January

Chumanyi chamuletesheli Timotewu amuzatishi nankashi kudi Yehova? Muloña wadiña nayilwilu yayiwahi yawakaKristu. (Fwili. 2:​19-22) Neyi tutala chamulumbulwiliwu Timotewu kudi kapostolu Pawulu, amushimuna nawu wadiña wadizoza, washinshika, wadikita nawa washindamenewa. Wayakameneneña nankashi amanakwindi. Chafuminimu, Pawulu wamukeñeli nankashi Timotewu nawa wamwinkeli nikuzata nyidimu yakala. Munjila yoyimu, Yehova wakutukeña nawa wukutuzatishaña nankashi muchipompelu neyi twikala nayilwilu yakeñayi. (Mas. 25:9; 138:6) Dichi lombelenuhu nikutoñojokahu hachilwilu chimukweti nawa chimunakukeña kuwahishaku. Tondenu chilwilu chimunakukeña kuzatilahu. Kwila musweja kwikala nawushona nehi? Munakukeña kwikala akakuleta kuwunda nawa anakenaña? Munateli kwihulaku ibwambu denu imwakuhwelela kulonda ayilejiku chimunateli kuzatilahu.—Yish. 27:6. w22.04 23 ¶4-5

Yehova wakeñaña nindi twiikali namuzañalu. Tuneluki chumichi muloña muzañalu himukaabu waspiritu yajila. (Ñal. 5:22) Chineli mukuhana mwekala muzañalu chikupu kubadika wekala mukutambwila, twekalaña namuzañalu nankashi neyi tuzataña chikupu mumudimu wakushimwina nikuyikwasha amanakwetu niahela munjila jambokamboka. (Yilw. 20:35) Neyi chinasonekiwu munsona yetu yalelu, kapostolu Pawulu nashimunihu yuma yiyedi yinateli kutuletesha kutwalekahu kwikala namuzañalu. Chatachi, twatela kumuzatila Yehova hanakumini ñovu jetu. Neyi tunakumukalakela hanakumini ñovu jetu, twatela kuzañalalaña. (Mat. 22:​36-38) Chamuchiyedi, bayi tudesekejaña nawakwetuku. Hichikweti muloña nachitunakuzataku, muloña wakukatakata, yuma yitwadiza hela yuma yitweluka, twatela kumusakililaña Yehova. Munjila yikwawu, neyi akwetu anakuzata nankashi munjila jikwawu jakushimwinamu kubadika chitunakuzata, twatela kuzañalala chinakuzatishawu yawaana yawu hakumushimeka Yehova. w22.04 10 ¶1-2

Kukuma kwakwitiya kwakutwamba kwakenza mukukasumwisha, chumichi chikahayamisha kaayi. (Chim. 18:​8-10) Neyi Babiloni Muneni anamujilumuni dehi kaayi kakanyinkesha nawa chikaleta yihuñu, ilaña antu jaNzambi akazañalala muloña wayuma yiyedi. Iwu chilumbu chaYehova Nzambi wunashimbuli akamufumishahu haya nyaaka, nawa twakeluka netu katataka atwamwini kunshakaminu yatama yakaayi kamakonu! Danyeli washimwineñahu dehi nindi “kwiluka kwalala kwakavula.” Nawa mwamweni kunavuli! Tuneluki wuprofwetu wahosha hampinji yitudimu. (Dan. 12:​4, 9, 10) Iwu wuprofwetu woloka nawa chatukwashaña kumukuhwelela Yehova niIzu dindi. (Isa. 46:10; 55:11) Twalekenuhu kukolesha chikuhwelelu chenu kuhitila mukudiza Bayibolu nikukwasha antu ekali nawubwambu wawuwahi naYehova. Wukuyikiña antu amushindamenaña nawa wukuyinka “kuwunda kwabulaña kumana.”—Isa. 26:3. w22.07 6-7 ¶16-17

Mukanda waChimwekeshu wamwekeshaña nawu Wanta waNzambi wamwiwulu watachika dehi kuyuula nawa Satana amuhaña dehi mwiwulu. (Chim. 12:​1-9) Chamuhañawu Satana, mwiwulu mudi kuwunda, ilaña chatuletela yihuñu. Muloñadi? Muloña Satana wasukwila ndulu hadi antu amukalakelaña Yehova nakashinshi hanu hamaseki. (Chim. 12:​12, 15, 17) Tunateli kutwalekahu ñahi kwikala ashinshika hela chakwila Satana nakutulukuka? (Chim. 13:10) Chuma chatachi chinateli kutukwasha hikwiluka yuma yikamwekana kumbidi. Chakutalilahu, muChimwekeshu, kapostolu Yowanu walumbululamu yuma yitukukeña kudiluñisha katataka. Hakachi kaniyi yuma hadi nikufumishahu ayilumbu jaNzambi. Muvasi yakutachikilahu hohu, Chimwekeshu chinatuleji nachu mazu itukukeña kutaña anayishimuni “muyinjikijilu,” dikwila nawu muchifwikija.—Chim. 1:1. w22.05 8 ¶1-3

Chuma chakelawu ambuña aYehova ashinshika chikakojeja antu adikañaña naYehova kuzuwa. Chuma chikafumamu, nyuza yakadibomba kulonda yakalukuki antu jaNzambi hamaseki hejima. Iku kulukuka akulumbulula muwuprofwetu nawu kulukuka kwaGogi waMagogi. (Ezek. 38:​14, 15) Yehova wakela ñahi naniku kulukuka? Natuleji nindi: “Kuzuwa kwami kwasweja kwakasañumuka.” (Ezek. 38:​18, 21-23) Chimwekeshu kapetulu 19 kanalumbululi chuma chikulondelahu. Yehova natemeshi Mwanindi amwini antu jindi nikushinda ayilumbu jawu. Muniku kulukuka Yesu wakadibomba “[na]mazaza awakanjita amwiwulu,” añelu ashinshika hamu nawa a 144,000. (Chim. 17:14; 19:​11-15) Yumanyi yakafumamu muniyi njita? Kujilumuna antu ejima nimakuloñesha ejima adikañaña naYehova!—Chim. 19:​19-21. w22.05 17 ¶9-10

Hanyima yakwila Adama naEva anavulumuni, Yehova wayinkeli anyanindi kuchiñeja kuhitila muwuprofwetu. Mazu ahosheliyi ekala haKutachika 3:​15, nawu: “Nukusha wulumbu hakachi kaneyi namumbanda nihakachi kamwaneyi namwana kamumbanda. Wakachika mutu weyi, nawa eyi wakamusuma kukatutu.” Iwu wuprofwetu wekala mumukanda watachi wamuBayibolu. Munjila yimu hela yikwawu, nyikanda yejima yinashali yamuBayibolu yinakundami kuniwu wuprofwetu. Neyi chabombañawu yipapilu hamu nakutuña mukanda, mazu ekala haKutachika 3:15 abomba nsañu yekala munyikanda yamuBayibolu kwikala nsañu yimu yanuñañana, dikwila nawu, Chamwinu akamutemesha kulonda akajilumuni Diyabolu niantu jindi ejima atama. Antu amukeña Yehova akatambwila nkisu! Kudiza Bayibolu kukutukwasha kwiluka chinashikijewi iwu wuprofwetu nichiwunateli kutukwasha. w22.07 14 ¶1-3

Mulombenu Yehova ayinki maana kulonda mukwashi anyanenu kumukeña. (Yak. 1:5) Diyi Muntu wunateli kuyileja kufumba kwakuwahi. Kudi yuma yinaleteshi tuhoshi mwenimu. Tuhoshenu hayiyedi. Chatachi, Yehova hinvwali wakuluka yitembi. (Mas. 36:9) Nawa chamuchiyedi, kufumba kwindi kwatukwashaña mpinji yejima. (Isa. 48:17) Kuhitila Mwizu dindi nimuKuloñesha kwindi, Yehova naloñeshi yakuda yayivulu yakuspiritu yashindamena haBayibolu yinateli kuyikwasha kulonda mukwashi nachu anyanenu kumukeña Yehova. (Mat. 24:45) Chakutalilahu, munateli kuwana nsañu yinateli kuyikwasha muyibaaba yinakuhosha nawu “Ifingafwa Indupwa,” yedikileña hadi yaaka yayivulu muMagazini yaLoleni! nawa ichi yidi nihawebusayiti yetu. Cheñi, mumavidiyo amavulu adi ha jw.org mudi kwihujola niyimwenu yinateli kukwasha anvwali kuzatisha kufumba kwaYehova hampinji yinakukulishawu anyanawu.—Yish. 2:​4, 5. w22.05 27 ¶4-5

Yehova diyi Muntu wanakenaña chikupu mukuleña kwejima. Chatachi, wadiloñesha kwanakena mpinji yejima. Chamuchiyedi, weluka yuma yejima hadi etu. Watwiluka nankashi chatuleñayi, nawa diyi weluka nankashi neyi chakwila tunabalumuki chikupu. Nawa chamuchisatu, neyi Yehova natwanakeni, wavulamenañaku kuyiluwa yetu. Chumichi chatuleteshaña kwikala nachinleji chitooka nikutwiteja. Hela chochu, chineli twawanina wanyi tukutwalekahu kuvulumuna. Ilaña, mazu ekala muInsight on the Scriptures, Volume 2, hefu 771, anateli kutukundeja: “Chineli Yehova hamuloña waluwi lwindi lwashindamena hakuzeyazeya kwawambuñindi, hiyatela kuneña mpinji yejima hamuloña wanshidi yakoñañawu yafuma kukubula kuwaninaku. (Mas. 103:​8-14) Neyi elaña yuma yakeñañayi Nzambi, akwikala namuzañalu. (Fwili. 4:​4-6; 1 Yow. 3:​19-22).”w22.06 7 ¶18-19

Bayi neyi Satana wazatishaña hohu jinfulumendi kulonda atutiyishi womaku. Amakwawu atiyaña woma nachikutoñojokawu antaña jawu neyi eluka nawu anadizi chalala. Mpinji yikwawu atiyaña woma chumichi kubadika nikuyeta. Ayikeña nankashi antaña jawu nawa akeñaña nawu niwena amwiluki nikumukeña Yehova. Aneñaña nankashi neyi anakutiya antaña jawu anakuhosha yuma yatama hadi Nzambi walala niantu adifukulaña kudi yena. Hela chochu, mpinji yikwawu antaña jawu adiña nakuyikaanisha adizaña chalala. Indi neyi antaña jetu aleka kuhosha nanetu muloña wachalala chitunadizi, tukwila ñahi? Mazu ekala haIsamu 27:10 anateli kutukwasha. Neyi twanuka netu Yehova watukeña, hitukutiya woma ikañeshaku. Nawa tukukuhwelela netu wakatusomwena hamuloña wakuumika. Yehova wukutwinka yuma yejima yitunakukeña, wukutukwasha kwikala mukuwunda nimuzañalu nawa tukuswina kudi yena. w22.06 16-17 ¶11-13

Hampinji yazatileñayi Yesu mudimu windi, amutwambilili nawu wadiña mukakusheta, wafwa hakuda, muntu waDiyabolu, mukwakufumpa nshimbi yaSabata nawa mukakutuka Nzambi. (Mat. 11:19; 26:65; Luka 11:15; Yow. 9:16) Hela chochu, Yesu hayakwilihu chatamaku. Neyi antu anatuhoshi chatama, twatela kwikala neyi Yesu, bayi tuyakula chatamaku. (1 Pet. 2:​22, 23) Hela chochu, chapela wanyi kudiwunjika neyi muntu nakwili chatama. (Yak. 3:2) Chumanyi chinateli kutukwasha? Neyi muntu ayihosha chatama hampinji yimunakushimwina bayi muhilaku. Manakwetu Sam wahosheli nindi, “Natoñojokeleña nami iwu muntu nateli kudiza chalala nawa nateli kuhimpa.” Mpinji yikwawu mwini itala wahilaña muloña wakwila tunenzi hampinji yatama. Neyi tuwana muntu wunahili, twatela kulomba wumweneni, twatela kulomba Yehova atukwashi kwikala adiwunjika kulonda tubuli kumwakula chatama. w22.04 6 ¶8-9

Kudiza Bayibolu nawanyana diyi njila yimu yalema yakuyikwashilamu kuswina kwakwihi naYehova. (2 Tim. 3:​14-17) Hela chochu, Bayibolu yashimuna njila yikwawu yakukwashilamu anyana kumwiluka Yehova. Mumukanda waYishimu, tata yawantu wamwanukishaña mwanindi hatooka nindi bayi adiwula yilwilu yaYehova yamwekenaña muyileñaleñaku. (Yish. 3:​19-21) Enu anvwali, chakadi nikujina mwekalaña nampinji yakwendujola nawanyanenu. Zatishenuña iyi mpinji kulonda mukwashi anyanenu amoni kunuñañana kwekala hakachi ‘kayuma yaleñawu’ nayilwilu yaYehova yayiwahi. (Rom. 1:20) Talenu Yesu chazatishileñayi yileñaleña hakutañisha. Mpinji yimu, Yesu wayilejeli atumbanji twindi kushinshika makololu ninkenu. (Luka 12:​24, 27-30) Wadizishili atumbanji twindi chikuma chalema hachisambu niluwi lwamwekeshañayi Tata yawu wamwiwulu nindi Yehova wadiishaña nikuvwika ambuñindi ashinshika neyi chelañayi namakololu ninkenu jamwisaña. w23.03 20-21 ¶1-4

Twamusakililaña Yehova muloña tunateli kulomba kudi yena kuhitila mudi Mwanindi. Yesu diyi njila yazatishañayi Yehova hakutwinka jitunakukeña. Yehova watiyililaña nikwakula kulomba kwalombañawu mwijina daYesu nawa watwanakenaña nshidi jetu kushindamena hamulambu wefutu danyiloña daYesu. (Rom. 5:1) Nsona jamulumbulula Yesu nawu “kapristu muneni . . . nashakami kuchikasa chachidiilu chetanda daWukeleñi mumawulu.” (Heb. 8:1) Yesu diyi “nkwashi [yetu] wudi naTata.” (1 Yow. 2:1) Twamusakililaña nankashi Yehova hakutwinka Kapristu Muneni watiyishaña kuzeyazeya kwetuku nawa “watulembelelañaku.” (Rom. 8:34; Heb. 4:15) Chakadi mulambu waYesu hitunateli kuhanjeka naYehova mukulombaku. Mukwiteja nenu hitukweti mazu amavulu akumusakilila Yehova hachawaana chatwinkayi chaMwanindiku! w22.07 23 ¶10-12

Muntu washinshika welaña munashiikiyi nawa hatwambañaku. (Mas. 15:4) Antu amwiluka nawu atela kumukuhwelela. Tunakukeña amanakwetu niahela amoneña nawu atela kutukuhwelela. Hitunateli kukanjikija antu netu atukuhweleliku. Antu atela kutukuhwelela awenawu. Antu ahoshaña nawu chikuhwelelu chekala neyi mali. Chakala kuyikwata; ilaña chapela kuyijimbesha. Chakadi nikujina, Yehova watukuhwelela. “Yuma yejima yelañayi yalala.” (Mas. 33:4) Nawa wakeñaña nindi tumwimbujoleña. (Efwe. 5:1) Twamusakililaña nankashi Yehova hakutubomba muchisaka chawamanakwetu mudi antu akweti kukeña nawa itwatela kukuhwelela! Dichi wejima wetu twatela kuyikuhwelela awa amanakwetu niahela. Neyi wejima wetu hamuntu-hamuntu tukumwekeshaña kukeña, kudizoza, kashinshi, kushinshika nikudiyuula, tukuleteshaña ejima kudikuhwelela wumu namukwawu muchipompelu. Tumwimbujoleña Nzambi yetu, Yehova, nikutwalekahu kumwekesha netu atela kutukuhwelelaña. w22.09 8 ¶1-2; 13 ¶17

Hela chakwila twekala muchisaka cheneni chawakakudifukula, mpinji yikwawu tunateli kumona netu tudi nkawetu nawa twaneñaña neyi tutoñojoka hakukala kutunakuhitamu nakumona netu tudi nkawetu. Yehova hanakukeña nindi tutoñojokeña muniyi njilaku. Talenu cheliliyi nakaprofwetu Elija. Yehova wamukolesheli Elija kuhosha. Mapampa kayedi wamwihwili Elija nindi: “Wunakwiladi kunu?” (1 Anya. 19:​9, 13) Awa mapampa ejima, Yehova wamutiyilileña Elija chadiña nakuhoshayi. Wamulejeli cheñi Elija nindi wukweti akakudifukula amavulu. (1 Anya. 19:​11, 12, 18) Chakadi nikujina, muchima waElija wawundili hanyima yakumulejamu Yehova chatiyileñayi nikutiya chamwakwiliwu. Yehova wamwinkeli Elija nyidimu yayivulu yalema. Wamulejeli kumuwayisha Hazayeli kulonda ekali mwanta wakuSiriya, Yehu kwikala mwanta muIsarela niElisha kwikala kaprofwetu. (1 Anya. 19:​15, 16) Yehova chamwinkeliyi Elija iyi nyidimu wamukwashili kutoñojoka hayuma yayiwahi. Nzambi wamwinkeli cheñi ibwambu wamuwahi, Elisha. w22.08 8 ¶3; 9 ¶5

Komana chipompelu chenu achituñilahu Itala daWanta hela kudiwahisha chachiha? Chakadi nikujina, mwatiyili kuwaha nankashi chimwapompelelimu katachi. Mwamusakilili nankashi Yehova. Hadaha, muzañalu wayiswejeleli chakwila mwakañenyi nikwimba kamina kakwenzunwina nachu. Matala aWanta chayituñañawu chiwahi aletaña kalemesha hejina daYehova. Ilaña twaletaña kalemesha chikupu hejina daYehova neyi tuzataku mudimu wukwawu wakutuña. Iwu mudimu munabombeli mudimu wukwawu walema bayi neyi kutuña hohuku. Munabombeli kutuña antu enzaña kunawa maluña akudifukwila. Kapostolu Pawulu wadiña naniyi yitoñojoka hampinji yadiñayi nakusoneka mazu adi munsona yetu yalelu. Kapostolu Pawulu himuntu itwatela kwimbujola welukili kutuña akwawu akaKristu. Wayitiyilileña wushona. Tunateli kumwimbujola kulonda tutuñeña amanakwetu niahela.—1 Kor. 11:1. w22.08 20 ¶1-2

MukaKristu wunakukeña kwikala waloña kumesu aNzambi watela kwikala washinshika munsañu yejima yakulanda nakulandulula. Muntu waloña wakeña cheñi wuñanji, dikwila nawu watiyaña kutama neyi nakumona antu anakuyikabisha. Nawa hakwila nawu “[amutiyishi Yehova] kuwaha chikupu,” muntu waloña wukutoñojoka chikutiyayi Nzambi hanoyu nsañu yinakufuukulayi. Bayibolu yamulumbulula Yehova nawu diyi Nsulu yakuloña. Hamuloña wachumichi, amutena nawu “iluña dakuloña.” (Yere. 50:7) Chineli Yehova diyi Nleñi, diyi hohu watela kushaku nshimbi hayuma yaloña niyabula kuloña. Weluka chikupu yuma yaloña niyabula kuloña kubadika chitwayiluka. (Yish. 14:12; Isa. 55:​8, 9) Hela chochu, chineli atuleña muchinfwanisha chaNzambi, tunateli kuhemba nshimbi jindi jaloña. (Kutach. 1:27) Nawa dichitwakeñaña kwila. Kukeña kutwamukeña Tata yetu kwatusañumunaña kumwimbujola chikupu.—Efwe. 5:1. w22.08 27 ¶5-6

Neyi tudi nakukala hela tunaneñi, tunateli kumona netu twatela kwilahu chuma kulonda tumanishi iku kukala. Chidi hohu chiwahi, ilaña twatela kwikala asoñama kulonda tubuli kwila yuma yahelayi Yehova. (Efwe. 5:​10-12, 15, 16) Mumukanda windi wayisonekeleliyi Afwilipi, kapostolu Pawulu wayikolesheli akaKristu kutwalekahu kwila yuma “yaloña, . . . yakadi majilu, . . . yasañumunaña kukeña, [ni]yayiwahi.” (Fwili. 4:8) Hela chakwila Pawulu wasonekeli wanyi yisela yitwatela kwila, yuma yasonekeliyi yikutukwasha kutonda chiwahi yisela. Esekenu chumichi: Hejima hanasonekiwu nawu “yuma” haniyi vasi, sinsishenuhu mazu adi neyi “tumina,” “mafwilimu,” “nyikanda,” hela “yisela yahavidiyo.” Kwila mwenimu kukuyikwasha kwiluka yuma yetejayi Nzambi niyabula kwitejayi. Tunakukeña kulondela nshimbi jaYehova jaloña muchihandilu chetu.—Mas. 119:​1-3. w22.10 9 ¶11-12

Hampinji yachidiñawu amomi, “aloña” amakwawu elileña yuma yasweja kutama chikupu. Akakeñekaña kuyidizisha kulonda akashakameña kwesekeja nanshimbi jaYehova jaloña. Hakwila nawu iwu mudimu wukazatiki, Wanta waNzambi wakalombola progilamu yakutañisha antu hamaseki yakwila kanda yimwekaneñahu dehi. Anyi akayitañishaña antu abula kuloña? Izaza deneni niantu aloña akasañulawu. Hakwila antu abula kuloña akayisoneki majinawu mumukanda wawumi, atela kwikala nawubwambu wawuwahi naYehova nikudihana awenawu kudi yena. Yesu Kristu niakwawu ansompeshi akatalaña chachiwahi chikelañawu awa antu abula kuwanina nansañu yakayidizishañawu. (Chim. 20:4) Wejima wakakaana kutiyilila kuniwu wukwashu akamufumishamu hela chakwila wudi nayaaka 100. (Isa. 65:20) Yehova niYesu anateli kwiluka yuma yidi mumuchima nawa hiyaketeja muntu wudi wejima kuleta kukala mwituña dadihaku.—Isa. 11:9; 60:18; 65:25. w22.09 17 ¶11-12

Muniyi vasi mazu akwila nawu “akweti wuswa wabadika” anakutena anyuuli awantu akweti ñovu nawa ayuulaña akwawu. AkaKristu atela kwovwahila awa akawuswa. Awa anyuuli aletaña kuwunda, amwekeshaña nawu nshimbi anajilondeli nawa mpinji yikwawu ayihakwilañaku antu jaYehova. (Chim. 12:16) Dichi atuleja kuyinka yuma yakeñañawu yidi neyi nyisonku, nyilambu nikalemesha. (Rom. 13:7) Hela chochu, iji nfulumendi jikweti hohu wuswa muloña Yehova wayiteja kwikalaku. Yesu wazatishili chishina chochimu hampinji yamwihujoleleñawu kudi Nguvulu wawaRoma Pontusi Pilatu. Pilatu chahosheliyi nindi wukweti wuswa wakumumbaku hela kwiteja amujahi, Yesu wamulejeli nindi: “Eyi hiwunateli kwikala nawuswa hadi amiku, chiña neyi anakwinkiwu kufuma mwiwulu.” (Yow. 19:11) Neyi chichadiña kudi Pilatu, wuswa wukweti anyuuli awantu niakamapolitiki makonu wudi namwakukumina. w22.10 14 ¶6

Mwanta Davidi amoneneni kusoneka hachakekala yuma kumbindi hampinji yakela mwanta wamaana nawa washinshika nashakami dehi hetanda. (Mas. 37:​10, 11, 29) Kakavulu twatañaña Isamu 37:11 neyi tunakuhanjeka nawantu haParadisa yakumbidi. Chumichi chinateleli muloña Yesu wahosheli hanawa mazu muMpanji yindi yahaMpidi, nakumwekesha nindi awa mazu akashikijewa kumbidi. (Mat. 5:5) Ilaña mazu aDavidi amwekesheli cheñi yuma chiyadi kwikala mumafuku aMwanta Solomoni. Hampinji yayuulileñayi Solomoni muIsarela, antu jaNzambi adiluñishileña kuwunda chikupu nawa adiña nayuma yayivulu mwituña “dasweja mayeli niwuchi.” Nzambi wahosheli nindi: “Neyi mukutwalekahu kwovwahila nshimbi jami . . . , nakaleta kuwunda mwituña nawa mwakashakamaña chakadi wakuyitiyisha woma.” (Lev. 20:24; 26:​3, 6) Iyi yikaninu yashikijeweli hayuulileñayi Solomoni. (1 Kushi. 22:9; 29:​26-28) Mazu ekala haIsamu 37:​10, 11, 29 ashikijeweli kunyima nawa akashikijewa cheñi kumbidi. w22.12 10 ¶8

Etu akaKristu alala, twatela kulondela wunlomboli. Bayibolu yahanaña iku kufumba kwakuwahi nawu: “Wunlomboli wamaana wukuzuña njita yeyi, nawa hadi akakulejana maana amavulu hekalaña kwimika mushindu.” (Yish. 24:​6, tth.) Talenu kuzatisha ichi chishina chichinateli kutukwasha mumudimu wetu wakushimwina nikutañisha. Chatela tuzateña mudimu wakushimwina kwesekeja nachitunakeñi etu aweni, twatela kulondela chinatulejiwu. Twatambwilaña iwu wunlomboli kukupompa kwetu kwawakaKristu, kwahanañawu jimpanji jashindamena haBayibolu kudi anhoshi akulukila nawa kutwadizaña chakuhanjeka nawantu. Kubombelahu, kuloñesha kwaYehova kwatwinka yitwa, nyikanda nimavidiyo, atukwashaña kutiyishisha Bayibolu. Twasakililaña nankashi hakufumba kwakuwahi kwekala Mwizu daNzambi! Twadi kwikala ñahi chakadi Izu daNzambi? Dichi tuzateña nañovu kulonda tuzatisheña maana atwinkañayi Yehova.—Yish. 3:​13-17. w22.10 23 ¶18-19

Neyi chochitwekalaña nañovu neyi tuda yakuda nawa yizatika chiwahi mumujimba, munjila yoyimu chikuhwelelu chetu chakolelañaku neyi tudizaña Izu daNzambi nikutoñojokahu chikupu. Kutalisha Hezu daNzambi, Yehova wakeñaña nindi ‘tuditiyishisheña. Tunateli kwila mwenimu kuhitila mukulomba, kutaña nikutoñojokahu chikupu. Chatachi, twalombaña kulonda tuloñeshi muchima wetu witeji yuma yinakutulejayi Nzambi. Kuhiñahu, twatañaña nsañu yamuBayibolu. Nkumininaku, twahudikilaña nakutoñojokahu, dikwila nawu kutoñojoka chikupu hansañu yitunatañi. Yumanyi yikufumamu? Neyi tutoñojokañahu chikupu, muchima wetu wachifwikija wukutiyishisha Izu daNzambi. Kutaña Bayibolu nikutoñojokahu chikupu kwalemenadi? Kwila mwenimu kwatwinkaña ñovu yakeñekaña hakwila tushimwini nsañu yaWanta makonu nikushimuna nsañu yakala yawunsompeshi yitukushimwina katataka kumbidi. Cheñi, neyi tutoñojokaña hayilwilu yayiwahi yaYehova, wubwambu wetu nayena wukukolelañaku chikupu. w22.11 6-7 ¶16-17

Yesu wamwekesheli nindi akakumulondela kushilahu niantu abula kwikala muchipompelu chawakaKristu, akeluka akakumulondela alala kuhitila mukukeña kwakufuma hamuchima kwadimwekeshelañawu. Nawa kukeña kwekala hakachi kawantu amuchipompelu chawakaKristu kwambukaku chikupu. Hela chochu, aYinsahu jaYehova hiyawaninaku? (1 Yow. 1:8) Dichi hampinji yitukuyilukaña nankashi antu amuchipompelu, dihu hichikwikala chaswayi kumona yiluwa yawu. (Rom. 3:23) Chawushona, amakwawu aleka kumukalakela Yehova muloña wayiluwa yawantu amakwawu. Yesu wamwekesheli ñahi nindi wayikeñeli apostolu indi? Nawa tunateli kumwimbujola ñahi Yesu makonu? Ninetu aYinsahu apapatishewa tukwila chiwahi neyi tukutoñojokaña hañakwilu yanawa malwihu. Kwila mwenimu kukutukwasha kumwekesha kukeña chikupu, sweje-e neyi akwetu anakuluwañesha.—Efwe. 5:2. w23.03 26-27 ¶2-4

Chitunakuswina kwakwihi nakukuma kwanshakaminu yamakonu, twatela kukuhwelela kumona kukala kukufuminaña muchipompelu. Iku kukala kunateli kusha kashinshi ketu kudi Yehova mukweseka. Dichi twatela kuhembaña yitoñojoka yetu. Neyi mumona nenu anayili katama kudi mukwenu mukaKristu, bayi muhilaku. Neyi anayifumbi, bayi musha maana hansonyi yimukutiyaku, ilaña itejenu kufumba nawa zatilenuhu. Nawa neyi kuloñesha kwaYehova kuhimpa yuma yinayineñeshi halwenu, itejenu oku kuhimpika namuchima wenu wejima nawa ovwahilenu munafuukuliwu. Twalekenuhu kumukuhwelela Yehova nikuloñesha kwindi neyi kashinshi kenu kadi mukweseka. Ikalenu adiwunjika, kutoñojoka chiwahi nikumona yuma neyi chayimonañayi Yehova. Mulombenu Yehova kulonda ayikwashi. Nawa bayi mudambula nachipompeluku. Chikufumamu, hela chakwila mukumona kukala kwamuchidinyi, Satana hakutwesha kuyambula kudi Yehova hela kuloñesha kwindiku.—Yak. 4:7. w22.11 24-25 ¶14-16

Akulumpi akwashaña amanakwawu kudiloñeshela chadimu henohu wubanji kanda wumwekani. Akwashaña ejima muchipompelu eluki chatela kwilawu hakwila ekali akiñewa nikutemeshela akulumpi foni neyi kudi kukala. Indi enu munateli kukwashana ñahi? Neyi kunamwekani wubanji, ihulenu akulumpi chimunateli kukwashana. Hadaha munateli kuloñeshela ana anahiti muwubanji hela anenzi nakukwashana hatela kukaamawu. Munateli kuyitwalilaku akakushimwina anakaankili yakuda hela yuma yinakukeñawu. Hela chakwila wubanji wunamwekeni kwiluña dakwakulehi, munateli kukwashana. Munjilanyi? Kuhitila mukuyilombelaku. (2 Kor. 1:​8-11) Hadaha munateli kukwashaku ana adi mukukaankila kuhitila mukuhanaku yawaana mumudimu wamukaayi kejima. (2 Kor. 8:​2-5) Neyi munateli kuya kwiluña kunamwekani wubanji nakukwashana, ihulenu akulumpi chimwatela kwila. Neyi ayitambika kuya nakuzataku kunamwekani wubanji, akayidizisha chakwila kulonda mwakazati chiwahi kwakayitemeshawu hakayikeñawu. w22.12 24 ¶8; 25 ¶11-12

Bayibolu yikwawu yabalumuna nsona yalelu nawu: “Hikunayiwani kweseka kwabulaña kutwesha antu ejimaku.” Awa mazu ayisonekeleli amayala niambanda akaKristu ashakamineña muKorinda. Amakwawu hakusambila adiña akawujila, akawutumwa niakakusheta. (1 Kor. 6:​9-11) Munakutoñojoka nenu hanyima yakupapatishewa, hiyalwishileñahu nakufwila kwatama kudi kwejimaku? Alwishileña. Hela chakwila wejima wawu adiña akaKristu awayishewa, ilaña achidiña antu abula kuwanina. Chakadi nikujina, alwishileña nakufwila kwatama mpinji yejima. Chumichi chatukoleshaña. Muloñadi? Muloña chinakumwekesha nawu kufwila kudi kwejima kumwalwishaña naku, kudi muntu wakushindahu dehi. Mwamweni, munateli kutwalekahu kwikala “akola mbe-e muchikuhwelelu, nanochu chimuneluki nenu makabi wowamu imunakuhitamu, diwu anakuhitamu nianakwenu ejima.”—1 Pet. 5:9. w23.01 12 ¶15

Yesu wamulombeli Yehova nindi ayihembeña akakumulondela. (Yow. 17:11) Muloñadi iyi nsañu chiyatukwashilaña kwikala ahamuka? Muloña Yehova wukweti ñovu kubadika ayilumbu jetu. (1 Yow. 4:4) Wamonaña yuma yejima. Tuneluki chikupu netu neyi tumushindamena Yehova tukuleka kutiya woma nawa tukumwekeshaña kuhamuka. Komana mpinji jikwawu mwatiyaña nsonyi kuleja antu nenu mudi Chinsahu chaYehova? Komana mwashintajalaña kwikala mukakushimwina hela kupapatishewa muloña wakwakama chinateli kuyimonawu antu? Bayi mwiteja yitoñojoka yamuchidiwu yiyikañeshi kwila chuma chaloñaku. Mulombenu chikupu Yehova. Mulombenu ayikwashi kwikala ahamuka kulonda mwili nkeñelu yindi. Chimukumonaña Yehova chinakwakulayi kulomba kwenu, mukwikala akola nawa ahamuka chikupu.—Isa. 41:​10, 13. w23.01 29 ¶12; 30 ¶14

Yesu wehwili nindi “Komana kanda mutañeñahu dehi?” kulonda amwekeshi nindi aFwarisi amweneña Nsona munjila yaheña. (Mat. 12:​1-7) Hayina mpinji, aFwarisi ahosheli nawu atumbanji twaYesu anafumpi lushimbi lwaSabata. Hakuyakula, Yesu wazatishili yakutalilahu yiyedi yamuNsona nawa wazatishili vasi yekala muHoseya kulonda amwekeshi nindi aFwarisi atiyishishili wanyi chaletesheli ashiku lushimbi lwaSabata nawa akañenyi kumwekesha luwi. Muloñadi awa amayala chabuliliwu kubalumuka hela chakwila atañileña Izu daNzambi? Muloña atañileña kulonda adivwimbeña nikukoleshela akwawu nshimbi. Yilwilu yawu yayiletesheleña abuleña kutiyishisha yuma yatañileñawu. (Mat. 23:23; Yow. 5:​39, 40) Talenu cheñi Matewu 19:​4-6, Yesu hayihwiliyi aFwarisi lwihu lolumu nindi: “Komana kanda mutañeñahu dehi?” Hela chakwila adiña atañahu dehi nsañu yahosha hayileñaleña, adiwili chiyahosheleña kutalisha hachamonañayi Nzambi wulu. Kumazu ahosheliyi Yesu tunakudizilaku netu twatela kutañaña Bayibolu nankañelu yayiwahi. Kwambukaku nawaFwarisi, twatela kwikala adizoza nawa akweti muchima wakudiza. w23.02 12 ¶12-13

MuNshimbi jaYehova jenkeliyi muza waIsarela mwabombeleli yuma yadi kuyikwasha kulonda kubuli kwikala maposu hetala nikumudimu. (Kwid. 21:​28, 29; Kuhit. 22:8) Neyi muntu najahi mukwawu chakubula kwiluka wekalileña mukukala chikupu. (Kuhit. 19:​4, 5) Nshimbi jahosheli nawu ninana anakatishi mwana wudi mwivumu chakadi kwiluka, atela kuyibabesha. (Kwid. 21:​22, 23) Nsona jinamwekeshi hatooka nawu Yehova wakeñaña nindi tudikiñeña kumaposu. Twamwekeshaña netu twasakililaña hachawaana chawumi chatwinkayi Nzambi kuhitila mukuzata nañovu kudikiña hetala nikumudimu. Twanatilaña yuma yatwa, yuma yafwana, hela yitumbu heluña datelela, nawa twashaña yuma yamuchidiwu heluña hanateli kubula kushikawu anyana anyanya. Twekalaña asoñama neyi tunakubutula kesi, tunakutaatisha menji nikuzatisha yozelu yamalayiti. Nawa twafumañahu wanyi neyi tunakwila iyi yuma. Twendeshaña wanyi motoka neyi tunanwi yitumbu yikweti ñovu, walwa, hela neyi tunazeyi muloña wakubula kukaama nawa hitwazatishaña mafoni neyi tunakwendesha motokaku. w23.02 21-22 ¶7-9

Yehova hiNtañishi wadiwunjika, waluwi nawa watoñojokelañaku. Watalaña hayuma yayiwahi mudi atudizi indi. (Mas. 130:3) Nawa hakeñaña nindi twileña yuma yinabadiki muñovu jetuku. Anukenu, watuñili woñu wenu, chawaana chachiwahi nankashi. (Mas. 139:14) Nleñi yetu wakeñaña nindi tutwalekeñahu kudiza haya nyaaka nikudiluñisha kudiza. Dichi chayinu mpinji, chalema “kufwila chikupu” chalala chamuBayibolu. (1 Pet. 2:2) Imikenu yikonkwanyi yimunateli kushikija, nawa kakelenu kundandanda yakutaña Bayibolu nikudiza halwenu. (Yosh. 1:8) Nawukwashu waYehova, mukudiluñishaña kutaña nikudiza hadi yena chikupu. Kwiluka hohu nkawaku hikunashikiliku. Kwiluka kwalema muloña kukuyikwasha kwilukilahu yuma yayivulu hadi Yehova nikwikala nayilwilu yidi neyi, kumukeña Yehova nikumukuhwelela. (1 Kor. 8:​1-3) Chimukudizaña, mulombenuña Yehova ayikwashi kulonda chikuhwelelu chenu chivulileñaku. (Luka 17:5) Wakulaña kulomba kwamuchidiwu namuchima wumu. w23.03 10 ¶11, 13

Atumbanji twaYesu hiyateleleli kushakama hohu hampinji yahembeleleñawu kukuma kwakaayi kwinzaku. Yesu wayinkeli mudimu wakuzata. Wayilejeli kushimwina nsañu yayiwahi “muYerusalema, muYudeya nimuSamariya mwejima nikwakumina iseki dejima.” (Yilw. 1:​6-8) Iwu wadiña himudimu weneni nankashi watambwililiwu akakumulondela Yesu! Chazatileñawu nankashi mumudimu wayinkeliwu, amwekesheli nawu azatishileña chiwahi mpinji yawu. Hakwila tudihembeña etu aweni, twatela kutoñojoka chikupu hachitwazatishaña mpinji yetu. “[Yuma] yamwekanaña chakubula kukuhwelela” yinateli kutumwekena wejima wetu. (Mukwa. 9:11) Hadaha tunateli kushikena dakufwa. Tunateli kuzatisha chiwahi mpinji yetu kuhitila mukwila nkeñelu yaYehova nikukolesha wubwambu wetu nayena. (Yow. 14:21) Twatela ‘kwikala akola mbe-e chakadi kuswijewa, mpinji yejima twikaleña nayuma yayivulu yakuzata mumudimu waMwanta.’ (1 Kor. 15:58) Dichi neyi kukuma kunenzi, chili hikukuma kwawumi wetu indi kwiji kukuma kwakanu kaayi katama, hitwakaditoñeshaku.—Mat. 24:13; Rom. 14:8. w23.02 18 ¶12-14