April

Komana munakumona kukala kweneni? Hadaha manakwenu muchipompelu nayineñeshi. (Yak. 3:2) Indi kwiji akwenu mumwazatilaña hela mumwatañilaña kushikola ayisehaña muloña mwamukalakelaña Yehova. (1 Pet. 4:3, 4) Indi kwiji antaña jenu anakuyikañesha kuya nakupompa hela kulejaku akwenu yuma yimwakuhwelela. (Mat. 10:35, 36) Neyi kukala kumunakumona kunakuyineñesha chikupu, hadaha munateli kutoñojoka jakuleka kumukalakela Yehova. Ilaña ilukenu chikupu nenu mukukala kwejima kumukumona, Yehova wukuyinka maana akuyikwasha niñovu yakuumika nachu. Yehova washimuna mwiIzu dindi chomikiliwu antu akwawu kukala hela chakwila adiña awanina wanyi. Muloñadi? Kulonda tudiziliku. Dihafumini Yehova yamuleji kapostolu Pawulu kusoneka iyi nsañu. Neyi tutaña iyi nsañu yikutukolesha nawa tukutwalekahu kuchiñeja. Ilaña, hakwila nawu iyi nsañu yitukwashi, hitwatela kukuminaña hohu dakutaña Bayiboluku. Twatela kwiteja nsona yihimpi yitoñojoka yetu nawa yitushiki hanyichima. w21.03 14 ¶1-2

Mwayimonaña ñahi antu imwashimwinaña nsañu yayiwahi? Komana mwayimonaña neyi tidiku yinahi dehi yinashiki hakwañula? Neyi dichi mwayimonaña, kudi yuma yisatu yikufumamu: Chatachi, mukushimwinaña mukunyakashana. Mpinji yakwaañula yinakehi; bayi mulabaku. Chamuchiyedi, mukuzañalalaña neyi mumona antu chinakwitejawu nsañu yayiwahi. Bayibolu yahosha nayu: ‘Antu aluñaña hampinji yakwaañula.’ (Isa. 9:3) Chamuchisatu, mukumonaña muntu wejima nenu nateli kwikala kambanji, dichi mukuhimpa njila yakuyishimwinamu kwesekeja nayuma yakeñawu. Yesu watoñojokeli wanyi neyi chadi kutoñojoka akwakumulondela nindi aSamariya kwila ekala atumbanji nehi. Ilaña wayimweni nindi anateli kwikala atumbanji twindi. Ninetu twatela kumonaña antu itwashimwinaña netu anateli kwikala atumbanji twaKristu. Kapostolu Pawulu watushila chakutalilahu chachiwahi chitwatela kulondela. Welukili yuma yakuhweleleliwu antu ashimwinineñayi, yuma yakeñeliwu nankashi nichamweniyi nindi anateli kwikala atumbanji twaYesu. w20.04 8-9 ¶3-4

Chatela mukunkululeña kwesekeja nayilwilu yamuntu, zatenuña nañovu kulonda mwiluki chinakutiyayi. Yehova diyi muntu watwiluka hohu chiwahi. Dichi mulombenuña kulonda yayikwasheña kumona akwenu neyi chayimonañayi nikwiluka chimwatela kuyitiyila wushona. Himwatela kutonda manakwetu hela muhela imwatela kutiyila wushonaku. Ejima wawu amonaña kukala neyi kwamweniyi Yona, Elija, Haga niLoti. Kakavulu adiletelaña kukala awenawu. Chakadi nikuhita mumbadi, mpinji yimu wejima wetu twadiñijilihu mukukala. Dihanafumi Yehova kutuleja nindi tudakameneña wumu namukwawu. (1 Pet. 3:8) Neyi tumwovwahila Yehova, tukwikala anuñañana nawamanakwetu niahela mukaayi kejima. Dichi tufwileña kuyitiyilila, kuyiluka nikuyimwekeshela wushona amanakwetu niahela. w20.04 18-19 ¶15-17

Yesu wamwekesheli chitwatela kumwovwahila Yehova. Dichi njila yimu yalema mutwamwovwahilaña Yehova hikulondela chikupu muntampu jaYesu. (Yow. 8:29) Hakwila tutwalekuhu kwenda muchalala, twatela kukuhwelela chikupu netu Yehova hiNzambi wachalala nawa netu yuma yejima yatulejañayi Mwizu dindi Bayibolu, yalala. Nawa twatela kukuhwelela cheñi netu Yesu diyi Mesiya akaniniwu. Antu amavulu makonu ajinookaña neyi chakwila Yesu amuwayisha kwikala Mwanta waWanta waNzambi. Yowanu wasoñamishili nindi kwadiña “akwakudimbana amavulu,” adi kuluwañesha antu abulili kudiloñesha kuhakwilaku chalala kutalisha hadi Yehova niYesu. (2 Yow. 7-11) Yowanu wasonekeli nindi: “Indi mukwakutwamba hinyi, komana hiyowu muntu wakaanaña nindi Yesu hidiyi Kristuku, tahindi?” (1 Yow. 2:22) Neyi tudizaña Izu daNzambi hiyanateli kutudimbaku. Chitwela mwenimu tukumwiluka Yehova niYesu. (Yow. 17:3) Nawa dihu hitukwiluka chikupu netu tukweti chalala. w20.07 21 ¶4-5

Njila yimu mutunateli kutondolwela kwikala “chuma chakumuhukesha” nachu mukwetu itunakutemuka nindi, hikulondela munakukeñayi chatela tufwileña hohu jitunakukeña. (Rom. 14:19-21; 1 Kor. 8:9, 13) Muniyi njila, hitwekala neyi chekala muntu wunakutemuka lufuchi lwatemukañawu antu afwilaña kuyinka isomuku. Awa akwakutemuka atoñojokaña hohu hakuditiyisha kuwaha aweni. Dichi anateli kushinjika mukwawu kulonda wena ekali kumbidi. Kwambukaku, etu hitwadichombeshañaku. (Ñal. 5:26; 6:4) Chuma chitwafwilaña hikukwasha antu amavulu kulonda tukashiki nawu kumufunda nikutambwila hamu wuloku wawumi wahaya nyaaka. Dichi twazatishaña kufumba ‘kwakufwila yuma bayi yatutiyishaña kuwaha etu aweni hohuku, chiña yuma yatiyishaña kuwaha niakwetu.’ (Fwi. 2:4) Mulufuchi lutwatemukaña, Yehova wayikana antu jindi kuyinka wuloku neyi atemuka nakushika kumufunda, wumi wahaya nyaaka chili mwiwulu hela muparadisa hamaseki. w20.04 28 ¶10; 29 ¶12

AkwaKristu amavulu amayala niambanda “[akafuma] mulukadi lwasweja” nakwiñila mwituña dadiha. Antu akapuluka akamona cheñi chakashindawu kufwa hampinji yakasañulawu yihita yawantu afwili dehi kunyima. Toñojokenu hamuzañalu wutukatiya hampinji yitukamona yumiyi! (Yilw. 24:15) Antu ejima ashinshika kudi Yehova akashinda cheñi kufwa kwaswanawu kudi Adama. Akashakama haya nyaaka. AkwaKristu ejima adiku makonu atela kuzañalala namazu akukundeja asonekeleliyi Pawulu aKorinda kutalisha hakusañuka. Tukweti yuma yayivulu yinateli kutuletesha kovwahila mazu aPawulu akuzata nankashi “mumudimu waMwanta.” (1 Kor. 15:58) Neyi tuzataña hakumina ñovu jetu muniwu mudimu, tukekala namuzañalu kumbidi. Ichi chihandilu chikawaha chikupu kubadika chuma chidi chejima chidiku makonu. Chumichi chikamwekesha nawu kudikita kwetu kutwadikitaña mudi Mwanta kwamukunkulwayi wanyi. w20.12 13 ¶16-17

Chinamwekani neyi wuprofwetu wudi haEzekeli 38:10-23; Danyeli 2:43-45; 11:44–12:1; niChimwekeshu 16:13-16, 21 wunakuhosha yuma yoyimu, neyi dimu wunatalishi, twatela kukuhwelela yuma yinalondelihu kumwekana. Hanyima yakwila lukadi lweneni lunatachiki, “anyanta ahanu hamaseki hejima” akadibomba. (Chim. 16:13, 14) Iku kudibomba akutenaña muNsona nawu “Gogi wamwituña daMagogi.” (Ezek. 38:2) Iku kudibomba kwanyuza kwakalukuka antu jaNzambi nakufwila kuyijiyisha chikupu. Kapostolu Yowanu washimwineñahu dehi haniyi mpinji nindi nvula yamalola yeneni yakanokela hadi ayilumbu jaNzambi. Iyi nvula yamalola yeneni yachifwikija hadaha hinsañu yawunsompeshi yikashimwinañawu antu jaYehova yakaletesha Gogi waMagogi kulukuka antu jaNzambi nakukeña kuyijiyisha heseki dejima.—Chim. 16:21. w20.05 15 ¶13-14

Spiritu yaNzambi yajila hichuma chikwawu chalema chabulaña kumwekana chitwatela kulemesha. Tunateli kumwekesha kusakilila chikupu haspiritu yajila neyi tutoñojoka hamudimu wuyinakuzata makonu. Henohu Yesu kanda yayi mwiwulu, wayilejeli atumbanji twindi nindi: “Mwakatambula ñovu neyi spiritu yajila yinenzi hadi enu, nawa mwakekala ayinsahu jami . . . nikwakumina iseki dejima.” (Yilw. 1:8) Nawukwashu waspiritu yajila, akwakudifukula aYehova akushika ku 8 miliyoni nachikunku anayipompeshi kufuma kutubadi twejima tweseki. Cheñi twadiluñishaña paradisa yakuspiritu muloña spiritu yaNzambi yatukwashaña kwikala nayilwilu yayiwahi yidi neyi kukeña, muzañalu, kuwunda, kudiwunjika, luwi, kuwaha, chikuhwelelu, kwovwaha nikudihemba. Iyi yilwilu diyi yatuña “nyikabu yaspiritu.” (Ñal. 5:22, 23) Spiritu yajila hichawaana chalema. w20.05 28 ¶10; 29 ¶13

Kudi yuma yayivulu yikuletesha tukuhweleli netu antu akayiluka antaña jawu akasañulawu. Yakutalilahu yawantu asañwiliwu kunyima yamwekeshaña nawu Yehova wakasañula antu kulonda akamwekaneña neyi chamwekeneñawu, chahosheleñawu nichatoñojokeleñawu henohu kanda afwi. Anukenu nenu, Yesu wesekejeli kufwa nakukaama mutulu nawa wesekejeli kusañuka nakuhinduka mutulu. (Mat. 9:18, 24; Yow. 11:11-13) Neyi antu anahinduki mutulu, mmwekenu yawu, nhoshelu yawu niyitoñojoka yawu yahimpikaña wanyi. Shinshikenu chakutalilahu chaLazaru. Mwahitili mafuku awana kufuma hafwiliyi nawa mujimba windi watachikili kutoka. Ilaña chamusañwiliwu kudi Yesu, ahela jindi amwilukili nawa hadaha niyena wayanukili.—Yow. 11:38-44; 12:1, 2. w20.08 14 ¶3; 16 ¶8

Awayishewa nianyikoku amakwawu ekala chochimu muloña wejima wawu alema kudi Nzambi. Cheñi, wayifweteleli wuseya wowumu, waMwanindi akeñayi kulonda yalandi nachu awayishewa nianyikoku amakwawu. Chaambu chidi hanawa mazanvu ayedi chidi chakwila nawu wejima wawu akweti kuchiñeja kwambuka. Ilaña wejima wawu atela kwikala ashinshika kudi Nzambi nikudi Kristu. (Mas. 31:23) Nawa ilukenu nenu spiritu yaNzambi yazatikaña chochimu kudi wejima wetu. Yehova wahanaña spiritu yindi yajila kudi antu ejima kwesekeja nachinakukeñayi Yehova wayinka ambuñindi adihana kuchiñeja kwakuwahi kumbidi. (Yere. 29:11) Chanukishu chakufwa kwaKristu chayinkaña awayishewa nianyikoku amakwawu mpinji yakumushimeka Nzambi niKristu hayuma yatwililayi kulonda tukadiluñisheña wumi wahaya nyaaka. Chanukishu dikupompa kwasweja kulema kwekalaña nawakwaKristu chaaka nichaaka. w21.01 18 ¶16; 19 ¶19

Antu amavulu enzaña kuChanukishu akweti kuchiñeja kwakushakama hamaseki. Hanu dinu muloñadi chayilañawu kuChanukishu? Afwilaña kwila neyi chelaña antu ayaña kuchawija chawulu webwambu dawu. Awa antu akeñaña kumwekesha nawu akeña antu anakudisumbula nawa anakukeña kuyikwasha. Munjila yoyimu, anyikoku amakwawu ayaña kuChanukishu muloña akeñaña kumwekesha kukeña kwawu nikukwasha Kristu niawayishewa. Anyikoku amakwawu ayaña cheñi kulonda amwekeshi kusakilila hamulambu waYesu, mulambu waletesha ekali nakuchiñeja kwakushakama hamaseki haya nyaaka. Chuma chikwawu chalema chaleteshaña anyikoku amakwawu ayeña kuChanukishu, hikwovwahila lushimbi lwaYesu. Yesu chatachikiliyi ichi chawija hamu nawapostolu indi wayilejeli nindi: “Dichi mwileña mwenimu hakuñanakana.” (1 Kor. 11:23-26) Dichi anyikoku amakwawu akutwalekahu kwanuka Kuda kwaMwanta kwaMelela chakala hohu awayishewa achidi hanu hamaseki. w21.01 17-18 ¶13-14.

Hakwila tuyikeñi nankashi awa antu, twatela kumwekeshaña muyilwilu netu twayikeña. (Esekejenu Yakoba 2:17, 26.) Chakutalilahu, Yehova watukeña. (1 Yow. 4:19) Nawa wamwekeshaña kukeña kwindi mumazu asonekayi muBayibolu. (Mas. 25:10; Rom. 8:38, 39) Tweluka netu Nzambi watukeña kuhitila muyuma yahoshañayi niyuma yelañayi. Yehova wetejeli iwu Mwanindi akeñayi kukabakana nikutufwila. (Yow. 3:16) Tweluka chikupu netu Yehova watukeña. Twamwekeshaña netu twamukeña Yehova niYesu kuhitila mukuyovwahila. (Yow. 14:15; 1 Yow. 5:3) Nawa Yesu watulejeli nindi tudikeñeña wumu namukwawu. (Yow. 13:34, 35) Hitwatela kumwekeshaña netu twayikeña amanakwetu niahela mumazu hohuku, ilaña nimuyuma yitwelaña.—1 Yow. 3:18. w21.01 9 ¶6; 10 ¶8.

Antu awayishawu naspiritu yajila akweti kuchiñeja kwakwikala naYesu haya nyaaka nikuyuula hamu nindi muWanta waNzambi. Akekalaña hamu naKristu, akamumonaña nikuhanjeka nindi. (Yow. 14:2, 3) Antu akweti kuchiñeja kwakushakama hamaseki niwena akatwalekahu kuyikeña kudi Yesu nikuyakamena. Hela chakwila akamumona Yesu wanyi, wubwambu wawu nayena wakakola chikadiluñishañawu yuma yayiwahi yakayililañawu kudi Yehova niYesu. (Isa. 9:6, 7) Neyi twiteja mutambi waYesu wakwikala amabwambu jindi, tukatambwila yuma yayiwahi yayivulu. Chakutalilahu, chayinu mpinji tunakumona chatukeñayi nichinakutukwashayi. Tukweti kukooleka kwakushakama haya nyaaka. Nawa chuma chasweja kulema, neyi twikala amabwambu jaYesu, tukwikala cheñi amabwambu jaTata yindi, Yehova. Hikukooleka chikupu kututena nawu amabwambu jaYesu. w20.04 25 ¶15-16

Kapostolu Pawulu wayisonekeleli mukanda akwaKristu awayishewa amuKorinda akasañulawu nawumi wamwiwulu. Awa akwaKristu ‘ayijilikili kwikala atumbanji twaKristu Yesu, atenañawu kwikala akwakujila.’ Nawa wateneni “ninowu aholokela dehi mutulu twakufwa mudi Kristu.” (1 Kor. 1:2; 15:18; 2 Kor. 5:17) Mumukanda wukwawu wamuBayibolu, Pawulu wasonekeli nindi ana ‘afwili neyi chafwiliyi [Yesu] niwena ‘akayisañula neyi chamusañwiliwu yena.’ (Rom. 6:3-5) Yesu amusañwili namujimba wakuspiritu nawa wayili mwiwulu. Dichuma chikayimwekena ejima “adi mudi Kristu,” dikwila nawu akwaKristu awayishewa. Pawulu wasonekeli nindi Kristu amusañwili neyi “mukabu watachi wanowu anaholokeli mutulu twakufwa.” (1 Kor. 15:20) Yesu diyi wadiña watachi kusañula kufuma mudi afu namujimba wakuspiritu nawa watambwilili wumi wahaya nyaaka. w20.12 5-6 ¶15-16

Awayishewa adiku makonu ashikenaña dakuyisañula hohenohu nakuya mwiwulu neyi anafwi. Chumichi chinesekani namazu akapostolu Pawulu adi ha 1 Akorinda 15:51, 52. Awa mazu aPawulu anakushikijewa. Chikayisañulawu awa amanakwaKristu akekala namuzañalu chikupu nawa akekalaña “hamu naMwanta mpinji yejima. Bayibolu yatulejaña mudimu wukazatañawu mwiwulu antu akahimpawu “mukulabula kwadisu.” Yesu wayilejeli nindi: “Muntu wemikaña mushindu nawa walondelaña nyidimu yami ndo-o nikunsa, nakamwinka wuswa hadi nyuza yejima, nawa iwu muntu wakabiñaña antu nakabama kachikuñu kulonda yakayibaloli neyi yuma yamawumba, neyi chinatambwila ami wuswa kudi Tata.”—Chim. 2:26, 27. w20.12 12 ¶14-15

Kapostolu Pawulu chamuteneniyi Yesu nindi “nyikaabu yatachi,” watalishili mukwila nindi kudi antu amakwawu akasañulawu nakuya mwiwulu. Apostolu niantu amakwawu “adi mudi Kristu” akamulondela Yesu. (1 Kor. 15:18) Hampinji yatelela niwena akayisañula neyi chamusañwiliwu Yesu. Kusañuka kwakuya mwiwulu kwawantu “adi mudi Kristu” kwadiña kanda kutachiki hampinji yayisonekeleliyi Pawulu aKorinda. Hela chochu, Pawulu wateneneña hampinji yakumbidi nindi: “Muntu-himuntu akamusañula kwesekeja nandonda yindi: Kristu diyi nyikabu yatachi, kuhiñahu antu jaKristu akayisañula hampinji yakwikalahu kwindi.” (1 Kor. 15:23; 1 Tes. 4:15, 16) Makonu tunakushakama mumpinji yateneniwu nawu “mpinji yakwikalahu” kwaKristu. Apostolu niakwaKristu amakwawu awayishewa afwili ahembeleleli kwikalahu kwaKristu kulonda akatambwili wuloku wawu wamwiwulu “nikudinuña hamu [naYesu] neyi chamusañwiliwu.”—Rom. 6:5. w20.12 5 ¶12; 6 ¶16-17

Kapostolu Pawulu wateneneña antu asañulañawu namujimba wamwiwulu, dikwila nawu ‘mujimba wakuspiritu.’ (1 Kor. 15:43, 44) Hampinji yadiñayi Yesu hamaseki, wadiña namujimba wawuntu. Ilaña chamusañwiliwu “wekalili spiritu yahanaña wumi” nawa wafuntili mwiwulu. Munjila yoyimu, akwaKristu awayishewa akayisañula nawumi wamwiwulu. Pawulu walumbulwili nindi: “Neyi chochitwafwana muntu aleñeliwu nalunkuñu, dichi chitwakafwana ninowu wafumini mwiwulu.” (1 Kor. 15:45-49) Ilukenu nenu Yesu hiyamusañwili namujimba wawuntuku. Dichi, Pawulu wahosheli nindi: “Mujimba wamashi hiwakaswana Wanta waNzambiku,” dikwila nawu mwiwulu. (1 Kor. 15:50) Apostolu niawayishewa amakwawu hiyakayisañula nakuya mwiwulu nanyijimba yanyisunyi yatokaña nawa yamashiku. w20.12 10-11 ¶10-12

Nzambi woneneni atumbanji twaYesu amakwawu mumafuku awapostolu kusoneka nsañu yakuchiñeja kwakuya mwiwulu. Kapostolu Yowanu walumbulwili nindi: “Ichi dinu tudi anyana kaNzambi, ilaña chitwakekala, kanda achisololi. Tweluka netu neyi yena anamusololi dehi, twakekala neyi yena.” (1 Yow. 3:2) Dichi akwaKristu awayishewa eluka wanyi chakekalawu neyi anayisañuli dehi nakuya mwiwulu nanyijimba yakuspiritu. Hela chochu, akamumona Yehova neyi anatambuli dehi wuloku wawu. Bayibolu yashimuna nsañu yantesha hachumichi. Awayishewa akekala naKristu “hampinji yakela najilumuni dehi nfulumendi jejima, niwuswa wejima niñovu jejima.” Munabombeli “chilumbu wakukumishaku, dikwila nawu kufwa.” Nkumininaku, Yesu niakwawu mwakayulilañawu hamu akadovwahisha nikuhana yuma yejima kudi Yehova. (1 Kor. 15:24-28) Iyi yikekala mpinji yamuzañalu! w20.12 8 ¶2

Akwakristu ashinshika abula kwikala nakuchiñeja kwakuya nakushakama hamu naKristu mwiwulu niwena akweti kuchiñeja kwakusañuka. Bayibolu yahosha nayu kapostolu Pawulu niantu amakwawu ayaña mwiwulu ‘ekala mukusañuka kwatachi kufuma mudi afu.’ (Fwi. 3:11) Komana chumichi chamwekeshaña nawu kwakekala kusañuka kukwawu hanyima yaniku kusañuka? Chumichi chinakwendela hamu nachahosheliyi Yoba kutalisha hayuma yikamwekana kumbidi. (Yoba 14:15) “Antu jaKristu hampinji yakwikalahu kwindi” akekala mwiwulu hamu naYesu hampinji yakela najilumuni dehi nfulumendi jejima, niwuswa wejima niñovu jejima. ‘Nichilumbu wakukumishaku, kufwa,’ akamujilumuna. Dichi antu ejima akasañulawu nakuya mwiwulu, hiyakafwa cheñiku. (1 Kor. 15:23-26) Antu akweti kuchiñeja kwakushakama hamaseki Atela kukuhwelela mazu ahosheliyi Pawulu adi munsona yalelu. Hela chochu, kwosi muntu wabula kuwanina watela kuya mwiwulu, dichi awa mazu amwekeshaña nawu kwakekala kusañuka kumbidi hanu hamaseki. w20.12 6-7 ¶18-19

Hela chochu, tunateli kudihula netu, ‘Nateli kwiluka ñahi nami chalala Yehova nañanakeni?’ Neyi mudihula ilu lwihu, chinakumwekesha nawu Yehova nateli kuyanakena. Yaaka yayivulu yinahitihu, Kaposhi Kakutalila kahosheli naku: “Tunateli kutwalekahu kukoña chiluwa chochimu. Hadaha tunakukañanya kuleka chilwilu chatama chitwadiña nachu henohu kanda tutachiki kumukalakela Nzambi. . . . Bayi tuzeyaku. Bayi mutoñojoka nenu munakoñi nshidi yinateli kubula kwanakenawu kudi Yehovaku. Dichakeñañayi Satana nindi mutoñojokeña. Neyi mutiya kutama hachiluwa chimunakoñi, chikumwekesha nawu himwatamaku nawa Yehova nateli kuyanakena. Twalekenuhu kwikala adizoza nawa lombenuña kudi Nzambi kulonda yayanakeni, yayikwasha kwikala nachinleji chitooka nawa yayikwashi kubula kufuntishahu chiluwa chochimu.” Henohu kanda yekali mukwaKristu, kapostolu Pawulu. wakoñeli nshidi jamaneni jajivulu. (1 Tim. 1:12-15) Ilaña wakuhweleleli nindi anateli kumwanakena muloña wefutu danyiloña nawa nindi hichawaana chamwinkeliwu kudi Nzambi. Dichi Pawulu walekeli kusweja kudinka nyiloña nawa washili maana hakumukalakela Yehova kwesekeja nahakumina ñovu yindi. w20.11 27 ¶14; 29 ¶17

Satana watwesekaña nayuma yayivulu kulonda tukoñi nshidi. Twelaña ñahi? Chinateli kwikala chaswayi kutoñojoka netu iyi yuma yatama wanyi. Chakutalilahu, tunateli kutoñojoka netu: ‘Kwila anhaña muchipompelu muloña wachumichi nehi, hichuma chatama wanyi.’ Yitoñojoka yamuchidiwu yaluwa. Twatela kudihula netu: ‘Komana Satana nakuzatisha iku kweseka kulonda nikali nanyichima yiyedi? Neyi niteja iku kufwila kwatama, nukuleta kasawuntu hejina daYehova? Yilwilu yamuchidiwu yinateli kunkojeja kuswina kwakwihi naNzambi tahindi nehi?’ Toñojokenuña chikupu hanawa malwihu. Lombenu maana kulonda mutweshi kwakula awa malwihu chakadi kutwamba. Kwila mwenimu kunateli kuyikiña. Chinateli kuyikwashaku kukaana kweseka, neyi cheliliyi Yesu hahosheliyi nindi: “Fumaku aha, eyi Satana!” (Mat. 4:10) Chatama kwikala nanyichima yiyedi. w20.06 12-13 ¶16-17

Twovwahilaña nshimbi jaYehova muloña tweluka netu Yehova diyi weluka yuma yinateli kutuwahila. (Efwe. 4:22-24) Kudizoza kwatukwashaña kulemesha yuma yakeñañayi Yehova kubadika yitwakeñaña nikumona akwetu netu atubadika. Chafumañamu, twekalaña nawubwambu wawuwahi naYehova ninawakwetu akwakwitiya. (Fwi. 2:3) Neyi kusoñama nehi, anateli kutuluwañesha kudi antu amukaayi kaSatana adivwimba nawa adikeña awenawu. Chinamwekani neyi akwaKristu amakwawu mumafuku awapostolu ayiluwañesheleña, muloña kapostolu Pawulu wayisonekeleli Aroma nindi: “Inakuleja muntu-himuntu hakachi kenu nami, bayi yatoñojoka nindi walema kubadika chekalayiku, ilaña muntu-himuntu yatoñojokeña kwesekeja nachekalayi.” Pawulu welukili nindi twatela kudilemesha etu aweni. Hela chochu, kudizoza kukutukwasha kubula kusweja kudilemesha etu aweni. w20.07 2 ¶1-2

Mumafuku aAsa, mpinji yakuwunda yamanini. Njita yeneni yamashidika akola 1 miliyoni, yenjili kufuma kuEtiyopiya. Mukulumpi wawu Zera, wakuhweleleli nindi yena nimashidika indi akumwimika Yuda mushindu. Ilaña Asa hakuhweleleli mukuvula kwamashidikaku, ilaña wakuhweleleli Nzambi yindi, Yehova. Asa walombeli nindi: “Tukwashuku eyi Yehova Nzambi yetu, muloña tunashindameni hadeyi, chitunenzi nakulwa naluntu ilu, tunenzi mwijina deyi.” (2 Kushi. 14:11) Hela chakwila mashidika awaEtiyopiya avulili chakwila mashidika aAsa akwiñilamu kwakwihi nakapampa kayedi, yena wakuhweleleli muñovu jaYehova niwuswa wakwamwina antu Jindi. Yehova wamukwashili nawa mashidika awaEtiyopiya ayimikili mushindu. (2 Kushi. 14:8-13) Hela chakwila tweluka wanyi yuma yejima yikatumwekena kumbidi hamuntu-hamuntu, ilaña tweluka netu mpinji yakuwunda yikwetiwu antu jaNzambi yakatwalekahu wanyi. Kafwampi, Yesu washimwineñahu dehi nindi mumafuku akukuminina, atumbanji twindi “akayihela kudi akwanyuza yejima.”—Mat. 24:9. w20.09 17-18 ¶14-16

Kwosi muntu wakeñaña kumutukaku. Hela chochu, neyi ayilumbu jetu atwituka nawa tushaku maana, tunateli kuzeya. (Yish. 24:10) Hanu dinu twatela kwila ñahi neyi ayilumbu jetu atwituka? Kufwana kapostolu Pawulu, tunateli ‘kutiya kuwaha . . . mumatuka.’ Muloñadi? Muloña neyi anakutwituka nikutudimbulula hichinjikijilu chinakumwekesha nawu tudi atumbanji twaYesu alala. (1 Pet. 4:14) Yesu wahosheli nindi atumbanji twindi akayikabishaña. (Yow. 15:18-20) Chumichi chamwekeni mumafuku awapostolu. Munana mafuku, antu aluwankeni nachisemwa chawaGiriki ayimweneña akwaKristu nawu hiyantu abula maana nawa nawu azeya. Nawa hakachi kawaYudeya, akwaKristu ayimweneña nawu “adiña ataña shikola wanyi ilaña adiña hohu neyi akwawu antu abulili kutaña,” adi neyi kapostolu Petulu niYowanu. (Yilw. 4:13) AkwaKristu ayimweneña nawu azeya nawa akiñewa wanyi. Dichi antu ayidiwili muchituñilu. Komana akwaKristu akusambila etejeli yuma yatama yahosheleña ayilumbu jawu kuyikañesha? Inehi. w20.07 14-15 ¶3-4

Kapostolu Yowanu wayikeñeli nankashi amanakwindi nawa wakeñeleña nindi ekali nachikuhwelelu chakola. Wamwekesheli iku kukeña munyikanda yisatu yayisonekeleliyi. Chatukoleshaña hakwiluka netu amayala niambanda akweti kukeña nawa akamenaña neyi Yowanu ayiwayisha kulonda akayuuli hamu naKristu. (1 Yow. 2:27) Tuzatisheña kufumba kwaheniyi. Tufwilenuña kwenda muchalala, nawa tumwovwahileña Yehova muyuma yonsu muchihandilu chetu. Dizenuña Izu dindi nawa kuhwelelenu chikupu idi Izu. Mukuhwelelenu nankashi Yesu. Kaanenuña maana awantu nintañishilu yawakwakusekesha. Bayi mumukalakeleña Yehova iku munakukoña yuma yatamaku nawa bayi mwiteja antu kuyikakeja kukoña nshidiku. Londelenuña nshimbi jaYehova. Nawa tukwasheña amanakwetu kwikala akola kuhitila mukwanakena antu atuneñeshaña nikukwasha antu anakankili. Tukutwalekahu kwenda muchalala hichikweti muloña nakukala kutunakumonaku. w20.07 24-25 ¶15-17

Yehova weteja ambuñindi ejima ashinshika kwikala muchipompelu chindi. Hela chakwila tukweti nyidimu yashiyashana, wejima wetu twalema nawa twatela kuzatilaña hamu. Kapostolu Pawulu wakonkomweneni nindi kwosi muntu wunateli kuleja mukwawu wamukalakelaña Yehova nindi “hinnakukukeña eyiku.” (1 Kor. 12:21) Hakwila muchipompelu mwikali kuwunda, twatela kudilemesha wumu namukwawu nikuzatila hamu. (Efwe. 4:16) Neyi twikala anuñañana, chipompelu chikwikala chakola nawa mukwikala muzañalu hama. Akulumpi ejima muchipompelu ayitondaña naspiritu yajila yaYehova. Hela chochu, ejima wawu akweti yawaana niwuswa washiyashana. (1 Kor. 12:17) Amakwawu hadaha anayitondi katataka nawa akulukila wanyi. Amakwawu anakuzata wanyi neyi chazatileñawu muloña wawushinakaji hela yikatu. Hela chochu, kwosi mukulumpi watela kuleja mukwawu nindi, “hinnakukukeña eyiku.” Ilaña mukulumpi wejima watela kulondela kufumba kwaPawulu kudi haAroma 12:10. w20.08 26 ¶1-2; 27 ¶4

Yehova watulombolaña munjila yaya kuwumi kuhitila mukuloñesha kwindi kwaheseki. Chakadi nikujina, neyi kudi kuhimpika hantañishilu yetu yashindamena haBayibolu ninshimbi, twayilondelaña. Hanu dinu twelaña ñahi neyi mukuloñesha kwaYehova mudi kuhimpika kunateli kuhimpa yuma yimu muchihandilu chetu,neyi alandisha Itala daWanta mutwapompelaña? Tukwikalaña namuzañalu neyi twanukaña netu mudimu wejima wutwazataña tunakumukalakela Yehova nawa netu diyi wunakulombola kuloñesha kwindi. (Kol. 3:23, 24) Mwanta Davidi wamwekesheli chakutalilahu chachiwahi hakuhanaku yawaana yakutuña nachu tembeli. Wahosheli nindi: “Ami yaminyi niantu ami hiyanyi mwaka tumoni ñovu jakutiya kuwaha kwakulambula mwejimimu? Muloña yuma yejima yafuma kudeyi tunakwinki yafuma kuchikasa cheyeyi aweni.” (1 Kushi. 29:14) Neyi tuhana yawana, ninetu twamwinkaña Yehova yuma yafumini kumakasa indi. Hela chochu, Yehova watiyaña kuwaha neyi tuzatisha mpinji yetu, ñovu nimaheta etu kulonda tukwashi mudimu wunakukeña kuzatayi.—2 Kor. 9:7. w20.11 22-23 ¶14-16

Chineli tudi aYinsahu jaYehova, hitwamonaña netu tunadikiti nankashi muloña wakuvula kwawantu itunaleti mukuloñesha kwaNzambiku. (Luka 8:11-15) Neyi tutwalekahu kushimwina nsañu yayiwahi nikudizisha antu, Yehova wukutumonaña nindi tunakudikita. Muloñadi? Muloña tunakumwovwahila yena niMwanindi. (Maku 13:10; Yilw. 5:28, 29) Kudi chuma chikwawu chinateli kutuletesha kushimwina swayi-swayi: Kukuma kwanshakaminu yamakonu kunakuswina kwakwihi. Mpinji yakuzata mudimu wakwamwina mawumi awantu yinakehi. Bayi mushintajala nakutoñojoka nenu mwakekala nampinji yayiwahi yakuzata iwu mudimu walemaku. Ikalenu neyena dakuzata, dizenuña Bayibolu, ikalenu ahamuka nawa difumbenuña. Dibombenu hakachi kawantu akubadika ha 8 miliyoni anakushimwina nsañu yayiwahi nawa mukumona muzañalu wafumaña kudi Yehova. (Nehe. 8:10; Luka 5:10) Fwilenuña kushimwina hakumina ñovu jenu nikutwalekahu kuzata sampu iwu mudimu wunamani. w20.09 7 ¶18-20

Hitwatela kufwila yuma yakumujimbaku. “Ñovu yakudimbana kwamaheta” yikuletesha tuleki kumukeña Yehova, tumoneña Izu daNzambi netu hidalemaku, nawa tukwikala nampwila yakushimwina wanyi. (Mat. 13:22) Neyi tunakukeña kukiña yuma yatwinkayi Yehova, twatela kuzatilahu swayi-swayi neyi tumona wubanji. Twatela kudiloñeshela chadimu chitukwila neyi tumona nyevulu yinakumwekesha yilwilu yawuvumbi, nyevulu yamadombu indi kwiji nsañu yawakwakusekesha hampinji yitunakusandujola haIntaneti, hitunakutala fwilimu hela progilamu yaha TV. Neyi tudiloñeshela chadimu hayuma yinateli kumwekana, tukuzatilahu swayi-swayi hakukiña wubwambu wetu naYehova nikwikala akadi ihuji kumesu indi. (Mas. 101:3; 1 Tim. 4:12) Twatela kukiña yuma yalema yatwinkayi Yehova, dikwila nawu, chalala chamuBayibolu nikukooleka kwakudizisha antu. Neyi twila mwenimu, tukwikala nachinleji chitooka, namuzañalu muchihandilu chetu, nimuzañalu wafumaña mukukwasha antu kumwiluka Yehova. w20.09 30 ¶16-19

Komana mwapapatishewa? Neyi mwapapatishewa, mwamwekeshili chikuhwelelu chenu mudi Yehova nawa nenu munakukeña kuzatila hamu nakuloñesha kwindi. Makonu, Yehova nakulombola kuloñesha kwindi munjila yamwekeshaña chekalayi, nkeñelu yindi ninshimbi jindi. Talenu yilwilu yisatu yaYehova yamwekanaña mukuloñesha kwindi. Chatachi, “Nzambi hakweti chaambuku.” (Yilw. 10:34) Muloña wakukeña, Yehova wahanini Mwanindi kwikala “ifutu danyiloña dakukuula nachu antu ejima.” (1 Tim. 2:6; Yow. 3:16) Yehova wazatishaña antu jindi kushimwina nsañu yayiwahi kudi antu ejima anakukeña kutiyilila, wakwashaña ejima kulonda aheteli mwifutu danyiloña. Chamuchiyedi, Yehova hiNzambi wakutela nawa wakuwunda. (1 Kor. 14:33, 40) Dichi, twatela kukuhwelela netu akwakudifukula indi atela kumukalakelaña mukutela nimukuwunda. Chamuchisatu, Yehova ‘hiNtañishi Wabadika.’ (Isa. 30:21) Dichi, kuloñesha kwindi kwasha muchima hakudizisha antu Izu dindi donenewa, muchipompelu nihakushimwina. w20.10 20 ¶1-3