September

Petulu wazatishili mazu ambukaku chanti hakuzatisha mazu adi muwuprofwetu waYoweli. Mazwinyi azatishiliyi? (Yilw. 2:16, 17) Chatela yatachiki namazu adi muYoweli akwila nawu “hanyima yayumiyi,” ilaña Petulu wahosheli nindi: “Nawa mumafuku akukuminina,” munawa mazu, dikwila nawu mumafuku akukuminina awaYudeya, spiritu yaNzambi akayichila “hadi antu ejima.” Chumichi chinakumwekesha nawu hahitili mpinji hakwila nawu wuprofwetu waYoweli wushikijewi. Hanyima yakwila Nzambi nechili dehi spiritu yajila mumafuku awapostolu, mudimu wakushimwina watachikili kuyilaku hambidi mwahita kaayi kejima. Hampinji yayisonekeleliyi Pawulu mukanda aKolosi mu 61 C.E., wahosheli nindi nsañu yayiwahi anakuyishimwañena “kuyuma yejima yekala mwishina dewulu.” (Kol. 1:23) Mumafuku akapostolu Pawulu, ‘yuma yejima’ yemeneneñaku maluña amukaayi mwashimwinineñawu. Nawukwashu waspiritu yaYehova yajila yabadika ñovu, mudimu wakushimwina wunakuyilaku hambidi nimakonu “kushika kwakumina iseki dejima.”—Yilw. 13:47. w20.04 6-7 ¶15-16

Yehova watukeña wejima wetu, kushilahu tuhu nianyikoku amakwawu anafumi hamukanka wanyikoku yindi. (Mat. 18:12-14) Yehova wakanini nindi wakakeñakeña nyikoku yindi yajimbala nawa wakayikwasha cheñi kwikala nawubwambu nayena. Nawa washimwini yuma yakelayi, yuma yelileñayi kabiña wamuIsarela neyi mukoku najimbali. (Ezek. 34:12-16) Chatachi, kabiña wadiña nakukeñakeña mukoku, chuma chakeñekeleña mpinji niñovu. Dichi neyi nawani dehi mukoku wajimbala, kabiña wamufuntishileña hamukanka. Cheñi, neyi mukoku nadikatishi hela nazeyi, kabiña wadiña nakumukwasha iwu mukoku wunazeyi kuhitila mukumukasa hayilonda, kumweleka nikumudisha. Akulumpi, enu atubiña ‘anyikoku yaNzambi,’ mwatela kulondela iyi yuma kulonda mukwashi ejima anafumi muchipompelu. (1 Pet. 5:2, 3) Akulumpi akeñakeñaña nyikoku, ayikwashaña kufunta cheñi muchipompelu nikuyimwekeshela kukeña kuhitila mukuyikwasha cheñi kwikala nawubwambu naYehova. w20.06 20 ¶10

Komana Yesu wamweneña nindi maha anahi dehi nawa anashiki hampinji yakwaañula muloña wakwila watoñojokeleña nindi antu amavulu akumulondelaña? Inehi. Nsona yashimwineñahu dehi nawu antu antesha akamukuhwelela. (Yow. 12:37, 38) Nawa Yesu wadiña nañovu yakumona munyichima yawantu. (Mat. 9:4) Hela chochu, washili maana hadi awa antesha amukuhweleleli nawa washimwinini antu ejima. Ndochu etu twabula wuswa wakumona munyichima yawantu, tukudiwiladi antu ekala mwiluña detu dakushimwina? Dichi monenuña antu nenu anateli kwikala atumbanji. Anukenuña mazu ahosheliyi Yesu kudi atumbanji twindi. Maha anatookashani, dikwila nawu anashiki dehi hakwañula. Antu anateli kuhimpa nakwikala atumbanji twaKristu. Yehova wayimonaña awa antu anateli kwikala atumbanji nindi ‘hiyuma yalema.’ (Hag. 2:7. NWT.) Neyi tumonaña antu neyi chayimonañayi Yehova niYesu, tukwiluka chidi chihandilu chawu niyuma yakeñeshawu. Chatela tuyimoneña netu anateli wanyi kuhimpa, ilaña tukuyimonaña netu anateli kwikala amanakwetu niahela. w20.04 13 ¶18-19

Izu daNzambi datudizishaña nawu twatela kumukeña Yesu nikutwalekahu kumukeña hakwila nawu tumuzañaleshi Yehova. Dichi chuma chimu chitwatela kwila hakwila twikali amabwambu jaYesu hikumwiluka. Tunateli kumwiluka neyi tutañaña nyikanda yamuBayibolu; Matewu, Maku, Luka niYowanu. Neyi tutoñojokaña nankashi haniyi nyikanda yamuBayibolu yahosha hachihandilu chaYesu, tukumukeña nikumulemesha Yesu muloña wanochu chahandiliyi nawantu. Chakutalilahu, hela chakwila wadiña Nkuluñaña wawu, hayikoñelihu atumbanji twindi neyi anduñuku. Ilaña wayilejeleña yuma yatoñojokeleñayi nichatiyileñayi. Yesu wadiña nakuneña neyi ananeñi nawa wadilileña hamu nawu. (Yow. 11:32-36) Niakwankunyi nindi elukili nawu wadiña ibwambu dawantu etejeleña mazu indi. (Mat. 11:19) Neyi tumwimbujola Yesu neyi chelileñayi nawatumbanji twindi, wubwambu wetu nawakwetu wukukola, tukuzañalala nawa tukumukeña nikumulemesha Kristu. w20.04 22 ¶9-10

Kwakwihi na 1870 nfulumendi yaBritain yayuulili matuña amavulu mukaayi kejima nawa yadiña namashidika asweja ñovu. Iwu wanta wemeneneñaku kaluseñu kanyanya kashindili jinseñu jisatu, dikwila nawu France, Spain, niNetherlands. (Dan. 7:7, 8) Nawa nfulumendi yaBritain yekalili mwanta wakukabeta kakuchidiilu kushika nikuNjita yaKaayi Yatachi. Haniyi mpinji, ituña daUnited States of America dekalili namaheta chikupu kubadika matuña ejima nawa datachikili kuzatila hamu netuña daBritain. Hampinji yikwadiña Njita Yakaayi Yatachi, ituña daUnited States niBritain atachikili kuzuñila hamu nawa ekalili namashidika asweja ñovu. Hayina mpinji, Britain niAmerica chadibombeliwu hamu enjili nakwikala Anglo-America Wanta waÑovu Wakaayi. Neyi chashimwineñahu dehi Danyeli, iwu mwanta wekalili “nanjita yindi yeneni nankashi yasweja ñovu.” Mumafuku akukuminina ejima Anglo-America diyi mwanta wakukabeta kakuchidiilu. w20.05 4 ¶7-8

Tukweti Menji muloña wakwila iseki dekala heluña datelela netena. Neyi iseki adiswijaku chanti kwitena, menji ejima akuuma nawa iseki dikutata chakwila kwosi chileñaleña chachumi chikuhandaku. Nawa neyi iseki adifumisha hidekala nawa adiswija kwakulehi netena, menji ejima akudikwata nawa iseki dikwikala ilola. Chineli Yehova washa iseki heluña datelela, menji akwashaña yileñaleña yikweti wumi. Mwaana watatishaña menji mukaluñalwiji niheseki nawa menji akakumukaña nakuya muluzwizu nakutuña mavu. Chaaka nichaaka itena dakakumwishaña mamiliyoni namamiliyoni amalita amenji kufuma heseki. Awa menji ashakamaña muluzwizu mafuku ikumi henohu kanda ekali nvula hela nvula yachishika yitooka. Kuhiñahu menji afuntaña cheñi mutuluñalwiji hela mutuloña nawa chatwalekañahu chochenichi. Yehova chaleñayi menji muniyi njila chamwekeshaña nawu wukweti maana niñovu chikupu.—Yoba 36:27, 28. w20.05 22 ¶6

Yesu watukonkomweneni kutwalekahu kulomba spiritu yajila. (Luka 11:9, 13) Yehova watwinkaña ñovu, kuhitila muspiritu yindi, dikwila nawu “ñovu yabadika hañovu jawantu.” (2 Kor. 4:7) Nawukwashu waspiritu yaNzambi, tunateli kuumika kweseka kwejima kutunateli kumona. Spiritu yajila niyena yinateli kutukwasha kuzata nyidimu mukuloñesha kwaNzambi. Spiritu yaNzambi yatukwashaña kuzatisha chiwahi wuswa niyawaana yitukweti. Tuneluki chikupu netu nyidimu yejima yitwazataña mumudimu waNzambi twayizataña nawukwashu waspiritu yindi. Tunateli kumwekesha netu twalemesha spiritu yajila yaNzambi kuhitila mukulomba netu yitukwashi kwiluka neyi tudi nayitoñojoka yatama hela kufwila kwatama mumuchima. (Mas. 139:23, 24) Neyi tulomba muniyi njila, Yehova wukutukwasha naspiritu yindi kwiluka yitoñojoka hela kufwila kwatama. Kuhiñahu twatela kulomba spiritu yaNzambi yitwinki ñovu yakushinda iyi yitoñojoka hela kufwila kwatama. Muniyi njila tukumwekesha netu tunakufwila kutondolwela kwila yuma yejima yinateli kuletesha Yehova kuleka kutwinka spiritu yajila.—Efwe. 4:30. w20.05 28-29 ¶10-12

Neyi tuhakwilaku ijina daYehova, tunakwimbujola chakutalilahu chaYesu Kristu. Yesu wayilejeli antu ijina daTata yindi kuhitila mukudizatisha nikuyileja kulonda eluki chekalayi Yehova. Chakutalilahu, wayikonkolweli Afwarisi amwekesheleña nawu Yehova wazuwa, wakeñaña yuma yitukubula kutwesha kwila, wudi hahalehi nawantu nawa wudana luwi. Yesu wakwashili antu kwiluka nawu Tata yindi watoñojokelañaku, wadiwunjika, wukweti kukeña nawa wanakenaña. Nawa wakwashili antu kumwiluka Yehova kuhitila mukwimbujola yilwilu yaTata muchihandilu chindi chejima. (Yow. 14:9) Kufwana Yesu tunateli kuyileja antu yuma yitweluka hadi Yehova, kuyileja netu hiNzambi wukweti kukeña niluwi. Neyi twila mwenimu dikwila nawu tunakufumisha makudi nikasawuntu kamwinkañawu Yehova. Tunakujilika ijina daYehova kulonda dikali dajila muyitoñojoka nimunyichima yawantu. Twamwekeshaña chekalayi Yehova kudi antu mumazu niyilwilu yetu, dikwila nawu tunakujilika ijina dindi. Twalemeshaña idi ijina kuhitila mukukwasha antu kulonda eluki chekalayi Nzambi. w20.06 6 ¶17-18

Hela chochu, njila yakuhanjekelamu haintaneti anateli kuyizatisha munjila yayiwahi, chidi neyi kuhanjeka nachisaka niamabwambu. Neyi mutala nsañu, nyevulu mavidiyo ombilañawu antu haintaneti ekala hohu akuditumbakesha awenawu. Chinamwekani neyi ahoshaña nawu “Nshishikenu ami.” Amakwawu ombilañahu mazu atama hanyevulu yawu hela hanyevulu yawakwawu. Chumichi chinambukiku nayilwilu yatela kwikala nawakwaKristu yakudizoza nikudakamena. (1 Pet. 3:8) Neyi mwazatishaña njila yakuhanjekelamu haintaneti, dihulenu nenu: ‘Mazu, nyevulu nimavidiyo inombilañahu amwekeshaña nawu inakuditumbakesha? Yaleteshaña antu amakwawu kutiya ichima?’ AkwaKristu hiyatela kufwilaña kutumbakanaku. Alondelaña kufumba kwamuBayibolu kwakwila nawu: kudi munsona yalelu. Neyi twikala adizoza hitukwikala neyi antu amukaayi adivwimba akeñaña kwikala alema kubadika akwawuku.—1 Yow. 2:16. w20.07 6 ¶14-15

Henohu kapostolu Pawulu kanda yekala kambanji kaKristu, wadiña mukwakasawuntu nawa wakabishileña atumbanji twaYesu. (Yilw. 7:58) Yesu yomwenindi wamulekesheli Pawulu ateneneñawu nawu Sawulu kukabisha chipompelu chawakwaKristu. Yesu wahosheli naPawulu iku wudi mwiwulu nawa wamuputishili mesu. Hakwila yatachiki cheñi kumona, Pawulu wayili nakulomba wukwashu kudi yowu antu akabishileñayi. Wetejeli kumukwasha kudi kambanji Ananiya nawa wamutonesheli. (Yilw. 9:3-9, 17, 18) Nkumininaku, Pawulu wekalili mukwaKristu waya mpuhu, ilaña wavulameneni wanyi yuma yamudizishiliwu kudi Yesu hayileñayi kuDamakasa. Pawulu watwalekelihu kwikala wadizoza nawa watambwilileña wukwashu kudi amanakwindi niahela. Welukili nindi ‘amukolesheleña.’—Kol. 4:10, 11, tth. w20.07 18-19 ¶16-17

Hela chakwila Yehova diyi wañovu jejima, wenkaña antu amakwawu nyidimu. Chakutalilahu, wamutonda Yesu kwikala Mwanta waWanta nawa wakenka a 144,000 wuswa wakuyuula hamu naYesu. Yehova wamudizisha Yesu kwikala Mwanta nawa kaPristu Muneni. (Heb. 5:8, 9) Wayidizishaña cheñi antu akayuula hamu naYesu, ilaña helaña yayinka mudimu yafunta cheñi nakuyimena kulonda yayilomboleña mutuyuma twejimaku. Ilaña wayikuhwelela nindi akwila nkeñelu yindi. (Chim. 5:10) Neyi chakwila Tata yetu wamwiwulu wukweti ñovu yakuzata nyidimu yejima yahana nyidimu kudi antu amakwawu, indi etu tukubuliladi. Chakutalilahu, komana mudi mutu wachisaka hela mukulumpi muchipompelu? Mwimbujolenu Yehova kuhitila mukuyinkaku amakwawu nyidimu nikubula kuyitalatala neyi anakuzata. Neyi mumwimbujolaña Yehova, nyidimu yikwendaña swayi nawa mukudizisha amakwawu nyidimu nikuyikwasha kukuhwelela nawu niwena anateli kuzataku.—Isa. 41:10. w20.08 9 ¶5-6

Yehova wakeñaña tuyimoneña ñahi nyikoku yindi yajimbala? Yesu watushilili njila yakulondela. Welukili nindi nyikoku yaYehova yejima yalema kumesu aNzambi. Dichi Yesu wazatili nañovu kulonda yakwashi “antu amwitala daIsarela adi neyi anyikoku ajimbala” afunti kudi Yehova. (Mat. 15:24) Chineli hikabiña wamuwahi, Yesu wazatili nañovu kulonda yabuli kujimbesha mukoku waYehova hela wumu. (Yow. 6:39) Kapostolu Pawulu wayikonkomweneni akulumpi muchipompelu chamuEfwesesa kumwimbujola Yesu. Wahosheli nindi: “[Mwatela kukwasha] antu azeya nawa mwatela kwanuka mazu aMwanta Yesu, chahosheliyi yomweni nindi: ‘Mukuhana mwekala muzañalu chikupu kubadika wekala mukutambwila.’” (Yilw. 20:17, 35) Dichi, akulumpi makonu akweti mudimu walema wakukwasha azeya. Salvador mukulumpi wakuSpain wahosheli nindi: “Neyi nitoñojoka chakamenañayi Yehova nyikoku yindi yajimbala, chansañumunaña kuzata nañovu kulonda niyikwashi. Chineli nindi kabiña wakuspiritu, neluki chikupu nami Yehova nakukeña nindi niyakameneña.” w20.06 23 ¶15-16

Yehova wakadiwunjika kushika tuhu nichakamana Yaaka Ikombakaji sampu tunekali awanina. Yehova wakatwalekahu kutwanakena nichakamana Yaaka Ikombakaji. Dichi, ninetu twatela kumonaña yuma yayiwahi mudi akwetu nikwikala adiwunjika nawena. Yesu niañelu azañaleli chelili iseki adileñi. Fwikijenu muzañalu wakatiyawu hakumona heseki hadi hohu antu awanina, amukeña Yehova nawa anakumukalakela. Fwikijenu muzañalu wakatiyawu antu akaya mwiwulu nakuyuula hamu naKristu hakumona antu anakuhetela mumudimu wawu. (Chim. 4:4, 9-11; 5:9, 10) Nawa fwikijenu muzañalu wutwakekala nawu chakela kukata, chineñi nikufwa jinamani dehi. Dichi twalekenuhu kumwimbujola Tata yenu wukweti kukeña, maana nawa wadiwunjika kushika tuhu niniyi mpinji. Neyi mwila mwenimu, mukwikala namuzañalu hichikweti muloña nakukala kumunakumonaku. (Yak. 1:2-4) Twasakililaña hachikaninu chaYehova chakwila nawu “kwamba kekala kusañuka.”—Yilw. 24:15. w20.08 19 ¶18-19

Bayibolu hichawaana chatwinkayi Nzambi. Tata yetu wamwiwulu woneneni amayala kulonda ayisoneki muloña wakwila watwikeña chikupu. Yehova wakulaña malwihu alema ejima itwehulaña kuhitila muBayibolu. Malwihu adi neyi: Etu antu twafuma kudihi? Muloñadi Nzambi chaleñeleliyi antu? Nawa yumanyi yikamwekana kumbidi? Yehova nakukeña anyanindi ejima kwiluka ñakwilu yanawa malwihu, dichi hayaaka yejimiyi yinahitihu nakwashi antu kubalumuna Bayibolu mumadimi amavulu. Makonu, Bayibolu yamukuma hela yachikunku yidi mumadimi akubadika ha 3,000. Bayibolu diwu mukanda wunabalumuniwu nawa wunahaniwu nankashi. Tunateli kumwekesha netu twasakililaña hakwikala naBayibolu kuhitila mukuyitaña ifuku niifuku, kutoñojoka chikupu hayuma yatañishaña Bayibolu nikuzatisha yuma yitunakudiza. Kubombelahu, twamwekeshaña kusakilila kudi Nzambi kuhitila mukuzata hanakumini ñovu jetu kulejaku antu mazu ekala muBayibolu.—Mas. 1:1-3; Mat. 28:19, 20. w20.05 24-25 ¶15-16

Kaprofwetu Yeremiya amutumini kuya nakuzatila mwiluña dakala. Antu adiña nakumutuka nikumuseha. Mpinji yimu waneñeli chakwila wakeñeleña kuleka kushimwina. Ilaña walekeli wanyi. Muloñadi? “Izu daYehova” dadiña neyi kesi mumuchima waYeremiya nawa halekeli kushimwinaku. (Yere. 20:9) Dichi chitwatiyaña ninetu neyi twinzesha yitoñojoka nimuchima wetu Nezu daNzambi. Dichuma chikwawu chitwatela kudizilaña Bayibolu mpinji yejima nikutoñojokahu chikupu. Nawu chikufumamu, tukwikala namuzañalu chikupu nawa antu akutiyililaña nsañu yitunakuyishimwina. (Yere. 15:16) Dichi, neyi munaneñi lombenu kudi Yehova yayikwashi. Wukuyikwasha kuumika hakubula kuwanina nikuzeya-zeya kwenu hela kuumika neyi mwakata. Wukuyikwasha kumonaña chiwahi nyidimu yenu. Nawa wukuyikwasha kulonda mumoneña chiwahi mudimu wenu wakushimwina. Kubombelahu, lombenuña kudi Tata yenu wamwiwulu nawa mulejenu kukala kwenu. Nawa wukuyikwasha kuleka kuneña. w20.12 27 ¶20-21

Ahela amakwawu, chayawu kukupompa diyi mpinji yadimonañawu nawakwawu akwakudifukula. Dichi twatela kuzatisha iyi mpinji kuyitambwila, kuhanjeka nawu kulonda amoni nawu twayakamenaña. Kufwana Yesu, ninetu tunateli kwikala nampinji yakuhanjeka nawahela. (Luka 10:38-42) Hadaha tunateli kuyitambika kwinza nakudiila hamu nanetu hela kuhemena hamu nawu. Neyi tuyitambika, twatela kuhanjeka hohu hansañu yinateli kuyikolesha. (Rom. 1:11, 12) Akulumpi atela kwikala nayilwilu neyi yadiña naYesu. Welukili nindi amakwawu kushakama wujiki kunateli kuyikalila, dichi wayilejeli hatooka nindi bayi neyi kusumbuka hela kwikala nanyana diyi yuma yaletaña muzañalu wahaya nyaakaku. (Luka 11:27, 28) Ilaña muzañalu wahaya nyaaka wafumaña mukutwamijaku mudimu waYehova. (Mat. 19:12) Sweje-e dinu, akulumpi atela kumonaña ambanda akwaKristu neyi hiyahela jawu niamama jawu akuspiritu. Akulumpi akwilaña chiwahi neyi akwikalaña nampinji yakuhanjeka nawahela henohu kupompa kanda hela hanyima yakupompa. w20.09 21-22 ¶7-9

MuIsarela ndimi watumbileña mbutu hanyima yanvula yakusambila nawa wañwileña mbutu hanyima yanvula yakukumishaku. (Maku 4:28) Mwani twimbujoleña chikupu kudiwunjika kwandimi. Hela chochu, chumichi chaswayi wanyi. Antu abula kuwanina akeñaña kushikena kumona yuma yikufuma mumudimu wunakuzatawu. Ilaña neyi tunakukeña iha detu kusoña chiwahi, twatela kutwalekahu kudakamena, dikwila nawu, kudidima, kuditumba, kudisela nikuditukumwina. Mudimu wakwilisha atumbanji niwena wakeñekaña kutwalekahu kuzata nañovu. Hakwila tukwashi atudizi etu kuleka chaambu nakwikala nachilwilu chakukeña, hatela kuhita mpinji. Kudiwunjika kunateli kutukwasha kubula kuzeya neyi tumona ikañesha. Neyi antu amakwawu akaana kututiyilila, twatela kudiwunjika. Hitunateli kukanjikija kadizi waBayibolu kwikala nachikuhweleluku. Mpinji yikwawu, atumbanji twaYesu niwena hiyashikeneneña kutiyishisha munatalishi yuma yayidizishileñawuku. (Yow. 14:9) Twanukeña netu, mudimu wetu wakutumba nikutukumwina, ilaña Nzambi diyi wakulishaña.—1 Kor. 3:6. w20.09 11 ¶10-11

Wejima wetu tunakukeña atudizi etu ashikihu kupapatishewa. Njila yimu yalema mutunateli kuyikwashila hikuyikolesha kulonda apompeña mafuku ejima. Kakavulu atudizi apompaña apamaña swayi. Antañishi amakwawu ayilejaña atudizi awu nawu kudi yuma yayivulu yinateli kudizawu kukupompa yiyanateli kubula kudizawu hakudiza Bayibolu. Tañenu Aheberu 10:24, 25 nakadizi wenu nawa mulumbulwilenu yuma yinateli kufumamu neyi yayaña nakupompa. Hoshenu namuzañalu yuma yimwadiza hakupompa kwafumahu. Neyi yamona chimunakutiya kutalisha hakupompa chikumusañumuna niyena kuya nakupompa. Yuma yikumonayi kadizi wenu neyi yapompa katachi yikubadika yuma yejima yamweniyi nikutiya kunsakililu yikwawu. (1 Kor. 14:24, 25) Nateli kuwana antu akweti yilwilu yayiwahi yinateli kwimbujolayi nawa anateli kumukwasha kushikahu kupapatishewa. w20.10 10-11 ¶14-15

Spiritu yaNzambi yinateli kuyikwasha kuzatisha yuma yimwatañaña nikudiza Mwizu daNzambi. Lombenuña neyi chalombeliyi ñimbi yamasamu nindi: “Eyi Yehova, nleji njila yeyi, nukwenda mwaya nsañu yeyi yalala. Bayi niikala nanyichima yiyeduku, chiña wunyinka wumu hohu wakwakama ijina deyi.” (Mas. 86:11) Dichi twalekenuhu kuda yakuda yakuspiritu yinakutuloñeshelayi Yehova kuhitila Mwizu dindi nikuloñesha kwindi. Bayi mukuminaña dakufwila hohu kwiluka chalalaku. Ilaña chihembenuña mumuchima nikuchizatisha muchihandilu chenu. Spiritu yaYehova yinateli kuyikwasha kwila mwenimu. Mwatela cheñi kukoleshaku amanakwenu niahela. (Heb. 10:24, 25) Muloñadi? Muloña hichisaka chenu chakuspiritu. Lombenuña spiritu yaNzambi yiyikwasheña kuhana ñakwilu chakufuma hamuchima kukupompa kwawakwaKristu nikuhana mpanji kwesekeja nahanakumini ñovu jenu. Neyi mwila mwenimu, mukumwekesha kudi Yehova niMwanindi nenu mwakeña “nyikoku” yawu yalema.” (Yow. 21:15-17) Dichi tiyililenuña kudi Ntañishi Yenu wabadika kuhitila mukuda yakuda yakuspiritu yinakuyinkayi. w20.10 24-25 ¶15-17

Yesu welili ñahi nawapostolu indi chelili azeyi? Chelili amusañuli, Yesu wayilejeli akwakumulonda nindi: “Bayi mutiya womaku! Yenu muyileji anakwami [nenu nasañuki].” (Mat. 28:10a) Yesu hakaanini apostolu indiku. Hela chakwila amushiyili, wayiteneni nindi “anakwami.” Kufwana Yehova, Yesu wayitiyilili luwi nawa wayanakeneni. (2 Anya. 13:23) Munjila yoyimu, ninetu twayakamenaña antu aleka kushimwina. Hiyamanakwetu niahela nawa twayikeña. Tuchidi kwanuka nyidimu yazatiliwu kunyima awa akwetu akwakwitiya, amakwawu hadaha azatili hadi yaaka yayivulu. (Heb. 6:10) Twayanukaña nankashi. (Luka 15:4-7) Dichi, twatela kuyileja antu azeya kulonda enzeña nakupompa neyi enzaña wanyi. Nawa neyi muntu wazeya yenza Kwitala daWanta nakupompa twatela kumushikija namuzañalu. w20.11 6 ¶14-17

Yakoba niYowanu hamu nimama yawu ayili nakumulomba Yesu nawu akayinki chuma chakwila yena wadiñahu wanyi nawuswa wakuhana. Chakadi kushintajala, Yesu wayilejeli nindi Tata yindi wamwiwulu hohu diyi wunateli kutonda watela kushakama kuchikasa chaYesu chachidiilu nichakuchimunswa muWanta. (Mat. 20:20-23) Yesu wamwekesheli nindi wukweti mwakukumina. Wadiña wadizoza. Helilihu chuma chabuliliwu kumuleja kudi Yehova nindi yeliku. (Yow. 12:49) Tunateli kumwimbujola ñahi Yesu? Twembujolaña chakutalilahu chaYesu chakwikala adizoza kuhitila mukuzatisha kufumba kudi munsona yalelu. Dichi neyi anatulombi wukwashu, bayi tukanjikijaña antu kulondela yitoñojoka yetuku hela kuhosha chakadi kutoñojoka chidi yumaku. Ilaña, twatela kulondela kufumba kwekala muBayibolu nimunyikanda yetu yashindamena haBayibolu. Muniyi njila, twamwekeshaña netu tuneluki hakukumina. Neyi twikala adizoza, twahanaña kalemesha kudi mwini ‘nshimbi jaloña’ Wañovu Jejima.—Chim. 15:3, 4. w20.08 11-12 ¶14-15

Chumanyi chimwatela kwanukaña neyi munakukeña kufumba mukwenu? Henohu kanda muhoshi namukwenu, dihulenu nenu, “Komana nadimonaña nami ‘naswejesha nankashi kuloña’?” Muntu wadimonaña nindi wasweja kuloña, hasompeshaña akwawu kushindamena hanshimbi jaYehovaku, ilaña wayisompeshaña nayitoñojoka yindi nawa hakweti luwiku. Neyi munadishinshiki dehi nawa muchidi kukeña kuhanjeka nindi, ilukenu chuma chinaleteshi nawa zatishenu malwihu kulonda yamoni mwaluwañeshayi. Mukwashenu kuzatisha Nsona nawa mwatela kwanuka nenu mukwenu akamusompesha kudi Yehova bayi enuku. (Rom. 14:10) Zatishenu maana ekala Mwizu daNzambi nawa neyi munakufumba muntu mwekeshenuña wushona neyi chelileñayi Yesu. (Yish. 3:5; Mat. 12:20) Muloñadi? Muloña Yehova wakatwila neyi chitwayilaña akwetu.—Yak. 2:13. w20.11 21 ¶13

Komana munateli kuzañalala neyi antu akunkulula kwesekeja nekowa denu, mmwekenu yenu hela chidi mujimba wenu? Inehi. Twakundejewaña hakwiluka netu Yehova hakunkululaña kwesekeja nachamonañawu antuku. Chakutalilahu, Samweli chayimweniyi anyana kaJesi, dichayimweniyi Yehova wanyi. Yehova wamulejeli Samweli nindi mwana wumu hakachi kanyana kaJesi wakekala mwanta wawaIsarela. Hanu dinu mwananyi? Samweli chamweniyi mwana kaJesi wamukulumpi Eliyabi, wahosheli nindi: “Wambala waYehova wawayishewa nashiki dehi kumesu indi.” Eliyabi wamwekeneña neyi mwanta. “Yehova hakumwila Samweli nindi, Bayi wumutala chekalayi kumesu hela chatalukayuku; [namukaani] kwami.” Yumanyi yitukudizilaku? Yehova watwalekelihu nindi: “Muloña antu atalaña kumesu hakwila Yehova watalaña [mumuchima].” (1 Sam. 16:1, 6, 7) Chikuwaha neyi tumwimbujola Yehova chitwatela kwila nawamanakwetu niahela. w20.04 14 ¶1; 15 ¶3

Yesu wadiña nakuhita mumaha, hadaha mumaha abali yinakukeña kuha. (Yow. 4:3-6) Kunashali tukweji tuwana hakwila chilaaka chakwaañula iyi mbutu chishiki. Yesu wahosheli nsañu yakuhayamisha. Dichi wahosheli nindi: “Fumbulenu mesu enu kulonda mutali maha, chiyanatookashaniwu dehi to-o, anashiki dehi hampinji yakwaañula.” (Yow. 4:35, 36) Watalishili mudihi? Hadaha Yesu wateneneña kwañula kwachifwikija, dikwila nawu antu. Shinshikenu chuma chamwekeni. Hela chakwila aYudeya adiña nakutiyañana wanyi nawaSamariya, Yesu washimwinini mumbanda kaSamariya nawa watiyilili. Kafwampi, hampinji yahosheleñayi Yesu hamaha “chiyanatookashaniwu dehi to-o, anashiki dehi hampinji yakwaañula,” aSamariya atiyili nsañu yahosheli mumbanda hadi Yesu enjileña nakumuwana kulonda adiziliku jajivulu. (Yow. 4:9, 39-42) Muntu wumu wahosha haBayibolu wahosheli haniyi nsañu nindi: “Mpwila yadiña nawantu . . . yamwekesheli nawu adiña neyi tidiku yinashiki dehi hampinji yakwaañula.” w20.04 8 ¶1-2

Kupompa kwetu kwatukwashaña kwikala akwakushimwina niantañishi akuluka yitembi. Chakutalilahu, kwatukwashaña kwiluka chakuzatisha chiwahi yozelu yidi muChikasha Chetu chaYozelu Yakuzatisha Hakudizisha. Dichi loñeshenuña chiwahi kupompa. Shenuñaku muchima hampinji yakupompa. Nawa zatishenuña yuma yimunadizi hakupompa. Neyi mwilaña yumiyi, mukwikala “ishidika wamuwahi waKristu Yesu.” (2 Tim. 2:3) Cheñi, mazaza awañelu atukwashaña. Toñojokenu hohu hamudimu wunateli kuzatayi kañelu wumu. (Isa. 37:36) Toñojokenu hamudimu wunateli kuzata mazaza awañelu. Kwosi muntu hela andemoni wukutwesha kuzuña namashidika aYehova añovuku. Yehova wukweti ñovu yasweja. Dichi neyi wudi kukabadi ketu tukwikala nañovu kubadika ayilumbu jetu hela chakwila amavulu chamuchidinyi. (Ansomp. 6:16) Twatela kukuhwelela chumichi netu chalala. Anukenuña chumichi neyi akwenu mumwazatilaña, mumwatañilaña hela ntaña yenu wabula kwitiya yahosha hela yayila chuma chatama. Anukenuña nenu himunakuzuña kankawenuku. Munakwila munakuyilejayi Yehova. w21.03 29 ¶13-14

Hadaha kapostolu Pawulu wahosheleña mazu ekala haIsaya 22:13, ahosha hayilwilu yadiña nawaIsarela. Chatela akoleshi wubwambu wawu naNzambi, ilaña wena afwilileña yuma yakuditiyisha kuwaha awenawu. Dichi, yitoñojoka yanawa aIsarela yadiña yakwila nawu “tudyenu tunwenu kumadiki hitukufwa,” diyi yilwilu yidiku nimakonu. Tweluka netu Yehova wakasañula afu, dichi chumichi chatela kutukwasha kutonda chiwahi antu atela kwikala amabwambu jetu. Amanakwetu muKorinda ateleleli kutondolwela antu ahosheleña nawu kwakekala wanyi kusañuka. Twatela kudizilaku ninetu: Neyi tudikundaña nawantu abula kusha maana hayuma yakumbidi nawa asha maana hachiseki, akutuluwañesha. Neyi mukwaKristu yadikundaña nawantu amuchidiwu niyena wukwikala nayilwilu yatama. Kafwampi, nateli kutachika kwila yuma yahelayi Nzambi. Dihafumini Pawulu kukonkomwena nindi: “Toñojokenuña chiwahi kulonda mwileña mwaya kuloña nawa bayi mukoña nshidiku.”—1 Kor. 15:33, 34. w20.12 9 ¶3, 5-6

Iyi vasi yinakushimuna Yehova chatanjikayi yisaka yindi mwiwulu nihamaseki. Kwikala mutu mwabombela yuma yiyedi, kwikala nawuswa nikuyisompeshelahu. Yehova diyi “mutu” hela diyi wukwetu wuswa wabadika nawa anyanindi ejima, añelu niantu akakula kwesekeja nachazatishañawu wuswa wawu. (Rom. 14:10; Efwe. 3:14, 15) Yehova wamwinka Yesu wuswa hachipompelu, ilaña Yesu wakakuula kudi Yehova nanochu chatwakamenañayi. (1 Kor. 15:27) Yehova wamwinka cheñi iyala wuswa hadi ñodindi nianyanindi. Nateli kwikala ñahi mutu wachisaka wamuwahi? Watela kwiluka yuma yakeñañayi Yehova nindi yeleña. Watela kwiluka cheñi chaletesheli Yehova yashiku wumutu nichatela kumwimbujolayi Yehova niYesu. Muloñadi iyala chatela kwilukilayi iyi yuma? Muloña Yehova wenka nyitu yayisaka wuswa nawa wakeñaña nindi azatisheña wuswa wawu chiwahi.—Luka 12:48b. w21.02 2 ¶1-3

Twatela cheñi kumwimbujola Yehova nakujimbalañaku yuma yikwawu. Chakutalilahu, Yehova wukweti wuswa wakwanuka yuma yejima, ilaña neyi tubalumuka mumuchima, watwanakenaña nawa wajimbalañaku chikupu kuyiluwa yetu. (Mas. 25:7; 130:3, 4) Nawa wakeñaña nindi ninetu twanakeneña akwetu neyi alomba kwanakena. (Mat. 6:14; Luka 17:3, 4) Twatela kumwekesha kusakilila hawoñu kuhitila mukuwuzatisha kulonda tumulemesheña nachu Yena watwinkeliwu. Antu amakwawu azatishaña woñu wawu chatama neyi anakufuukula yuma yayiwahi nayatama. Ilaña chineli Yehova diyi watuleñeli, yena diyi watela kushaku nshimbi hayuma yayiwahi nayatama kubadika kudishilaku etu aweni. (Rom. 12:1, 2) Neyi tulondelaña nshimbi jindi tukwikala mukuwunda. (Isa. 48:18) Nawa twelukaña yuma yakeñañayi Yehova nindi twileña mpinji yitunakuhanda, kulonda tumulemesheña Nleñi yetu nawa Tata nikumuzañalesha.—Yish. 27:11. w20.05 23-24 ¶13-14

Tunateli kuyikeña ñahi chikupu amanakwetu niahela makonu? Neyi tuyiluka chiwahi akwetu akwakwitiya chikwikala chaswayi kwiluka yuma yakeñañawu nawa tukuyikeña chikupu. Tunateli kwikala amabwambu jawu hela chakwila hiyakulumpi, atwansi hela afuma kuyitachi yacheñi. Jonatani wamubadikilimu Davidi nayaaka 30, ilaña ekalili amabwambu chikupu. Komana kwila mukwata wubwambu namukulumpi hela kansi nehi? Neyi mwila mwenimu, mukumwekesha nenu ‘mwakeña anakwenu ejima.’ (1 Pet. 2:17) Komana kukeña chikupu akwetu akwakwitiya kwatalisha mukwila nawu tukukeñaña ejima muchipompelu munjila yoyimu? Inehi. Chikutwesheka wanyi. Chatama wanyi kudikunda chikupu nawantu amu kubadika nawantu amakwawu muloña twakeña yuma yoyimu. Yesu wayiteneneña apostolu indi ejima nindi ‘amabwambu,’ ilaña wadikundileña nankashi naYowanu. (Yow. 13:23; 15:15; 20:2) Hela chochu, Yesu hamumweneña Yowanu nindi wabadika akwawuku.—Maku 10:35-40. w21.01 23 ¶12-13

Kapostolu Pawulu hayishimwinini akwanyuza amuAtenisi neyi chayishimwininiyi aYudeya musinagogiku. Washinshikili chikupu yuma yadiñamu nawa wamweni tushidikilu twamunsakililu yawu. (Yilw. 17:23) Kuhiñahu, Pawulu wasambilili kukeña yuma yakuhweleleliwu yamuNsona kuhiñahu dinu hakuyishimwina. Dichi Pawulu wahimpili njila yakushimwinamu. Wayilejeli akwaAtenisi nindi nsañu yashimwineñayi yafumini kudi “Nzambi Wabula Kwilukewa” iyadifukwileñaku. Hela chakwila akwaNyuza adiña eluka wanyi Nsona, Pawulu halekeli kuyishimwinaku. Ilaña wayimweneña nindi adi neyi tidiku yinahi dehi yinashiki hakwañula nawa wahimpili njila yakuyishimwinamu nsañu yayiwahi. Kufwana Pawulu, shinshikenuña chidi yuma. Shinshikenuña yuma yinakumwekesha yuma yakuhwelelawu antu amwiluña denu dakushimwina. Shinshikenu mwini itala chinawahishiyi itala. Komana ijina dindi, yakuvwala, mmwekenu hela nhoshelu yindi yinakumwekesha yuma yamunsakililu yindi? w20.04 9-10 ¶7-8