March

Hitwakeñaña netu antu atuheliku. Nawa hitwakeñaña netu atukabisheña hamuloña wayuma yitwakuhwelelaku. Hanu dinu tukuzañaleladi neyi anakutuhela? Hamuloña waniyi yuma yisatu. Chatachi, neyi tuumika, Nzambi watutiyaña kuwaha. (1 Pet. 4:13, 14) Chamuchiyedi, chikuhwelelu chetu chakolelañaku. (1 Pet. 1:7) Nawa chamuchisatu, akatwinka wufwetu wabadika, wumi wahaya nyaaka. (Rom. 2:6, 7) Hashimbwili wanyi kufuma hamusañwiliwu Yesu, apostolu ekalili namuzañalu wateneniyi Yesu. Chelili ayivupoli nawa ayilekeshi kushimwina wena azañaleli. Muloñadi? “Muloña ayisawili hamuloña wakuzatisha ijina [daYesu].” (Yilw. 5:40-42) Amukeñeli chikupu Mwanta wawu nawa hiyatiyili woma kuyikabisha kudi ayilumbu jawuku. Nawa amwekesheli kukeña kwawu kuhitila mukushimwina nsañu yayiwahi ‘chakadi kuleka.’ Amanakwetu amavulu makonu, anatwalekihu kwikala ashinshika hela chakwila anakumona yihuñu. Eluka nawu Yehova hamba kavulamena mudimu wawu hela kukeña kwakeñawu ijina dindiku. w21.03 25 ¶18-19

AkwaKristu awayishewa hiyavwalikaña nakuchiñeja kwakuya mwiwuluku. Nzambi diyi wayinkaña iku kuchiñeja. Atoñojokaña haniku kuchiñeja kwawu, alombelañahu nawa afwilaña kutambwila wuloku wawu wamwiwulu. Eluka wanyi chikekala nyijimba yawu mwiwulu. (Fwi. 3:20, 21; 1 Yow. 3:2) Hela chochu, atalilaña mpinji yakaswanawu Wanta wamwiwulu. Anyikoku amakwawu atalilaña kuchiñeja kwakushakama hamaseki haya nyaaka, chuma chafwilañawu ejima. Atalilaña mpinji yakelishawu iseki dejima kwikala Paradisa, yakatuñawu matala awu, kudima matempa awu nikukulisha anyanawu nanyijimba yakola. (Isa. 65:21-23) Atalilaña cheñi mpinji yakahitañanawu iseki dejima nakumona jimpidi, mavunda, tuluñalwiji nikwiluka yuma yejima yaleñayi Yehova. Chuma chasweja kulema, azañalalaña hakwiluka nawu wubwambu wawu naYehova wukakolelaku. w21.01 18-19 ¶17-18

Chelili aBabiloni ajilumuni musumba, antu amweneña ahosheleña nawu: “Hichihembi chakadi antu hela anyama. Nenu Adihana dehi kudi aKaladeya.” (Yere. 32:43) Chimwahitili yaaka 200 kufuma haprofweteliyi Yoweli, Yehova wamuzatishili Yeremiya kushimunañahu dehi nsañu yikwawu kutalisha haniku kulukuka. Wahosheli nindi akwakulukuka akakeñakeña chikupu nikukwata aIsarela elileña yuma yatama, dikwila nawu kuyikwata ejima wawu. ‘Tiyenu Yehova nindi Ami nakatambeka akwakulowa anshi amavulu akayilowa. Nakalondeshamu ayibinda amavulu akayizombazomba kumpidi jamaneni jejima nikumpidi janyanya jejima nimumpaku jamumalola. . . . Nakayifwetesha kuluwa kwawu nanshidi yawu.’ Tuluñalwiji hela yinkalampata hiyatwesheli kuyisweka awa aIsarela abulileña kubalumuka mumuchima kudi eni Babiloniku.—Yere. 16:16, 18. w20.04 5 ¶12-13

Hampinji yasweja kulema muchihandilu chindi, Loti washintajalili kovwahila mwamulejeliwu kudi Yehova. Tunateli kukunkulula netu Loti washiliku wanyi maana hela netu wadiña nakadiwu. Hela chochu, Yehova hamulekeliku. Dichi añelu enjili nakuyikwata kumakasa nichisaka chindi nakuyifumisha mumusumba “muloña Yehova wamutiyilili luwi.” (Kutach. 19:15, 16) Yehova watela wamutiyilili Loti luwi muloña wayuma yimu. Hadaha Loti wadiña nakulabajala kufuma mumusumba muloña wadiña nakuchiina antu adiña hanji yamusumba. Mwadiña cheñi wubanji wukwawu. Chinamwekani neyi Loti welukili anyanta ayedi aholokeleli muchinekineki chadiña kwakwihi mwadiña manonokela. (Kutach. 14:8-12) Chineli wadiña nachisaka, Loti watela wadiña nakwakama muloña wachisaka chindi. Kubombelahu, Loti wadiña namaheta, hadaha wadiña netala dadiwahi muSodoma. (Kutach. 13:5, 6) Hela chochu, yuma yejimiyi hiyadi kumukañesha Loti kumwovwahila Yehovaku. Ilaña, Yehova hashili maana hayiluwa yaLotiku nawa wamumweni nindi ‘himuntu waloña.’—2 Pet. 2:7, 8. w20.04 18 ¶13-14

Amanakwetu atwansi hanateli kuhita mpinji hakwila antu anakuyimona chimunakukula atachiki kuyimona nawu munakuli. Ilaña mwatela kwiluka chikupu nenu Yehova hashaña maana hachimunakumwekanaku. Wayiluka chachiwahi nawa weluka niyuma yimukutwesha kwila. (1 Sam. 16:7) Koleshenu wubwambu wenu naNzambi. Davidi wakolesheli wubwambu windi naNzambi kuhitila mukushinshika hayuma yaleñayi Yehova. Davidi watoñojokeleña chikupu hayileñaleña chiyamudizishileña hadi Nleñi. (Mas. 8:3, 4; 139:14; Rom. 1:20) Chuma chikwawu chimunateli kwila hikulomba kudi Yehova kulonda yayinki ñovu. Chakutalilahu, komana akwenu imwatañaña nawu kushikola ayisehaña hamuloña wakwikala Chinsahu chaYehova? Neyi ayisehaña mulombenu Yehova kulonda yayikwashi kuumika iku kukala. Nawa zatishenuña yuma yekala Mwizu daNzambi nimunyikanda yetu yashindamena haBayibolu nimavidiyo. Neyi mumona Yehova chinayikwashiyi kumanisha kukala kumu, mukusweja nikumukuhwelela. Kubombelahu, neyi antu amona chimwamushindamena chikupu Yehova, akuyikuhwelela. w21.03 4 ¶7

Ebwambu namuntu adilejaña yuma yejima. Komana dichekala niwubwambu wetu naYehova? Eña. Yehova wahanjekaña nanetu kuhitila Mwizu dindi, dimu mwatulejelañayi yitoñojoka yindi nichatiyañayi. Twahoshaña nindi mukulomba nawa tunateli kumuleja yitoñojoka yetu nichitunakutiya. Chineli hibwambu detu watukeña, Yehova watiyaña kulomba kwetu nawa watwakulaña. Mpinji yikwawu watwakulaña swayi. Ilaña mpinji yikwawu twatela kutwalekahu kulomba hakukala kokumu. Dichi, twatela kukuhwelela netu wukakula kulomba kwetu hampinji yatelela. Hela chochu, Nzambi nateli kwakula kulomba kwetu munjila yambukaku nachitunakukuhwelela. Chakutalilahu, chatela yamanishi kukala, nateli kutwinka maana niñovu “yakuumikilamu oku kweseka.” (1 Kor. 10:13) Tunateli kumwekesha ñahi kusakilila hanichi chawaana chalema chakulomba? Njila yimu hikwovwahila iku kufumba kwalema kwakwila nawu “lombenuña mpinji yejima.”—1 Tes. 5:17. w20.05 27-28 ¶7-8

Akwakutemuka lufuchi atemukaña mulufuchi lwachintampu chachilehi ashaña maana kumbindi kulonda abuli kuhukana. Neyi adimbuka, anyamukaña nakutwalekahu kutemuka. Hiyashaña maana hachuma chinayihukeshiku, ilaña ashaña maana hakushika kumufunda nihesomu dinakufwila kutambwilawu. Mulufuchi lutwatemukaña, tunateli kuhukana mapampa kakavulu, kuluwañesha munhoshelu hela muyuma yitwelaña. Indi kwiji akwetu itunakutemuka nawu anateli kwila chuma chinateli kutuneñesha. Twatela kukuhwelela chumichi kumwekana. Wejima wetu twawanina wanyi nawa wejima wetu tunakutemukila munjila yanyanya yaya kuwumi. Mpinji yikwawu “tukudihumaña” wumu namukwawu nikwikala “namuloña” kudi wumu namukwawu. (Kol. 3:13) Dichi, chatela tusheña muchima hachuma chinatuhukeshi, tusheña muchima hesomu didi kumbidi nikutwalekahu kutemuka. Neyi tunahili nawa tukaana kunyamuka, hitukashika kumufunda nikutambwila isomuku. Kubombelahu, tunateli kwikala akwakuhukesha akwetu anakuzata nañovu kutemukila munjila yanyanya yaya kuwumi. w20.04 26 ¶1; 28 ¶8-9

Kaprofwetu Danyeli washimwini nfulumendi jawantu jinakabishi antu jaNzambi. Anayilumbululi neyi yiidi yamukishi weneni wachikuñu. Nfulumendi yawantu yakukumishaku anayimwekeshi nawu himadatilu amukishi akutuña nachikuñu chadibomba newumba. Awa madatilu emenañaku Anglo-America Wanta waÑovu Wakaayi. Iwu wuprofwetu wunamwekeshi nawu wakayuulaña nichakenza Wanta waNzambi nakujilumuna nfulumendi jawantu. Kapostolu Yowanu niyena walumbulula mawanta añovu mukaayi anakabishi antu jaYehova. Muwuprofwetu waYowanu iji nfulumendi jinakwimenaku kanyama wamwisaña chisumi wanyitu 7. Mutu wamu 7 waniwu kanyama chisumi wemenañaku Anglo-America Wanta waÑovu waKaayi. Chumichi chalema muloña iwu kanyama hiyanamumwekeshihu nawu nameni mutu wukwawuku. Mutu wamu 7 waniwu kanyama chisumi nakuyuula nihampinji yanenziyi Kristu nanjita yindi yamwiwulu nakujilumuna iwu mutu nikanyama wejima.—Chim. 13:1, 2; 17:13, 14. w20.05 14 ¶11-12

Tweluka netu Nzambi diyi waleñeli wumi, ilaña awa amazu anakutwanukisha nawu kudi Nzambi dikwafumaña kukeña. Yehova watukeña. Kukeña kwindi kwatukwashaña kwikala akiñewa, kwikala namuzañalu. AkwaKristu hiyatela kutondahu kumwekesha kukeña hela kubula kukumwekeshaku. Ilu hilushimbi. (Mat. 22:37-40) Neyi tumwiluka Yehova chikupu chinateli kwikala chaswayi kwovwahila lushimbi lwindi lwatachi. Muloña Yehova waloña, watwakamenaña nawa watutiyilaña wushona. Ilaña chinateli kutukalila kwovwahila lushimbi lwamuchiyedi. Muloñadi? Muloña amanakwetu niahela, dikwila nawu antu adi hakachi kawakwetu itwadikundaña nawu chikupu, hiyawaninaku. Mpinji yikwawu anateli kuhosha nikwila yuma yinateli kutuneñesha. Yehova welukili nindi chinateli kutukalila kwovwahila ilu lushimbi. Dichi, wazatishili ansoneki amakwawu aBayibolu kutudizisha chitwatela kumwekesha kukeña kudi wumu namukwawu nichakukumwekesha. Muntu wumu hakachi kanawa ansoneki hikapostolu Yowanu.—1 Yow. 3:11, 12. w21.01 8 ¶1-2

Hela chakwila tunamukalakeli Yehova hadi yaaka yayivulu hela yantesha, twatela kudihula netu; ‘Komana inakushinda kweseka kwaSatana kukunletesha kwikala nanyichima yiyedi?’ Chakutalilahu, neyi mumona mwevulu wanzekesi haTV hela haintaneti mwelaña ñahi? Chinateli kwikala chaswayi kutoñojoka nawu ona mwevulu hela muvwimbimbi himwevulu wanzekesiku. Komana hichinateli kwikala chuma chazatishañayi Satana kulonda mwikali nanyichima yiyediku? Iwu mwevulu tukuwesekeja kukachikuñu katwa kazatishañayi muntu kubalula nachu mutondu. Chatachi weñijaña wumwemu wanichi chikuñu mumutondu. Nkumininaku neyi yachipopa nankashi mumutondu, mutondu wukwambuka hakachi. Iwu mwevulu wudi neyi wumwemu wanichi chikuñu. Chuma chinateli kumwekana neyi chanyanya nawa chabula kufwana chinateli kukojeja muntu kukoña nshidi yinateli kwambula muchima windi nikufumpa kashinshi kindi. Dichi bayi mwiteja chuma chatama kwiñila mumuchima wenuku. Ikalenu namuchima wumu hohu wakwakama ijina daYehova. w20.06 11-12 ¶14-15

Twatela kutwalekahu kuyikwasha nikuyikolesha antu azeya. Kufwana mwana wajimbeli wamuchishimu chaYesu, awa antu akweti chineñi hanateli kushimbula hakwila nawu chimani. (Luka 15:17-24) Hadaha anazeyi kuspiritu muloña wakukala kwamweniwu mukaayi kaSatana. Twatela kuyikwasha kulonda amukuhweleli cheñi Yehova. Muchishimu chamukoku wajimbeli, Yesu walumbulwili nindi kabiña wasendeli mukoku hamafwiji nakumufuntisha hamukanka. Kabiña wazatishili mpinji yeneni niñovu hakwila yawani mukoku wajimbeli. Welukili nindi mukoku nazeyi, dichi watela kumusenda nakumufuntisha hamukanka. (Luka 15:4, 5) Twatela kuzatisha mpinji yeneni niñovu kulonda tukwashi azeya ashindi yuma yinakuyikañesha kumukalakela Yehova. Ilaña nawukwashu waspiritu yaYehova, Izu dindi ninyikanda yitwatambwilaña muchipompelu, tunateli kuyikwasha kukolesha wubwambu wawu naYehova cheñi. Dichi mwatela kwiteja neyi ayileja nawu mudizisheña muntu wazeya Bayibolu. w20.06 28 ¶14-15

Wejima wetu twatela kumwekeshaña kukeña, chinjikijilu chakuyilukilaku nachu akwaKristu alala. Ilaña cheñi twatela kwikala “nakwiluka kwalala nikashinshi kakeni.” (Fwi. 1:9) Neyi nehi anateli kutuluwañesha “[nantañishilu] yakutwamba yawantu adimbaña akwawu,” nikudi akwakusekesha. (Efwe. 4:14) Chelili atumbanji akusambila amavulu aleki kumulondela Yesu, kapostolu Petulu wahosheli chakufuma hamuchima nindi Yesu “wukweti mazu awumi wahaya nyaaka.” (Yow. 6:67, 68) Hela chakwila haniyi mpinji Petulu welukili wanyi yuma yejima yahosheleñayi Yesu, wadiña washinshika muloña welukili chalala hadi Kristu. Ninenu munateli kukuhwelela chikupu muyuma yatañishaña Bayibolu. Neyi mwila yumiyi, chikuhwelelu chenu chikwikala chakola hela munamoni kweseka nawa mukakwasha amakwawu kukolesha chikuhwelelu chawu.—2 Yow. 1, 2. w20.07 8 ¶2; 13 ¶18

Hakwila nawu tukwashi amanakwetu kutwalekahu kwenda muchalala, twatela kumwekesha wushona. (1 Yow. 3:10, 11, 16, 17) Twatela kudikeña wumu namukwawu mumpinji yayiwahi niyakala. Chakutalilahu, kudihu manakwetu hela muhela wumuneluki wunafwishi wunakukeña kukundejewa hela wunakukeña wukwashu wudi wejima? Indi kwiji munatiyi nawu akwetu akwakwitiya anajimbeshi yuma yawu muwubanji wadimwekenaña anakukeña kuyikwasha kutuñulula Matala aWanta hela matala awu? Twamwekeshaña netu twayikeña nikuyitiyila wushona amanakwetu niahela muyuma yitwahoshaña niyitwelaña. Neyi tudikeña wumu namukwawu dikwila nawu tunakumwimbujola Tata yetu wamwiwulu wukweti kukeña. (1 Yow. 4:7, 8) Njila yimu yalema mutwamwekeshelaña kukeña hikudanakena wumu namukwawu. Chakutalilahu, muntu nateli kutuneñesha, ilaña yenza nakudanakena. Twamwekeshaña kukeña kuhitila mukumwanakena nikuvulamenaku.—Kol. 3:13. w20.07 24 ¶14-15

Komana muntu himuntu akamudizishaña neyi chitunakudizisha antu Bayibolu makonu? Komana awa antu amaha akekala muyipompelu kulonda akayidizisheña chakudizisha antu akasañuka hanyima yawu? Tuneluki wanyi, twatela kuhembelela. Hela chochu, tweluka netu hakumana kwaChiyuulu chaYaaka Ikombakaji daKristu, “iseki dejima dakawanina kumwiluka Yehova.” (Isa. 11:9) Twakadiluñisha nanyidimu yayivulu mwikombakaji dayaaka. Muchiyuulu chaYaaka Ikombakaji daKristu, anyana kaYehova ejima aheseki akatwalekahu kuhimpa yilwilu yawu kulonda akamuzañalesha yena. Dichi wejima wawu akadakamenaña wumu namukwawu hampinji yikakwashañawu antu akasañuka kuhimpa yilwilu yawu yatama kulonda akashakameña kwesekeja nanshimbi jaYehova. (1 Pet. 3:8) Chakadi nikujina antu akasañuka akamona antu jaYehova chadizozawu nichiyakatwalekahu kuhimpa yilwilu yawu kulonda kumuzañalesha Yehova nawa akadifukulaña hamu nawu.—Fwi. 2:12. w20.08 16 ¶6-7

Neyi tuzatisha kufumba kwakapostolu Pawulu kwonenewa nawa tudishinshika chidi yilwilu yetu, tukutachika kwiluka netu tukweti yawaana niwuswa wabula akwetu. Chakutalilahu, mukulumpi hanateli kwikala nachawaana chakuhana jimpanjiku, ilaña nateli kwikala nachawaana chakwilisha atumbanji. Indi kwiji weluka wanyi kuloñesha yuma chiwahi neyi akwawu akulumpi muchipompelu, ilaña akwakushimwina anateli kumwiluka nawu hikabiña wukweti luwi nikukeña nawa waswayi kusolomoka neyi anakukeña wukwashu kushindamena haNsona. Hela nateli kwikala nejina dadiwahi muloña wachisambu. (Heb. 13:2, 16) Neyi twiluka wuswa wetu niyawaana yitukweti, tunateli kutiya kuwaha hakwiluka netu kudi mudimu wutunateli kuzataku muchipompelu. Nawa hitukutiyilaña ichima amanakwetu akweti yawaana yambukaku nayetuku. Hichikweti muloña namudimu wutukweti muchipompeluku, wejima wetu tuwahisheñaku nzatilu yetu nikwikala antañishi amawahi. w20.08 24 ¶16-18

Mpanji yahosheleña nawu, “Izaza Deneni,” ayihanini kudi manakwetu J. F. Rutherford hakupompa kweneni kwadiñaku muWashington, D.C., U.S.A. mu 1935. Mumpanji yahaniniyi Manakwetu Rutherford, walumbulwili “izaza deneni” (King James Version), dashimunawu haChimwekeshu 7:9. Kushika tuhu nihaniyi mpinji, Atudizi aBayibolu elukili nawu izaza deneni dadiña hiizanvu dawantu akaya mwiwulu abulili kwikala ashinshika nankashi neyi awayishewa. Manakwetu Rutherford walumbulwili kuzatisha Nsona nindi izaza deneni hiyaditondaña kuya nakushakama mwiwuluku, ilaña hinyikoku yikwawu yaKristu yikapuluka lukadi lwasweja nawa yikashakama hamaseki haya nyaaka. (Chim. 7:14) Yesu wakanini nindi: “Nikweti anyikoku amakwawu, ilaña hiyamwiyinda dinuku; awa anyikoku niwena natela kuyileta mudinu iyinda, niwena akatiya izu dami nawa akekala mukanka wumu nikabiña wumu.” (Yow. 10:16) Awa anyikoku amakwawu hiyaYinsahu jaYehova ashinshika akweti kuchiñeja kwakushakama hamaseki muParadisa haya nyaaka.—Mat. 25:31-33, 46. w21.01 14 ¶1-2

Twatela kudifumba hakwila nawu tuumiki nikumanisha mudimu wetu. (Mat. 28:19, 20) Hitwaswanaña chilwilu chakudifumbaku. Kakavulu twelaña yuma yitwamonaña netu yapela. Ilaña mpinji yikwawu yuma yalema yitwatela kwila, yapela wanyi kuyila. Dichi twatela kudiyuula hakwila nawu tudifumbi. Yehova watukwashaña naspiritu yindi yajila. (Ñal. 5:22, 23) Kapostolu Pawulu wadiña nakudifumba. Ilaña washimwini nindi wadiña ‘nakufumba’ mujimba windi kulonda yeleña yuma yaloña. (1 Kor. 9:25-27) Wayikonkomweneni akwawu nindi adifumbeña nawa eleña yuma yejima “mukutelela nawa mukuloña.” (1 Kor. 14:40) Twatela kuzata nañovu hakwila tutwalekihu kudifukula kudi Yehova, munabombeli kushimwina nikushimwina.—Yilw. 2:46. w20.09 6-7 ¶15-17

Mumatuña amavulu makonu, twashimwinaña chakadi kutukañesha. Mwashakamaña mwituña mwayitejawu kudifukula? Neyi ayiteja, dihulenu nenu, ‘Inakuzatisha ñahi iku kusubuka?’ Munanu mafuku akukuminina, kuloñesha kwaYehova kunakulombola mudimu weneni wakushimwina nikudizisha wabulahu dehi kuzatika mukaayi. Kudi nyidimu yayivulu yatela kuzatawu antu jaYehova. Munateli kuzatisha ñahi chiwahi mpinji yakuwunda? (2 Tim. 4:2) Munateli kushinshika chidi yuma kulonda mumoni neyi chakwila enu hela wumu muchisaka chenu nateli kuzataku chikupu mumudimu wakushimwina, hadaha kuzataku wupayiniya. Ayinu himpinji yakudivulishila maheta niyuma wanyi, yuma yitwakabula kupuluka nayu halukadi lwasweja. (Yish. 11:4; Mat. 6:31-33; 1 Yow. 2:15-17) Akwakushimwina amavulu anadizi madimi acheñi kulonda ashimwineña nikudizisha munawa madimi. Kuloñesha kwaNzambi kunakuyikwasha kuhitila mukwidisha nyikanda yashindamena haBayibolu mumadimi amavulu mumadimi akubadika ha 1,000. w20.09 16 ¶9-1

Mushidika wamuwahi washinshika. Wazataña nañovu kukiña muntu akeñayi hela chuma chalemeshayi. Pawulu wamukolesheli Timotewu kumwakama Nzambi, dikwila nawu kwikala washinshika kudi Nzambi. (1 Tim. 4:7) Neyi tusweja kumukeña Nzambi nikumwakama, mpwila yetu yakukwatisha chalala yikuswejelaku chikupu. (1 Tim. 4:8-10; 6:6) Ishidika watela cheñi kuzata nañovu kulonda ekali wadiloñesha kuzuña njita. Timotewu watwelekelihu kwikala wakola kuspiritu muloña watiyilili kufumba kwaPawulu kwakwikala nayilwilu yayiwahi, kudikunda nawakwawu akwakwitiya nikutemuka kufwila kwatama. (2 Tim. 2:22) Hakwila eli mwenimu wateleleli kudidizisha kwila yuma yaloña. Twatela kudidizisha kwila yuma yaloña hakwila tushindi njita yakufwila yuma yakumujimba. (Rom. 7:21-25) Kubombelahu, twatela kudifumba kulonda tutwalekihu kusubula wuntu wawukulu nakuvwala wuntu wawuha. (Efwes. 4:22, 24) Nawa neyi tunazeyi hanyima yakuzata, twatela kudinkaku kuya nakupompa.—Heb. 10:24, 25. w20.09 28 ¶9-11

Twatela kwikala adiwunjika neyi tunakukwasha atudizi kulonda adihani nikupapatishewa. Ilaña mpinji yikwawu twatela kwiluka neyi chakwila nakufwila kumukalakela Yehova Nzambi. Komana kadizi nakumwekesha nindi nakulondela nshimbi jaYesu? Tahindi nakukeña hohu kwiluka nsañu yamuBayibolu? Mpinji yejima monenuña chinakuyilaku kadizi hambidi. Chakutalilahu, komana wamwekeshaña nindi wamukeña Yehova? Walombaña kudi Yehova? (Mas. 116:1, 2) Komana watañaña Bayibolu? (Mas. 119:97) Wapompaña mpinji yejima? (Mas. 22:22) Komana nahimpi yilwilu yindi? Natachiki kulejaku chisaka chindi niakwawu yuma yinakudizayi? (Mas. 9:1) Chuma chabadika kulema, komana nakukeña kwikala Chinsahu chaYehova? (Mas. 40:8) Neyi kadizi nakwila wanyi iyi yuma, mwihulenu mukubabala chuma chinakuletesha nawa hanjekenu nindi chachiwahi nawa chakadi kuhita mumbadi. w20.10 18 ¶14-15

Tata yaYesu wamwiwulu wafuukulaña mwamuwahi mpinji yejima nawa anvwali jindi ahamaseki niwena afuukwili mwamuwahi. Hela chochu, Yesu chakuliliyi wafuukwilihu yomweni yuma yatela kwilayi. (Ñal. 6:5) Niyena wadiña nawuswa wakudifuukwila neyi wutukweti wejima wetu. Wadi kutondahu kwila yuma yakumutiyisha kuwaha bayi nkeñelu yaNzambiku. Ilaña wafuukwilihu kutwalekahu kwikala nawubwambu wawuwahi naYehova. Yesu chelukiliyi yuma yakeñeleñayi Yehova nindi yeli, wafuukwilihu kwila nkeñelu yaYehova. (Yow. 6:38) Welukili nindi akumuhela kudi antu amavulu. Hela chakwila hakeñeleña chuma chamuchidiwu kumumwekenaku, wafuukwilihu kumwovwahila Yehova. Chelili Yesu yapapatishewi mu 29 C.E.,washili muchima hakwila nkeñelu yaYehova muwumi windi. (Heb. 10:5-7) Nihampinji yafwileñayi hamutondu wakuyandishila, Yesu watwalekelihu kwila nkeñelu yaTata yindi.—Yow. 19:30. w20.10 29 ¶12; 30 ¶15

Kudihu amanakwetu hela ahela muchipompelu anakukabakana muloña wayikatu hela kukala kukwawu? Indi kwiji anafwishi ntaña yawu. Neyi twiluka muntu wunakuhita mukukala kwamuchidiwu, twatela kulomba kudi Yehova kulonda yatukwashi kuhosha hela kwilahu chuma chidi chejima. Hadaha yilwilu yitukumwekesha hela mazu itukuhosha akumukolesha manakwetu hela muhela. (1 Pet. 4:10) Neyi chamweniyi Pawulu niamabwambu jindi kukala, ninetu tunakumona kukala kwasweja kudi neyi mpepela yamankanda asweja. Hampinji yoyimu, tuneluki netu tunateli kuumika muloña Yehova wudi nanetu. Watukwashaña kuhitila mudi Yesu niañelu. Cheñi neyi yuma yinakwendela hamu nankeñelu yindi, Yehova nateli kutukwasha kuhitila mudi antu akweti wuswa. Neyi etu amakwawu chitunamoni muchihandilu chetu, Yehova wazatishaña spiritu yindi yajila kusañumuna nyichima yawambuña indi kulonda akwashi amanakwawu niahela. Kufwana kapostolu Pawulu, ninetu kudi yuma yikuletesha tuhoshi chakadi kujinoka netu: “Yehova diyi nkwashi yami; hinukutiya womaku. Chumanyi chikuñilayi muntu?”—Heb. 13:6. w20.11 17 ¶19-20

Apostolu adiña nawunsahu chikupu wamwekesheleña nawu Yehova wadiña nawena. Wayinkeli ñovu yakukoña yihayamisha. (Yilw. 5:12-16; 6:8) Ilaña etu Yehova watwinka wanyi ñovu yakukoña yihayamisha. Hela chochu, Yehova watulejaña mwiizu dindi nindi, neyi tunakukabakana hamuloña wakufwila kuloña, watutiyaña kuwaha nawa spiritu yindi yekalaña hadi etu. (1 Pet. 3:14; 4:14) Dichi bayi twakamaña hayuma yitwakela neyi anakutukabisha kumbidiku, ilaña twatela kuzata nañovu nakumukuhwelela chikupu Yehova netu nateli kutukwasha nikutwamwina. Twatela kukuhwelela muchikaninu chaYesu chakwila nawu: “Ami nakayinka mazu nimaana owu akakañanyawu akwakudikaña nenu ejima kuyikaana hela kuyitaadika.” Nawa atukana nawu: “Neyi mwakomika, mwakapulwisha mawumi enu.” (Luka 21:12-19) Nawa mwatela kwanukaña nenu Yehova wuchidi kuyanuka ambuña indi ashinshika afwa dehi kulonda yakayisañuli. w21.01 4 ¶12

Kapostolu Pawulu diyi wadiña watachi kuhosha hansañu yakusañuka wanyi. Ilaña nkakulula Yoba niyena wahoshelihu. Wakuhweleleli nindi Nzambi wakamwanuka nawa wakamusañula. (Yoba 14:7-10, 12-15) “Kusañuka kwawafu” ‘hichikuku’ hela “[hi]ntañishilu yatachi,” yakuhwelelawu akwaKristu ejima. (Heb. 6:1, 2) Nsañu yahosheliyi Pawulu hakusañuka yekala ha 1 Akorinda 15. Nsañu yasonekeliyi yatela yayikolesheli akwaKristu akusambila. Nawa aka kapetulu kakuyikwasha kukuhwelela chikupu nenu kukekala kusañuka. Kusañuka kwaYesu Kristu kwatukwashaña kukuhwelela netu antaña jetu afwa dehi akasañuka. Iyi nsañu yadiña hakachi ‘kansañu yayiwahi’ yayishimwininiyi Pawulu Akorinda. (1 Kor. 15:1, 2) Dichi wahosheli nindi neyi mukwaKristu wakuhwelela wanyi mukusañuka dikwila nawu chikuhwelelu chindi chamukunkulwayi.—1 Kor. 15:17. w20.12 2 ¶2-4

Chumanyi chamukwashili kapostolu Petulu? Wanukili nindi mpinji yimu Yesu walombeli nindi chikuhwelelu chaPetulu bayi chikazeyaku nawa Yesu wamulejeli Petulu nindi yafunti nakukolesha amanakwindi. Yehova wakwili iku kulomba kwakufuma hamuchima. Nkumininaku, Yesu wamwekeni kudi Petulu kulonda yamukoleshi. (Luka 22:32; 24:33, 34; 1 Kor. 15:5) Yesu wamwekeni cheñi kudi apostolu hampinji yachishiliwu wufuku wejima ilaña kukwatahu ninshi wumu nehi. Haniyi mpinji, Yesu wamwesekeli Petulu kulonda yamoni neyi wamukeña nankashi. Yesu wamwanakeneni ibwambu dindi wakeñeliyi nawa wamwinkeli kuzata nyidimu yayivulu. (Yow. 21:15-17) Chuma chakoñeliyi Yesu hadi Petulu chamwekeshaña nawu Yesu wukweti luwi neyi chekala Tata yindi. Dichi neyi tunaluwañeshi, hitwatela kutoñojokaña netu Yehova hakabula kutwanakenaku. Twatela kwanukaña netu Satana nakukeña nindi tutoñojokeña muniyi njila. Ilaña twatela kwanuka netu Yehova watukeña nawa weluka kuzeya-zeya kwetu, cheñi nakukeña kutwanakena neyi tuluwañesha. Dichi ninetu twatela kumwimbujola neyi akwetu ela chuma chinatuneñeshi.—Mas. 103:13, 14. w20.12 20-21 ¶17-19

Tunateli kudizila kudi antu akañenyi kudiwunjika nikumukuhwelela Yehova. Neyi tudizaña yuma yeliliwu awa antu, chinateli kutukwasha kutondolwela kukoña yiluwa yoyimu neyi yakoñeliwu. Chakutalilahu, kumatachikilu achiyuulu chaMwanta Asa, neyi Mwanta Asa wudi nakukala wadiña nakulomba kudi Yehova nindi yamukwashi. Chimwahitili mpinji walekeli kushindamena hadi Nzambi nindi yamukwashi, ilaña wafuukwilihu kumanisha kukala yomweni. (2 Kushi. 16:1-3, 12) Hakusambila chalombeliyi Asa wukwashu kudi aSiriya nindi amukwashiku kuzuña nawaIsarela yamwekeneña neyi hiyitoñojoka yayiwahi. Ilaña, hiyadiña mukuwunda nawaIsarela hadi mpinji yayilehiku. Yehova wamulejeli kuhitila mudi kaprofwetu nindi: “Chiwunashindameni hadi mwanta wakuSiriya kushindamena hadi Yehova Nzambi yeyi nehi dichi njita yamwanta wakuSiriya yinapuluki dehi kudeyi.” (2 Kushi. 16:7) Twatela kwikala asoñama kulonda tubuleña kutoñojoka netu tunateli kumanisha kukala etu aweni chakadi kulomba wukwashu kudi Yehova kuhitila Mwiizu dindi Bayibolu. Hela chakwila tunamoni kukala kunakukeñeka kuzatilahu swayi-swayi, twatela kudiwunjika nakumushindamena Yehova nawa nateli kutukwasha kufuukulahu chiwahi. w21.01 6 ¶13-15

Chayinu mpinji, antu jaYehova anakukabakana muloña wakubula kwikala namali akulandamu yakuda hela kukala kukwawu kunakwinza hamuloña wanjita. Amakwawu anakuyikasa muloña wachikuhwelelu chawu. Hela chochu, izaza deneni datiyaña kuwaha muloña deluka nawu hanyima yakujilumuka kwakanu kaayi katama, akekala nayakuda yayivulu yakumujimba niyakuspiritu. Hampinji yakajilumunañawu kaayi kaSatana, izaza deneni akadikiña kukuzuwa kwaYehova kudi neyi ‘nkanza yinakochana.’ Hanyima yakumana kwalukadi lweneni, Yesu wakalombola antu akapuluka “kumenji awumi [wahaya nyaaka].” (Chim. 7:17) Ilukenu nenu: Izaza deneni dikweti kuchiñeja kwambukaku. Antu amavulu akekalaku hiyakafwañaku! (Yow. 11:26) Nyikoku yikwawu yikweti kuchiñeja kwakuwahi hama kuyamusakililañahu Yehova niYesu! w21.01 16-17 ¶11-12

Hawufuku wakukumishaku muchihandilu chindi chawuntu hanu hamaseki, Yesu wadiña nakutoñojoka hakukala kwakamonawu atumbanji twindi. Yesu wayikeñeli nankashi amabwambu jindi, dichi wamulejeli tata yindi nindi “wuyihembi muloña wanowu watama.” (Yow. 17:14, 15) Yesu welukili nindi neyi nafunti dehi mwiwulu, Satana Diyabolu wukatwalekahu kulwa njita namuntu wejima wukukeña kumukalakela Yehova. Hamuloña wachumichi, antu jaYehova atela kuyikiña. Makonu tunakukeña netu Yehova yatukiñeña sweje-e chayinu mpinji. Satana amutemuna mwiwulu dichi, “nahili chikupu.” (Chim. 12:12) Naleteshi antu amakwawu kutoñojoka nawu neyi anakutukabisha “amuzatilaña Nzambi mudimu wajila.” (Yow. 16:2) Amakwawu abula kumukuhwelela Nzambi, atukabishaña hamuloña wakwila twambukaku nawantu amukaayi. Twatiyaña woma wanyi, hichikweti muloña nayuma yinaleteshi atukabishiku. Muloñadi? Ñakwilu yidi munsona yefuku dalelu. w21.03 26 ¶1, 3

Yuma yejima yelañayi Yehova wayilaña muloña wakukeña. Watwinkaña yakuda yakuspiritu. Yehova watuloñesheleli ifutu danyiloña muloña watukeña. Yesu niyena watukeña nankashi muloña wahanini wumi windi kukoola etu. (Yow. 3:16; 15:13) Kwosi chuma chinateli kuyambula antu ashinshika kukukeña kwayikeñawu kudi Yehova niYesuku. (Yow. 13:1; Rom. 8:35) Munjila yoyimu, yuma yejima yelañayi mutu wachisaka watela kuyilaña hamuloña wakukeña. Chumichi chalemenadi? Kapostolu Yowanu wakwili nindi: “Muntu wabula kukeña manakwindi [hela amuchisaka] amonañayi namesu, hakutwesha kukeña Nzambi abula kumonayiku.” (1 Yow. 4:11, 20) Iyala wakeña chisaka chindi nawa wakeña kumwimbujola Yehova niYesu, wakwashaña chisaka chindi kwikala nawubwambu naYehova nikuyikwasha kwikala akiñewa nikuyikeñela yuma yakumujimba. (1 Tim. 5:8) Wayidizishaña anyanindi nikuyifumba. Wafuukulaña cheñi yuma yikuleta kalemesha hadi Yehova nawa yikukwasha chisaka chindi. w21.02 5 ¶12-13

Tata yetu wamwiwulu weluka nindi kukala kutwamweni kwatuneñeshaña. Ilaña wamonaña cheñi yuma yayiwahi munyichima yetu, dikwila nawu yilwilu yayiwahi yitwabulaña kumona etu aweni. (1 Yow. 3:19, 20) Muntu wunakuzata nañovu nindi yaleki kwila yuma yatama nawa yafuntishahu cheñi chiluwa chochimu nateli kuneña. Hela chochu, chatama wanyi kudinka nyiloña neyi tunavulumuni. (2 Kor. 7:10) Ilaña bayi tuswejaña kudinka nyiloña nakutoñojoka netu: ‘Nidi wamukunkulwayiku. Yehova nateli kuñanakena wanyi.’ Yitoñojoka yamuchidiwu yatama nawa yinateli kutuletesha kuleka kumukalakela Yehova. Ilaña ‘tiyañanenu’ naYehova mukulomba nawa mulombenu yayanakeni. (Isa. 1:18) Neyi Yehova yamona nindi munabalumuki mumuchima, wukuyanakena. Kubombelahu, dimonenu nawakulumpi. Akuyikwasha kwikala cheñi nawubwambu wakola naYehova.—Yak. 5:14, 15. w20.12 23 ¶5-6

Yesu walemesheleña ambanda. Yesu hadiña neyi Afwarisi adiwileña ambandaku, wena hiyahanjekeleña nawambanda hadi antu amavulu hela kuhanjeka nawu haNsonaku. Ilaña, yena wahanjekeleña nawambanda niamayala nsañu yalema yamunyikanda yajila. (Luka 10:38, 39, 42) Wayitejeleña ambanda kuya hamu nindi nakushimwina. (Luka 8:1-3) Nawa Yesu wayinkeli ambanda kukooleka kwakuya nakushimuna kudi apostolu nindi anamusañuli. (Yow. 20:16-18) Kapostolu Pawulu wamulejeli Timotewu nindi yalemesheña ambanda. Pawulu welukili nindi mama yaTimotewu ninkaka yindi diwu amudizishili “nsona jajila.” (2 Tim. 1:5; 3:14, 15) Pawulu wayimushili ahela nakuyitena hamajina mumukanda wayisonekeleliyi Aroma. Welukili nyidimu yazatileñawu nawa wayihamekeli hanyidimu yawu.—Rom. 16:1-4, 6, 12; Fwi. 4:3. w21.02 15 ¶5-6