August

Amabwambu jaYesu hohu diwu anateli kuhetela mumulambu wefutu danyiloña dindi. Yesu wahosheli nindi “[wakahana] wumi windi kukoola amabwambu jindi.” (Yow. 15:13) Antu ashinshika adiñaku henohu Yesu kanda yenzi hamaseki, akadiza hadi yena nikumukeña. Awa amayala niambanda akayisañula, ilaña ninawa ambuña aYehova aloña akakeñekaña kwikala amabwambu jaYesu hakwila akekali nawumi wahaya nyaaka. (Yow. 17:3; Yilw. 24:15; Heb. 11:8-12, 24-26, 31) Twatiyaña kuwaha kuzatila hamu naYesu mumudimu wakushimwina nikutañisha antu nsañu yayiwahi yaWanta. Yesu wadiña ntañishi mpinji yadiñayi hamaseki. Nawa kufuma tuhu mpinji yafuntiliyi mwiwulu, Yesu natwalekihu kulombola mudimu wakushimwina nikutañisha chineli diyi mutu wachipompelu. Wamonaña nawa wasakililaña chimwadikitaña kukwasha antu amavulu kulonda amwiluki yena niTata yindi. Dichi, hakwila nawu tuzati chiwahi iwu mudimu chiña Yehova niYesu atukwasha.—Yow. 15:4. w20.04 22 ¶7-8

Nkumbu yakwila nawu “mwanta wakukabeta kakuchimunswa” niyakwila nawu “mwanta wakukabeta kachidiilu” hakusambila ayizatishileña hakutena mawanta añovu amuIsarela, wanta wadiña kuchimunswa nimwanta wakuchidiilu. (Dan. 10:14) Muza wawaIsarela akumujimba diwu wadiña antu jaNzambi kushika tuhu nihaPentekosta 33 C.E. Kufuma tuhu hanidi ifuku, Yehova watondeli atumbanji twaYesu ashinshika kwikala antu jindi. Dichi, chibalu cheneni chawuprofwetu waDanyeli kapetulu 11 hichakundama kudi aIsarela akumujimbaku, ilaña kudi atumbanji twaKristu. (Yilw. 2:1-4; Rom. 9:6-8; Ñal. 6:15, 16) Nawa anyuuli amboka-mboka ekalili mwanta wakukabeta kakuchimunswa nimwanta wakukabeta kakuchidiilu hampinji jashiyashana. Hela chochu, awa anyanta adiña nakwila yuma yoyimu yashimunawu muniwu wuprofwetu. Chatachi, anyanta adiña nakukabisha antu jaNzambi munjila jajivulu. Chamuchiyedi, chakabishileñawu antu jaNzambi chamwekesheli nawu amuhela Nzambi walala, Yehova. Nawa chamuchisatu awanyanta ayedi añovu adizuñishili. w20.05 3 ¶3-4

Yehova welishaña yuma kuzatika nakwilisha yuma yinakukeñeka kulonda yeli nkeñelu yindi. Yehova nateli kwilisha antu indi abula kuwanina kwikala chuma chinakukeñayi kumukalakela nikwila nkeñelu yindi. (Isa. 64:8) Muyumiyi, Yehova wakojejaña nkeñelu yindi kuzatika. Kwosi chuma chinateli kumukañesha kushikija nkeñelu yindiku. (Isa. 46:10, 11) Tunateli kumusakilila Tata yetu wamwiwulu kuhitila mukutoñojoka chikupu hayuma yineliyi niyinatukwashiyi kwila. Chakutalilahu, neyi tutoñojoka chikupu hayuma yaleñayi Yehova, twatiyaña kuwaha nankashi hayuma yejima yaleñayi. (Mas. 8:3, 4) Nawa neyi tutoñojoka chinatukwashiyi Yehova hakwila nawu twili nkeñelu yindi, twamulemeshaña chikupu. Twatela kulemesha chikupu ijina dakwila nawu Yehova. Dinabombelimu chekalayi Tata yetu, yuma yejima yineliyi, niyuma yamba kelayi.—Mas. 89:7, 8. w20.06 9-10 ¶6-7

Oxygen himpepela yakwashaña antu niatunyama kutwalekahu kuhanda. Akwakusandujola anawani nawu yileñaleña yayumi yazatishaña nkulakaji yayihita yaoxygen muchaaka. Antu niatunyama edishaña mpepela yacarbon dioxide hakona. Hela chochu, antu niatunyama hiyatweshaña kumanisha mpepela yejima yaoxygen yitonañaku, nawa luzwizu hilwenzalaña nampepela “yamajilu” yacarbon dioxideku. Muloñadi? Muloña Yehova waleñeli nyitondu yamaneni niyanyanya yayivulu yazatishaña mpepela yaCarbon dioxide yitwedishaña hakona nawa iyi nyitondu yedishaña mpepela yitwakokaña hakona yaOxygen. Chatuñikaña mpepela yaoxygen chinaditeji namazu adi munsona yefuku dalelu. Chumanyi chinateli kutukwasha kusakilila hachawaana cheseki nihayuma yejima yayiwahi yekalahu? (Mas. 115:16) Njila yimu hikutoñojoka chikupu hayuma yaleñayi Yehova. Chumichi chikutusañumuna kumusakilila Yehova ifuku niifuku hayuma yayiwahi yatwinkañayi. Nawa twamwekeshaña netu twasakililaña hachawaana cheseki kuhitila mukuhemba chiwahi iluña ditwashakamaña. w20.05 22 ¶5, 7

Yehova wamanisha nyiloña yaletayi Satana munjila yamaana, yakudiwunjika nawa yawuñanji. Namwekeshi cheñi munjila jajivulu nindi wukweti ñovu yabadika. Sweje-e dinu, yuma yejima yelañayi yamwekeshaña nawu wukweti kukeña. (1 Yow. 4:8) Yehova natwalekihu kudikita kulonda yajiliki ijina dindi. Nimakonu Satana natwalekihu kutamisha ijina daNzambi. Waleteshaña antu kujinooka nawu Nzambi hakweti ñovu, wuñanji, maana hela kukeñaku. Chakutalilahu, Satana wadimbaña antu kubula kukuhwelela nawu Nzambi diyi Nleñi. Nawa neyi antu akuhwelela nawu Nzambi wekala kwoku, Satana wayileteshaña kukuhwelela nawu nshimbi jaNzambi jakala nawa nindi jajiwahi wanyi. Cheñi wayitañishaña nindi Yehova hiNzambi wabula luwi nawa watama muchima wochaña antu mukesi kahelu. Neyi akuhwelela munawa makudi, chekalaña chaswayi kukaana chiyuulu chaYehova chaloña. Chineli Satana kanda amushindi, wukukeñaña nindi ninenu mumukaani Yehova. Komana wukutwesha? w20.06 5 ¶13-15

Muyipompelu yayivulu mudi amanakwetu niahela anakukabakana hakudiza muchidi. Chinateli kuyikalila kuhosha yuma yinakutoñojokawu. Neyi tubula kusha maana hachinakukabakanawu namuchidi, tukumonaña chamukeñawu Yehova niiyena dakumukalakela. Neyi tumonañamu iyi yilwilu yayiwahi, tukuyikeña nikuyilemesha chikupu awa amanakwetu niahela. Hitukuhoshaña netu “Hinnakuyikeña enuku” hamuloña wakwila anakukañanya kuhosha chiwahi idimiku. (1 Kor. 12:21) Yehova watwiteja kwikala muchipompelu chindi. Hela chakwila tudi amayala hela ambanda, ajiki hela asumbula, akulumpi hela atwansi nawa hela twahoshaña chiwahi idimi hela nehi, twalema kudi Yehova nikudi wumu namukwawu. (Rom. 12:4, 5; Kol. 3:10) Dichi twatela kwiluka yuma yitwatela kwila hakwila tukolesheña amanakwetu niahela. Chikutukwasha cheñi kuyikeña nikuyilemesha mpinji yejima. w20.08 31 ¶20-22

Kapostolu Pawulu walekeli wanyi kuyishimwina antu amuAtenisi hela chakwila musumba wawu wenzeli nawantu adifukwileña kudi ankishi, ayivumbi niantu adiña namaana awasenji; nawa hetejeli kasawuntu kawu kumulekesha kushimwinaku. Pawulu niyena wekalili mukwaKristu hela chakwila wadiña “mukwakusawula Nzambi nimukwakukabisha antu jindi nawa mukwakasawuntu.” (1 Tim. 1:13) Neyi chakuhweleleliyi Yesu nindi Pawulu nateli kwikala kambanji, Pawulu niyena wakuhweleleli nindi antu amuAtenisi anateli kwikala atumbanji. Yuma yakuhweleleliyi yazatikili. (Yilw. 9:13-15) Mumafuku awapostolu, antu akuyitachi yashiyashana ekalili atumbanji twaYesu. Pawulu chayisonekeleliyi akwaKristu ashakamineña muKorinda mukanda, wahosheli nindi antu amakwawu muchipompelu adiña ambanji hela ayivumbi henohu kanda ekali akwaKristu. Nawa wabombelelihu nindi: “Enu amakwawu dichi chimwadiña. Ilaña anayiweleshi nakuyitookesha.” (1 Kor. 6:9-11) Neyi mwadiñi enu mwadi kuyimona nenu awa antu akuhimpa nakwikala atumbanji? w20.04 12 ¶15-16

Akulumpi hiyatela kunyakalaña kusompesha antu ajinokaña neyi chakwila mukumukalakela Yehova mwafumaña yuma yayiwahiku. Chatela ayizuwili, akulumpi atela kwiluka ntahi chinaleteshi ahosheña hela kwila munoyu njila. Kufumahu dinu, akulumpi anateli kuzatisha Bayibolu kulonda ayikoleshi. Kaprofwetu Elija wamutemukili Mwadi Yezebeli. (1 Anya. 19:1-3) Watoñojokeli nindi nyidimu yazatileñayi yadiña yamukunkulwayi, dichi wakeñeleña nindi yafwi. (1 Anya. 19:10) Yehova hamuzuwilili Elijaku, ilaña wamulejeli nindi hadiña nkawindiku, wamulejeli kukuhwelela muñovu yaNzambi nawa nindi kwadiña nyidimu yikwawu yatela kuzatayi. Yehova watiyilili nakanañachima kukukala kwaElija nawa wamwinkeli mudimu wukwawu. (1 Anya. 19:11-16, 18) Chumanyi chitunakudizilaku? Wejima wetu, sweje-e akulumpi atela kukwasha nyikoku yaYehova munjila yayiwahi. Hela muntu nakuhosha mukuhila hela nakutoñojoka nindi Yehova hakamwanakenaku, akulumpi atela kumutiyilila nakanañachima chinakulumbululayi. Nkumininaku atela kukwasha mukoku wunajimbali nawu Yehova wamukeña. w20.06 22 ¶13-14

Yehova wakeñaña nindi twikaleña nampinji yakuzañalela hamu nawamabwambu niyisaka yetu. (Mas. 133:1) Yesu wadiña nawamabwambu amawahi. (Yow. 15:15) Bayibolu yalumbulula yuma yayiwahi yafumaña mukwikala nawamabwambu alala. (Yish. 18:24) Nawa yatulejaña nawu bayi tudambuleña nawakwetuku. (Yish. 18:1) Antu amavulu atoñojokaña nawu njila yakuhanjekelamu yahaintaneti diyi njila yakwikalilamu nawamabwambu amavulu hela kubula kwikala nachineñi. Hela chochu, twatela kwikala asoñama neyi tunakuzatisha iyi njila. Kusandujola kumu kunawani nawu, antu ombaña mpinji yeneni nakutala nsañu ninyevulu yinombiliwu akwawu haintaneti enzaña nakutiya wudi nichineñi. Muloñadi? Muloña wumu wudi wakwila nawu antu ombilaña haintaneti nyevulu yamwekeshaña yuma yadiluñishañawu muchihandilu chawu, ashañahu nyevulu yawu yayiwahi, amabwambu jawu nikumaluña amawahi kwendeleliwu. Muntu wunakubanjila iyi nyevulu nateli kukunkulula nindi chihandilu chawakwawu chachiwahi kubadika chindi. w20.07 5-6 ¶12-13

Kaposhi Kakutalila kaOctober 1, 1988, kahosheli nawu: “Akulumpi atela kwiluka nawu Kristu nateli kuzatisha spiritu yajila kukwasha mukulumpi wudi wejima hezanvu dawakulumpi kutoñojoka hachishina chamuBayibolu chinateli kuyikwasha kufuukulahu chiwahi. (Yilw. 15:7-15) Spiritu yajila yakwashaña akulumpi ejima muchipompelu, bayi wumu hohuku.” Mukulumpi walemesha akwawu akulumpi hafwilaña mpinji yejima kwikala watachi kuhosha neyi anabulakaniku. Mpinji yejima hakeñaña kuhosha kubadika akwawuku nawa hatoñojokaña nindi yitoñojoka yindi diyinawahi kubadika akwawuku. Ilaña waletaña yitoñojoka yindi mukudizoza. Watiyililaña nakanañachima yuma yinakuhoshawu akwawu. Chuma chasweja kulema, wafwilaña kuhanjeka nawakwawu hayishina yekala muNsona nawa walondelaña wunlomboli wafumaña kudi “nduñu wamaana nikashinshi.” (Mat. 24:45-47) Neyi akulumpi adikeña nikudilemesha wumu namukwawu mpinji yinakuhanjekawu, spiritu yajila yaNzambi yikwikala hadi wena nawa yikuyikwasha kufuukula chiwahi.—Yak. 3:17, 18. w20.08 27 ¶5-6

Kapostolu Pawulu amubadikili ñovu kudi ayilumbu jindi. Amweteli kakavulu nikumukasa. Cheñi Pawulu amukabishili kudi antu ateleleli kwikala amabwambu jindi. Amakwawu muchipompelu chawakwaKristu adiña nakumudimbulula. (2 Kor. 12:11; Fwi. 3:18) Ilaña Pawulu washindili ikañesha dawantu ejima adiña nakumudimbulula. Munjilanyi? Watwalekelihu kushimwina hela chakwila amukañesheleña. Watwalekelihu kwikala washinshika kudi amanakwindi niahela hela chakwila amuneñesheleña. Chuma chabadika kulema, wadiña washinshika kudi Yehova kushika nikukufwa. (2 Tim. 4:8) Washindili kukala kwejima muloña wakwila washindameneni hadi Yehova. Komana ayitukolaña hela kuyikabisha? Twomikaña mushindu kutama kuhitila mukukwasha antu kulonda amwiluki Yehova niBayibolu. Munateli kwila mwenimu kuhitila mukuzatisha Bayibolu hakwakula malwihu awantu, kwikala nakalemesha niwushona kudi antu ayilaña katama nawa nikwilaña yuma yayiwahi kudi antu ejima kushilahu tuhu niayilumbu jenu.—Mat. 5:44; 1 Pet. 3:15-17. w20.07 17-18 ¶14-15

Komana mwalala Yehova wadizoza? Eña. Dichahosheliyi niDavidi mumazu adi hewulu. (Mas. 18:35) Hadaha Davidi wadiña nakutoñojoka hefuku denjili kaprofwetu Samweli kwitala datata yindi nakuwayisha wakaswana hawanta muIsarela. Davidi diyi wadiña kansi hadi anyana 8, ilaña diyi atondeliwu kudi Yehova kumusinsa Mwanta Sawulu. (1 Sam. 16:1, 10-13) Davidi wadi kwiteja mazu ahosheli ñimbi yamasamu kutalisha hadi Yehova nindi: “Wadizozaña nakutala niyuma yamumawulu niyuma yahamaseki. Diyi wanonaña kazweñi hamaseki diyi wanyamunaña wabula yuma . . . kulonda amushakamishi hamu nawayilolu.” (Mas. 113:6-8) Yehova wamwekeshaña nindi wadizoza kwesekeja nachelañayi nawakwakudifukula indi abula kuwanina. Wetejaña kudifukula kwetu nawa watumonaña nindi tudi amabwambu jindi. (Mas. 25:14) Hakwila nawu twikali amabwambu jindi, Yehova wahanini Mwanindi kwikala mulambu wahanshidi jetu. Yehova wukweti luwi niwushona. w20.08 8 ¶1-3

Yehova wafuukula dehi ifuku nimpinji yakajilumunayi kanu kaayi katama. (Mat. 24:36) Wukudiwunjika kushika tuhu nimpinji yatoñolayi. Wafwilaña kusañula afu, ilaña wadiwunjika. (Yoba 14:14, 15) Nakuhembelela sampu mpinji yatoñolayi yakuyisañula yinashiki. (Yow. 5:28) Kudi yuma yayivulu yikuletesha tumusakilileña Yehova hakudiwunjika kwindi. Toñojokenu hachumichi: Hamuloña wakudiwunjika kwaYehova, antu amavulu kushilahu tuhu ninetu, tudi nakukooleka “kwakubalumuka munyichima.” Yehova nakukeña nindi antu amavulu akekali nawumi wahaya nyaaka. Dichi tumwekesheña netu twasakililaña hakudiwunjika kwindi. Munjilanyi? Kuhitila mukuzata hanakumini ñovu jetu kukeñakeña antu adi “nanyichima yashinshika yakukeña kwikala nawumi wahaya nyaaka” nikuyikwasha kulonda amukeñi Yehova nawa amukalakeleña. (Yilw. 13:48) Kuhiñahu, niwena akwikala nakuchiñeja neyi kutukweti kwakwikala nawumi wahaya nyaaka muloña wakudiwunjika kwaYehova. w20.08 18 ¶17

Yuma yinakudizayi kadizi hakudiza Bayibolu yatela kushakamaña mumuchima nimuyitoñojoka yindi. Muloñadi? Muloña muchima wetu, munabombeli yuma yitwafwilaña, yitoñojoka nichitwatiyaña chatuleñelaña kwilahu yuma. Yesu wadiña nakutañisha antu nawa antu akeñeli yuma yayitañishileñayi. Ilaña antu adiña cheñi nakumulondela muloña wadiña nakuyishika hamuchima. (Luka 24:15, 27, 32) Kadizi wenu watela kumumonaña Yehova neyi hiMuntu, muntu wunateli kwikala ibwambu dindi, kumumona nindi hiTata yindi, Nzambi yindi nawa Ibwambu dindi. (Mas. 25:5) Mpinji yimunakudiza, hoshenuña nankashi hayilwilu yaNzambi. (Kwid. 34:5, 6; 1 Pet. 5:6, 7) Hamutu wansañu wudi wejima wumunakuhanjekahu, hoshenuña chekalayi Yehova. Mukwashenu kadizi wenu yeluki yilwilu yaYehova, yidi neyi kukeña, luwi niwushona. Yesu wahosheli nindi “lushimbi lwabadika nawa lwakusambila” dilu lwenilu “keñaku Yehova Nzambi yeyi.” (Mat. 22:37, 38) Mukwashenu kadizi wenu yamukeñi chikupu Nzambi. w20.10 10 ¶12

Yesu walemesheleña ambanda ejima. (Yow. 4:27) Yesu walemesheleña chikupu ambanda elileña nkeñelu yaTata yindi. Chasweja kulema, wayimweneña nindi hiyahelindi nawa wayiteneneni hamu nawamayala amweneñayi neyi chisaka chindi. (Mat. 12:50) Yesu wadiña ibwambu dawu walala. Shinshikenu hadi amabwambu jindi aMariya naMata, wejima wawu adiña ajiki. (Luka 10:38-42) Chakadi nikujina, mazu niyuma yelileñayi Yesu yayikojejeli kwikala akasunuka. Mariya wakasunukili nakushakama kunyendu yindi hamu neyi kambanji. Nawa Mata chatiyili kutama muloña wakwila Mariya wamukwashiliku kuloñesha yakuda wanyi, wakasunukili nakumulejamu Yesu yuma yadiña kumuchima windi. Haniyi mpinji, Yesu wayikwashili awa ambanda kuspiritu. Wamwekesheli nindi wayakameneni awa ambanda nimanakwawu Lazaru, kuhitila mukuyihempula mpinji jikwawu. (Yow. 12:1-3) Dichi Lazaru chakatiliyi nankashi, aMariya naMata elukili nawu anateli kulomba wukwashu kudi Yesu.—Yow. 11:3, 5. w20.09 20 ¶3; 21 ¶6

Atumbanji twaYesu akuhweleleli nawu Wanta “wukumwekana hohenohu” nakuyamwina kumakabisha awaRoma. Twatalilaña ifuku dakafumishahu Wanta waNzambi kutama nakuleta kaayi kakaha kakuloña. (2 Pet. 3:13) Hela chochu, twatela kudiwunjika nakuhembelela mpinji yatoñolayi Yehova. Yehova wamwinkeli Nowa mpinji yeneni yakutuña watu nimudimu wakwikala “mukwakushimwina kuloña.” (2 Pet. 2:5; 1 Pet. 3:20) Yehova wamutiyilili Abarahama chamwihwileñayi malwihu nakufuntisha-funtishahu hanochu chafuukwiliyi kujilumuna antu ashakamineña munyisumba yatama yaSodoma naGomora. (Kutach. 18:20-33) Hadi yaaka yayivulu, Yehova wadiwunjikili chikupu namuza waIsarela wabula kushinshika. (Nehe. 9:30, 31) Makonu tunakumona kudiwunjika kwaYehova chinakuyinkayi mpinji antu ejima anakukokayi kulonda “ekali nakukooleka kwakubalumuka munyichima.” (2 Pet. 3:9; Yow. 6:44; 1 Tim. 2: 3, 4) Kudiwunjika kwaYehova kwatukwashaña kwikala adiwunjika hampinji yitunakutwalekahu kushimwina nikudizisha. w20.09 10 ¶8-9

Mpinji yakayisañulayi Yehova antu, akekala neyi chadiñawu hakusambila. Toñojokenu munatalishi ichi chuma. Yehova wayikeña nankashi chakwila wamonaña nikwanuka yuma yejima yimwatoñojokaña, chimwatiyaña, yimwahoshaña niyimwelaña. Dichi neyi yela nindi yayisañuli, wukuyifuntisha neyi chochimwadiña. Mwanta Davidi welukili nindi Yehova watwiluka wejima wetu hamuntu-hamuntu. (Mas. 139:1-4) Twatiyaña ñahi neyi twiluka netu Yehova watwiluka chiwahi? Neyi tunakutoñojoka chikupu chatwilukayi Yehova, bayi twakamaku. Muloñadi? Anukenuña nenu Yehova watwakamenaña nankashi. Watumonaña wejima wetu nindi twalema kudi yena. Wanukaña yuma yejima yatumwekenaña muchihandilu yaletesha twikali neyi chitudi. Chumichi chatukundejaña hama. Bayi tutoñojokaña netu tudi kankawetuku. Mpinji yejima Yehova wudi nanetu nawa nakukeña kutukwasha.—2 Kushi. 16:9. w20.08 17 ¶13-14

Yehova wakeña nankashi kudizisha antu jindi. Nakukeña amwiluki, amukeñi nawa ashakameña haya nyaaka neyi anyanindi akeñayi. Yuma yejimiyi hiyinateli kuzatika chakubula kuyidizishaku. (Yow. 17:3) Yehova wazatishili chipompelu chawakwaKristu akusambila kudizisha antu jindi. (Kol. 1:9, 10) “Nkwashi” dikwila nawu spiritu yajila, yayishiikiliyi Yesu, yazatili mudimu weneni. (Yow. 14:16) Yayikwashili atumbanji kutiyishisha Izu daNzambi nikwanuka yuma yejima yahosheli Yesu niyuma yeliliyi yenjili nakusonekawu muNyikanda yaNsañu Yayiwahi. Iku kwiluka kwakolesheli chikuhwelelu chawakwaKristu akusambila nawa amukeñeli Nzambi, Mwanindi nikudikeña wumu namukwawu. Yehova washimwineñahu dehi nindi “kunyaka yakukuminina” antu akunyuza yejima akapompela kumpidi yindi yachifwikija nakuyileja njila jindi. (Isa. 2:2, 3) Tunakumona chinakushikijewa iwu wuprofwetu. w20.10 24 ¶14-15

Chumanyi chinateli kuletesha muntu kukaana kufumba neyi ibwambu dindi namufumbi? Kudinka wanta. Antu adinka wanta akeña “yuma yakeñañawu kutiya namatu awu.” Akeña wanyi “kutiyilila kuchalala.” (2 Tim. 4:3, 4) Atoñojokaña nawu akweti maana nawa alema kubadika akwawu, dichi kwosi muntu watela kuyifumbaku. Hela chochu, kapostolu Pawulu wasonekeli nindi: “Neyi muntu nakutoñojoka nindi walema henohu wamukunkulwayi, nakudidimba yomweni.” (Ñal. 6:3) Mwanta Solomoni walumbulwili chiwahi iyi nsañu. Dichi wasonekeli nindi: “Mukwenzi wakazweñi wukweti maana wabadika mwanta wakashinakaji wasupa wakalejewaña kudi akwawu.” (Mukwa. 4:13) Talenu chelili kapostolu Petulu chelili amufumbili hamesu awantu kudi kapostolu Pawulu. (Ñal. 2:11-14) Petulu wadi kumuhilila Pawulu muloña wanochu chahosheliyi niluña dahosheleliyi. Ilaña Petulu wadiña namaana. Wetejeli kufumba nawa hamuhembeleli Pawulu nkunyiku. Nkumininaku wamuteneni Pawulu nindi ‘manakwetu itwakeña.’—2 Pet. 3:15. w20.11 21 ¶9, 11-12

Chumanyi chinateli kumukwasha kadizi waBayibolu kupama kuspiritu? Kwinzaña nakupompa. Muloñadi? Yuma yikutiyawu kukupompa yikuyikwasha kwiluka yuma yayivulu, kukolesha chikuhwelelu chawu nikumukeña Nzambi chikupu. (Yilw. 15:30-32) Mukwakushimwina nateli kumuleja kadizi kukeña kwamukeñeliyi Yehova chikwamukwashili kwovwahila nshimbi jaNzambi. (2 Kor. 7:1; Fwili. 4:13) Neyi atudizi aBayibolu eluka akwakushimwina amavulu ashinshika, atudizi anateli kudizila kudi wena mwatalisha kuhemba lushimbi lwaKristu lwakumukeña Nzambi niakwetu. (Yow. 13:35; 1 Tim. 4:12) Kwiluka nawu akwakushimwina amweni kukala neyi kukwetiyi anateli kuhimpa yilwilu nakwikala kambanji kaKristu. (Kuhit. 30:11) Muntu wejima muchipompelu nateli kukwasha atudizi aBayibolu kupama kuspiritu.—Mat. 5:16. w20.11 5 ¶10-12

Hadaha kapostolu Pawulu wahosheleña hakuzuña kwazuñiliyi nawanyama muEfwesesa. (2 Kor. 1:8; 4:10; 11:23) Hela hadaha wadiña nakutena aYudeya niantu amakwawu adiña nakumukabisha adiña neyi “[anyama] amwisaña ayisumi.” (Yilw. 19:26-34; 1 Kor. 16:9) Pawulu wamweni kukala kwakuvulu. Ilaña watwalekelihu kukuhwelela nindi kumbidi yuma yikamuwahila. (1 Kor. 15:30, 31; 2 Kor. 4:16-18) Tunakushakama mumpinji yakala. Amanakwetu amakwawu anakuyikabisha. Amakwawu ekala mumatuña mwekala jinjita nawa hiyekala akiñewaku. Hela chochu, amakwawu anakumukalakela Yehova hela chakwila anakusha wumi wawu muwubanji mumatuña mwalekeshawu hela mwakaanishawu mudimu wetu wakushimwina. Awa amanakwetu niahela anatwalekihu kudifukula kudi Yehova nawa anakutwimikila chakutalilahu chachiwahi. Hiyatiyaña woma kufwaku, muloña eluka nawu Yehova wayikana yuma yayiwahi kumbidi. w20.12 9 ¶3-4

Komana mpinji yimu mwatiyilihu kutama hamuloña wakwila antu amwiluña denu atiyililaña wanyi kunsañu yetu indi kwiji antu antesha hohu diwu ekalaña hamatala? Munsañu jamuchidiwu munateli kutwalekahu ñahi kwikala namuzañalu? Mwatela kumonaña mudimu wenu wakushimwina munjila yayiwahi. Chumichi chinatalishi mudihi? Shenu muchima hakutiyakesha ijina daNzambi niWanta windi. Yesu wahosheli nindi antu antesha hohu diwu akawana njila yaya kuwumi. (Mat. 7:13, 14) Neyi tudi mumudimu wakushimwina twazatilaña hamu naYehova, Yesu niañelu. (Mat. 28:19, 20; Chim. 14:6, 7) Yehova wakokaña antu akeñaña kumukalakela. (Yow. 6:44) Dichi neyi muntu yakaana kutiyilila kunsañu yetu katachi, ifuku dikwawu waketeja. Muhela Deborah itwashimuna hakusambila wahosheli nindi, “Chineñi dichitwa cheneni chazatishañayi Satana.” Ilaña Yehova Nzambi wukweti ñovu nankashi kubadika Satana niyitwa yindi. w20.12 26 ¶18-19; 27 ¶21

AkwaKristu amavulu azatishaña mpinji yeneni kumudimu wakumujimba kulonda adikwashileñamu niyisaka yawu. Hela chochu, awa akwakushimwina ashinshika akwashaña kuloñesha kwaNzambi kwesekeja nahanakumini wuswa wawu. Chakutalilahu, amakwawu akwashaña kunamwekani wubanji wadimwekenaña, amakwawu azatañaku mudimu wakutuña nawa ejima ahanaña yawaana yakukwasha mudimu wamukaayi kejima. Elaña yumiyi muloña amukeña Nzambi niakwawu antu. Mulungu nimulungu, twamwekeshaña netu twayikeña amanakwetu niahela kuhitila mukupompaña mpinji yejima nikwakulahu. Hela tunazeyi, twayaña nakupompa. Twakulañahu hela tunakutiya woma. Hela chakwila wejima wetu twekalaña nakukala kwamboka-mboka, twadikoleshaña wumu namukwawu henohu kanda tutachiki kupompa nihanyima yakupompa. (Heb. 10:24, 25) Twasakililaña hamudimu wazataña akwetu akwakushimwina. w21.01 10 ¶11

Chayikalilaña antu adivwimba kuhameka akwawu, ilaña wena akeñaña kuyihameka. Akeña kudesekeja nawakwawu nawa afwilaña kwikala abadika hadi akwawu. Chatela adizisheña akwawu nikuyinka wuswa, wena ahoshaña nawu, “Neyi wunakukeña neyi yuma yendi chiwahi, watela kuyizata eyi aweni.” Muntu wadivwimba wakeñaña kwikala walema nawa wekala nechima. Neyi twiluka netu twadivwimba, twatela kulomba chikupu kudi Yehova kulonda yotukwashi ‘kuhimpa yitoñojoka yetu’ kulonda kudivwimba kubuli kutanda mudi etu. (Rom. 12:2) Twasakililaña chikupu muloña wakwila Yehova wadizoza. (Mas. 18:35) Twamonaña chadizozayi kwesekeja nachelañayi nawambuña indi nawa twatela kumwimbujola. Kubombelahu, tunakukeña kwimbujola antu ashimunawu muBayibolu adiña adizoza nawa endeli naNzambi. Tumulemesheña Yehova mpinji yejima nikumutumbakesha.—Chim. 4:11. w20.08 13 ¶19-20

Wulu hichawaana chachiwahi chafuma kudi Nzambi, ilaña antu hiyawaninaku. (1 Yow. 1:8) Dichuma chaletesha Bayibolu yiyisoñamisheña adi muwulu nawu akumonaña kukala, kukala kwashimunawu nawu “yihuñu mumujimba wawu.” Yehova wakeñaña nindi amayala akeñeleña yisaka yawu yuma yakeñekaña muchisaka nikuyikwasha kwikala nawubwambu wakola naYehova. (1 Tim. 5:8) Hela chochu, ahela asumbuka atela kwikalaña nampinji yakutaña Bayibolu nikutoñojokahu chikupu nikulomba kudi Yehova ifuku niifuku. Chumichi chinateli kwikala chakala. Ambanda ekala akasika nanyidimu, ilaña chalema kwikala nampinji. Muloñadi? Muloña Yehova nakukeña wejima wetu twikali nawubwambu wakola nayena. (Yilw. 17:27) Mumbanda watela kuzata nañovu kulonda yamwovwahileña nfumwindi wabula kuwanina. Hela chochu, chinateli kwikala chaswayi kuzata mudimu windi wamwinkawu kudi Yehova neyi yeluka mwatalisha Nsona chiyahosha nawu yovwahileña nfumwindi nikumulemesha. w21.02 9 ¶3, 6-7

Kukala kutwamonaña kudi neyi kesi kazatishañawu kutatisha nachu chikuñu chinakuchilawu. Neyi chikuñu achitatisha nawa achinwisha chakolelañaku. Munjila yoyimu, neyi tuumika kukala, chikuhwelelu chetu chakolelañaku. Dihafumini Yakoba yasoneki nindi: “Itejenu kuumika kumanishi mudimu waku, kulonda mwiikali awanina nawa alumbwa muyuma yejima.” (Yak. 1:4) Neyi tumona netu kukala kutunakumona kunakukolesha chikuhwelelu chetu, tunateli kuumika namuzañalu. Mumukanda wasonekeliyi, Yakoba watenenimu cheñi kukala kunateli kuletesha tubuli kwikala namuzañalu. Kukala kumu hikubula kwiluka chakwila. Neyi tunakumona kukala twatela kumulomba Yehova kulonda yatukwashi kwila yuma yikumuzañalesha, yikukwasha amanakwetu niahela nawa yikutukwasha kuhemba kashinshi ketu. (Yere. 10:23) Twatela kwikala namaana hakwila twiluki chitwatela kwila nichakuyakula antu atudimbululaña. Neyi tuneluki wanyi chakwila, tunateli kuzeya nawa muzañalu wetu wukumana. w21.02 28 ¶7-9

Yehova wamwekeshaña chitwatela kwila. Kukeña kwindi kwasweja chikupu chakwila neyi twikala ashinshika kudi yena kwosi chuma chinateli kutwambula kudi yenaku. (Rom. 8:38, 39) Izu dachiGiriki dabalumunawu nawu “chikupu” datalisha kudi muntu wunakuzata nañovu kulonda yamwekeshi kukeña. Mpinji yikwawu, twatela ‘kuzata’ nañovu’ hakwila nawu tuyikeñi chikupu amanakwetu niahela.” Neyi akwetu anatuhilishi twatela kutwalekahu ‘kuditiyilila wumu namukwawu mukukeña, kwikala mukuwunda wumu namukwawu nikufwila chikupu kuhemba kunuñañana kwetu kutwekalaña naku kuhitila mudi spiritu yajila.’ (Efwe. 4:1-3) Nawa tukuzataña nañovu kulonda tuyimoneña amanakwetu neyi chayimonañayi Yehova. (1 Sam. 16:7; Mas. 130:3) Chakala kuyimwekeshela amanakwetu kukeña sweje-e neyi tuneluki yiluwa yawu. Hadaha dikukala kwadiña nawakwaKristu akusambila amakwawu, neyi chichadiña kudi aEyodiya naSintiki. Kapostolu Pawulu wayilembeleli nindi “ekali nayitoñojoka yoyimu mudi Mwanta.”—Fwi. 4:2, 3. w21.01 22-23 ¶10-11

Atushinakaji alemesha chimwamukalakelaña Yehova hamu nawu ‘namuchima wumu! (Zef. 3:9) Atiyaña kuwaha chimwazataña nyidimu yinayinkiwu muchipompelu neyena nawa nañovu. Mwayitiyishaña kuwaha chikupu. Enu akwenzi anukenuña nenu Yehova wayikeña nawa wayikuhwelela. Washimwineñahu dehi nindi mumafuku akukuminina, kwakekala izanvu deneni dawakwenzi akadihana aweni chakudikeñela. (Mas. 110:1-3) Weluka nindi mwamukeña nawa munakufwila kumukalakela hanakumini ñovu yenu. Dichi ikalenu adiwunjika. Neyi munaluwañeshi nawa ayifumba, itejenu kufumba nakumona nenu kunafumi kudi Yehova. (Heb. 12:6) Zatenuña nañovu mudimu wejima wunayinkiwu. Nawa chuma chasweja kulema, muyuma yejima yimunakwila, mutiyishenuña Tata yenu wamwiwulu kuwaha.—Yish. 27:11. w21.03 7 ¶17-18

Kudi yuma yayivulu yinateli kutuneñesha, yuma yamwekanaña niyabulaña kumwekana. Yumiyi munabombeli kubula kuwanina, kuzeya-zeya niyikatu. Tunateli cheñi kuneña hamuloña wakwila anatwinki wanyi kukooleka kutwakeñaña mumudimu waYehova hela hamuloña wakwila antu amwiluña mutwashimwinaña atiyililaña wanyi kunsañu yetu. Tunateli kutiya kutama hamuloña wakubula kuwanina nikuzeya-zeya kwetu. Chuma chinateli kufumamu, tunateli kutachika kutoñojoka netu Yehova wakatwiñija wanyi mwituña dadiha hamuloña wakuluwañesha kwetu. Yitoñojoka yamuchidiwu yinateli kutuzeyesha. Bayibolu yahoshaña nawu “antu ejima anavulumuni,” kufumishaku hohu Yesu. (Rom. 3:23) Ilaña Nsoneki waBayibolu hakeñakeñaña yiluwa mudi etu hela nindi chiña twikali awaninaku. Yena hiTata yetu watukeña nawa wakeñaña kutukwasha. Cheñi wadiwunjika. Wamonaña chitwazataña nañovu hakwila nawu tuumiki kuzeya-zeya kwetu nichitwatiyaña kutama hayiluwa yetu, dichi yena wafwilaña kutukwasha.—Rom. 7:18, 19. w20.12 22 ¶1-3

Wejima wetu tudi halwendu. Tunakufwila kushika mwituña dadiha mwakekala chiyuulu chaYehova. Ifuku nifuku twafwilaña kwenda munjila yaya kuwumi. Ilaña neyi chochahosheli Yesu iyi njila yanyanya nawa yakala kwendamu. (Mat. 7:13, 14) Twawanina wanyi, dichi chinateli kwikala chaswayi kufuma muniyi njila. (Ñal. 6:1) Neyi tunakukeña kutwalekahu kwenda munjila yanyanya yaya kuwumi, twatela kuhimpaña yitoñojoka yetu niyilwilu yetu. Kapostolu Pawulu watukolesheli kutwalekahu ‘kolola yitoñojoka etu.’ Chatukalilaña kwiluka chitwatiyaña nichidi yitoñojoka yetu. Muchima wetu wadimbanaña dichi chinateli kutukalila kwiluka yuma yiwunateli kutukojeja kwila. (Yere. 17:9) Chinateli kwikala chaswayi kudidimba etu aweni “nayitoñojoka yakutwamba.” (Yak. 1:22) Dichi tuzatisheña Izu daNzambi kulonda tudishinshikeña. Izu daNzambi datukwashaña kwiluka chekala wuntu wetu wamukachi, chidi neyi “yitoñojoka niyuma yafwilaña muchima.”—Heb. 4:12, 13. w20.11 18 ¶1-3

Neyi twikala adizoza nawa twiluka hakumina, tukwikala namuzañalu chikupu. Munjilanyi? Neyi twiluka netu kudi yuma yitwatela kwila niyitwatela kubula kwila, tukusakililaña hawukwashu wutunatambwili kudi akwetu. Toñojokenu hampinji yokiliyi Yesu amayala 10 adiña nambumba. Wumu hohu diyi wafuntili nakumusakilila Yesu hakumuuka musoñu watama, chuma chadi kubula kwilayi halwindi. Iwu iyala wadizoza wasakilili chamuukiliwu nawa wamulemesheli Nzambi hachumichi. (Luka 17:11-19) Antu adizoza atiyañanaña chiwahi nawakwawu nawa ekalaña amabwambu. Munjilanyi? Amonaña yilwilu yayiwahi mudi akwawu nawa ayikuhwelelaña. Antu adizoza atiyaña kuwaha neyi amona akwawu anakuzata chiwahi mudimu wunayinkiwu nawa ayihamekaña nikuyilemesha. w20.08 12 ¶17-18