January

Yesu wayifwishili akulumpi jansakililu amumafuku indi namuloña. Chakutalilahu, wamwekesheli nindi aFwarisi adiña anfwikiji muloña alemesheli kwisuka kumakasa kubadika kwakamena anvwali jawu. (Mat. 15:1-11) Yesu hetejeli yitoñojoka yawakulumpi jansakililu kumukañesha kuhosha chalalaku. Yesu wamwekesheli cheñi nindi yuma yatañishileñawu munsakililu yadiña yakutwamba. Wahosheli wanyi nindi yuma yejima yakuhwelelawu munsakililu Nzambi wayitejaña. Ilaña washimwini nindi antu amavulu akaya munjila yabwambwañana yatwalaña kukujilumuka, ilaña antesha akekala munjila yanyanya yatwalaña kuwumi. (Mat. 7:13, 14) Wahosheli nindi antu amakwawu akamwekana neyi amukalakelaña Nzambi, ilaña hiyamukalakelañaku. Watusoñamishili nindi: “Babalenu nawatuprofwetu akutwamba enzaña kudi enu iku anavwali yitembi yanyikoku, ilaña mukachi hiyatuñwidi afwa hakuda. Mukuyilukila kunyikabu yawu.”—Mat. 7:15-20. w21.05 9 ¶7-8

Hana wasumbukili kudi kaLevi Elikana, wamukeñeli nankashi. Ilaña Elikana wadiña namumbanda mukwawu wejina daPenina. Elikana wamukeñeli nankashi Hana kubadika Penina. Hela chochu, “Penina wadiñi nawanyanindi ilaña Hana hadiñi nawanyanaku.” Hamuloña wachumichi, Penina wamuvulokeleña Hana “nankashi kulonda kumutiyishaña kutama.” Hana waneñeli “hakudilaña hohu nikudyaña nawa nehi.” Hela chochu, hosi hashimunawu nawu Hana wakeñeleña kumufuntishila Penina katama. Ilaña wamulejelimu Yehova chatiyileñayi nawa wakuhweleli nindi wukumukwasha. (1 Sam. 1:2, 6, 7, 10) Chumanyi chitunateli kudizila kudi Hana? Neyi muntu yeseka nindi yadibechi nanenu, ilukenu nenu yenu mwatela kuzatilahu. Bayi mwiteja kulonda mudibechi nindiku. Chatela mufuntisheña katama nakatama, esekenu kuleta kuwunda nanowu muntu. (Rom. 12:17-21) Neyi nakaani kuhimpa, enu mukutwalekahu kwikala nakuwunda kwamuyitoñojoka. w21.07 17 ¶13-14

Lwisu lwamuletesheli Yudasi Isakaroti kwila chuma chatama nawa wamufukejeleli Yesu. Dichadiñayi hakusambila wanyi. (Luka 6:13, 16) Wamukuhweleleli muloña diyi wadiña nakuhemba mali. Ilaña mpinji yimu, Yudasi watachikili kwiya, hela chakwila watiyili Yesu chadiña nakuyisoñamishayi halwisu. (Maku 7:22, 23; Luka 11:39) Hashimbwili wanyi henohu Yesu kanda amujahi, Yudasi wamwekesheli nindi wadiña nalwisu. Yesu niatumbanji twindi, Mariya nimuhelindi Mata adiña enyi mwitala daShimona mukwambumba. Hampinji yadiileñawu, Mariya wanyamukili nakumuhuñunwina Yesu manji evumba dadiwahi alema wuseya hamutu. Yudasi niatumbanji amakwawu atiyili kutama. Atumbanji amakwawu atoñojokeli nawu chadi kuwaha kuyizatisha awa mali mumudimu wakushimwina. Ilaña Yudasi wadiña nayitoñojoka yambukaku. Wadiña “ikombi” nawa wakeñeleña kwiya mali muchikasha.—Yow. 12:2-6; Mat. 26:6-16; Luka 22:3-6. w21.06 18 ¶12-13

Komana mpinji yikwawu mwatoñojokaña wanyi nenu mukweti nyidimu yayivulu nawa nenu mukukañanya kuyizata? Neyi dimu, mukwiluka chatiyileñayi Pawulu. Hakameneneña chipompelu chimu hohuku ilaña “yipompelu yejima.” (2 Kor. 11:23-28) Komana munakuhita muyikatu yinakuletesha mubuleña kwikala namuzañalu? Pawulu wakabakeneña ‘namwiña mumujimba,’ dikukala kwamweneñayi nawa wakeñeleña nindi kumani. (2 Kor. 12:7-10) Komana mwaneñaña hamuloña wakubula kuwanina? Pawulu niyena waneñeleña mpinji yikwawu. Waditeneni nindi “yayo-o, ami nshona” muloña walwishileña hamuloña wakubula kuwanina kwindi. (Rom. 7:21-24) Pawulu watwalekelihu kumukalakela Yehova hela chakwila wamweneña kweseka nikukala kwamboka-mboka. Chumanyi chamwinkeleña ñovu? Hela chakwila welukili nindi wawanina wanyi, wakuhweleleli nankashi mwifutu danyiloña. w21.04 22 ¶7-8

Neyi muntu wawanina Adama, wajimbesheli chawana chakwikala nawumi wahaya nyaaka, niwawanyanindi ejima alondelelihu. Hadiña hosi hakuleyela nachuma cheliliyi Adama. Wakoñelelimu hohu nshidi. Indi anyanindi? Kwosi chuma chatama chakoñeliwu. (Rom. 5:12, 14) Yehova welilihu chuma chimu kulonda anyana kaAdama akekali nawumi wahaya nyaka. Hanyima yakwila Adama navulumuni dehi, Yehova wamwekesheli chakamwinayi anyana kaAdama kunshidi nikukufwa. (Kutach. 3:15) Muloña wefutu danyiloña, tunateli kwikala nawubwambu wakola naYehova hela twawanina wanyi. Muloña wefutu danyiloña, nyidimu yaDiyabolu yejima akayikisañana. (1 Yow. 3:8) Muloña wefutu danyiloña, yuma yafuukwiliyi Yehova kutalisha heseki yakashikijewa. Iseki dejima dikekala paradisa. w21.04 14 ¶1; 19 ¶17

Izaza deneni dawamayala niambanda afumi kumatuña acheñi nawa ahosheleña madimi ashiyashana apompeli hamu. Hanidi ifuku kwamwekeni chuma chakuhayamisha. AYudeya atachikili kuhosha mumadimi ahosheleña antu enjili! Ichi chuma chayihayamishili antu amavulu, yuma yahosheleñawu aYudeya niyuma yahosheleña kapostolu Petulu yahayamishili antu ejima. Ayilejeli nawu neyi akuhwelela mudi Yesu Kristu akayamwina. Iyi nsañu yayishikili hamuchima. Yayishikili antu hamuchima chakwila ehwili nawu: “Twili ñahi?” Petulu wakwili nindi: “Wejima wenu hamuntu-hamuntu, ayipapatishi.” (Yilw. 2:37, 38) Chuma chikwawu chamwekeni chadiña chakuhayamisha. Antu akushika ku 3,000 apapatisheweli hanidi ifuku nawa ekalili atumbanji twaKristu. Iyi diyi yadiña ntachikilu yamudimu weneni wakwilisha atumbanji wayilejeliyi Yesu akwakumulondela kuzata. Iwu mudimu wunatwalekihu nimakonu. w21.06 2 ¶1-2

Hadaha twashakamaña mwiluña mwakala kutachika atudizi aBayibolu. Antu amakwawu anateli kukaana hela kudimbulula nsañu yetu. Chumanyi chinateli kutukwasha kukuhwelela netu awa antu aketeja nsañu yamuBayibolu? Anukenu nenu chihandilu chawantu chinateli kuhimpika mukanu kaayi munenzali yuma yatama, nawa antu akaanineña nsañu yetu anateli kutachika kukeña kudiza. (Mat. 5:3) Antu amakwawu akaanineña kutambula nyikanda yetu kunyima, etejeli kudiza Bayibolu. Tweluka cheñi netu Yehova diyi Mwini mudimu wakwañula. (Mat. 9:38) Nakukeña nindi tutwalekihu kutumba nikutukumwina, ilaña yena diyi wudi namudimu wakukulisha. Nawa chatukoleshaña hakwiluka netu hela chakwila tunakulombola wanyi kadizi chayinu mpinji, Yehova watufwetaña kwesekeja nachitwazataña nañovu, bayi nayuma yafumañamuku. w21.07 6 ¶14

Yehova wayinka antu wuswa wakuvwala anyana nimudimu wakuyidizisha kumukeña nikumukalakela. Hela chakwila añelu ayikiswila chikupu kudi Yehova, hiyekala naniku kukoolekaku. Dichi neyi mudi anvwali, mwekeshenuña kusakilila haniwu mudimu wayinkawu wakukulisha anyana. Anvwali ayinka mudimu weneni wakukulisha anyana, “[kuyifumba] nikuyikonkomwena kwesekeja nachakeñañayi Yehova.” (Efwe. 6:4; Kuhit. 6:5-7) Hakwila nawu chiyikwashiku anvwali, kuloñesha kwaYehova kwaloñesha yuma yashindamena haBayibolu chidi neyi nyikanda, mavidiyo, tumina niyibaaba yahaintaneti. Tata yetu wamwiwulu niMwanindi ayikeña atwansi. (Luka 18:15-17) Dichi Yehova watiyaña kuwaha neyi anvwali amushindamena nawa azata hakumina ñovu jawu kwakamena anyanawu. Nawa anvwali amuchidiwu ayikwashaña anyanawu kwikala muchisaka chaYehova chahaya nyaaka! w21.08 5 ¶9

Antu amavulu atoñojokaña nawu chikuhwelelu chatalisha mukukuhwelela chuma chakadi wunsahu wunakumwekesha nawu ochu chuma chidi kwoku. Ilaña kwesekeja naBayibolu, ichi hichikuhwelelu wanyi. Bayibolu yalumbulula nawu chikuhwelelu chashindamena hawunsahu walala, hela chakwila twamumonaña wanyi Yehova, Yesu niWanta, tukweti wunsahu wamwekeshaña nawu iyi yuma yekala kwoku. (Heb. 11:3) Sayantisiti wumu wekalili Chinsahu chaYehova wahosheli nindi: “AYinsahu jaYehova akweti wunsahu wayiletesha kukuhwelela, bayi neyi akaanaña chahoshañawu asayansiku.” Neyi kudi wunsahu wamwekeshaña nawu Nleñi wekala kwoku, ‘Hanu dinu muloñadi antu amavulu chakuhwelelawu nawu Nzambi diyi waleñeli wanyi yuma yonaña?’ Muloña amakwawu kanda asandujoleñahu dehi iwu wunsahu halwawu. Robert, wekalili Chinsahu chaYehova, wahosheli nindi: “Chineli kushikola atutañishileña wanyi hayileñaleña, natoñojokeleña nami iyi nsañu yalala wanyi. Sampu nichinashikijili yaaka yamuma 20 hinadizileña nelukili nami Bayibolu yatulejaña wunsahu watuleteshaña kukuhwelela netu Nzambi diyi waleñeli yuma yejima.” w21.08 15 ¶4-5

Tunateli kwiluka chawahayi Yehova neyi tutañaña Bayibolu nikutiyilila kuyuma yayiwahi yahoshañawu antu yayililañayi Yehova. Ilaña tukwiluka chikupu chawahayi Yehova neyi ‘tuditompela’ etu aweni kuwaha kwindi. Chakutalilahu, twili netu tunakukeña kumukalakela Yehova mumudimu wampinji yejima, ilaña hakwila tushikiji mutunafuukuli, twatela kupeleshaku chihandilu chetu. Tweluka chikaninu chaYesu chakwila nawu, neyi tutwamijaku Wanta waYehova wukutwinka yuma yejima yitunakukeña ilaña kanda tumumoneñahu dehi Yehova kutwilila iyi yuma. (Mat. 6:33) Hela chochu, chineli twakuhwelela muchikaninu chaYesu, twatela kupeleshaku jakulandalanda, kukeheshaku nyidimu, nikuzata hakumina ñovu yetu mumudimu wakushimwina. Chitwela mwenimu, tukwiluka chikupu netu Yehova watwakamenaña nayuma yitwakeñaña. ‘Tukuditompela’ kuwaha kwaYehova. w21.08 26 ¶2

Komana dichidiwu antu makonu? Eña. Akulumpi jansakililu akeñaña antu alema, aheta niamonañawu nawu akweti maana mukaayi kwikala mumachechi awu. Awa akulumpi jakwitiya etejaña awa antu amuchidiwu kwikala mumachechi awu hela chakwila akweti yilwilu yakaanishawu muBayibolu. Awa akulumpi jansakililu ayidiwulaña antu jaYehova akweti yilwilu yayiwahi, muloña wena alondelaña wanyi yilwilu yamukaayi. Pawulu washimwini nindi, Nzambi watondeli antu ‘adiwulañawu.’ (1 Kor. 1:26-29) Hela chochu, Yehova wamonaña ambuñindi ejima ashinshika nindi alema. Tunateli kwila ñahi kulonda abuleña kutuluwañesha nayitoñojoka yamukaayi? (Mat. 11:25, 26) Bayi ayiluwañesha nayitoñojoka yamukaayi nachayimonañawu antu jaNzambiku. Ilukenu nenu Yehova wazatishaña antu adizoza hakwila nkeñelu yindi. (Mas. 138:6) Nawa toñojokenu hanyidimu yinazatiyi kuzatisha antu amonañawu mukaayi nawu ataña wanyi hela nawu adana maana. w21.05 8 ¶1; 9 ¶5-6

Kapostolu Pawulu watiyileña kuwaha chiyamukwashileñaku kudi amanakwindi. Wadiña wadizoza nawa wetejeleña kumukwashaku kudi amanakwindi niahela. (Fwili. 2:19-22) Enu amanakwetu niahela mwakula dehi munateli kumwekesha nenu mwayisakililaña atwansi adi muchipompeli chenu munjila jajivulu. Neyi anakukeña nawu ayikwashiku munsañu jañendelu, kuya nakulanda yuma hela muyuma yikwawu, itejenu. Anukenuña nenu chinakuyikwashawu hinjila yimu munakumwekeshelayi Yehova nindi wayikeña. Mukwikala amabwambu chikupu nawantu anakuyikwasha. Mpinji yejima, yikwashenuña amabwambu jenu kuswina kwakwihi naYehova. Nawa yilejenuña nenu munakutiya kuwaha hakumona atwansi chinakushikahu kuzata nyidimu muchipompelu. Nawa ikalenuña nampinji yakuyilejaku yuma yimunamoni mukuhanda kwenu. Neyi mwilaña mwenimu ‘mukumwekeshaña kusakilila’ kudi Yehova hakuyinka atwansi akokelayi muchipompelu.—Kol. 3:15; Yow. 6:44; 1 Tes. 5:18. w21.09 11-12 ¶12-13

Yehova wayikeña amanakwetu niahela. Ilaña chapela wanyi kuyikeña nikuyimwekeshela kukeña mpinji yejima. Mpinji yikwawu chatukalilaña muloña twafuma kuyisemwa yambuka ninkulilu yashiyashana. Wejima wetu twaluwañeshaña nawa tunateli kuyineñesha hela kuyihilisha. Hela chochu, tunateli kuzata nañovu kulonda tuyikeñi awa amanakwetu niahela. Munjilanyi? Twatela kumwimbujolaña Tata yetu kuhitila mukumwekesha kukeña kudi amanakwetu niahela. (Efwe. 5:1, 2; 1 Yow. 4:19) Muntu waluwi wakamenaña neyi yamona muntu nakukabakana nawa wamonaña njila munateli kumukwashilayi nikumukundeja. Yesu chahandileñayi nawantu, wamwekesheleña Yehova chayakamenañayi. (Yow. 5:19) Chamweniyi mazaza awantu Yesu “wayitiyilili wushona, muloña ayikabishileña nikuyidiwula neyi anyikoku akadi kabiña.” (Mat. 9:36) Yesu wakuminineña dakuyimwekeshela hohu kukeñaku ilaña wayikwashileña. Wokileña antu akata nawa wadiña nakuyihizumwisha ‘antu ejima akabakeneña nawa asendeli yiteli yalema.’—Mat. 11:28-30; 14:14. w21.09 22 ¶10-11

Yehova watiyaña kuwaha kumwekesha luwi. Kapostolu Pawulu amoneneneni kusoneka nawu Nzambi “wasweja luwi nankashi.” Munawa mazu, Pawulu walumbulwileña nindi Nzambi wukweti luwi muloña wayinkaña antu kuchiñeja kwakuya mwiwulu, ambuñindi awahishewa. (Efwe. 2:4-7) Hela chochu, Yehova wayitiyilaña antu ejima luwi bayi awahishewa hohuku. Ñimbi yamasamu Davidi wasonekeli nindi: “Yehova himuwahi kudi antu ejima; wushona windi wekala kunyidimu yindi yejima.” (Mas. 145:9) Chineli Yehova wakeña antu, wamwekeshaña luwi mpinji yejima hanateleli. Yesu hohu diyi weluka chikupu Yehova chamwekeshañayi luwi. Yehova niYesu adiña hamu mwiwulu henohu Yesu kanda yenzi hanu hamaseki. (Yish. 8:30, 31) Hadi mpinji yayilehi, Yesu wamweneña Tata yindi chatiyilileñayi antu akoñeleña nshidi luwi. (Mas. 78:37-42) Muntañishilu yindi, kakavulu Yesu wahosheleña hanichi chilwilu chachiwahi chikwetiyi Tata yindi. w21.10 8-9 ¶4-5

Yehova wakwili iku kulomba nezu datiyakana kufuma mwiwulu, nakushimuna nindi wukulemesha ijina dindi. Hampinji yazatileñayi mudimu windi, Yesu walemesheli ijina daTata yindi. (Yow. 17:26) Dichi akwaKristu alala eluka nawu chalema nankashi kuzatisha ijina daNzambi nikukwasha antu kulonda adiluki. Mumafuku awapostolu, hanyima yakutuña chipompelu chawakwaKristu, Yehova “[wabalumukilili] kudi antu akunyuza katachi nakunonamu antu ejina dindi.” (Yilw. 15:14) Dichi awa akwaKristu akusambila atiyileña kuwaha kuzatisha ijina daNzambi nikulejaku antu kulonda adiluki. Azatishileña ijina daNzambi neyi anakushimwina nimunyikanda yawu yasonekeliwu. Amwekesheli nawu wena hohu diwu atiyakesheleña ijina daNzambi. (Yilw. 2:14, 21) Munjila yoyimu, nimakonu aYinsahu jaYehova hohu diwu atiyakeshaña ijina. w21.10 20-21 ¶8-10

Kukeña kwaNzambi kwakashinshi kwahaya nyaaka. Luwi hela netu kukeña kwakashinshi, akushimuna mapampa 26 mumukanda waMasamu 136. Muvasi yakutachikila twatañaña netu: “Musakililenu Yehova, himuwahi; luwi lwindi [hela kukeña kwindi kwakashinshi] lwahaya nyaka.” (Mas. 136:1) Muvasi 2 nakushika ku 26, afuntisha funtishamu mazu wowamu akwila nawu “luwi lwindi lwahaya nyaaka.” Neyi tunakutaña idi isamu, twahayamaña hakumona njila jajivulu mwamwekeshelañayi Yehova luwi lwindi hela kukeña kwindi kwakashinshi chakadi kuleka. Awa mazu iyafuntishahu akwila nawu “luwi lwindi lwahaya nyaaka” atulejaña nawu kukeña kwayikeñayi Nzambi ambuñindi kwahimpaña wanyi. Chatukoleshaña chikupu hakwiluka netu Yehova halekaña kuyikeña ambuñindiku. Ilaña neyi nakumumwekeshela muntu wamukalakelaña kukeña, hamushiyañaku sweje-e mumpinji yayihuñu. Chichatukwashaña: Twazañalalaña chikupu hakwiluka netu Yehova wekalaña nanetu nawa watwinkaña ñovu yakuumika yihuñu nikutwalekahu kwenda munjila yaya kuwumi.—Mas. 31:7. w21.11 4 ¶9-10

Komana mpinji yikwawu mwakamaña neyi mutoñojoka hayuma yikamwekana kumbidi, chidi neyi kujilumuka kwansakililu yakutwamba, kulukuka kwaGogi wakuMagogi hela njita yaAmagedoni? Mwadihulahu dehi enu aweni nenu, ‘Neyi mpinji yinashiki dehi, komana nikatwalekahu kwikala washinshika haniyi mpinji yakutiyisha woma?’ Neyi mwatoñojokaña hanawa malwihu, mazu aYesu adi munsona yalelu akuyikwasha. Yesu wayilejeli atumbanji twindi nindi: “Bayi mwakama munyichima yenuku. Kuhwelelenu.” Chikuhwelelu chakola chikatukwasha kudiwunjika nayuma yikamwekana kumbidi. Tunateli kweseka chikuhwelelu chetu kulonda tukomiki nakukala kutwakamona kumbidi neyi tutoñojokaña chitwomikaña neyi anatweseki chayinu mpinji. Neyi tutoñojokaña chitwelaña neyi anatweseki, chikutukwasha kwiluka hitwatela kuzatila. Mpinji yejima yitwomikaña kukala, chikuhwelelu chetu chakolelañaku. Chumichi chikatukwasha kuumika nikumbidi. w21.11 20 ¶1-2

Kapostolu Pawulu wamukolesheli Timotewu niakwawu akwaKristu kutwalekahu kuzata nañovu mudimu wakushimwina. (2 Tim. 4:5) Ilaña mpinji jikwawu chakalaña. Chakutalilahu, toñojokenu hadi amanakwetu niahela ashakamaña mumaluña mwakaanishawu hela mwalekeshawu mudimu wetu. Antu jaYehova amonaña kukala kwashiyashana kunateli kuyizeyesha. Chakutalilahu, amakwawu azataña hadi mpinji yayilehi hakwila nawu akeñeli yisaka yawu yuma yakeñekaña. Akeñaña kuzata nankashi mumudimu wakushimwina, ilaña nyijimba yazeyaña. Amakwawu anateli kukañanya kuzata nañovu muloña wayikatu hela kukula kumujimba; chakwila ashakamaña hohu hamatala. Hela chochu, amakwawu atoñojokaña mpinji yejima nawu alema wanyi kudi Yehova. Hichikweti muloña nakukala kwetuku, Yehova nateli kutwinka ñovu yakuumika kukala nikutukwasha kutwalekahu kumukalakela hanakumini ñovu yetu. w21.05 20 ¶1-3

Mpinji yikwawu, akwetu akashikola, akwetu mutwazatilaña, antaña jetu abula kwikala aYinsahu niantu amakwawu anateli kutukañesha kudifukula kudi Yehova munjila yetejayi. Neyi chumichi chitumwekena, twatela kufuukulahu chuma chalema. Talenu ichi chishina chalema chekala haALevi 19:19, chahosha nawu: “Kuvwala chuma chamahina akubombashana nyitundu yiyedi chinjila.” Ilu lushimbi lwayikwashileña aIsarela kwikala ambukaku nanyuza yayinyeñumukili. Makonu, chineli hitwekala muNshimbiku, chatama wanyi mukwaKristu kuvwala chakuvwala chakutuña namahina ashiyashana. Ilaña twakaanaña kwikala neyi antu akuhwelela hela elaña yuma yaditadikishaña nachahosha Bayibolu hela chakwila awantu hiyakwetu akashikola, akwetu mutwazatilaña hela antaña. Hela chochu, twayikeña antaña jetu niakwetu antu. Ilaña yuma yitwafuukulaña muchihandilu yamwekeshaña nawu twamukeña Yehova hela chakwila yatuleteshaña kwikala ambukaku nawantu. Chumichi chalema nankashi muloña neyi tunakukeña kwikala ajila twatela kumukalakelaña Nzambi hohu.—2 Kor. 6:14-16; 1 Pet. 4:3, 4. w21.12 5 ¶14; 6 ¶16

Njila yaya kuwumi anateli kuyiwana. Yesu wahosheli nindi: “Neyi mukutwalekahu kuhemba mazu ami, chalala mudi atumbanji twami, nawa mukwiluka chalala, chalala nichena chikuyifumisha muwuduñu.” (Yow. 8:31, 32) Chachiwahi nankashi muloña himwelili chuma neyi chelañawu antu ejimaku; ilaña mwakeñakeñeli chalala. Mwatachikili kudiza Izu daNzambi kulonda mwiluki yuma yakeñañayi Nzambi nindi twileña nawa mwatiyilili kuntañishilu yaYesu. Mwadizili nenu Yehova wakeñaña nindi tukaaneña ntañishilu yamunsakililu yakutwamba nawa tubuleña kwanakana mafuku akunooka afuma munsakililu yakutwamba. Mwadizili cheñi nenu kwila yuma yakeñayi Yehova nikuleka yuma yahelayi chapela wanyi. (Mat. 10:34-36) Hadaha chayikalilili kuhimpa. Hela chochu, mwazatili nañovu kulonda muhimpi muloña mwamukeña Tata yenu wamwiwulu. Wayitiyili kuwaha.—Yish. 27:11. w21.12 22 ¶3; 23 ¶5

Mosi himuntu wumu itwatela kwimbujola wetejeli kufumba hanyima yakukoña chiluwa cheneni. Mpinji yimu wahilili nankashi chakwila hamulemesheli Yehovaku. Hamuloña wachumichi, Mosi amwitejeli wanyi kwiñila Mwituña daChikaninu. (Kuch. 20:1-13) Chelili Mosi amuleji Yehova nindi yamutoñojokeliku, Yehova wamulejeli nindi: “Kuminaku hohenohu! Bayi wuhosha cheñi nanami haniyi nsañuku.” (Kuhit. 3:23-27) Mosi haneñeliku. Ilaña, wetejeli mwafuukwiliyi Yehova nawa Yehova watwalekelihu kumuzatisha hakulombola aIsarela. (Kuhit. 4:1) Mosi wetejeli mwamufumbiliwu nawa ninetu twatela kumwimbujola. Mosi wamwekesheli nindi wetejeli mwamufumbiliwu kudi Yehova kuhitila mukutwalekahu kwikala washinshika nihanyima yakumutambula kukooleka kwakeñesheliyi. Mwafumaña yuma yayiwahi neyi twimbujola amayala ashinshika adi neyi Mosi. (Yish. 4:11-13) Amanakwetu niahela amavulu dichineliwu. w22.02 11 ¶9-10

Mu 32 C.E., mumpinji yachishika ibwambu daYesu Lazaru wakatili nawa wafwili. (Yow. 11:3, 14) Iwu iyala wadiña nawahela indi ayedi, Mariya naMata nawa Yesu wachikeñeli nankashi ichi chisaka. Mata chatiyiliyi nindi Yesu nakwinza, wayili swayi-swayi nakumukinkilila. Fwikijenu chineñi chatiyiliyi chelili yahoshi nindi: “Mwanta, neyi wadiña kunu, manakwami hadi kufwaku.” (Yow. 11:21, 32, 33) Yesu wadilili hakumona Mariya niMata ananeñi nakufwa kwamanakwawu akeñeliwu. Neyi mwafwisha ntaña yenu Yehova weluka chimwatiyaña. Yesu “diyi wamufwana chikupu” Tata yindi. (Heb. 1:3) Yesu chadililiyi wamwekesheli chatiyañayi Tata yindi neyi tunafwishi ntaña yetu. (Yow. 14:9) Neyi mwafwisha ntaña yenu ilukenu nenu Yehova weluka chineñi chimwatiyaña nawa wayakamenaña. Nakukeña kuyuuka.—Mas. 34:18; 147:3. w22.01 15 ¶5-7

Neyi mwikala nampinji yakuhosha naYehova, kumutiyilila nikutoñojoka hadi yena, mukufuma yuma yayiwahi. Chatachi, mukufukulaña chiwahi. Bayibolu yatulejaña nawu ‘muntu wendaña nawakwamana niyena wakekala mukwamaana.’ (Yish. 13:20) Chamuchiyedi, mukwikala ntañishi wamuwahi. Neyi tunakudiza Bayibolu namuntu, chuma chalema chitwafwilaña hikumukwasha yaswini kwakwihi naYehova. Neyi twikala nampinji yakuhanjeka naTata yetu wamwiwulu kukeña kutwamukeña kukuswejelaku nawa tukuyikwasha atudizi etu kulonda amukeñi. Toñojokenu hachuma cheliliyi Yesu. Wamuhamekeli Yehova munjila yakukeña nawa ichi chuma chayiletesheli atumbanji twindi kumukeña Yehova. (Yow. 17:25, 26) Chamuchisatu, chikuhwelelu chenu chikukola. Talenu chuma chamwekanaña neyi mumulomba Yehova nenu yayilomboleña, kuyikundeja nawa nenu yayikwashi. Mpinji yejima yakulañayi Yehova kulomba kwenu, chikuhwelelu mudi yena chakolaña.—1 Yow. 5:15. w22.01 30 ¶15-17

Yehova watulejaña nindi tuleki kwikala nayitoñojoka yatama niyilwilu yatama muloña watukeña nankashi nawa nakukeña etu tudiluñisheña wumi. (Isa. 48:17, 18) Weluka nindi antu abulaña kutondolwela kufwila kwatama, adikatishaña awenawu niakwawu. Watiyaña kutama neyi yamona tunakudikatisha etu aweni niakwetu antu. Amabwambu jetu amakwawu niantu amuchisaka chetu anateli kutusupisha muloña wakwila tunakufwila kuhimpa wuntu wetu. (1 Pet. 4:3, 4) Anateli kuhosha nawu tukweti wuswa wakwila yuma yejima yitunakukeña nawa hitwatela kwiteja antu amakwawu kutuleja yuma yitwatela kwilaku. Hela chochu, awa antu akaanaña nshimbi jaYehova hiyekala asubukaku. Munjila yikwawu, etejaña kaayi kanakuyulewa naSatana kuyiwumba. (Rom. 12:1, 2) Wejima wetu twatela kutondahu chuma chimu: Chili kutwalekahu kwikala nawuntu wawukulu, waluwañeshawu kudi nshidi nikaayi kaSatana, hela kwiteja Yehova atubalumuni kulonda twikali antu amawahi.—Isa. 64:8. w22.03 3 ¶6-7

Neyi tutoñojokaña Hezu daNzambi chikutukwashaña kwikala nayitoñojoka yayiwahi hakukala kutunakumona. Toñojokenu Bayibolu chiyamukwashili mumbanda nfwila wadiña nachineñi. Mukulumpi wumu wamulejeli nindi neyi yataña nsañu yekala mumukanda waYoba yinateli kumukwasha. Chatachikiliyi kutaña, watachikili kumwinka Yoba nyiloña hakutoñojoka mwaluwa. Wafwikijileña nakumwila Yoba nindi: “Yoba! Kutoñojokaña hohu hakukala kweyi nehi!” Ilaña nkumininaku welukili nindi yilwilu yindi yadiña neyi yaYoba. Chumichi chamukwashili kuhimpa yitoñojoka yindi nawa chamukwashili kuumika chineñi chakufwisha nfumwindi. Cheñi Yehova wazatishaña akwaKristu kulonda akoleshi akwawu akwakudifukula. Pawulu wafwilileña kudimona nawamanakwindi niahela kulonda ‘akadikoleshi.’—Rom. 1:11, 12. w21.05 22 ¶10-11; 24 ¶12

AIsarela ayilejeli nawu: “Kapampa kasatu muchaaka, amayala eyi ejima atela kuya kumesu aYehova Nzambi yeyi kwiluña dakatondayi.” (Kuhit. 16:16) Ashileña matala awu nimaha awu chakadi muntu wakuyitala. Yehova wayikanini nindi: “Kwosi muntu wukafwilaña ituña deyi hiwakayaña nakudimona naYehova Nzambi yeyi.” (Kwid. 34:24) Chineli aIsarela amukuhweleli chikupu Yehova, ayileña kuyawija yaha chaaka. Dichi adiluñishileña yuma yayivulu; elukili chikupu Nshimbi jaNzambi, atoñojokeleña chikupu hakuwaha kwindi nawa adikolesheleña nawakwawu akakwitiya. Ninetu twadiluñishaña yuma yoyimu neyi tuzata nañovu kulonda tuyi nakupompa. Nawa toñojokenu muzañalu watiyañayi Yehova neyi tuya iku tunadiloñeshi kulonda twakulihu ñakwilu yatiyakana nawa yayihi. w22.03 22 ¶9

Yehova wamudizishileña Yesu hamudimu windi wakumbidi neyi nekali dehi Kapristu Muneni. Yesu watiyili ochu chichakala kumwovwahila Nzambi neyi wudi mukweseka kwasweja. Wadiña mukukala nankashi chakwila walombeli nindi amukwashi “iku nakudila chikupu nimadilu.” Chineli Yesu wahitamu dehi muyihuñu, yena weluka dehi kukala kwetu nawa “nateli [kutukwasha]” neyi ‘anakutweseka.’ Twamusakililaña Yehova hakutwinka Kapristu Muneni wunateli “kutiyisha kuzeyazeya kwetu.” (Heb. 2:17; 4:14-16; 5:7-10) Yehova wamwitejeli Yesu kukabakana chikupu kulonda yakuli lwihu lwalema: Komana antu anateli kwikala ashinshika kudi Nzambi neyi anayeseki chikupu? Satana wahoshaña nindi inehi! Wahoshaña nindi antu amukalakelaña Nzambi muloña akeñaña nawu yayinkeña yuma nawa nindi, hiyadihana kudi Yehovaku. (Yoba 1:9-11; 2:4, 5) Yesu wahembeli kashinshi kindi nawa wamwekesheli nindi Satana hitwambi. w21.04 16-17 ¶7-8

Henohu kadizi kanda yapapatishewi, watela kuzatishaña yuma yatañishaña Bayibolu. Neyi kadizi yazatishaña yuma yinakudizayi, wukwikala neyi “muntu wamaana” washimunawu muchishimu chaYesu wapundili chakunama nakutuñila itala dindi helola. (Mat. 7:24, 25; Luka 6:47, 48) Kwashenu kadizi wenu yahimpi chihandilu chindi. (Maku 10:17-22) Yesu welukili nindi chinateli kwikala chakala samaheta kulandisha yuma yindi yejima. (Maku 10:23) Hela chochu, Yesu wamulejeli iwu iyala kuhimpa chihandilu chindi. Muloñadi? Muloña Yesu wamukeñeli iwu muntu. Mpinji yikwawu, chinateli kutukalila kumukolesha kadizi waBayibolu kuzatisha yuma yinakudizayi muloña tunateli kumona netu mpinji kanda yishikili yakuhimpa. (Kol. 3:9, 10) Ilaña neyi muhanjeka nakadizi swayi-swayi niyena wukutachika kuhimpa swayi. Neyi muhanjeka nindi mukumwekesha nenu mwamwakamenaña.—Mas. 141:5; Yish. 27:17. w21.06 3 ¶3, 5

Kapostolu Petulu wahosheleña hachakutalilahu chachiwahi chaYesu chakuumika makabi. Hela chochu, kudi njila jajivulu mutunateli kumwimbujolela Yesu. (1 Pet. 2:18-25) Dichi, twatela kwimbujola chihandilu chaYesu chejima, dikwila nawu yuma yejima yahosheleñayi niyelileñayi. Twawanina wanyi, komana chalala tunateli kulondela yuma yelileñayi Yesu? Eña, tunateli. Anukenu nenu Petulu watulejeli ‘kulondela chikupu muntampu jaYesu.’ Neyi tulondelaña chikupu muntampu jindi, kuzata hanakumini ñovu jetu hela chakwila twawanina wanyi, tukumwekeshaña netu tunakovwahila mazu akapostolu Yowanu ahosheliyi nindi: ‘Twalekenuhu kwenda neyi chendeliyi Yesu.’ (1 Yow. 2:6) Neyi tulondelaña chikupu muntampu jaYesu tukuswina kwakwihi naYehova. Tunahoshelidi mwenimu? Chatachi, mpinji yejima Yesu welileña yuma yamutiyishileña Nzambi kuwaha. (Yow. 8:29) Dichi neyi tulondelaña muntampu jaYesu, tukumuzañaleshaña Yehova. Nawa twatela kwiluka netu Tata yetu wamwiwulu wukuswina kwakwihi nawantu azataña nañovu kulonda ekali amabwambu jindi.—Yak. 4:8. w21.04 3 ¶4-6

Yehova wamonaña yilwilu yetu yayiwahi; weluka nindi tunateli kwikala antu amawahi nawa watukokelaña kudi yena. Neyi twikalaña ashinshika kudi yena, wukuswina kwakwihi nanetu haya nyaaka! (Yow. 6:44) Neyi twiluka netu Yehova watukeña nawa watukwashaña, tukumuzatilaña chakufuma hamuchima hichikweti muloña nakukala kutunakumonaku. Ilaña neyi tutoñojokaña netu Nzambi watwakamenaña wanyi, ‘ñovu jetu jikukeha.’ (Yish. 24:10) Neyi tuzeya nawa tuleka kukuhwelela netu Nzambi watukeña, tukatwesha wanyi kushinda neyi Satana natweseki. (Efwe. 6:16) AkwaKristu amakwawu ashinshika wubwambu wawu naNzambi wunakehi muloña wakujinooka nawu wayikeña wanyi. Tunateli kwila ñahi neyi tutachika kutoñojoka netu Nzambi hatukeñaku? Twatela kuleka kutoñojokahu swayi-swayi. Mulombenu Yehova kulonda yayikwashi kufumisha “yitoñojoka [yakwakama]” nakuhiñishamu ‘kuwunda kwaNzambi kwabadika kwiluka kwejima kukuhemba nyichima yenu niyitoñojoka yenu.’ (Mas. 139:23; Fwili. 4:6, 7) Nawa anukenuña nenu himudi nkawenuku. w21.04 20 ¶1; 21 ¶4-6

Mwekalili ñahi Chinsahu chaYehova? Chatachi, hadaha mwatiyili “nsañu yayiwahi” kudi avwali jenu, mukwenu mumwazatilaña, mukwenu mukashikola hela hayendeleliwu aYinsahu kwitala. (Maku 13:10) Dichi ashakamini nenu hadi mpinji yayilehi nawa azatili nañovu kuyidizisha Bayibolu. Chimwadizileña, mwamukeñeli Yehova nawa mwelukili nenu wayikeña ninenu. Yehova wayiletesheli mukeñi chalala nawa chineli munekali dehi kambanji kaYesu Kristu, munekali nakuchiñeja kwakwikala nawumi wahaya nyaaka. (Yow. 6:44) Chakadi nikujina, mwamusakililaña Yehova hakutemesha muntu kwinza nakuyidizisha enu chalala nawa nihakuyiteja enu kwikala kambuñindi. Chineli tuneluki chalala, tudi namudimu wakukwasha antu kulonda niwena ekali munjila yaya kuwumi. Hadaha twashimwinaña kwitala nikwitala, ilaña chinateli kutukalila kulombola atudizi aBayibolu. w21.07 2 ¶1-2