June

Antañishi atela kwakamenaña atudizi awu. Yimonenuña nenu akekala amanakwenu niahela kumbidi. Chinateli kuyikalila kuleka amabwambu jawu amukaayi nikuhimpa yuma yejima hakwila amukalakeleña Yehova. Antañishi aBayibolu akuluka yitembi kulejaku akwawu muchipompelu hadi atudizi awu kulonda ayikwasheñaku. Dichi atudizi aBayibolu akutachika kudikunda nawantu jaNzambi anateli kuyikwasha kwikala amabwambu jaYehova nikuyikwasha neyi adi nakukala. Tunakukeña kadizi kwiluka nindi himuntu wamuchipompelu nawa wamuchisaka chetu chakuspiritu. Tunakukeña yekali muchisaka chetu chawakwaKristu. Chumichi chikumukwasha kuleka kudikunda nawantu anateli kubula kumukwasha kumukeña Yehova. (Yish. 13:20) Neyi antu adikundileñayi nindi amudiwula, wukwiluka nindi nateli kuwana amabwambu alala mukuloñesha kwaYehova.—Maku 10:29, 30; 1 Pet. 4:4. w20.10 17 ¶10-11

Twatela kwikala amabwambu jaYesu hakwila nawu twikali nawubwambu wakola naYehova. Muloñadi? Shinshikenu yikuma yiyedi. Chatachi, Yesu wayilejeli atumbanji twindi nindi: “Tata yomwenindi wayikeña enu, muloña mwankeñeli.” (Yow. 16:27) Wahosheli cheñi nindi: “Kwosi muntu wunateli kwinza kudi Tata chakadi kuhitila mudi amiku.” (Yow. 14:6) Kukwata wubwambu naYehova chakadi kwikala amabwambu jaYesu chidi neyi kwiñila mwitala habula chiisu. Yesu wazatishili ichi chakutalilahu hadilumbulwileñayi nindi “yami chiisu heñililaña anyikoku.” (Yow. 10:7) Chamuchiyedi, Yesu wadiña nakwimbujola yilwilu yaTata yindi. Wayilejeli atumbanji twindi nindi: “Muntu wejima wunamoni ami, dikwila nawu namoni niTata.” (Yow. 14:9) Njila yimu yalema mutunateli kumwilukila Yehova hikwiluka chihandilu chaYesu. Chitukudizaña hadi Yesu, tukumukeña chikupu. Nawa neyi wubwambu wetu naYesu wukola, tukumukeña Tata yindi chikupu. w20.04 21-22 ¶5-6

Komana mwendaña wanyi muloña wayikatu hela wufwayi? Komana mwakata nyendu hela munakumona chiwahi wanyi? Neyi dimu, mukutwesha kutemukila hamu nawatwansi niantu akola kumujimba? Eña mukutwesha! Antu akula dehi niakata anakutemuka lufuchi munjila yaya kuwumi. Hiyazataña iwu mudimu nañovu jawuku. Ilaña afumishaña ñovu kudi Yehova kuhitila mukutiyilila kuprogilamu yinakwatiwu yakupompa kwawakwaKristu hela kutala vidiyo. Nawa azatañaku nimudimu wakwilisha atumbanji kuhitila mukuyishimwina andotolu, manensi niantaña jawu. Neyi munakukañanya kumuzatila Yehova muloña wayikatu, bayi muzeya nikutoñojoka nenu himukutwesha kuumika nakushika kunsaku. Yehova wayikeña muloña mwamukuhwelela nawa muloña mwomikaña. Yinu diyi mpinji yimwatela kumulomba wukwashu nawa hakayishiya kankawenuku. (Mas. 9:10) Ilaña wukuswina kwakwihi nanenu. w20.04 29 ¶16-17

Nsañwinyi yimunateli kuhanjeka namuntu wekala munsakililu? Ilukenu yuma yakuhwelelayi neyi diyi yimwakuhwelela. Hadaha wadifukulaña hohu kudi Nzambi wumu, hadaha wamwiluka Yesu nindi diyi Chamwinu chawantu ejima, indi kwiji wakuhwelela nindi tunakushakama mumafuku akukuminina. Zatishenu iyi yuma yimwakuhwelela nawa yakuhwelelayi kulonda muhanjeki nindi munjila yinateli kumusañumuna. Mwatela kwanuka nenu antu hiyanateli kukuhwelela yuma yejima yatañishañawu munsakililu yawuku. Neyi muneluki dehi nsakililu yindi, esekenuña kwiluka yuma yakuhwelelayi halwindi. Nawa manakwetu mishonali wamweni nindi amakwawu ahoshaña nawu akuhwelela mudi Anzambi aSatu, ilaña hiyakuhwelela nawu Tata, Mwana nispiritu yajila hiNzambi wumuku. Wahosheli nindi, “Neyi niluka chumichi chankwashaña kwiluka yuma yakuhwelelayi muntu yinesekani nayinakuhwelela.” Dichi esekenuña kwiluka yuma yakuhwelelawu antu. Kufwana kapostolu Pawulu, munateli “kwikala yuma yejima kudi antu ejima.”—1 Kor. 9:19-22. w20.04 10 ¶9-10

Hitwatela kwakama nayuma yikamwekana kumbidiku muloña Danyeli niYowanu anamwekeshi hatooka nawu ejima amukalakelaña Yehova niYesu akapuluka halukadi lwasweja. Danyeli wahosheli nindi antu akapuluka majinawu akekala “anayisoneki mumukanda.” Yumanyi yitwatela kwila hakwila nawu majina etu ayisoneki muniwu mukanda? Twatela kumwekesha hatooka netu twamukuhwelela Yesu, Mwana kaMukoku waNzambi. (Yow. 1:29) Twatela kudihana kudi Nzambi nikupapatishewa. (1 Pet. 3:21) Twatela kukwasha Wanta waNzambi kuhitila mukudikita chikupu kukwasha antu amakwawu kumwiluka Yehova. Yinu diyi mpinji yakumukuhwelela chikupu Yehova nikuloñesha kwindi mudi ambuñindi ashinshika. Ayinu diyi mpinji yakukwashaku Wanta waNzambi. Neyi twila mwenimu, tukapuluka hakajilumunañawu mwanta wakukabeta kakuchimunswa nimwanta wakukabeta kakuchidiilu kudi Wanta waNzambi. w20.05 16 ¶18-19

Adama naEva elukili ijina daYehova nawa elukili yuma yayivulu hadi mwini idi ijina. Elukili nawu diyi Nleñi, Wayinkeli wumi, Paradisa yayiwahi nawa wayinkeli ibwambu wawanina. (Kutach. 1:26-28; 2:18) Komana atwalekelihu kutoñojoka hayuma yejima yayinkeliwu kudi Yehova? Komana atwalekelihu kumukeña nikumwekesha kusakilila kudi Yehova? Ñakwilu yamwekeni chelili chilumbu chaNzambi yayeseki. Satana wazatishili kapela nakumwihula Eva nindi: “Chalala Nzambi nahoshi nindi, Nyitondu yejima yamwitempa bayi mwakayidyaku?” (Kutach. 2:16, 17; 3:1) Munilu lwihu mudi makudi adi neyi wulembi wafwana wakusweka. Ilaña Nzambi kwindi wahosheli nindi atela kuda tuhu kwawu nyitondu yejima, kufumishaku hohu mutondu wumu. (Kutach. 2:9) Satana wayiletesheli kutoñojoka nawu Nzambi wahanaña wanyi. Hadaha Eva wadihwili nindi, ‘Komana kudihu yuma yayiwahi yinakutukanishayi Nzambi?’ w20.06 3-4 ¶8-9

Ambuña aYehova amakwawu ayineñesheli kudi amanakwawu niahela. Kapostolu Pawulu welukili nindi mpinji yikwawu hakachi ketu hanateli kumwekana muntu wudi “namuloña namukwawu.” Hadaha atwilili chatama. Neyi tubula kusoñama, tunateli kudihilila. Kuhila kunateli nikumuleñela muntu kuleka kumukalakela Yehova. Manakwetu Pablo wakuSouth America amutwambilili nawu nakoñi chuma chatama chakwila amutambwili kukooleka muchipompelu. Welili ñahi? Pablo wahosheli nindi: “Nahilili nawa natachikili kufuma chovu-chovu muchipompelu.” Hela muntu wakoñeli nshidi kunyima, nateli kutwalekahu kudinka nyiloña nawa nateli kumona nindi Nzambi hamukeñaku. Hela chakwila wabalumukili mumuchima nawa amwanakeneni, nateli kutoñojoka nindi hashikilamu kwikala hakachi kawantu jaNzambiku. Munakutoñojokahu hodi hadi amanakwetu niahela anakumona kukala neyi kutunahanjekihu? w20.06 19 ¶6-7

Ninetu twatela kwilukila chadimu yuma yinateli kutuletela wubanji nawa nikwilahu chuma kulonda tuwutondolweli. (Heb. 5:14) Chakutalilahu, twatela kutonda chiwahi yisela. Maprogiramu Aha TV nimafwilimu kakavulu amwekeshaña yilwilu yatama. Yilwilu yamuchidiwu yamuneñeshaña Nzambi nawa chakadi nikujina yikaleta wubanji. Twatondolwelaña yisela yinateli kuletesha tuleki kumukeña Nzambi chovu-chovu. (Efwe. 5:5, 6) Ninetu twatela kwiluka wubanji wekala munsañu yakutwamba yatandishañawu akwakusekesha, anateli kutandisha nsañu jakutwamba hadi amanakwetu hela kutuletesha tutachiki kujinoka kuloñesha kwaYehova. (1 Tim. 4:1, 7; 2 Tim. 2:16) Nsañu yamuchidiwu yinateli kuzeyesha chikuhwelelu chetu. Hitwatela kukuhwelela iyi nsañu yakutwambaku. Muloñadi? Muloña iyi nsañu ayitandishaña kudi ‘antu aluwankana muyitoñojoka nawa adiwulaña chalala.’ Wena afwilaña hohu ‘ntaadi nikutaadeka.’ (1 Tim. 6:4, 5) Akeñaña tukuhweleli makudi awu nawa tutachiki kujinoka amanakwetu. w20.09 29 ¶13, 15

Eyala namumbanda atela kudikeña nikudilemesha. (Efwe. 5:33) Bayibolu yatulejaña kuhana bayi kukumina hohu dakutambwilaku. (Yilw. 20:35) Chilwilwinyi chinateli kukwasha adisumbula kudikeña nikudilemesha? Hikudizoza. Kudizoza kunakwashi akwaKristu adisumbula amavulu kwikala namuzañalu muwulu wawu. Chakutalilahu, Manakwetu Steven wasumbula wahosheli nindi: “Adisumbula neyi anakukeña kwikala namuzañalu, atela kuzatila hamu sweje-e neyi kudi kukala. Chatela nitoñojokeña hohu ‘yuma yikuntiyisha ami kuwaha’ natela kutoñojoka yuma yatela kututiyisha wejima wetu’ kuwaha.” Ñodindi Stephanie, niyena dichatoñojokañayi. Wahosheli nindi: “Kwosi muntu wakeñaña kushakama namuntu wabulaña kutiyañanayi nindi. Neyi tunamoni kukala, twafwilaña kwiluka chuma chinaleteshi. Nkumininaku twalombaña, kusandujola nikuhanjeka chitunateli kukumanisha. Twafwilaña kumanisha kukala bayi kuzuñaku.” Adisumbula anateli kwikala namuzañalu neyi abulaña kutoñojokaña nawu asweja kulema kubadika mukwawu. w20.07 3-4 ¶5-6

Bayi mushindamenaña hañovu jenu hela hawuswa wenu hakumukalakela Yehovaku. Kapostolu Pawulu wadiña wataña chikupu, amudizishili kudi Gamaleli, nlomboli wawaYudeya alemesheliwu nankashi. (Yilw. 5:34; 22:3) Hakusambila, Pawulu adiña amulemesha nankashi kudi akwawu aYudeya. (Yilw. 26:4) Ilaña, Pawulu hadishindameneniku. Pawulu washiyili yuma yejima yamuletesheli kuya mpuhu kwesekeja nachamonañawu mukaayi. (Fwi. 3:8) Pawulu amukabishili muloña wakwikala kambanji kaKristu. Amuheleli kudi antu akumuza windi. (Yilw. 23:12-14) Amweteli nikumukasa mukaleya kudi akwawu Aroma. (Yilw. 16:19-24, 37) Kubombelahu, Pawulu waneñeleña muloña wakubula kuwanina nawa chamukalilileña kwila yuma yaloña. (Rom. 7:21-25) Ilaña chatela yeteji ayilumbu jindi hela kuzeyazeya kwindi kumukañeshi kumulondela Kristu, ‘watiyileña kuwaha mukuzeyazeya.’ Muloñadi? Muloña neyi nazeyi dihamweneñayi chamukwashileñawu kudi Nzambi muchihandilu chindi.—2 Kor. 4:7; 12:10. w20.07 16 ¶7-8

Makonu, twatela kutwamijaku chikupu mudimu wakushimwina. Yesu washimwineñahu dehi nindi iwu mudimu wakatanda kwejima nawa wakatwalekahu hanyima yakufwa kwindi. Chelili Yesu yafwi, atumbanji twindi amakwawu afuntili nakukwata inshi. Chasañukiliyi, Yesu welili chihayamisha nakukwasha atumbanji twindi amakwawu kukwata inshi. Wazatishili iyi mpinji kuyileja nindi mudimu wawu wakwikala ayibinda awantu wadiña walema kubadika mudimu wudi wejima. (Yow. 21:15-17) Henohu Yesu kanda yayi mwiwulu, wayilejeli atumbanji twindi nindi mudimu wakushimwina watachikiliyi wakatanda kubadika ñinza jaIsarela. (Yilw. 1:6-8) Chimwahitili yaaka, Yesu wamumwekesheleli kapostolu Yowanu chimwenu kulonda yamuleji yuma yikamwekana “mwifuku daMwanta.” Muchimwenu, Yowanu wamweni ninichi chuma chakuhayamisha: Nawunlomboli wakañelu, “nsañu yayiwahi yahaya nyaaka” ayishimwinineña ‘kunyuza yejima, kunyichidi yejima, kumadimi ejima nikudi antu ejima.’ (Chim. 1:10; 14:6) Mwamweni, makonu Yehova nakukeña nindi tuzatiku iwu mudimu weneni wakushimwina sampu wunamani. w20.09 9 ¶5

Muchisaka chaAbarahama mwadiña cheñi kukala kukwawu. Ñodindi Sara wadiña nshinta. Adiña nachineñi hadi yaaka yayivulu. Nkumininaku, Sara wamwinkeli Abarahama nduñu yindi wamumbanda Haga nindi yoyivwaliliku anyana. Ilaña Haga chabaabiliyi ivumu daIshimeli, watachikili kumudiwula Sara. Yuma yatamini chakwila Sara wamuhañili Haga. (Kutach. 16:1-6) Nkumininaku, Sara wemitili nawa wamuvweleli Abarahama mwana weyala nawa wamutumbili nindi Isaka. Abarahama wayikeñeli anyanindi ejima ayedi, Ishimeli niIsaka. Ilaña chineli Ishimeli wamukabishileña Isaka, chaletesheli amuleji Abarahama nawu yamuhañi Haga niIshimeli. (Kutach. 21:9-14) Chimwahitili yaaka, Yehova wamwilili Abarahama nindi yomulambuli mwanindi Isaka. (Kutach. 22:1, 2; Heb. 11:17-19) Mukukala kwejima iku, Abarahama wamukuhweleli Yehova nindi wukashikija yikaninu yindi. w20.08 4 ¶9-10

Fwikijenu muzañalu wakatiya antu akasañulawu chakavuulañawu wuntu wawu wawukulu nakushikama kwesekeja nanshimbi jaNzambi. Antu akahimpa yilwilu yawu, akashakama haya nyaaka muParadisa. Ilaña antu akadikaña naNzambi hiyakayiteja kushakama muParadisaku. (Isa. 65:20; Yow. 5:28, 29) Mpinji yakayuulaña iwu Wanta, antu jaNzambi ejima aketeja mazu adi haYishimu 10:22 nawu alala, akwila nawu: “Nkisu yaYehova yaheteshaña muntu, habombelañaku kukalaku.” Chineli spiritu yaYehova yikayikwashaña, antu jaNzambi akaheta kuspiritu, dikwila nawu, akekala neyi Kristu nawa akekala awanina. (Yow. 13:15-17; Efwe. 4:23) Ifuku nifuku akekalaña akola kumujimba. Chihandilu chikawaha chikupu.—Yoba 33:25. w20.08 17 ¶11-12

Twatela kwanukaña netu akwaKristu amakwawu afuukulahu kushakama wujiki. AkwaKristu amakwawu ajiki akeñaña kusumbula hela kusumbuka, ilaña kanda awani muntu watelela. Amakwawu niwena afwisha enikwawu. Hichikweti muloña nayumiyiku, komana antu adi muchipompelu atela kuyihula akwaKristu ajiki chabulilawu kusumbula hela kusumbuka hela kuyihula neyi chakwila atela kuyikeñela muntu wakwiñila nindi muwulu? Hanu dinu neyi anakukeña wanyi wukwashu, amanakwetu niahela ajiki anateli kutiya ñahi? (1 Tim. 5:13) Amanakwetu niahela ajiki akutiya kuwaha neyi tuyilemeshaña muloña wayilwilu yawu yayiwahi bayi muloña wawujikiku. Chatela tuyitiyileña luwi, twatela kuyisakililaña hakashinshi kawu. Chikufumamu, amanakwetu niahela ajiki hiyakutoñojokaña nawu tunakuyila netu: “Hinnakuyikeña enuku.” (1 Kor. 12:21) Ilaña akwiluka nawu twayilemesha nawa twalemesha mudimu wazatañawu muchipompelu. w20.08 29 ¶10, 14

Nkumininaku, Yesu wamwekeni kudi kapostolu Pawulu yomweni. (1 Kor. 15:8) Pawulu (Sawulu) wayileña kuDamakasa hampinji yatiyiliyi izu daYesu asañwiliwu nawa hamweniyi chimwenu chaYesu iku wudi mwiwulu. (Yilw. 9:3-5) Chuma chamumwekeneni Pawulu chadiña hiwunsahu wukwawu wamwekesheleña nawu mwalala Yesu amusañwili. (Yilw. 26:12-15) Antu amakwawu anateli kukeña kwiluka mazu aPawulu muloña mpinji yimu wadiña nakukabisha akwaKristu. Hanyima yakwila Pawulu nakuhweleli dehi nindi Yesu amusañwili, wazatili nañovu kulonda yakwashi antu kwiluka ichi chalala. Hampinji yashimwinineñayi ichi chalala nindi Yesu wafwili nawa amusañwili cheñi, Pawulu wamweni yihuñu yayivulu, amweteli, amukasili mukaleya nawa matu akandaminiyi akisikili. (1 Kor. 15:9-11; 2 Kor. 11:23-27) Pawulu welukili nindi Yesu amusañwili kufuma mudi afu nawa wafwilileña kufwa muloña wakuhakwilaku yuma yakuhweleleliyi. Komana wunsahu washimwiniwu akwaKristu akusambila hiwunayikwashi kwiluka chikupu nenu Yesu amusañwili kufuma mudi afuku? Nawa hiwayileteshaña kukuhwelela chikupu nenu kumbidi kwakekala kusañukaku? w20.12 3 ¶8-10

Twatela kudihula etu aweni netu, ‘Komana napompaña mpinji yejima?’ Neyi tuyaña kukupompa kwatuloñeshelañawu kudi kuloñesha kwaYehova, twakolelañaku kuspiritu chikupu nawa atukoleshaña kudi anakwetu. (Mat. 11:28) Twatela kudihula cheñi netu, ‘Komana nikweti chaaku chakudiza nkawami?’ Neyi mwashakamaña nachisaka chenu, komana mwekala nampinji yakudifukula kwachisaka mulungu-himulungu? Hela neyi mwashakamaña nkawenu, komana mwekala nampinji yakudifukula neyi kwiji mudi hamu nachisaka? Cheñi, komana mwadikitaña chikupu mumudimu wakushimwina niwakwilisha atumbanji? Muloñadi wutwatela kudihwila awa malwihu? Bayibolu yatulejaña nawu Yehova washinshikaña chidi yitoñojoka yetu niyuma yidi munyichima yetu, dichi ninetu dichitwatela kwila. (1 Kushi. 28:9) Neyi tumona netu twatela kuhimpa yuma yitunakufwila kwila, yilwilu hela yitoñojoka yetu, twatela kumulomba Yehova kulonda yatukwashi mutunakukeña kuhimpa. Ayinu diyi mpinji yakudiloñeshela chadimu muloña wakweseka kudi kumbidi. w20.09 19 ¶19-20

Yesu walumbulwili chuma chatela kwilayi muntu neyi nakukeña kwikala kambanji kindi. Wahosheli hadi muntu wunakukeña kutuña kaposhi nimwanta wunakukeña kuya kunjita. Yesu wahosheli nindi mukwakutuña watela “kusambila kushakama hamaseki nakuchinda mali akuzatishayi” kulonda yamoni neyi wukutwesha kuhwisha kutuña kaposhi kindi nawa cheñi nindi mwanta watela “kusambila kushakama hamaseki” nakumona neyi amashidika indi anateli kulwa njita. (Luka 14:27-32) Munjila yoyimu, Yesu welukili nindi muntu wunakukeña kwikala kambanji kindi watela kutoñojokahu chikupu chatela kwilayi hakwila yekali kambanji kindi. Muloña wachumichi twatela kukolesha atudizi etu aBayibolu kulonda tudizeña nawu mulungu nimulungu. Chineli mudi antañishi, mwatela kuloñeshaña chiwahi kudiza hikudiza. Toñojokenu hadi kadizi wenu nichimunateli kumulumbulwila iyi nsañu kulonda yayitiyi nikuyizatisha.—Nehe. 8:8; Yish. 15:28a. w20.10 7 ¶5; 8 ¶7

Nshimbi jaYesu japela. Twatela kudizisha antu yuma yatulejeliyi Yesu. Hela chochu, hitwatela kujimbalaku chikuma chalemaku. Yesu wahosheli wanyi nindi: ‘Yidizishenu yuma yejima yinayileji enu.’ Ilaña wahosheli nindi: Yidizishenu “ahembeña yuma yejima yinnayileji enu.” Hakwila twovwahili ilu lushimbi hakudizisha kadizi waBayibolu, hitwatela kwikala hohu antañishiku, ilaña twatela nikuyilombola. (Yilw. 8:31) ‘Kuhemba’ lushimbi kwatalisha mukulovwahila. Neyi tunakudiza Bayibolu nawantu, twayidizishaña yuma yakeñañayi Nzambi kudi etu. Hitwatela kukumina dakuyidizisha yuma yakeñañayi Nzambi hohuku. Ilaña twatela cheñi kuyidizisha atudizi etu aBayibolu kuzatisha yuma yinakudizawu. (Yow. 14:15; 1 Yow. 2:3) Tunateli kuyidizisha atudizi etu chatela kuzatishawu nshimbi jamuBayibolu kushikola, kumudimu hela neyi anakunooka kuhitila muyuma yitwelaña. Tunateli kuyilumbulwila kuzatisha nshimbi jamuBayibolu chikwatukiñili kuwubanji hela chikwatukwashili kufuukulahu chiwahi. Neyi tudi nawatudizi etu, twatela kulomba kudi Yehova kulonda spiritu yajila yiyilomboleña.—Yow. 16:13. w20.11 2-3 ¶3-5

Atumbanji twaYesu amweni cheñi kukala kukwawu. Chakutalilahu, hiyadiña nanyivuñilu yaNsona yayivuluku. Hiyadiña nanyikanda yakuzatisha hakudizisha yitukweti makonuku. Nawa atumbanji ashimwinineña kudi antu ahosheleña madimi amboka-mboka. Hichikweti muloña naniku kukalaku, awa atumbanji adikita azatili iwu mudimu wamwekeneña neyi wakala hadi yaaka kwakwihi na 30, ashimwinini nsañu yayiwahi “kuyuma yejima yekala mwishina dewulu.” (Kol. 1:6, 23) Makonu, Yehova natwalekihu kulombola antu jindi nikuyinka ñovu yakwila nkeñelu yindi. Kakavulu wayilombolaña antu jindi kuhitila Mwizu dindi donenawu naspiritu yajila. Mwizu dindi twawanañamu nsañu yahosha hamudimu waYesu nilushimbi lwayilejeliyi akwakumulondela nindi atwalekihu kuzata mudimu watachikiliyi. (Mat. 28:19, 20) Yehova hakweti chaambuku; washimwineñahu dehi nindi nsañu yayiwahi akayishimwina “akwanyuza yejima, akwanyichidi yejima, akwamadimi ejima niantu ejima.” (Chim. 14:6, 7) Nakukeña antu ejima kutiya nsañu yaWanta. w20.10 21 ¶6-8

Mwanta Davidi wadiña muntu wakeña ‘nshimbi jaYehova.’ (Mas. 1:1-3) Davidi welukili nindi Yehova wamwinaña antu adizoza, ilaña wadikañaña nawantu adivwimba. Dichi Davidi wetejeli nshimbi jaNzambi kuhimpa yitoñojoka yindi. Wasonekeli nindi: “Nukumukiswila Yehova nkisu, diyi nanleji maana: chalala muchima wami wanlejaña kashinshi nawufuku.” (Mas. 16:7) Neyi twadizoza tukwiteja Izu daNzambi kuhimpa yitoñojoka yetu henohu kanda tukoñi yuma yatama. Izu daNzambi dikwikala neyi izu dinakutuleja nawu: “Njila iyi, endenu mwomwenimu.” Dikutusoñamisha neyi tutachika kukoña yuma yatama. (Isa. 30:21) Neyi tukwilaña yuma yatulejañayi Yehova, mwakafuma yuma yayiwahi. (Isa. 48:17) Chakutalilahu, hitukutiyaña nsonyi muloña wakutufumba kudi manakwetu hachuma chituneliku. Tukuswina kwakwihi naYehova muloña tuneluki netu nakutwimona neyi mwana wakeñewa.—Heb. 12:7. w20.11 20 ¶6-7

Yitoñojoka yamuchidiwu yatela yaluwañesheli antu amakwawu muKorinda. (1 Kor. 15:12) Cheñi, hadaha amakwawu atoñojokeleña nawu kwadiña kusañuka kwachifwikija, dikwila nawu muntu “wafwili” munshidi, ilaña wekalili cheñi “wamumi” chekaliliyi mukwaKristu. Hichikweti muloña nawunsahu wahanineñawuku, ilaña neyi muntu yakaana kukuhwelela mukusañuka, dikwila nawu chikuhwelelu chindi chafwa. Neyi chakwila Nzambi hamusañwili Yesuku, dikwila nawu kwosi ifutu danyiloña dahaniniyi nawa nshidi jawantu hiyajanakeneniku. Dichi antu abulili kukuhwelela mukusañuka hiyadiña nakuchiñejaku. (1 Kor. 15:13-19; Heb. 9:12, 14) Kapostolu Pawulu welukili nindi “Kristu amusañwili kufuma mudi afu.” Iku kusañuka kwadiña kwalema nankashi kubadika kwawantu ejima asañwiliwu hamaseki nawa afwa cheñi. Pawulu wahosheli nindi Yesu diyi wadiña “mukabu watachi wanowu anaholokeli mutulu twakufwa.” Diyi wadiña muntu watachi kumusañula namujimba wakuspiritu nawa diyi wadiña watachi kuya mwiwulu.—1 Kor. 15:20; Yilw. 26:23; 1 Pet. 3:18, 22. w20.12 5 ¶11-12

Mumafuku awakwaKristu akusambila, izanvu dalombolaña muYerusalema dazatili mukunuñañana hakwila nawu dileti kuwunda nikutela hadi antu jaNzambi. (Yilw. 2:42) Chakutalilahu, chelili kwikali kukala hansañu yakwalama mu 49 C.E., izanvu dalombolaña nawukwashu waspiritu yajila datalili haniyi nsañu. Neyi chipompelu chabulili kunuñañana hamuloña waniku kukala, kachi hiyadi kuzata mudimu wakushimwina chiwahiku. Hela chakwila adiña aYudeya, apostolu niakulumpi amakwawu hiyaluwankeni nachisemwa chawaYudeya hela kwiteja antu alondeleleña chisemwa chawaYudeya kuyiluwañeshaku. Ilaña asandujoleleña Mwizu daNzambi nikulomba spiritu yajila kuyikwasha. (Yilw. 15:1, 2, 5-20, 28) Chumanyi chafuminimu? Yehova wakiswilili mwafuukwiliwu, kuwunda nikunuñañana kwatwalekelihu nawa mudimu wakushimwina wayililiku hambidi. (Yilw. 15:30, 31; 16:5) Makonu, kuloñesha kwaYehova kunazati nañovu kukwasha antu jaYehova kutwalekahu kwikala anuñañana nikwikala mukuwunda. w20.10 22-23 ¶11-12

Kudi yuma yayivulu yinateli kuletesha abuli kutwinka mudimu wutwakeñaña mumudimu waYehova. Chakutalilahu, wushinakaji, yikatu hela yuma yikwawu. Neyi dikukala kutukweti, twatela kudizila kudi Mwanta Davidi. Davidi wafwilileña kutuñila Nzambi tembeli, ilaña amulejeli nawu yena diyi wukutuña wanyi, anatondi muntu wacheñi. Davidi welili ñahi? Wamukwashiliku chikupu iyala atondeliwu. Davidi wahanini yawaana yayivulu yakukwasha iwu mudimu. Ichi hichakutalilahu chachiwahi chitwatela kwimbujola. (2 Sam. 7:12, 13; 1 Kushi. 29:1, 3-5) Hamuloña wakukatakata manakwetu Hugues, wakuFrance, walekeli kuzata neyi mukulumpi nawa hatwesheleña nikuzata tunyidimu twanyanya twahetalaku. Wasonekeli nindi: “Hakusambila naneñeleña nawa nadimweneña nami hinashikilamuku. Chimwahitili mpinji namweni nami natela kuleka kuneña hayuma yinateli kubula kutwesha kuzata. Chafuminimu nekalili namuzañalu hakuzata nyidimu yinatwesheleña mumudimu waYehova. Inakufwila kutwalekahu. Kufwana Gideyona niamayala 300 adiñayi nawu azeyeli, nikutwalekahu chakadi kuzeya!”—Ansomp. 8:4. w20.12 25 ¶14-15

Munsañu yasonekeliyi hachihandilu chaYesu, Yowanu wazatishili nankashi izu dakwila nawu “kukeña” nidakwila nawu “wakeñeli” kubadika akwawu asatu mwasonekeleliwu nyikanda yaNsañu Yayiwahi. Nyikanda yindi yejima yatudizishaña nawu yuma yejima yitwelaña etu akwaKristu twatela kuyilaña nakukeña. (1 Yow. 4:10, 11) Hela chochu, hahitili mpinji hakwila Yowanu yeluki chumichi. Yowanu hadiñayi mukwenzi, hamwekesheleña kukeña mpinji yejimaku. Chakutalilahu, mpinji yimu Yesu niatumbanji twindi ayileña kuYerusalema nakuhita muSamariya. Antu amu mumukala wumu muSamariya akaanini kuyitambwila. Yowanu wamwilili Yesu nindi yatambiki kesi kufuma mwiwulu kulonda kajilumuni musumba wejima. (Luka 9:52-56) Mpinji yikwawu, Chinamwekani neyi yena nimanakwindi Yakoba diwu amulejeli mama yawu nawu yamwili Yesu kulonda yakayinki maluña alema muWanta. Apostolu amakwawu chatiyiliwu chuma chelili aYakoba naYowanu, ahilili. (Mat. 20:20, 21, 24) Hela chakwila Yowanu waluwañesheli mwejimimu, Yesu watwalekelihu kumukeña.—Yow. 21:7. w21.01 8-9 ¶3-4

Yehova wafuukulaña yuma yinateli kukwasha antu amakwawu. Chakutalilahu, haleñeli wumi nindi yaditiyisheña yomwenindi kuwahaku, ilaña nindi tudiluñisheña. Kwosi wamukanjikijili kuhana Mwanindi kulonda yatukuuli kunshidiku. Wahanini iwu mulambu mukudikeñela kulonda wutukwashi. Yesu niyena wafuukwilihu chuma chinateli kutukwasha. Chakutalilahu, hampinji yazeyeliyi chatela yanooki, yena wadiña nakuyitañisha antu. (Maku 6:31-34) Iyala wamuwahi weluka nindi chuma chakala kwila hikufuukula chuma chatela kukwasha chisaka chindi nawa washañaku muchima chikupu. Hafuukulaña chuma kwesekeja nachinakutiyayi hela chinakutoñojokayi hanoyu mpinjiku. Ilaña walombaña wukwashu kudi Yehova kulonda yamukwashi chakufuukula. (Yish. 2:6, 7) Neyi yela mwenimu, wukufuukula chuma chinateli kutiyisha akwawu kuwaha bayi yomweniku. (Fwi. 2:4) Neyi iyala yamwimbujolaña Yehova niYesu, nateli kwikala mutu wachisaka wamuwahi. w21.02 7 ¶19-21

Mwanta Asa, hachidiñayi kansi wadiña wadizoza nawa wahamuka. Chakutalilahu, hampinji yamuswaniniyi tata yindi Abiya, watachikili kufumisha ankishi ejima mwituña. Cheñi “walejeli aYuda kukeñakeña Yehova Nzambi yawankakulula jawu nikwila ninshimbi nikuleja.” (2 Kushi. 14:1-7) Chelili Zera kaEtiopiya niamashidika indi 1,000,000, enzi nakulukuka Yuda, Asa wamulombeli Yehova nindi yamukwashi, walombeli nindi: “Eyi hiwamonaña kukala kukwasha hela akwañovu hela abula ñovuku; tukwashuku eyi Yehova Nzambi yetu, muloña tunashindameni hadeyi.” Awa mazu amawahi amwekeshaña nawu Asa wakuhweleleli nindi Yehova wukweti ñovu yakumwamwina yena niantu jindi. Asa wamushindameneni Tata yindi wamwiwulu, nawa “Yehova hakutapa aEtiyopiya.” (2 Kushi. 14:8-12) Kumulukuka kudi amashidika 1,000,000 kwadiña hikukala kweneni kudi Asa, hela chochu wamushindameneni Nzambi nawa washindili. w21.03 5 ¶12-13

MuBayibolu mwekala nsañu yawantu abula kuwanina adikeñeli chikupu. Talenu chichadiña hadi aJonatani naDavidi. Bayibolu yahosha nawu: “Muchima waJonatani wudikasa namuchima waDavidi hamu mbe Jonatani hakumukeña neyi chadikeñeliyi [yomweni].” (1 Sam. 18:1) Davidi amuwayishili kulonda yamusinsi mwanta Sawulu. Hanyima yachumichi, Sawulu wamutiyilili Davidi ichima nawa wakeñeleña kumujaha. Ilaña mwana kaSawulu Jonatani hadikwatili natata yindi nindi yamujahi Davidiku. Yena naDavidi adikanini nawu akutwalekahu kwikala amabwambu nikudikwasha. (1 Sam. 20:42) Hichuma chakuhayamisha nankashi neyi tutoñojoka hakukeña kwadiña hakachi kaJonatani naDavidi muloña kwadiña yuma yayivulu yadi kuletesha abuli kwikala amabwambu. Chakutalilahu, Jonatani wamubadikilimu Davidi nayaaka 30. Jonatani wadi kutoñojoka nindi nateli wanyi kwikala ibwambu dakansi wabula kwiluka yuma yayivulu, ilaña Jonatani dichatoñojokeliyi wanyi. Yena wamulemesheli Davidi. w21.01 21-22 ¶6-7

Yesu wayishiikili akwakumulondela nindi akekala namuzañalu walala. Ilaña wayilejeli cheñi nindi akamonaña kukala. (Mat. 10:22, 23; Luka 6:20-23) Twazañalalaña hakwikala atumbanji twaKristu. Mukutiya ñahi neyi chisaka chenu cheseka kuyikañesha kumukalakela Yehova, neyi ayikabisha kudi nfulumendi hela neyi akwenu mumwatañilaña hela mumwazatilaña ayikanjikija kwila yuma yatama? Neyi tutoñojoka hayuma yamuchidiwu tunateli kutachika kwakama. Antu amavulu atoñojokaña nawu neyi anakuyikabisha hiyanateli kwikala namuzañaluku. Ilaña, Izu daNzambi datulejaña nawu tuzañalaleña hampinji yinakutukabishawu. Chakutalilahu, kapostolu Yakoba wasonekeli nindi chatela tuneñeña twatela kuzañalalaña hampinji yitunakuhita mukweseka. (Yak. 1:2, 12) Nawa Yesu wahosheli nindi twatela kuzañalalaña neyi anakutukabisha. (Matewu 5:11) Yehova wamoneneni Yakoba kusonekela akwaKristu nsañu yayikwashili kutwalekahu kwikala namuzañalu hela chakwila amweneña kukala. w21.02 26 ¶1-2; 27 ¶5

Mumafuku aTimotewu, akwaKristu amakwawu alemesheli wanyi kukooleka kwadiñawu naku kwakwikala akwakukalakala hamu naNzambi. Awa antu adiña Demasi, Fwigelu, Hemoni, Himenusa, Alesanderi, niFwiletu. (1 Tim. 1:19, 20; 2 Tim. 2:16-18; 4:10) Awa antu ejima amukeñeli Yehova, ilaña mukuhita kwampinji atachikili kumona yuma yayinkeliyi nawu hiyalemaku. Tufutanyi twazatishañayi Satana hakwila nawu tudiwuli yuma yalema yatwinkayi Yehova? Talenu tufuta twantesha twazatishañayi Satana. Wazatishaña maprogilamu aha TV, mafwilimu, intaneti, yipapilu yansañu, nyikanda nimamagazini kulonda tutachiki kutoñojoka nikwila yuma munjila yikuletesha tuleki chovu-chovu kumukeña Yehova nikumwovwahila. Wafwilaña kututiyisha kutama nekakeja dawakwetu hela ikabisha kulonda tuleki kushimwina. Nawa wesekaña kutukokola kulonda tutiyilili ‘kuyuma yakutwamba yatenañawu nawu “kwiluka”’ yawakwakusekesha kulonda tushiyi chalala. Neyi kubabala nehi, tunateli kutachika chovu-chovu kushiya chalala.—1 Tim. 6: 21. w20.09 27 ¶6-8

Ayineñeshahu dehi kudi ibwambu denu hela ntaña yenu? Neyi ayineñeshahu dehi chuma chikuyikwasha hikwiluka cheliliyi Mwanta Davidi helili mwanindi Abisalomi. (2 Sam. 15:5-14, 31; 18:6-14) Iku munakutoñojoka hanoyu nsañu, mulejenumu Yehova chimunakutiya hachuma chatama chinayiliwu. (Mas. 6:6-8) Cheñi fwikijenu chatiyiliyi Davidi hampinji yamumwekeneneña iyi yuma. Wamukeñeli Abisalomi nawa wamukuhweleleli Ahitwofweli. Ilaña wejima wawu ayedi amubalumukilimu. Amuneñesheli chikupu nawa akeñeleña nikumujaha. Mutenowu Davidi wadi kuleka kuyikuhwelela amabwambu jindi ashinshika nakutoñojoka nindi niwena anadibombi naAbisalomi. Hadaha wadi kudipulwisha hohu yomweni nikutemuka mwituña nkawindi. Indi kwiji wadi kushakama hohu nakudishona. Walombeli kudi Yehova kulonda yamukwashi. Cheñi wayilombeli akwawu kulonda amukwashiku. Nawa wanyakeli kwila mwafuukwiliyi. Watwalekelihu kumukuhwelela Yehova niamabwambu jindi. w21.03 15 ¶7-8; 17 ¶10-11