February

Iyi nsona yalelu yinatalishi mudihi? Kwesekeja nachalumbulwiliyi Yesu, iku hikukeña kwakudihana muntu yomweni, kukeña kunateli kuletesha mukaKristu kufwila mukwawu mukakwitiya neyi chinateleli. Izu daNzambi dakonkomwena nankashi hakukeña. Antu amavulu hamavasi akeñeshawu nankashi amuBayibolu abombelahu ninawa mavasi: “Nzambi hikukeña.” (1 Yow. 4:8) “Watela kukeña mukwenu neyi chiwadikeña eyi aweni.” (Mat. 22:39) “Kukeña kwabutaña hanshidi jajivulu.” (1 Pet. 4:8) “Kukeña hikwamanañaku.” (1 Kor. 13:8) Awa mavasi kushila nimavasi amakwawu amwekeshaña hatooka chichalemena kudi muntu wejima kwikala nanichi chilwilu chachiwahi nikuchimwekesha. Muloña kukeña kwalala kwafumaña hohu kudi Yehova nawa wenkaña idi izanvu dawakakudifukula spiritu yindi nikuyikiswila. (1 Yow. 4:7) Dichahosheleliyi Yesu nindi akakumulondela alala akayilukila hohu kukukeña kwalala kwadimwekeshelañawu. Neyi chashimwineñahu dehi Yesu, antu amavulu ayilukilaña akakumulondela indi alala kukukeña kwadimwekeshelañawu. w23.03 27-28 ¶5-8

Komana munakukeña nankashi mwanakeneña akwenu? Munateli kutachika kutaña nikutoñojoka hansañu yawantu ashimunawu muBayibolu anakeneni akwawu chakufuma hamuchima niabulili kwanakena akwawu. Talenu chakutalilahu chaYesu. Wayanakeneneña antu. (Luka 7:47) Cheñi, hashileña muchima hayiluwa yawuku, ilaña hayuma yayiwahi yinateli kwilawu. Kwambukaku, Afwarisi mumafuku aYesu “amweneña akwawu nawu amukunkulwayi.” (Luka 18:9) Hanyima yakutoñojoka nankashi haniyi yakutalilahu, dihulenu nenu: ‘Yumanyi yinamonaña mudi akwetu? Yilwilwinyi yikwetiwu yinatela kushinshikahu?’ Neyi chayikalilaña kwanakena muntu, esekenu kusoneka yilwilu yejima yayiwahi yikwetiyi. Nkumininaku dihulenu nenu: ‘Yesu wamumonaña ñahi iwu muntu? Wukumwanakena?’ Neyi tudizaña muniyi njila chikutukwasha kuhimpa yitoñojoka yetu. Chatachi, twatela kuzata nañovu kulonda tumwanakeni muntu wunatuneñeshi. Ilaña neyi tuzataña nañovu kulonda tuwahishiku yilwilu yetu, tukamwanakenaña. w22.04 23 ¶6

Mumukanda waChimwekeshu, ayilumbu jaNzambi anayilumbululi muyifwikija. Tunamoni anyama azuwa. Chakutalilahu, kudi “kanyama wazuwa nakukanduka mukaluñalwiji.” Wukweti “nseñu 10 ninyitu 7.” (Chim. 13:1) Ona kanyama anamulondeli kudi “kanyama mukwawu wazuwa [wunakufuma] hamaseki.” Iwu kanyama nakuhosha neyi chazañombi nawa “[na]kukojeja kesi kufuma mwiwulu.” (Chim. 13:​11-13) Kuhiñahu cheñi tunamoni kanyama mukwawu wambukaku, “kanyama wazuwa wuchinana nge-e,” anashakamiwu hewulu nakumwendesha kudi mumbanda chivumbi. Awa atunyama asatu anakwimenaku ayilumbu anamuzuñishi Yehova Nzambi niWanta windi hadi mpinji yayilehi. Dichi, chikuwaha neyi tuyiluka. (Chim. 17:​1, 3) Twatela kwiluka yuma yinakwimenaku awa atunyama nichivumbi. Chuma chinateli kutukwasha kutiyishisha hikuleka Bayibolu yayeni kudilumbulwila. Yinjikijilu yikwawu yekala mumukanda waChimwekeshu ayilumbulula dehi munyikanda yikwawu yamuBayibolu. w22.05 8-9 ¶3-4

Ambuña aYehova amakwawu aneñaña hamuloña wakwila anakutwesha wanyi kuzata neyi chazatileñawu mumudimu waYehova hamuloña wakukula hela yikatu. Neyi mpinji yikwawu mwaneñaña hamuloña wakukala kumukweti, dihulenu nenu, ‘Yehova nakukeña nindi nilidi?’ Nakukeña nindi muzati hakumina ñovu jenu kwesekeja nakukala kumukweti. Toñojokenu hachumichi: Muhela wudi nayaaka yamuma 80 waneñaña muloña nakutwesha wanyi kuzata mudimu wakushimwina neyi hadiñayi nayaaka yamuma 40. Nakutoñojoka nindi hela chakwila nakuzata hanakumini ñovu yindi hanakumuzañalesha Yehovaku. Komana chalala dimu? Toñojokenuhu. Neyi iwu muhela wazatileña hakumina ñovu yindi hadiñayi nayaaka yamuma 40 nawa natwalekihu kuzata hanakumini ñovu yindi hadiyi nayaaka yamuma 80, dikwila nawu naleki wanyi kuzata hanakumini ñovu yindi. Neyi tuzataña hanakumini ñovu jetu Yehova yomweni wakatwila nindi: “Wuzataña!” (Esekejenu Matewu 25:​20-23.) Tukwikala namuzañalu neyi tusha muchima hayuma yitunateli kuzata chatela tusheña muchima hayuma yitukubula kuzata. w22.04 10 ¶2; 11 ¶4-6

Chimwekeshu kapetulu 21 yinesekeji a 144,000 namusumba wawuwahi atenawu nawu “Yerusalema Yayiha.” Iwu musumba awala hamalola 12 achikuku nawa hasonekawu “majina 12 awapostolu 12 aMwana kaMukoku.” (Chim. 21:​10-14; Efwe. 2:20) Iwu musumba nambukiku chikupu nanyisumba yejima. Wukweti mukwakwa weneni wawuru yakadi majilu, yiisu 12 yamperola, mpwembu niyikuku yakutuña namalola alema wuseya, nawa yakupima chachiwahi. (Chim. 21:​15-21) Hela chochu, mwabuleneni yuma yikwawu! Talenu chahosheliyi Yowanu: “Hinamwenimu tembeliku, muloña Yehova Nzambi Wañovu Jejima diyi tembeli yawu, niMwana kaMukoku. Nawa musumba wenowu hiwakeñekaña itena hela kakweji kutoñekelamuku, muloña kulema kwaNzambi dikwatoñekelañamu, nawa inoñu dawu hiMwana kaMukoku.” (Chim. 21:​22, 23) Antu akekala muYerusalema Yayiha akadimonaña naYehova.—Heb. 7:27; Chim. 22:​3, 4. w22.05 17-18 ¶14-15

Hela chakwila Yehova hiNleñi yetu, diyi Watwinkaña nshimbi, nawa hiNsompeshi yetu, wekala cheñi Tata yetu wukweti kukeña. (Mas. 100:3; Isa. 33:22) Neyi tuvulumuna kudi yena nawa tubalumuka chikupu mumuchima, wukweti wuswa nimuchima wakufwila kutwanakena. (Mas. 86:5) Kuhitila mudi kaprofwetu Isaya, Yehova watuleja nindi: “Hela chakwila nshidi jenu jichinana nge-e, akajitookesha neyi sino.” (Isa. 1:18) Chineli twawanina wanyi, twahoshaña nikwila yuma yaneñeshaña akwetu. (Yak. 3:2) Hela chochu, chumichi hichinayi mukwila nawu hitukuleka kudikunda nawuku. Tukwikala amabwambu, neyi tudanakenaña. (Yish. 17:9; 19:11; Mat. 18:​21, 22) Neyi tunadineñeshi nawakwetu, Yehova nakukeña nindi tudanakeneña. (Kol. 3:13) Kudi chuma chikuletesha tudanakeneña. Kafwampi, Yehova ‘watwanakenaña nankashi.’—Isa. 55:7. w22.06 8 ¶1-2

Hela chakwila twatela kutondolwela kudesekeja nawakwetu, tunateli kudizilaku yuma yayivulu kudi antu ashinshika. Hakwila tulumbululi chumichi, tuhanjekenu hadi Yesu. Hela chakwila wadiña wawanina, tunateli kudizilaku yuma yayiwahi kuyilwilu yindi niyuma yeliliyi. (1 Pet. 2:21) Neyi tuzata hakumina ñovu jetu nawa tulondela chakutalilahu chindi, tukwikala ambuña aYehova amawahi. Mwizu daNzambi, ashimunamu amayala niambanda ashinshika itwatela kwimbujola hela chakwila adiña awanina wanyi. Toñojokenu hadi Mwanta Davidi, ateneniwu kudi Yehova nindi “iyala innatiyi kuwaha mumuchima wami.” (Yilw. 13:22) Hela chochu, Davidi wakoñeli yiluwa yamaneni. Hela chakwila waluwañesheli, twatela kumwimbujola. Muloñadi? Muloña hesekeli kudiyiñishaku. Ilaña wetejeli kufumba kwamufumbiliwu nawa wadanakeneni chikupu hayiluwa yakoñeliyi. Chafuminimu, Yehova wamwanakeneni.—Mas. 51:​3, 4, 10-12. w22.04 13 ¶11-12

Bayibolu yashimuna nawu kufwa hichilumbu. (1 Kor. 15:​25, 26) Twatoñojokaña netu tunateli kufwa sweje-e neyi etu hela ntaña yetu nakati nankashi. Muloñadi chitwachiininaña kufwa? Muloña Yehova watuleñeli namuchima wakufwila kushakama haya nyaaka. (Mukwa. 3:11) Neyi tunakutiya woma netu tukufwa chinateli kutukwasha kudikiña. Chinateli kutukojeja kufuukula chiwahi hayakuda, kunyika mujimba, kudimona nandotolu nikutambula yitumbu neyi chinatwesheki nikubula kusha wumi muwubanji. Satana weluka nindi twalemesha wumi wetu. Wahoshaña nindi tunateli kuleka yuma yejima yitukweti kushilahu niwubwambu wetu naYehova kulonda tubuli kufwa. (Yoba 2:5) Satana hintwambi. Ilaña, chineli “wakojejaña kufwa,” Satana wazatishaña woma wutukweti kulonda tumushiyi Yehova.—Heb. 2:​14, 15. w22.06 18 ¶15-16

Neyi tudi mwituña mwakaanishawu mudimu wetu, tunateli kubulakanaña nawamanakwetu mutumazanvu twanyanya. Haniyi mpinji chalema nankashi kwikala nakuwunda nawamanakwetu. Zuñenuña naSatana, bayi kudizuñañesha wumu namukwawuku. Diwulenuña tuyiluwa twawamanakwenu, hela kumanisha swayi kukala. (Yish. 19:11) Tachikilenuñahu kukwasha akwenu. (Tit. 3:14) Wukwashu wamukwashiliwu muhela kudi izanvu dakushimwina, waletesheli antu munidi izanvu atachiki kudikwasha wumu namukwawu. Adikundili neyi chisaka. (Mas. 133:1) Amanakwetu niahela akaKristu amavulu atwalekañahu kumukalakela Yehova hela neyi anakuyikañesha kudi nfulumendi. Amakwawu ayikasaña muloña wachikuhwelelu chawu. Tunateli kuyilombelaku wena, yisaka yawu, niamanakwetu anakusha wumi wawu hakatoña kulonda ayikwashi amanakwetu niahela kuspiritu, kumujimba, nikuyihoshelaku muyota. (Kol. 4:​3, 18) Bayi mudiwula ñovu yekala mukulombelaku akwenuku!—2 Tes. 3:​1, 2; 1 Tim. 2:​1, 2. w22.12 26-27 ¶15-16

Anyana kakavulu embujolaña anvwali jawu. Kwosi nvwali wawaninaku. (Rom. 3:23) Hela chochu, anvwali atela kuzata nañovu kulonda ahani chakutalilahu chachiwahi kudi anyanawu. Tata yawantu wumu wahosheli nindi: “Ekala neyi kadihina kakokaña menji.” Wabombelelihu nindi: “Neyi yuma yitwelaña yinakwambuka nayuma yitwayidizishaña atulejaña.” Dichi neyi tunakukeña netu anyanetu amukeñi Yehova, kukeña kutwamukeña kwatela kwikala kwakola nawa twatela kukwimwekesha. Kudi njila jajivulu anvwali munateli kudizishilawu anyanawu kumukeña Yehova. Manakwetu Andrew wudi nayaaka 17, wahosheli nindi: “Mpinji yejima anvwali jami akonkomweneneña chichalemena kulomba. Ifuku dejima nawufuku, atata alombeleña nanami hela chakwila nalomba dehi. . . . Ichi nalombaña kudi Yehova mpinji yejima nawa namumonaña nami hiTata yami wukweti kukeña.” Enu nvwali ilukenu nenu kukeña kumwamukeña Yehova kunateli kukwasha anyanenu niwena kumukeña. w22.05 28 ¶7-8

Hakwila nawu tudiloñeshi kushikahu kupapatishewa, chuma chatachi chitwatela kwila, hikubalumuka chikupu mumuchima nakuleka nshidi jetu. (Yilw. 2:​37, 38) Neyi tubalumuka chikupu mumuchima, tukuhimpa chikupu yilwilu yetu. Komana mwaleka dehi kwila yuma yamuneñeshaña Yehova, chidi neyi wuvumbi, kunwa makanya hela nhoshelu yatama? (1 Kor. 6:​9, 10; 2 Kor. 7:1; Efwe. 4:29) Twalekenuhu kuzata nañovu kulonda muhimpi. Hanjekenu namuntu wunakuyidizisha Bayibolu, hela lejenu akulumpi muchipompelu kulonda ayikwashi nikuyilombola. Neyi mudi kansi nawa mwashakamaña nawanvwali jenu, yilejenu ayikwashi kulonda muleki yilwilu yejima yinateli kuyikañesha kupapatishewa. Chalema cheñi kwila yuma yakuspiritu mpinji yejima. Muniyi yuma munabombeli kuya kukupompa kwawakaKristu nikwakulahu. (Heb. 10:​24, 25) Nawa neyi munashikihu dehi kutachika kuya nakushimwina, ilenuña mwenimu mpinji yejima. w23.03 10-11 ¶14-16

Antu atenawu haKutachika 3:​14, 15 munabombeli, “kapela” ‘nianyana’ kakapela. Neyi kadiña kapela kakeni, hikadi kutiya yuma yahosheliyi Yehova mwitempa daEdeniku. Dikwila nawu Yehova wakunjikileña iwu wunsompeshi kudi chileñaleña wukweti maana. Hinyi yenowu? Chimwekeshu 12:9 yamushimuna hatooka. Haniyi nsona “kapela wakushankulu” amushimuna hatooka nawu Satana Diyabolu. Neyi Bayibolu yihosha hadi anyana muchifwikija, yatenaña antu atoñojokaña nikwila yuma neyi tata yawu wachifwikija. Dichi anyana kakapela hiyileñaleña yatama yakuspiritu niantu, neyi chelañayi Satana, adikañaña naYehova Nzambi nawa adimbululaña antu Jindi. Munabombeli añelu ashili nyidimu yawu mwiwulu mumafuku aNowa niantu atama elaña yuma neyi tata yawu Diyabolu.—Kutach. 6:​1, 2; Yow. 8:44; 1 Yow. 5:19; Yuda 6. w22.07 14-15 ¶4-5

Kapostolu Pawulu wakeñeli amanakwindi nankashi. Niyena wamweneña kukala; dichi, wayimwekesheleleña akwawu akakwitiya wushona niluwi neyi anakumona kukala. Mpinji yimu, Pawulu mali amumanini, dichi watachikili kuzata kulonda adikwashi yena niakwawu mwazatilileñawu. (Yilw. 20:34) Wadiña weluka kuchima matenti. Chashikiliyi muKorinda, watachikili kuzata nawakwawu akakuchima matenti aAkwila naPrisila. Ilaña “hasabata-hisabata” washimwinineña kudi aYudeya niaGiriki. Kuhiñahu chashikiliwu aTimotewu naSilasi, “Pawulu watachikili kusha maana chikupu hamudimu wakushimwina izu.” (Yilw. 18:​2-5) Pawulu wajimbeli wanyi mudimu windi walema muchihandilu, wakumukalakela Yehova. Chineli Pawulu wadiña nakuzata nañovu mudimu wakushimwina niwakumujimba, wakolesheleña amanakwindi niahela. Wayanukishili nindi bayi eteja kukala kwamuchihandilu nikukeñela chisaka yuma yakeñekaña kuyikojeji kudiwula “yuma yalema nankashi[ku],” mbadi jejima jakudifukula kudi Yehova. w22.08 20 ¶3

Makonu Nzambi nakukeña nindi nsañu yayiwahi yaWanta ayishimwini mwahita iseki dejima. (1 Tim. 2:​3, 4) Iwu himudimu waYehova nawa walema nankashi chakwila wamwinka Mwanindi akeñayi nindi awulomboleña. Twatela kwiluka netu chineli Yesu diyi wunakulombola iwu mudimu, mudimu wakushimwina wakamana chikupu henohu kukuma kanda kwesekeja nachakeñañayi Yehova. (Mat. 24:14) Tuneluki ñahi chumichi? Chelili kunashali dehi mpinji yantesha nakuya mwiwulu, Yesu wadiña nawakakumulondela ashinshika hampidi yaÑaliliya. Wayilejeli nindi: “Ananyinki wuswa wejima mwiwulu niheseki.” Talenu mazu ahosheliyi cheñi: “Dichi, yenu mwakelishi antu akunyuza yejima ekali atumbanji.” (Mat. 28:​18, 19) Hakachi kayuma yikwawu, Yesu amwinkeli wuswa wakulombola mudimu wakushimwina. Nawa mudimu wakushimwina akutwalekahu kuwulombola kudi Yesu kushika tuhu nimunanu mafuku. w22.07 8 ¶1, 3; 9 ¶4

Aloña, elileña yuma yayiwahi henohu kanda afwi, “akasañukila kuwumi” muloña majina awu akusoneka dehi mumukanda wawumi. Chumichi chinayi mukwila nawu kusañuka kwawantu “akoñeleña yuma yayiwahi” ashimunawu haYowanu 5:29 kwokumu nakusañuka kwawantu “aloña” ashimunawu haYilwilu 24:15. Iyi ntiyishishilu yinesakani namazu ekala haARoma 6:​7, akwila nawu: “Muntu wunafwi, nasubuki dehi kunshidi jindi.” Nshidi yakoñeleñawu antu aloña yamanini hampinji yafwiliwu, ilaña kashinshi kawu hiyakivulameneniku. (Heb. 6:10) Hela chochu, aloña akasañulawu atela kutwalekahu kwikala ashinshika hakwila nawu majina awu akatwalekihu kwikala mumukanda wawumi. w22.09 18 ¶13, 15

Kaprofwetu Danyeli himuntu akuhweleleliwu itwatela kwimbujola. Hela chakwila amutwalili muwunkoli muBabiloni, hashimbwili wanyi antu atachikili kumukuhwelela. Antu aswejeleliku kumukuhwelela, chelili alumbululi yilota yaMwanta Nebukaneza wakuBabiloni nawukwashu waYehova. (Dan. 4:​20-22, 25) Chimwahitili yaaka, Danyeli wamwekesheli cheñi nindi atela kumukuhwelela chelili alumbululi nsona yakuhayamisha yamwekeni hambañu muBabiloni. (Dan. 5:​5, 25-29) Hela chochu chimwahitili mpinji, Dayirusi wakuMediya niayilolu jindi niwena amweni nawu mudi Danyeli “mwadiña spiritu chikupu.” Elukili chikupu nawu Danyeli “adiña amukuhwelela, hadiña wakatalaku, nawa hiyamuwaninihu nakutama kudi kwejimaku.” (Dan. 6:​3, 4) Twatela kudihula netu: ‘Komana añiluka nawu nazataña chikupu nawa atela kunkuhwelela?’ Twaletaña kalemesha hadi Yehova neyi antu atukuhwelela. w22.09 8-9 ¶2-4

Mukuhemba nshimbi jaYehova jahosha hayuma yaloña niyabula kuloña mwafumaña yuma yayiwahi. Muneluki muloña waweni? Toñojokenu chuma chikumwekana neyi makampani amabanki adishilaku nshimbi jawu aweni hansañu yakulema kwamali hela neyi makampani atuñaña matala ashaku nshimbi jawu jakupiminamu. Yuma yikuluwankana chikupu. Nawa neyi andotolu akañanya kulondela nshimbi jakukilamu, ayeji anateli kufwa. Mwamweni, kulondela nshimbi kwatukiñaña. Munjila yoyimu, nshimbi jaNzambi jahosha hayuma yaloña niyabula kuloña jatukiñaña. Yehova wakiswilaña antu azataña nañovu kuhemba nshimbi jindi. Watushiika nindi: “Aloña akaswana iseki, nawa akashakamahu haya nyaaka.” (Mas. 37:29) Toñojokenu antu chakekalawu anuñañana, awunda nawa amuzañalu neyi ejima anakulondela nshimbi jaYehova. Yehova nakukeña nindi mudiluñisheña chihandilu chamuchidiwu. Mwamweni, wejima wetu tuneluki chitwakeñela kuloña! w22.08 27-28 ¶6-8

Neyi tumona kukala, kashinshi ketu kudi Yehova nikuloñesha kwindi kanateli kwikala mukweseka. Tunateli kushinda ñahi iku kukala kwejima? Twatela kuhemba yitoñojoka yetu nikwikala atona, nakwimana akola mbe-e muchikuhwelelu. Twahembaña yitoñojoka yetu kuhitila mukudiwunjika, mukutoñojoka chiwahi nikufwila kumona yuma neyi chayimonañayi Yehova. Neyi twila mwenimu, hitukwiteja kutuyuula kudi yitoñojoka yatamaku. Hekwawu tumona netu anatwili katama kudi mukwetu mukaKristu, hadaha manakwetu wukweti kukooleka muchipompelu. Hekwawu iwu manakwetu hayineñeshelelimu hohuku. (Rom. 3:23; Yak. 3:2) Hela chochu, yuma yeliliyi hekwawu yayitiyishili kutama. Hadaha mwadihwileña nenu, ‘Neyi manakwetu wukwila chuma chamuchidiwu, chalala iku hikuloñesha kwaNzambi?’ Ichi dichakeñañayi Satana nindi tutoñojokeña. (2 Kor. 2:11) Iyi yitoñojoka yatama yinateli kutwambula kudi Yehova nikuloñesha kwindi. Dichi twatela kwikala asoñama nakutondolwela kuhila. w22.11 20 ¶1, 3; 21 ¶4

Yehova watwinka kuchiñeja kwakuwahi kwakwikala nawumi wahaya nyaaka. Amakwawu achiñejaña kushakama mwiwulu haya nyaaka neyi yileñaleña yakuspiritu yabulaña kufwa. (1 Kor. 15:​50, 53) Hela chochu, amavulu achiñejaña kushakama haya nyaaka hamaseki nanyijimba yakola nawa namuzañalu. (Chim. 21:​3, 4) Chili twatalilaña kushakama mwiwulu haya nyaaka hela hamaseki, kuchiñeja kwetu kwalema. Yuma yitwachiñejaña kumbidi yikamwekana muloña Yehova diyi wayishiika. (Rom. 15:13) Tweluka yuma yatukanayi, nawa tweluka netu mpinji yejima washikijaña mwatukanañayi. (Kuch. 23:19) Tuneluki chikupu netu Yehova wukweti muchima niñovu yakwila yuma yejima yahoshayi nindi wakayila. Tata yetu wamwiwulu watukeña, nawa wakeñaña nindi tumukuhweleli. Neyi tuchiñejaña chikupu yuma yatukanayi Yehova, tukuumikaña kukala nawa twakomika yuma yikumwekanaña muchihandilu chetu namuzañalu. w22.10 24 ¶1-3

Chineli antu akaanini kutiyilila, Isaya washimwineñahu dehi nindi Yehova wakayiteja akamoni yihuñu. (Isa. 30:​5, 17; Yere. 25:​8-11) Nawa dichuma chamwekeni, ayitwalili muwunkoli kudi eni Babiloni. Hela chochu, hakachi kawaYudeya hadiña amakwawu ashinshika, nawa Isaya wayilejeli nindi ifuku dimu Yehova wakayimwekeshela cheñi wuselewa. (Isa. 30:​18, 19) Nawa dichenjili nakumwekana. Yehova wayifumishili muwunkoli. Hela chochu, hiyashikeneni dakuyifumisha muwunkoliku. Mazu akwila nawu “Yehova nadiwunjiki nakuhembelela kulonda ayimwekesheli wuselewa,” amwekesheli nawu hakahita mpinji hakwila awa antu ashinshika ayamwini. Kafwampi, aIsarela ashakamini yaaka 70 muwunkoli muBabiloni henohu ashalilihu kanda ayiteji kufunta kuYerusalema. (Isa. 10:21; Yere. 29:10) Chafuntiliwu antu kumukala wawu, madilu achineñi ayisinsishili namadilu amuzañalu. w22.11 9 ¶4

Mumaluña amavulu makonu, amanakwetu niahela anakumona kukala kwamweniwu apostolu mumafuku awakaKristu akusambila hayikabishileñawu muloña wakushimwina hadi Yesu. Mapampa kakavulu, ansompeshi amuchota cheneni chawaYudeya “[ayikonkomweneni] nawu bayi ahosha hela kutañisha kuzatisha ijina daYesuku.” (Yilw. 4:​18-20; 5:​27, 28, 40) Ilaña elukili nawu wukweti wuswa wabadika ‘wayikonkomweneni nindi ashimwineña kudi antu nikushimuna chikupu wunsahu’ hadi Kristu. (Yilw. 10:42) Dichi antu ayihosheleleñaku, aPetulu naYowanu, ahamukili nakuhosha nawu atela kwovwahila Nzambi bayi ana ansompeshiku nawa akuleka wanyi kushimwina hadi Yesu. (Yilw. 5:29) Hanyima yakuyivupola muloña wakuhemba kashinshi kawu apostolu afumini muchota cheneni chawaYudeya, “iku anazañalali, muloña ayilemesheli nanochu chayisawiliwu kukoola ijina [daYesu],” nawa atwalekelihu kushimwina!—Yilw. 5:​41-42. w22.10 12-13 ¶2-4

Chakadi nikujina, neyi tunakudiza hadi Yehova twatachikaña nantañishilu yamuBayibolu yakutachikilahu. Mumukanda windi wayisonekeleliyi aHeberu, kapostolu Pawulu wateneni ntañishilu yakutachikilahu nindi “yuma yakutachikilahu.” Hatalishili mukwila nindi “ntañishilu yatachi” yamukunkulwayiku; wadiña nakuyesekeja namayeli akoleshaña mukeki. (Heb. 5:12; 6:1) Ilaña wayikonkomweneni cheñi akaKristu ejima nindi kubombela haniyi ntañishilu yatachi atela kwilukilahu yuma yikwawu nikudiza chalala chakunama chaMwizu daNzambi. Komana mukweti muchima wakufwila chikupu kwiluka ntañishilu yakunama yamuBayibolu? Komana munakufwila kutwalekahu kupaminaku, kutwalekahu kudiza hadi Yehova ninkeñelu yindi? Hela chochu, etu amavulu chatukalilaña kudiza nkawetu. Indi enu? Komana kushikola mwadizili chakutaña nikudiza chiwahi nkawenu? Mwadiluñishileña kudiza nkawenu nakumona nenu munelukilihu yuma yayivulu? Tahindi mwakunkulwili nenu mweluka chakudiza chiwahi wanyi munyikanda? Neyi diimu, himudi nkawenuku. Hela chochu, Yehova nateli kuyikwasha. Wawanina nawa hiNtañishi wamuwahi chikupu. w23.03 10 ¶8-10

Neyi twikala amwovu, tukwiteja Izu daNzambi kuhimpa yilwilu yetu. Nsañu yamuBayibolu yahosha haluwi, wushona nikukeña yinateli hohu kutuhimpa neyi tubula kwikala nachilwilu chakudivwimba hela kukoleshela akwetu nshimbi. Yuma yitwayilaña akwetu yamwekeshaña neyi chakwila tunakwiteja Izu daNzambi kutubalumuna hela nehi. AFwarisi akañenyi kwiteja Izu daNzambi kuyishika hamuchima, nawa chafuminimu “[afwishileña] namuloña antu akadi muloña.” (Mat. 12:7) Munjila yoyimu, chitwayimonaña akwetu niyuma yitwayilaña yamwekeshaña neyi chakwila twetejaña Izu daNzambi kutubalumuna hela nehi. Chakutalilahu, komana twahoshaña hayuma yayiwahi yitwamonaña mudi akwetu, tahindi twanyakalaña kuhosha hayiluwa yawu? Komana twekala naluwi nawa twanakenaña swayi, tahindi twafwishaña akwetu nanyiloña nawa twahembaña nkunyi? Ñakwilu yetu kutalisha kunawa malwihu yikutukwasha kwiluka neyi chakwila twetejaña yuma yitwatañaña kuhimpa yitoñojoka yetu, chitwatiyaña niyuma yitwelaña.—1 Tim. 4:​12, 15; Heb. 4:12. w23.02 12 ¶13-14

Talenu chuma chelili Yosefu wakuAramateya. Amulemesheli chikupu kudi aYudeya. Wadiña membala wamuSanihedirini, chota cheneni chawaYudeya. Hela chochu, hampinji yazatileñayi Yesu mudimu windi hanu hamaseki, Yosefu wadiña wahamuka wanyi. Yowanu wahosheli nindi ‘wadiña kambanji kaYesu ilaña wadiswekeleña muloña watiyileña aYudeya woma.’ (Yow. 19:38) Hela chakwila Yosefu wakeñeli nankashi nsañu yaWanta, wadiswekeleña kudi antu nakumwekesha nindi wamukuhweleleli Yesu wanyi. Chakadi nikujina, watiyileña woma nindi keña ajimbeshi chifulu chalema chamwinkeliwu muchituñilu. Ilaña, Bayibolu yatulejaña nawu chafwiliyi Yesu, hohenohu Yosefu “wamwekesheli wulobu nakuya kudi Pilatu nawa walombeli mujimba waYesu.” (Maku 15:​42, 43) Haniyi mpinji Yosefu wamwekesheli hatooka nindi wadiña kambanji kaYesu. Mwatiyahu dehi antu woma neyi chatiyiliyi Yosefu? w23.01 30 ¶13-14

Mwanta wamumbanda wakuSheba watiyili nsañu yakuwunda niyuma yayiwahi yadiluñishileñawu aIsarela muchiyuulu chaSolomoni. Iwu mwanta wafumini kwituña dakwakulehi nakuya kuYerusalema nakudimwena yomweni yuma chiyadiña. (1 Anya. 10:1) Hanyima yakutalatala mwahita wanta waSolomoni, wahosheli mazu adi hewulu. Ilaña yuma yamwekeneña muchiyuulu chaSolomoni yadiña hohu yuma yantesha hayuma yakelilayi Yehova muchidi wamuntu muchiyuulu chaMwanindi, Yesu. Yesu wamubadika Solomoni muyuma yejima. Solomoni wadiña muntu wabula kuwanina waluwañesheleña nankashi hakusompa nakuletesha antu jaNzambi kukabakana. Ilaña Yesu, hiNyuuli wawanina wabulaña kuluwañesha. (Luka 1:32; Heb. 4:​14, 15) Kristu wamwekesheli nindi hakakoñahu nshidi hela kwila chuma chidi chejima chinateli kukatisha antu jindi ashinshikaku. Nashikilimu chikupu kwikala Mwanta wetu. w22.12 11 ¶9-10

Chumanyi chitwatela kwila neyi chikatu chasambukilaña chinakutaanda mwiluña mutwashakamaña? Twatela kwovwahila nshimbi jinafumi kudi akawuswa, chidi neyi jinakuhosha hakwisuka kumakasa, kudishila yintampu, kuvwala kadihina hakanwa nikushakama kwakankawetu neyi tunakati. Neyi twilaña iyi yuma, tukumwekesha chitwasakililaña chikupu hachawaana chawumi chatwinkayi Nzambi. Neyi kudi wubanji wunamwekani, mpinji yikwawu tunateli kutiya nsañu yakutwamba kudi amabwambu, hakachi kawantuñi netu nihanyuzi. Chatela tukuhweleli “izu dejima” ditukutiya, tukwila chiwahi neyi tutiyilila kunsañu yalala yinakufuma kunfulumendi nikudi andotolu. (Yish. 14:15) Izanvu Dalombolaña niamanakwetu mutusanji twanyitayi azataña nañovu kulonda ekali nawunsahu walala henohu kanda ahani nshimbi kutalisha hakupompa kwachipompelu nihamudimu wakushimwina. Neyi twovwahila, twadikiñaña etu aweni niakwetu. Tunateli cheñi kuletesha antu amuchituñilu kuyimona aYinsahu jaYehova munjila yayiwahi.—1 Pet. 2:12. w23.02 23 ¶11-12

AIsarela cheñililiwu Mwituña daChikaninu, atachikili kushakama mumaluña ashiyashana. AIsarela ashakamineña mwiluña dimu chadi kwikala chaswayi kubula kusha maana kudi akwawu aIsarela ashakamineña mumaluña amakwawu mwituña. Ilaña Yehova washiliku ntanjikilu kulonda aIsarela apompeña hamu hampinji jashiyashana nakutiyilila chatañileñawu Izu dasonekewa nichadilumbulwileñawu. (Kuhit. 31:​10-12; Nehe. 8:​2, 8, 18) Fwikijenu chinatiyiyi kaIsarela washinshika hampinji yinashikiyi muYerusalema nawa hadaha namoni akwawu akakudifukula amavulu nankashi anafumi kumaluña ashiyashana mwituña! Muniyi njila, Yehova wayikwashileña antu jindi kutwalekahu kwikala anuñañana. Chimwahitili mpinji, chelili chipompelu chawakaKristu achituñi, mwadiña amayala niambanda ahosheleña madimi ashiyashana nawa adiña nachihandilu ninkulilu yashiyashana. Ilaña adifukwileña kudi Nzambi walala mukunuñañana. Antu etiyileña hakwila atiyishishi Izu daNzambi ayikwashileña kudi akwawu akakudifukula nikuhitila mukupompa hamu nawena.—Yilw. 2:42; 8:​30, 31. w23.02 3 ¶7

Yehova wakana nindi antu akumwovwahilaña akekala “[nawumi] wahaya nyaaka.” (Rom. 6:23) Neyi tutoñojokaña hayuma yatukanayi Yehova, twaswejaña kumukeña. Toñojokenu hachumichi: Tata yetu wamwiwulu watukeña nankashi chakwila hiyamba katwambula kudi yenaku. Chikaninu chaNzambi chakutwinka wumi wahaya nyaaka chatukwashaña kuumika kukala kutunakumona makonu. Hela chakwila ayilumbu jetu akutuchiinisha nawu atujahi, hitukuleka kumukalakela Yehovaku. Muloñadi? Muloña tuneluki netu neyi tufwa iku twashinshika kudi Yehova, wakatusañula mudi afu nakwikala nakuchiñeja kwakubula kufwa cheñi. (Yow. 5:​28, 29; 1 Kor. 15:​55-58; Heb. 2:15) Tweluka netu Yehova nateli kutuletesha kushakama haya nyaaka muloña diyi Nsulu yawumi nawa washakamaña haya nyaaka. (Mas. 36:9) Bayibolu yamwekeshaña nawu Yehova wekalañaku nawa wakekalañaku mpinji yejima.—Mas. 90:2; 102:​12, 24, 27. w22.12 2 ¶1-3

Etu antu jaYehova chatuhayamishaña wanyi neyi tunakuhita mukukala. Tweluka netu Bayibolu yahoshaña nawu, “hakwila twakeñili muWanta waNzambi twatela kuhita muyihuñu yayivulu.” (Yilw. 14:22) Tweluka cheñi netu kukala kukwawu kutunakuhitamu kwakamana hohu neyi tunatachiki kushakama mwituña daNzambi dadiha, mwakabula ‘kufwa, kudishona hela kuneña.’ (Chim. 21:4) Yehova hakañeshaña kukala kubuli kutumwekenaku. Ilaña watukwashaña kuumika. Talenu kapostolu Pawulu chalejeliyi akaKristu ashakamineña muRoma. Wasambilili kuchinda kukala kwamweneñayi yena niamanakwindi. Kuhiñahu wasonekeli nindi: “Tunakwimika mushindu chikupu kuhitila mudi yena watukeñeli.” (Rom. 8:​36-37) Chumichi chinatalishi mukwila nawu Yehova nateli kuyikwasha kuumika hela chakwila muchidi muniku kukala. w23.01 14 ¶1-2