July

Twatela kukwata wubwambu naYesu hakwila nawu kulomba kwetu akwakuli. Hitwatela kukumina dakuhosha netu “mwiijina daYesu” neyi tunakulombaku. Twatela kwiluka Yehova chamuzatishañayi Yesu hakwakula kulomba kwetu. Yesu wayilejeli apostolu nindi: “Chuma chejima chimukulomba mwijina dami, nukuchikoña.” (Yow. 14:13) Hela chakwila Yehova diyi wakulaña kulomba kwetu, wamwinka Yesu wuswa wakwila munafuukuliyi Yehova. Henohu Nzambi kanda yakuuli kulomba kwetu, wamonaña neyi chakwila tunalondeli kufumba kwatulejeliyi Yesu. Chakutalilahu, Yesu wahosheli nindi: “Muloña neyi mukwanakena antu yuma yatama yelañawu, Tata yenu wekala mwiwulu niyena wukuyanakena; ilaña neyi mubula kwanakena antu yuma yatama yelañawu, Tata yenu niyena hakuyanakena nshidi jenuku.” (Mat. 6:14, 15) Dichi twatela kuyilaña akwetu neyi chatwilañawu kudi Yehova niYesu. w20.04 22 ¶6

Kapostolu Pawulu wamweneña yuma yakeñawu antu ashimwinineñayi, dichi niyena wahimpileña njila yakushimwinamu. Chakutalilahu, izaza dawantu dashimwininiyi muLisitira, dadiña deluka chanti hela dabula kwiluka Nsona. Dichi Pawulu wahanjekeli nawu munjila yakwila atweshi kutiya. Wahosheli hayilaaka yakwaañwilamu yakuda nihawuswa wakudiluñisha wumi. Wazatishili mazu niyakutalilahu yaletesheli antu ashimwinineñayi atiyishishi. Zatishenuña kashinshi kulonda mwilukeña yuma yakeñawu antu mwiluña dimwashimwinaña nawa himpenu njila yakuyishimwinamu. Munateli kwiluka ñahi yuma yakeñayi muntu neyi munamuwani hela munashiki hetala dindi? Shinshikenu yuma yinakwilayi. Hadaha nakudima, nakutaña, nakuloñesha nkinga hela tuhu yuma yikwawu. Neyi chinatwesheki, munateli kutachika kuhanjeka nindi kutalisha hayuma yinakwilayi. (Yow. 4:7) Mpinji yikwawu niyakuvwala yinavwaliyi muntu yamwekeshaña yuma yakeñayi, hadaha kwafumayi, mudimu wazatañayi hela izanvu dayisela dakeñayi. w20.04 11 ¶11-12

Amanakwetu niahela amakwawu atiyaña woma ninsonyi nakukala kudi kwejima kunakumonawu hamuloña wakusweja kwakama. Chinateli kuyikalila kwikala hadi antu amavulu, ilaña atwalekañahu kuya nakupompa kwachipompelu, kupompa kwanyanya nikwamaneni. Chayikalilaña kuhanjeka nawantu abula kwilukawu, ilaña ahoshaña nawantu mumudimu wakushimwina. Neyi diku kukala kumukweti, ilukenu nenu himudi nkawenuku. Antu amavulu niwena ekala nansonyi. Ilukenu nenu Yehova wazañalalaña nanyidimu yimwazataña namuchima wenu wejima. Chineli munazeyi wanyi, chumichi chinakumwekesha nawu nakuyikiswila nawa nakuyinka ñovu yimunakukeña. (Fwi. 4:6, 7) Neyi munakumukalakela Yehova hela chakwila mudi nakukala kumujimba hela chineñi, mwatela kwiluka nenu munakumuzañalesha Yehova. Etu amavulu twakola wanyi kumujimba, ilaña tunakuumika. (2 Kor. 4:16) Nawukwashu waYehova, wejima wetu tukutemukaña lufuchi ndo-o nikumufunda. w20.04 31 ¶20-21

Maana aNzambi amwekenaña munjila yaleñayi iseki ditwashakamañahu. (Heb. 3:4) Iseki didi hakachi kamapulaneti (yuma yanyeñumukaña kwitena), ilaña dambukaku muloña dikweti yuma yejima yakwashaña antu kuhanda. Munjila yikwawu, iseki didi neyi watu wudi hakaluñalwiji. Ilaña hadi chaambu cheneni hakachi kawatu munakandami antu neseki ditwashakamañahu. Chakutalilahu, antu adi muwatu anateli kuhanda mafuku añahi neyi ela nawu adiloñesheleña aweni mpepela yakona, yakuda, menji hela tuhu kubula kunatila chuma chidi chejima mukaluñalwiji? Antu adi muniwu watu akushimbula wanyi nakufwa. Kwambukaku, iseki dinakuhandisha mabiliyoni awantu nianyama. Dedishaña mpepela yitonaña yaOxygen, yakuda nimenji akeñekaña nawa hitwakankilaña yumiyiku. Hela chakwila majilu ekalahu hiyayaña kwacheñiku; ilaña iseki dinatwalekihu kwikala dalubanji nawa datelela kushakamahu. Chinekali ñahi muniyi njila? Yehova waleñeli iseki munjila yakwila neyi chuma chinazatiki nawa chikala majilu chinateli kuhimpika nakwikala chuma chachiwahi chinateli kuzatika cheñi. w20.05 20 ¶3-4

Satana munjila yikwawu wamulejeleña Eva nindi Yehova hisakutwamba. Dihafumini Satana kwikala diyabolu hela sakutwamba. Eva amudimbili chikupu; nawa wamukuhweleleli Satana. (1 Tim. 2:14) Wamukuhweleleli nankashi kubadika Yehova. Dichuma chaletesheli Eva kufuukula mwaluwa. Wadikañili naYehova. Wadiili mukabu wamukaanishiliwu kudi Yehova nawu bayi yadaku. Kuhiñahu wamwinkelihu Adama. (Kutach. 3:6) Toñojokenu Eva chateleleli kumwakulayi Satana. Fwikijenu neyi wahosheli nindi: “Nakwiluki wanyi, ilaña namwiluka Tata yami, Yehova, namukeña nawa namukuhwelela. Watwinka naAdama yuma yejima yitukweti. Yeyinyi hakwila wuhoshi yuma yatama hadi yena? Fumaku aha!” Yehova wadi kuzañalala hakutiya mwanindi wamumbanda nakuhosha muniyi njila. (Yish. 27:11) Ilaña Eva hamukeñeli Yehovaku; hela tuhu Adama. Chineli hiyamukeñeli Tata yawuku, Adama naEva akañenyi kuhakwilaku ijina dindi kunana makudi. w20.06 4 ¶10-11

Ahela jetu akeñekaña kuyihameka hayuma yejima yelañawu mumudimu waYehova. Muniwu mudimu munabombeli kutuña nikuwahisha matala, kukwasha mazanvu ahoshaña idimi dacheñi nikuzatila haBeteli. Azatañaku mumudimu wakukwasha antu anaholokeli muwubanji, akwashaña kubalumuna nyikanda yetu nawa azatañaku wupayiniya niwumishonali. Kubombelahu, ambanda akwashaña anfumu jawu kukalakala nyidimu yalema muchipompelu nimukuloñesha. Awa amanakwetu hiyamayala ahanawu “kwikala yawaana,” chadi kuyikalila chikupu neyi chakwila añodi jawu hiyanakuyikwashaku. (Efwe. 4:8) Akulumpi akweti kashinshi eluka nawu ahela ‘hiizaza deneni’ dawakwakukalakala adihana nawa kakavulu ekala hakachi kawakwakushimwina nsañu yayiwahi ashikahu. Kubombelahu, akulumpi eluka nawu ahela ashinshika nawa apama azataña chiwahi hakukwasha ahela atwansi anakuhita mukukala. (Tit. 2:3-5) Chakadi nikujina, twatela kuyihameka ahela jetu! w20.09 23-24 ¶13-14

Yehova havulamena ambuña indi azeya adiña nakumukalakelaku. Nawa havulamena nyidimu yamukalakeleliwuku. (Heb. 6:10) Kaprofwetu Isaya wasonekeli chakutalilahu chachiwahi chamwekeshaña Yehova chakamenañayi antu jindi. Isaya wasonekeli nindi: “Wakadiisha mukanka windi wanyikoku neyi kabiña, wakakuñwila anyana muchikasa chindi, wakayisendela hantulu yindi.” (Isaya 40:11) Indi Kabiña Muneni watiyaña ñahi neyi mukoku windi yafuma hamukanka? Yesu wamwekesheli chatiyañayi Yehova hayihwiliyi atumbanji twindi nindi: “Mukutoñojokahu nenudi? Neyi muntu wukweti anyikoku 100 nawa wumu yajimbala, komana kwila yashiya anyikoku 99 hamapidi nakuya nakukeñakeña owu mukoku wunajimbali nehi? Inakuyileja chalala nami, wukuzañalala nankashi neyi yamuwana owu mukoku kubadika chikuzañalalayi nawanyikoku 99 anabuli kujimbala.”—Mat. 18:12, 13. w20.06 19-20 ¶8-9

Hikukooleka chikupu kumukalakela Yehova hakumina ñovu jetu. (Mas. 27:4; 84:10) Neyi manakwetu nakufwila kuzataku nyidimu yayivulu mukuloñesha kwaYehova, hichuma chachiwahi. Hela chochu, neyi anamwinki kukooleka, bayi yatoñojoka nindi walema kubadika chekalayiku. (Luka 17:7-10) Watela kufwilaña kukalakela akwawu mukudizoza. (2 Kor. 12:15) MuBayibolu mwekala yakutalilahu yatusoñamishaña yawantu atoñojokeleña nawu asweja kulema. Diyotefwesi hadiña wadizozaku wakeñeleña “kwikala watachi” muchipompelu. (3 Yow 9) Muloña wakudivwimba, Uziya wazatili mudimu wabulili kumwinkawu kudi Yehova. (2 Kushi. 26:16-21) Abisalomi wafwilileña kwikala mwanta, dichi watwambili kuyikeña antu kulonda ekala kukabadi kindi. (2 Sam. 15:2-6) Neyi chinamwekeshi iyi nsañu, Yehova hatiyaña kuwaha antu akeñaña kutumbakanaku. (Yish. 25:27) Mukuhita kwampinji, antu adivwimba nawa akeñaña nawu ayilemesheña ekalaña mukukala.—Yish. 16:18. w20.07 4 ¶7-8

Yisaka yikwawu yawakwaKristu yabuukila kumatuña acheñi nakushakamaku hela nakukeña nyidimu. Hamuloña wakubuuka, anyanawu kushikola anakuzatisha idimi damwituña mwabuukilawu. Anvwali jawu niwena atela kudiza idimi dahoshañawu hakwila nawu awani mudimu. Indi neyi mudi chipompelu hela izanvu dahoshaña idimi dawu? Muchipompelunyi mwatela kuyaña chisaka? Komana akuyaña muchipompelu mwahoshañawu idimi damunodu ituña tahindi muchipompelu mwahoshañawu idimi dawu? Mutu wachisaka watela kufuukulahu chipompelu mwatela kuya chisaka chindi. Chineli iku hikufuukula kwamuntu, watela kwiluka yuma yinateli kukwasha chisaka chindi. Twatela kulemesha munafuukuli mutu wachisaka. Yuma yejima yikufuukulayi, twitejenu munafuukuliyi nikutambwila chisaka chindi muchipompelu.—Rom. 15:7. w20.08 30 ¶17-18

Neyi tunakukeña netu Yehova yatwinki ñovu, bayi tutoñojokeña netu kwikala nañovu, kutaña shikola, yitachi hela maheta diyuma yalemaku. Yehova hanateli kutuzatisha muloña wakwikala naniyi yumaku. Kafwampi, antu jaNzambi amavulu hiyekala “namaana akumujimbaku,” “akwañovuku” nawa “avwalika kuyisaka yalemaku.” (1 Kor. 1:26) Bayi muleka kumukalakela Yehova muloña wakwila himukweti yuma yaleteshaña antu kutoñojoka nawu alemaku. Ilaña monenuña chihandilu chenu nenu hinjila yimu yikuyikwasha kumona ñovu yaYehova chiyinakuzatika mudi enu. Chakutalilahu, neyi mwatiyaña woma antu akeñaña nawu mujinokeña yuma yimwakuhwelela, mulombenu Yehova yayikwashi kwikala ahamuka kulonda muhakwiluku yuma yimwakuhwelela. (Efwe. 6:19, 20) Neyi munakukabakana muloña wayikatu, mulombenu Yehova yayinki ñovu kulonda mutwalekihu kumukalakela. Neyi mumona Yehova chinakuyikwashayi, chikuhwelelu chenu chikukolelaku nawa mukwikala nañovu. w20.07 16 ¶9

Neyi tunakukeña kutwamijaku Wanta waNzambi muchihandilu chetu, twatela kwikala neyi Abarahama wadihanini kulonda yamuzañaleshi Nzambi. (Maku 10:28-30; Heb. 11:8-10) Mwatela kukuhwelela nenu mukumonaña kukala. Ninana adihanaña nawumi wawu wejima kumukalakela Yehova amonaña kukala muchihandilu chawu. (Yak. 1:2; 1 Pet. 5:9) Makonu tukweti wunsahu wawuvulu wukutuletesha kusha maana kumbidi. Yuma yinakumwekana mukaayi yinakumwekesha chikupu nawu tudi kumakumishilu anshakaminu yamakonu. Chuma chimu hakachi kayuma yitwakadiluñisha muchiyuulu chaWanta waNzambi hikusañuka kwawantaña jetu afwa dehi. Haniyi mpinji, Yehova wakamusañula Abarahama nichisaka chindi muloña wachikuhwelelu nikudiwunjika kwindi. Komana mwakekalaku kulonda mwakayikinkilili? Mwakekalakoku neyi mudibonda muloña waWanta waNzambi, mwikala nachikuhwelelu hela chakwila munakumona kukala nawa mumutalilaña Yehova nakudiwunjika neyi cheliliyi Abarahama.—Mika 7:7. w20.08 5-6 ¶13-14; 7 ¶17

Tweluka netu neyi ayilumbu jetu akutujaha, Yehova wakatusañula. Twakuhwelela chikupu netu, kwosi chuma chikwilawu chinateli kutukañesha kumukalakela Yehovaku. (Rom. 8:35-39) Yehova wamwekesha chikupu nindi wukweti maana hakutwinka kuchiñeja kwakusañuka. Muloña wakusañuka, twatiyaña wanyi woma neyi antu jaSatana atuchinisha nawa kwatukwashaña kwikala ashinshika kudi Yehova. Neyi ayilumbu jaYehova ayichinisha nawu akuyijaha, komana mukumukuhwelela Yehova nenu wakayisañula? Muneluki ñahi nenu mukumukuhwelela? Njila yimu hikudihula nenu, ‘Komana namwekeshaña nami namukuhwelela Yehova nimutuyuma twanyanya tunafuukulaña?’ (Luka 16:10) Dihulenu cheñi nenu, ‘Komana chihandilu chami chamwekeshaña nawu nakuhwelela muchikaninu chaYehova chakuñakamena muyuma yinakankili neyi nitwamijaku Wanta windi?’ (Mat. 6:31-33) Neyi mukwakula nenu eña, mukumwekesha nenu chalala mwamukuhwelela Yehova nawa mukudiloñesha kushinda kweseka kwejima kukwinza.—Yish. 3:5, 6. w20.08 17-18 ¶15-16

Twatela kukulukila mukuzatisha Izu daNzambi. Kupompa kwetu kunateli kutukwasha kwikala akuluka yitembi. Ilaña neyi tunakukeña kushinjila antu netu chalala chamuBayibolu chalema, twatela kudizaña Bayibolu mpinji yejima. Twatela kuzatisha Izu daNzambi kukolesha chikuhwelelu chetu. Dikwila nawu hitwatela kutaña hohu Bayiboluku. Ilaña twatela nikutoñojoka chikupu hayuma yitunakutaña nikusandujola munyikanda yetu kulonda tutiyishishi Nsona nikuyizatisha. (1 Tim. 4:13-15) Kufumahu tukutwesha kuzatisha Izu daNzambi kudizisha antu amakwawu. Cheñi, bayi neyi tukukumina dakuyitañila mavasi amuBayiboluku. Ilaña tunakukeña kukwasha antu kwiluka munatalishi nsona nichiyinayikundami. Dichi neyi tudizaña Bayibolu mpinji yejima, tukukulukila mukuzatisha Izu daNzambi donenewa hakudizisha antu.—2 Tim. 3:16, 17. w20.09 28 ¶12

Tunateli kutwamijaku mudimu wakushimwina neyi tutoñojokaña hayuma yinakutwililayi Yehova hakutukwasha. Chakutalilahu, nakutuloñeshela yakuda yayivulu yakuspiritu yakupulinta, yahayozelu, yamazu nimavidiyo akukwata dehi, nimaprogilamu aha JW Broadcasting. Toñojokenu hachumichi: Hawebusayiti yetu hadi nsañu yidi mumadimi akubadika ha 1,000! (Mat. 24:45-47) Njila yikwawu yinateli kutukwasha kutwamijaku mudimu wakushimwina hikumwimbujola Yesu. Hetejeli chuma hela chimu kumukañesha kushimwina wunsahu wachalalaku. (Yow. 18:37) Hampinji Satana yamwinkeleñayi “mawanta ejima amukaayi nikulema kwawu”; nihakeñeleñawu kumuswanyika hawanta kudi antu, wakaanini. (Mat. 4:8, 9; Yow. 6:15) Hashili muchima kukufwila maheta hela kufwa mutentu makabisha aswejaku. (Luka 9:58; Yow. 8:59) Neyi chikuhwelelu chetu chidi mukweseka, tunateli kutwamijaku mudimu wakushimwina neyi twanuka kufumba kwakapostolu Pawulu kudi munsona yalelu. w20.09 9-10 ¶6-7

Twazañalalaña chikupu hakwikala nawahela adikita muchipompelu. Akulañahu hakupompa nawa ashimwinaña nsañu yayiwahi. Amakwawu azatañaku mudimu wakuwahisha Itala daWanta nawa akamenaña akwawu akwakudifukula. Hela chochu, amonaña kukala. Amakwawu akamenaña anvwali jawu akula dehi. Amakwawu ayidimbululaña kudi antu amuchisaka chawu. Amakwawu niwena hiyanvwali ajiki, azataña nañovu kwakamena anyanawu. Muloñadi chitwatela kukwashila ahela? Muloña kakavulu antu amukaayi hiyalemeshaña ambandaku. Kubombelahu, Bayibolu yatulejaña kukolesha ambanda. Chakutalilahu, kapostolu Pawulu walejeli chipompelu chamuRoma kumutambwila Fwibi “nakumukwasha muyuma yejima yikukaankilayi.” (Rom. 16:1, 2) Pawulu muchisaka muchisemwa chawantu amweneña ambanda neyi amukunkulwayi. Ilaña chekaliliyi mukwaKristu, wamwimbujoleli Yesu nawa walemesheleña ambanda nikuyitiyila luwi. w20.09 20 ¶1-2

Hakwila tukwashi atudizi aBayibolu ekali namuchima wakushimwina nsañu yayiwahi, twatela kuyihula atudizi etu aBayibolu netu: “Chihandilu chenu chinahimpiki ñahi muloña wakuzatisha yuma yimunakudiza muBayibolu? Munakutoñojoka nenu kwosi antu amakwawu atela kutiyaku iyi nsañu? Chumanyi chimwatela kwila hakwila nawu muyikwashi?” (Yish. 3:27; Mat. 9:37, 38) Anukenu nenu Yesu watulejeli kudizisha antu ‘kuhemba yuma yejima’ yatulejeliyi. Munabombeli nshimbi jiyedi jabadika, dikwila nawu kumukeña Nzambi niakwetu, nshimbi yejimiyi yinakundami kumudimu wakushimwina nikwilisha atumbanji. (Mat. 22:37-39) Kafwampi kukeña dichuma chatuleteshaña kushimwina. Kuhosha hohu chalala, atudizi aBayibolu amakwawu anateli kutiya woma kushimwina. Ilaña twatela kuyikolesha atudizi amuchidiwu netu Yehova nateli kuyikwasha kuleka kutiya woma chovu-chovu.—Mas. 18:1-3; Yish. 29:25. w20.11 3 ¶6-8

Chimukuloñeshaña, lombelenuku kadizi wenu kudi Yehova nihayuma yinateli kumukwasha. Lombenu kudi Yehova yayikwashi kutañisha nsañu yidi muBayibolu munjila yinateli kumushika muntu hamuchima. Ilukenu nenu chuma chimunakufwila hikumukwasha kulonda yapapatishewi. Kadizi niyena watela kuhanjekaña naYehova. Munjilanyi? Kuhitila mukutiyilila nikuhosha naYehova. Nateli kumutiyilila Nzambi kuhitila mukutaña Bayibolu mpinji yejima. (Yosh. 1:8; Mas. 1:1-3) Kuhosha naYehova kuhitila mukulomba mafuku ejima. Dichi lombenuña chakufuma hamuchima hakutachika nihakukumisha kudiza nawa mutenenuña kadizi wenu mukulomba. Chikutiyañayi chimunakulomba, wukudiza chakulomba kudi Yehova chakufuma hamuchima nawa wukulombaña kuhitila mwijina daYesu Kristu. (Mat. 6:9; Yow. 15:16) Kutaña Bayibolu mpinji yejima (kumutiyilila Yehova) nikulomba (kuhanjeka naYehova) kunateli kumukwasha kadizi wenu kukundama kwakwihi naNzambi.—Yak. 4:8. w20.10 8 ¶8; 9 ¶10-11

Kuloñesha kwaYehova kunakuzata nañovu kulonda yipompelu yitwalekihu kwikala yanuñañana nikwikala mukuwunda neyi chichadiña kudi akwaKristu akusambila. (Yilw. 16:4, 5) Chakutalilahu, neyi chakwila muya nakupompa Kaposhi Kakutalila muchipompelu chacheñi hela kwiluña dacheñi, mukwilukila chadimu chakulombolawu Kaposhi nichibaaba chimukuhanjekañahu. Mukwikala akasunuka. Spiritu yaNzambi hohu diyi yinateli kuletesha hekali kunuñañana. (Zef. 3:9) Yuma yimwatela kwila. Dihulenu nenu: ‘Komana naletaña kunuñañana nikuwunda muchipompelu? Komana novwahilaña antu anakulombola? Komana amanakwetu anateli kunshindamena sweje-e neyi nikweti mudimu muchipompelu? Komana nadikita, nakwashaña antu nikufwila kukalakela akwetu?’ (Yak. 3:17) Neyi mumona nenu hadi himwatela kuzatila, lombenu spiritu yajila yiyikwashi. Neyi mwiteja nenu spiritu yiyikwashi kuhimpa chimwekala niyilwilu yenu, amanakwenu niahela akuyikeña chikupu nawa akuyilemesha. w20.10 23 ¶12-13

Izu daNzambi didi neyi chibanjilu kudi etu. (Yak. 1:23-25) Etu amavulu twatalaña muchibanjilu ntetemena henohu kanda tufumi hetala. Twaditalaña muchibanjilu kulonda tumoni hitwatela kudiwahisha henohu antu kanda atumoni. Munjila yoyimu, neyi tutañaña Bayibolu mpinji yejima, tukwiluka chitwatela kuhimpila yitoñojoka yetu niyilwilu yetu. Amavulu atañaña nsona yefuku nifuku ntetemena henohu kanda afumi hetala. Atoñojokaña hayuma yatañañawu. Dichi ifuku dejima awanaña njila mwatela kuzatishilawu kufumba kwaMwizu daNzambi. Kubombelahu, twatela cheñi kudizaña nikutoñojoka chikupu Hezu daNzambi ifuku nifuku. Chumichi chamwekanaña neyi chapela, ilaña hichuma chidi hakachi kayuma yasweja kulema yitwatela kwila kulonda tutwalekihu kwenda munjila yanyanya yakuwumi. Munjila yikwawu, Izu daNzambi didi neyi ikina dazatishañawu kumona nachu mukachi kamujimba datenañawu nawu X-ray, datukwashaña kwiluka chitwekala mukachi. Ilaña twatela kwikala adizoza hakwila tuzatishi kufumba kwekala muBayibolu hela kwafumaña kudi antu amwimenañaku Nzambi. w20.11 18 ¶3; 20 ¶8

Hela chakwila akwaKristu akusambila ayikabishileña kakavulu, ilaña adiña ninampinji jakuwunda. Indi atumbanji azatishileña ñahi iji mpinji? Ana amayala niambanda ashinshika ashimwinini nsañu yayiwahi chakadi kuleka. Nsañu yashimunawu mumukanda waYilwilu yahosha nawu atwalekahu “nakumutiya Yehova woma.” Atwalekelihu nakushimwina nsañu yayiwahi, nawa chuma chafuminimu chipompelu “chakulilileñaku.” Chakadi nikujina, Yehova wakiswilili mudimu wawu wakushimwina wazatileñawu neyena mumpinji jakuwunda. (Yilw. 9:26-31) Atumbanji amuyaaka nkulakaji yakusambila azatishili mpinji yejima yadiñawu nayu kutandisha nsañu yayiwahi. Chakutalilahu, kapostolu Pawulu chelukiliyi nindi anamwenzunwini chenzelu cheneni hadiñayi muEfwesesa, wazatishili iyi mpinji kushimwina nikwilisha atumbanji muniwu musumba. (1 Kor. 16:8, 9) Atumbanji azatili nañovu yayeni kushimwina “nsañu yayiwahi yamazu aYehova.” (Yilw. 15:30-35) Yumanyi yafuminimu? Nsona yalelu yinashimuni. w20.09 16 ¶6-8

Chelili Adama yavulumuni wadileteleli kukala kushilahu tuhu nianyanindi. Tuchidi kukabakana muloña wakudikaña kwindi. Ilaña hamuloña wakwila Nzambi wasañwili Mwanindi, tukweti kuchiñeja kwakumbidi. “Kusañuka kwawafu nikwena kwenza kuhitila mudi muntu wumu,” Yesu. Kapostolu Pawulu wahosheli nindi: “Neyi chochinakufwawu antu ejima kuhitila mudi Adama, chochimu nawa antu ejima akekala nawumi kuhitila mudi Kristu.” (1 Kor. 15:21, 22) Pawulu watalishili mudihi chahosheliyi nindi “chochinakufwawu antu ejima kuhitila mudi Adama”? Pawulu wahosheleña hadi antu ejima aswana nshidi nikubula kuwanina kuhitila mudi Adama nawa anakufwa. (Rom. 5:12) Adama wudi wanyi hakachi kawantu “akekala nawumi.” Ifutu danyiloña daKristu hidamukuulaku muloña wadiña wawanina wadikañili naNzambi mumushikila. Yuma yamumwekeneni Adama diyi yakamwekena antu akasompeshawu kudi “Mwana kamuntu” nawu “ampembi,” dikwila nawu “akayijilumuna haya nyaaka.”—Mat. 25:31-33, 46; Heb. 5:9. w20.12 5 ¶13-14

Neyi anayinkihu wanyi mudimu wudi wejima toñojokenuña hadi añelu ashinshika. Hampinji yayuulileñayi Mwanta Ahabi, Yehova walejeli añelu ashinshika kuhana yitoñojoka yawu hachinateli kumudimbawu iwu mwanta watama. Añelu amakwawu ashimwini yitoñojoka yawu. Ilaña Nzambi watondelihu yitoñojoka yakañelu wumu nawa wamulejeli nindi diyi yikuzatika. (1 Anya. 22:19-22) Komana añelu amakwawu aneñeli hadaha nikutoñojoka nawu, ‘Nadikabishilañadi?’ Dichatoñojokeleñawu wanyi. Añelu ekala adizoza nawa akeñaña kalemesha kejima kuya kudi Yehova. (Ansomp. 13:16-18; Chim. 19:10) Anukenuña hakukooleka kutukweti kwakututena nawu aYinsahu jaYehova nikwakushimwina nsañu yaWanta. Bayi neyi mudimu diwu watuleteshaña kwikala alema kumesu aNzambiku. Ilaña neyi twadizoza tunateli kwikala alema kudi Yehova nikudi amanakwetu. Dichi mulombenuña Yehova kulonda yayikwashi kwikala adizoza. Toñojokenuña chikupu hadi ambuña Nzambi adizoza ashimunawu Mwizu dindi. Yikalakelenuña amanakwenu munjila yejima yimukutwesha.—1 Pet. 5:5. w20.12 26 ¶16-17

Itepa dawamwinu hikuchiñeja kwatwinkayi Yehova. Kuchiñeja kwatushiikayi nindi wukatupulwisha kukufwa nawa wakayisomwena antu elaña nkeñelu yindi. (1 Tes. 5:8; 1 Tim. 4:10; Tit. 1:1, 2) Kuchiñeja kwawamwinu kwakiñaña yitoñojoka yetu. Kuchiñeja kwatukwashaña kusha muchima hayikaninu yaYehova nawa kwatukwashaña kulonda tubuli kuzeya nakukala kutunakumona. Twavwalaña itepa Kuhitila mukumonaña yuma neyi chayimonañayi Nzambi. Chakutalilahu, hitwashaña muchima hakwikala namahetaku, ilaña twamuchiñejaña Nzambi. (Mas. 26:2; 104:34; 1 Tim. 6:17) Mpoku yakabali yaspiritu hiIzu daNzambi, Bayibolu. Iyi mpoku yikweti ñovu yakusolola makudi nikuyisubula antu kuwuduñu wantañishilu yakutwamba nikuyilwilu yafwana. (2 Kor. 10:4, 5; 2 Tim. 3:16, 17; Heb. 4:12) Twelukaña chakuzatisha chiwahi iyi mpoku kuhitila mukudiza kwankawetu nichatudizishañawu mukuloñesha kwaNzambi.—2 Tim. 2:15. w21.03 27 ¶4; 29 ¶10-11

Nihampinji yamukasiliwu hamuloña wakushimwina hadi Yesu, Yowanu wamwekesheli nindi wadiña wayikeña antu. Chakutalilahu, wasonekeli mukanda waChimwekeshu nawa wawutemesheli kuyipompelu kulonda antu eluki “yuma yikukeña kumwekana katataka.” (Chim. 1:1) Kuhiñahu chelili amumbiku kuPatamosa, Yowanu wasonekeli Nsañu Yayiwahi yahosha hachihandilu nimudimu waYesu. Wasonekeli cheñi nyikanda yisatu kulonda yakoleshi amanakwindi niahela. Munateli kwimbujola chihandilu chaYowanu chakudihana nakumwekesha nenu mwakeña antu kuhitila muyuma yimwatondaña kwila muchihandilu chenu. Kaayi kaSatana kakeñaña nawu muzatisheña ñovu nimpinji yenu kulonda mufwileña mali amavulu hela kutumbakana. Ilaña akwakushimwina aWanta mukaayi kejima azatishaña mpinji yawu kushimwina nsañu yayiwahi nikukwasha antu kulonda aswini kwakwihi naYehova. w21.01 10 ¶9-10

Jonatani neyi wakeñeleña wadi kumutiyila Davidi ichima. Chineli wadiña mwana kaMwanta Sawulu wadi kuhosha nindi yena diyi wadi kumuswana mwanta. (1 Sam. 20:31) Ilaña Jonatani wadiña wadizoza nawa washinshika kudi Yehova. Dichi yena wazatilili hamu namuntu atondeliwu kudi Yehova nindi wakekala mwanta kumbidi. Wadiña washinshika kudi Davidi hela chakwila chumichi chamutiyishileña Sawulu kutama. (1 Sam. 20:32-34) Jonatani wamukeñeli Davidi nawa hamutiyilileña ichimaku. Jonatani wadiña wakulukila mukwasa nsewu nawa wadiña mushidika wahamuka. Yena nitata yindi Sawulu ayilukili nawu “lufuchi lwawu lwabadikili lwawambuulu” nawa “ñovu jawu jabadikili jawanyitupa.” (2 Sam. 1:22, 23) Hela chochu, Jonatani wadi kudisamba hamuloña wakuhamuka kwindi. Ilaña Jonatani hadimweneña nindi wamubadika Davidi hela kumutiyila ichimaku. Dichi yena watiyileña kuwaha nakuhamuka kwaDavidi nichamushindameneniyi Yehova. Dichi hanyima yakwila Davidi namujahi dehi Goliyati, Jonatani watachikili kumukeña Davidi neyi chadikeñayi yomweni. w21.01 21 ¶6; 22 ¶8-9

Yesu Kristu diyi mutu wawakwaKristu ejima nawa yena wawanina. Hela chochu, mumbanda mukwaKristu neyi nasumbuki, mutu windi wekalaña iyala wabula kuwanina. Chumichi chinateli kwikala chakala. Dichi neyi nakukeña muntu wakusumbuka nindi, watela kudihula nindi: ‘Yumanyi yinakumwekesha nawu iwu manakwetu wakekala mutu wachisaka wamuwahi? Komana walemesha yuma yakuspiritu muchihandilu chindi? Neyi hayilemeshaku, neluki ñahi nami wukatukwasha kutwalekahu kwikala nawubwambu wawuwahi naYehova neyi tunadisumbuli?’ Hela chochu, muhela watela kudihula cheñi nindi: ‘Yilwilwinyi yayiwahi yinikweti yikatukwasha muwulu wetu? Komana nadiwunjika nawa nekala nachisambu? Komana wubwambu wami naYehova wakola?’ (Mukwa. 4:9, 12) Mumbanda neyi yafuukulahu chiwahi henohu kanda yasumbuki. Ahela akwaKristu amavulu ovwahilaña anfumu jawu. Twatela kuyihameka! w21.02 8 ¶1-2

Hadi yaaka yayivulu, akwakushimwina amavulu anafuukulihu kudiza idimi dacheñi kulonda atwali mudimu wakushimwina hambidi nakuya muchipompelu mudi kukankila kwawakwakushimwina aWanta. Awa akwaKristu afuukulahu awenawu kulonda atwali mudimu waWanta hambidi. Hela chakwila hahitaña yaaka hakwila elukishi idimi, akwashaña chipompelu munjila jajivulu. Yilwilu yawu yayiwahi niyuma yelukawu yakoleshaña chipompelu. Twayilemesha nankashi awa amanakwetu niahela adihana. Izanvu dawakulumpi hidatela kubula kumuhameka manakwetu kulonda yekali mukulumpi hela nkoñi wakuzatila hamuloña wakubula kwilukisha idimi dahoshañawu muchipompeluku. Akulumpi atela kulondela chahosha Bayibolu neyi anakumuhameka manakwetu kulonda yekali mukulumpi hela nkoñi wakuzatila bayi hakwilukisha idimiku.—1 Tim. 3:1-10, 12, 13; Tit. 1:5-9. w20.08 30 ¶15-16

Antu atoñojokaña nawu anateli kwikala namuzañalu neyi akola kumujimba, adi namali amavulu nawa chisaka chawu chidi mukuwunda. Ilaña muzañalu wateneneñayi Yakoba himukabu waspiritu yaNzambi nawa hiwashindamena hayuma chiyidi muchihandiluku. (Ñal. 5:22) MukwaKristu wekalaña namuzañalu walala neyi yeluka nindi nakumuzañalesha Yehova nawa nakumwimbujola Yesu. (Luka 6:22, 23; Kol. 1:10, 11) Neyi chakiñewa muzuzu wakesi wunakubutukila mukachi kenoñu, iwu muzañalu niwena watwalekañahu kubutuka muloña wekala mukachi kamuchima wamukwaKristu. Hela chakwila twakata, indi kwiji tudana mali iwu muzañalu hiwamanañaku. Nawa muzañalu wetu waswejelañaku neyi antu anakutuseha hela neyi antaña anakweseka kutukañesha. Chatela wumani, muzañalu wetu waswejelañaku neyi ayilumbu jetu anakufwila kutuzeyesha. Neyi anakutukabisha hamuloña wachikuhwelelu chetu chamwekeshaña nawu tudi atumbanji twaKristu alala. (Mat. 10:22; 24:9; Yow. 15:20) Dihafumini Yakoba yasoneki mazu adi munsona yalelu. w21.02 28 ¶6

Neyi muwana mavasi amuBayibolu anakumwekesha chichalemena kudiwunjika nikumukuhwelela Yehova, yihembelenu kumutu. Hakwila chiyikwashiku kwanuka, yitañilenuña hewulu hela kuyisoneka nawa hitulukenuñamu kapampa kakavulu. Yoshuwa amulejeli kutañaña mukanda waNshimbi mpinji yejima nikutoñojokañahu chikupu hakwila nawu yakamoni kuwaha. Yeniyi nshimbi yatañileñayi yadi kumukwasha kubula kutiya woma nikwikala wahamuka hampinji yamweneñayi kukala kudi kwejima. (Yosh. 1:8, 9) Mavasi amavulu adi Mwiizu daNzambi anateli kuyikwasha kwikala awunda hampinji yimunakumona kukala kunateli kuyakamisha hela kuyitiyisha woma. (Mas. 27:1-3; Yish. 3:25, 26) Hakupompa, jimpanji jahanañawu hachinañamu, ñakwilu yahanaña izaza nimazu amawahi ahoshañawu amanakwetu niahela atukoleshaña. (Heb. 10:24, 25) Tunateli cheñi kukoleshewa neyi tulejañaku akwetu itwakuhwelela muchipompelu yuma yinakutwakamisha. w21.01 6 ¶15-16

Chimwapapatisheweli, mwamukuhweleleli nikumushindamena Yehova. Nawa Yehova wayitambwilili chachiwahi muchisaka chindi. Chuma chimwatela kwila hikutwalekahu kumushindamena Yehova. Chinateli kumwekana neyi chapela kumushindamena Yehova neyi munakufuukula yuma yalema, hanu dinu mwelaña ñahi muyuma yikwawu? Chalema nankashi kumushindamena Yehova hampinji yimunakufuukula niyuma yidi neyi yisela, mudimu wakumujimba niyuma yimunakufwila kwila! Bayi mushindamena hamaana enuku. Keñenu yishina yamuBayibolu yikuyikwasha mukukala kumukweti hela muyuma yimunakukeña kwila nawa yizatishenu. (Yish. 3:5, 6) Chimwela mwenimu, mukumutiyisha Yehova kuwaha nawa antu muchipompelu chenu akuyilemesha. Ninenu mudi neyi etu, mwawanina wanyi, mpinji yikwawu munateli kuluwañesha. Hela chochu, chumichi hichatela kuyikañesha kudikita chikupu mumudimu waYehovaku. w21.03 6 ¶14-15

Komana anakuyikañesha kumukalakela Yehova kudi antu amuchisaka chenu? Indi kwiji munakushakama mwituña mwakañeshañawu hela mwalekeshawu mudimu wawaYinsahu jaYehova? Neyi dimu neyi mutaña mazu ekala ha 2 Timotewu 1:12-16 ni 4:6-11, 17-22, akuyikolesha. Kapostolu Pawulu wasonekeli awa mazu hadiñayi mukaleya. Henohu kanda mutañi awa mavasi mulejenumu Yehova kukala kumukweti nichimunakutiya. Mulejenu yuma yejima. Nkumininaku mulombenu Yehova yayikwashi kuwana yishina munsañu yahosha hakukala kwamweniyi Pawulu yikuyikwasha kumanisha kukala kumukweti. Yehova wamulejeleñahu dehi Pawulu nindi akamukabisha muloña wakwikala mukwaKristu. (Yilw 21:11-13) Yehova wamukwashili ñahi Pawulu? Wakwili kulomba kwaPawulu nawa mukuhita kwampinji wamwinkeli ñovu. Yehova wamulejeli Pawulu nindi wakamufweta hanyidimu yakalakeleñayi. Yehova wayisañumwini amabwambu jaPawulu ashinshika kumukwasha muyuma yakumujimba. w21.03 17-18 ¶14-15, 19