February

Yehova nakukeña nindi akwakudifukula indi ejima ekali namuzañalu. Wudi kwakwihi nanetu hamuntu-hamuntu, nawa wamonaña neyi tunakwakamena hela neyi tunaneñi. (Mas. 145:18, 19) Talenu Yehova chamwakameneniyi kaprofwetu kindi Elija. Iwu iyala washinshika wadiñaku mumpinji yakala yawaIsarela. Akwakudifukula aYehova ayikabishileña chikupu, sweje-e akeñeleña kumujaha Elija kudi antu abulileña kudifukula kudi Yehova. (1 Anya. 19:1, 2) Chuma chamuneñesheleña cheñi Elija, watoñojokeleña nindi yena diyi wadiña hohu kaprofwetu washalilihu wamukalakeleleña Yehova. (1 Anya. 19:10) Nzambi wamukwashili Elija swayi-swayi. Yehova watemesheli kañelu kwinza nakumukolesha kaprofwetu kindi nindi hadiña nkawindiku nawa nakumuleja nindi muIsarela mwadiña cheñi antu amakwawu amutiyileña Nzambi woma! (1 Anya. 19:5, 18) Yesu wayakwili nindi amanakwawu niahela diwu akekala chisaka chawu. (Maku 10:29, 30) Nawa Yehova, Tata yetu wamwiwulu, washiika nindi wukukwashaña antu ejima anakukeña kumukalakela.—Mas. 9:10. w21.06 8-9 ¶3-4

Antu amavulu ahukanaña muloña yuma yamuBayibolu yitwatañishaña yasololaña ntañishilu yakutwamba. Akulumpi jansakililu atañishaña anyikoku awu nawu Nzambi wochaña antu atama mukesi kahelu. Azatishaña iyi ntañishilu yakutwamba kulonda ayiyuuleña antu. Etu ambuña aYehova adifukulaña kudi Nzambi wukweti kukeña, twasololaña iyi ntañishilu yakutwamba. Akulumpi jansakililu atañishaña cheñi nawu wumi wafwaña wanyi. Twatañishaña netu iyi ntañishilu yekala yamuBayibolu wanyi, muloña neyi yadiña yalala kwosi wadi kukeña nindi akamusañuli. Hela chakwila nsakililu yatañishaña nawu yuma yejima ayifuukula dehi kudi Nzambi, twadizishaña netu muntu wukweti wuswa wakutondahu kumukalakela Nzambi hela nehi. Awa akulumpi jansakililu elaña ñahi? Kakavulu ahilaña. Neyi twakeña chalala, twatela kukuhwelela nikwovwahila izu daNzambi. (Yow. 8:45, 46) Kwambukaku naSatana Diyabolu, hitwakakaana chalalaku. Hitwakelahu chuma chidi chejima chaditadikishaña nayuma yitwakuhwelelaku. (Yow. 8:44) Nzambi wakeñaña nindi antu jindi ‘aheleña yuma yatama’ nawa ‘akakeleña kuyuma yayiwahi’ neyi cheliliyi Yesu.—Rom. 12:9; Heb. 1:9. w21.05 10 ¶10-11

Chumanyi chitwatela kwila neyi tumona netu tunatachiki kudivwimba hela kwikala nalwisu? Tunateli kusopokamu! Kapostolu Pawulu wahosheli nindi: Antu ‘anakwatiwu amomi kudi’ Diyabolu anateli kusopoka mumuhetu. (2 Tim. 2:26) Mwatela kwanukaña nenu, Yehova wamubadika ñovu Satana. Dichi neyi twitejaña wukwashu waYehova tunateli kusopoka munyihetu hela mutukosi twaDiyabolu. Hela chochu, chatela tusopokeña munyihetu hela mutukosi twaSatana, twatela kututondolwela twejima. Nzambi hohu diyi wunateli kutukwasha. Mulombenuña Yehova mpinji yejima kulonda yayikwashi kushinshika yitoñojoka yenu niyilwilu yenu. (Mas. 139:23, 24) Dichi zatenuña nañovu kulonda mubuli kwikala adinka wanta hela nalwisu! Hadi yaaka yayivulu, Satana nekali chibinda. Katataka amukasi nawa nkumininaku akumujilumuna. (Chim. 20:1-3, 10) Tunakutalila idi ifuku. Dichi, twalekenuhu kwikala asoñama nanyihetu yaSatana. Zatenuña nañovu kulonda mubuli kwikala adivwimba hela nalwisu. Fwilenuña kudikaña “naDiyabolu, niyena wukuyitemuka.” w21.06 19 ¶15-17

Yehova wazañalalaña neyi muntu yeteja chalala chamuBayibolu nawa yalejeñaku antu. (Yish. 23:15, 16) Yehova watela wazañalalaña hakumona yuma yinakumwekana makonu. Chakutalilahu, muchaaka chamudimu chamu 2020, hela chakwila kwadiña musoñu waKorona twalombweli atudizi 7,705,765, nawa twakwashili antu 241,994, kudihana kudi Yehova nakupapatishewa. Awa atumbanji amaha niwena akulombolaña atudizi aBayibolu nikwilisha atumbanji amavulu. (Luka 6:40) Chakadi nikujina, twamuzañaleshaña Yehova chitwazataña mudimu wakwilisha atumbanji. Mudimu wakwilisha atumbanji wakala, ilaña Yehova nateli kutukwasha kudizisha atumbanji amaha kumukeña Tata yetu wamwiwulu. Komana kwila tuloñesha kulonda tutachiki kulombola kadizi waBayibolu nehi? Hadaha tunateli kuhayama hakumona chuma chinateli kumwekana, neyi twihula antu itwawanaña kulonda tutachiki kudiza nawu Bayibolu. w21.07 6-7 ¶14-16

Mwanta Davidi wahanini mali niyuma yayivulu kulonda akwashi kutuña nachu tembeli. (1 Kushi. 22:11-16) Hela chakwila chayinu mpinji hitukweti ñovu yakutuñaku, tunateli kutwalekahu kukwasha iwu mudimu kuhitila mukuhana yawana kwesekeja nahanakumini ñovu jetu. Nawa tunateli kukwasha atwansi kuhitila mukuyilejaku yuma yituneluki. Kutalisha hakuhana toñojokenu hachuma cheliliyi kapostolu Pawulu. Wamusendeli Timotewu mumudimu wawumishonali nawa Pawulu wamudizishili iwu mukwenzi weyala jinjila jakushimwinamu nikutañisha. (Yilw. 16:1-3) Pawulu wamudizishili Timotewu kwikala mukwakushimwina wamuwahi wansañu yayiwahi. (1 Kor. 4:17) Timotewu niyena, wazatishili yuma yamudizishiliwu kudi Pawulu kudizishaku akwawu. w21.09 12 ¶14-15

Yumanyi yitunateli kudizila kudi kambanji Apolosi nikapostolu Pawulu? Awa amayala ejima wawu ayedi adiña eluka Nsona. Ejima wawu adiña aya mpuhu nawa adiña antañishi amawahi. Nawa wejima wawu elishili atumbanji amavulu. Ilaña aditiyilileña ichima wanyi. (Yilw. 18:24) Kafwampi chimwahitili mpinji hanyima yakwila Apolosi nafumi kuKorinda, Pawulu wamulejeli cheñi kufunta kweniku. (1 Kor. 16:12) Apolosi wazatishili waana windi chiwahi, kushimwina nsañu yayiwahi nikukolesha amanakwindi. Tuneluki cheñi netu Apolosi wadiña wadizoza. Chakutalilahu, hosi hasonekawu nawu Apolosi wahilili chelili Akwila naPrisila amutambiki “nakumulumbulwila chiwahi mwaya njila yaNzambi.” (Yilw. 18:24-28) Kapostolu Pawulu welukili nyidimu yayiwahi yazatiliyi Apolosi. Ilaña Pawulu hadakameneni nindi antu akutoñojokaña nawu Apolosi wamubadika yenaku. Neyi tutaña mazu ayisonekeleliyi Pawulu aKorinda, tukumona netu Pawulu wadiña wadizoza nawa watoñojokeleleñaku akwawu.—1 Kor. 3:4-6. w21.07 18-19 ¶15-17

Adama naEva afuukwilihu kudikaña naNzambi, dichi chateleleli chayifumishiliwu muchisaka chaYehova. Indi anyanawu? Yehova waloñesheli njila kulonda antu adi nanyichima yashinshika ekali muchisaka chindi. Wazatishili ifutu danyiloña daMwanindi wumu hohu. (Yow. 3:16) Muloña wamulambu waYesu, a 144,000 ayitonda kwikala anyana kaNzambi. (Rom. 8:15-17; Chim. 14:1) Kubombelahu, antu amavulu ashinshika nawa ovwahila anakwila nkeñelu yaNzambi. Adi nakuchiñeja kwakwikala muchisaka chaNzambi hanyima yakuhita mukweseka kwakukumishaku kwaYaaka Ikombakaji. (Mas. 25:14; Rom. 8:20, 21) Nichayinu mpinji amutenaña Yehova Nleñi yawu nawu “Tata.” (Mat. 6:9) Antu akasañulawu niwena akadiza yuma yakeñañayi Yehova nindi eleña. Nkumininaku, ana akwovwahila nshimbi jindi niwena akekala muchisaka chindi. w21.08 5 ¶10-11

Kapostolu Pawulu amwinkeli mudimu wakushimwina nawa hadi yaaka yayivulu walemesheli nankashi iwu mudimu muchihandilu chindi. Washimwinineña “hamesu awantu nikwitala niitalaku.” (Yilw. 20:20) Washimwinineña mpinji yejima. Chakutalilahu, hampinji yadiñayi nakuhembelela amabwambu jindi muAtenisi, watachikili kushimwina nsañu yayiwahi kudi izanvu dawantu alema nawa amakwawu etejeli. (Yilw. 17:16, 17, 34) Nihampinji ‘yamukasiliwu mumaleñi’ wayishimwinineña antu adiñayi nawu. (Fwili. 1:13, 14; Yilw. 28:16-24) Pawulu wazatishileña chiwahi mpinji yindi. Wasendeleñaku antu amakwawu mumudimu windi wakushimwina. Chakutalilahu, halwendu lwindi lwatachi lwawumishonali wamusendeli Yowanu Maku nawa halwendu lwindi lwamuchiyedi wamusendeli Timotewu. (Yilw. 12:25; 16:1-4) Chakadi nikujina, Pawulu wazatili nañovu hakuyidizisha awa amayala chakuzata chiwahi nachipompelu, chakubiña nichakwikala antañishi amawahi.—1 Kor. 4:17. w22.03 27 ¶5-6

Antu amakwawu akuhwelela wanyi mudi Nleñi muloña ahoshaña nawu anateli kukuhwelela hohu yuma yamonañawu. Hela chochu, akuhwelela muyuma yabulaña kumonawu, chakutalilahu, ñovu yakokaña, muloña akweti wunsahu wunakumwekesha nawu iyi yuma yalala. Chikuhwelelu chashimunawu muBayibolu mwabombela yuma “yalala hela chakwila hitwayimonaku.” (Heb. 11:1) Chakeñekaña mpinji niñovu yakushinshika wunsahu etu aweni, nawa antu amavulu akeñaña wanyi kuzata nañovu kulonda awani wunsahu. Muntu wabulaña kudiza kulonda yawani wunsahu yomweni nateli kukunkulula nindi kwekala Nzambi wanyi. Hanyima yakudiza wunsahu, asayantisiti amakwawu anakuhweleli nawu Nzambi diyi waleñeli mawulu nimaseki. Antu amakwawu anateli kutoñojoka nawu kwekala Nleñi wanyi muloña kumashikola amaneni kwayiliwu hiyayitañishilihu hayileñaleñaku. Hela chochu, ichi anamwiluki Yehova nawa anamukeñi. Mwamweni, wejima wetu twatela kukolesha chikuhwelelu chetu mudi Nzambi, hela chakwila twataña hela hitwatañaku. w21.08 14 ¶1; 15-16 ¶6-7

Yesu wazatishili chishimu chamwana wajimbeli kulonda yatukwashi kwiluka Yehova chatiyilañayi antu luwi. Iwu mwana wafumini hetala nawa ‘wakisañeni yuma yindi yejima muloña washakamineña chihandilu chakubajama.’ (Luka 15:13) Chimwahitili mpinji, wabalumukili, wadizozeli nawa wafuntili hetala. Tata yindi welili ñahi? Yesu wahosheli nindi: “Henohu [mwana] wuchidi hahalehi, tata yindi wamumweni nawa wamutiyilili wushona, hohenohu watemukili nakumukumbata nikumufufwa.” Tata yindi hamutiyishili mwanindi nsonyiku. Ilaña wamwanakeneni mwanindi nawa wamutambwilili muchisaka. Iwu mwana wajimbeli wavulumwini chikupu, ilaña muloña wakwila wabalumukili mumuchima tata yindi wamwanakeneni. Tata yawantu wukweti luwi munichi chakutalilahu nakwimenaku Yehova. Munjila yoyimu, Yesu wamwekesheli nindi Tata yindi wanakenaña akwanshidi neyi abalumuka chikupu.—Luka 15:17-24. w21.10 8 ¶4; 9 ¶6

Makonu, anlomboli ansakililu anazati nañovu kulonda asweki ijina daNzambi. Adifumisha mumaBayibolu awu abalumunawu nawa adikaanishaña kudizatisha mumachechi awu. Kwosi muntu wukukaana nindi aYinsahu jaYehova hohu diwu alemesha ijina daNzambi nawa adizatishaña. Tunakutandisha ijina daNzambi kulonda antu ejima adiluki, kubadika nsakililu jejima. Tunakuzata nañovu kulonda twikali neyi mwatalisha ijina detu, netu tudi aYinsahu jaYehova. (Isa. 43:10-12) Tunedishi maBayibolu akubadika ha 240 miliyoni aNew World Translation of the Holy Scriptures mwazatishawu ijina daYehova hamaluña hidekala nawa hadifumishiliwu kudi akwakubalumuna Bayibolu. Nawa tunakwidisha nyikanda yashindamena haBayibolu yazatishaña ijina daYehova mumadimi akubadika ha 1,000. w21.10 20-21 ¶9-10

Twadifukulaña kudi Yehova neyi tukwasha akwetu akaKristu anakankili. Yehova wayishikili aIsarela nindi wukuyikiswilaña neyi akwasha atuzweñi. (Kuhit. 15:10) Mpinji yejima yitwakwashaña mukwetu mukakudifukula wunakankili, Yehova wamonaña nindi tunakumwinka yena chawaana. (Yish. 19:17) Chakutalilahu, chelili akaKristu amuAFwilipi amutemesheli Pawulu yawaana hampinji yamukasiliwu, wateneni yawaana yamwinkeliwu nindi “mulambu wetejewa, watiyañayi Nzambi kuwaha.” (Fwili. 4:18) Shinshikenu muchipompelu chenu nawa dihulenu nenu, ‘Kudihu muntu inatela kukwasha?’ Yehova wazañalalaña neyi amona tunakuzatisha mpinji yetu, ñovu yetu yuma yitweluka niyuma yakumujimba hakwila tukwashi antu anakankili. Wamonaña chumichi nindi hikudifukula. (Yak. 1:27) Kudifukula kwalala kwakeñekaña mpinji. Ilaña hichisenda wanyi. (1 Yow. 5:3) Muloñadi? Muloña wakumukeña Yehova niamanakwetu niahela. w22.03 24 ¶14-15

Henohu kanda tuyimwekesheli amanakwetu nawahela wushona, twatela kwiluka kukala kunakumonawu. Chakutalilahu, muhela nateli kwikala wakata chikupu. Wahoshaña wanyi hakukala kukwetiyi, ilaña wukutiya kuwaha neyi muntu yamukwasha. Komana kwila tumutelekelaku yakuda hela kumukwashaku kuwahisha mwitala nehi? Manakwetu niyena mudimu wunateli kumana. Twatela kumwinkahu kadali chakadi kumuleja netu iyetu tunakwinki, sampu nawani mudimu wukwawu? Hitwatela kuhembelelaña amanakwetu niahela atuleji nawu tuyikwashi mwaaka dinu tuyimwekesheleña wushonaku. Kufwana Yehova, twatela kuyikwashaña henohu kanda atulombi. Watuntwishaña itena chakadi etu kumulomba! Nawa mwana wakwashaña antu ejima, bayi neyi amusakililaña hohuku. Komana mukwiteja wanyi nenu chatwinkañayi Yehova yuma yejima yitwakeñaña, watumwekeshelaña kukeña? Twamukeña nankashi Yehova muloña wekala naluwi nawa wahanaña! w21.09 22-23 ¶12-13

Kukeña kwaNzambi kwakashinshi kwamuleteshaña yatwanakeneña. Neyi Yehova yamona nindi mukwanshidi nabalumuki nawa naleki yuma yatama yelileñayi, kukeña Kwindi kwakashinshi kwamuleteshaña kumwanakena. Ñimbi yamasamu Davidi wahosheli hadi Yehova nindi: “Hanatwili mwesekena nshidi jetuku, hela kutwinka muloña wesekana nakuluwa kwetuku.” (Mas. 103:8-11) Davidi welukili chitwadinkaña nyiloña nichitwaneñaña neyi chinleji chinakutukabisha. Ilaña welukili cheñi nindi Yehova “wanakenaña.” Chumanyi chamuleteshaña Yehova kwanakena? Ñakwilu yidi munsona yetu yalelu. Eña, neyi chochahosheliyi Davidi mukulomba kwindi, Yehova wanakenaña muloña wayitiyilaña luwi antu amulombaña nawu yayanakeni. Dichi neyi tunavulumuni, chidi hohu chiwahi kutiya kutama hayuma yituneli. Chinateli kutukwasha kuhimpa nikulomba kwanakena. w21.11 5 ¶11-12

Yehova wakeña ijina dindi nawa nakukeña muntu wejima yadilemesheña. (Isa. 42:8) Ilaña hadi yaaka 6000 yinahitihu, ijina dindi anadisawuli. (Mas. 74:10, 18, 23) Chumichi chatachikili helili Diyabolu (ijina daya mukwila nawu “Mukwakudimbulula”) yamutwambili Nzambi nindi wakeñeleña wanyi Adama naEva adiluñisheña yuma yayiwahi. (Kutach. 3:1-5) Kufuma tuhu yina mpinji, Yehova amutwambilaña nawu wayuminaña antu yuma yakeñañawu. Yesu wakameneneña hakasawuntu kaleteleñawu hejina daTata yindi. Yehova wudi nawuswa wakuyuula mawulu nimaseki nawa wayuulaña chiwahi. (Chim. 4:11) Ilaña Diyabolu nadimbi añelu niantu kulonda atoñojokeña nawu Nzambi hakweti wuswa wakuyuulaku. Katataka iyi nsañu ayimanishi. Yehova akamulemesha chikelukawu nawu Wanta windi hohu diwu wunateli kuleta kuwunda nikukiñewa hamaseki. w21.07 9 ¶5-6

Iyala wejima wafwilaña kukeñela chisaka chindi yakuda, yakuvwala nihakukaama. Komana chinakuyikalila kuwana mali akuhanda nachu? Neyi dimu, ichi chuma chapela wanyi. Hela chochu, munateli kuzatisha iyi mpinji kukoleshelamu chikuhwelelu chenu. Mulombenu Yehova, tañenu mazu aYesu ekala haMatewu 6:25-34 nawa toñojokenuhu. Toñojokenu hayakutalilahu yamakonu yamwekeshaña nawu Yehova wakwashaña antu asha muchima hakumukalakela. (1 Kor. 15:58) Chimwela mwenimu, mukusweja kumukuhwelela Tata yenu wamwiwulu nenu wukuyikwashaña neyi chinakwashiyi antu amakwawu adiña nakukala neyi kumunakumona. Neluki yuma yimunakukeña nawa neluki chinateli kuyikwashayi. Neyi mumona Yehova chinakuyikwashayi muchihandilu chenu, chikuhwelelu chenu chikukolelaku kulonda mwakatweshi kuumika kukala kwasweja kumukamona kumbidi. w21.11 20 ¶3; 21 ¶6

Chikuhwelelu chawakwaKristu amavulu chakola nankashi hamuloña wantañishilu yefutu danyiloña. Anatwalekihu kushimwina hela chakwila anakumona ikañesha nawa anomiki kweseka kwashiyashana kushika tuhu nimuwushinakaji. Talenu chakutalilahu chakapostolu Yowanu. Washimwinini chalala chahosha hadi Kristu niifutu danyiloña, hadaha kubadika yaaka 60. Wadiña nayaaka kwakwihi na 100, ilaña nfulumendi yawaRoma yatoñojokeli nawu wadiña watama nawa amukasilili hachitutu chaPatamosa. Muloñanyi wakoñeliyi? “Kukoola mazu aNzambi, nikushimuna nsañu yaYesu.” (Chim. 1:9) Twatela kwimbujola chikuhwelelu chindi nikuumika kwindi! Yowanu wasonekeli chamukeñeliyi Yesu nichalemesheliyi ifutu danyiloña munyikanda yindi. Wahosha hefutu danyiloña niyuma yayiwahi yaleta ifutu danyiloña kubadika mapampa 100. (1 Yow. 2:2) Chinamwekani hatooka nawu Yowanu walemesheli ifutu danyiloña. w21.04 17 ¶9-10

Yehova wakeñeleña nindi antu jindi ayitiyileña antu adiña nawufwayi luwi. Chakutalilahu, Nzambi wayilejeli aIsarela nindi kushiña muntu wajika matu nehi. Mukumushiña mwabombeleli kumutiyisha woma hela kumuhosha chatama. Chatama nankashi kushiña muntu wajika matu! Hatiyileña chamuhosheleñawuku nawa hakutwesha kudihakwilaku yomweniku. Kubombelahu, muALevi 19:14 Nzambi wayilejeli ambuñindi kubula “kumushila mputamesu chuma chakumudimbwisha mwakuyayi.” Mukanda wumu wahosha hadi antu akweti wufwayi nawu: “Kunyima kwakwihi namusela antu akweti wufwayi ayikabishileña nikuyila chatama.” Hadaha muntu watama wamushilileña mputamesu chuma kumbidi yindi kulonda yahukaniku nawa amusehi. Owu maana kutama! Munilu lushimbi Yehova wayikwashili antu jindi kwiluka nawu atela kuyitiyilaña ayifwayi wushona. w21.12 8-9 ¶3-4

Yakoba wakameneña nindi hadaha manakwindi wuchidi wamuhembela nkunyi. Walombeli kudi Yehova nakumulejamu iyi nsañu. Kuhiñahu wamutemesheleli Esawu yawaana. (Kutach. 32:9-15) Nkumininaku, chadibulakeniwu mesu namesu, Yakoba wadizozeli kudi Esawu. Yakoba wamubandaminini Esawu mapampa 7. Yakoba wadizozeli nawa wamwekesheli kalemesha nawa ichi chuma chamukwashili kuleta kuwunda namanakwindi. (Kutach. 33:3, 4) Twadizilañaku kuchuma cheliliyi Yakoba hadiloñesheliyi kuya nakudibulakana namanakwindi nicheliliyi hampinji yadibulakeniyi naEsawu. Yakoba wamulombeli Yehova kulonda yamukwashi. Kuhiñahu, welili kwesekeja namwalombeliyi. Wazatili nañovu kulonda yaleti kuwunda namanakwindi. Chadibulakeniwu, Yakoba hatachikili kubobola naEsawu kulonda amoni waluwañesheli niwabulili kuluwañeshaku. Ilaña Yakoba wafwilileña kuleta kuwunda namanakwindi. Komana kwila mumwimbujola nehi?—Mat. 5:23, 24. w21.12 25 ¶11-12

Neyi mutoñojoka hakufwa kwaYesu kwakubuta hanshidi yenu, munateli kuhosha nenu, ‘Ami hinatelela ichi chawana chalemaku.’ Munateli kutoñojokeladi muniyi njila? Muchima wetu wabula kuwanina wunateli kutudimba nakutoñojoka netu twalema wanyi hela atukeña wanyi. (1 Yow. 3:19) Neyi tutachika kutoñojoka muniyi njila, twatela kwanukaña netu “Nzambi wabadika nyichima yetu.” Twatela kwiluka chikupu netu Tata yetu wamwiwulu watukeña nankashi nawa nakukeña kutwanakena. Twatela kwiluka chikupu chatumonañayi Yehova. Hakwila twili mwenimu, twatela kutañaña Izu dindi mpinji yejima, kumulomba mpinji yejima nikudikundaña nawantu amukalakelaña. Kwila yumiyi kwalemenadi? Mukwiluka nenu Yehova wukweti yilwilu yayiwahi yayivulu. Mukwiluka nenu wayikeña nankashi. Neyi mutoñojokaña chikupu Hezu daNzambi ifuku niifuku, chikuyikwashaña kutoñojoka chiwahi, “kwolola nachu” yitoñojoka yenu nimuchima wenu.—2 Tim. 3:16. w21.04 23-24 ¶12-13

Kudi yuma yayivulu yakeñekaña kwila, hakwila twikali nachikuhwelelu chakola. Twatela kutoñojokaña chikupu hayuma yitunakudiza. Talenu chuma chamumwekeneni nsoneki yaMasamu 77. Waneñeli muloña watoñojokeleña nindi yena niakwawu aIsarela ajimbesheli wubwambu wawu naYehova. Muloña waniyi yitoñojoka, hakamineñaku. (Mavasi 2-8) Chumanyi cheliliyi? Wamulejeli Yehova nindi: “Nukutoñojoka chachiwahi nimwaya mudimu weyi wejima nukushinshika mumuchima wami, muwelaña eyi.” (Vasi 12) Hela chochu, welukili yuma yayililiyi Yehova antu jindi kunyima ilaña wadiña nakwakama, nindi: “Nzambi navulameni dehi kwanakena, tahindi? Chanazuwiyi najiki dehi wushona windi, tahindi?” (Vasi 9) Ñimbi yamasamu watoñojokeli hanyidimu yaYehova nawa nindi Nzambi wayitiyilili luwi niwushona kunyima. (Vasi 11) Chumanyi chafuminimu? Ñimbi yamasamu wakuhweleleli chikupu nindi Yehova hakushiya antu jindiku. (Vasi 15) w22.01 30-31 ¶17-18

Yehova watiyaña ñahi nawamayala niambanda ashinshika afwa dehi? Wafwilaña kuyimona cheñi! (Yoba 14:15) Yehova wafwilaña kumona cheñi ibwambu dindi Abarahama. (Yak. 2:23) Hela Mosi, muntu wahosheliyi nindi mesu-namesu. (Kwid. 33:11) Nawa watalilaña mpinji yakatiyililayi kutumina twakumushimeka twembileñayi Davidi niañimbi amasamu amakwawu! (Mas. 104:33) Hela chakwila amabwambu jaNzambi afwa dehi, Yehova wayijimbala wanyi. (Isa. 49:15) Wayanukaña chikupu. Ifuku dimu wakayisañula, nawa wakatiyilila cheñi kukulomba kwawu kwakufuma hamuchima nawa waketeja nikudifukula kwawu. Neyi munafwishi ntaña yenu imwakeña, awa mazu ayiwundisheña nikuyikundeja. Kudikaña chikwatachikili mwitempa daEdeni, Yehova welukili nindi yuma yikaswejelaku kutama henohu kanda yiwahi. Yehova wahela kutama, wuñaji waheña nimadombu adi mukaayi makonu. w21.07 10 ¶11; 12 ¶12

Neyi tumwekeshaña kukeña kwamuchidiwu, tunakumwekesha kusakilila hefutu danyiloña. Muloñadi? Muloña Yesu wahanini wumi windi kukoola etu niamanakwetu niahela. Neyi Yesu wayifwilili wena, dikwila nawu alema kudi yena. (1 Yow. 3:16-18) Twamwekeshaña netu twayikeña amanakwetu niahela kwesekeja nachitwayilaña. (Efwe. 4:29, 31–5:2) Chakutalilahu, twayikwashaña neyi anakati, hela neyi anakumona kukala kwasweja kushilahu niwubanji wadimwekenaña. Hanu tunateli kwila ñahi neyi mukwetu mukwakwitiya yatuneñesha namazu hela chuma chineliyi? Komana mwakeña kuyihembela akwenu akwakwitiya nkunyi? (Lev. 19:18) Neyi dimu, londelenu iku kufumba: “Ditiyililenuña wumu namukwawu nikudanakena wumu namukwawu chakufuma kumuchima hela chakwila kudi muntu wudi namuloña namukwawu. Neyi chayanakeneniyi Yehova chakufuma kumuchima, ninenu nawa mwatela kwila mwomumu.” (Kol. 3:13) Mpinji yejima yitwayanakenaña amanakwetu niahela, twamwekeshaña kudi Tata yetu wamwiwulu netu twasakililaña ifutu danyiloña. w21.04 18 ¶12-13

Tunateli kumuzatila Yehova nañovu nawa tunateli kukwasha antu amavulu kupapatishewa. Ilaña tweluka netu Yehova diyi watukwashaña kwila yuma yejima yitwelaña. Kuchakutalilahu chaApolosi nikapostolu Pawulu twadizilañaku cheñi netu, neyi tukweti cheñi nyidimu yayivulu muchipompelu, tunateli kuzata nañovu kulonda tuleteña kuwunda muchipompelu. Twatiyaña kuwaha neyi amayala atondewa aletaña kuwunda nikunuñañana kuhitila mukuzatisha Izu daNzambi neyi anakufumbana, bayi kushindamena hadi awenawuku, ilaña kulondela chakutalilahu chaKristu Yesu. (1 Kor. 4:6, 7) Wejima wetu tukweti yawaana niwuswa watwinkawu kudi Nzambi. Tunateli kutoñojoka netu mudimu wutwazataña walema wanyi. Ilaña twatela kwanukaña netu nyidimu yejima yitwazataña yakwashaña chipompelu kwikala chanuñañana. Dichi tutwalekihu kuzata nañovu kulonda tubuleña kudimona netu twayibadika akwetu. Nawa tuzateña nañovu kulonda tuleteña kuwunda nikunuñañana muchipompelu.—Efwe. 4:3. w21.07 19 ¶18-19

Mwatela kukuhwelela chikupu nenu mwakayimona cheñi antu imwakeña afwa dehi. Madilu awulumwiniyi Yesu kulonda yakundeji amabwambu jindi aneñeli, hichinjikijilu chamwekeshaña nawu wafwilaña chikupu kusañula antu! (Yow. 11:35) Munateli kukwasha antu ananeñi. Yesu hakuminini hohu dakudilila hamu naMata niMariyaku, ilaña wayitiyilili nikuyikolesha. (Yow. 11:25-27) Tunateli kwila chuma chochimu kudi antu ananeñi. Dan, mukulumpi washakamaña Australia, wahosheli: “Chafwili ñodami, nakeñeleña muntu wakunkwasha. Amanakwetu amavulu niañodijawu enjileña mpinji yejima nakuntiyilila. Awundili nakutiyilila chinalumbulwileña nawa hiyatiyili nsonyi nanochu chinadilileñaku. Ankwashili cheñi muyuma yidi neyi kukosa motoka yami, kunlandilaku yuma nikuntelekelaku yakuda neyi chakwila nakañanyi kuzata iyi nyidimu. Kakavulu alombeleña hamu nanami. Amwekesheli nawu hiyamabwambu alala ‘amanakwamuntu avwalikila mumpinji yakala.’”—Yish. 17:17. w22.01 16 ¶8-9

Yehova wakeñaña yuma yinateli kutukwasha. (Yish. 4:20-22) Neyi yatufumba kuzatisha Izu dindi, nyikanda yashindamena haBayibolu hela mukwetu mukaKristu wapama kuspiritu dikwila nawu nakutumwekeshela kukeña. (Heb. 12:9, 10) Shenu muchima hakufumba bayi hanjila munayifumbiliwuku. Mpinji yikwawu tunateli kutoñojoka netu hakuhanini munjila yayiwahi wanyi. Hela chochu, muntu wejima wunakufumbana watela kufumbana chiwahi kulonda muntu wunakufumbayi yeteji. (Ñal. 6:1) Ilaña neyi yetu anakufumbawu twatela kusha muchima kuyuma yitunateli kudizilaku kukufumba. Hela chakwila tunakutoñojoka netu adi kunfumba munjila yayiwahi. Twatela kudihula netu: ‘Hela chakwila nakeñi wanyi munjila mwanfumbilayi kudihu chuma chinatela kudizilaku? Kwila nidiwula yiluwa yamuntu wanfumba nehi nikusha muchima kuyuma yahoshayi nehi?’ Chikuwaha kudi etu mukufumba kutunatambwili kunonamu yikuma yitunateli kuzatisha muwumi wetu. w22.02 12 ¶13-14

Yehova weluka nindi hakuhita mpinji yeneni nawa twatela kuzata nañovu hakwila tuleki yitoñojoka niyilwilu yatama. (Mas. 103:13, 14) Hela chochu, kuhitila Mwizu Dindi, spiritu yindi nikuloñesha kwindi, Yehova watwinkaña maana, ñovu nawa watukwashaña kulonda tuhimpi wuntu wetu. Zatishenu Bayibolu kulonda mudishinshiki chikupu nikwiluka chimwekala. Izu daNzambi dekala neyi chibanjilu; dinateli kuyikwasha kudishinshika chimwatoñojokaña, chimwahoshaña nichimwelaña yuma. (Yak. 1:22-25) Nawa Yehova wadiloñesha kuyikwasha mpinji yejima. Diyi hohu wunateli kuyikwasha muloña weluka yuma yidi mumuchima wenu. (Yish. 14:10; 15:11) Dichi lombenuña kudi yena nawa dizenuña Izu dindi mpinji yejima. Ilukenu chikupu nenu nshimbi jaYehova jajiwahi nankashi. Yuma yejima yatulejañayi Yehova nindi twileña yinateli kutukwasha. Antu alondelaña nshimbi jindi ayilemeshaña, akweti nkeñelu muchihandilu nawa akweti muzañalu walala.—Mas. 19:8-11. w22.03 4 ¶8-10

Twadifukulaña kudi Yehova neyi tunakutuña nikuwahisha maluña akudifukwila. Bayibolu yahosha nawu mudimu wakutuña tabanaka niyuma yadiñamu wadiña “mudimu wajila.” (Kwid. 36:1, 4) Nimakonu, Yehova wamonaña mudimu wakutuña Matala aWanta nimatala amakwawu akudifukwilamu nindi mudimu wajila. Amanakwetu niahela amakwawu ekalaña nampinji yakuzata iyi nyidimu. Kwila tuyisakilila hamudimu walema wazatañawu wakwashaña mudimu waWanta nehi? Hela chochu, azataña nimudimu wakushimwina. Amakwawu afwilaña nikuzataku wupayiniya. Akulumpi muchipompelu anateli kumwekesha nawu anakukwasha nyidimu yakutuña kuhitila mukubula kushintajala kuhameka awa amanakwetu niahela adikita kwikala apayiniya neyi anashikihu. Hela chakwila tweluka mudimu wakutuña hela nehi, wejima wetu tunateli kuzataku mudimu wakuwahisha nikuhemba chiwahi awa matala. w22.03 22 ¶11-12