August

Yesu wateneneña amashidika awaRoma amupopeli nyisumali kumakasa nikunyendu. Yesu wateleli kufwa wanyi. Ilaña wahilili wanyi nawa hayishilili nkunyiku. (1 Pet. 2:23) Kufwana Yesu, twatela kwanakenaña akwetu. (Kol. 3:13) Antu makwawu, kushilahu niantaña jetu, anateli kutudimbulula muloña eluka wanyi yuma yitwakuhwelela nichitwashakamaña. Anateli kututwambila, kutusawula hadi antu, kutukisila nyikanda yetu hela kutuchinisha nawu akutukatisha. Chatela tuyihembeleña nkunyi, twatela kumulomba Yehova yayikwashi antu atudimbululaña kulonda niwena ifuku dimu aketeji chalala. (Mat. 5:44, 45) Mpinji jikwawu, chinateli kutukalila kwanakena antu, sweje-e neyi anatwili chatama. Ilaña neyi tukutwalekahu kuhila nikubula kuyanakena akwetu, chikutukataña etu aweni. (Mas. 37:8) Neyi twanakena akwetu, dikwila nawu tunakukeña wanyi kwiteja yuma yatama yamwekana yitwalekihu kutuhilisha.—Efwe. 4:31, 32. w21.04 8-9 ¶3-4

Mudihu nantaña yenu ahañawu muchipompelu? Ichi chuma chatukataña chikupu! Toñojokenu chatiyiliyi Yehova chelili añelu amakwawu adiña muchisaka chindi amufutaleli. (Yuda 6) Nawa fwikijenu chatiyiliyi chelili anyanindi akeñeliyi aIsarela, adikañi mapampa kakavulu nayena. (Mas. 78:41) Dichi mwatela kwiluka nenu Tata yetu wamwiwulu niyena waneñaña neyi muntu imwakeña yamushiya. Weluka chimwatiyaña. Wukutwalekahu kuyikolesha nikuyikwasha. Neyi mwana yaleka kumukalakela Yehova, anvwali atoñojokaña nawu chiña twamukwashili mwanetu nankashi hakwila yatwalekihu kumukalakela Yehova. Hanyima yakwila mwanawu anamuhañi, manakwetu wumu wahosheli nindi: “Nadinkeleña nyiloña ami aweni. Nakañenyeña nikukaama chiwahi.” Muhela Elizabeth, wamweni kukala kwokumu wadihwili nindi: “Chumanyi chinabulili kwila hakwila nimukwashi? Natoñojokeleña nami nakañenyi kumudizisha mwanami chalala.” w21.09 26 ¶1-2, 4

Amakwawu ahoshaña nawu antu jaNzambi anateli wanyi kudizisha antu Bayibolu muloña aya wanyi kumashikola kwadizishañawu jansakililu. Ilaña atela kwiluka walala kutalisha hanoyu nsañu. Dichuma cheliliyi Luka nsoneki waNsañu Yayiwahi. Wazatili nañovu hakwila nawu yadizi “yuma yejimiyi.” Wakeñeleña nindi antiyilili jindi ‘eluki chikupu yuma yejima’ yatiyiliwu hadi Yesu. (Luka 1:1-4) AYudeya akunyima muBereya adiña neyi Luka. Chatiyiliwu nsañu yayiwahi yahosha hadi Yesu katachi adiña nakutalatala muNsona jachiHeberu kulonda amoni neyi yuma yayilejeliwu yadiña yalala hela nehi. (Yilw. 17:11) Munjila yoyimu, antu atela kwilaña chuma chochimu. Atela kwesekejaña yuma yayidizishañawu kudi antu jaNzambi nachahosha Nsona. Atela cheñi kwiluka yuma yineliwu antu jaYehova makonu. Neyi eluka “wunsahu walala,” hiyakwiteja nsañu yakutwamba kuyiluwañeshaku. w21.05 3 ¶7-8

Komana muchipompelu chenu mudihu muntu wunakukeña muntu watela kumumwekeshela chisambu? Mpinji yikwawu akwetu akwaKristu anateli kutiya kuwaha neyi twikalaña nampinji yakuhanjeka nawu. Amakwawu chinateli kuyikalila kwikala hamu nawantaña jawu abula kwitiya mumafuku akunooka. Amakwawu anateli kuneña hamafuku amu, sweje-e hefuku dafwili ntaña yawu. Neyi twikala nampinji yakuhanjeka nawamanakwetu niahela anakumona kukala kwamuchidiwu, tukumwekesha netu ‘twayakamenaña chikupu.’ (Fwili. 2:20) Kudi yuma yayivulu yinateli kumuletesha mukwaKristu kuneña. Hela chochu, twatela kwiluka netu Yehova weluka chatiyañawu. Watwinkaña yuma yitwakeñaña, kakavulu wazatishaña akwetu akwaKristu. (Mat. 12:48-50) Ninetu twamwekeshaña netu twalemesha ntanjikilu yaYehova neyi tunakuzata nañovu kukwasha amanakwetu niahela. Hichikweti muloña nanochu chitunakutiyaku, tudi nkawetu wanyi muloña Yehova wudi nanetu mpinji yejima. w21.06 13 ¶18-20

Yesu wazeyeli wanyi nawa watwalekelihu kushimwina hela chakwila antu amakwawu akaanineña kutiyilila kunsañu yindi. Muloñadi? Welukili nindi antu akeñeleña kudiza chalala, nawa wakeñeleña kukwasha antu amavulu kulonda eluki nsañu yaWanta. Welukili cheñi nindi antu amakwawu akaanineña hakusambila anateli kwiteja. Toñojokenu chuma chamwekeni muchisaka chindi. Hadi yaaka yisatu nachikunku yazatiliyi Yesu mudimu wakushimwina, kwosi manakwindi hela wumu wekalili kambanji kindiku. (Yow. 7:5) Ilaña, hanyima yakwila anamusañuli dehi, ekalili akwaKristu. (Yilw. 1:14) Tuneluki wanyi wunateli kwiteja nakwikala kambuña aYehova. Antu amakwawu hashimbulaña hakwila adizi chalala amakwawu nehi. Niantu akaanaña kutiyilila kunsañu yetu neyi amonaña yilwilu yetu yayiwahi, nkumininaku anateli kutachika ‘kumulemesha Nzambi.’ w21.05 18 ¶17-18

Yesu hadiñayi hanu hamaseki wayilejeli akwakumulondela kuzata nyidimu yiyedi. Wayilejeli kushimwina nsañu yayiwahi yaWanta nawa wayidizishili chakushimwina. (Luka 8:1) Chakutalilahu, Yesu wayilejeli atumbanji twindi chakwila neyi antu atiyilila nsañu yaWanta, nichatela kwilawu neyi antu akaana kutiyilila. (Luka 9:2-5) Washimwini cheñi nindi atumbanji twindi akashimwina kudi antu amavulu nikumaluña amavulu chahosheliyi nindi “yikekali wunsahu kudi akwanyuza yejima.” (Mat. 24:14; Yilw. 1:8) Kubombelahu, wayilejeli akwakumulondela kudizisha atumbanji kuhemba yuma yejima yayilejeliyi. Yesu washimwini nindi iwu mudimu walema wukatwalekahu nimunanu mafuku, “kushika nikukukuma kwanshakaminu yamakonu.” (Mat. 28:18-20) Muchimwenu chamumwekesheleliyi Yowanu, Yesu wamwekesheli nindi atumbanji twindi ejima atela kukwasha antu kumwiluka Yehova.—Chim. 22:17. w21.07 2-3 ¶3-4

Mukaayi makonu, antu amavulu adimonaña nawu abadika akwawu. Mukwakulanda nakulandulula nateli kwila yuma yidi yejima chakadi kwakama kulonda yayibadiki akwawu. Mukwakuhema yisela nateli kukatishilamu mukwawu mumushikila kulonda yayibadiki akwawu. Mukashikola wunakukeña nindi yakayi hayunivesiti yaya mpuhu nateli kutwamba hakusoneka kweseka. Etu akwaKristu tweluka netu yilwilu yamuchidiwu yatama; “[hi]nyidimu yamujimba wanshidi.” (Ñal. 5:19-21) Hela chochu, ambuña aYehova amakwawu anateli kwiluka wanyi nawu anakusañumuna yilwilu yakudibecha muchipompelu hela kuluwañesha amakwawu. Twatela kutoñojokahu hachumichi, muloña neyi antu amuchipompelu anakwila yuma yinakumwekesha nawu abadika akwawu, muchipompelu mukwikala kunuñañana wanyi. Tukwila chiwahi neyi tukushinshika hayakutalilahu yawamayala niambanda ashinshika ashimunawu muBayibolu abulili kwikala nachilwilu chakudibecha. w21.07 14 ¶1-2

Kukeña kwakashinshi kwatuleteshaña kukwasha antu ananeñi. Neyi chocheliliyi Luti naNyawomi, amanakwetu niahela amavulu makonu atwalekañahu kuyikwasha ejima muchipompelu ananeñi hela anazeyi. Ayikeña amanakwawu niahela, nawa afwilaña kuyikwasha hakumina ñovu jawu. (Yish. 12:25; 24:10) Chumichi chinesekani namazu akapostolu Pawulu ahosheliyi nindi: “Kundejenu antu ananeñi, koleshenu azeya nawa ikalenu mukuwunda nawantu ejima.” (1 Tes. 5:14) Njila yimu yimunateli kukwashilamu manakwetu hela muhela wunaneñi hikumutiyilila neyi nakulumbulula nikumuleja netu twamukeña. Yehova watiyaña kuwaha chimwakwashaña nyikoku yindi yalemeshayi. Yishimu 19:17 yahoshaña nawu: “Muntu wamutiyilaña kazweñi luwi wudi nakusondamisha Yehova, yena wakamufweta cheñi nachuma chachiwahi chaneliyi.” w21.11 10 ¶11-12

Chumanyi chitwatela kwila chayinu mpinji hakwila nawu tudiloñeshi nayuma yikamwekana kumbidi? Twatela kuzañalalaña nayuma yitukweti nawa twatela cheñi kuzañalalaña hawubwambu wutukweti naYehova. Neyi tumwiluka Nzambi yetu chikupu, chikatukwasha kumukuhwelela netu wukatukiña hampinji yikatulukukawu kudi Gogi waMagogi. Awa mazu adi munsona yalelu analumbululi muloña waweni Davidi chelukiliyi nindi watela kumukuhwelela Yehova nindi wukumukwasha. Kakavulu Davidi wamushindameneni Yehova, nawa Nzambi yindi hamumbiliku. Davidi hadiñayi kansi wayili nakuzuña nachikelamu cheyala, Goliyati kaFwilistinu nawa wamulejeli iwu mushidika wañovu nindi: “Yehova wukukwinka muchikasa chami lelu.” (1 Sam. 17:46) Chimwahitili mpinji, Davidi wamukalakeleleña mwanta Sawulu nawa kapampa kakavulu Sawulu wakeñeleña kumujaha. Ilaña “Yehova wadiña” naDavidi. (1 Sam. 18:12) Chineli Davidi welukili nindi Yehova wamukwashili kunyima welukili cheñi nindi wukumukwasha cheñi nakukala kwamweniyi hayina mpinji. w22.01 6 ¶14-15

Muyuma yejima yelañayi, Yehova wadiwunjikaña kulonda yamanishi kuzata mudimu windi. Welaña mwenimu kulonda yajiliki ijina dindi nikukwasha antu. Chakutalilahu, toñojokenu Yehova chayileñeleliyi antu niiseki chovu-chovu. Hakulumbulula Yehova chadileñeliyi iseki, Bayibolu yashimuna “yesekelu yachu, kushimika “chikuku” nikusha “ilola dakwiwombu.” (Yoba 38:5, 6) Nawa wadiña ninampinji yakubanjila yuma yaleñeliyi. (Kutach. 1:10, 12) Fwikijenu chatiyiliwu añelu hakumona yuma yaleñeleñayi Yehova chovu-chovu. Azañaleli chikupu. Hamuloña wachumichi “hiyakudikuwa nakuzañalala.” Chumanyi chitunakudizilaku? Hahitili yaaka yayivulu hakwila nawu Yehova yamanishi kuleña, ilaña chatalileñayi yuma yaleñeliyi, wahosheli nindi “yinawahi.”—Kutach. 1:31. w21.08 9 ¶6-7

Munichi chishimu chaYesu iwu iyala wadiña halwendu. Henohu kanda yanyamuki, wayitambikili anduñu jindi nawa wayinkeli ntalenta kulonda aselujoleña. Dichi wayinkeli hamuntu-hamuntu kwesekeja nahakumina ñovu jawu. Wumu wamwinkeli ntalenta jitanu, mukwawu jiyedi nawa wamuchisatu yimu. Anduñu ayedi azatili nañovu kulonda awaninihu mali ahewulu ankaka yawu. Ilaña nduñu wamuchisatu, kwosi yuma yeliliyi namali amwinkeliwu nawa amuhañili mudimu kudi nkaka yindi. Nduñu watachi nduñu niwamuchiyedi alemesheli mudimu wayinkeliwu nawa amuzatilili nkaka yawu nañovu. Chafuminimu, avulishili ntalenta jankaaka yawu. Nkaaka yawu wayifweteli awa anduñu chazatiliwu nañovu. Nkaaka yindi wayihamekeli nawa wayinkelelihu nyidimu yikwawu. w21.08 21 ¶7; 22 ¶9-10

Yehova nadiwunjiki chikupu munanu mafuku akukuminina. Hakeñaña muntu hela wumu akajilumukiku. (2 Pet. 3:9) Nayinki antu ejima kukooleka kwakubalumuka mumuchima nawa afuukulihu chiwahi. Ilaña hakatwalekahu kudiwunjika haya nyaakaku. Antu ejima anakukaana kuhimpa haniyi mpinji, akamona chuma chochimu neyi chamweniyi Fwaro mumafuku aMosi. Yehova wamulejeli Fwaro nindi: “Nukwolola kwami chikasa chami dinu kulonda nikubabeshi nineyi niantu eyi ejima nanyisoñu; akakufumisha hanu hamaseki. Chalala dichi chinakulemesheli kulonda nikumwekesheli ñovu yami, kulonda ijina dami dakatiyakani mwejima mwahita maseki.” (Kwid. 9:15, 16) Nyuza yejima yakeluka nawu Yehova diyi Nzambi walala hohu. (Ezek. 38:23) Kukankisha kudi munsona yetu yalelu kwakatalisha kukujilumuka kwahaya nyaaka kwawantu adi neyi Fwaro, akaanaña kwiteja nawu Yehova diyi watelela kuyuula. w21.09 18-19 ¶17-18

Komana chinakuyikata kumuchima muloña ntaña yenu anamuhañi muchipompelu? Nawa mukwila ñahi neyi antu amakwawu muchipompeli ahosha yuma yikuyiletesha enu muneñi nankashi? Hitwatela kukuhwelela antu ejima kuhosha yuma yayiwahiku. (Yak. 3:2) Twawanina wanyi, dichi bayi muhayama neyi muntu wakañanyaña kwiluka yuma yayiwahi yatela kuhoshayi hela neyi yahosha mazu anateli kuyineñeshaku. Anukenuña kufumba kwakapostolu Pawulu kwahosheliyi nindi: “Ditiyililenuña wumu namukwawu nikudanakena wumu namukwawu chakufuma kumuchima hela chakwila kudi muntu wudi namuloña.” (Kol. 3:13) Twalekenuhu kukwasha antu amuchisaka ashinshika. Sweje-e dinu chayinu mpinji, anakukeña nawu muyikeñi nikuyikolesha chikupu. (Heb. 10:24, 25) Mpinji yikwawu, chisaka chikweti ntaña yawu anahañiwu muchipompelu, chatiyaña neyi ayikeña wanyi kudi antu amuchipompelu. Bayi mwiteja chuma chamuchidiwu kumwekanaku! Sweje-e dinu atwansi akweti anvwali jawu anafumi muchalala, akeñaña kuyihameka nikuyikolesha. w21.09 29 ¶13-14; 30 ¶16

Neyi atushinakaji niatwansi ahanjekaña, akudikoleshaña wejima wawu. (Rom. 1:12) Enu atwansi mukwiluka chikupu nenu Yehova wakamenaña ambuñindi ashinshika nawa atushinakaji niwena akwiluka nawu ayikeña. Akutiya kuwaha kuyileja chinayikiswiliwu kudi Yehova. Lubanji lwakumesu lwamanaña, ilaña muntu washinshika kudi Yehova lubanji lwindi lwaswejelañaku chikupu hachaaka-hachaaka. (1 Tes. 1:2, 3) Muloñadi? Muloña hadi yaaka yayivulu, aneteji spiritu yaYehova kuyidizisha nikuyikwasha kwikala nayilwilu yayiwahi. Neyi tuyiluka chiwahi amanakwetu niahela, tukuyilemeshaña nawa tukudizilañaku kudi wena, tukuyimonaña netu hiheta dasweja kulema! Chipompelu chaswejelañaku kukola neyi atwansi alemeshaña atushinakaji nawa atushinakaji niwena alemeshaña atwansi. w21.09 7 ¶15-18

Dichi tuzateña nañovu kulonda tubuleña kwikala akalisha nikwikala “naluwi nankashi” neyi chekalayi Nzambi. (Efwe. 2:4) Neyi tukweti luwi hitukukuminaña dakutiyila hohu akwetu wushonaku. Nawa antu akweti luwi ‘elaña yuma yikukwasha akwawu.’ Dichi wejima wetu twatela kuyikwashaña antu anakukeñeka wukwashu muchisaka, muchipompelu nimuchituñilu chetu. Kudi njila jajivulu mutunateli kumwekeshela luwi. Kudihu muntu wunakukeñeka kumukundeja? Kwila tumukwashaku nehi, hadaha kumwinkaku yakuda hela kumwililaku yuma yikumukwasha nehi? Komana kudihu mukwaKristu wunafuntishiwu muchipompelu, wukukeña muntu wakumukundeja nikumukolesha? Kwila tushimwina nsañu yayiwahi yakukundeja hamu nawakwetu nehi? (Yoba 29:12, 13; Rom. 10:14, 15; Yak. 1:27) Neyi twiluka netu antu amakwawu anakukeña kuyikwasha, tukumonahu njila mutunateli kuyitiyila luwi. Neyi tukutiyilaña akwetu luwi, tukumutiyisha Tata yetu wamwiwulu kuwaha, Nzambi “wasweja luwi nankashi.” w21.10 13 ¶20-22

MuIsamu 23, dejima dinashaliku, Davidi nateni yuma yalema chikupu chidi neyi yuma yayiwahi yamwililiwu kudi Yehova muloña wakwila wamwitejeli kwikala Kabiña kindi. Yehova wamulombweli Davidi “munjila jakuloña,” nawa wamukwashili Davidi mumpinji yayiwahi nimumpinji yatama. Davidi welukili nindi hela chakwila wadiña ‘mumunyenvu waYehova wututa’ wakamonaña kukala. Mpinji jikwawu waneñeleña neyi kwiji nakwenda “muchinekineki chamwidima wakufwa,” nawa wadiña nawayilumbu jindi. Ilaña hamuloña wakwila Davidi welukili nindi Yehova wadiña Kabiña kindi, ‘hatiyili woma chuma chatamaku.’ Munjilanyi Davidi ‘mwabuliliyi chuma chachiwahi nichimu’? Wadiña nayuma yejima yakeñeleñayi hakwila yatwalekihu kuswina kwakwihi naYehova. Muzañalu windi hiwashindameneni hayuma yakumujimbaku. Davidi watiyileña kuwaha nayuma yejima yamwinkeleñawu kudi Yehova. Yuma yalemesheliyi yena hinkisu yafumineña kudi Yehova nichamukiñileñayi. Kumazu aDavidi tunakudizilaku netu bayi tusweja kulemesha maheta muchihandilu chetuku. w22.01 3-4 ¶5-7

Kufuma tuhu kunyima, ambuña aYehova amavulu ashimwinineña antu abulileña kwiteja nsañu yayiwahi. Chakutalilahu, Nowa wadiña “mukwakushimwina kuloña,” hadi yaaka yayivulu. (2 Pet. 2:5) Chakadi nikujina, wakuhweleleli nindi antu amakwawu aketeja nsañu yashimwinineñayi, ilaña Yehova hamwekesheli nindi chumichi chikamwekanaku. Dichi, Nzambi chamulejeliyi Nowa kutuña watu wamulejeli nindi: “Wakeñila muwatu, nineyi, nianyaneyi, niñodeyi, niañodi jawanyaneyi hamu naneyi.” (Kutach. 6:18) Chamulejeliwu kudi Yehova kutalisha hakutoha kwawatu wateleli kutuñayi, hadaha Nowa welukili nindi antu amavulu akamutiyilila wanyi muloña watu wadiña wanyanya. (Kutach. 6:15) Neyi chitweluka, kwosi muntu niwumu wamutiyilili Nowa. (Kutach. 7:7) Komana Yehova watoñojokeli nindi Nowa washimwinini chiwahi wanyi? Inehi mwani! Yehova watiyili kuwaha namudimu wazatiliyi Nowa, muloña wazatili mudimu wamwinkeliwu kuzata.—Kutach. 6:22. w21.10 26 ¶10-11

Fwikijenu chatiyiliyi Luti hakutiya awa mazu ahosheliyi Nyawomi! Luti wazatili hakumina ñovu yindi kulonda yamukwashiku Nyawomi. Luti wadililili hamu naNyawomi, wamukundejeli nawa endeli lwendu hamu hadi mafuku amavulu. Hela chakwila wamwilili yuma yejimiyi, Nyawomi wahosheli nindi: “Yehova nanfuntishi cheñi kunu makasakasa hohu.” Hela chakwila Luti wadiña naNyawomi haniyi mpinji, mazu ahosheliyi amwekesheli nawu wasakililili wanyi chamukwashiliwu kudi Luti. Chakadi nikujina, awa mazu amuneñesheli nankashi Luti. Hela chochu, Luti hamushiyili Nyawomiku. (Luti 1:3-18) Makonu, muhela wunaneñi nateli kuhosha mazu anateli kutuneñesha hela chakwila tunamukwashi nankashi. Ilaña bayi tuhilaku. Twatela kutwalekahu kumukwasha muhela wunakankili nikulomba kudi Yehova yatukwashi kulonda tuwani njila mutunateli kumukundejela. (Yish. 17:17) Muhela wunakaankili hakusambila nateli kukaana kumukwasha. Hela chochu, kukeña kwakashinshi kukutukwasha kutwalekahu kumukwasha.—Ñal. 6:2. w21.11 11 ¶17-19

MuBayibolu izu ‘dakujila’ datalisha kuyilwilu yayiwahi nikukudifukula kwakadi majilu. Idi izu dinateli kutalisha cheñi kukumukalakela Nzambi hohu. Munjila yikwawu, anateli kututena nawu tudi ajila neyi twikala nayilwilu yayiwahi, tudifukulaña kudi Yehova munjila yetejayi nawa twikala nawubwambu wawuwahi nayena. Chatuhayamishaña chikupu hakwiluka netu hela chakwila twawanina wanyi nawa Nzambi wajila, wakeñaña nindi twikali amabwambu jindi, sweje-e neyi twiluka chahosha Bayibolu kutalisha hakujila kwaYehova. Yehova wajila muyuma yejima. Dichamutenañawu kudi Asafi hela netu añelu emanaña kwitanda dindi. Amakwawu abidikaña nawu: ‘Yehova wamazaza Wajila, Wajila, Wajila.’ (Isa. 6:3) Hela chochu, hakwila ekali nawubwambu naNzambi yawu wajila, añelu atela kwikala ajila nawa ekala ajila. w21.12 3 ¶4-5

Kakavulu atwansi akamenaña yuma yakelawu muchihandilu chawu. Mpinji yikwawu antañishi niantaña abula kwikala aYinsahu jaYehova ayilejaña kuya kumashikola amaneni kulonda akeñili mudimu wamali. Kuya kuniyi shikola kunateli kuda mpinji yeneni. Kwambukaku, anvwali niamabwambu jawu muchipompelu ayilejaña atwansi kumukalakela Yehova muchihandilu chawu. Chumanyi chinateli kumukwasha kansi wamukeña Yehova kufuukula chiwahi? Chuma chikumukwasha hikutaña nikutoñojoka AEfwesesa 5:15-17. Neyi natañi dehi awa mavasi, nateli kudihula nindi: “Chumanyi ‘chinakukeñayi Yehova’? Nukumutiyisha ñahi kuwaha? Nukwila ñahi hakwila nizatishi chiwahi mpinji yami?” Ilukenu nenu “anu mafuku anatami” nawa kaayi kanakuyuulawu kudi Satana keña kakumi. w22.01 27 ¶5

Mpinjinyi Yakoba yekalili kambanji kaYesu? Chelili Yesu anamusañuli dehi, “wamwekeni kudi Yakoba, nikudi apostolu ejima.” (1 Kor. 15:7) Hanyima yakuna kubulakana Yakoba wekalili kambanji kaYesu. Wadiña hamu nawapostolu hampinji yahembeleleñawu spiritu yajila yayikaniniwu mukapeka kahewulu muYerusalema. (Yilw. 1:13, 14) Chimwahitili mpinji, Yakoba wekalili membala wamwizanvu dalombolaña dawakwaKristu akusambila. (Yilw. 15:6, 13-22; Ñal. 2:9) Nawa chimwahitili mpinji henohu chaaka cha 62 C.E., kanda chishiki, amoneneni kusonekela akwaKristu awayishewa mukanda. Iwu mukanda watukwashaña ninetu makonu, hela chakwila tukweti kuchiñeja kwakuya mwiwulu hela kwakushakama hamaseki. (Yak. 1:1) Kwesekeja namukwakushimuna nsañu wakunyaka wamumafuku awapostolu Josephus, washimwini nindi, Kapristu Muneni Ananiya Wakansi wahanini lushimbi nindi amujahi Yakoba. Yakoba wadiña washinshika kudi Yehova sampu nichafwiliyi. w22.01 8 ¶3; 9 ¶5

Chuma chimu chitwatela kudizilaku kunsona yalelu chidi chakwila nawu hitwatela kukuhwelela Yehova kutukiña kuyuma yinakweseka chikuhwelelu chetuku. Neyi chochamwesekeliwu Yesu, ninetu twatela kwikala ashinshika kushika nikukufwa. (Mat. 16:24, 25) Hela chochu, twatela kukuhwelela netu Nzambi hakutwiteja kuhita mukweseka kunabadiki muñovu jetuku. (1 Kor. 10:13) Tukudizilaku cheñi netu anateli kutukabisha chakadi muloña neyi Yesu. (1 Pet. 2:19, 20) Antu atudimbululaña atukabishaña muloña hitwekala amukanu kaayiku nawa twashimwinaña wunsahu wachalala bayi hamuloña wakuluwañeshaku. (Yow. 17:14; 1 Pet. 4:15, 16) Yesu welukili chaletesheli Yehova yamwiteji kukabakana. Akwakudifukula amakwawu ashinshika ehulaña mpinji yikwawu chetejelañayi Yehova yuma yatama yimwekaneña. (Hab. 1:3) Nzambi yetu waluwi nawa wadiwunjika weluka nindi awa antu bayi neyi abula chikuhweleluku, ilaña akeñaña yena yayikundejeña.—2 Kor. 1:3, 4. w21.04 11 ¶9-10

Yehova wukwiteja kudifukula kwetu neyi kunakwendela hamu nankeñelu yindi nawa tunakukuhana nakukeña ninakalemesha. Tweluka netu kudi Yehova dikutwatela kudifukula nawa tunakukeña chawaana chetu chakudifukula chikali chachiwahi. Njila yimu mutwadifukwilañamu kudi Yehova hikulomba. Nsona jesekeja kulomba kwetu nainsensi yinaloñeshiwu chiwahi yocheleñawu hatabanaka nkumininaku hatembeli. Iyi insensi yamutiyishileña Nzambi kuwaha. Munjila yoyimu, kulomba kwetu kwakufuma hamuchima “kwamuzañaleshaña,” hela chakwila tunazatishi mazu apela. (Yish. 15:8; Kuhit. 33:10) Chamutiyishaña Yehova kuwaha neyi yamona chitwamukeña nichitwamusakililaña. Wakeñaña tumulejeña yuma yitunakutoñojoka, yitunakukeña niyitunakufwila. Henohu kanda mulombi kudi Yehova, kwila mutoñojokahu hamazu imwatela kuzatisha nehi? Neyi mwila mwenimu, mukulambula “insensi” yayiwahi kudi Tata yenu wamwiwulu. w22.03 20 ¶2; 21 ¶7

HaAmagedoni, etu tukweti wanyi wuswa wakufuukulahu muntu atela kutiyilawu luwi kudi Yehova hela nehi. (Mat. 25:34, 41, 46) Komana twaketeja mwakafuukulayi Yehova, tahindi twakaleka kumukuhwelela muloña wakwila tuneteji wanyi munafuukuliyi? Mwamweni, twatela kumukuhwelela Yehova chayinu mpinji kulonda twakamukuhweleli chikupu nikumbidi. Fwikijenu chitwakatiya mwituña dadiha. Kwitiya kwakutwamba kwakekalaku wanyi nawa akwakulanda nakulandulula akwalwisu akekala kwosi hela nfulumendi yawantu yinakabishi antu hadi yaaka yayivulu. Kwakekala kwosi kukatakata, wushinakaji nikufwisha antaña jetu itwakeña. Satana hamu niandemoni jindi akayikasa hadi yaaka ikombakaji. Yuma yatama yamwekanaña hamuloña wakudikaña kwawu yakajiya. (Chim. 20:2, 3) Twakatiya kuwaha hakwiluka netu twakuhweleleli munjila mwelilañayi Yehova yuma! w22.02 6-7 ¶16-17

Yesu diyi wadiña mutachi kuleta kuwunda nawa wakolesheli amakwawu kumanisha kukala mulwawu. Wayilejeli nindi atela kuleta kuwunda namanakwawu neyi chakwila anakukeña nawu Yehova eteji kudifukula kwawu. (Mat. 5:23, 24) Nawa kakavulu wayikwashili apostolu kulonda aleki kuditadikisha hamuntu wadiña mukulumpi hakachi kawu. (Luka 9:46-48; 22:24-27) Hakwila twikali akakuleta kuwunda, twatela kuzata nañovu kubadika kutondolwela hohu kuleta yikonkojola. Twatela kuzata nañovu kulonda twikaleña atachi kuleta kuwunda nawakwetu nikuyikolesha amanakwetu niahela kulonda amanisheña kukala mulwawu. (Fwili. 4:2, 3; Yak. 3:17, 18) Twatela kudihula etu aweni netu: ‘Chumanyi chinatela kuleka kulonda nileteña kuwunda nawakwetu? Neyi manakwetu hela muhela naneñeshi, komana namuhembelaña nkunyi? Komana nahembelelaña mukwetu kulonda yasambilihu kwinza nakuleta kuwunda nanami ntahindi natachikilañahu hela chakwila mukwetu diyi wavundumuna oku kukala?’ w22.03 10 ¶10-11

Bayibolu yashimwineñahu dehi nawu antu jaNzambi “akadihana namuchima wumu” hakumukalakela Yehova iku anakulondela wunlomboli waYesu. (Mas. 110:3) Chakadi nikujina, iwu wuprofwetu wunakushikijewa makonu. Chaaka nichaaka, ambuña aYehova azataña maora amavulu mumudimu wakushimwina. Ayifwetaña wanyi ilaña azataña mukudikeñela. Awanañaku cheñi mpinji kulonda akwasheña akwawu akakwitiya kuhitila mukuyikolesha nikuyikwasha kulonda amukeñi chikupu Yehova. Akulumpi niankoñi akuzatila azatishaña mpinji yeneni nakuloñesha jimpanji nikuya nakubiña akwawu akakwitiya. Chumanyi chayikojejaña antu jaNzambi kuzata iyi nyidimu? Muloña amukeña Yehova niakwawu antu. (Mat. 22:37-39) Yesu watwamijileñaku yuma yakeñeleñawu antu kubadika yakeñeleñayi. Tunakuzata hakumina ñovu yetu kulonda tumwimbujoleña. (Rom. 15:1-3) Neyi tumwimbujolaña mukafuma yuma yayiwahi. w22.02 20 ¶1-2

MuIsarela antu amavulu adiña andimi nawa antu ayizatilileña ayifweteleña hefuku-hefuku neyi anamanishi kuzata. Neyi kumufweta muntu wunamukalakeleña nehi, iwu muntu hadi kwikala namali akuhandilamu hanodi ifukuku. Yehova walumbulwili nindi: “Yena hikazweñi, nashuhu muchima windi.” (Kuhit. 24:14, 15; Mat. 20:8) Makonu, antu eñijawu nyidimu ayifwetaña kamu hela kayedi mukakweji, bayi hefuku-hefukuku. Hela chochu, chishina chidi haALevi 19:13 chichidi kuzatika nimakonu. Akwakwiñija nyidimu amakwawu ayidiilaña antu eñijawu nyidimu mabula hamutu. Dichi ayinkaña nfwetu yantesha iku anazati mudimu weneni. Eluka nawu antu eñijawu mudimu akweti wanyi mwakwilila nawa akutwalekahu kuzata hela anakuyinka wufwetu wantesha. Munjila yikwawu, akwakwiñija nyidimu amuchidiwu ‘ayidiilaña antu ayikalakelaña.’ MukwaKristu weñija antu nyidimu watela kuyifwetaña antu nfwetu yashikila. w21.12 10 ¶9-10

Chelili Yesu wakabakeni nankashi, watela watiyili mpwila nankashi. Wakeñeleña wukwashu kulonda mpwila yindi yimani. Yesu watoñojokeli nindi chatama wanyi kushimuna chinakutiyayi, ninetu twatela kushimunaña chitunakutiya. Hadaha twakeñaña wanyi kulejaku akwetu yuma yitunakaankili. Ilaña neyi chakwila yuma yinatukalili, twatela kuleja akwetu kulonda atukwashi. Chakutalilahu, neyi twakula dehi hela twakata twatela kulejaku mukwetu kulonda yatutwali nakulanda tuyuma hela nakudimona nandotolu. Neyi tunaneñi, twatela kulejaku mukulumpi wudi wejima hela mukwetu mukwaKristu wapama wunateli kututiyilila hela kutukolesha ‘nezu dadiwahi.’ (Yish. 12:25) Anukenuña nenu amanakwetu niahela atukeña nankashi nawa akeñaña kutukwasha ‘mumpinji yakala.’ (Yish. 17:17) Ilaña akwiluka wanyi yuma yitunakutoñojoka hela kutiya. Anateli kwiluka wanyi nawu tunakukeña wukwashu chiña neyi tuyileja. w21.04 11-12 ¶11-12

Etu amavulu yuma yatukalilaña neyi yuma yinahimpiki muchihandilu. Amakwawu anakalakali mumudimu wampinji yejima hadi yaaka yayivulu mudimu wawu wunahimpiki hela kumana. Amakwawu aleka kuzata mudimu wawu wakeñesheliwu hamuloña wakukula. Neyi chuma chamuchidiwu chinatumwekeni twaneñaña. Chatupelelaña kuumika kukala neyi tunakumona yuma neyi chayimonañayi Yehova. Yehova nakukoña yuma yamaneni makonu, nawa tudi akakukalakala hamu nindi. (1 Kor. 3:9) Kukeña kwatukeña Yehova kwahimpikaña wanyi. Dichi, neyi kuhimpika kudi mukuloñesha kwinza hadi enu, bayi mumbaña mpinji yenu nakutoñojoka hayuma yinaleteshi ayihimpiku. Chatela mwanukeña “mafuku akunyima,” mulombenu Yehova kulonda ayikwashi mumoneña yuma yayiwahi yinafumi mukuhimpika. (Mukwa. 7:10) Monenuña yuma munjila yayiwahi. Dichi, tukutwalekahu kwikala namuzañalu nawa ashinshika hela chakwila chihandilu chinahimpiki. w22.03 17 ¶11-12

Anyi amwekeshelañayi Yehova kukeña kwakashinshi? Bayibolu yashimuna nawu tunateli kukeña yuma yayivulu, chidi neyi “wundimi,” “vinyu nimanji,” “kufumbewa,” “kwiluka,” “maana” niyuma yikwawu. (2 Kushi. 26:10; Yish. 12:1; 21:17; 29:3) Hela chochu, kukeña kwakashinshi hiyakumwekeshelaña muyuma yidi yejimaku; antu hohu diwu amwekeshelañawu kukeña kwakashinshi. Ilaña Yehova hamwekeshelaña muntu wudi wejima kukeña kwakashinshiku. Wayimwekeshelaña hohu antu akweti wubwambu wawuwahi nayena. Nzambi yetu wekala washinshika kudi amabwambu jindi. Wayikana yuma yayiwahi nawa hakuleka kuyikeñaku. Yehova wayikeña antu ejima. Yesu wamulejeli Nikodemu nindi: “Muloña Nzambi wakeñeli nankashi kaayi chakwila watemesheli Mwanindi wumu hohu, kulonda muntu wejima wukumukuhwelela yakabuli kujilumuka, ilaña yakekali nawumi wahaya nyaaka.”—Yow. 3:1, 16; Mat. 5:44, 45. w21.11 2 ¶3; 3 ¶6-7

Chihandilu muyinu nshakaminu chakola, nawa hadaha tunateli nikumona kukala kwasweja kumbindi. (Mat. 24:21) Tunakutalila mpinji yakela kukala kwejimiku kunahiti dehi, mpinji yitukavulamena yuma yejimiyi nawa yiyakabulaña kumwekana cheñi! (Isa. 65:16, 17) Dichi, twatela kutwalekahu kudiza chakuumika. Muloñadi? Muloña Yesu wahosheli nindi: “Neyi mwakomika, mwakapulwisha mawumi enu.” (Luka 21:19) Neyi tutoñojoka hadi akwetu chinakuumikawu kukala kudi neyi kutunakumona, chinateli kutukwasha kutwalekahu kuumika. Hinyi womikaña chikupu itwatela kwimbujola? Yehova Nzambi. Komana munahayami hakutiya iyi ñakwilu? Hadaha munahayami, ilaña neyi mutoñojokahu, mukuhayama wanyi. Kanu kaayi anakukiyuula kudi Diyabolu, nawa mudi kukala kwakuvulu. Yehova wukweti ñovu yakufumishahu iku kukala neyi mukulabula kwadisu, ilaña nakutalila ifuku dakumbidi kulonda yakeli mwenimu. (Rom. 9:22) Chayinu mpinji, Nzambi yetu natwalekihu kuumika sampu mpinji yatoñolayi yinashiki. w21.07 8 ¶2-4