October

Yuma yitwatañaña niyitwakuhwelela yafumaña muBayibolu. Hela chochu, antu amavulu ahukanaña muloña atoñojokaña nawu njila yitwadifukwilañamu yasweja kupela nawa nsañu yitwatañishaña yesekana wanyi nayuma yakeñañawu kutiya. Tunateli kwila ñahi kulonda tubuleña kuhukana? Kapostolu Pawulu wayilejeli akwaKristu ashakamineña muRoma nindi: “Chikuhwelelu chenzaña hadi muntu neyi natiyi mazu. Nawa muntu watiyaña mazu neyi kudi wunakuhosha nsañu yahosha hadi Kristu.” (Rom. 10:17) Dichi twekalaña nachikuhwelelu kuhitila mukudiza Nsona, bayi mukwila yidika yajinsakililu yabula kwikala muBayibolu, hela chakwila yayiwahi chamuchidinyiku. Twatela kwikala nachikuhwelelu chakola kushindamena hakwiluka kwalala, muloña “chakadi chikuhwelelu, hichikutwesheka kumuzañalesha Nzambiku.” (Heb. 11:1, 6) Dichi, hitunakukeña kumona chinjikijilu kufuma mwiwulu kulonda dinu twiteji netu tunawani chalalaku. Yuma yitunadizi muBayibolu yinateli kutukwasha kwiluka netu ichi dichalala nikuleka kujinooka. w21.05 4-5 ¶11-12

Kapostolu Pawulu wamweneña kukala kwakuvulu. Sweje-e wakeñeleña ñovu hamweteliwu, hamwasiliwu malola nihamukasiliwu. (2 Kor. 11:23-25) Pawulu washimwini nindi mpinji jikwawu waneñeleña. (Rom. 7:18, 19, 24) Wadiña cheñi “namwiña mumujimba,” kukala kwakeñeleñayi nindi Nzambi yakumanishi. (2 Kor. 12:7, 8) Yehova wamwinkeli Pawulu ñovu yakutwalekahu kushimwina hichikweti muloña nakukala kwamweneñayiku. Talenu nyidimu yazatiliyi Pawulu. Chakutalilahu, hampinji yamukasiliwu mukaleya muRoma mwitala, wahakwilileñaku nsañu yayiwahi kumesu awanlomboli jawaYudeya niakwawuswa. (Yilw. 28:17; Fwili. 4:21,22) Wayishimwinineña cheñi ninana amuhembeleña mukaleya niantu ejima enjileña nakumuhempula. (Yilw. 28:30, 31; Fwili. 1:13) Hayoyina mpinji, Pawulu wasonekeli nyikanda yonenewa yakwashili akwaKristu alala hayina mpinji nawa yinakutukwasha nimakonu. w21.05 21 ¶4-5

Kudinka wanta kwamuletesheli Mwanta Uziya wakuYuda kukaana kufumba nikwila yuma munjila yakudivwimba. Uziya welili yuma yayivulu yayiwahi. Washindili njita jajivulu, watuñili nyisumba yayivulu nawa wadiña namaha amavulu. “Nzambi wamushakamishili chachiwahi mafuku ejima amukeñakeñeliyi.” (2 Kushi. 26:3-7, 10) Bayibolu yahosha nawu: “Ilaña chakwatiliyi ñovu hakudivwimba mumuchima windi hakwila nichakudikisañana.” Yehova wahanini nshimbi nindi atupristu hohu diwu atela kwocha insensi hatembeli. Ilaña Mwanta Uziya wadivwimbili nakwiñila mutembeli nakwocha insensi. Yehova watiyili kutama chakwila wamweteli iwu iyala wadivwimba nambumba. (2 Kushi. 26:16-21) Komana kudivwimba kunateli kutuletesha kufwa mumuhetu neyi mwafwiliyi Uziya? Eña, kunateli sweje-e neyi tutoñojokaña hohu hayuma yinateli kutuzañalesha. Twatela kwanukaña etu yawana yitukweti ninyidimu yatwinkañawu muchipompelu yafumaña kudi Yehova. (1 Kor. 4:7) Neyi twadinka wanta Yehova wukutuzatishaña wanyi. w21.06 16 ¶7-8

Yesu welukili nindi bayi neyi mpinji yejima atumbanji twindi akamonaña yuma yamuchidiwu mumudimu wawuku. Hela chochu, tuneluki wanyi kuvula kwawantu ahanjekeli nawatumbanji twaYesu ekalili akwaKristu. Atumbanji hiyateleli kutiya kuwaha nanyidimu yazatiliwuku, ilaña chuma chasweja kulema hikwiluka nawu Yehova watiyili kuwaha chazatiliwu nañovu. Neyi tuumikaña mumudimu wakushimwina, tukatambwila wumi wahaya nyaaka. Neyi tuzata hakumina ñovu yetu kushimwina nikudizisha nsañu yayiwahi, dikwila nawu “tunakukuwila kuspiritu” kuhitila mukwiteja spiritu yaNzambi yajila yizatikeña muchihandilu chetu. Neyi tubula “kuzeya” hela “kuleka,” Yehova watukana nindi wakatwinka wumi wahaya nyaaka, hela chakwila hitunakwashihu muntu hela wumu kupapatishewaku.—Ñal. 6:7-9. w21.10 26 ¶8-9

Mpinji yimu, Yesu nawatumbanji twindi azeyeli nankashi muloña wakwila ashimwinini hama. Akeñeleña iluña kwakunookela, ilaña izaza deneni dawantu dayiwanini. Yesu wayitiyilili wushona nawa watachikili kuyitañisha antu “yuma yayivulu.” Yesu welukili chatiyileñawu antu. Wamweni chakabakeneñawu, chakeñeleñawu muntu wakuyikwasha nawa wakeñeleña kuyikwasha. Dichidiwu niantu makonu. Bayi mumona hohu chinakumwekanawuku. Adi neyi mukoku wunajimbali, wunabuli kabiña wakumulombola. Kapostolu Pawulu walumbulwili antu amuchidiwu nindi amwiluka wanyi Nzambi nawa hiyakweti kuchiñejaku. (Efwe. 2:12) Neyi twiluka chidiwu antu mwiluña detu dakushimwina, kukeña niwushona kunateli kutuletesha kuyikwasha. Nawa njila yayiwahi yitunateli kuyikwashilamu hikuyidizisha Bayibolu. w21.07 5 ¶8

Muntu wadivwimba watoñojokaña hohu hadi yomwenindi. Muntu walwisu bayi neyi wakeñaña hohu kwikala nayuma yidi namukwawuku, ilaña wakeñaña cheñi nikutambula yuma yikwetiyi. Lwisu dilwaleteshaña kuhelañana. Yilwilu yatama yidi neyi kudivwimba nilwisu tunateli kuyesekeja namajilu eñilaña mumanji azatikaña mundeki. Ndeki yinateli kutuuka ilaña majilu anateli kukañesha manji kuhita chiwahi. Chikufumamu ndeki yikuholoka nakukisika. Munjila yoyimu, muntu nateli kumukalakela Yehova hadi mpinji yayilehi. Ilaña neyi wadivwimba nawa wukweti lwisu, wukujilumuka. (Yish. 16:18) Wukuleka kumukalakela Yehova nawa wukudikisañana yomweni niakwawu. Tunateli kutondolwela kudivwimba neyi tuzatishaña kufumba kwakapostolu Pawu. Watufumbili nindi: “Bayi mukoña chuma hela chimu nantaadi hela nakudivwimba kwamukunkulwayiku, ilaña dizozenuña nakumona akwenu nenu ayibadika enu.”—Fwili. 2:3. w21.07 15-16 ¶6-8

Antu amakwawu atoñojokaña nawu kudifukula kwalala kwatela kwakula malwihu ejima, nimalwihu abula kwakulawu muBayibolu. Komana iyi yuma yahoshañawu dimu? Talenu chakutalilahu chakapostolu Pawulu. Wayilejeli akwawu akwakudifukula nindi “esekenu yuma yejima nakutondahu yayiwahi,” ilaña wahosheli nindi kudi yuma yayivulu yabulili kutiyishishayi. (1 Tes. 5:21) Wasonekeli nindi, “tweluka hohu chanti,” nawa wabombelelihu nindi, “tunakumona chiwahi wanyi, muloña chidi neyi tunakutala hachibanjilu chachikuñu.” (1 Kor. 13:9, 12) Pawulu hatiyishishili yuma yejimaku; ninetu twatiyishishaña yuma yejima wanyi. Ilaña Pawulu watiyishishili chalala chahosha hayuma yafuukulayi Yehova. Welukili yuma yayivulu yamuletesheli kukuhwelela nindi wadiña nachalala. Njila yimu yinateli kutukwasha kukuhwelela chikupu netu ichi dichalala, hikwesekeja yuma yelileñayi Yesu nayuma yinakwilawu aYinsahu jaYehova makonu. w21.10 18-19 ¶2-4

Enu amanakwetu niahela munashinakaji hela chakwila mudi mumudimu wampinji yejima hela nehi, munateli kuzata nañovu kukwasha amanakwetu. Munateli kwila ñahi mwenimu? Ilukenu chidi chihandilu chenu hanoyu mpinji, imikenu yikonkwanyi nawa shenu muchima hayuma yimukutwesha kwila bayi yimukukañanyaku. Mwanta Davidi wakeñeleña chikupu kutuña itala daYehova. Ilaña chelili Yehova yamuleji nindi mukwenzi Solomoni diyi wukatuña tembeli, Davidi wetejeli mwafuukwiliyi Yehova nawa wakwashili iwu mudimu namuchima windi wejima. (1 Kushi. 17:4; 22:5) Davidi watoñojokeli wanyi nindi yena diyi washikililimu kuzata iwu mudimu muloña wakwila Solomoni “wuchidi kansi kanda apami.” (1 Kushi. 29:1) Davidi welukili nindi tembeli akuyituña muloña Yehova wakiswilileña iwu mudimu, hichikweti muloña nayaaka hela yuma yayivulu yelukayi muntu wunakulombolaku. Kufwana Davidi, nimakonu antu akula dehi atwalekañahu kumukalakela Yehova hela chakwila mudimu wawu wunahimpiki. Nawa eluka nawu Yehova wukuyikiswila atwansi anakuzata nyidimu yazatileñawu. w21.09 9 ¶4; 10 ¶5, 8

Neyi twikalaña nayikonkwanyi mumudimu waYehova tukwikalaña namuzañalu muchihandilu. Hela chochu, chuma chinateli kutukwasha hikwimika yikonkwanyi kwesekeja nachidi wuswa wetu nichihandilu chetu, bayi yikonkwanyi yinemikiwu akwetuku. Neyi twimikaña yikonkwanyi yinakwimikawu akwetu tukukañanya nawa tukuzeya. (Luka 14:28) Chineli mudi ambuña aYehova, mwalema nankashi nawa kwosi wudi neyi enu. Yehova wayikokela kwakwihi nayena bayi neyi muloña wakwila mwabadika akwenuku. Wayikokeli kwakwihi nayena muloña washinshikili munyichima yenu nawa wamweni nindi mwadizoza nawa nateli kuyidizisha. Ilukenu nenu watiyaña kuwaha neyi muzata hakumina ñovu jenu hakumukalakela. Chimomikaña nichimwashinshika chamwekeshaña nawu mwekala “namuchima wawuwahi.” (Luka 8:15) Dichi twalekenuhu kumukalakela Yehova hakumina ñovu jenu. Mukwikala nayuma yakuzañalelahu “enu aweni.”—Ñal. 6:4. w21.07 24 ¶15; 25 ¶20

Kakavulu chakeñekaña kwikala adiwunjika neyi anakutwila chatama. Chakutalilahu, neyi akulumpi eluka nawu kudi muntu wamuchipompelu wunakoñi nshidi, alombaña maana “afumaña mwiwulu” kulonda amoni oyu nsañu kwesekeja nachayimonañayi Yehova. (Yak. 3:17) Afwilaña kukwasha muntu wunakoñi nshidi “kufuma kuyuma yatama yinakoñiyi” neyi chinatwesheki. (Yak. 5:19, 20) Azataña cheñi nañovu kulonda akiñi chipompelu nikukundeja antu ananeñi. (2 Kor. 1:3, 4) Nawa neyi anakusompa nsañu yamuntu wunavulumuni, akulumpi akeñakeñaña wunsahu walala wejima, nawa hanateli kuhita mpinji hakwila eli mwenimu. Nkumininaku, alombaña nawa amufumbaña kuzatisha Nsona nikumwolola “mwawuñaji” muntu wunavulumuni. (Yere. 30:11) Akulumpi hiyanyakalaña kufuukulaku. Neyi akulumpi azatisha nshimbi jaYehova, chipompelu chikumona yuma yayiwahi yakufumamu. w21.08 11 ¶12-13

Chineli muIsarela mwaholokeli nzala, Nyawomi, nfumwindi nianyanawu ayedi ayili nakushakama kuMowabi. Kwayiliwu, nfumwa aNyawomi wafwili. Anyanindi ayedi asumbwili, chawushona, niwena afwili. (Luti 1:3-5) Iku kukala kwamweniyi kwamuletesheli Nyawomi kuneña nankashi. Waneñeli chakwila watoñojokeli nindi Yehova diyi wamuleteleli iku kukala. Talenu chahosheliyi kutalisha hadi Nzambi nanochu chaneñeliyi nindi: “Chikasa chaYehova anachiñolweli nakunkalisha hohu.” “Chinaweji nanmweshi kalula.” Wabombelelihu nindi: “Yehova wanhilila dehi, Chinaweji wanmwesha dehi chikela, kayedi nawa.” (Luti 1:13, 20, 21) Yehova weluka nindi “[makabisha] asupishaña mukwamaana.” (Mukwa. 7:7) Wamuzatishili Luti kulonda yamumwekesheli Nyawomi kukeña kwakashinshi. Luti wakeñeleña kumumwekeshela Nyawomi kukeña nawa wamukwashili kumanisha chineñi nikwiluka nindi Yehova wamukeña. w21.11 9 ¶9; 10 ¶10, 13

Komana kusha maana hanyidimu yitukweti kunatalishi mukwila nawu twatela kuleka kuzata nañovu kulonda tukazatiku nyidimu yikwawu mumudimu waYehova? Inehi. Twatela kwimika yikonkwanyi yinateli kutukwasha kwikala antañishi amawahi mumudimu wakushimwina nawa yinateli kukwasha amanakwetu niahela. Tunateli kushikija iyi yikonkwanyi neyi tusha muchima hakukalakela akwetu. (Yish. 11:2; Yilw. 20:35) Yikonkwanyinyi yimwatela kudimikila enu aweni? Mulombenu Yehova yayikwashi kwiluka yikonkwanyi yimunateli kwimika nawa yimunateli kuzata. (Yish. 16:3) Kwila mweseka kuzataku wupayiniya wakukwasha hela wampinji yejima, kutuña matala aWanta, matala amaneni akupompela, tusanji twanyitayi nitusanji twakubalumwina nehi? Hela hadaha munakukeña kudizaku idimi dacheñi kulonda mushimwineña nsañu yayiwahi indi kwiji kushimwina mwiluña mwahoshañawu idimi dacheñi. w21.08 23 ¶14-15

Kukeña kwakashinshi hichilwilu chalema kudi Yehova. (Hos. 6:6) Nzambi watulejeli kuhitila mudi kaprofwetu Mika nindi “tukeñi luwi” hela kukeña kwakashinshi. (Mika 6:8, tth) Henohu kanda twili mwenimu, tushinshikenu ntahi mwatalisha kukeña kwakashinshi. Kukeña kwakashinshi hichumanyi? Izu dakwila nawu kukeña kwakashinshi muBayibolu yaNew World Translation of the Holy Scriptures dekalamu mapampa 230. MaBayibolu amakwawu abalumuna izu dakukeña kwakashinshi nawu luwi hela kukeña. Hanu kukeña kwakashinshi hichumanyi? “Neyi muntu wukweti kukeña kwakashinshi, wamukeñaña nankashi mukwawu muntu chakwila watwalekañahu kumukeña nawa wekala washinshika kudi yena. Kakavulu, adizatishaña hakutena kukeña kwakeñayi Nzambi antu nikukeña kwadimwekeshelañawu antu wumu namukwawu.” Yehova diyi muntu wabadika wamwekeshaña iku kukeña. Dihafumini Mwanta Davidi hakuhosha nindi: “Luwi lweyi, eyi Yehova, ludi mumawulu . . . Eyi Nzambi, O luwi lweyi o kuwaha!” (Mas. 36:5, 7) Kufwana Davidi, komana kukeña kwaNzambi kwakashinshi twakulemesha? w21.11 2 ¶1-2; 3 ¶4

Muchisaka chawakwakudifukula aYehova, munabombeli Yesu, “wedi wayileñaleña yejima” nimazaza awañelu. (Kol. 1:15; Mas. 103:20) Hampinji yadiñayi Yesu hanu hamaseki, wakwashili antu ashinshika kwiluka nawu anateli kumutena Yehova nawu Tata. Hahosheleñayi nawatumbanji twindi, Yesu wamuteneni Yehova nindi: “Tata yami nawa Tata yenu.” (Yow. 20:17) Nawa chitwadihanini kudi Yehova nikupapatishewa, twekalili muchisaka mudi amanakwetu niahela. (Maku 10:29, 30) Yehova hiTata wukweti kukeña. Yesu wakeñaña nindi tumumoneña Yehova neyi chamumonañayi, netu wukweti luwi nawa hinvwali wukweti kukeña nawa tunateli kuhanjeka nindi mpinji yidi yejima, bayi neyi muntu wabula luwi nawa wakeñaña hohu kutuleja jakwilaku. Watachikili kulomba kwachitalilu namazu akwila nawu: “Tata yetu.” Yesu wadi kutuleja nindi mutenenuña Yehova nenu “Mukwañovu jejima,” “Nleñi,” hela “Mwanta wahaya nyaaka” iyi nkumbu yejima yatelela muloña yamuNsona. (Kutach. 49:25; Isa. 40:28; 1 Tim. 1:17) Ilaña, Yesu watulejeli kumutena Yehova netu “Tata.” w21.09 20 ¶1, 3

Mwanta Manase niyena wakaanineña mwamufumbileñawu kudi Yehova kuhitila mudi atuprofwetu twindi. Nkumininaku, “Yehova hakuyiletela [aYuda] akulumpi anjita amwanta wakuAshuri hiyakumukwata Manase namalonda hiyakumukasa mumaleñi hiyakumutwala kuBabiloni.” Hampinji yamukasiliwu mukaleya muBabiloni, chinamwekani neyi Manase watoñojokelihu chikupu hayuma yeliliyi. “Hakudizoza nankashi kumesu aNzambi yawankakulula jindi.” Welili yuma yikwawu cheñi. “Wamulembeleleli Yehova Nzambi yindi.” Dichi, Manase “watwalekelihu kulomba kudi Yena.” (2 Kushi. 33:10-12) Mukuhita kwampinji, Yehova wakwili kulomba kwaManase. Wamweni nindi iwu iyala nahimpi, neyi chamwekesheliyi mukulomba kwindi. Yehova wamutiyili Manase chalombeliyi nindi yamwanakeni nawa wamufuntishili cheñi hawanta. Manase wazatili nañovu kulonda yamwekeshi nindi wabalumukili chikupu. w21.10 4 ¶10-11

Ashili mukala wawu welukiliwu chikupu, kuwana mukala wawuha, nikutachika cheñi kuchima matenti kwiluña dabulili kwinjililawu. Chayiliwu kuKorinda, aAkwila naPrisila atachikili kukwasha chipompelu chadiña mudina iluña nikuzatila hamu nakapostolu Pawulu kulonda ayikoleshi amanakwetu. Chimwahitili mpinji, abukilili kunyisumba yikwawu kwadiña kukankila kwawakwakushimwina. (Yilw. 18:18-21; Rom. 16:3-5) Adiña nanyidimu yayivulu nawa adiña namuzañalu. Adisumbula makonu atela kutwamijañaku Wanta neyi aPrisila naAkwila. Antu anakukeña kudisumbula atela kuhanjekela chadimu yuma yakelañawu hampinji yinakudilukawu. Neyi adisumbula afuukulahu kumukalakela Yehova nawa azatila hamu kushikija munafuukuliwu, Yehova wukuyikwashaña.—Mukwa. 4:12. w21.11 17 ¶11-12

Dichi, chalema nankashi kwovwahila nshimbi jaNzambi jahosha hakwovwahila anvwali jetu. Anukenuña nenu lushimbi lwekala haALevi 19:3, lwakulemesha mama yamuntu nitata yamuntu, hafuma mazu akwila nawu: “Mwakekalaña ajila muloña ami Yehova Nzambi yenu najila.” (Lev. 19:2) Neyi tutoñojoka halushimbi lwatwinkeliyi Yehova lwakulemesha anvwali jetu, twatela kudihula netu, ‘Komana nayilemeshaña anvwali jami?’ Neyi munamoni nenu mwayilemesheleña nankashi wanyi kunyima, mwatela kuzatilahu. Kwila mutwesha kuhimpa jakunyima nehi, ilaña mwatela kuzata nañovu kuhitila mukwikala nampinji yakuhanjeka nawanvwali jenu nikuyikwasha. Hadaha mwatela kwikala nampinji yimwatela kuhanjekaña nawu. Hela munateli kuyikwashaku muyuma yakumujimba, kuyikwasha kukolesha wubwambu wawu naNzambi nikuyikundeja. Neyi mwilaña yumiyi, dikwila nawu munakwovwahila lushimbi lwekala haALevi 19:3. w21.12 4-5 ¶10-12

Mwanta Davidi hampinji yakoñeliyi yiluwa yayivulu. Chakutalilahu, welili wuvumbi naBatisheba nawa wamujahishili ninfumwindi. (2 Sam. 11:2-4, 14, 15, 24) Muloña wachuma cheliliyi Davidi, yena nichisaka chindi akabakeni kushilahu niañodi jindi. (2 Sam. 12:10, 11) Mpinji yimu cheñi, Davidi wamwekesheli nindi hamukuhweleleli Yehova chikupuku, hampinji yachindiliyi amayala akwanjita muIsarela, chuma chabulili kumuleja kudi Yehova nawu yachili. Chumanyi chafuminimu? AIsarela 70,000 afwili nachipupu! (2 Sam. 24:1-4, 10-15) Komana mwadi kutoñojoka nenu chiña abulili kumwanakena David kudi Yehova? Yehova dichatoñojokeliyi wanyi. Welukili nindi Davidi wadiña washinshika nawa wabalumukili mumuchima. Chafuminimu, Yehova wamwanakeneni Davidi nshidi jakoñeliyi. Yehova welukili nindi Davidi wamukeñeli nankashi nawa wafwilileña kwila yuma yaloña. Twatiyaña kuwaha hakwiluka netu Yehova wamonaña yilwilu yayiwahi mudi etu.—1 Anya. 9:4; 1 Kushi. 29:10, 17. w21.12 19 ¶11-13

Yesu wayitiyilileña wushona ayifwayi. Anukenu nsañu yamutemesheleliyi Yowanu Mupapatishi nindi: “Amputamesu anakumona, akwakubalakata anakwenda, akwambumba anakuyitookesha, ajika matu anakutiya, afu anakuyisañula.” Antu ejima chamweniwu yihayamisha yaYesu, “atachikili kumuhameka Nzambi.” (Luka 7:20-22) AkwaKristu akeñaña kumwimbujola Yesu nikutiyila ayifwayi wushona. Dichi twayitiyilaña luwi niwushona ayifwayi. Hela chochu, Yehova hatwinka ñovu yakukoña yihayamishaku. Ilaña tukweti mudimu wakuleja antu akata hela amputamesu kuspiritu nsañu yayiwahi yahosha haparadisa mwakekalawu antu ejima awanina nawa nawubwambu wakola naNzambi. (Luka 4:18) Iyi nsañu yayiwahi yinakukwasha antu amavulu kumuhameka Nzambi. w21.12 9 ¶5

Yakoba washindameneneña haNsona. Wazatishili Izu daNzambi kulonda yakwashi antiyilili jindi kwiluka nawu Yehova wakiswilaña antu adi neyi Yoba, ashinshika kudi Nzambi. Yakoba wayidizishili ichi chikuma kuzatisha mazu apela nikulumbulula munjila yatiyakana. Dichi cheliliyi muniyi njila haditumbakesheleña yomweniku ilaña waleteli kalemesha hadi Yehova. Chuma chitunakudizilaku: Tañishenuña munjila yapela nawa yuma yimunakutañisha yifumishenuña Mwizu daNzambi. Neyi tunakudizisha antu hitwatela kudimwekeshaña netu tweluka yuma yayivuluku, ilaña twatela kuyidizishaña kulonda amwiluki Yehova nawu wayakamenaña. (Rom. 11:33) Hakwila twili mwenimu chiña yuma yejima yitunakuhosha yishindamenaña haNsona. Chakutalilahu, chatela tuyilejeña atudizi etu chuma chitwadi kwila neyi iyetu twadiña wena, ilaña twatela kuyikwasha kulonda atoñojokeña hadi antu ashimunawu muBayibolu nikwiluka Yehova chatoñojokañayi nawa nichatiyañayi. Chumichi chikuyikwasha kuzatisha yuma yinakudizawu kulonda amuzañalesheña Yehova, bayi etuku. w22.01 11 ¶9-10

Nzambi wakeñaña nindi tuyikeñi akwetu nawa tubuleña kuyineñesha. Kumukeña neyi chiwadikeña eyi aweni dichuma chatela kwilayi mukwaKristu neyi nakukeña kumuzañalesha Nzambi. Talenu Yesu chamwekesheliyi nindi lushimbi lwekala haALevi 19:18 lwalema nankashi. Mpinji yimu kaFwarisi wamwihwili Yesu nindi: “Lushimbinyi lwabadika haNshimbi jejima?” Yesu wamwakwili nindi “lushimbi lwabadika nawa lwakusambila” lwakwila nawu twatela kumukeña Yehova namuchima wetu wejima, wumi wetu wejima niyitoñojoka yetu yejima. Kuhiñahu Yesu wahosheli mazu ekala haALevi 19:18, nindi: “Lushimbi lwamuchiyedi ludi neyi ilu, lwakwila nawu: ‘Keñaku mukwenu neyi chiwadikeña eyi aweni.’” (Mat. 22:35-40) Kudi njila jajivulu mutunateli kuyimwekeshela akwetu kukeña. Njila yimu mutunateli kumwekeshela netu twayikeña akwetu hikuzatisha kufumba kudi haALevi 19:18. Yahosha nawu: “Kuditenda chinjila; kushila anyana kawantaña jeyi nkunyi kumuchima chinjila.” w21.12 10-11 ¶11-13

Yesu wolweli chikasa chindi nakumwamwina kapostolu Petulu. Petulu wendeli hamenji hampinji yamushinshikileñayi Yesu. Ilaña chamweniyi mpepela yeneni watiyili woma nawa watachikili kujinooka, nkumininaku watachikili kunekama. (Mat. 14:24-31) Tunateli kudizila kudi Petulu. Hafuminiyi muwatu nakwenda hakaluñalwiji, hatoñojokelihu nindi kudi yuma yikumuluwañesha nakutachika kunekamaku. Wakeñeleña kutwalekahu kwenda hamenji sampu nashiki kudi Yesu. Ilaña walekeli kushinshika hadi Yesu. Makonu, twatela kwikala nachikuhwelelu hakwila nawu tuumiki kukala neyi chochakeñeleñayi Petulu chikuhwelelu hakwila nawu yendi hamenji. Neyi tuleka kumukuhwelela Yehova niyikaninu yindi, chikuhwelelu chetu chikuzeya. Hichikweti muloña nakukala kutunateli kumona muchihandilu chetuku, twatela kumukuhwelela Yehova netu wukutukwashaña. w21.12 17-18 ¶6-7

Kulomba, kudiza nikutoñojokahu chikupu. Neyi tunakulomba dikwila nawu tunakuhanjeka naTata yetu wekala mwiwulu watukeña nankashi. Neyi tunakudiza Bayibolu ‘twamwilukaña Nzambi’ Nsulu yamaana ejima. (Yish. 2:1-5) Neyi tunakutoñojoka chikupu hayuma yitunakudiza hadi Yehova dikwila nawu tunakutoñojoka hayilwilu yindi nikwanuka yuma yayiwahi yinakukeñayi kuyililayi antu, iyi diyi njila yakuzatishilamu mpinji yetu chiwahi. Hanu dinu chumanyi chinateli kutukwasha kuzatisha mpinji yetu chiwahi? Neyi chinatwesheki keñenu iluña dawunda. Talenu chakutalilahu chaYesu. Henohu kanda yatachiki mudimu windi wahamaseki, washakamini mafuku 40 muchinkalampata. (Luka 4:1, 2) Kunidi iluña dawunda, Yesu walombeleña kudi Yehova nikutoñojoka hachuma chakeñeleñayi nindi yeli. Chumichi chamukwashili Yesu kudiloñesha nakweseka kwadi kumonayi kumbidi. w22.01 27-28 ¶7-8

Mukulumpi hela manakwetu wapama nateli kushimuna chuma chitwatela kuzatilahu. Neyi mukwetu watukeña chakwila yatufumba kuzatisha Bayibolu twatela kutiyilila kuyuma yinakuhoshayi nikuzatisha kufumba. Kuhosha hohu chalala, chinateli kutukalila kwiteja neyi muntu natufumbi. Tunateli nikuhukana. Muloñadi? Hela chakwila, twetejaña netu twawanina wanyi, chinateli kutukalila kwiteja kufumba neyi muntu yashimuna chiluwa chitukweti. (Mukwa. 7:9) Tunateli kudiyiñisha. Tunateli kutiya kutama chuma chinaleteshi atufumbi ninjila yinazatishiyi hakutufumba. Nawa nikutachika kuwana yiluwa mudi muntu wunatufumbi nakuhosha netu: ‘Hinyi wunamwinki wuswa wakwila nawu yenzi nakufumba? Netu niyena waluwañeshaña!’ Nawa neyi kufumba tunakukeñi wanyi hadaha tunateli kukudiwula, hela kwihula muntu mukwawu kulonda yatufumbi kwesekeja nachitunakukeña. w22.02 8-9 ¶2-4

Komana chihandilu mwituña daNzambi dadiha chikekala chakala chakwila chakaleteshi twakatachiki kujinooka njila yelilañamu Yehova yuma? Chakutalilahu, talenu chuma chamwekeni hanyima yakwila aIsarela anayifumishi muwuduñu muEjipitu. Amakwawu atachikili kutooba muloña anukili yakuda yadileñawu kwenakuna, nawa atachikili kudiwula manina ayinkeleñawu kudi Yehova. (Kuchi. 11:4-6; 21:5) Komana diyi yitoñojoka yitwakekala nayu hanyima yakwila lukadi lwasweja lunamani? Tuneluki wanyi kutoha kwamudimu wutwakekala nawu wakufumisha majilu nakwilisha iseki paradisa chovu-chovu. Chakadi nikujina, twakekala namudimu weneni wakuzata. Komana twakatoobaña nayuma yakatwinkañayi Yehova hayina mpinji? Chuma chimu chitwatela kwiluka dichichi: Neyi twasakililaña hayuma yatwinkañayi Yehova chayinu mpinji, chakekala chaswayi kumusakilila hayina mpinji. w22.02 7 ¶18-19

Wuprofwetu wekala haZekariya 8:23, wunalumbululi chiwahimazu akwila nawu “kaYudeya” niizu dakwila nawu “wudi nanenu” anakutalisha kudi izanvu dimu, dawawayishewa ashalahu. (Rom. 2:28, 29) “Ikumi dawamayala akunyuza yamadimi ejima” dinakwimenaku anyikoku amakwawu. “Akwata kumunkukumba,” dikwila nawu adinuña hamu nawawayishewa nawa ekala hamu nawu mukudifukula kwalala. Munjila yoyimu hakushikija wuwuprofwetu wekala haEzekeli 37:15-19, 24, 25 Yehova naleti awayishewa nianyikoku amakwawu kulonda azatileña hamu mukunuñañana. Iwu wuprofwetu washimuna tunyitondu tuyedi. Awa akweti kuchiñeja kwakuya mwiwulu adi neyi kamutondu “kaYuda,” (mumuchidi mwafumineña anyanta awaIsarela), nawa antu akweti kuchiñeja kwakushakama hamaseki adi neyi kamutondu “kaEfweremi.” Yehova wadi kubomba awa mazanvu ayedi kulonda ekali “kamutondu kamu.” Chumichi chinayi mukwila nawu azatilaña hamu mukunuñañana nawa ekala naMwanta wawu wumu, Kristu Yesu.—Yow. 10:16. w22.01 22 ¶9-10

Yesu wahosheli hadi antu ahanineña yawaana yawu kudi atuzweñi ilaña azatileña nañovu kulonda antu amoni yuma yelileñawu nawa ayihamekeña. Hela chakwila nyidimu yazatileñawu yadiña yayiwahi Yehova hayitiyili kuwahaku. (Mat. 6:2-4) Tunateli kwikala amawahi neyi twila chuma chaloña nankeñelu yayiwahi. Dihulenu nenu: ‘Komana ami neluka chuma chaloña chinatela kwila nikuchiila? Chumanyi chansañumunaña kwila yuma yayiwahi?’ Yehova hiNzambi wakalakalaña, nawa spiritu yindi hiñovu yazatikaña. (Kutach. 1:2) Dichi mukaabu wejima waspiritu wunateli kutukwasha kukalakala. Chakutalilahu, kambanji Yakoba wasonekeli nindi: “Chikuhwelelu chakadi nyidimu chafwa.” (Yak. 2:26) Dichuma chochimu chitunateli kuhosha kutalisha kunyikaabu yaspiritu yaNzambi. Mpinji yejima yitwayimwekeshaña, twamwekeshaña netu spiritu yaNzambi yinakuzatika mudi etu. w22.03 11-12 ¶14-16

Hadaha twadifukulaña kudi Yehova mpinji yejima nikuzata nyidimu yayiwahi. Hela chochu, Kapostolu Petulu wayikolesheli akwaKristu kwila chuma chimu chalema. Henohu Petulu kanda yatukoleshi nindi twikali ajila muyilwilu yetu watulejeli nindi: “Loñeshenu yitoñojoka yenu kulonda muzati mudimu.” (1 Pet. 1:13) Mudimwinyi yeniwu? Petulu wahosheli nindi amanakwaKristu awayishewa “‘[akashimwina] kumaluña ejima kuwaha kwejima’ Kwanowu wayitambikili.” (1 Pet. 2:9) Nawa akwaKristu ejima makonu akweti iwu mudimu walema wakwashaña antu amavulu kubadika nyidimu yikwawu. Antu jaNzambi ajila akooleka chikupu chazatañawu mudimu wakushimwina nikudizisha neyena. (Maku 13:10) Neyi twilaña netu mwenimu, tukumwekeshaña netu twamukeña Nzambi niakwetu antu. Nawa tukumwekesha netu tunakukeña “kwikala ajila” muyilwilu yetu yejima. w21.12 13 ¶18

Kapostolu Pawulu wayitoñojokeleleña hohu yuma yayiwahi amanakwindi niahela. Welukili chaambu chidi hakachi kayilwilu yatama nawantu atama. Wayikeñeli amanakwindi nawa washili muchima hayilwilu yawu yayiwahi. Neyi chinakuyikalila kwila yuma yayiwahi, wadiña nakutoñojoka nindi anakukeña kwila yuma yaloña dichi anakukeñeka hohu kuyikwasha. Talenu chuma cheliliyi Pawulu nawahela ayedi adiña muchipompelu chamuFwilipi. (Fwili. 4:1-3) Chinamwekani neyi, Eyodiya naSintiki akañenyi kutiyañana chakwila wubwambu wawu wamanini. Pawulu habulili kuyitiyila luwi hela kwikala wakalishaku; ilaña washili muchima hayilwilu yawu yayiwahi. Adiña ahela ashinshika nawa amukalakeleli Yehova hadi mpinji yayilehi. Pawulu welukili nindi Yehova wayikeña. Chineli Pawulu wadiña nayitoñojoka yayiwahi hadi awa ahela, wayikolesheli nindi aleti kuwunda mukachi kawu. Hamuloña wakwila Pawulu washili muchima hayilwilu yayiwahi yawamanakwindi watwalekelihu kwikala namuzañalu nikwikala ninawubwambu wakola nawamabwambu jindi muchina chipompelu. w22.03 30 ¶16-18

Kuwunda kwahanañayi Yehova kwawundishaña muchima wetu nawa kwatukwashaña kwikala nayitoñojoka yayiwahi. Talenu chuma chamumwekeneni muhela Luz. Wahosheli nindi: “Kakavulu natiyaña wuudi. Nawa natoñojokaña nami Yehova wankeña wanyi. Ilaña neyi natachiki kutiya wuudi namulejañamu Yehova chinakutiya. Kulomba kwankwashaña chikupu.” Chuma chamumwekeneni chinakumwekesha nawu tunateli kwikala nakuwunda neyi tulombaña. (Fwili. 4:6, 7) Tweluka netu Yehova niYesu akutukwasha neyi tufwisha ntaña yetu itwakeña. Anatusañumuni kushimwina nikutañisha nawushona muloña Yehova Nzambi niYesu Kristu akweti wushona. Nawa chatukundejaña hakwiluka netu Yehova niMwanindi akeñayi eluka chitwatiyaña, eluka kuzeyazeya kwetu nawa akutukwasha kuumika. Tunakutalila ifuku dakashikijayi Yehova ‘dakakombolayi madilu ejima kumesu etu.’—Chim. 21:4. w22.01 15 ¶7; 19 ¶19-20

Yesu wateneni yiisu yiyedi yambuka yatwalaña kunjila jiyedi jashiyashana, njila “yabwambwañana” ninjila “yanyanya.” (Mat. 7:14) Kwosi njila yamuchisatuku. Twatela kuditondela etu aweni njila yitwatela kwendamu. Ichi dichuma chalema chitwatela kufuukulahu muloña dihanashindameni wumi wetu wahaya nyaaka. Njila “yabwambwañana” ayiluka kudi antu amavulu muloña yaswayi kwendelamu. Chawushona, antu amavulu atondahu kwenda muniyi njila nawa elaña yuma yoyimu yelaña antu endañamu. Akañanyaña kwiluka nawu mwini iyi njila hiSatana Diyabolu nawa iyi njila yindi yatwalaña kukufwa. (1 Kor. 6:9, 10; 1 Yow. 5:19) Kwambukaku nanjila “yabwambwañana,” njila yikwawu “yanyanya” nawa Yesu wahosheli nindi antu antesha hohu diwu ayiwanaña. Muloñadi? Muvasi yalondelahu, Yesu wayisoñamishili atumbanji twindi kutalisha hadi atuprofwetu akutwamba.—Mat. 7:15. w21.12 22-23 ¶3-5