudizisha anyanenu chakuzatisha yozelu yetu yitwazatishaña hakudiza Bayibolu, neyi chochimwadizishaña atudizi enu aBayibolu. Neyi mwila mwenimu, mukukwasha anyanenu kumukeña Yehova nikukuhwelela “nduñu wamaana nikashinshi” wazatishañayi kutuloñeshela yakuda yakuspiritu. (Mat. 24:45-47) Himwatela kukumina dakudizisha hohu anyanenu chalala chapela chamuBayiboluku. Yikwashenu ekali nachikuhwelelu chakola kuhitila mukuyidizisha ‘yuma yakunama yaNzambi’ kwesekeja nahanakumini wuswa wawu wakudiza yuma.—1 Kor. 2:10. w20.07 11 ¶10, 12-13

Antu añahi akweti wubwambu naYehova makonu? Mamiliyoni awantu. Anekali naniwu wubwambu muloña wakukuhwelela mumulambu wefutu danyiloña daYesu. Muloña wefutu danyiloña, tunateli kudihana kudi Yehova nikupapatishewa. Neyi twila yumiyi, twadibombaña namamiliyoni awantu adihana, akwakristu apapatishewa adi “hampuña” naMuntu wasweja kulema mukuleña kwejima. Tunateli kumwekesha ñahi netu twalemesha wubwambu wetu naYehova? Kufwana Abarahama niYoba atwalekelihu kwikala ashinshika kudi Nzambi kubadika hayaaka 100, twatela kutwalekahu kwikala ashinshika kudi Yehova hichidi namuloña nayaaka yitunamukalakeliku. Kufwana Danyeli, twatela kulemesha wubwambu wetu naYehova kubadika wumi wetu. (Dan. 6:7, 10, 16, 22) Nawukwashu waYehova tunateli kuumika kukala kudi kwejima kutunateli kumona nikutwalekahu kwikala nawubwambu nayena.—Fwi. 4:13. w20.05 27 ¶5-6

Mwanta Davidi wamweni ñodambala nakuwela. Wadiña weluka lushimbi lwaYehova lwakwila nawu: “Chinjila; kwikala nalwisu lwañodamukwenu.” (Kwid. 20:17) Ilaña yena watwalekelihu kumutala. Wekalili nanyichima yiyedi, wakumufwila Batisheba niwakumuzañalesha Yehova. Hela chakwila Davidi wamukeñeli nikumwakama Yehova hampinji yayilehi, wetejeli kufwila kwatama. Haniyi mpinji, Davidi wavulumwini. Waleteli kasawuntu hejina daYehova. Waleteli cheñi kukala hadi antu akadi muloña, kushilahu tuhu niamwitala dindi. (2 Sam. 11:1-5, 14-17; 12:7-12) Yehova wamubabesheli Davidi nawa wekalili cheñi nawubwambu wawuwahi naYehova. (2 Sam. 12:13; Mas. 51:2-4, 17) Davidi wanukili yihuñu yafuminimu muloña wakwikala nanyichima yiyedi. Komana Yehova wamukwashili Davidi kwikala namuchima wumu hohu? Eña, muloña izu daNzambi damutenaña Davidi nawu ‘muchima windi hiwukuya chikupu kudi Yehova Nzambi.’—1 Anya. 11:4; 15:3. w20.06 11 ¶12-13

Bayibolu yalumbulula nawu kukeña kwayikeñayi Yehova antu jindi kudi neyi monji. Munjilanyi kukeña kwaNzambi mukunekalili neyi monji? Talenu ichi chakutalilahu: Fwikijenu mudi hakaloña munakukeña kunwina nawa mukwenu yayinatila nichuma chikuyiletesha mubuli kunekama. Chakadi nikujina mukumusakilila nankashi muloña chumichi chikuyikwasha kubula kunekama. Ilaña ichi chuma hidichikuyihandisha hohuku. Chineli menji atuta, mwatela kufuma mumenji hakwila nawu muhandi. Kwatela kwikala muntu wakuyinatila monji kulonda yayikokeli muwatu. Neyi chahosheli Yehova mumazu adi munsona yalelu kutalisha hadi aIsarela afumini kudi yena nindi: “Nayikokeli.” Dichatiyañayi Nzambi nimakonu kutalisha hadi antu analeki kumukalakela nawa anakunwina muloña wakukala nikwakama. Nakukeña eluki nawu wayikeña nawa nakukeña kuyifuntisha kudi yena. Nawa Yehova nateli kuyizatisha enu kulonda muyikwashi awa antu eluki nawu wayikeña. Twatela kutwalekahu kuyileja antu azeya netu Yehova wayikeña nawa netu ninetu twayikeña. w20.06 27 ¶12-13

Chelili kambanji Stefwanu amujahi, akwaKristu amavulu atemukili muYerusalema nawa “apalañeneni mumaluña amuYudeya nimuSamariya,” nkumininaku ayili nakushika kuKipirosi nikuAntiyoki. (Yilw. 7:58–8:1; 11:19) Atumbanji amweni kukala kwakuvulu. Hela chochu, atwalekelihu kushimwina nsañu yayiwahi kwejima kuyayileñawu nawa atuñili yipompelu mumaluña ejima ayuulileñawu kudi aRoma. (1 Pet. 1:1) Ilaña amweni cheñi kukala kwakuvulu kwasweja. Chakutalilahu, mu 50 C.E., Mwanta waRoma Kaludusa walejeli aYudeya ejima kufuma muRoma. Dichi aYudeya ejima ekalili akwaKristu ashiyili matala awu nakuya kwacheñi. (Yilw. 18:1-3) Mu 61 C.E., kapostolu Pawulu wasonekeli nindi akwawu akwaKristu ayisawili hamesu awantu, kuyisha mukaleya nawa ayibuwili maheta awu. (Heb. 10:32-34) Nawa neyi chochichadiña kudi antu ejima, akwaKristu akabakeneña nawuzweñi niyikatu.—Rom. 15:26; Fwi. 2:25-27. w21.02 26-27 ¶2-4

Kwosi chuma chinateli kwilayi Satana hela antu jindi chinateli kuluwañesha chikuhwelelu chamukwakristuku. (2 Yow. 8, 9) Twatela kwiluka netu kaayi katela kutuhela. (1 Yow. 3:13) Yowanu watwanukishaña nindi “kaayi kejima kadi mumakasa awatama.” (1 Yow. 5:19) Kukuma kwakanu kaayi kunakuswina kwakwihi nawa Satana nasweji kuzuwa. Wazatishaña wuvumbi, makudi afumaña kudi akwakusekesha nimakabisha. Satana neluki nindi nashali hohu nakapinji kantesha kakulekesha mudimu wetu wakushimwina hela kuzeyesha chikuhwelelu chetu. Dichi, chumichi hichatuhayamishañaku hela chakwila mudimu wetu anakuwukañesha hela kuwulekesha mumatuña amakwawu. Hela chochu, amanakwetu niahela munawa matuña anakuumika. Anakumwekesha nawu hela chakwila Satana wukutukabisha ñahi, tunateli kutwalekahu kwikala ashinshika. w20.07 24 ¶12-13

Yehova wakeñeleña nindi antu ashakameña haya nyaaka hamaseki. Ilaña chelili Adama naEva adikañi naNzambi, hiyatwesheli cheñi kushakama haya nyaakaku. (Rom. 5:12) Yehova welili ñahi? Washimwini chakamwinayi antu ejima. (Kutach. 3:15) Yehova wafuukwilihu kuhana ifutu danyiloña kulonda damwini anyana kaAdama naEva kunshidi nikufwa. Kuhiñahu wetejeli muntu himuntu kufuukulahu kumukalakela kulonda akekali nawumi wahaya nyaaka. (Yow. 3:16; 1 Kor. 15:21, 22) Mpinji yakasañulañayi Yehova antu kuhitila mudi Mwanindi, hitwatela kukuhwelela netu akayisañula ejima hampinji yimuku. Muloñadi? Muloña neyi heseki hekala antu amavulu mumpinji yimu, hanateli kwikala kukala. Nawa Yehova helaña yuma mukuluwañeshaku. Weluka nindi hakwila nawu kwikali kuwunda, yuma atela kuyila mukutelela.—1 Kor. 14:33. w20.08 14 ¶3; 15 ¶5

Kadizi watela kwiluka nindi nkeñelu yakudiza Bayibolu hikumukwasha kutachika kumukalakela Yehova nikwikala Chinsahu Chindi. Kudi yuma yayivulu yatela kwilayi kadizi waBayibolu wunakukeña kupapatishewa. Chatachi, kadizi watela kumwiluka Yehova, kumukeña nikumukuhwelela. (Yow. 3:16; 17:3) Kuhiñahu kadizi wukwikala ibwambu daYehova nikudikunda nachipompelu. (Heb. 10:24, 25; Yak. 4:8) Mukuhita kwampinji, kadizi wukudanakena nshidi jindi nawa wukuleka kwila yuma yatama. (Yilw. 3:19) Dichi, wukutachika kulejaku akwawu yuma yinakuhweleliyi. (2 Kor. 4:13) Nkumininaku wukudihana kudi Yehova nikumwekesha kudihana kwindi kuhitila mukupapatishewa. (1 Pet. 3:21; 4:2) Hanidi ifuku dinapapatishewiyi antu akuzañalala. Neyi kadizi nakwila yuma yejima yatela kwilayi hakwila nawu yopapatishewi, muhamekenuña nikumukolesha kulonda yatwalekihu kwila yumiyi. w20.10 17-18 ¶12-13

Neyi mudesekejaña nawantu amakwawu muchipompelu, mukudimonaña nenu mwashikilamu wanyi. Amakwawu muchipompelu ayinka chawaana mukutañisha, mukuloñesha yuma chiwahi hela mukukundeja nikukolesha akwawu. Hadaha munakutoñojoka nenu mukutwesha wanyi kuzata neyi chazatañawu. Chumichi chinakumwekesha nawu mwadizoza. (Fwi. 2:3) Ilaña mwatela kwikala asoñama. Neyi mutwalekahu kudesekeja nawakwenu eluka yuma yayivulu, mukuzeya. Mukutachika kutoñojoka neyi chahosheli kapostolu Pawulu, nenu kwosi mudimu wumukutwesha kuzata muchipompeluku. Yehova wayinkeli akwaKristu akusambila yawaana yaspiritu yajila muchihayamisha, ilaña akwaKristu ejima hiyayinkeli chawaana chochimuku. (1 Kor. 12:4-11) Hela chochu, mukwaKristu wejima wadiña namudimu wakuzata. Makonu hitwatambwilaña yawaana yaspiritu muchihayamishaku. Ilaña chikuma chochimu. Tukweti wuswa wamboka-mboka, hela chochu, wejima wetu tukweti mudimu kudi Yehova. w20.08 23 ¶13-15

Neyi mulomba kulonda mwikali ahamuka nawa akadi woma, Yehova wukwakula kulomba kwenu nawa hakayishiyaku. (Yilw. 4:29, 31) Wukuyikwashaña mpinji yejima. Toñojokenu Yehova chayikwashayi kushinda kukala nikuyinka ñovu hakwila muhimpi chihandilu chenu. Chakadi nikujina, Yena walombweli antu jindi kuhita haKaluñalwiji Kachinana wukuyikwasha kwikala kambanji kaKristu. (Kwid. 14:13) Ikalenu nachikuhwelelu mudi Yehova neyi chadiña nañimbi yamasamu wahosheli mazu adi munsona yalelu. Yehova nateli cheñi kukwasha akwakushimwina amaha kwikala ‘ahamuka.’ Talenu chakutalilahu chamuhela Tomoyo. Chatachikiliyi kushimwina kwitala nikwitala, hetala datachi dashikiliyi amulejeli nawu: “Inakukeña wanyi kuhosha nawaYinsahu jaYehova!” nawa washinkili kuchisu. Muhela Tomoyo watiyili woma wanyi, dichi walejeli akwawu nindi: “Munatiyi chinahoshiyi? Kwosi izu dinahosha, ilaña wañiluka nindi nidi Chinsahu chaYehova. Natiyi kuwaha.” Chayinu mpinji muhela Tomoyo hipayiniya wampinji yejima. w20.09 6 ¶13-14

Asa walejeli antu nindi Yehova diyi ‘wunayinookeshi dehi mbadi jejima.’ (2 Kushi. 14:6, 7) Asa wamweneña wanyi nindi iyi mpinji yakuwunda himpinji yakunooka. Ilaña watachikili kutuña nyisumba, jimpwembu, tuposhi niyenzelu. Walejeli antu amuYuda nindi: “Tuchidi netuña.” Asa watalishili mudihi? Watalishili mukwila nawu antu endeleña mukukasunuka mwituña dayinkeliwu kudi Nzambi nawa atuñileña chakadi kuyikañesha kudi ayilumbu. Walejeli antu kuzatisha chiwahi iyi mpinji yakuwunda. Asa wazatishili cheñi mpinji yakuwunda kukoleshelamu njita yindi. (2 Kushi. 14:8) Komana chumichi chinayi mukwila nawu hamukuhweleleli Yehovaku? Inehi. Ilaña, Asa welukili nindi chineli wadiña mwanta diyi wadiña namudimu wakukolesha antu hakukala kunateli kumonawu kumbidi. Asa welukili nindi mpinji yadiñawu antu amuYuda mukuwunda yikatwalekahu wanyi, nawa dichuma chamwekeni. w20.09 15 ¶4-5

Hamuloña wakwila mukulumpi nateli kushaku nshimbi yinateli kukiña nyikoku yaNzambi. Hela chochu, hekala chaambu hawuswa wukwetiyi mukulumpi nawukwetiyi mutu wachisaka. Chakutalilahu, Yehova wayinka akulumpi wuswa wakusompesha, nawa wayinka nimudimu wakufumisha muchipompelu muntu wunabuli kubalumuka mumuchima. (1 Kor. 5:11-13) Kwambukaku, Yehova wenka nyitu yayisaka wuswa wabula kwinkayi akulumpi. Chakutalilahu, wamwinka mutu wachisaka wuswa wakushaku nshimbi nikukoleshamu kulonda ejima muchisaka ayovwahili. (Rom. 7:2) Chakutalilahu, mutu wachisaka wukweti wuswa wakuyileja anyanindi mpinji yatela kushikañawu hetala. Wukweti cheñi wuswa wakuyibabesha anyanindi neyi abula kuyovwahila oyu nshimbi. (Efwe. 6:1) Kafwampi, mutu wachisaka wakeña chisaka chindi, wasambilaña kuhanjeka nañodindi henohu kanda yashiku nshimbi, muloña wena ayedi adi “mujimba wumu.”—Mat. 19:6. w21.02 16-18 ¶10-13

Chuma chimu chaletesha chalala chaMwizu daNzambi kwikala chalema himuloña wakwila Yehova wachisololaña hohu kudi antu adizoza adi “nanyichima yashinshika.” (Yilw. 13:48) Antu amuchidiwu etejaña njila yazatishañayi makonu kuhaninamu ichi chalala. (Mat. 11:25; 24:45) Kwila twiluka ichi chalala halwetu nehi, nawa kwosi kwekwawu kutunateli kuwana ichi chalala chalemaku. (Yish. 3:13) Yehova watwinka cheñi kukooleka kwakudizisha antu chalala kulonda amwiluki nikwiluka nkeñelu yindi. (Mat. 24:14) Nsañu yitwashimwinaña yalema chikupu muloña yakwashaña antu kwikala muchisaka chaYehova nikwikala nakukooleka kwakuheta wumi wahaya nyaaka. (1 Tim. 4:16) Chili tunakuzata nankashi mumudimu wakushimwina hela nehi, tunakuzata mudimu walema wunakuzatewa hayinu mpinji. (1 Tim. 2:3, 4) Hikukooleka chikupu kwikala akwakukalakala hamu naNzambi!—1 Kor. 3:9. w20.09 26-27 ¶4-5

Hampinji yayileñayi kuRoma, Pawulu amukwashili kudi Yehova kuhitila mudi akwawu akwakwitiya. Chakutalilahu, amabwambu jindi ayedi ashinshika Arisitaka niLuka ayili nindi kuRoma. Ashili wumi wawu muwubanji kulonda ayi naPawulu, hela chakwila Bayibolu yashimuna wanyi nawu Yesu wayikanini niwena nindi akashika kuRoma chakadi kumona kukala. Enjili hohu nakwiluka nawu hiyakufwaku mpinji yakisikili watu mwadiñawu. Chashikiliwu hemeniwu mumusumba waSidoni, Yuliyusi wamwitejeli Pawulu “kuya kudi amabwambu jindi kulonda amwakameni.” (Yilw. 27:1-3) Nawa chashikiliwu mumusumba waPuteyoli, Pawulu niamabwambu jindi ‘awanini anakwawu nawa ayilembeleli nawu ashakami nawu mafuku 7.’ Hampinji yayakameneneñawu aPawulu niamabwambu jindi kudi awa akwaKristu, chakadi nikujina, Pawulu watela wayikolesheli chikupu kuhitila mukuhanjeka nawu hayuma yamwekeni.—Esekejenu Yilw. 15:2, 3. w20.11 15-16 ¶15-17

Anvwali amutiyaña Nzambi woma anateli kudizilaku kwodi kudi Yosefu naMariya? Chuma chasweja kulema, mwekeshenuña kudi anyanenu nenu mwamukeña Yehova kuhitila munhoshelu nimuyilwilu yenu. Ilukenu nenu chawana chasweja kulema chimunateli kuyinka anyanenu hikuyikwasha kumukeña Yehova. Nawa chuma chimu chidi hakachi kayuma yasweja kulema yimunateli kuyidizisha anyanenu hikuyikwasha kwikala nampinji yakudiza Bayibolu, kulomba nikuya nakupompa mpinji yejima nikushimwina. (1 Tim. 6:6) Mwatela kuyikeñela anyanenu yuma yakumujimba. (1 Tim. 5:8) Ilaña anukenu nenu wubwambu wakola wukwetiwu anyanenu naYehova diwu wukayikwasha hakukuma kwakaayi kaSatana nikwiñila mwituña daNzambi dadiha, bayi neyi yuma yakumujimbaku. (Ezek. 7:19) Twazañalalaña hakumona anvwali akwaKristu amavulu anakukwasha anyanawu kuswina kwakwihi naYehova. Anyana akulilaña muyisaka yamuchidiwu atwalekañahu kwila yuma yayiwahi neyi anakuli nawa ekalaña namuzañalu hakuyikulisha muniyi njila.—Yish. 10:22. w20.10 28-29 ¶10-11

Mpinji jikwawu kapostolu Petulu welileña yuma nikuhosha chakadi kutoñojoka. Wenjili nakuditoñesha hayuma yeliliyi niyahosheliyi. Chakutalilahu, mpinji yelili Yesu yaleji apostolu indi nindi akamukabisha nikumujaha, Petulu watachikili kumuhosha mazu adi hewulu. (Mat. 16:21-23) Kuhiñahu Yesu wamufumbili Petulu. Izanvu dawantu chidenjili nakumukwata Yesu, Petulu wakoñeli chuma chakadi kutoñojokahu, waketwili itu danduñu yakapristu muneni. (Yow. 18:10, 11) Yesu wamufumbili cheñi iwu kapostolu. Kubombelahu, Petulu wadisambili nindi neyi apostolu amakwawu akamushiya Kristu muloña wachuma chidi chejima chadi kumumwekena, yena hakumushiyaku. (Mat. 26:33) Ilaña kusweja kudishindamena kwamuletesheli kuchiina antu nawa wamukaanini Yesu kapampa kasatu. Petulu waneñeli nankashi, dichi “wayili hanji nawa wadilili nankashi.” (Mat. 26:69-75) Hadaha wadiña nakutoñojoka neyi Yesu wakamwanakena. Hela chochu, Petulu hetejeli chineñi kumukañesha kumukalakela Yehovaku. Hanyima yakuluwañesha, watwalekelihu kumukalakela Yehova hamu nawakwawu apostolu.—Yow. 21:1-3; Yilw. 1:15, 16. w20.12 20 ¶17-18

Mutu wachisaka watela kumwekesha nindi wadizoza munjila jajivulu. Chakutalilahu, hakufwilaña nindi ñodindi nianyanindi ekali awaninaku. Watiyililaña munakutoñojoka chisaka chindi hela chakwila anakukaana yitoñojoka yindi. Kubombelahu, iyala wadizoza wazataña nitunyidimu twahetala, hela chakwila muchituñilu mwashakamañayi antu amonaña iyi nyidimu nawu yawambanda. Chumichi chakala. Muloñadi? Muhela Rachel wahosheli nindi: “Kumukala wetu neyi iyala yakwashaku ñodindi kukosa yeña hela kuwahisha mwitala, antuñi nindi niantaña jindi akutachika kutoñojoka nawu ‘hiyala’ wanyi. Atoñojokaña nawu wakañanyaña kuyuula ñodindi.” Neyi kumukala wenu kwekala yilwilu yamuchidi iwu, anukenuña nenu Yesu wayiwelesheli atumbanji twindi kunyendu hela chakwila iwu mudimu awumweneña nawu wawañamba. Iyala wamuwahi hakeñaña kudimwekesha nindi walemaku, ilaña wakeñaña kuzañalesha ñodindi nianyanindi. w21.02 2 ¶3; 4 ¶11

Kwanuka yuma yayiwahi hichawaana chatwinkayi Yehova, ilaña hela chakwila yuma yadiña chiwahi kunyima, yuma yikasweja kuwaha mwituña dadiha. Antu anateli kutuneñesha, ilaña neyi tuyanakena, tukushaña maana hakumukalakela Yehova. Kusweja kudinka nyiloña kunateli kutukañesha kumukalakela Yehova namuzañalu. Kufwana kapostolu Pawulu, twatela kukuhwelela netu Yehova natwanakeni. (1 Tim. 1:12-15) Tukweti kuchiñeja kwakushakama haya nyaaka. Nawa mwituña daNzambi dadiha, hitwakanukaña yuma yatutiyishaña kutamaku. Bayibolu yahosha kutalisha kuniyi mpinji nawu: “Yuma yakusambila hiyakayanuka nawaku.” (Isa. 65:17) Toñojokenu hachumichi: Etu amakwawu tunashinakajili mumudimu waYehova, ilaña mwituña dadiha, twakafunta cheñi kuwukwenzi. (Yoba 33:25) Dichi bayi tuswejeña kutoñojoka hayuma yakunyimaku. Ilaña tusheña hohu maana hayuma yakumbidi nikuzata hakumina ñovu jetu kulonda twakekali mwituña dadiha. w20.11 24 ¶4; 29 ¶18-19

Yumanyi yikamwekana kumbidi? Hampinji yalukadi lwasweja, Yehova wakatwamwina mapampa kayedi munjila yakuhayamisha. Chatachi, wakayipulwisha ambuñindi ashinshika hampinji yakakojejayi anyanta ahanu hamaseki kujilumuna Babiloni Muneni, kwitiya kwakutwamba kwejima. (Chim. 17:16-18; 18:2, 4) Nkumininaku, wakapulwisha antu jindi hampinji yakajilumunayi yuma yamukaayi kaSatana yejima haAmagedoni. (Chim. 16:14, 16) Neyi tukundama kwakwihi naYehova, kwosi chuma chinateli kwilayi Satana chinateli kutukatishaku. Kafwampi yena diyi akajilumunawu haya nyaaka. (Rom. 16:20) Dichi vwalenu yitwa yanjita yejima nawa twalekenuhu kuyizatisha. Bayi muzuñaña kankawenuku. Yikwashenuñaku amanakwenu niahela. Nawa londelenuña nshimbi jaYehova. Neyi mwila yumiyi, Tata yenu wamwiwulu wakayinka ñovu nikuyikiña.—Isa. 41:10. w21.03 30 ¶16-17

Tunateli kumukuhwelela ñahi Yehova? Kuhitila mukuzatisha nshimbi jatwinkañayi Yehova. MuBayibolu mudi nsañu yayivulu yamwekeshaña nawu chalema kudiwunjika nikumukuhwelela Yehova. Chimukudizaña iyi nsañu, talenu yuma yayikwashili ambuña aNzambi kutwalekahu kwikala adiwunjika hela chakwila amweneña ikañesha dasweja. Chakutalilahu, chelili chota chanyiloña cheneni chawaYudeya chiyileji apostolu nawu aleki kushimwina, hiyatiyili womaku. Ilaña ahosheli nawu: “Nzambi diyi nyuuli wutwatela kwovwahila bayi antuku.” (Yilw. 5:29) Nihanyima yakwila anayivupoli dehi yikoti, hiyatiyili womaku. Muloñadi? Muloña elukili nawu Yehova wadiña nawena. Wayitiyileña kuwaha. Dichi atwalekelihu kushimwina nsañu yayiwahi. (Yilw. 5:40-42) Nihampinji yamujahileñawu kambanji Stefwanu, waduñumikili chakwila “kumesu indi kwamwekeneña neyi kumesu akañelu.” (Yilw. 6:12-15) Muloñadi? Muloña welukili nindi Yehova wamutiyileña kuwaha. w21.01 4 ¶10-11

Chumichi chinakumwekesha nawu akweti chinleji chitooka nawa Yehova wayitiyaña kuwaha. (Isa. 1:18) Adihana, hiyakwaKristu apapatishewa, akweti chikuhwelelu chakola mumulambu waYesu nawa akweti wubwambu wawuwahi naYehova. (Yow. 3:36; 1 Pet. 3:21) Dichaletesha Nzambi yayitiyeña kuwaha nawa amukalakelaña mudimu wajila “mwaana niwufuku” hanu hamaseki. (Chim. 7:15) Chayinu mpinji, ashimwinaña nsañu yaWanta nikwilisha atumbanji nawa atwamijaku Wanta waNzambi kubadika yuma yawu. (Mat. 6:33; 24:14; 28:19, 20) Izaza deneni dikapuluka halukadi lweneni dakuhwelela nawu Nzambi wakatwalekahu kudakamena, muloña “Owu washakama hetanda wakalemena itenti dindi hadi wena.” Chikaninu chatalilaña nyikoku yikwawu chikamwekana, chikaninu chakwila nawu: “[Nzambi] wakakombola madilu ejima kumesu awu.”—Chim. 21:3, 4. w21.01 16 ¶9-10

Twatiyaña kuwaha hakwikala muchisaka chaYehova nawa wejima wetu twazataña nañovu kulonda twovwahileña antu atondayi Yehova kulombola chipompelu. Bayibolu yamwekeshaña nawu Yehova walemesha ambanda niamayala. Chakutalilahu, yamwekeshaña nawu mumafuku awapostolu Yehova wayinkeli ambanda niamayala spiritu yindi yajila nawa wayinkeli ñovu yakukoña nyidimu yakuhayamisha, yidi neyi kuhosha madimi ashiyashana. (Yilw. 2:1-4, 15-18) Ejima ambanda niamayala ayiwayisha naspiritu yajila kulonda akayuuli hamu naKristu. (Ñal. 3:26-29) Ambanda niamayala akayinka wumi wahaya nyaaka hanu hamaseki. (Chim. 7:9, 10, 13-15) Nawa wejima wawu ambanda niamayala ayinka mudimu wakushimwina nikudizisha nsañu yayiwahi. (Mat. 28:19, 20) Nawa, Bayibolu mumukanda waYilwilu yashimuna mudimu wazatili muhela wumu wejina daPirisila hamu nanfumwindi Akwila, kumulumbulwila chiwahi Apolosi chalala, iyala wadiña wataña chikupu.—Yilw. 18:24-26. w21.02 14 ¶1; 15 ¶4

Enu akulumpi, mudi namudimu walema wakukwasha akwakushimwina kukulukila mumudimu wakushimwina, nikuyikwasha adizisheña chiwahi atudizi awu aBayibolu. Neyi mukwakushimwina imunakuzata nindi natiyi nsonyi yakulombola himudi, lombolenu. Akulumpi anateli kuyikolesha nikuyisañumuna akwakushimwina anakulombola atudizi. (1 Tes. 5:11) Hela neyi chayinu mpinji tunakulombola wanyi kadizi, tunateli kukwasha muntu kuyilaku hambidi nakupapatishewa. Chatela tuswejeña kuhoshahu, neyi twaloñesha chiwahi tukumukwasha mukwetu wunakulombola kadizi. Twatela kudikundaña nawatudizi neyi anenzi nakupompa, nawa yilwilu yetu yayiwahi yinateli kuyikwasha. Nawa akulumpi anateli kukolesha atudizi neyi ekalaña nampinji yakuhanjeka nawu, nawa anateli kuyikolesha anakulombola atudizi neyi ayidizishaña nikuyihameka. Neyi twiluka netu tunakwashi muntu munjila yidi yejima kulonda yamukeñi nikumukalakela Tata yetu, Yehova, tukuzañalala. w21.03 13 ¶18-19

Muchihandilu, Davidi wazatileña nyidimu yamwinkeleñawu nawa amukuhweleleli. Chakutalilahu hadiñayi mukwenzi, wahembeleña chiwahi nyikoku yatata yindi. Wamweni kukala kwakuvulu hazatileñayi iwu mudimu. Nkumininaku, Davidi wamulejeli Mwanta Sawulu nindi: “Ami kambuñeyi hinahembelaña nyikoku yatata yami kwenjili nimutupa nibera hiyakukwata mwana kamukoku hamutaña; ami hinukuya kwadiñiyi hinukumutapa hinukumupulwisha mukanwa kindi.” (1 Sam. 17:34, 35) Davidi welukili nindi wadiña namudimu wakukiña nyikoku. Amanakwetu achidi atwansi niwena anateli kumwimbujola Davidi kuhitila mukuzata chiwahi nyidimu yejima yinayinkuwu. Kufuma tuhu kuwansi, Davidi wadiña nawubwambu wakola naYehova. Davidi walemesheli nankashi wubwambu windi naYehova kubadika chilwilu chakuhamuka chadiñayi nachu hela kwimba tudada. Yehova wadiña Nzambi yaDavidi nawa Ibwambu dindi, Ibwambu dindi chikupu. Amanakwetu atwansi, chuma chalema chimwatela kwila hikukolesha wubwambu wenu naTata yenu wamwiwulu. w21.03 3 ¶4-5