April

Yesu niyena watumwekesheleli kukeña kwabadika kuhitila mukuhana wumi windi kukola etu. (Yow. 15:13) Hitukutwesha kumufweta Yehova niYesu hakukeña kwatumwekeshelawuku. Ilaña tunateli kumwekesha kusakilila kwesekeja nanochu chitwahandaña ifuku niifuku. (Kol. 3:15) Awayishewa alemesha nankashi ifutu danyiloña, muloña dayikwasha kwikala nakuchiñeja kwamwiwulu. (Mat. 20:28) Yehova wayitena kuloña nawa wayiteja kwikala anyanindi muloña akuhwelela mumulambu waKristu. (Rom. 5:1; 8:15-17, 23) Anyikoku amakwawu niwena alemesha ifutu danyiloña. Chineli akuhwelela mumashi aKristu apwekesheliyi, akweti ñimenu yayiwahi kudi Yehova, chakwila amukalakelaña mudimu wajila nawa akweti kuchiñeja “kwakufuma mulukadi lwasweja.” (Chim. 7:13-15) Mazanvu ejima ayedi amwekeshaña kusakilila hefutu danyiloña kuhitila mukwikalaku haChanukishu chaaka nichaaka. w22.01 23 ¶14-15

Yesu waneñeli hanyiloña yamutwikiliwu yaletesheli amujahi. Amutwambilili nawu himukwakasawuntu, muntu wabulaña kumulemesha Nzambi hela ijina daNzambi. (Mat. 26:64-66) Nyiloña yamwinkeliwu antu nawu wamulemeshaña wanyi Nzambi diyamukabishili muyitoñojoka nawa wakuhweleleli nindi Tata yindi hakwiteja kumusawulu muniyi njilaku. (Mat. 26:38, 39, 42) Yesu ateleleli kumujahila hamutondu kulonda yayisubuli aYudeya kwishiñu. (Ñal. 3:10) Etejeli nawu akwovwahilaña Nshimbi jaNzambi, ilaña alekeli kujovwahila. Chafuminimu, abombelelihu ishiñu dikwawu heshiñu daswaniniwu kunshidi yaAdama. (Rom. 5:12) Nshimbi yaNzambi yashimwini nawu muntu neyi nakoñi nshidi yatela kufwilahu atela kumujaha. Kuhiñahu, mujimba windi wafwa atela kuwukudika hamutondu. (Kuhit. 21:22, 23; 27:26) Dichi chamukudikiliwu hamutondu, Yesu wayikuulili aYudeya kunidi ishiñu. w21.04 16 ¶5-6

Toñojokenu yuma yamumwekeneni Yesu hefuku dakukumishaku nakufwa. Amashidika awaRoma anamweti nankashi. (Mat. 26:52-54; Yow. 18:3; 19:1) Anakumuvupola natubama tunakumushila yilonda hamujimba. Kuhiñahu, anamusendeshi mutondu walema hanyima. Yesu natachiki kumukulula nakumutwala kwiluña dakuyandishila. Ilaña mukapinji kantesha hohu amashidika awaRoma anenki muntu wacheñi kumusendelaku iwu mutondu. (Mat. 27:32) Yesu chinashikiyi kwiluña kukumujahilawu, amashidika anamupopeli hamutondu kumakasa nikunyendu. Dichi chineli mujimba waYesu walema nyisumali yinakutabula yilonda. Amabwambu jindi ananeñi nawa mama yindi nakudila, ilaña anyuli awaYudeya anakumuseha nikumusupisha Yesu. (Luka 23:32-38; Yow. 19:25) Yesu nakabakani hadi maora amavulu. Dichi chinakumukalila kwona chiwahi muloña muchima wunazati nankashi. Hakona kakukumishaku, nalombi kudi Yehova kakukumishaku. Nawa nkumininaku nanoñami nawa wumi windi wunakumi. (Maku 15:37; Luka 23:46; Yow. 10:18; 19:30) Mwamweni wafwili kufwa kwayeña nawa amusawishili. w21.04 16 ¶4

Yesu wayilejeli apostolu indi 11 ashinshika yitiyañenu yiyedi, chitiyañenu chachiha nichitiyañenu chaWanta. (Luka 22:20, 28-30) Iyi yitiyañenu yayenzunwina awa apostolu niantu amakwawu antesha kwikala anyanta niatupristu mwiwulu. (Chim. 5:10; 14:1) Chiña hohu awayishewa ashalahu, ekala muniyi yitiyañenu yiyedi diwu atela kuda kudinkendi nikunwa vinyu haChanukishu. Yehova wayinka kuchiñeja kwakuwahi kwakwikala nawumi wabulaña kufwa nimujimba wabulaña kufwa mwiwulu. Akazatila hamu naYesu Kristu alemeshawu nia 144,000, nawa chuma chasweja kulema, akamumonaña Yehova Nzambi. (1 Kor. 15:51-53; 1 Yow. 3:2) Awa awayishewa eluka nawu atela kutwalekahu kwikala ashinshika sampu nikukufwa.—2 Tim. 4:7, 8. w22.01 21 ¶4-5

Atupondu ayedi ayipopeleli kwakwihi naYesu wumu iku wumu iku. (Luka 23:40, 41) Wumu washetumukilili kudi Yesu Wamulejeli nindi: “Wakañanukaña neyi wuneñili dehi muWanta weyi.” (Luka 23:42) Chineli Yesu welukili nindi Tata yindi wukweti wushona, wahosheli mazu amuletesheli iwu kapondu kwikala nakuchiñeja. (Mas. 103:8; Heb. 1:3) Yehova nakufwila kutwanakena nikututiyila luwi neyi tuleka yuma yatama yitwelileña nawa tukuhwelela netu wukutwanakena nshidi jetu kuhitila mumashi apwekesheliyi Yesu Kristu. (1 Yow. 1:7) Amakwawu anateli kujinoka nawu Yehova hanateli kuyanakenaku. Neyi dichimwatoñojokaña mpinji yikwawu, toñojokenu hachumichi: Henohu Yesu kanda yafwi, wamutiyilili ona kapondu luwi watachikili kumukuhwelela. Dikwila nawu Yehova watiyilaña luwi akwakudifukula indi ashinshika!—Mas. 51:1; 1 Yow. 2:1, 2. w21.04 9 ¶5-6

Chatwalekelihu kwikala washinshika nikukufwa kwindi, Yesu wazatili yuma yayivulu. Chatachi, wamumwekesheli nindi Satana hisakutwamba. Yesu wamwekesheli nindi muntu wawanina nateli kutwalekahu kwikala washinshika hela chakwila Satana wukwila yuma yamuchidinyi. Chamuchiyedi, Yesu wahanini wumi windi kwikala ifutu danyiloña. Chahaniniyi wumi windi chaletesheli antu abula kuwanina kwikala nawubwambu wawuwahi naNzambi nikwikala nakuchiñeja kwakwikala nawumi wahaya nyaaka. Chamuchisatu, Yesu wamwekesheli nindi Yehova hohu diyi nyuli waloña nawa wahakwililiku ijina daTata yindi kukasawuntu. Dichi tumoneña ifuku-niifuku netu didu ifuku dakwikala ashinshika. Dichi, hela chakwila tukufwa tukutwesha kuhosha netu, “Yehova, nazati nañovu hakuhemba kashinshi kami, namwekeshi nami Satana hisakutwamba nawa najiliki ijina deyi nikuhakwilaku chiyuulu cheyi.” w21.04 12 ¶13-14

Hanyima yakumutwambila nikumwinka muloña wachuma chinabuli kukoñayi, Yesu anakumusupisha, kumukabisha nawa nkumininaku anamupopeli hamutondu wakuyandishila. Nyisumali yinamuhanuki kumakasa nikunyendu yindi. Mpinji yejima yinakwilayi nindi yooni nikuhosha chinakumukata. Ilaña watela kuhosha muloña wukweti nsañu yalema yatela kuhoshayi. Yumanyi yalema yitunateli kudizila kumazu akukumishaku ahosheliyi Yesu? Tunadiziliku netu twatela kwanakenaña akwetu nikukuhwelela netu Yehova nateli kutwanakena. Tukweti amanakwetu niahela amavulu muchipompelu atukwashaña, ilaña neyi tunakukeña atukwashi twatela kuyilejamu. Tuneluki netu Yehova wukutukwashaña kuumika kukala kudi kwejima. Nawa tumoneña ifuku-niifuku netu didu ifuku dakwikala ashinshika, nikukuhwelela netu Yehova wakatusañula neyi tufwa. w21.04 8 ¶1; 13 ¶17

Neyi tulondelaña muntampu jaYesu chikupu twakashakama haya nyaaka. Chelili mukwenzi nyuli samaheta yehuli yuma yateleli kwilayi hakwila yakekali nawumi wahaya nyaaka, Yesu wamwakwili nindi: “[Inzaku] wiikali mukwakunlondela.” (Mat. 19:16-21) Yesu walejeli aYudeya amakwawu abulili kumukuhwelela nawu hiKristu nindi: “Anyikoku ami . . . anlondelaña. Nayinkaña wumi wahaya nyaaka.” (Yow. 10:24-29) Twamwekeshaña netu twamukuhwelela Yesu neyi tuzatishaña yuma yatulejeliyi nikwimbujola yuma yelileñayi. Neyi twilaña yumiyi, twakekala nawumi wahaya nyaaka. (Mat. 7:14) Henohu kanda tulondeli chikupu muntampu jaYesu, twatela kusambila kumwiluka. ‘Kumwiluka’ Yesu hichuma chitwatela kutwalekahu kwila. Twatela kutwalekahu kudiza yuma yayivulu yahosha hadi yena chidi neyi yilwilu yindi, yuma yatoñojokañayi ninshimbi jindi. Hela chakwila tunamukalakeli Yehova hadi yaaka yayivulu, twatela kutwalekahu ‘kumwiluka’ Yehova niMwanindi. w21.04 4 ¶9-10

Mpinji yikwawu kapostolu Pawulu waneñeleña neyi yanuka yuma yakoñeleñayi kunyima. Twahayamaña wanyi nachaditeneniyi yomweni nindi nidi “mukwanshidi chikupu.” (1 Tim. 1:15) Henohu kanda yadizi chalala, Pawulu wakabishileña nankashi akwaKristu mumusumba nimusumba, amakwawu kuyisha mutuleya nikufukejela amakwawu nindi ayijahi. (Yilw. 26:10, 11) Fwikijenu chatiyileñayi Pawulu neyi yabulakana mukwaKristu wakansi wukweti anvwali jindi ajahiliwu muloña walusesa lwahaniniyi. Pawulu waditoñesheleña nayiluwa yakoñeliyi, ilaña welukili nindi hakutwesha kuhimpa yuma yamwekeniku. Wakuhweleleli nindi Kristu wamufwilili nawa wasonekeli nindi: “Ilaña hamuloña waluwi lwaNzambi lwasweja, dilu lunanleñeli niikali ichi chinidi.” (1 Kor. 15:3, 10) Chumanyi chitunakudizilaku? Itejenu chikupu nenu Kristu wayifwilili enu nawa wayenzunwinini njila yakwikalilamu nawubwambu naYehova. (Yilw. 3:19) Chuma chalema kudi Nzambi hichuma chitunakwila yinu mpinji nichitwakela kumbidi, bayi yiluwa yitwakoñeli kunyimaku.—Isa. 1:18. w21.04 23 ¶11

Hela chakwila aYudeya amavulu amumafuku aYesu akuhweleleli wanyi nawu Mesiya wateleleli kufwa, talenu chiyaprofweteleñahu dehi muJinsona: “Nanochu chamwañiliyi wumi windi hakufwa nanochu chamubombeluwu hamu nawakwakuputola hela chochu hakusenda nshidi yawantu amavulu hakulembelela niakwakuputola.” (Isa. 53:12) Dichi aYudeya hiyateleli kuhukana nachamujahiliwu Yesu neyi mukwanshidiku. Makonu, tunateli kuhukana wanyi neyi chakwila twilukaña wunsahu waweni walala kutalisha hanoyu nsañu. Mumpanji yindi yahampidi, Yesu wayisoñamishili antiyilili jindi nindi antu amakwawu ‘akayitwambila yuma yatama yeñi-nayeñi.’ (Mat. 5:11) Iku kutwamba kwafumaña kudi Satana. Waluwañeshaña akwakudimbulula kutandisha nsañu yakutwamba hadi antu akeña chalala. (Chim. 12:9, 10) Twatela kukaana nsañu yejima yakutwamba yafumaña kudi akwakudimbulula. Bayi twiteja iyi nsañu yakutwamba yizeyeshi chikuhwelelu chetuku. w21.05 11 ¶14; 12 ¶16

Mukwashenu kadizi wenu yamukuhweleli Yehova. Yesu wayilejeli atumbanji twindi nindi Yehova wukuyikwashaña muloña wayikeña. (Mat. 10:19, 20, 29, 30) Mulejenu kadizi wenu nenu Yehova wukumukwashaña niyena. Munateli kuyikwasha kumushindamena Yehova neyi mulombelaña nawu hamu hayuma yinakufwila kwilawu. Franciszek, washakamaña kuPoland wahosheli nindi: “Ntañishi yami wateneneña yuma yinafwilileña kwila mukulomba kwindi. Chinamweni Yehova chakwiliyi kulomba kwantañishi yami, ninami natachikili kulomba. Yehova wakwili kulomba kwami chinalombeli kumudimu nami añiteji niyeña nakupompa nikukupompa kweneni.” Yehova wayakamenaña nankashi atudizi etu aBayibolu. Wamonaña chazatañawu nañovu akwaKristu hakwila akwashi antu kuswina kwakwihi nayena nawa wayikeña chikupu hamuloña wachumichi. (Isa. 52:7) Neyi chayinu mpinji munakulombola wanyi kadizi waBayibolu, munateli kukwasha atudizi kuhitila mukuya nawakwakushimwina amakwawu kudi atudizi awu. w21.06 7 ¶17-18

Tunateli kumwekesha netu twasakililaña hakwikala Nezu daNzambi neyi tuditañaña mpinji yejima. Twatela kwikala nandandanda yakutaña nikudiza Bayibolu chatela tutañeña hohu neyi tunakeñi. Neyi tutañaña nikudiza chakadi kukilokela, chikuhwelelu chetu chikukola nankashi. Kwambukaku “nawakwamaana niantu adiza” amukanu kaayi, etu chikuhwelelu chetu chashindamena Hezu daNzambi. (Mat. 11:25, 26) Muloña wakwila twadizaña Bayibolu, tuneluki yuma chiyinakutaminaku hanu hamaseki nichuma chakelayi Yehova. Dichi tutwalekihu kukolesha chikuhwelelu chetu nikukwasha antu amavulu kumukuhwelela Nleñi yetu. (1 Tim. 2:3, 4) Dichi tutwalekihu kutalila mpinji yakahoshawu antu ejima akekalaku amomi hanu hamaseki mazu ekala haChimwekeshu 4:11 nawu: “Yehova Nzambi yetu, watelela kutambwila kulema . . . muloña yeyi waleñeli yuma yejima.” w21.08 19 ¶18-20

Chineli hiyatubiña, akulumpi akweti mudimu wakufumbana neyi hanateleli. Atela kuzata nañovu kufumbana munjila yinateli kumusañumuna muntu ‘nikuzañalesha muchima.’ (Yish. 27:9) Akulumpi ayikeña nankashi amanakwawu niahela. Mpinji jikwawu amwekeshaña iku kukeña kwawu kuhitila mukufumba muntu wunakukeña kufuma munjila. (Ñal. 6:1) Henohu kanda ahoshi namuntu, hela chochu, mukulumpi watela kusambila kutoñojoka hayuma yahosheliyi Pawulu kutalisha hakukeña. “Kukeña kwadiwunjikaña. . . . Kwabutaña yuma yejima, kwakuhwelelaña yuma yejima, kwachiñejaña yuma yejima, kwomikaña yuma yejima.” (1 Kor. 13:4, 7) Neyi mukulumpi atoñojokahu hanawa mavasi amuBayibolu, chikumukwasha kufumbana munjila yakukeña. Neyi muntu anakufumbawu amona nindi mukulumpi wamukeña, niyena wukwiteja kufumba. w22.02 14 ¶3; 15 ¶5

Yehova waleñeli añelu niantu nanyijimba yawanina. Ilaña kañelu Satana (ijina daya mukwila nawu “Mukwakudikaña”) waletesheli antu awanina, Adama naEva kudikaña naYehova. Añelu amakwawu niantu niwena adikañili. (Yuda 6) Yehova waneñeli nankashi. Hela chochu, nomiki nawa natwalekihu kuumika sampu nimpinji yakayijilumunayi akwakudikaña ejima. Chumichi chikaletesha antu jindi ashinshika anakuumika hamu nayena munshakaminu yamakonu kwikala namuzañalu. Satana wamutwambilili Yoba, niambuña aYehova ashinshika ejima nindi adifukulaña kudi Yehova muloña wayuma yayinkayi. (Yoba 1:8-11; 2:3-5) Diyabolu natwalekihu kutwambila antu kushika niamakonu. (Chim. 12:10) Tunateli kumwekesha netu Satana wahoshaña mwakutwamba neyi tuumika kukala nawa tutwalekahu kwikala ashinshika kudi Yehova muloña wakumukeña. w21.07 9 ¶7-8

Kapostolu Pawulu wazatishili chakutalilahu kulonda atudizishi nindi chalema nankashi kuhimpa chihandilu chetu. Wasonekeli nindi twatela kupopela wuntu wetu wawukulu “hamutondu.” (Rom. 6:6) Munjila yikwawu, tunakukeña kulondela chakutalilahu chaYesu. Twatela kufumisha mudi etu yilwilu niyaaku yahelayi Yehova. Neyi tulondela iji njila tukwikala nachinleji chitooka nawa twakadiluñisha wumi haya nyaaka. (Yow. 17:3; 1 Pet. 3:21) Yehova hamba kahimpa nshimbi jindi kwesekeja nachitunakukeña etuku. Ilaña etu aweni twatela kuhimpa kulonda twovwahileña nshimbi jindi. (Isa. 1:17, 18; 55:9) Nihanyima yakwila munapapatishewi dehi, mwatela kutwalekahu kukaana kufwila kwatama. Lombenu kulonda Yehova ayikwashi nawa shindamenenu haspiritu yindi bayi hañovu jenuku. (Ñal. 5:22; Fwili. 4:6) Twatela kuzata nañovu chikupu neyi chakwila tunakukeña kuvuula wuntu wawukulu nikuwuleka chikupu. w22.03 6 ¶15-17

Yehova watukana nindi wukutwinkaña yakuda, yakuvwala nihakukama neyi tutwamijañaku Wanta nikwovwahila nshimbi jindi muchihandilu chetu. (Mat. 6:33) Neyi tutoñojokaña mwenimu, tukuleka kutoñojoka netu yuma yakumujimba yidi mukanu kaayi yikutukiña nawa yikutuletelaña muzañalu. Tweluka netu njila yimu yinateli kutukwasha kwikala nakuwunda kwamuyitoñojoka hikwila nkeñelu yaYehova. (Fwili. 4:6, 7) Hela chakwila tudi nawuswa wakulanda yuma yayivulu, twatela kumona neyi chakwila tukweti mpinji niñovu yakuzatisha nikuyihemba. Ntahindi tukusweja kukeña nankashi maheta itukweti? Dichi anukenuña nenu Nzambi nakukeña twikali antu amuchisaka chindi adikita. Chumichi chinatalishi mukwila nawu hitwatela kwiteja kulonda atuluwañeshiku. Hitwatela kwikala neyi iyala wumu wakaanini mutambi wakumukalakela Yehova nikwikala mwanindi hamuloña wakusweja kukeña maheta ahanu hamasekiku.—Maku 10:17-22. w21.08 6 ¶17

Chimukudizaña jiNsona, mukwiluka chekalayi Yehova niyilwilu yindi yayiwahi yamwekenaña muyileñaleña. Neyi twiluka yilwilu yaYehova chikutukwasha kwiluka chikupu netu Yehova wekala kwoku. (Kwid. 34:6, 7; Mas. 145:8, 9) Chimukumwilukaña Yehova chikupu, chikuhwelelu chenu chikukola, mukusweja kumukeña nawa wubwambu wenu nayena wukusweja kukolelaku chikupu. Lejenuña antu yuma yimweluka hadi Nzambi. Mukwila ñahi neyi muntu imunakushimwina nakujinoka nindi Nzambi wekalaku wanyi nawa muneluki wanyi chakumwakula? Keñakeñenu ñakwilu yamuNsona munyikanda yetu nawa hanjekenu nindi. Munateli cheñi kumwila mukwenu mukwaKristu wapama kulonda yayikwashi. Hela chakwila owu muntu wukwiteja chinakuli Bayibolu hela nehi, nsañu yimunasandujoli yikuyikwasha. Chikuhwelelu chenu chikukolelaku. w21.08 18 ¶14-15

Hitwatela kuleka yuma yejima yitwakeña kulonda tumuzañalesheña Yehovaku. (Mukwa. 5:19, 20) Hela chochu, neyi tufuukulahu kubula kumukalakela Yehova nankashi mumudimu windi muloña wakukaana kuleka yuma yikwawu yitwakeña tukwikala neyi ona iyala wamuchishimu chaYesu, wazatili nañovu nakwikala nayuma yayivulu ilaña yamudiwula Nzambi. (Luka 12:16-21) Neyi tunakumona kukala, twalombaña wukwashu nawa twatoñojokaña njila mutunateli kumanishila oku kukala. (Yish. 3:21) Yehova watukiswilaña munjila jajivulu. Twatela kumuhamekaña Yehova kulonda tumwekesheña netu twasakililaña nayuma yatwililañayi. (Heb. 13:15) Munabombeli kushimwina nankashi nawa Yehova wukutukiswila chikupu. Ifuku nifuku, tumoneña njila mutunateli ‘kumutompela Yehova nikutiya chawahayi.’ (Mas. 34:8) Kuhiñahu, tukwikala neyi Yesu, wahosheli nindi: “Yakuda yami yowu kwila nkeñelu yanowu wantemesheli nikumanisha mudimu windi.”—Yow. 4:34. w21.08 30-31 ¶16-19

Satana wakeñaña nindi tudivwimbeña. Weluka nindi neyi twikala adivwimba, tukwikala neyi yena nawa tukatambwila wumi wahaya nyaaka wanyi. Kapostolu Pawulu watusoñamishili nindi muntu nateli kwikala ‘wadinka wanta nakumusompesha neyi chamusompeshawu Diyabolu.’ (1 Tim. 3:6, 7) Chumichi chinateli kutumwekena wejima wetu, hela chakwila tudi amaha muchalala hela tunamukalakeli Yehova hadi yaaka yayivulu. Antu adivwimba adikeña aweni. Satana wakeñaña nindi tutoñojokeña hadi etu aweni chatela tutoñojokeña hadi Yehova, sweje-e neyi tunamoni kukala. Chakutalilahu, ayitwambilahu dehi? Indi kwiji ayilahu dehi chatama? Satana wakeñaña nindi tumwinkeña Yehova nyiloña hela anakwetu. Nawa Diyabolu wakeñaña mutoñojokeña nindi njila yimu hohu mumunateli kumanishila kukala, hikwila chimunakukeña chatela mulondeleña nshimbi jaYehova.—Mukwa. 7:16, 20. w21.06 15 ¶4-5

Yehova wamwinkeli kaprofwetu Hagayi mudimu walema watela kuzatayi. Hadaha Hagayi wadiña hakachi kawantu afuntili muYerusalema kufuma muwunkoli muBabiloni mu 537 B.C.E. Chashikiliwu hohu muYerusalema, awa akwakudifukula ashinshika alili chikuku chetala daYehova hela tembeli. (Ezera 3:8, 10) Ilaña hashimbwili wanyi kudi chuma chatama chamwekeni. Azeyeli nawa alekeli kuzata mudimu wazatileñawu muloña wekañesha. (Ezera 4:4; Hag. 1:1, 2) Mu 520 B.C.E., Yehova wamulejeli kaprofwetu Hagayi kulonda yayikwashi aYudeya ekali cheñi neyena nawa amanishi kutuña tembeli. (Ezera 6:14, 15) Nsañu yaHagayi yadiña yakuyikolesha aYudeya kulonda amukuhweleli Yehova. Mazu akwila nawu “Yehova wamazaza” ayikolesheli. Yehova wukweti añelu amavulu akwanjita alombolañayi, dichi aYudeya ateleleli kushindamena hadi yena hakwila amanishi kuzata. w21.09 15 ¶4-5

Makonu, aYinsahu jaYehova adikeña nawa anuñañana mukaayi kejima. Twambuka nansakililu yejima, muloña twekala neyi chisaka hela chakwila twafuma kumatuña nikuyisemwa yamboka-mboka. Twamonaña iku kukeña kwalala hakupompa kwahachipompelu, hakupompa kwanyanya nikweneni. Chumichi chatukwashaña kwiluka netu twadifukulaña kudi Yehova munjila yetejayi. (Yow. 13:34) Nsona jatulejaña nawu “dikeñenu chikupu wumu namukwawu.” (1 Pet. 4:8) Njila yimu yitwamwekeshelañamu iku kukeña hikudanakena wumu namukwawu nikuditiyilila. Twahanaña kudi antu ejima nikuyimwekeshela chisambu ejima amuchipompelu, kushilahu niantu atuneñeshaña. (Kol. 3:12-14) Neyi tumwekesha kukeña kwamuchidiwu, tunakumwekesha netu tudi akwaKristu alala. w21.10 22 ¶13-14

Komana kuhaña muntu muchipompelu hikumutiyila luwi? Eña. Amanakwetu niahela akoñeli nshidi nawa ayihaña muchipompelu ahosheli nawu akulumpi elili chiwahi hakuyihaña, nawa chayikwashili kuhimpa yilwilu yawu nakufunta cheñi kudi Yehova. (Heb. 12:5, 6) Talenu ichi chakutalilahu. Kabiña namoni nindi mukoku windi wumu nakati. Neluki nindi hakwila yamuuki chikatu chinakatiyi, watela kumufumisha hamukanka wawanyikoku nakumutwala kwakankawindi. Hela chochu, nyikoku yakeñaña nankashi kwikala hamu nawa yatiyaña kutama kuyambula hadi akwawu. Neyi kabiña yamufumishahu nawa yamutwala nakumuukila kwakankawindi, komana chinatalishi mukwila nawu kabiña watama? Inehi. Neluki nindi neyi yamulekela iwu mukoku wakata hamukanka wawanyikoku amakwawu, wukusambwisha akwawu. Neyi yamufumishahu, wukukiña mukanka wejima. w21.10 10 ¶9-10

Hikukooleka nankashi kwikala muchisaka chawamanakwetu niahela mukaayi kejima adikeña wumu namukwawu. Tunakukeña antu amavulu enzi nakudifukula kudi Nzambi yetu. Dichi, bayi twila chuma chidi chejima chikuletesha antu atoñojokeña yuma yatama hadi Yehova Nzambi niantu jindiku. Twatela kwikala nayilwilu yayiwahi yinateli kukokola antu kulonda adizi nsañu yayiwahi. Mpinji jikwawu, antu amakwawu anateli kutukabisha muloña wakwila twamwovwahilaña Tata yetu wamwiwulu. Indi neyi twatiyaña woma kulejaku antu yuma yitwakuhwelela? Twatela kukuhwelela netu Yehova niMwanindi akutukwashaña. Yesu walejeli atumbanji twindi nindi hiyatela kwakama nayuma yatela kuhoshawu hela chiyatela kuhoshawuku. Muloñadi? Yesu walumbulwili nindi: “Akayileja yuma yimwakahosha hanoyu mpinji; muloña hiyenu mwakahoshañaku, ilaña spiritu yaTata yenu diyi yakahoshelaña mudi enu.”—Mat. 10:19, 20. w21.09 24 ¶17-18

Mosi niyena wamwesekejeli Nzambi nachiswamu. (Mas. 90:1 nitumazu twaheshina) Henohu Mosi kanda yafwi, wabombelelihu cheñi mazu amakwawu amawahi. Wasonekeli nindi: “Nzambi wakunyaka dihu hawushakaminu weyi, makasa ahaya nyaka akuma kwishina.” (Kuhit. 33:27) Indi mazu akwila nawu “makasa ahaya nyaka akuma kwishina” anakuyilejadi kutalisha hadi Yehova? Neyi tukuhwelela netu Yehova wukutukiñaña, hitukwakamañaku. Ilaña mpinji yikwawu tunateli kuneña nikuleka kutoñojoka netu twakiñewa. Yehova wukutukwasha ñahi haniyi mpinji? (Mas. 136:23) Wukusha makasa indi kwishina detu, nakutunyamuna nikutukwasha kulonda tuleki kuneña. (Mas. 28:9; 94:18) Kwiluka netu Nzambi nateli kutukwasha, chatukwashaña kwanuka netu Nzambi nateli kutukwasha muniji njila jiyedi. Chatachi, hichikweti muloña nakutwashakamañaku, tuneluki netu Yehova wukutukiñaña mpinji yejima. Chamuchiyedi, Tata yetu wamwiwulu watwakamenaña chikupu. w21.11 6 ¶15-16

Yesu welukili nindi wuñaji waheña wukaletesha chikuhwelelu chawatumbanji twindi kwikala mukweseka. Hakwila yayikwashi kuumika, wayilejeli chakutalilahu chashimunawu hamukanda waLuka. Yesu washimwini nsañu yamumbanda nfwila watwalekelihu kudilila nsompeshi wabula kuloña nindi yamusompeli mwaloña. Welukili chikupu nindi neyi yatwalekahu kumudilila wukumukwasha. Nkumininaku, iwu nsompeshi wetejeli kumukwasha. Chumanyi chitunakudizilaku? Yehova waloña. Yesu wahosheli nindi: “Komana chalala Nzambi hakayiñisha namuloña antu jindi atondewa amudililaña mwaana [niwufukuku]?” (Luka 18:1-8) Yesu wabombelelihu cheñi nindi: “Neyi Mwana kamuntu nashiki, komana wakawana ichi chikuhwelelu hanu hamaseki?” Neyi anakutwila chatama, twatela kudiwunjika nikutatakena kulonda tumwekeshi netu tudi nachikuhwelelu chakola neyi chadiña nanona mumbanda. Neyi twikala nachikuhwelelu chamuchidiwu, tukukuhwelela chikupu netu katataka hela kumbidi Yehova wukatukwasha. Twatela cheñi kwiluka netu kulomba kukweti ñovu. w21.11 23 ¶12; 24 ¶14

Enu atwansi komana mpinji yikwawu mwatoñojokaña nenu nshimbi jaYehova jayikañeshaña kwila yuma yimwakeñaña kwila? Dichinakukeñayi Satana nindi mutoñojokeña. Nakukeña nindi mwileña yuma yelaña antu endaña munjila yabwambwañana, muloña amwekanaña neyi anakudiluñisha. Nateli kuzatisha yuma yelañawu akwenu akashikola hela yuma yimwamonaña haintaneti kulonda mutoñojokeña nenu munakushalahu yuma yayiwahi. Satana nakukeña nindi mutoñojokeña nenu nshimbi jaYehova jinakuyikañesha enu kudiluñisha yuma yayiwahi muchihandilu. Ilaña anukenuña nenu: Satana nakukeña antu anakwenda muniyi njila abuli kwiluka jikayimwekena kumbidi. (Mat. 7:13, 14) Ilaña Yehova nakukeña nindi mwiluki chihandilu chenu chichakekala neyi mutwalekahu kwenda munjila yaya kuwumi.—Mas. 37:29; Isa. 35:5, 6; 65:21-23. w21.12 23 ¶6-7

Tweluka netu twatela kwanakenaña; dichuma chachiwahi chitwatela kwila. Ilaña chinateli kutukalila kwanakena. Hadaha kapostolu Petulu niyena chamukalileña mpinji yikwawu. (Mat. 18:21, 22) Chumanyi chinateli kutukwasha? Chatachi, toñojokenuña chikupu hamapampa ayanakenañayi Yehova. (Mat. 18:32, 33) Hitwateleli kutwanakenaku, ilaña watwanakena chikupu. (Mas. 103:8-10) “Ninetu twatela kudikeña wumu namukwawu.” Kwanakena bayi neyi hichuma chitwatela kufuukula kwila hela nehiku. Twatela kwanakenaña amanakwetu niahela. (1 Yow. 4:11) Chamuchiyedi, toñojokenuña chikupu hachuma chamwekanaña neyi mwanakena akwenu. Tunateli kukwasha muntu wunatuneñeshi, kunuñañesha chipompelu, kukiña wubwambu wetu naYehova nikufumisha chiteli chalema hamafwiji etu. (2 Kor. 2:7; Kol. 3:14) Nkumininaku, mulombenu Muntu watulejaña nindi twanakeneña akwetu. Bayi mumwitejaña Satana yaluwañeshi kuwunda kumukweti nawamanakwenu niahelaku. (Efwe. 4:26, 27) Twatela kwiteja Yehova yatukwashi neyi tunakukeña tutondolweli kufwa mumuhetu waSatana. w21.06 22 ¶11; 23 ¶14

Davidi watemukileña muloña akeñeleña kumujaha. Sawulu, mwanta wañovu wawaIsarela, wakeñeleña kumujaha. Davidi hakeñeleñayi yakuda wemeni mumusumba waNobi, nakulomba mankedi atanu. (1 Sam. 21:1, 3) Chimwahitili mpinji, Davidi niantu jindi ayili nakubatama mwiyeñu. (1 Sam. 22:1) Davidi wadiwanini ñahi muniku kukala? Sawulu wamutiyilili chikupu Davidi ichima, muloña Davidi amukeñeli nankashi kudi antu amavulu nawa amuhamekeleña muloña washindili njita jajivulu. Sawulu welukili cheñi nindi kubula kwovwahila kwindi dikwaletesheli amukaani kudi Yehova kubula kwikala mwanta wawaIsarela nawa nindi Yehova wamutondeli Davidi kulonda yakaswani hetanda dindi. (1 Sam. 23:16, 17) Chineli Sawulu wachidiña mwanta wawaIsarela, wadiña nawamashidika amavulu niantu amavulu amuhakwilileñaku, dichi Davidi watemukili kuchina kumujaha. Komana mwamweni Sawulu wadi kumukañesha Nzambi kumusha Davidi hetanda daWanta? (Isa. 55:11) Bayibolu hiyashimunaku, ilaña chuma chitwatela kwiluka dichi ichi: Sawulu wadishileña yomweni mukukala. Mpinji yejima antu adikañaña naNzambi ashindaña wanyi! w22.01 2 ¶1-2

Yesu wadikitileña nankashi mumudimu wakushimwina. Wamwekesheli nindi wayikeña antu kuhitila mukushimwina hejima hanateleli. (Luka 19:47, 48) Chumanyi chamusañumwineña kuyishimwina? Yesu wayitiyilileña wushona. Mpinji yikwawu antu amavulu akeñeleña kutiyilila kudi Yesu chakwila yena niatumbanji “akañenyi nikuda yakuda.” (Maku 3:20) Chelili iyala wumu yakeñi kuhanjika nindi mpinji yawufuku, Yesu wetejeli kuhanjeka nindi. Antu amavulu asambilili kutiyilila kunsañu yaYesu, hiyekalili atumbanji twindiku. Ilaña antu ejima amutiyilili etejeli. Makonu tunakukeña kulejaku antu ejima nsañu yayiwahi. (Yilw. 10:42) Hakwila tutweshi kwila mwenimu, twatela kuhimpa njila yetu yakushimwinamu. Bayi tushimwinaña hohu mpinji yitunakeñiku, ilaña twatela kuhimpaña ndandanda yetu kulonda tuyishimwineña antu hampinji yitwatela kuyiwana. Chitwela mwenimu, Yehova wukutiya kuwaha. w22.01 17 ¶13-14

Makonu antu amavulu chayikalilaña kukuhwelela muntu wejima wukweti wuswa. Anachimoni nawu jinfulumendi ninshimbi kakavulu jakiñaña antu aheta niantu akweti ñovu, ilaña hiyakwashaña atuzweñiku. Kubombelahu, akulumpi amukwitiya kukwawu akoñaña yuma yatama, yinaleteshi antu amakwawu kubula kumukuhwelela Nzambi. Dichi neyi muntu neteji kumudizisha Bayibolu, twamonaña kukala hakwila tumukwashi amukuhweleli Yehova nikukuhwelela antu amwimenañaku hamaseki. Hela chochu, bayi neyi atudizi aBayibolu diwu atela hohu kumukuhwelela Yehova nikuloñesha kwindiku. Ninetu tunashakami yaaka yayivulu muchalala bayi tuleka kumukuhwelela Yehova netu yuma yelañayi hiyaloña mpinji yejimaku. Mpinji yikwawu yuma yinateli kumwekana yikutuletesha chitukalili kumukuhwelela. w22.02 2 ¶1-2