June

Yoba wadiña nawubwambu wawuwahi naYehova. Wadiña nachisaka cheneni chanuñañana nawa wadiña namaheta amavulu. (Yoba 1:​1-5) Ilaña Yoba wajimbesheli yuma mwifuku dimu hohu. Chatachi, wajimbesheli maheta indi. (Yoba 1:​13-17) Kuhiñahu, anyanindi ejima afwili. Toñojokenu chikela nichineñi chatiyiliyi Yoba niñodindi hakutiya nawu anyanawu ejima 10 anafwi. Dichaletesheli Yoba hakutabula yakuvwala yindi nakudila nawa wadimbukili heseki! (Yoba 1:​18-20) Kuhiñahu Satana wamukatishili Yoba nawa waletesheli antu amumoneña nawu wamukunkulwayi. (Yoba 2:​6-8) Yoba adiña amulemesha mumukala mwashakamineñayi. Antu enjileña nakulomba maana kudi yena. (Yoba 31:18) Haniyi mpinji alekeli kwinza kudi yena. Amudiwili, amukaanini kudi amanakwindi, amabwambu jindi nikudi añamba amwitala dindi yomweni!—Yoba 19:​13, 14, 16. w22.06 21 ¶5-6

Hanyima yakupapatishewa, wejima wetu twatela kulondela kufumba kwaheniyi kapostolu Pawulu kudi akwawu akakwitiya amuEfwesesa. Wayikolesheli kwikala akaKristu ‘apama chikupu.’ (Efwe. 4:13) Hinjila yikwawu yakuhoshelamu nawu, ‘Twalekenuhu kupama.’ Mwamukeña Yehova nankashi. Ilaña kukeña kwenu kumwamukeña kunateli kuswejelaku. Munjilanyi? Kapostolu Pawulu washimwini njila yimu, yasonekawu haAFwilipi 1:9. Pawulu walombeli nindi kukeña kwawaAFwilipi “kusweji nankashi.” Dichi kukeña kunateli kuswejelaku. Tunateli kwila mwenimu neyi tuzata nañovu kulonda twikali “nakwiluka kwalala nikashinshi kakeni.” Neyi tuswejelaku kumwiluka nankashi Yehova, tukuswejelaku kumukeña nawa tukwiluka yilwilu yindi nichelañayi yuma. Tukufwilaña kumutiyisha kuwaha nawa tukutondolwelaña yuma yidi yejima yinateli kumuneñesha. Tukuzataña nañovu kulonda twiluki chatoñojokañayi nichitunateli kuzatila hamu nindi. w22.08 2-3 ¶3-4

Yuma yasonekawu mumukanda waChimwekeshu hiyayisonekeleli antu ejimaku, ilaña etu ambuña aNzambi adihana. Etu antu jaNzambi twatela kuhayama wanyi hakwiluka netu ninetu tunakushikijaku wuprofwetu wekala muniwu mukanda. Kashinakaji kapostolu Yowanu washimwini iyi mpinji yakashikijewa iwu wuprofwetu. Wahosheli nindi: “Chañoneneniwu, nakashimukili nidi mwifuku daMwanta.” (Chim. 1:10) Hampinji yasonekeliyi Yowanu awa mazu kwakwihi na 96 C.E., ‘ifuku daMwanta’ dachidiña kwakulehi. (Mat. 25:​14, 19; Luka 19:12) Ilaña kwesekeja nawuprofwetu wamuBayibolu, idi ifuku datachikili mu 1914, hampinji yamuswanyikiliwu Yesu kwikala Mwanta mwiwulu. Kufuma tuhu hayina mpinji, wuprofwetu wamuChimwekeshu, munabombeli antu jaNzambi watachikili kushikijewa. Eña, ichi tunakushakama “mwifuku daMwanta”!—Chim. 1:3. w22.05 2 ¶2-3

Henohu achidi amomi, wejima wawu ayedi kanyama wazuwa nikaprofwetu wakutwamba ayuumbilili mwijiya dakesi kabutukaña sawufa. Dikwila nawu henohu jichidi kuyuula, iji jinfulumendi jadikañaña naNzambi akajijilumuna haya nyaaka. Chumichi chinatukundami ñahi? Etu akaKristu, twatela kwikala ashinshika kudi Nzambi niWanta windi. (Yow. 18:36) Bayi tudiñijaña munsañu jamatuña nachiyuulu jamukaayiku. Chumichi chapela wanyi, muloña nfulumendi jamukaayi jakeñaña nawu tudibombeñamu mumazu nimuyilwilu. Ejima adibombaña munsañu jamatuña nachiyuulu atambwilaña chinjikijilu chakanyama wazuwa. (Chim. 13:​16, 17) Hela chochu, muntu wejima watambwilaña ichi chinjikijilu, Yehova hamwitejañaku nawa hakatambwila wumi wahaya nyaakaku. (Chim. 14:​9, 10; 20:4) Dichi, wejima wetu hamuntu-hamuntu, bayi tudiñija munsañu jamatuña nachiyuuluku, hela anakutukanjikija chamuchidinyi! w22.05 10-11 ¶12-13

Chikonkwanyi chimu chimunateli kwimika hikudiza mudimu wunateli kuyikwasha. Neyi tuzataña nañovu, tukushikahu kulonda atushilihu nyidimu yikwawu. Toñojokenu hakuvula kwawantu anakukeñeka hakutuña maBeteli, Matala Amaneni Akupompela niMatala aWanta. Antu amavulu atuñili adizili nyidimu kuhitila mukuzatila hamu nawamanakwetu niahela eluka nyidimu. Makonu, awa amanakwetu niahela anakudiza nyidimu yinakukeñeka yikuyikwasha kuhemba chiwahi Matala Amaneni Akupompela niMatala aWanta. Muniji njila ninjila jikwawu, Yehova Nzambi, “Mwanta wahaya nyaaka,” niKristu Yesu, “Mwanta wawanyanta,” anakuzata nyidimu yakuhayamisha kuhitila mudi awa akakukalakala. (1 Tim. 1:17; 6:15) Tunakukeña kuzata nañovu nikuzatisha yuma yitunadizi kulonda tumushimeki Yehova, bayi etu aweniku nehi.—Yow. 8:54. w22.04 24 ¶7; 25 ¶11

Solomoni wadiña waheta chikupu, nawa wahandileña chihandilu chawuhandu. (1 Anya. 10:​7, 14, 15) Kwambukaku, Yesu wadiña nayuma yanti nawa hadiña namukalaku. (Mat. 8:20) Hela chochu, wejima wawu amweneña maheta munjila yayiwahi muloña maana awu afumini kudi Muntu yowumu, Yehova Nzambi. Solomoni welukili nindi neyi tudi namali, tunateli kulandamu yuma yakudikwasha nachu kumujimba nituyuma twanti tutunakukeña. Ilaña hela chakwila Solomoni wadiña waheta welukili nindi kudi yuma yalema kubadika mali. Chakutalilahu wasonekeli nindi: “Ijina dadiwahi hela [“mpuhu yayiwahi,” tth.] akuditonda kubadika maheta amavulu.” (Yish. 22:1) Solomoni wahosheli cheñi nindi antu akeña mali hiyazañalalaña nayuma yikwetiwuku. (Mukwa. 5:​10, 12) Nawa watusoñamishili kubula kukuhwelela mali, chineli mali itukweti akisikaña mukapinji kanti.—Yish. 23:​4, 5. w22.05 21 ¶4-5

Twakoleshaña wubwambu wetu naYehova neyi tutoñojokaña hayuma yayiwahi yinakutwililayi chayinu mpinji. Nawa neyi tutoñojokaña hayuma yayiwahi yikatwililayi Yehova kumbidi, chikutukwasha kutwalekahu kumukalakela haya nyaaka. Yuma yejimiyi yikutukwasha kumukalakela Yehova namuzañalu chayinu mpinji. Yehova “wakemana” nakutwamwina hampinji yakakisañanañayi kanu kaayi katama. Tuneluki chikupu netu Yehova, “Nzambi wawuñanji,” haketeja kaayi kaSatana kutwalekahu hampinji yayilehiku. (Isa. 25:9) Twamutalilaña Yehova nakudiwunjika kulonda odu ifuku dawamwinu dakashiki. Chayinu mpinji, tunakufwila kutwalekahu kulemesha chawaana chakulomba, kudiza Izu daNzambi nikuzatisha yuma yitunakudiza, kushilahu nikutoñojoka hankisu jitukweti nijitwakatambwila kumbidi. Chitukwilaña mwenimu, Yehova wukutukwashaña kuumika namuzañalu hampinji yitunakudifukula kudi yena. w22.11 13 ¶18-19

Hela chakwila Bayibolu yashimuna wanyi chipapatishu chaTimotewu, ilaña tunateli kufwikija muzañalu watiyiliyi mama yindi, Yunisi, hadina ifuku. (Yish. 23:25) Yunisi watwesheli kumudizisha mwanindi kumukeña Yehova niMwanindi, Yesu Kristu. Anvwali jaTimotewu adiña ambokelamu mukwitiya. Tata yindi wadiña kaGiriki, nawa mama yindi ninkaka yindi Lowisi adiña aYudeya. (Yilw. 16:1) Timotewu wadiña kansi hampinji Yunisi niLowisi yekaliliwu akaKristu. Hela chochu, tata yindi hekalili mukaKristuku. Timotewu wukulondela hinyi? Amama jawantu akaKristu niwena makonu akeña yisaka yawu. Akeñaña kukwasha anyanawu ekali nawubwambu wawuwahi naYehova kubadika chuma chidi chejima. Nawa Nzambi yetu watiyaña kuwaha chazatañawu nañovu. (Yish. 1:​8, 9) Yehova nakwashi amama jawantu amavulu kukwasha anyanawu kumukeña nikumukalakela. w22.04 16 ¶1-3

Katataka Yehova achishi munyichima yawanyuuli akaayi “kulonda akoñi mwaya nkeñelu yindi.” Chumanyi chikafumamu? Awa anlomboli akaayi, “anyanta 10,” akabalumukilamu makuloñesha akwitiya kwakutwamba nakuyijilumuna. (Chim. 17:​1, 2, 16, 17) Tuneluki ñahi netu kukuma kwaBabiloni Muneni kudi mukamwihi? Hakwila twakuli ilu lwihu, chikuwaha neyi twanuka netu musumba waBabiloni awukiñili kudi menji amavulu aKaloña Yufurati. Mukanda waChimwekeshu wesekeja antu amavulu ahakwilañaku Babiloni Muneni ‘namenji amavulu.’ (Chim. 17:15) Ilaña wamwekeshaña cheñi nawu menji ‘akooma,’ chinakumwekesha nawu wanta wamukaayi wakwitiya kwakutwamba wukajimbesha antu amavulu awuhakwilañaku. (Chim. 16:12) Iwu wuprofwetu wunakushikijewa, muloña antu amavulu anakufuma mukwitiya kwakutwamba nawa anakuya kwacheñi nakukeña wukwashu. w22.07 5-6 ¶14-15

Twamwekeshaña netu twasakililaña neyi tudanakenaña. Muchishimu chimu, Yesu wamwesekejeli Yehova nankaka yawantu wanakeneni nduñu yindi mukudi hamukudi wakañenyi kufwetayi. Ilaña wakañenyi kutiyila luwi nduñu wadiña namukudi kudi yena, wamali antesha. (Mat. 18:​23-35) Yesu watudizishileñadi? Neyi twasakililaña haluwi lwatutiyilañayi Yehova, ninetu tukwanakenaña akwetu. (Mas. 103:9) Hayaaka yayivulu yinahitihu Kaposhi Kakutalila kahosheli muniyi njila naku: “Hela chakwila tukwanakena akwetu mapampa añahi hichikwesekana nakwanakena kwatwanakenañayi Nzambi niluwi lwatutiyilañayi kuhitila mudi Kristuku.” Antu anakenaña niwena akayanakena. Yehova watiyilaña luwi antu ekala naluwi. (Mat. 5:7) Yesu wahosheli ichi chikuma hampinji yadizishileñayi atumbanji twindi chakulomba.—Mat. 6:​14, 15. w22.06 10 ¶8-9

Yesu wenjili hamaseki nakwikala muntu. Wamwekesheli yilwilu yaTata yindi. (Yow. 14:9) Dichi, kuhitila mudi yena tunamwiluki nikumukeña Yehova Nzambi. Cheñi tunadizili kuyuma yatañishileñayi nichinakulombolayi chipompelu chawakaKristu makonu. Natudizishi chitwatela kuhanda munjila yinateli kuletesha Yehova atutiyi kuwaha. Hamuloña wakwila Yesu wafwili, wejima wetu tunakumwenamu yuma yayiwahi. Yesu chamusañwiliwu, wahanini mashi indi “atutookeshaña kunshidi jejima” kwikala mulambu wawanina. (1 Yow. 1:7) Ichi hiMwanta walema, wakafwaña. Katataka Yesu amuchiki kapela kumutu. (Kutach. 3:15) Chumichi chakawaha nankashi chikela Satana anamufumishihu dehi! Henohu chumichi kanda, bayi muzeyaku. Twatela kumukuhwelela chikupu Nzambi yetu. Wakaleta yuma yayiwahi kudi “nyuza yejima yahanu hamaseki.” w22.07 18 ¶13; 19 ¶19

Neyi tunakwimika chikonkwanyi bayi tudikoleshela yumaku. Muloñadi? Muloña yuma yahimpikaña muchihandilu. Tuhanenu chakutalilahu: Kapostolu Pawulu wakwashiliku kutuña chipompelu mumusumba waTesalonika. Ilaña akakudimbulula amutemwini Pawulu muniwu musumba. (Yilw. 17:​1-5, 10) Neyi Pawulu washakamini, wadi kuyisha amanakwindi mukukala. Ilaña Pawulu halekeli kuyikwashaku. Dichi, welili kwesekeja nachadiña yuma. Kuhiñahu, wamutemesheli Timotewu kulonda ayi nakuyikolesha awa akakwitiya amaha muTesalonika. (1 Tes. 3:​1, 2) ATesalonika atiyili kuwaha. Twatela kudizila kuchuma chamumwekeneni Pawulu muTesalonika. Tunateli kwimika chikonkwanyi, ilaña yuma yinateli kuhimpika chakwila yinateli kutukañesha kwila ochu chuma chitunakufwila kwila. (Mukwa. 9:11) Neyi diku kukala kumukweti tondenu chikonkwanyi chacheñi chimukushikija. w22.04 25-26 ¶14-15

Yehova watukundejaña kuhitila mukuchiñeja kwakumbidi. Talenu yakutalilahu yantesha yamuBayibolu yinateli kutukundeja neyi tunakuhita mukukala. MuNsona, Yehova watuleja nindi kwosi chuma, kushilahu nikukala kwasweja, chinateli “kutwambula kukukeña [kwindiku].” (Rom. 8:​38, 39) Watulejaña cheñi nindi “wudi kwakwihi nanowu ejima anakumutambika” mukulomba. (Mas. 145:18) Yehova watulejaña nindi neyi tumushindamena, tukuumika makabi ejima nawa tunateli kwikala namuzañalu hela chakwila tunakukabakana. (1 Kor. 10:13; Yak. 1:2) Izu daNzambi datwanukishaña nawu kukala kutunakumona kwakapinji kantesha neyi tukwesekeja nankisu jahaya nyaaka jitukatambwila. (2 Kor. 4:​16-18) Yehova watuleja nindi wakafumishahu chuma chaletaña kukala kwejima, dikwila nawu Satana Diyabolu niejima embujolaña yilwilu yindi yatama. (Mas. 37:10) Munahembihu mavasi amuBayibolu akayikwasha kuumika makabi kumbidi? w22.08 11 ¶11

Komana mwadakamenaña nenu mukutwesha wanyi kutwalekahu kulondela nshimbi jaYehova jaloña ifuku-niifuku, chaaka-nichaaka? Yehova watushiika nindi kuloña kwetu kunateli kwikala “neyi mankanda ahakaluñalwiji.” (Isa. 48:18) Fwikijenu munemani kuchikumu chakaluñalwiji keneni, munakutala mankanda chinakubwankañilawu chakadi kuleka. Kwiluña damuchidiwu, komana mukutoñojoka nenu ifuku dimu akaleka? Inehi! Muneluki nenu akatwalekahu hohu. Kuloña kwenu kunateli kwikala neyi mankanda ahakaluñalwiji. Munjilanyi? Neyi munakufuukulahu chuma, chatachi mwatela kutoñojoka hayuma yikukeñayi Yehova nindi mwili. Kuhiñahu ilenu mwenomu. Hela chakwila chuma chimunakufuukulahu chakala chamuchidinyi, Tata yenu wukweti kukeña wukuyikwasha kutwalekahu kwikala akola nikulondela nshimbi jindi jaloña ifuku-niifuku.—Isa. 40:​29-31. w22.08 30 ¶15-17

Hakumana kwayaaka ikombakaji Satana akamumbaku. Wakatachika cheñi kuluwañesha antu awanina. Haniku kweseka, antu awanina hamaseki akamwekesha neyi chakwila anakuhakwilaku ijina daNzambi nichiyuulu chindi hela nehi. (Chim. 20:​8-10) Chuma chakelawu haniyi mpinji dichakaletesha majinawu kuyisoneka mumukanda wawumi hela nehi. Antu amakwawu akela neyi chelili Adama naEva, akakaana chiyuulu chaYehova. Chumanyi chakayimwekena? Chimwekeshu 20:15 yatulejaña nawu: “Kubombelahu, muntu wejima abulili kusonekawu mumukanda wawumi, amuumbilili mwijiya dakesi.” Awa akakudikaña akayijilumuna haya nyaaka. Ilaña antu awanina amavulu akahita hakweseka kwakukumishaku. w22.09 23-24 ¶15-16

Amakwawu muchipompelu chawakaKristu akusambila, ahosheleña nawu antu akunyuza yacheñi ekalili akaKristu atela kwaalama, kuchiina kuyihosha kudi antu acheñi. (Ñal. 6:12) Kapostolu Pawulu wakaanini chikupu iyi yitoñojoka, ilaña chatela ayikanjikiji kulondela yitoñojoka yindi, mukudizoza watwalili iyi nsañu kudi apostolu niakulumpi muYerusalema. (Yilw. 15:2) Chuma cheliliyi, chayikwashili akaKristu kutwalekahu kwikala namuzañalu nikuwunda muchipompelu. (Yilw.15:​30, 31) Neyi kunamwekani kukala kweneni, twalombaña wukwashu kudi antu atondayi Yehova kwakamena chipompelu. Kakavulu, wunlomboli washindamena haBayibolu wekala munyikanda hela munshimbi jitwatambwilaña kuhitila mukuloñesha. Tunateli kuleta kuwunda muchipompelu, neyi tulondelaña iji nshimbi chatela tushindameneña hachitunakutoñojoka. w22.08 22 ¶8-9

Kwekalaña mpinji etu amakwawu yitwayilejañaku amabwambu jetu nsañu yakujinda. Ilaña mpinji yikwawu chakalaña. Hadaha twenjilila wanyi kulejaku antu amakwawu yuma yidi mumuchima wetu, nawa neyi twiluka netu ibwambu detu walejaku amakwawu nsañu yitwamuleja, chatuneñeshaña. Munjila yikwawu, twatiyaña kuwaha nankashi neyi muntu ahemba kajindilu! Akulumpi ahembaña kajindilu adi neyi “iluña mwakuswama mpepela, iluña mwakwiyama” amanakwawu. (Isa. 32:2) Tweluka netu twatela kwikala akasunuka kuhosha nanawa amanakwetu, nakukuhwelela netu akuhemba nsañu yitunayileji. Hitwayikanjikijaña netu atulejiku nsañu yakujindaku. Kubombelahu, twayihamekaña añodi jawakulumpi muloña hiyayikanjikijaña anfumu jawu kushimuna nsañu yakujindaku. Chachiwahi nankashi kubula kumulejaku ñoda mukulumpi nsañu yinakundami amanakwetu niahela. w22.09 11 ¶10-11

Twatela kwiluka chikupu netu Yehova wakapulwisha añamba jindi ashinshika hampinji “yalukadi lwasweja” lunakwinza. (Mat. 24:21; Dan. 12:1) Wakela chumichi hakudibomba kwanyunza yatenañawu nawu Gogi waMagogi, hakalukukayi antu ashinshika kudi Yehova. Hela chakwila kudibomba kwamatuña mudi matuña 193 aUnited Nations, hiyakesakana naMukakubadika ninjita yindi yamwiwuluku! Yehova washiika nindi: “Chakadi nikujina, nakaditohesha nikudijilika ami aweni nawa nakaletesha nyuza yayivulu yakañiluki. Dihakelukawu nawu yami Yehova.” (Ezek. 38:​14-16, 23) Chakalukukayi Gogi chakasañumuna njita yakukumishaku yaYehova yaAmagedoni, hakajilumunayi Yehova “anyanta ahanu hamaseki hejima.” (Chim. 16:​14, 16; 19:​19-21) Kwambukaku, “muntu woloka hohu diyi wakashakama hamaseki, nawa owu wahembaña kashinshi diyi wakekalahu.”—Yish. 2:​21, tth. w22.10 16-17 ¶16-17

Hitwamonaña mumuchima wamuntuku; “Yehova [diyi] washinshikaña nkeñelu yindi.” (Yish. 16:2) Wakeña antu ejima, akuyitachi niyisemwa yashiyashana. Nawa Yehova watulejaña ‘kwenzununa chikupu nyichima yetu.’ (2 Kor. 6:13) Twatela kuyikeña amanakwetu ejima, bayi kuyisompeshaku. Chumichi chinatalishi cheñi mukwila nawu bayi tusompeshaña antu abula kwikala muchipompeluku. Komana munateli kusompesha ntaña yenu wabula kukuhwelela yuma yimwakuhwelela nenu, “Iwu muntu hakenza muchalalaku?” Inehi, Iku hikudivwimba, nawa hikudimona kuloña. Yehova wuchidi kuyinka “antu ejima ashakamaña kumaluña ejima” mpinji yakubalumuka. (Yilw. 17:30) Mpinji yejima anukenuña nenu kudimona kuloña hikubula kuloña. Kukeña kutwakeña nshimbi jaYehova jaloña kutuleteleña muzañalu nawa tukolesheña akwetu, tuyikwashi akundami kwakwihi nanetu nikudi Nzambi yetu. w22.08 31 ¶20-22

Twatela kukuhwelela netu tukumonaña ikañesha hampinji yitunakuzata mudimu wetu wakushimwina. Idi ikañesha dinateli kuswejelaku kumbidi. (Dan. 11:44; 2 Tim. 3:12; Chim. 16:21) Ilaña twatela kukuhwelela netu Yehova wukutukwashaña. Tunahoshelidi mwenimu? Yehova natwalekihu kukwasha ambuñindi kuzata nyidimu yayinkañayi, hela chakwila yakola chamuchidinyi. Talenu kaprofwetu Ezekeli, washimwinineña kudi aYudeya ankoli adiña muBabiloni. Antu adiña mwiluña mwashimwinineñayi Ezekeli adiña nayilwilu yamuchidinyi? Yehova wayiteneni nindi hiyantu “akola nyichima” nawa “adikaña.” Adiña afwana neyi nyiña nawa neyi tunjimbu. Dichaletesheli Yehova atwalekihu kumuleja Ezekeli nindi: “Bayi wutiya womaku”! (Ezek. 2:​3-6.) Ezekeli watwesheli kuzata mudimu windi wakushimwina muloña (1) amutemesheli kudi Yehova, (2) amwinkeleña ñovu kudi spiritu yaNzambi, nawa (3) mazu aNzambi akolesheli chikuhwelelu chindi. w22.11 2 ¶1-2

Yehova waleñeli yuma yayumi hanu hamaseki nindi yikushakamaña hohu kapinji kantesha, kufumishaku hohu antu. Wayileñeli nindi ashakameña chakadi kufwa. Yehova watuleña cheñi nampwila yakukeña kutwalekahu kuhanda. Bayibolu yahosha kutalisha hadi antu nawu Nzambi “[washa muchima] wakufwila kushakama haya nyaaka mudi wena.” (Mukwa. 3:11) Dichuma chimu chaleteshaña tumoneña kufwa netu hichilumbu. (1 Kor. 15:26) Neyi tunakati nankashi, komana twashakamaña hohu nakuleka netu tufwi? Inehi. Kakavulu twayaña nakudimona nandotolu, hadaha nikunwa yitumbu kulonda tukoli. Kafwampi, twazataña nañovu jetu jejima kulonda tubuli kufwa. Nawa neyi muntu itwakeña nafwi, chili hikansi hela himukulumpi, twaneñaña hadi mpinji yayilehi. (Yow. 11:​32, 33) Chakadi nikujina, muloña wakwila Nleñi yetu wukweti kukeña watwinka muchima wakufwila kushakama haya nyaaka, chamwekeshaña nawu wakeñeleña nindi tushakameña haya nyaaka. w22.12 3 ¶5; 4 ¶7

Akwetu akakudifukula amavulu anateli kukata, kutiya woma hela kumona neyi adi nkawawu mujinu mpinji jakala. Ikalenuña nampinji yakuhanjeka nawamanakwenu niahela. Neyi kudi musoñu, hadaha chikukeñeka nawu tudishileña chintampu hela chakwila tudi nawakwetu akakudifukula. Mumpinji yamuchidiwu, munateli kutiya neyi chatiyiliyi kapostolu Yowanu. Wakeñeleña kudimona nebwambu dindi Gayusi mesu namesu. (3 Yow. 13, 14) Hela chochu, Yowanu welukili nindi hayina mpinji, hadi kutwesha kudimona naGayusiku. Dichi wafuukwilihu kumusonekela hohu Gayusi mukanda. Neyi mukutwesha wanyi kudimona nawamanakwenu niahela mesu namesu, munateli kuhanjeka nawu kuzatisha njila yidi yejima. Neyi muhanjekaña nawakwenu akaKristu, mukutiya nenu mwakiñewa nawa mukwikala nakuwunda. Hanjekenu nawakulumpi neyi munakwakama nawa itejenu munakuyikoleshawu.—Isa. 32:​1, 2. w22.12 17-18 ¶6-7

Bayibolu yashimuna cheñi nawu, haniyi mpinji nyendu yaYosefu ayihatili mumpompa nawa nshiñu yindi ayishili muyikuñu. (Mas. 105:​17, 18) Kukala kwamweneñayi Yosefu kwaswejeleleñaku. Hakusambila wadiña nduñu akuhwelelawu, ilaña ichi wekalili kayili adiwulawu. Mwamonahu dehi kukala kwayineñesheleña nawa kwaswejeleleñaku hela chakwila mwalombeleña chikupu? Chumichi chinateli kumwekana. Yehova hakañeshaña kukala kudi mukanu kaayi kayuulañawu kudi Satana kubuli kutumwekenaku. (1 Yow. 5:19) Hela chochu, mwatela kwiluka chumichi nenu: Yehova neluki chikupu kukala kumunakumona nawa wayakamenaña. (Mat. 10:​29-31; 1 Pet. 5:​6, 7) Kubombelahu, wakana nindi: “Hinamba kakushiyaku, nawa hinamba kakufutalelaku.” (Heb. 13:5) Yehova nateli kuyikwasha kuumika hela chakwila kukala kwenu kunakumwekana neyi kukumana wanyi. w23.01 16 ¶7-8

Nsona yatulejaña nawu neyi tuluwañesha Nzambi yetu wakatushiya wanyi. AIsarela amuvulumwineña Yehova kakavulu, ilaña neyi abalumuka chikupu mumuchima, Nzambi wayanakeneneña. AkaKristu akusambila niwena elukili nawu Nzambi wayikeña. Chamoneneniwu, kapostolu Pawulu wayilejeli akwawu akakwitiya nindi atela “kumwanakena nikumukundeja” muntu wakoñeleña nshidi yasweja, ilaña abalumuka mumuchima. (2 Kor. 2:​6, 7; 1 Kor. 5:​1-5) Twazañalalaña hakwiluka chikupu netu Yehova hayikaanineña akakudifukula indi muloña wakwila aluwañesheleñaku! Ilaña, wayikwashileña munjila yakukeña, kuyolola nikuyitambika kulonda ekali cheñi amabwambu jindi. Dichayishiikayi niakanshidi ejima abalumukaña mumuchima makonu. (Yak. 4:​8-10) Bayibolu yamwekeshaña maana aNzambi, wuñanji windi nikukeña kwindi. Iwu mukanda wamwekeshaña nawu Yehova wakeñaña nindi tumwiluki. Wakeñaña twiikali amabwambu jindi. w23.02 7 ¶16-17

Kudi yuma yinakuletesha tukeñesheña kumona yuma yinakumwekana mukaayi chiyinakushikija wuprofwetu wamuBayibolu. Chakutalilahu, Yesu washimwini yuma yikamwekana yikutukwasha kwiluka netu kukuma kwakaayi kaSatana kudi kwakwihi. (Mat. 24:​3-14) Kapostolu Petulu watukolesheli kusha muchima hachinakushikijewa wuprofwetu kulonda chikuhwelelu chetu chitwalekihu kwikala chakola. (2 Pet. 1:​20, 21). Wakeñaña nindi tutwalekihu kuhemba yitoñojoka yetu hampinji yitunakushinshika hawuprofwetu wamuBayibolu. Watukonkomwenaña “[kwanuka] chikupu kwikalahu kwefuku daYehova.” (2 Pet. 3:​11-13) Muloñadi? Muloña hitunakufwila kwiluka “ifuku niora” yakaletayi Yehova Amagedoniku, ilaña tunakukeña kuzatisha mpinji yitunashali nayu kumwekeshelamu ‘yilwilu yakujila ninyidimu yakumwakama Nzambi.’ (Mat. 24:36; Luka 12:40) Twatela kutwalekahu kwikala nayilwilu yayiwahi nikumwekesha netu nyidimu yitwamukalakelaña Yehova twayizataña muloña twamukeña chikupu. Hakwila tutwalekihu kwila mwenimu, twatela kudihembaña etu aweni. w23.02 16 ¶4, 6

Kudi yuma yatela kwila “anyikoku amakwawu” chayinu mpinji hakwila akashakami muParadisa. Twatela kumwekesha chitwatiyaña hachuma chatwililayi Yesu. Chakutalilahu, twamwekeshaña chitwamukeña kuhitila muyuma yitwelilaña amanakwindi awayishewa naspiritu. Yesu wahosheli nindi wakasompesha anyikoku kushindamena haniyi yuma. (Mat. 25:​31-40) Tunateli kuyikwasha mumudimu wakushimwina niwakwilisha atumbanji. (Mat. 28:​18-20) Hitwatela kuhembelela sampu tunatachiki kushakama muParadisa hakwila dinu twakekali nayilwilu yamuntu wunakukeñayi Yehova nindi akashakami mwenomuku. Ayinu diyi mpinji yitwatela kuzata nañovu kulonda tubuleña kutwamba, twiikali nayilwilu yayiwahi nichihandilu chapela. Nawa twatela kwikala ashinshika kudi Yehova, enikwetu nikudi akwetu akaKristu. Neyi twovwahilaña chikupu nshimbi jaNzambi hampinji yitunakushakama mukanu kaayi katama, chakatupelela kujovwahila hitwakekala muParadisa. Twatela cheñi kwiluka nyidimu niyuma yikumwekesha nawu tunakudiloñesha kushakama muParadisa. w22.12 11-12 ¶14-16

Twamukeña Yesu hamu neyi Mwanta wetu muloña hiNyuuli wamuwahi. Yehova yomweni wamudizishili Mwanindi nawa wamutondeli kulonda ayuuleña. (Isa. 50:​4, 5) Toñojokenu cheñi hakukeña kwakudihana kwamwekeshayi Yesu. (Yow. 13:1) Chineli Yesu hiMwanta wenu, mwatela kumukeña chikupu. Walumbulwili nindi antu amukeña chikupu, dikwila nawu, ana atenañayi nindi amabwambu jindi, amwekeshaña chamukeñawu kuhitila mukwovwahila nshimbi jindi. (Yow. 14:15; 15:​14, 15) Hikukooleka chikupu kwikala ibwambu daMwana kaYehova! Mwamumonaña Yesu nenu wadizoza nawa wamwimbujolaña Tata yindi chikupu. Mweluka nenu wadiishili adiña nanzala, wakundejeli aneñeli nikuuka akata. (Mat. 14:​14-21) Mwamonaña chalombolañayi chipompelu chindi makonu. (Mat. 23:10) Nawa mweluka nenu wakazata nyidimu yayivulu kumbidi hamu neyi Mwanta waWanta waNzambi. Munateli kumwekesha ñahi nenu mwamukeña? Hikuhitila mukumwimbujola. Munateli kutachika kumwimbujola kuhitila mukudihana enu aweni kudi Yehova nakupapatishewa. w23.03 4 ¶8, 10

Yehova wenzesha mumawulu, hamaseki nimutuluñalwiji yileñaleña yayivulu yakuhayamisha yitwatela kudizilaku. (Mas. 104:​24, 25) Nawa toñojokenu hohu hachatuleñayi Nzambi. Watuleña namuchima wakusakilila halubanji lwayileñaleña. Watuleña cheñi munjila yakwila tudiluñisheña yuma yashiyashana yaleñayi kuhitila mukutwinka wuswa wakumona, kutiya, kukwata, kutompa nikwipula ivumba. Bayibolu yashimuna cheñi chuma chikwawu chalema chinateli kutuletesha twikaleña nampinji yakushinshika yileñaleña. Yatudizishaña hayilwilu yaYehova. (Rom. 1:20) Chakutalilahu, toñojokenu hachaleñawu yileñaleña chiwahi. Komana yamwekeshaña wanyi maana aNzambi? Nawa toñojokenu hayakuda yayiwahi yitwadiluñishaña. Iwu diwunsahu wamwekeshaña nawu wayikeña antu. Neyi tumwiluka Yehova chekalayi kuhitila muyuma yaleñeliyi, chatukwashaña kumwiluka chiwahi nawa twaswinaña kwakwihi nayena. w23.03 16 ¶4-5

Yuma chiyikuswejelañaku kutama mukaayi, chinateli kutukalila nankashi kukuhwelela Mwizu daNzambi. Antu anateli kutuletesha kutachika kujinoka neyi chakwila mwamweni nsañu yekala muBayibolu yalala hela kujinoka neyi chakwila Yehova watonda nduñu wamaana nikashinshi kulonda alomboleña akakudifukula indi makonu. Ilaña neyi tweluka chikupu netu Izu daYehova mpinji yejima dahoshaña mwalala, twakashinda iku kweseka kwakukeña nawu tukisañani chikuhwelelu chetu. Dichi ‘twakadikasa mumuchima wetu kwovwahila nshimbi jaYehova mpinji yejima, kushika nikunsa.’ (Mas. 119:112) Twakatiyaña “nsonyi wanyi” kuleja antu chalala nikuyikolesha kulonda achizatisheña muchihandilu chawu. (Mas. 119:46) Nawa twakatwesha kuumika kukala kwasweja niikabisha, “nakuwunda nimuzañalu.” (Kol. 1:11; Mas. 119:​143, 157) Chalala chatukwashaña kwikala awunda, ahamuka nawa chatudizishaña chitunateli kushakama chiwahi mukanu kaayi kanakusweja kutaminaku nawa mudi yikonkojola. Chatukwashaña kuchiñeja yuma yayiwahi yakumbidi yakekala muchiyuulu chaWanta waNzambi. w23.01 7 ¶16-17

Hawufuku wakwila Yesu kanda afwi, wayilombeleliku atumbanji twindi hadi mpinji yayilehi. Wamulombeli Tata yindi nindi “wuyihembi muloña wanowu watama.” (Yow. 17:15) Yesu wadiña wayikeña nankashi. Hela chakwila welukili nindi katataka akabakani nankashi, wayakameneni atumbanji twindi. Kufwana Yesu, hitwatoñojokaña hohu hayuma yitunakukeñaku. Ilaña, mpinji yejima twayilombelañaku amanakwetu niahela. Neyi twila mwenimu, tunakwovwahila lushimbi lwaYesu lwakudikeña wumu namukwawu nawa twamwekeshaña kudi Yehova netu twayikeña akwetu akakwitiya. Kuyilombelaku amanakwetu niahela hikunata mpinjiku. Izu daNzambi datulejaña nawu “Kulomba kwakulembelela kwamuntu waloña kwekala nañovu chikupu.” (Yak. 5:16) Akwetu akakwitiya akeñekaña kuyilombelaku muloña amonaña kukala kwakuvulu. w22.07 23-24 ¶13-15