September

Antu amakwawu mumafuku aYesu akeñeleña yinjikijilu yayivulu. Ilaña chakaaniniyi kuyikoñela chinjikijilu chakeñeleñawu, ahukeni. (Mat. 16:4) Nsona jahoshaña nawudi? Kaprofwetu Isaya wasonekeli hadi Mesiya nindi: “Hakabilela hela kubobola hela kutiyakesha izu dindi hanzuku.” (Isa. 42:1, 2) Yesu wazatileña mudimu windi wakushimwina chakadi kudituumbakesha. Hatuñili matembeliku, nawa wavwalileña wanyi yakuvwala yambukaku yawakulumpi jakwitiya hela kumutena majina ajinkumbu jakwitiya. Hampinji yamwihwileñawu, Yesu wakaanini kumutiyisha Mwanta Herodi kuwaha chakaaniniyi kumumwekeshela chinjikijilu. (Luka 23:8-11) Yesu wakoñeleña yihayamisha, ilaña washili muchima hakushimwina nsañu yayiwahi. Wayilejeli atumbanji twindi nindi, “muloña dichuma chinenjilili.”—Maku 1:38. w21.05 4 ¶9-10

Tunakukeña antu adi “nanyichima yashinshika yakukeña kwikala nawumi wahaya nyaaka.” (Yilw. 13:48) Hakwila tuyikwashi awa antu ekali atumbanji, twatela kuyikwasha kulonda (1) atiyishishi, (2) eteji (3) nawa azatisheña yuma yinakudizawu muBayibolu. (Kol. 2:6, 7; 1 Tes. 2:13) Ejima muchipompelu atela kuyikwashaña awa atudizi aBayibolu kuhitila mukuyimwekeshela kukeña nikuyitambwila neyi anenzi nakupompa. (Yow. 13:35) Muntu wunakulombola kadizi watela kuzatisha mpinji nikuzata nañovu kukwasha kadizi windi kuleka yuma yakuhwelelayi “yashimata chikupu” hela yelañayi. (2 Kor. 10:4, 5) Hanateli kuhita tukweji twatuvulu hakwila tukwashi muntu kuhimpa kulonda yashikihu nakupapatishewa. Ilaña neyi yahimpa chinateli kumukwasha. w21.07 3 ¶6

Komana tweluka chikupu netu yuma yitwadizishaña dichalala nawa njila yadifukwilañamu aYinsahu jaYehova makonu diyi njila yetejayi Yehova? Kapostolu Pawulu wakuhweleleli chikupu nindi ichi dichalala. (1 Tes. 1:5) Hakuhweleleli chumichi hamuloña wakutiya hohu kuwahaku. Pawulu wadizileña nankashi Izu daNzambi. Wakuhweleleli nindi “Nsona yejima ayonena kudi Nzambi.” (2 Tim. 3:16) Yumanyi yadiziliyi? MuNsona, Pawulu wawaninimu wunsahu wamwekesheleña nawu Yesu diyi Mesiya akaniniwu, niwunsahu wamwekesheleña nawu akulumpi jansakililu yawaYudeya adiwili chumichi. Ahosheleña nawu ayidizishileña antu chalala chaNzambi, ilaña elileña yuma yahelayi Nzambi. (Tit. 1:16) Kwambukaku nawena, Pawulu hatondelihu yuma yatela kukuhwelelayi Mwizu daNzambi niyatela kubula kukuhwelelayiku. Watañishileña nikuzatisha yuma “yejima yaNzambi.”—Yilw. 20:27. w21.10 18 ¶1-2

Hampinji yitunakutumba nikutukumwina, twatela kwanukaña netu Nzambi diyi wukweti mudimu wakukulisha. (1 Kor. 3:6, 7) Yehova wamonaña antu ejima nindi alema. Watwinka kuzatila hamu naMwanindi mudimu wakupompesha antu akunyuza yejima henohu kukuma kwanshakaminu yamakonu kanda kushiki. (Hag. 2:7) Mudimu wakushimwina tunateli kuwesekeja namudimu wakupulwisha antu. Nawa tudi neyi antu anatemeshiwu kuya nakupulwisha antu anabutiliwu kudi maseki mumugoti. Hela chakwila antu antesha diwu anawaniwu amomi, mudimu wunazatiwu akwakupulwisha walema nankashi. Dichidi nimudimu wutwazataña wakushimwina. Tuneluki wanyi antu añahi itunateli kupulwisha mukaayi kaSatana. Yehova nateli kuzatisha muntu wudi wejima kulonda yayikwashi. Manakwetu Andreas, washakamaña muBolivia, wahosheli nindi, “Namonaña muntu wejima wunadizi Bayibolu nawa yapapatishewa nami himudimu wazatiluwu antu amavulu.” Ninetu tutwalekenuhu kushimwina chakadi kuzeya. Neyi twila mwenimu, Yehova wukutukiswila nawu tukwikala namuzañalu chikupu mumudimu wetu wakushimwina. w21.05 19 ¶19-20

Chuma chafwilañayi chibinda hikulawula kanyama hela kumujaha. Nateli kuzatisha nyihetu yashiyashana ninyihetu yashimwiniyi wumu wahadi amabwambu jaYoba akutwamba. (Yoba 18:8-10) Chibinda nateli kukokola ñahi kanyama kulonda yafwi mumuhetu windi? Welukaña chidiyi kanyama nakudihula nindi, wayaña kudihi? Yumanyi yakeñayi? Muhetu wamuchidinyi wunatela kuzatisha? Satana niyena wudi neyi iwu chibinda. Watwiluka chiwahi. Wamonaña kutwayaña niyuma yitwasweja kukeña. Kuhiñahu wataña muhetu wunelukiyi nindi nateli kutulawula nachu chakadi kwiluka. Hela chochu, Bayibolu yatulejaña nawu neyi anatulawuli, tunateli kusopokamu. Yatudizishaña cheñi chitunateli kutondolwela iyi nyihetu yejima. Nyihetu yavula kuzatishayi Satana hikudivwimba nilwisu. Hadi yaaka yayivulu, Satana nazatishi iyi yilwilu yiyedi. Wudi neyi chibinda chawatujila, wayikokwelaña mumwonji windi hela mukaleñi kindi. (Mas. 91:3) Ilaña Satana hatela kutulawulaku. Muloñadi? Muloña Yehova natuleji tufuta twazatishañayi Satana.—2 Kor. 2:11. w21.06 14 ¶1-2

Munjila yoyimu, amanakwetu niahela ashinakaja alema chikupu. Izu daNzambi desekeja invu jawu nachibañula. (Yish. 20:29) Chinateli kwila chaswayi kuyimona netu alema wanyi. Atwansi amonaña nawu atushinakaji alema nankashi, adizilañaku yuma yayivulu kudi wena. Yehova Nzambi wayilemesha nankashi atushinakaji ashinshika. Wayimonaña chekalawu nawa walemesha yilwilu yayiwahi yikwetiwu. Watiyaña kuwaha neyi yamona atushinakaji anakulejaku atwansi yuma yayiwahi yinadiziwu hayaaka yejima yinamukalakeliwu Yehova. (Yoba 12:12; Yish. 1:1-4) Yehova watiyaña cheñi kuwaha chomikañawu. (Mal. 3:16) Anamoni kukala kwakuvulu muchihandilu chawu, ilaña anatwalekihu kumukuhwelela Yehova. Anakuhweleli chikupu muyikaninu yakumbidi kubadika chiyadiña hampinji yadiziliwu chalala. Yehova wayikeña chikupu muloña anatwalekihu kushimwina ijina dindi “nimuwushinakaji.”—Mas. 92:12-15. w21.09 2 ¶2-3

Chachiwahi kushinshikaña chidi yilwilu yetu mpinji yejima. Dihulenu nenu: ‘Komana natiyaña kuwaha hohu neyi nitoñojoka nami nabadika mukwetu? Komana nazataña nañovu muloña nakeñaña kwikala wayibadika amanakwami niahela? Tahindi nazataña nañovu kulonda nimuzañalesheña Yehova?’ Bayibolu yatulejaña nawu bayi tudesekejaña nawakwetuku. Muloñadi? Chatachi, neyi tutoñojokaña netu tunakuzata nañovu kubadika amanakwetu tukwikala adivwimba. Ilaña, cheñi neyi tutoñojokaña netu amanakwetu niahela elaña chiwahi kubadika etu, tukuzeya. (Rom. 12:3) Twatela kwanukaña netu bayi neyi Yehova watukokela kwakwihi nayena muloña wakuwaha, kuhosha chiwahi hela muloña wakwila antu amavulu atukeñaku, ilaña muloña wakwila twamukeña nawa twamutiyililaña Mwanindi.—Yow. 6:44; 1 Kor. 1:26-31. w21.07 14-15 ¶3-4

Hakwila tuhimpi yitoñojoka, twatela kulombaña, kudiza Izu daNzambi nikutoñojokahu chikupu. Dichi twalekenuhu kwila mwenimu nawa mulombenuña Yehova yayinki ñovu yikuyikwasha kuumika. Spiritu yindi yajila yikuyikwasha kuleka kudesekeja nawakwenu. Yehova wukuyikwasha cheñi kwiluka neyi chakwila mukweti lwisu hela mwekala adivwimba, wukuyikwasha kwiluka swayi-swayi. (2 Kushi. 6:29, 30) Yehova weluka yitoñojoka yetu. Weluka nindi twazuñaña nayitoñojoka yatama yamukanu kaayi nikubula kuwanina kwetu. Neyi Yehova yamona chitwalwishaña naniyi yuma, waswejaña kutukeña. Hakulumbulula chatiyañayi hadi etu, Yehova wazatisha chakutalilahu chamama yawantu namwanindi. (Isa. 49:15) Chatukundejaña hakwiluka netu Yehova watukeña nankashi neyi yamona nindi tunakuzata nañovu hakwila nawu tumukalakeleña namuchima wetu wejima! w21.07 24-25 ¶17-19

Tunateli kwikala namuzañalu chikupu neyi tudikitaña mumudimu wejima wutukweti mumudimu waYehova. Shenuña “muchima chikupu hamudimu wakushimwina” nawa zatilenuña hamu nachipompelu. (Yilw. 18:5; Heb. 10:24, 25) Yenuña kukupompa iku munaloñeshi kulonda muhaneña ñakwilu jikukolesha antu. Monenuña mpanji yawatudizi yamukachi kamulungu nenu yalema. Neyi anayinki mudimu muchipompelu, wuzatenu mukunyakashana. Bayi mutoñojokaña nenu mudimu wunayinkiwu wamukunkulwayiku nawa nenu kwila mumanishilahu mpinji nehi. Zatenuña nañovu kulonda muwahishiku nzatilu yenu. (Yish. 22:29) Neyi muzataña nañovu mumudimu waYehova, mukwikala ibwambu dindi nawa mukwikala namuzañalu chikupu. (Ñal. 6:4) Mukutiyaña wanyi kutama neyi akwenu ayinka mudimu wumwafwilaña.—Ñal. 5:26. w21.08 22 ¶11

Twatela kutondolwela kwikala adivwimba nawa twatela kutwalekahu kwikala adizoza kulonda atudizisheña kudi Yehova. Chikatu chinateli kuletesha muchima wamuntu kubula kuzata chiwahi, kubula kudizoza nikwena kunateli kuletesha muntu kudikaña nawunlomboli waYehova. Afwarisi adiña adivwimba chakwila akaanini kwiteja wunsahu wamwekesheleña nawu Yesu wadiña naspiritu yaNzambi nawa wadiña Mwana kaNzambi. (Yow. 12:37-40) Kudivwimba kwawu kwatamini muloña kwayikañesheli kutambwila wumi wahaya nyaaka. (Mat. 23:13, 33) Dichi, chalema nankashi kutwalekahu kwiteja Izu daNzambi nispiritu yindi yiwumbi yilwilu yetu, yitoñojoka yetu nikutukwasha muyuma yitwafuukulaña! Chineli Yakoba wadiña wadizoza, wamwitejeli Yehova kulonda yamudizishi. Neyi chitukudiza, kudizoza dikwamukwashili kwikala ntañishi wamuwahi. w22.01 10 ¶7

Neyi tuzatisha iku kufumba “[nikulomba] chakadi kuzeya,” tukukuhwelela netu Tata yetu wamwiwulu wukutiya nawa wukwakula kulomba kwetu. (Kol. 4:2) Hela chakwila hakushimbula hakwila nawu yatwakuli, Yehova watushiika nindi wukwakula kulomba kwetu “hampinji yatelela.” (Heb. 4:16.) Dichi bayi tumutwika Nzambi nyiloña neyi kulomba kwetu anakwakuli wanyi mukunyakashana kwesekeja nachitunakutoñojoka. Chakutalilahu, hadi yaaka yayivulu antu amavulu analombi nawu Wanta waNzambi winzi nakufumishahu yinu nshakaminu. Yesu niyena wahosheli nindi twatela kulomba haniwu Wanta. (Mat. 6:10) Hiwusupi neyi muntu yaleka kumukuhwelela Nzambi muloña wakwila kukuma hikunashiki kwesekeja nachakuhweleleliwu antuku. (Hab. 2:3; Mat. 24:44) Chikuwaha neyi tutwalekahu kumuchiñilila Yehova nikulomba nakukuhwelela netu wukwakula kulomba kwetu. Kukuma kwakenza hampinji yatelela, muloña Yehova watonda dehi “ifuku niora” yikwakenza. Iyi yakekala mpinji yayiwahi kudi antu ejima.—Mat. 24:36; 2 Pet. 3:15. w21.08 10 ¶10-11

Amanakwetu adikehesha akula dehi, neyi hiyakushinakaja elukaña nawu hiyanateli kuzata neyi chiyazatileñawuku. Chakutalilahu, toñojokenu hadi ankoñi añinza. Neyi anashikiji yaaka 70, ayilejaña kutachika kuzata mudimu wacheñi. Chumichi chinateli kuyikalila. Atiyileña kuwaha kukalakela amanakwawu. Ilaña, eluka nawu chikuwaha neyi amanakwetu achidi atwansi azata iwu mudimu. Amwekeshaña muchima wowumu neyi wadiña nawaAlevi muIsarela, alejeliwu nawu neyi anashikiji yaaka 50 atela kuleka mudimu wazatileñawu hatabanaka. Awa Alevi adiña namuzañalu hichikweti muloña namudimu wazatileñawuku. Azatileña nañovu jawu jejima kulonda akwashi atwansi. (Kuch. 8:25, 26) Makonu neyi ankoñi añinza anashikiji yaaka 70 alekaña kwendela yipompelu yayivulu, ilaña akwashaña nikukolesha yipompelu mwekalawu. w21.09 8-9 ¶3-4

Yesu washimwini nsañu yamwana wajimbeli yekala haLuka 15:11-32. Mukwenzi weyala wadikañili natata yindi, wafumini hetala, nawa wayili “kwituña dakwakulehi.” Watachikili kushakama chihandilu chatama. Chihandilu chichatachikili kumukalila, watachikili kutoñojoka hayuma yeliliyi. Wenjili nakwiluka nindi washakamineña chiwahi hadiñayi kwitala datata yindi. Neyi chahosheliyi Yesu, iwu mukwenzi weyala watachikili cheñi “kutoñojoka chiwahi.” Wafuukwilihu kufunta kwitala nakumulomba tata yindi nindi yamwanakeni. Chadiña chalema muloña iwu mwana welukili nindi waluwañesheli nankashi. Wateleli kuhimpa yilwilu yindi. Mwana wajimbeli wamwekesheli nindi wabalumukili chikupu mumuchima hayuma yeliliyi. Ichi chishimu, hinsañu yakutiyisha hohu kuwahaku. Iyi nsañu yinateli kuyikwasha akulumpi kwiluka neyi muntu wunakoñi nshidi yeneni nabalumuki chikupu mumuchima hela nehi. w21.10 5 ¶14-15

Chumanyi chikabula kukankishawu hela kuchifumishahu? Kapostolu Pawulu wasonekeli nindi: “Chituneluki netu twakatambwila Wanta wabulaña kukankishawu, tutwalekenuhu . . .kumukalakela Nzambi chiwahi mudimu wajila nakumutiya woma nikumwakama nankashi.” (Heb. 12:28) Hanyima yakwila kukankisha kwakukumishaku kunahiti dehi, Wanta waNzambi hohu diwu wakabula kukankishawu. Wakemana mbe haya nyaaka. (Mas. 110:5, 6; Dan. 2:44) Mpinji yinamani dehi. Antu atela kutondahu: Neyi akutondahu kuhakwilaku nfulumendi yamukaayi, akayijilumuna. Ilaña neyi atondahu kumukalakela Yehova, nikuhimpa yilwilu yawu kulonda eleña nkeñelu yindi, akekala nawumi wahaya nyaaka. (Heb. 12:25) Neyi tushimwinaña, tukuyikwasha antu kutondahu kukabadi kwatela kwikalawu. Nawa mpinji yejima twanukeña mazu aMwanta wetu Yesu, ahosheliyi nindi: “Ninsañu iyi yayiwahi yaWanta akayishimwina mwahita iseki dejima mwashakamawu antu kulonda yikekali wunsahu kudi akwanyuza yejima, mwaka dinu kukuma kwakenzi.”—Mat. 24:14. w21.09 19 ¶18-20

Akulumpi, mudi namudimu weneni nankashi wakukundeja akwenu akwakudifukula akweti antaña jawu analeki kumukalakela Yehova. (1 Tes. 5:14) Yikoleshenuña henohu kupompa kanda kutachiki nihanyima yakupompa. Yendelenuña kumatala awu nawa yilombelenuñaku. Yenuña nakushimwina hamu nawa mpinji yikwawu yitambikenuñaku kukudifukula kwachisaka. Akulumpi atela kuyakamenaña antu ananeñi, kuyitiyila wushona nikuyimwekeshela kukeña. (1 Tes. 2:7, 8) Yehova “hakeñaña muntu hela wumu akamujilumuniku, ilaña wakeñaña nindi antu ejima ekali nakukooleka kwakubalumuka munyichima.” (2 Pet. 3:9) Hela chakwila muntu wukukoña nshidi yamuchidinyi, wumi windi walema kudi Nzambi. Toñojokenu hawuseya wahaniniyi Yehova, ifutu danyiloña daMwanindi akeñayi kukola nshidi jetu. Muloña wakukeña, Yehova wesekaña kuyikwasha awa antu kulonda afunti kudi yena. Wakuhwelelaña nindi akufunta kudi yena, neyi chashimunawu muchakutalilahu chaYesu chamwana wajimbeli.—Luka 15:11-32. w21.09 30-31 ¶17-19

Indi neyi himukutwesha kushimwina hela kudizisha neyi chimwazatileñaku muloña wakukatakata? Munateli kwikala namuzañalu namudimu wumwazataña wakumuna. Talenu chuma chamumwekeneni Mwanta Davidi hampinji yelili yena niamayala indi apulwishi yisaka yawu niyuma yawu kudi aAmaleki. Amayala 200 azeyeli nanjita yazuñileñawu, dichi ashalili kunyima nakuhemba yuma yawu. Chelili anashindi dehi, Davidi wayilejeli nindi anzañani hakachi nakachi yuma yejima yapupiliwu. (1 Sam. 30:21-25) Dichekala nimudimu wetu wakwilisha atumbanji mukaayi kejima. Muntu wudi wejima wazataña hakumina ñovu jindi nateli kwikala namuzañalu neyi muntu wamuha yamwiluka Yehova nawa yapapatishewa. Yehova wamonaña chitwazata nañovu, nichitwamukeña nawa wakatufweta. Watudizishaña cheñi chitunateli kwikala namuzañalu namudimu wutunakumuzatila mumudimu wakushimwina. (Yow. 14:12) Twatela kwiluka chikupu netu neyi tubula kuzeya tukumutiyishaña Nzambi kuwaha! w21.10 28 ¶15-17

Chitunakukula, tunateli kutiya woma netu, hiyanateli kutuzatisha kudi Yehova neyi chitwazatileña hitwadiña atwansiku. Hela chakwila hitukweti ñovu neyi yitwadiña nayu hitwadiña atwansiku, tunateli kuzatisha maana niyuma yitunadizi kukwasha atwansi kulonda ayizatisheña mukuloñesha kwaYehova. Atushinakaji atela kwikala adikehesha hakwila akwasheña atwansi. Muntu wadikehesha wamonaña akwawu nindi amubadika. (Fwili. 2:3, 4) Amanakwetu niahela akula dehi akweti ichi chilwilu, eluka nawu kakavulu munateli kwila chuma munjila jamboka-mboka kwesekeja nachahosha Bayibolu nichidi owu mudimu. Hiyakuhwelelaña antu ejima kwila yuma neyi chiyelileñawu wenaku. (Mukwa. 7:10) Hela chakwila eluka yuma yayivulu yatela kulejawu atwansi, eluka nawu “yuma yamukaayi yinakuhimpika” nawa kudi njila jajiha jakwililamu yuma.—1 Kor. 7:31. w21.09 8 ¶1, 3

Yehova wambukaku nanawa anzambi akutwamba. Halejaña antu ejima adifukulaña kudi yena kwila chuma chidi chejima chamajiluku. Ichi chuma achishimuna hatooka hamazu asonekeliwu hacheña chawuru chadiña hachitambala chavwalileña kapristu muneni. Hanichi cheña asonekelihu nawu: ‘Kujila kwaYehova.’ (Kwid. 28:36-38) Awa mazu adiña hanichi cheña ayanukishileña antu ejima ayimweneña nawu Yehova wajila chikupu. Indochu kaIsarela wabulileña kumona ichi cheña muloña wakubula kuswina kwakwihi nakapristu muneni? Komana welukileña nindi Yehova wajila? Eña! AIsarela ejima atiyileña awa mazu hampinji yatañileñawu iyi Nshimbi kumesu awamayala, ambanda nianyana. (Kuhit. 31:9-12) Neyi mwadiña kwoku, mwadi kutiya awa mazu akwila nawu: “Ami yami Yehova Nzambi yenu . . . mwikali ajila muloña ami najila.” “Mwakanjililaña ami; muloña ami Yehova najila.”—Lev. 11:44, 45; 20:7, 26. w21.12 3 ¶6-7

Antu amakwawu anateli kwakama chinateli kuwanawu yakuda, yakuvwala niitala. Hadaha ashakamaña mwituña mwasweja wuzweñi nawa mwakala kuwana nyidimu. Chinateli kuyikalila kuwana mali akuhemba nachu chisaka chawu, indi kwiji muntu wayihembeleña nafwi chisaka hichinateli kwikala namali amavulu akulandamu yuma yakudikwashamu nachuku. Chatela twakameneña hakukala kutukweti, twatela kumukuhwelela Yehova. Anukenu nenu Tata yetu wukweti kukeña Yehova, watukana nindi wukutwalekahu kutwakamena neyi tumutwamijaku. (Mat. 6:32, 33) Washikijaña ichi chikaninu chindi. (Kuhit. 8:4, 15, 16; Mas. 37:25) Neyi Yehova wakamenaña atujila ninkenu, hitwatela kwakama hayuma yitukuda hela yitukuvwalaku! (Mat. 6:26-30; Fwili. 4:6, 7) Neyi kukeña chikwasañumunaña anvwali kwakamena anyanawu, Tata yetu wamwiwulu niyena wayinkaña antu yuma yakeñañawu muloña wakwila wayikeña. w21.12 17 ¶4-5; 18 ¶8

Komana ayineñeshahu dehi kudi muntu indi kwiji manakwenu hela muhela muchipompelu? Talenu chakutalilahu chaYosefu ayandishiliwu kudi amanakwindi. Watwalekelihu kumukalakela Yehova wenjili nakumukiswila hamuloña wakudiwunjika kwindi nikuumika. Nkumininaku, Yosefu wayanakeneni antu amwilili chatama nawa wenjili nakumona chamukiswililiwu kudi Yehova. (Kutach. 45:5) Kufwana Yosefu, tukukundejewa neyi tuswina kwakwihi naYehova nikushiya kukala kwejima mumakasa indi. (Mas. 7:17; 73:28) Neyi munakukabakana muloña wakuyila chatama, hela kukala kukwawu, anukenuña nenu Yehova wudi kwakwihi “nawantu abaluka nyichima.” (Mas. 34:18) Wayikeña nanochu chimwadiwunjika nichimwombilaña yiteli yenu hadi yena. (Mas. 55:22) Diyi Nsompeshi weseki dejima. Wamonaña yuma yejima. (1 Pet. 3:12) Neyi munakumona kukala kumukubula kutwesha kumanisha, komana mukumuchiñililaña Yehova? w21.08 11 ¶14; 12 ¶16

Chikuwaha neyi tukuzatishaña mpinji yetu kwililamu yuma yamuzañaleshaña Yehova. Twatela kwilaña yuma yalema. Mpinji yikwawu, mukuzatisha chiwahi mpinji yetu mwabombela kufuukulahu kwila chuma chimu hayuma yiyedi yayiwahi. Nsañu yitweluka yayendeleliyi Yesu aMariya naMata yinalumbululi ichi chikuma. Chakadi nikujina, Mata watiyili kuwaha chayihempwiluwu kudi Yesu nawa waloñesheli yakuda yayivulu. Ilaña hampinji yaloñesheleñayi, muhelindi Mariya washakamini kwakwihi naYesu nakutiyilila chatañishileñayi. Chuma chelili Mata chatama wanyi, ilaña Yesu wahosheli nindi Mariya “natondihu chuma chachiwahi.” (Luka 10:38-42) Mukuhita kwampinji, hadaha Mariya wavulamenenumu yakuda yaloñesheliwu, Ilaña nsañu yadiziliyi kudi Yesu wayivulameneni wanyi. Neyi chochalemesheliyi Mariya mpinji yadiñayi naYesu, ninetu twalemesha mpinji yitwahanjekaña naYehova. w22.01 27 ¶5-6

Hela chakwila Ahabi wadizozeli kumesu aYehova, yuma yeliliyi mukuhita kwampinji yamwekesheli nawu wabalumukili chikupu wanyi. Hafumishili kudifukula kwaBayali muwanta windiku. Nawa hakolesheli antu kudifukula kudi Yehovaku. Chelili Ahabi nafwi dehi, Yehova wamwekesheli chamumweneñayi iwu iyala. Kaprofwetu kaYehova wahosheli nindi: wadiña ‘watama.’ (2 Kushi. 19:1, 2) Talenu chumichi: Neyi Ahabi wabalumukili chikupu mumuchima, kaprofwetu kaYehova hadi kumutena nindi iyala watama wamuhela Yehovaku. Chakadi nikujina, hela chakwila wamwekesheli nindi naneñi, habalumukili chikupu mumuchimaku. Yumanyi yitunateli kudizila kudi Ahabi? Chelili Elija yamuleji Ahabi nindi chisaka chindi akachibabesha, Ahabi wadizozeli. Welili chuma chachiwahi. Ilaña yuma yeliliyi mukuhita kwampinji yamwekesheli nawu habalumukili chikupu mumuchimaku. Dichi, mukubalumuka mwabombela yuma yayivulu kubadika kuneña hohu hayuma yituneli. w21.10 3 ¶4-5, 7-8

Isaya wadiña kaprofwetu chinamwekani neyi niñodindi wadiña namudimu wakuprofweta, chineli niyena amutena nawu wadiña “kaprofwetu wamumbanda.” (Isa. 8:1-4) Awa eyala namumbanda ashili muchima hakumukalakela Yehova muchihandilu chawu. Adisumbula makonu atela cheñi kusha muchima hakumukalakela Yehova kuhitila mukuzata hakumina ñovu jawu mumudimu waYehova. Anateli kumukuhwelela chikupu Yehova kuhitila mukudizila hamu wuprofwetu wamuBayibolu nikumona chiwashikijewaña. (Tit. 1:2) Atela kutoñojoka chuma chatela kwilawu kulonda akwashani mumudimu wakushikija wuprofwetu wamuBayibolu. Chakutalilahu, akweti lubadi lwakushikija wuprofwetu waYesu wakwila nawu nsañu yayiwahi atela kuyishimwina mwahita iseki dejima henohu kukuma kanda kwinzi. Neyi adisumbula akuhwelela chikupu nawu wuprofwetu wamuBayibolu wunakushikijewa akufwilaña kumuzatila Yehova chikupu. w21.11 16 ¶9-10

Yesu wakameneni chakahandañayi mama yindi wadiña nfwila. Muloña wakumukeña nikumwakamena Mariya, Yesu wamwinkeli Yowanu mudimu wakumwakamena Mariya, muloña welukili nindi wukumukwasha kwikala washinshika kudi Nzambi. Kufuma dina ifuku, Yowanu wekalili neyi mwana kaMariya nawa wamwakameneneña tuhu neyi mama yindi. Yesu wamukeñeli chikupu iwu mumbanda wamukulishili kufuma tuhu mpinji yasemukiliyi nawa wadiña nindi hampinji yafwiliyi! Yumanyi yitunateli kudizila kumazu aYesu? Wubwambu wetu nawamanakwetu niahela watela kwikala wakola kubadika wubwambu wetu nawantaña jetu. Antaña jetu anateli kutudimbulula hela kutushiya, ilaña neyi chatukaniniyi Yesu, neyi tudikundaña naYehova nikuloñesha kwindi, tukutambwila “mapampa 100” kubadika yuma yitunajimbeshi. Amavulu akwikala anyanetu, amama jetu hela atata jetu. (Maku 10:29, 30) Mwatiyaña ñahi kwikala nawamanakwetu nihela akuhwelela yuma yoyimu, amukeña Yehova nawa adikeña wumu namukwawu?—Kol. 3:14; 1 Pet. 2:17. w21.04 9-11 ¶7-8

Neyi tukweti kukeña kwakashinshi, tukuzataña nañovu kulonda tukwasheña akwetu. Neyi chichadiña kunyima, makonu amanakwetu niahela amavulu anakuyimwekeshela akwawu akwakwitiya kukeña kwakashinshi, hela chakwila kanda ayimoneñahu dehi. Chakutalilahu, neyi eluka nawu kunamwekani wubanji wadimwekenaña, akeñaña kwiluka chinateli kukwashanawu. Neyi muntu muchipompelu wudi nakukala, akeñaña kwiluka kukala kukwetiyi nawa amukwashaña. Kufwana akwaMasidoniya akunyima, azataña nañovu kulonda amukwashi. Adihanaña, ahanaña “kubadika nihayuma [yikwetiwu]” kulonda akwashi amanakwawu. (2 Kor. 8:3) Akulumpi ayihamekaña amanakwetu niahela neyi amona chinakukwashawu akwawu. Kuyihameka amanakwetu niahela hampinji yatelela kunateli kuyikwasha kutwalekahu kukwasha akwawu.—Isa. 32:1, 2. w21.11 11 ¶14; 12 ¶21

Wejima wetu twakeñekaña kutufumba mumpinji-mumpinji. Mpinji jikwawu, tunateli kwihula muntu itwakuhwelela kulonda yatulejiku mwakwilila. Mpinji jikwawu manakwetu nateli kutusolomoka nakutuleja nindi keña tukoñi “chuma chatama” chitwakaditoñesha. (Ñal. 6:1) Nkumininaku, anateli kutufumba hanyima yakukoña chiluwa cheneni. Hichikweti muloña nanjila munatufumbiliwuku, twatela kwiteja. Neyi twiteja kufumba chinateli kutukwasha nawa tukupulwisha wumi wetu! (Yish. 6:23) Nsona yetu yalelu yinakutukolesha ‘kutiyilila kumazu amukamaana.’ Kwosi muntu weluka yuma yejimaku; mpinji yejima kwekala muntu wukweti maana hela welukisha yuma kubadika etu. (Yish. 12:15) Dichi neyi muntu yeteja kufumba nakumwekesha nindi wadizoza. Nawa chamwekeshaña nawu weluka mwakukumina; tweluka netu tunakukeña kutukwasha hakwila twili yuma yitunafuukuli. Mwanta waMaana Solomoni wasonekeli nawu: “Adi akakukwashana maana amavulu yuma yalumbulukaña [hela “akakushakama hampuña,” tumazu twaheshina].”—Yish. 15:22. w22.02 8 ¶1-2

Mukubalumuka chikupu mwabombela yuma yayivulu. Kubadika kuhosha hohu netu añanakeniku neyi tunakoñi nshidi. Munabombeli kuleka yilwilu yatama nikutachika kwovwahila nshimbi jaYehova. (Ezek. 33:14-16) Chuma chatela kwilayi muntu wunavulumuni hikwikala cheñi nawubwambu wawuwahi naYehova. Hanu dinu, tukwila ñahi neyi twiluka netu ibwambu detu nakoñi nshidi? Neyi tukusweka nshidi jindi tunakumukwasha wanyi. Kwila tutwesha kusweka nshidi yindi nehi muloña Yehova nakumona. (Yish. 5:21, 22) Munateli kukwasha ibwambu denu neyi mumuleja nenu yaku kudi akulumpi akukwashi. Neyi mukwenu nakaani kuyileja, yenu muyileji akulumpi hanoyu nsañu nakumwekesha nenu munakukeña kumukwasha chikupu mukwenu. w21.10 7 ¶19-21

Wejima wetu tunateli kumwimbujola Yesu chakwikala namuchima wakudihana. Bayibolu yahoshaña nawu “wadibalumwini neyi nduñu.” (Fwili. 2:7) Nduñu hela ñamba nateli kuzata nañovu kulonda yamutiyisheña nkaka yindi kuwaha. Hakwikala anduñu jaYehova nihakukalakela amanakwetu, chakadi nikujina, munakukeña kuyizatisha kudi Yehova nikukalakela amanakwenu. Dihulenu nenu: ‘Komana nazatishaña mpinji yami niñovu yami kulonda nikwashi nachu akwetu? Komana nadihanaña swayi-swayi neyi kudi antu anakukeñeka atela kuya nakuwahisha iluña dakupompela kupompa kweneni hela Hetala daWanta?’ Twili netu munamoni nenu hadi himwatela kuzatila kulonda mudihaneña ilaña munakutoñojoka nenu mukutwesha wanyi kuhimpa. Neyi dikukala kumukweti, mulombenu Yehova chakufuma hamuchima. Mulejenumu Yehova chimunakutiya nawa mulombenu yayinki “muchima wakufwila kukoña yuma niñovu yakwilamu.”—Fwili. 2:13. w22.02 22-23 ¶9-11

Yesu wamwekesheleña luwi kuhitila mukubula kwikala wakalisha nimumpinji yakala. (Mat. 11:29, 30) Chakutalilahu, chelili ona mumbanda kaFwenisa amulembeleli nindi amukili mwanindi, Yesu hakusambila wamukaanini ilaña chamwekesheliyi chikuhwelelu chakola, wamuukilili mwanindi. (Mat. 15:22-28) Hela chakwila wadiña naluwi, Yesu wayifumbileña antu. Mpinji yikwawu wayitiyilileña luwi kuhitila mukuyifumba antu akeñeliyi chakadi kuyihita mumbadi. Chakutalilahu, Petulu cheliliyi nindi eseki kumukañesha Yesu kwila nkeñelu yaYehova, Yesu wamuzuwilili hamesu awatumbanji amakwawu. (Maku 8:32, 33) Cheliliyi mwenimu bayi neyi wakeñeleña kumusawisha Petuluku, ilaña wakeñeleña kumudizisha nikusoñamisha atumbanji amakwawu kubula kwikala nachilwilu chakudivwimba. Chakadi nikujina, Petulu watiyili nsonyi ilaña kuna kufumba kwamukwashili. Hakwila nawu mumwekeshi nenu mwayitiyilaña antu imwakeña luwi, mpinji yikwawu mwatela kuyifumba chakadi kuyihita mumbadi. Neyi munakufumbana mwimbujolenu Yesu kuhitila mukushindamena hayishina yekala Mwizu daNzambi. w22.03 11 ¶12-13

Twadifukulaña kudi Yehova neyi tunakumushimeka. (Mas. 34:1) Twamushimekaña Yehova neyi tunakulejañaku antu yilwilu yindi yabadika ninyidimu yindi. Tunateli kumushimeka neyi tukweti muchima wakusakilila. Neyi twikala nampinji yakutoñojoka hakuwaha kwaYehova hela netu yuma yejima yatwililayi, tukumushimekaña mpinji yejima. Neyi tunakushimwina diyi mpinji yayiwahi yitwamulambulaña “Nzambi mpinji yejima mulambu wakushimeka, dikwila nawu, nyikaabu yakunyivumbu yetu.” Neyi chochitunateli kutoñojokahu hamazu itukuhosha henohu kanda tulombi kudi Yehova, munjila yoyimu twatela kutoñojokahu chikupu hamazu itukuhosha henohu kanda tuwani antu itunakushimwina. Tunakukeña “mulambu [wetu] wakushimeka” wikali wawuwahi chikupu. Dichatuleteshaña tushimwineña chakufuma hamuchima neyi tunakuyishimwina antu. w22.03 21 ¶8