July

Nzambi watwinka chawaana chakuhosha. Hela chochu, chawaana chakuhosha achizatishileña chatama. Satana Diyabolu wamudimbili Eva nawa chaletesheli antu kwikala nanshidi nikubula kuwanina. (Kutach. 3:​1-4) Adama wazatishili chatama chawaana chindi chakuhosha hamutwikiliyi Eva niYehova muloña hansañu yakuluwa kwindi. (Kutach. 3:12) Kena wamudimbili Yehova hanyima yakumujaha manakwindi Abeli. (Kutach. 4:9) Makonu, mumavidiyo amavulu mwekala hohu nhoshelu yakasawuntu. Atudizi atiyilaña nhoshelu yatama kushikola nawa akulumpi niwena ayitiyilaña kunyidimu. Neyi kubabala nehi, tunateli kwinjilila kutiyilila kunhoshelu yatama chakwila tukutachika kuyizatisha. Hela chochu, etu akaKristu, tunakukeña kumuzañalesha Yehova nawa mukumuzañalesha mwabombela kutondolwela nhoshelu yatama. Tunakukeña kuzatisha chawaana chetu chakuhosha munjila yayiwahi, yakumushimeka Nzambi yetu. w22.04 4 ¶1-3

Yesu wamweneña yuma yakumujimba munjila yayiwahi. Wadileña yakuda nikunwa. (Luka 19:​2, 6, 7) Mpinji yimu wabalumwini menji kwikala vinyu yayiwahi, chihayamisha chindi chatachi. (Yow. 2:​10, 11) Nawa hefuku dafwiliyi wavwalili chakuvwala chasweja wuseya. (Yow. 19:​23, 24) Ilaña Yesu hashili muchima hayuma yakumujimba muchihandilu chindiku. Yesu watañishili nindi neyi tutwamijaku Wanta, Yehova wukutwinka yuma yitunakukeña. (Mat. 6:​31-33) Kuzatisha kufumba kwahosha hansañu yamali kunayikwashi antu amavulu. Talenu chuma chamumwekeneni manakwetu wabula kusumbula wejina daDaniel. Wahosheli nindi: “Hinadiña kansi nafuukwilihu nami chuma chalema chinatela kwila muchihandilu chami hikumukalakela Nzambi.” Chineli wapeleshaku chihandilu chindi, Daniel natwalekihu kuzatisha mpinji yindi niyuma yelukayi mumudimu waYehova wakutuña. Wabombelelihu nindi: “Hela mali akuvula chamuchidinyi hiyakwesekana nankisu jinanyinkiyi Yehovaku.” w22.05 21-22 ¶6-7

Tunateli kumwekesha netu twalemesha chalala neyi tutañaña Bayibolu ninyikanda yashindamena haBayibolu. Hela chakwila tunashimbuli muchalala, kudi yuma yayiha yitwatela kudiza. Kudiza kwapela wanyi, ilaña mwafumaña yuma yayiwahi nankashi. Bayi neyi wejima wetu twakeña kutaña nikudizaku. Ilaña Yehova watulejaña nindi tutwalekihu “kukeñakeña” yuma yakunama yachalala. (Yish. 2:​4-6) Mukukeñakeña, mwafumaña yuma yayiwahi. Corey wahosheli nindi neyi nakutaña Bayibolu nkawindi, washaña maana havasi yimu yinakutañayi. Walumbulwili nindi: “Nukutaña mafutunoti ejima, nsona jikwawu jinateniwu nikusandujola chikupu. . . . Nadizaña yuma yayivulu nankashi kuzatisha iyi njila!” Hela chakwila twazatishaña iyi njila hela yikwawu, twamwekeshaña netu twasakililaña chalala neyi twikalaña nampinji yakudiza.—Mas. 1:​1-3. w22.08 17 ¶13; 18 ¶15-16

Yesu hadiñayi hamaseki, wazatishili yileñaleña kulonda adizishi atumbanji twindi amwiluki Tata yindi. Talenu chuma chimu hayuma yatañishiliyi. Yehova wamwekeshelaña antu ejima kukeña. MuMpanji yahaMpidi, Yesu wayikwashili atumbanji twindi kwiluka kulema kwayileñaleña yiyedi yabulaña kushaku antu amavulu maana: chejeji chetena ninvula. Yuma yejimiyi yalema muloña yatukwashaña kutwalekahu kuhanda. Yehova wadi kufuukulahu kuyikiisha antu abulaña kumukalakela iyi yuma. Ilaña muloña wakukeña, wayituntwishilaña antu ejima itena nikuyinokeshela nvula. (Mat. 5:​43-45) Yesu wazatishili ichi chuma chalema kulonda ayidizishi atumbanji twindi nindi Yehova wakeñaña tumwekesheleña antu ejima kukeña. Mpinji yejima yitunakumona itena dinakuhuma hela nvula yinakusosota, twatela kutoñojoka hakukeña kwaYehova kwakubula chaambu. Kukeña kwindi kukutuletesha kumwekesha kukeña kwokumu kuhitila mukushimwina kudi antu ejima. w23.03 17 ¶9-10

Chumanyi chamuhayamishili kapostolu Yowanu? Mumbanda wakandamini hakanyama wazuwa wuchinana nge-e. Anamumwekeshi nawu “chivumbi muneni” nawa anamuteni nawu “Babiloni Muneni.” Welaña ‘wuvumbi nawanyanta ahamaseki ejima.’ (Chim. 17:​1-5) “Babiloni Muneni” hinyi? Iwu mumbanda kwila emenaku mutayi wamapolitiki nehi, muloña anamushimuni nawu welaña wuvumbi nawanlomboli amatuña nachiyuulu. (Chim. 18:9) Kafwampi, wazataña nañovu kuyiyuula awa anlomboli, muchifwikija wayendeshaña. Kubombelahu, kwila yemenaku mutayi walwisu wakulanda nakulandulula wamukaayi kaSatana nehi. Awa ayishimuna chaambukaku nawu “akakulanda nakulandulula ahamaseki.” (Chim. 18:​11, 15, 16) Babiloni wakushankulu mwenzeli kudifukula kwakutwamba. Dichi, Babiloni Muneni nakwimenaku kwitiya kwakutwamba kwejima. Kafwampi diyi wanta wakaayi wakwitiya kwakutwamba.—Chim. 17:​5, 18. w22.05 11 ¶14-16

Mama yawantu nateli kujinoka neyi anyanindi akutondahu kumukalakela Yehova. Anvwali eluka kukala kwamonañawu anyanawu mukanu kaayi kaSatana. Kubombelahu, amama jawantu amavulu chayikalilaña kukulisha anyanawu chakadi iyala hela neyi iyala hadifukulaña kudi Yehovaku. Anvwali akweti enikwawu abulaña kumukalakela Yehova hidiwu hohu amonaña kukala kwakukulisha anyanaku. Hela chakwila anvwali ejima hiyakaKristu, chinateli kuyikalila kuyishika anyanawu hamuchima kulonda ekali ambuña aYehova ashinshika. Neyi dichidi yuma, bayi mwakama nankashiku. Yehova wukuyikwasha. Munateli kwihula anvwali eluka chakuzatisha yozelu yitukweti hakudizisha anyanawu hakudifukula kwachisaka. (Yish. 11:14) Mulombenu Yehova nawa mulejenu ayikwashi. Nawa mulejenu ayikwashi kuzatisha malwihu atelela anateli kuyikwasha kwiluka chinakutoñojoka anyanenu nichinakutiyawu.—Yish. 20:5. w22.04 17 ¶4, 7; 18 ¶9

Tunateli kumukeña nankashi Yehova kuhitila mukumwiluka Mwanindi nikudikunda nindi, wamwekesheli yilwilu yaTata yindi. (Heb. 1:3) Njila yayiwahi yakumwilukilamu Yesu, hikudiza nyikanda yiwaana yaNsañu Yayiwahi. Neyi kanda mwikali nachaaku chakutaña Bayibolu ifuku niifuku, kwila mutachika chochichi nehi? Chimukutañaña iyi nsañu yaYesu, talenu yilwilu yayiwahi yikwetiyi. Wadiña waswayi kusolomoka, wadiña ninakwakata anyana anyanya mumakasa indi. (Maku 10:​13-16) Wayiwundishileña atumbanji twindi; nawa adiña akasunuka kuhosha nindi neyi wudi hohu. (Mat. 16:22) Muniyi njila, Yesu wembujoleleña Tata yindi wamwiwulu. Yehova niyena waswayi kusolomoka. Tunateli kuhosha nindi mukulomba. Neyi tunakulomba, tunateli kumuleja yuma yejima yidi kumuchima wetu. Tunakuhweleli netu hakutuzuwilaku. Watukeña; watwakamenaña.—1 Pet. 5:7. w22.08 3 ¶4-5

Chineli diyi watuleñeli, Yehova watwiluka nankashi. Toñojokenu hachumichi! Weluka yuma yejima hadi muntu wejima hanu hamaseki. (Mas. 139:​15-17) Dichi wamonaña yiluwa yejima yitwaswanini kudi anvwali jetu. Kubombelahu, weluka cheñi yuma yahimpa yilwilu yetu. Indi iyi yuma yejima yelukayi Yehova hadi antu yamuleteshaña kwiladi? Yamuleteshaña kututiyila luwi. (Mas. 78:39; 103:​13, 14) Yehova namwekeshi nindi nakukeña kutwanakena. Weluka nindi hamuloña wayuma yakoñeliyi muntu watachi, Adama, wejima wetu twekala mwishiñu danshidi nikufwa. (Rom. 5:12) Hitukutwesha kudamwina etu aweni hela muntu mukwawu kunidi ishiñuku. (Mas. 49:​7-9) Ilaña Nzambi wukweti kukeña watutiyilili luwi nawa waloñesheli njila kulonda atukuuli. Neyi chashimuna Yowanu 3:​16, Nzambi watemesheli Mwanindi akeñayi kulonda atufwili.—Mat. 20:28; Rom. 5:19. w22.06 3 ¶5-6

Antu anakenaña niwena akayanakena muloña Yehova wahosheli chikuma chochimu nikudi kambuñindi Yoba. Iwu iyala washinshika amuneñesheli namazu atama ahosheliwu amayala asatu aElifazi, Bilidadi niZofari. Yehova wamulejeli Yoba kuyilombelaku. Hanyima yakwila Yoba nayilombeliku dehi, Yehova wamukiswilili. (Yoba 42:​8-10) Kuhemba ndulu kwatama. Yehova wakeñaña wanyi nindi tukabakaneña nayihuñu yenzaña hamuloña wakuhemba ndulu. (Efwe. 4:​31, 32) Watulejaña nindi: “Lekaku kuzuwa nawa lekaku ndulu.” (Mas. 37:8) Chalema nankashi kulondela iku kufumba. Kuhemba ndulu kunateli kutukatisha kumujimba nimuyitoñojoka. (Yish. 14:30) Neyi tumuhembela muntu ndulu yena hichikumukatañaku chidi tuhu neyi tunanwi wulembi wukubula kumukatisha yena. Ilaña neyi tunakwanakena akwetu dikwila nawu tunakudinka etu aweni chawaana. Twekalaña nakuwunda kwamuyitoñojoka nimumuchima nawa twatwalekañahu kumukalakela Yehova. w22.06 10 ¶9-10

Kuchiñeja kudi neyi itepa dachifwikija dakiñaña yitoñojoka yetu nikutukwasha kubula kudiñija muyuma yatama yikuluwañesha wubwambu wetu naYehova. (1 Kor. 15:​33, 34) Itepa detu dakuchiñeja dinateli kutukiña kuyitoñojoka yakwila nawu kwosi chuma chikufumamu neyi tumuzañalesha Yehova. Anukenu nenu diyitoñojoka yazatishiliyi Elifazi wenjili nakumukundeja Yoba jamakudi. Elifazi wahosheli nindi: “Muntu wafwaña nateli kwikala ñahi wakadi majilu?” Kuhiñahu, wahosheli hadi Nzambi nindi: “Tiyaña! Indi ajila hayikuhwelelaku, nimawulu aweni hiyekala atooka kumesu indiku.” (Yoba 15:​14, 15) Wenowu makudi! Anukenu wakojejaña yitoñojoka yamuchidiwu Satana. Weluka nindi neyi mutoñojokaña hayuma yamuchidiwu, mukuleka kuchiñeja. Ilaña, kaanenu makudi amuchidawa. Bayi mujinoka nenu Yehova nakukeña mwakashakami haya nyaaka nawa nindi wakayikwasha mwakashikihuku.—1 Tim. 2:​3, 4. w22.10 25-26 ¶8-10

Satana wakeñeleña Yoba akuhweleli nindi nakukabakana muloña Yehova wamutiyili kutama. Chakutalilahu, Satana wakojejeli mpepela yañovu kubuvula itala mwadiña nakudiila anyana kaYoba. (Yoba 1:​18, 19) Cheñi wakojejeli kesi kufuma mwiwulu kajilumwini yimuna yaYoba niañamba adiña nakuyihemba. (Yoba 1:16) Chineli mpepela nikesi kafumini mwiwulu, Yoba watoñojokeli nindi jinafumi kudi Yehova. Nawa chafuminimu, hadaha Yoba watoñojokeli nindi namuneñeshi Yehova. Hela chochu, Yoba hamuhoshelihu Tata yindi wamwiwulu chatamaku. Yoba welukili nindi Yehova namwinki yuma yayiwahi hadi yaaka yayivulu. Watoñojokeli nindi neyi watiyileña kuwaha kutambwila yuma yayiwahi watela nikutambwila yuma yatama. Dichi wahosheli nindi: “Ijina daYehova atwalekihu kudihameka.”—Yoba 1:​20, 21. w22.06 21 ¶7

Yesu wayisoñamishili atumbanji twindi chuma chochimu, chashimunawu haYowanu 17:14. Tunamoni chinashikijewi iwu wuprofwetu, sweje-e hayaaka 100 yinahitihu. Munjilanyi? Chelili hohu Yesu amuswanishi haWanta wawuMesiya mu 1914, Satana amufumishili mwiwulu. Ichi wudi hamaseki, nakuhembelela kumujilumuna. (Chim. 12:​9, 12) Bayi neyi nakuhembelela iku washakamaku. Satana nazuwi nawa nasukwili ndulu yindi hadi antu jaNzambi. (Chim. 12:​13, 17) Hamuloña wachumichi, kaayi kanaswejeliku kuyihela antu jaNzambi. Hela chochu, kwosi chuma chikuletesha tumutiyi woma Satana niantu jindiku. Ilaña, tukweti chikuhwelelu neyi chadiña nakapostolu Pawulu, wasonekeli nindi: “Neyi Nzambi wudi nanetu, hinyi wukutwimakena?” (Rom. 8:31) Twatela kumukuhwelela chikupu Yehova. w22.07 18 ¶14-15

Yesu hakameneni nindi akakuzata mudimu akakeha kumakumishilu anshakaminu yamakonuku. Welukili nindi mazu awuprofwetu añimbi yaMasamu akashikijewa. Akwila nawu: “Antu jeyi akadihana namuchima wumu hefuku diwakalombola mashidika eyi añovu kunjita.” (Mas. 110:3) Neyi munakuzata mudimu wakushimwina, munakumukwasha Yesu ninduñu washinshika nawa munakushikija iwu wuprofwetu. Mudimu wunakuzatika, ilaña kudi kukala. Kukala kumu kunakumonawu akakushimwina aWanta hiikañesha. Akakusekesha, akulumpi jakwitiya niakamatuña nachiyuulu ayilejaña antu nsañu yakutwamba hamudimu wetu. Neyi antaña jetu, antu itweluka niakwetu mutwazatilaña ayiluwañesha nanawa makudi, hadaha anateli kutukanjikija nawu tuleki kumukalakela Yehova nikushimwina. Mumatuña amakwawu ikañesha denzaña kuhitila mukutuchiinisha, kutukasa nikutuumbila mutuleya. w22.07 8 ¶1; 9 ¶5-6

Yehova wakeñaña nindi twikaleña nampinji yakudiza Bayibolu mpinji yejima nikutoñojokahu chikupu hayuma yitunakutaña. Neyi tuzatishaña yuma yitunakudiza, chikuhwelelu chetu chikukolelaku nawa tukuswina kwakwihi naTata yetu wamwiwulu. Nawa chumichi chikutukwasha kuumika kukala. Yehova cheñi wahanaña spiritu yindi yajila kudi antu ashindamena Hezu dindi. Nawa iyi spiritu yinateli kutwinka “ñovu yabadika hañovu jawantu” kulonda tutweshi kuumika kukala. (2 Kor. 4:​7-10) Yehova nakukwasha “nduñu wamaana nikashinshi” kwidisha yibaaba yayivulu, mavidiyo, nitumina tunakutukwasha kwikala nachikuhwelelu chakola nikwikala nawubwambu wakola naYehova. (Mat. 24:45) Yehova nadizishi antu jindi kudikeña wumu namukwawu nikudikundeja mumpinji yakala. (2 Kor. 1:​3, 4; 1 Tes. 4:9) Amanakwetu niahela anakutukwasha kutwalekahu kukwikala ashinshika neyi tunakuhita mukukala. w22.08 12 ¶12-14

Kuhitila mukuhosha hayilwilu yayiwahi yawamanakwetu niahela, tukuyikwasha kudikunda wumu namukwawu, chumichi chikutuña chipompelu. Mpinji yikwawu, akaKristu apama anateli kubobola. Dichuma chamumwekeneni kapostolu Pawulu nebwambu dindi Baranaba. Awa amayala ayedi aditaadikishili nankashi neyi chakwila atela kumusenda Maku halwendu lwawu lukwawu lwawumishonali hela nehi. Dichi “atachikili kutaadeka chikupu” hakachi kawu nawa adaambwili. (Yilw. 15:​37-39) Ilaña Pawulu, Baranaba niMaku aleteli kuwunda hakachi kawu. Chimwahitili mpinji Pawulu wahosheli chiwahi hadi Baranaba niMaku. (1 Kor. 9:6; Kol. 4:10) Ninetu twatela kumanisha kukala nawamanakwetu muchipompelu nikutwalekahu kusha maana hayilwilu yawu yayiwahi. Muniyi njila, tukuleta kuwunda nikunuñañana. w22.08 23 ¶10-11

Hampinji yitunakuzata nañovu kulondela nshimbi jaYehova jaloña, twatela kutondolwela kusompesha akwetu nikudimona kuloña. Twatela kwanukaña netu Yehova diyi “Nsompeshi yeseki dejima.” (Kutach. 18:25) Yehova hatwinka mudimu wakusompeshaku. Tuhanjekenu hachakutalilahu chaYosefu muntu washinshika. Watondolweleña kusompesha akwawu ninana adiña nakumukabisha. Amanakwindi akuvwalika nawu amweteli, amulandishili muwuduñu, nawa amudimbili tata yawu nawu Yosefu nafwi. Chimwahitili yaaka, Yosefu wekalili cheñi nachisaka chindi. Chineli Yosefu nekali dehi mukulumpi wetuña, wadi kuyifuntishilamu amanakwindi katama nakatama. Amana kwaYosefu atiyili woma nawu dichikwilayi, hela chakwila adanakeneni nankashi hachuma cheliliwu. Ilaña Yosefu wayilejeli nindi: “Bayi mutiya womaku. Ami yami Nzambi?” (Kutach. 37:​18-20, 27, 28, 31-35; 50:​15-21) Dichi Yosefu wamulekeleli Yehova kusompa. w22.08 30 ¶18-19

Komana muneluki nenu anateli kuyizatisha kudi Yehova kwakwilamu kulomba kwamuntu wunakulomba chakufuma hamuchima? Eña wukuyizatisha, chili mudi mukulumpi, nkoñi wakuzatila, payiniya hela mukakushimwina muchipompelu. Nateli cheñi kuyizatisha ninenu chili mudi kansi, mukulumpi, manakwetu hela muhela. Neyi muntu wamukeña Yehova amulomba nindi amukwashi, kakavulu Nzambi wazatishaña akulumpi niambuñindi ashinshika amakwawu kulonda “amukundeji chikupu.” (Kol. 4:11) Wenowu muzañalu wutukweti hakumukalakela Yehova niamanakwetu muniyi njila! Tunateli kuyikwasha hela kuyikundeja amanakwetu neyi kunenzi musoñu, wubanji wadimwekenaña hela neyi anakuyikabisha. Hadaha tukukeña kukwasha amanakwetu, ilaña chinateli kutukalila neyi amuchisaka chetu anakukabakana. Hela chochu, twakeñaña kukwasha amanakwetu nawa Yehova watiyaña kuwaha neyi tuzata hanakumini ñovu jetu kuyikwasha.—Yish. 19:17. w22.12 22 ¶1-2

Kukeña dikwaleteshaña muntu kukuhwelela mukwawu. Yesu wahosheli nindi nshimbi jasweja kubadika jiyedi hikumukeña Yehova nikukeña mukwenu. (Mat. 22:​37-39) Chineli Yehova amukuhwelela, kukeña kutwamukeña kukutukojeja twimbujoli chakutalilahu chindi chachiwahi. Chakutalilahu, kukeña kutwakeña amanakwetu niahela kukutuletesha kuhemba nsañu yakujinda yinatulejiwu. Bayi tushimuna nsañu yikuletesha ekali mukukala, yikuyisawisha hela yikuyikatishaku. Nawa neyi twikala adizoza, antu akutukuhwelelaña. MukaKristu wadizoza hakeñaña kutiyisha akwawu kuwaha kuhitila mukwikala watachi kushimuna nsañu yakujindaku. (Fwili. 2:3) Hadimwekeshaña nindi walema kuhitila mukuhosha nindi neluki nsañu yimu yakujindaku. Kudizoza kukutukwasha cheñi kubula kutandisha nsañu yabula kushimunawu muBayibolu hela munyikanda yetu yashindamena haBayibolu. w22.09 12 ¶12-13

Kañelu wamulejeli Danyeli nindi mazu awuprofwetu amumukanda waDanyeli akayitiyishisha chikupu kudi antu jaNzambi, ilaña nawu“kwosi muntu watama wakeluka yumiyiku.” (Dan. 12:10) Ayinu diyi mpinji yitwatela kumwekesha netu tudi wanyi hakachi kawantu atama. (Mal. 3:​16-18.) Yehova nakupompesha antu amonañayi nindi “iheta dadimena,” hela iheta dalemeshayi. Tunakukeña chikupu kwikala hakachi kawu. Tunakushakama mumpinji yamuzañalu. Ilaña yuma yakuhayamisha keña yimwekani. Katataka tumoni kujilumuka kwayuma yatama yejima. Kuhiñahu cheñi, tukamona kushikijewa kwamazu amukaniniwu Danyeli kudi Yehova nawu: “Wakemana nakutambwila iseka deyi kumafuku akukuminina.” (Dan. 12:13) Munakufwila wanyi kumona ifuku ‘dakemanayi’ Danyeli cheñi hamu niantaña jenu? Neyi dichimunakufwila, zatenu nañovu kulonda mwiikali ashinshika, nawa kuhwelelenu nenu ijina denu dikatwalekahu kwikala mumukanda waYehova wawumi. w22.09 24 ¶17; 25 ¶19-20

Awa mazu atela amukolesheli Ezekeli. Muloñadi? Chakadi nikujina, wanukili nindi Yehova wazatishili mazu wowamu hampinji yayitondeliyi aMosi naIsaya kwikala atuprofwetu twindi. (Kwid. 3:10; Isa. 6:8) Ezekeli welukili cheñi Yehova chakwashiliyi awa atuprofwetu ayedi kuumika kukala kwamweneñawu. Dichi Yehova chamulejeliyi Ezekeli kayedi nindi: “Innakukutemesha,” iwu kaprofwetu wakuhweleleli chikupu nindi Yehova wukumukwashaña. Kubombelahu, mumukanda waEzekeli, twawanañamu awa mazu afuntisha-funtishawu kakavulu nawu: “Izu daYehova denjili kudi ami.” (Ezek. 3:16) Nawa wasonekeli nakufuntisha-funtishahu nindi “Izu daYehova denjili cheñi kudi ami.” (Ezek. 6:1) Mwamweni, Ezekeli welukili chikupu nindi anamutemeshi kudi Yehova. Kubombelahu, chineli wadiña mwana kakapristu, hadaha amulejeleña kudi tata yindi hadi Yehova chayikanineñayi atuprofwetu twindi kunyima nindi wukuyikwashaña. Yehova wamulejeli Isaka, Yakoba niYeremiya nindi: “Ami nidi naneyi.”—Kutach. 26:24; 28:15; Yere. 1:8. w22.11 2 ¶3

Hela chakwila aAdama naEva avulumwini nakuletela anyanawu kufwa, Yehova hahimpili yitoñojoka yindi kutalisha hankeñelu yindiku. (Isa. 55:11) Wuchidi kufwila nindi antu ashinshika akashakami haya nyaaka. Talenu yuma yahoshayi Yehova niyelayi hakwila ashikiji nkeñelu yindi. Yehova wakana nindi wakasañula afu nawa wakayinka wumi wahaya nyaaka. (Yilw. 24:15; Tit. 1:​1, 2) Iyala washinshika, Yoba, welukili chikupu nindi Yehova wafwilaña kusañula antu afwa dehi. (Yoba 14:​14, 15) Kaprofwetu Danyeli welukili nindi antu akayisañula nawa akashakamaña haya nyaaka. (Mas. 37:29; Dan. 12:​2, 13) AYudeya amumafuku aYesu niwena elukili nawu Yehova wakayinka ambuñindi ashinshika “[wumi] wahaya nyaaka.” (Luka 10:25; 18:18) Yesu wahosheli kakavulu hanichi chikaninu, nawa niyena amusañwili kudi Tata yindi.—Mat. 19:29; 22:​31, 32; Luka 18:30; Yow. 11:25. w22.12 4-5 ¶8-9

Yehova wakeñaña nindi tuswini kwakwihi nayena. (Yak. 4:8) Wakeñaña nindi ekali Nzambi yetu, Tata yetu nawa Ibwambu detu. Wakulaña kulomba kwetu nikutukwasha hampinji yitunakumona kukala. Nawa wazatishaña kuloñesha kwindi hakutudizisha nikutukiña. Tunateli kuswina kwakwihi naYehova kuhitila mukulomba kudi yena, kutaña Izu dindi nikutoñojokahu chikupu. Neyi twila mwenimu, tukusweja kumukeña nawa tukumusakililaña. Chumichi chatukwashaña kumwovwahila nikumwinka kalemesha kamutelela. (Chim. 4:11) Neyi tusweja kumwiluka Yehova, tukusweja kumukuhwelela kushilahu nikuloñesha kwindi kwatwinkayi nindi kutukwasheña. Hela chochu, Diyabolu wafwilaña kutulekesha chovu-chovu kumukuhwelela Yehova nikuloñesha kwindi. Ilaña tunateli kudikaña natufuta twindi. Neyi chikuhwelelu chetu chakola nawa twamukuhwelela chikupu Yehova, hitwakamushiya Nzambi yetu nikuloñesha kwindiku.—Mas. 31:​13, 14. w22.11 14 ¶1-3

Akakristu alala amavulu azatishaña kusubuka kwawu nikusha wumi wawu muwubanji muloña amukeña Yehova nawu diyi Nyuuli Wabadika. Ejima wawu hiyakakuhemba kashinshi kawu, adi neyena dodimu neyi dadiña nawaHeberu asatu apulwishiliwu muluteñu lwakesi muloña atwalekelihu kumukuhwelela Mukakubadika. Ñimbi yaMasamu Davidi wasonekeli chichalemena kuhemba kashinshi kudi Nzambi, nindi: “Yehova wukusompesha antu. Nsompeshi, eyi Yehova, kwesekeja nakuloña kwami nawa kwesekeja nakashinshi kami.” (Mas. 7:8) Cheñi, Davidi wasonekeli nindi: “Kashinshi nikwoloka jinkiñeña.” (Mas. 25:21) Muchihandilu chetu chejima twatela kwikala ashinshika kudi Yehova, nakutwalekahu kwikala ashinshika kudi yena! Chikafumamu tukatiya neyi chatiyiliyi ñimbi yaMasamu wasonekeli nindi: “Adi namuzañalu wowu ahembaña kashinshi kawu . . . , owu endaña munshimbi jaYehova.”—Mas. 119:​1, tth. w22.10 17 ¶18-19

Hampanji jahanjekeliyi Yoba nawakwawu muchihandilu chindi chejima, mpanji yahanjekeliyi naYehova Nzambi diyabadikili. Yehova washimwini yuma yimu yakuhayamisha yamwekanaña muyileñaleña hakumukolesha Yoba kulonda akuhweleli mumaana aNzambi nimuwuswa wakwakamena ambuñindi. Chakutalilahu, Yoba amwanukishili nawu Nzambi wakamenaña anyama, dichi niyena nateli kumwakamena. (Yoba 38:​39-41; 39:​1, 5, 13-16) Kuhitila mukutoñojoka hayakutalilahu yayileñaleña, Yoba welukili yuma yayivulu hayilwilu yikwetiyi Nzambi yindi. Ninetu tunateli kwiluka yuma yayivulu hadi Nzambi yetu neyi tushinshikaña hayuma yaleñayi. Hela chochu, mpinji yikwawu chinateli kutukalila kwila mwenimu. Neyi twashakamaña mutawuni, hefuku-hefuku tukumonaña hohu yuma yantesha hayuma yaleñayi Yehova. Hela chakwila twashakamaña kwakwihi nayileñaleña, tunateli kumona netu tudana mpinji yakuyitala, ilaña chalema kwikala nampinji nikuzata nañovu kulonda tushinshikeña yileñaleña. w23.03 15 ¶1-2

Yesu wahosheli nindi “nyitentanshi yamaneni nankashi” niwubanji wukwawu wadimwekenaña jakamwekanaña henohu kukuma kanda. (Luka 21:11) Wahosheli cheñi nindi “kutama kukasweja,” yumiyi yinakumwekena muwubanji, mumadombu nikudilukuka nakudijaha. (Mat. 24:12) Yesu wahosheli wanyi nindi iku kukala kwakashikena hohu ana afutalelayi Yehova. Kafwampi, ambuña aYehova ashinshika amavulu niwena anakuyishikena kudi wubanji wadimwekenaña. (Isa. 57:1; 2 Kor. 11:25) Yehova hanateli kutukiña muchihayamisha kuniwu wubanji wejimaku, ilaña wukutukwasha munjila yidi yejima kulonda twiikali nakuwunda. Neyi tudiloñeshela chadimu chakwila henohu kukala kanda kushiki, chakekala chaswayi kubula kusweja kwakama. Komana kudiloñeshela chadimu kwamwekeshaña nawu twamukuhwelela Yehova wanyi? Inehi. Kafwampi, neyi tudiloñeshela chadimu henohu wubanji kanda, tukumwekesha netu twakuhwelela muñovu jindi jakutwakamena. Muloñadi? Izu daNzambi datukwashaña kudiloñeshela chadimu henohu wubanji wadimwekenaña kanda. w22.12 18 ¶9-10

Hampinji yadiñayi Yosefu mukaleya, Yehova wamukojejeli mwanta waEjipitu kulota yilota yiyedi yamwakamishili. Mwanta chelukiliyi nindi Yosefu wukweti ñovu yakulumbulula yilota, watemesheli muntu wakuya nakumutambika. Yehova wamukwashili Yosefu kulumbulula yilota nawa Fwaru watiyili kuwaha mwamulejeliwu. Fwaru chamweniyi nindi Yehova wudi naniwu mukwenzi, wamutondeli Yosefu kwikala mukulumpi wakutala yakuda muEjipitu yejima. (Kutach. 41:​38, 41-44) Mukuhita kwampinji, muEjipitu mwaholokeli nzala yeneni kushilahu nimuKenani, ituña mwashakamineña chisaka chaYosefu. Haniyi mpinji Yosefu wadiña nawuswa wakwamwina chisaka chindi nikuhemba ndonda yachisaka mwakavwalikila Mesiya. Chakadi nikujina, Yehova diyi wamukwashileña Yosefu muyuma yejima yelileñayi. Kunsa yachu, Yehova wabalumwini kafuta katama kawamana kwaYosefu kushikijilamu nkeñelu yindi. w23.01 17 ¶11-12

Muntu wadihembaña yomweni wekalaña wasoñama kuwubanji wudi wejima wunateli kukisañana wubwambu windi naYehova, nawa welañahu yuma yimu kulonda chumichi chibuli kumumwekena. Neyi ela mwenimu, washakamaña mukukeña kwaNzambi. (Yish. 22:3; Yuda 20, 21) Kapostolu Pawulu wayikonkomweneni akaKristu nindi adihembeña awenawu. Chakutalilahu, wayilejeli akaKristu amuEfwesesa nindi: “Ilukenu chimwendaña, bayi mwendeña neyi antu abula maanaku, ilaña neyi akamaana.” (Efwe. 5:​15, 16) Mpinji yejima Satana wafwilaña kukisañana wubwambu wetu naYehova. Dihafuma Bayibolu yitwanukisheña nawu “[twilukeña] chidi nkeñelu yaYehova” kulonda tudikiñeña kunyihetu yejima yaSatana. (Efwe. 5:17) Hakwila tufuukuli chiwahi, twatela kwiluka hela kutoñojoka ‘hankeñelu yaYehova.’ Twatela kwila mwenimu kuhitila mukudiza Izu daNzambi mpinji yejima nikutoñojokahu chikupu. Chitwasweja kwiluka nkeñelu yaYehova nikwikala ‘nayitoñojoka yaKristu,’ tukwendaña “neyi akamaana,” hela chakwila hitukweti nshimbi jatela kutuleja jiika yuma yitwatela kwilaku.—1 Kor. 2:​14-16. w23.02 16-17 ¶7-9

Mapampa añahi imwawahishaña mwitala denu? Hadaha henohu kanda mubuukilimu, mwawahishilimu chikupu. Hanu dinu chumanyi chikumwekana neyi mukuhita kwampinji muleka kuwahishamu? Chakadi nikujina, mukushikena kwinzala lunkuñu nimajilu. Hakwila mwitala denu mwiikali mwawunyonji, mwatela kuwahishañamu mpinji yejima. Munjila yoyimu, twatela kutwalekahu kuzata nañovu neyi tunakukeña kwolola yitoñojoka yetu niwuntu wetu. Kafwampi, henohu kanda tupapatishewi twazatili nañovu kuhimpa yilwilu yetu kulonda “[tuditookeshi] kuyuma yejima yatamishaña mujimba nispiritu.” (2 Kor. 7:1) Hela chochu, twatela kutwalekahu kulondela kufumba kwakapostolu Pawulu “[kwakutwalekahu] kubalumuka nakwikala amaha.” (Efwe. 4:23) Yuma yidi neyi lunkuñu nimajilu yamukanu kaayi yinateli kwiñila swayi mudi etu. Hakwila chuma chamuchidiwu chibuli kutumwekena kulonda tutwalekihu kwikala atooka kumesu aYehova, mpinji yejima twatela kushinshikaña chidi yitoñojoka yetu, wuntu wetu niyuma yitwafwilaña. w23.01 8 ¶1-2

Fwikijenu chichatiyakeneña kutiyilila kunsañu yatañishileñayi Yesu. Kakavulu nsañu yahosheleñayi wayifumishileña muNsona Jajila. Yadiña mpinji yamupapatishileñawu Yesu nihamuwayishileñawu naspiritu yajila, dihichamwekeni hatooka nawu amufuntishilili wuswa wadiñayi nawu wakwanuka yuma hadiñayi kanda ekali mumujimba wawuntu. Mumazu indi atachi asonekeliwu ahosheliyi hanyima yakumupapatisha nimumazu indi akukumishaku ahosheliyi henohu kanda afwi, Yesu wayifumishili muNsona. (Kuhit. 8:3; Mas. 31:5; Luka 4:4; 23:46) Nawa muyaaka yisatu nachikunku mwamwekeneni iyi yuma yiyedi, kakavulu Yesu wayitañilileña antu amavulu, kuyileja nsañu yamuNsona nikuyilumbulula. (Mat. 5:​17, 18, 21, 22, 27, 28; Luka 4:​16-20) Hadi yaaka yayivulu henohu kanda atachiki mudimu windi wakushimwina, kakavulu Yesu wadiña nakutaña nikutiya Izu daNzambi. Chakadi nikujina, kwitala watiyileña Mariya niYosefu chazatishileñawu jiNsona. (Kuhit. 6:​6, 7) Cheñi, Yesu wayileña kusinagogi mpinji yejima haSabata nachisaka chindi. (Luka 4:16) Hampinji yadiñayi kwenoku, watela wadiña nakutiyilila nakanañachima neyi anakutaña Nsona. w23.02 8 ¶1-2

Kudi yuma yayivulu yaleteshaña tumukeñi Yehova. Chakutalilahu, muneluki nenu diyi “nsulu yawumi” nawa nenu diyi wahanaña “chawaana chejima chachiwahi nichawaana chejima chabadika kuwaha.” (Mas. 36:9; Yak. 1:17) Yuma yejima yayiwahi yimwadiluñishaña yafumaña kudi Nzambi yetu wakukeña nawa wukweti chisambu. Ifutu danyiloña hichawaana chachiwahi chatwinkayi Yehova. Tukuhosheladi mwenimu? Talenu wubwambu wekala hadi Yehova naMwanindi. Yesu wahosheli nindi: ‘Tata wankeña’ ‘ninami namukeña Tata.’ (Yow. 10:17; 14:31) Wubwambu wawu wakoleleliku hadiñawu hamu hadi yaaka yayivulu. (Yish. 8:​22, 23, 30) Toñojokenu chichamukatili Nzambi hakwiteja Mwanindi kukabakana nikufwa. Yehova wayikeña nankashi antu, kushilahu ninenu, chakwila wahanini Mwanindi wakeñayi chakufuma hamuchima kwikala mulambu wakuyikwasha enu niantu amakwawu kulonda mwakashakami haya nyaaka. (Yow. 3:16; Ñal. 2:20) Ichi dichuma chabadika chikuletesha tumukeñi Nzambi. w23.03 4-5 ¶11-13

Bayi twitejaña ntañishilu yawakakusekeshaku. Yesu wazuwilili antu amuPerigamu aleteleña chaambu. (Chim. 2:​14-16) Wayihamekeli amuTiyatira abulileña kulondela “yuma yakunama yaSatana” nawa wayilejeli ‘kukwatisha’ chikupu kuchalala. (Chim. 2:​24-26) AkaKristu azeya etejeli kuyiluwañesha nantañishilu yakutwamba, ateleleli kubalumuka mumuchima. Indi etu makonu? Twatela kukukaana ntañishilu yejima yabula kwitejayi Yehova. Akakusekesha “amwekanaña neyi amwakama Nzambi,” ilaña “akaanaña ñovu” yachu. (2 Tim. 3:5) Chaswayi kwiluka nikukaana ntañishilu yakutwamba neyi twadizaña chikupu Izu daNzambi. (2 Tim. 3:​14-17; Yuda 3, 4) Twatela kuzata nañovu kulonda kudifukula kwetu akwitejeña kudi Yehova. Neyi tunakwila chuma chikuletesha kudifukula kwetu abuli kukwiteja kudi Yehova, twatela kuhimpa swayi-swayi yilwilu yetu kulonda Nzambi etejeña kudifukula kwetu.—Chim. 2:​5, 16; 3:​3, 16. w22.05 4 ¶9; 5 ¶11