March

“Anyikoku” ashimunayi Yesu munichi chishimu chekala haMatewu 25:31-36 anakwimenaku antu aloña adiku mumpinji yakukuminina, akweti kuchiñeja kwakushakama hamaseki. Anyikoku amakwawu akwashaña amanakwaKristu awayishewa ashalahu kuhitila mukuyikwasha kuzata mudimu wakushimwina nikwilisha atumbanji mukayi kejima. (Mat. 24:14; 28:19, 20) Chaaka nichaaka munyilungu yakutwala kuChanukishu, anyikoku amakwawu amwekeshaña nawu ayikwashaña amanakwaKristu kuhitila mukuzataku chikupu mumudimu wakukwasha antu akweti mpwila mukaayi kejima kulonda akenzi kuChanukishu. Aloñeshaña cheñi yuma yakeñekaña kulonda Chanukishu chikaliku muyipompelu yejima mukaayi kejima. Anyikoku amakwawu atiyaña kuwaha kukwasha amanakwaKristu muniyi njila. Awa anyikoku eluka nawu Yesu wamonaña nyidimu yejima yayililañawu awa awayishewa nindi anakumuzatila yena.—Mat. 25:37-40. w22.01 22 ¶11-12

Neyi twimbujola yilwilu yindi nichahandileñayi nawantu; chidi neyi chamutiyililiyi wushona mukwambumba, chamutiyililiyi luwi mumbanda wadiña namusoñu wafwana, niwushona watiyilileñayi antu afwishileña antaña jawu, dikwila nawu tunakumwimbujola cheñi Yehova. (Maku 1:40, 41; 5:25-34; Yow. 11:33-35) Neyi tumwimbujolaña Yehova, wubwambu wetu nayena wukukola. Neyi tulondelaña chikupu muntampu jaYesu kaayi hikakutuluwañeshaku. Hawufuku wakukumishaku hanu hamaseki, Yesu wahosheli nindi: “Ami kaayi nakimiki mushindu.” (Yow. 16:33) Watalishili mukwila nindi wakaanini kumuluwañesha nayitoñojoka, yuma yafwilañawu niyilwilu yamukanu kaayi. Yesu washili muchima hakwila chuma chamutemesheleliwu hanu hamaseki, kumuhakwilaku Yehova. Indi etu? Mukanu kaayi mudi yuma yayivulu yinateli kutuluwañesha. Ilaña neyi tusha muchima hakwila nkeñelu yaYehova neyi Yesu, ‘tukwimika kaayi mushindu.’—1 Yow. 5:5. w21.04 3-4 ¶7-8

Kapostolu Pawulu welukili chikaninu chaYesu chakwila nawu “muntu wejima wukumukuhwelela [Yesu] . . . [wakekala] nawumi wahaya nyaaka.” (Yow. 3:16; Rom. 6:23) Pawulu wadiña hakachi kawantu akuhweleleli mwifutu danyiloña. Welukili chikupu nindi Yehova wadiloñesha kwanakena antu anavulumuni nshidi yasweja neyi abalumuka. (Mas. 86:5) Pawulu wakuhweleleli cheñi nindi Nzambi wamukeña muloña wakukeña kwamwekesheliyi Kristu. Talenu mazu akukolesha kumakumishilu AÑalija 2:20. Pawulu wahosheli nindi: “Mwana kaNzambi, wankeñeli nawa wadihanini yomweni kukoola ami.” Pawulu watoñojokeleña wanyi nindi Nzambi hamukeñaku, neyi kwiji nakuhosha nindi, ‘Neluki muloña waweni Yehova chakeñelayi amanakwami hohu, ilaña ami hankeñaku.’ Pawulu wayanukishili aRoma nindi: “Hampinji yitwadiña akwanshidi, Kristu watufwilili.” (Rom. 5:8) Kwosi chuma chinateli kukañesha kukeña kwatukeñayi Nzambiku. Pawulu welukili chikupu nindi kukeña kwaNzambi kukweti ñovu. Welukili cheñi nindi Yehova wadiwunjikili namuza waIsarela. w21.04 22 ¶8-10

Neyi munakulombola kadizi, Kwashenu kadizi wenu yamukeñi Yehova. Munjilanyi? Ikalenu nampinji yakumukwasha kadizi wenu kwiluka yilwilu yaYehova. Kwashenu kadizi wenu yeluki nindi Yehova hiNzambi wamuzañalu wakwashaña antu amukeña. (1 Tim. 1:11; Heb. 11:6) Mulejenu kadizi wenu yeluki nindi neyi yazatishaña iyi nsañu yikumukwasha, nawa mulumbulwilenu nenu Yehova wamukeña. (Isa. 48:17, 18) Neyi kadizi wenu yasweja kumukeña Yehova, chikumukwasha kuhimpa yilwilu yindi. Hakwila yapapatishewi, kadizi waBayibolu watela kulekahu yuma yimu. Atudizi aBayibolu amakwawu atela kuleka kufwila yuma yakumujimba. Amakwawu atela kuleka kudikunda nawakwawu abula kumukeña Yehova. Amakwawu anateli kuyikaana kudi antaña jawu ahela aYinsahu jaYehova. Yesu washiika nindi antu ejima amulondelaña hakayishiyaku. Wakayinka chisaka cheneni chakuspiritu.—Maku 10:29, 30. w21.06 4 ¶8-9

Kapostolu Pawulu wesekejeli mudimu wakwilisha atumbanji nakutumba mbutu, nakumwekesha nindi twatela kuzataku nyidimu yikwawu kubadika kutumba hohu mbutu. Wayilejeli akwaKorinda nindi: “Ami natumbili, Apolosi watukumwinini . . . Enu mudi iha, odu dinakudimayi Nzambi.” (1 Kor. 3:6-9) Chineli tudi akwakukalakala ‘mwiha daNzambi,’ bayi neyi twatumbaña hohu mbutuku ilaña twatukumwinaña nikutala chiyinakukula mbutu yetu yitwatumbili. Hampinji yoyimu, tweluka netu Nzambi diyi wakulishaña mbutu. Tukweti mudimu wakushimwina nikudizisha antu chalala. Iwu mudimu watuzañaleshaña chikupu. Kapostolu Pawulu, wakwashili antu amavulu amuTesalonika kwikala atumbanji, dichi walumbulwili chatiyiliyi nawa wahosheli nindi: “Indi kuchiñeja kwetu hela muzañalu hela chibaaba chakudisambilamu kudi Mwanta wetu Yesu hampinji yakwikalahu kwindi dichidihi? Komana hiyenuku? Chalala, enu yenu kulema kwetu, yenu muzañalu wetu.”—1 Tes. 2:19, 20; Yilw. 17:1-4. w21.07 3 ¶5; 7 ¶17

Yehova watukokela kwakwihi nayena. (Yow. 6:44) Toñojokenu mwatalisha chumichi. Yehova chashinshikiliyi antu ejima mukaayi, wamweni chuma chalema mudi enu, muchima wawuwahi wakumukeña. (1 Kushi. 28:9) Yehova wayiluka, weluka chimwatiyaña nawa wayikeña. Awa mazu atukoleshaña chikupu. Yehova wayakamenaña chikupu nawa wayakamenaña amanakwenu niahela akwaKristu ejima. Hakwila nawu tutiyishishi ichi chikuma, Yesu wamwesekejeli Yehova nakabiña. Neyi mukoku wumu yafuma hamukanka wawanyikoku 100, chumanyi chikwilayi kabiña? “[Wukushiya] anyikoku 99 hamapidi nakuya nakukeñakeña owu mukoku wunajimbali.” Neyi kabiña yawana iwu mukoku wukuhila wanyi. Ilaña wukuzañalala. Chumanyi chitunakudizilaku? Mukoku wejima walema kudi Yehova. Yesu wahosheli nindi: “Tata yami wekala mwiwulu . . . hakeñaña wumu hadi awa akehelamu kujilumukaku.”—Mat. 18:12-14. w21.06 20 ¶1-2

Neyi tutoñojokaña hakuchiñeja kwetu kutukweti nihakukeña kwatumwekeshelayi Nzambi kwabulaña kumana tukumukeña Yehova nankashi niwubwambu wetu nayena wukukola hama. (Rom. 8:38, 39) Chatuleteshaña kumwimbujola Yesu. (1 Pet. 2:21) Mumafuku akutwala kuChanukishu, twatañaña muBayibolu nsañu yaYesu yahosha hamulungu wakukumishaku hanu hamaseki, hakufwa kwindi nihakusañuka kwindi. Nkumininaku namelela haChanukishu, mpanji yaChanukishu yatwanukishaña kukeña kwatukeñayi Yesu. (Efwe. 5:2; 1 Yow. 3:16) Neyi tunakutaña nsañu yahosha hakudihana kwaYesu nikutoñojokahu twafwilaña “kutwalekahu kuhanda neyi chahandileñayi.” (1 Yow. 2:6) Twafwilaña kutwalekahu kushakama mukukeña kwaNzambi. (Yuda 20, 21) Twashakamaña mukukeña kwaNzambi kuhitila mukuzata hanakumini ñovu jetu nakumwovwahila, kujilika ijina dindi nikumutiyisha kuwaha. (Yish. 27:11; Mat. 6:9; 1 Yow. 5:3) Kwanakana Chanukishu kwatuleñelaña kushakama mukukeña kwaNzambi ifuku niifuku neyi kwiji tunakumuleja Yehova netu, ‘inakukeña kutwalekahu kushakama mukukeña kweyi haya nyaaka!’ w22.01 23 ¶17; 25 ¶18-19

Yehova watwinka wuswa wakudifuukwila. Tunateli kutondahu chuma chidi chejima chitunakukeña kwila muchihandilu chetu. Nzambi yetu wukweti kukeña watiyaña kuwaha neyi tutondahu kumukalakela. (Mas. 84:11; Yish. 27:11) Tunateli kuzatisha chiwahi wuswa wetu wakufuukula muyuma yayivulu. Tunateli kumwimbujola Yesu kuhitila mukutwamijaku yuma yakeña akwetu kubadika yetu. Mpinji yimu, helili Yesu nawapostolu indi azeyi nankashi, ayili kwiluña dimu kwamwena nawu anooki. Hela chochu, hiyanookeliku. Izaza dayiwanini nawa afwilileña chikupu kuyidizisha kudi Yesu. Ilaña Yesu wahilili wanyi. Wayitiyilili wushona. Hanu dinu, chumanyi cheliliyi Yesu? Watachikili kuyitañisha yuma yayivulu. (Maku 6:30-34) Neyi tumwimbujola Yesu kuhitila mukuzatisha mpinji yetu niñovu kukwasha akwetu, tukuleta kalemesha kudi Tata yetu wamwiwulu.—Mat. 5:14-16. w21.08 3 ¶7-8

Yehova hakeñaña yuma yejima niantu ejima kwikala chochimuku. Chumichi chamwekenaña muyileñaleña yindi, kushilahu niantu. Wejima wetu twenda kwambuka. Yehova hayesekejaña enu nawakwenuku. Washinshikaña mumuchima, wuntu wamukachi. (1 Sam. 16:7) Welukaña yuma yimunateli kutwesha kwila, yimukukañanya nichayikulishiliwu. Hayilejaña nindi mwili yuma yinabadiki muñovu jenuku. Twatela kumwimbujola Yehova kuhitila mudimona etu aweni neyi chatumonañayi. Dichi tukutoñojokaña ‘kwesekeja nachitwekala,’ hitukutoñojokaña netu twabadika hela tudi amukunkulwayiku. (Rom. 12:3) Tunateli kudizila kuyakutalilahu yawakwetu. Hadaha twelukahu manakwetu hela muhela wazataña chiwahi mumudimu wakushimwina. (Heb. 13:7) Tunateli kudizila kudi wena chakushimwina chiwahi. (Fwili. 3:17) Ilaña hekala chaambu hakwimbujola chakutalilahu chachiwahi chawakwetu nakudesekeja nawu. w21.07 20 ¶1-2

Munateli kukolesha chikuhwelelu chenu mudi Nleñi neyi mubanjilaña anyama, nyitondu nitutumbwa. (Mas. 19:1) Neyi mudizaña chikupu haniyi yuma, mukwiluka chikupu nenu Yehova diyi Nleñi. Neyi munakudiza hayileñaleña, shenu muchima hayuma yinakumwekesha nawu Nleñi wekala kwoku. (Rom. 1:20) Chakutalilahu, itena datwinkaña iyena nichejeji, chakwashaña yuma yonaña hamaseki. Hela chochu, yuma yikwawu yafumaña kwitena yafwana. Etu antu atela kutukiña kuniyi yuma nawa atukiñaña! Munjilanyi? Hanu hamaseki hekala mpepela yatukiñaña kuniyi yuma yejima. Neyi iyi yuma yafwana yisweja ñovu, mpepela yatukiñaña niyena yaswejelañaku. Komana mukwiteja wanyi nenu kwatela kwekala muntu washaku yumiyi nawa hiNleñi wukweti kukeña nawa wukweti maana chikupu? w21.08 17 ¶9-10

Neyi muntu napapatishewi, twatela kutwalekahu kumukeña nikumulemesha. (1 Yow. 4:20) Tunateli kwila ñahi mwenimu? Chuma chimu chitwatela kwila, hikumukuhwelela netu wukweti yilwilu yayiwahi. Neyi tuneluki wanyi chuma chaletesha yeli chuma chimu, hitwatela kutoñojoka netu welilamu hohu kulonda yaditiyishi kuwahaku. Ilaña tukumulemesha manakwetu nakumumona netu watubadika. (Rom. 12:10; Fwili. 2:3) Mwamweni, twatela kutiyilaña antu ejima luwi niwushona. Neyi tunakukeña kwikala muchisaka chaYehova haya nyaaka, twatela kuzatishaña Izu daNzambi muchihandilu chetu. Chakutalilahu, Yesu washimwini nindi twatela kutiyila antu ejima luwi niwushona kushilahu tuhu niayilumbu jetu. (Luka 6:32-36) Mpinji yikwawu, chinateli kutukalila kwila mwenimu. Neyi chatukalilaña twatela kutoñojokaña nikwila yuma neyi chelileñayi Yesu. Neyi tuzata nañovu kumwovwahila Yehova nikumwimbujola Yesu, tukumwekesha kudi Tata yetu wamwiwulu netu tunakukeña kwikala muchisaka chindi haya nyaaka. w21.08 6 ¶14-15

Mushindamenenuña Yehova. Watukana nindi wakatukiswila neyi tumukuhwelela nawa tuzata hakumina ñovu jetu. MuBayibolu mwekala yakutalilahu yawantu azatileña nañovu mumudimu waYehova. Kakavulu elileñahu chuma chimu hakwila nawu Yehova yayikiswili. Chakutalilahu, Abarahama amukiswilili kudi Yehova hanyima yakushiya mukala windi “hela chakwila helukili kwayileñayi.” (Heb. 11:8) Yakoba niyena amukiswilili hanyima yakulwisha nakañelu. (Kutach. 32:24-30) Muza waIsarela hiwadiña kwakwihi nakwiñila Mwituña daChikaninu, wazambukili hohu hanyima yakwila atupristu anadati dehi muKaloña Yodana. (Yosh. 3:14-16) Yakutalilahu yawaYinsahu amakonu anakumushindamena Yehova nikudikita mumudimu windi yinateli kuyikwasha. w21.08 29-30 ¶12-14

Enu amanakwetu niahela mwakula dehi hadi yaaka yinahitihu, muneluki chimwazatileña kunyima, ilaña muneluki cheñi nenu mwatela kuhimpa kwesekeja nachidi yuma. Ninenu akulumpi munapapatishewi katataka mukweti yuma yayivulu yakwila. Atwansi akutiya kuwaha neyi muyilejañaku yuma yimweluka niyimunadizi. Neyi ‘muhanaña’ kuhitila mukuzatisha yuma yimunadizi nikulejaku antu, Yehova wukuyikiswila nankashi. (Luka 6:38) Enu akulumpi neyi mudikundaña nawatwansi, mukudikoleshaña wumu namukwawu. (Rom. 1:12) Muntu himuntu wukweti chuma chabula kwikala namukwawu. Akulumpi akweti maana niyuma yayivulu yinadiziwu muchihandilu chawu. Atwansi akweti ñovu. Neyi atwansi niakulumpi azatilaña hamu neyi amabwambu, akuletaña kalemesha hadi Tata yetu wamwiwulu nawa akukolesha chipompelu chejima. w21.09 8 ¶3; 13 ¶17-18

Muloñadi aYudeya amavulu chamukaaniniwu Yesu hamuloña wakwila amujahilili hamutondu wakuyandishila? Wena atoñojokeleña nawu Yesu amujahilili hamutondu wakuyandishila muloña hikapondu nawa mukwanshidi bayi Mesiyaku. (Kuhit. 21:22, 23) Dichi aYudeya ahukeni akañenyi kwiluka nawu Yesu hadiña namuloñaku nawa amutwambilili nikumukabisha chakadi muloña. Antu amusompesheleña Yesu hiyakameneni chuma chidi chejimaku. Añanji amuchota cheneni chawaYudeya apompeli hamu swayi-swayi kulonda amusompeshi Yesu nawa hiyalondeleli nshimbi yashimunawu hakusompeshaku. (Luka 22:54; Yow. 18:24) Chatela asambili kutiyilila nyiloña yamutwikileñawu Yesu nawa amoni wunsahu wunakumwinkelawu nyiloña, wena “amukeñeleleña Yesu wunsahu wakutwamba kulonda amujahi.” (Mat. 26:59; Maku 14:55-64) Hanyima yakwila Yesu anamusañuli dehi kufuma mudi afu, añanji abula kushinshika “ayinkeli mali amavulu asiliva” amashidika awaRoma ahembeleña kwijamu kulonda ashimuni nsañu yakutwamba chaletesheli Yesu yabuli kwikala mwijamu.—Mat. 28:11-15. w21.05 11 ¶12-13

Yehova wukujilumuna kanu kaayi katama hadi mpinji yidi yejima. Ilaña kudiwunjika kwindi kunatukwashi nankashi. Anyana kaAdama naEva ejima neyi anavwaliki ekalaña awanina wanyi. Hela chochu, Yehova wayikeña nawa wayakamenaña. Nawa washiika nindi wakajilumuna nshakaminu yamakonu. (1 Yow. 4:19) Nawa watonda mpinji yakamanishayi makabi ejima amonañawu antu. Komana kukeña kutwamukeña kwila kutuletesha kutwalekahu kuumika hamu nayena neyi chinatwesheki nehi? Yehova womikaña ninetu twatela kumwimbujola. Yesu womikileña neyi Tata yindi. Hadiñayi hamaseki, Yesu womikili nhoshelu yakudikaña, kasawuntu nikumukabishila hamutondu wakuyandishila kukola etu. (Heb. 12:2, 3) Chakadi nikujina, chomikañayi Yehova dichamuletesheli Yesu niyena kuumika. Dichi ninetu chinateli kutukwasha kuumika. w21.07 12-13 ¶15-17

Mpinji yejima twamonaña chatumwekeshelañayi luwi Tata yetu wamwiwulu. (Mas. 103:10-14) Akwakumulondela Yesu adiña awanina wanyi ilaña wayimwekesheleleña luwi nikuyanakena. Wahanini niwumi windi kulonda nshidi jetu ajanakeni. (1 Yow. 2:1, 2) Kukeña kutwadikeña wumu namukwawu kwaswejelañaku neyi “[tudanakenaña] wumu namukwawu.” (Efwe. 4:32) Hela chochu, chatukalilaña kuyanakena akwetu mpinji jikwawu, ilaña twatela kuzata nañovu. Muhela wumu wahosheli nindi chibaaba chaKaposhi Kakutalila chahosheleña nawu, “Danakenenu Chikupu Muntu naMukwawu” chamukwashili. Wasonekeli nindi: “Ichi chibaaba chinankwashi kwiluka kwanakena antu, chikunateli kunkwasha. Walumbulwili nindi kwanakena antu hikwatalisha mukwila nawu wuneteji yiluwa yawu hela hiyakuneñeshaku. Ilaña kwanakena kwatalisha mukubula kuhemba nkunyi hayuma yatama yelawu nikutwalekahu kwikala mukuwunda.” Neyi tuyanakenaña amanakwetu niahela chakufuma hamuchima tukumwekeshaña netu twayikeña nawa tunakumwimbujola Tata yetu Yehova. w21.09 23-24 ¶15-16

Yesu wakeñeli chalala, chalala chahosha hadi Nzambi ninkeñelu Yindi. Yuma yelileñayi Yesu yamwekesheleña nawu wakuhweleleli ichi chalala nawa walejeleñaku antu ichi chalala. (Yow. 18:37) Atumbanji twaYesu alala niwena akeña ichi chalala. (Yow. 4:23) Dichi, kapostolu Petulu wateneni chikuhwelelu chawakwaKristu nindi “njila yachalala.” (2 Pet. 2:2) Chineli akeñeli nankashi chalala, akwaKristu akusambila akaanineña yitoñojoka yamunsakililu, tushidikilu niyitoñojoka yawantu yaditadikishileña nachalala. (Kol. 2:8) Nimakonu, akwaKristu alala azataña nañovu kulonda “[atwalekihu] kwenda muchalala.” Yuma yelañawu muchihandilu chawu niyuma yakuhwelelawu yashindamena Hezu daYehova. (3 Yow. 3, 4) Antu jaNzambi makonu ahoshaña wanyi nawu atiyishishaña yuma yejima yekala muBayibolu. Mpinji yikwawu, aluwañeshaña chalumbululañawu ntañishilu yamuBayibolu hela chalombolañawu chipompelu. Neyi chakwila kunekali kuhimpika muntiyishishilu, niwena alondelaña mwenomu. w21.10 21-22 ¶11-12

Kunyima, mpwembu yamusumba yakiñileña antu kudi ayilumbu, kukeña kwaYehova kwakashinshi nikwena kudi neyi mpwembu yatukiñaña kuyuma yatama yinateli kuzeyesha wubwambu wetu naYehova. Kubombelahu, kukeña kwaYehova kwakashinshi kwamukwashaña Yehova kuswina kwakwihi nanetu. (Yere. 31:3) Ñimbi yamasamu Davidi wazatishili chakutalilahu chikwawu hakulumbulula Nzambi chakiñañayi antu jindi. Wasonekeli nindi: “Nzambi diyi kaposhi kami kakalehi kakutemukila diyi Nzambi yami wantiyilaña luwi.” Davidi wahosheli cheñi hadi Yehova nindi: “Diyi luwi lwami, diyi mpwembu yami, diyi kaposhi kami kakalehi kakutemukila, diyi mukwakumpulwisha; diyi nkebu yami, dimu nabataminaña.” (Mas. 59:17; 144:2) Muloñadi Davidi chesekejeleliyi kukeña kwaYehova kwakashinshi nachiswamu nikaposhi kakalehi kakutemukila? Hichikwetu muloña nakutwashakamaña hanu hamasekiku, chakala hohu tudi ambuñindi, Yehova wukutukiña kulonda tuhembi wubwambu wetu nayena. w21.11 6 ¶14-15

Hampinji yadiñayi Yesu niatumbanji twindi muwatu nawa kwinzi mpepela yasweja, Yesu wazatishili iyi mpinji kulonda yayikwashi atumbanji twindi kwiluka nawu atela kwikala nachikuhwelelu chakola. (Mat. 8:23-26) Haniyi mpinji yikwenjili mpepela yeneni nawa mankanda atachiki kwiñija menji muwatu, Yesu wadiña wakaama. Atumbanji atiyili woma chakwila amuhindwishili Yesu nawu yayamwini. Mwanta wayifumbili nindi: “Munakutiyiladi woma, enu mukweti chikuhwelelu chantesha?” Komana munakumona “mpepela yeneni” muchihandilu chenu? Hadaha munakukabakana muloña wawubanji wadimwekenaña. Yinateli kwikala mpepela yeneni yidi neyi yikatu yasweja yinakuyineñesha nawa muneluki wanyi chakwila. Munateli kwakama mpinji yikwawu ilaña bayi mwiteja yuma yamuchidiwu yiyileteshi kuleka kumukuhwelela Yehovaku. Swinenu kwakwihi nayena kuhitila mukulomba chakadi kuleka. Koleshenu chikuhwelelu chenu kuhitila mukutoñojoka hampinji yayikwashiliyi Yehova kunyima. (Mas. 77:11) Mwatela kwiluka nenu hakuyishiya chayinu mpinji hela kumbidiku. w21.11 22 ¶7, 10

Hadaha muntu nateli kutoñojoka nindi neyi hatambulahu chuma chabula kwikala chindiku, nakwovwahila ilu lushimbi. Ilaña, hadaha nakwiya munjila jikwawu. Chakutalilahu, mukwakulanda nakulandulula wazatishileña yesekelu hela yipimu yakutwamba kulonda ayidimbi nachu akwakulanda munjila yikwawu wadiña nakwiya. ALevi 19:13 yanuñañesha kwiya nakumudila muntu mabula hamutu nawu: “Kumudya mukwenu mbalakanyi chinjila.” Kuda mbalakanyi mujakulanda nakulandulula kwendelaña hamu nakwiya hela kubuwa. Lushimbi lwamu 8 lwahosheli nawu kwiya chatama. Ilaña nsañu yekala mumukanda waALevi yayikwashili aYudeya kwiluka chiyatela kuzatisha ichi chishina chekala munshimbi, dikwila nawu atela kwikala ashinshika muyuma yejima. Chikuwaha nankashi kutoñojoka ochu Yehova chamonañayi muntu wabula kushinshika nawa weyaña. Tunateli kudihula netu: ‘Kwesekeja naALevi 19:11-13, komana kudihu munateli kuhimpa kutalisha hansañu jakulanda nakulandulula hela hamudimu wami?’ w21.12 9-10 ¶6-8

Neyi munakulomba, toñojokenuña mumwaluwañesha hanodu ifuku nawa mulombenu Yehova yayanakeni. Hela chochu, neyi munakoñi nshidi yeneni mwatela cheñi kulejamu akulumpi kulonda ayikwashi. Akuyitiyilila nawa akuyikwasha kuzatisha Izu daNzambi. Akulombela hamu nanenu, akumulomba Yehova yazatishi kulema kwamulambu waYesu “kulonda ayuuki,” mwikali cheñi nawubwambu wawuwahi naNzambi. (Yak. 5:14-16) Cheñi, chikuwaha neyi mutoñojokaña chikupu hefutu danyiloña. Munateli kuneña nankashi neyi mutoñojoka chakabakeniyi Mwana kaNzambi. Ilaña neyi mutoñojokaña chikupu hamulambu wahaniniyi Yesu, mukusweja kumukeña nankashi yena niTata yindi. Chaaka nichaaka twamwekeshaña kusakilila hefutu danyiloña chitwayaña kuChanukishu chakufwa kwaYesu nikutambika antu amavulu kwinza nakupompa nanetu. Yehova watwinka mudimu walema wakudizisha antu kulonda amwiluki Mwanindi. w21.04 18-19 ¶13-16

Toñojokenu chuma cheliliyi Yesu hampinji yelili mazaza awantu enzi nakumuwana kumpidi. Yesu wachishili wufuku wejima nakulomba. Hadaha wazeyeli nankashi, ilaña chamweniyi izaza dawantu wayitiyilili luwi atuzweñi niantu akata adiña hakachi kawu. Hakuminini hohu dakuyikoleshaku ilaña wahanini cheñi mpanji yakukolesha yelukawu nawu Mpanji yahaMpidi. (Luka 6:12-20) Yesu wekalileña nawantu hela chakwila niyena wakeñeleña mpinji yakwikala nkawindi. Fwikijenu chatiliyi Yesu chelukiliyi nindi ibwambu dindi Yowanu Mpapatishi anamujahi. Bayibolu yahosha nawu: “Chachitiyiliyi [nindi Yowanu nafwi], wafumini kwenoku nawatu nakuya kwiluña kwakankawindi.” (Mat. 14:10-13) Ilaña Izaza deneni dashikileñahu dehi henohu yena kanda ashiki. (Maku 6:31-33) Yesu wamweni nindi dakeñekeleña kudikwasha nikudikundeja kudi Nzambi nawa dichuma cheliliyi.—Luka 9:10, 11. w22.02 21 ¶4, 6

Tunateli kwila ñahi neyi twiluka netu tunamuneñeshi mukwetu mukwakwitiya? Twatela kumulomba Yehova. Twatela kumulomba kulonda yatukwashi kuleta kuwunda namanakwetu. Twatela kudishinshika cheñi chitwekala. Twatela kudihula awa malwihu: ‘Komana netejaña neyi naluwañeshi, nadanakenaña nawa naletaña kuwunda? Neyi nileta kuwunda namanakwami hela namuhela, Yehova niYesu akutiya ñahi?’ Ñakwilu yetu kunawa malwihu yikutuletesha kumutiyilila Yesu nikuleta kuwunda nawakwetu akwakwitiya. Neyi tunakuya nakuleta kuwunda namanakwetu, twatela kwikala adizoza. (Efwe. 4:2, 3) Twatela kuhosha nindi munjila yikuletesha yatwanakeni nawa twiikali cheñi amabwambu. Anukenu nenu kuleta kuwunda namanakwenu, dichuma chachiwahi kubadika kudiyiñisha nawu yeyi waluwañesha.—1 Kor. 6:7. w21.12 26 ¶13-16

Chamukatili Yesu kumuchima muloña welukili nindi hela chakwila amutambwilili namuzañalu, aYudeya amavulu akutambwila nsañu yaWanta wanyi. Chikufumamu, Yerusalema akumujilumuna nawa kaYudeya wejima wukupuluka hampinji yakujilumuna musumba akumutwala muwunkoli. (Luka 21:20-24) Chawushona, neyi chahosheliyi Yesu, antu amavulu amukaanini. Indi antu kwiluña kumwashakamaña elaña ñahi nansañu yaWanta? Neyi antu antesha diwu etejaña kuyishimwina chalala, chumanyi chimunateli kudizilaku chadililiyi Yesu? Talenu yuma yisatu yikwawu yitukudizilaku. Yehova wayakamenaña antu. Chadililiyi Yesu chatwanukishaña ochu Yehova chakamenañayi antu. “Hakeñaña muntu hela wumu akamujilumuniku, ilaña wakeñaña nindi antu ejima ekali nakukooleka kwakubalumuka munyichima.” (2 Pet. 3:9) Makonu, twamwekeshaña netu twayikeña antu kuhitila mukutwalekahu kuyishimwina kulonda tuyikwashi adizi nsañu yayiwahi yaWanta.—Mat. 22:39. w22.01 16 ¶10-12

Chikuhwelelu chenu chikukolelaku neyi mutoñojoka chikupu hayuma yayililayi Yehova antu jindi niyinayililiyi enu halwenu. Chuma chasweja kulema, mukusweja kumukeña Yehova chikupu. Kukeña hichilwilu chabadika yilwilu yikwawu, kukuyikwasha kumwovwahila Yehova, kudihana kulonda mumutiyisheña kuwaha nikuumika kweseka kudi kwejima. (Mat. 22:37-39; 1 Kor. 13:4, 7; 1 Yow. 5:3) Kwosi chuma chalema kubadika kwikala nawubwambu wakola naYehova! (Mas. 63:1-7) Ilukenu nenu kulomba, kudiza nikutoñojokahu chikupu hikudifukula kudi Yehova. Kufwana Yesu, keñenuña iluña kwamwena kulonda muhanjekeleñaku naYehova. Tondolwelenuña yuma yinateli kuyiluwañesha. Mulombenuña Yehova yayikwashi kushaku muchima neyi munakwila yuma yakukoleshelamu wubwambu wenu nayena. Neyi muzatishaña mpinji yenu chiwahi chayinu mpinji, Yehova wukuyikiswila wumi wahaya nyaaka mwituña daNzambi dadiha.—Maku 4:24. w22.01 31 ¶18-20

Yuma yitwatoñojokañahu diyi yitwelaña. Dichaletesheli Yesu atuleji kukaana yitoñojoka yinateli kutuletesha etu kukoña nshidi yahamesu bwi-i. (Mat. 5:21, 22, 28, 29) Chakadi nikujina, tunakukeña kumuzañalesha Tata yetu wamwiwulu. Dichi chalema nankashi kukaana yitoñojoka yejima yatama yinateli kwinza muyitoñojoka yetu. Yesu wahosheli nindi: “Yuma yejima yedikaña mukanwa yafumaña mumuchima.” (Mat. 15:18) Mwamweni, nhoshelu yetu yamwekeshaña chitwekala munyichima yetu. Dichi dihulenu nenu: ‘Komana nakaanaña kutwamba hela chakwila kuhosha walala kukunletela kukala? Ami nekala muwulu komana nekala wasoñama kulonda nibuleña kusenseka namuntu wabula kwikala mwinikwami? Komana natondolwelaña chikupu nhoshelu yatama? Neyi muntu nanhilishi, komana namwakulaña mumesu akuwunda?’ Chikuyikwasha nankashi neyi mutoñojoka nakanañachima hanawa malwihu. Neyi muzata nañovu yenu yejima kulonda muleki nhoshelu yakasawuntu, yakutwamba nawa yatama, chikuyipelela kuvuula wuntu wawukulu. w22.03 5 ¶12-14

Antu alombaña nawu ayifumbi ekalaña ambuña aYehova apama kubadika ana abulaña kulomba nawu ayikwashi. Dichi lombenuña antu kulonda ayikwashi. Mpinjinyi yitunateli kulomba akwetu akakwitiya netu atukwashi? Talenu iyi yakutalilahu. (1) Muhela naleji mukakushimwina wakulukila kulonda ayi nindi nakulombola kadizi nawa nkumininaku namwihuli chatela kwilayi hakwila ekali ntañishi wamuwahi. (2) Muhela mujiki nakukeña kulanda yakuvwala dichi nehuli muhela wapama kulonda amuleji chinakutoñojokayi hayakuvwala yinatondiyi. (3) Manakwetu anamuleji nawu akahani mpanji yawantu amavulu yatachi. Naleji nhoshi wakulukila kulonda yatiyilili nakanañachima kumpanji yindi nawa yamukwashi hatela kuzatilayi. Nimanakwetu watachikili dehi kuhana mpanji nateli kwila chiwahi neyi yehulaku nhoshi wakulukila nawa azatisha yuma yinamulejiwu.—Yish. 19:20. w22.02 13 ¶15-17

Yehova watukeña nawa watwakamenaña neyi chochamukeñeliyi Yesu nikumwakamena hampinji yakalakeleñayi mudimu windi wahanu hamaseki. (Yow. 5:20) Wamukwashileña Yesu kutwalekahu kwikala nachikuhwelelu chakola, wamukwashileña neyi naneñi, nawa wamwinkeleña yuma yakumujimba. Nawa Yehova wamulejeleña Mwanindi nindi wamukeña nawa wamutiyileña kuwaha. (Mat. 3:16, 17) Muloña wakwila Yesu welukili nindi wadiña naTata yindi wamwiwulu nawa wakumukwasha muyuma yejima, hadakameneneñaku. Kufwana Yesu, wejima wetu tunamoni Yehova chatukwashañayi munjila jamboka-mboka. Toñojokenu hachumichi: Yehova watwiteja kwikala amabwambu jindi nawa watwinka amanakwetu niahela atuzañaleshaña nawa atukoleshaña neyi tunaneñi. (Yow. 6:44) Yehova watwinkaña yuma yejima yitwakeñaña kulonda tukoleshi chikuhwelelu chetu. Nawa watukwashaña cheñi nayuma yakumujimba. (Mat. 6:31, 32) Neyi tutoñojoka hachatukeñayi Yehova, tukumukeña nankashi. w21.09 22 ¶8-9

Chihandilu chenu chadiña ñahi henohu kanda mutachiki kudiza Bayibolu nawaYinsahu jaYehova? Etu amavulu hitwakeñaña kutoñojoka hachadiña chihandilu chetuku. Chakadi nikujina, yilwilu yetu niwuntu wetu yaluwankeni nayitoñojoka yamonañawu nawu yayiwahi hela yatama. Neyi dichitwadiña dikwila nawu, “hitwadiña nakuchiñejaku nawa hitwamwilukili Nzambi mukaayiku.” (Efwe. 2:12) Ilaña hampinji yimwadizileña Bayibolu, mwelukili nenu mukweti Tata yenu wamwiwulu wayikeña hama. Mwelukili nenu neyi munakukeña kumuzañalesha Yehova nikwikala hakachi kachisaka chawakakudifukula indi, mwatela kuhimpa chikupu chihandilu chenu, chimwamonaña yuma nichimwatoñojokaña. Mwadizili cheñi nenu mwatela kwila yuma yamonañayi Yehova nindi yaloña nikutondolwela yuma yamonañayi nindi yatama. (Efwe. 5:3-5) Nleñi yetu nawa Tata yetu wamwiwulu, Yehova wukweti wuswa wakushaku nshimbi jatela kulondelawu antu amuchisaka chindi. Nawa wakeñaña nindi henohu kanda tupapatishewi twatela kuzata nañovu kulonda tuvuuli wuntu wetu wawukulu niyilwilu yachu.” w22.03 2 ¶1-3

Anyikoku amakwawu niwena atiyaña kuwaha kwikalaku haChanukishu nawa atoñojokaña hakuchiñeja kwawu. Akeñaña kutiyilila kumpanji yaChanukishu muloña yahoshaña nankashi hayuma yakayililawu kudi Yesu Kristu nia 144,000 muChiyuulu chaYaaka Ikombakaji. Hampinji yakayuulañayi Yesu Kristu, awa anyuli akayulilaña mwiwulu akakwasha antu kulonda iseki dikekali paradisa nikukwasha antu adizoza kulonda akekali awanina. Mamiliyoni awantu enzaña kuChanukishu atiyaña kuwaha kufwikija chakashikijawu wuprofwetu wamuBayibolu, iwu wekala haIsaya 35:5, 6; 65:21-23; niChimwekeshu 21:3, 4. Adifwikijaña wena niantaña jawu akeñawu adi mwituña dadiha. Achiñejaña yuma yidi kumbidi nawa afwilaña kutwalekahu kumukalakela Yehova bayi kufunta hanyimaku.—Mat. 24:13; Ñal. 6:9. w22.01 21 ¶5-7

Ifutu danyiloña hichumanyi? Hiwuseya wahaniniyi Yesu kulonda alandi nachu chuma chajimbesheliyi Adama. (1 Kor. 15:22) Muloñadi chitunakukeñela ifutu danyiloña? Muloña nshimbi jaYehova jahosheleña hawuñanji jashimwini muNshimbi nawu wumi nawumi. (Kwid. 21:23, 24) Adama wajimbesheli wumi windi wawanina. Hakwila nawu wuñanji waNzambi wushikijewi, Yesu wahanini wumi windi wawanina neyi muntu. (Rom. 5:17) Wekalili “Tata Wahaya Nyaka” kudi ejima akuhwelelaña mwifutu danyiloña. (Isa. 9:6; Rom. 3:23, 24) Yesu wahanini wumi windi kwikala mulambu muloña wakumukeña Tata yindi wamwiwulu ninetu. (Yow. 14:31; 15:13) Chineli Yesu wamukeñeli Tata yindi ninetu, wafuukwilihu kwikala washinshika muchihandilu chindi chejima kushika nikukufwa kwindi. Dichi hamuloña wachuma cheliliyi Yesu, chuma chafuukwiliyi Yehova hakusambila kutalisha kumuchidi wamuntu niiseki chikashikijewa. w21.04 14 ¶2-3