November

Neyi mudi anvwali, kwashenu anyanenu kuloñesha ñakwilu yinesekani nayaaka yawu. Mpinji jikwawu, twadizaña hansañu yakunama, chidi neyi kukala kwamuwulu hela yilwilu yatama yitwatela kutondolwela, ilaña munateli kuwanikahu paragilafu yimu hela ayedi munateli kwakula mwana wanyanya. Cheñi, kwashenu anyanenu eluki chuma chikuletesha hadaha abuli kuyinka kukooleka kwakwakulahu mpinji yejima yikwololawu makasa. Kuyilumbulwila mwenimu chikuyikwasha kubula kuneña neyi akwawu anayinki kukooleka ilaña wena nehi. (1 Tim. 6:18) Wejima wetu tunateli kuloñesha ñakwilu yikumulemesha Yehova nikukolesha akwetu akaKristu. (Yish. 25:11) Mpinji yikwawu tunateli kuhosha hayuma yatumwekeneni, ilaña twatela kutondolwela kuhosha nankashi hadi etu aweni. (Yish. 27:2; 2 Kor. 10:18) Hela chochu, twatela kuhosha nankashi hadi Yehova, Izu dindi nihadi antu jindi ejima.—Chim. 4:11. w23.04 24-25 ¶17-18

Kukeña nikwena kwalema muloña kwatukwashaña kwikala atona nikuhemba yitoñojoka yetu. (Mat. 22:​37-39) Kukeña kutwamukeña Nzambi kwatukwashaña kutwalekahu kushimwina hela chakwila mukufuma kukala kwamuchidinyi. (2 Tim. 1:​7, 8) Hamuloña wakwila twayikeña niantu abulaña kumukalakela Yehova, twatwalekañahu kushimwina nikutwalekahu kuzatila mumaluña etu akushimwina, kushilahu nikushimwina kuzatisha foni nikusoneka nyikanda. Hitwazeyaña nakuleka kukuhwelela netu awa antu ifuku dimu akahimpa nakutachika kwila yuma yayiwahiku. (Ezek. 18:​27, 28) Mukukeña akwetu munabombeli nikukeña akwetu akaKristu. Twamwekeshaña iku kukeña kuhitila “[mukudikolesha] wumu namukwawu nikudituña wumu namukwawu.” (1 Tes. 5:11) Neyi chazatilañawu hamu amashidika neyi anakuzuña njita, ninetu twadikoleshaña wumu namukwawu. Hitunateli kwililamu hohu chuma chinateli kuneñesha amanakwetu niahela, indi kwiji kufuntisha katama hakatamaku. (1 Tes. 5:​13, 15) Twamwekeshaña cheñi kukeña kuhitila mukulemesha amanakwetu anlombolaña muchipompelu.— 1 Tes. 5:12. w23.06 10 ¶6; 11 ¶10-11

Njila yimu mutunateli kukoleshela chikuhwelelu chetu hikutoñojoka chikupu hefutu danyiloña. Ifutu danyiloña hiwunsahu wamwekeshaña nawu yikaninu yaNzambi yakashikijewa. Neyi tutoñojokaña chikupu hachahanininiwu ifutu danyiloña niyuma yabombelelimu, twakuhwelelaña chikupu netu chikaninu chaNzambi chakwikala nawumi wabulaña kukuma mukaayi kakawahi chikashikijewa. Tunahoshelidi mwenimu? Hanu dinu, yumanyi yabombeleli mwifutu danyiloña? Yehova watemesheli Mwanindi wawedi akeñayi nankashi, muntu adikundayi nindi, kufuma mwiwulu nakwinza hanu hamaseki kulonda avwaliki neyi muntu wawanina. Hadiñayi hamaseki, Yesu womikili kukala kwashiyashana. Kuhiñahu wakabakeni nawa wafwili kufwa kwayeña. Iwu wadiña hiwuseya weneni chikupu wafweteliyi Yehova! Nzambi yetu wukweti kukeña hadi kwiteja Mwanindi kukabakana nikufwa kulonda atwinki chihandilu chachiwahi ilaña chakuhanda hohu hakampinji kanteshaku. (Yow. 3:16; 1 Pet. 1:​18, 19) Chineli wahanini wuseya weneni ñana, Yehova wakaletesha twakashakameña haya nyaaka mukaayi kakaha. w23.04 27 ¶8-9

Komana Yehova wafwilaña kusañula afu? Chakadi nikujina, wafwilaña kwilamu. Woneneni ansoneki amavula aBayibolu kusoneka chikaninu chindi chakusañula antu kumbidi. (Isa. 26:19; Chim. 20:​11-13) Nawa neyi Yehova nakani, mpinji yejima washikijaña munakaniyi. (Yosh. 23:14) Kafwampi, Yehova wafwilaña kusañula antu afwa dehi. Talenu mazu ahosheliyi nkakulula Yoba. Welukili chikupu nindi hela wukufwa, Yehova wukufwilaña kumumona wamumi cheñi. (Yoba 14:​14, 15, tth.) Yehova wuchidi kukeñesha kumona akakudifukula indi ejima afwa dehi anekali cheñi amomi. Wafwilaña kuyisañula akekali akola kumujimba nawa akweti muzañalu. Indi antu amavulu afwa chakadi kwikala nakukooleka kwakudiza chalala chahosha hadi Yehova? Nzambi yetu wukweti kukeña wafwilaña kuyisañula niwena. (Yilw. 24:15) Wakeñaña nindi akekali nakukooleka kwakwikala amabwambu jindi nawa akashakameña haya nyaaka hamaseki.—Yow. 3:16. w23.04 9 ¶5-6

Munateli kutwalekahu ñahi kuchiñeja yuma yakumbidi? Chakutalilahu, neyi mudi nakuchiñeja kwakushakama haya nyaaka hanu hamaseki, tañenuña nsañu yamuBayibolu yashimunaña chakekala Paradisa nikutoñojokahu chikupu. (Isa. 25:8; 32:​16-18) Fwikijenuña chakekala chihandilu mukaayi kakaha. Difwikijenu munakushakama mwenomu. Neyi tutwalekahu kuchiñeja chikupu yuma yakekala mukaayi kakaha, kukala kutwamonaña kukwikala ‘kwakapinji kantesha nawa kwapepela.’ (2 Kor. 4:17) Yuma yimwachiñejaña yayishiikayi Yehova, yinateli kuyikwasha kutwalekahu kuumika kukala. Wahana dehi yuma yinateli kuyikwasha hakwila mwiikali nañovu yafumaña kudi yena. Dichi neyi munakukeña wukwashu wakuzata mudimu wumukweti, kuumika kukala, hela kutwalekahu kwikala namuzañalu, mulombenu chikupu Yehova kulonda ayilomboli kuhitila mukudiza nkawenu. Tambwilenu wukwashu wafumaña kudi amanakwenu niahela akaKristu. Twalekenuhu kuchiñeja chikupu yuma yakumbidi. Chikufumamu, ‘ñovu jabadika jikuyikolesha kwesekeja nakulema kwaNzambi kwasweja kulonda muumiki chikupu nakuwunda nimuzañalu.’—Kol. 1:11. w23.10 17 ¶19-20

Kudi yuma yayivulu yikuletesha tumusakilileña Yehova mukulomba. Tunateli kumusakilila hachuma chejima chachiwahi chitukweti; muloña chawaana chejima chachiwahi chafumaña kudi yena. (Yak. 1:17) Chakutalilahu, tunateli kumusakilila halubanji lweseki niyuma yayiwahi yaleñayi. Tunateli cheñi kumusakilila hawumi wutukweti, chisaka, amabwambu nihayuma yitwachiñejaña. Nawa twatela kumusakilila Yehova hakutwiteja kwikala nawubwambu wawuwahi nayena. Twatela kuzata nañovu chikupu hakwila tutoñojokeña hayuma yikutuletesha tumusakilili Yehova halwetu. Tunakushakama mukaayi mudi antu abulaña kusakilila. Kakavulu antu atoñojokaña hohu hayuma yinakukeñawu chatela atoñojokeña hachinateli kumwekeshawu kusakilila hayuma yikwetiwu. Neyi tutachika kwikala nayitoñojoka yamuchidiwu, kulomba kwetu kukwikala hohu kwakulomba yuma yitunakukeña. Hakwila tukañeshi iyi yitoñojoka, twatela kutwalekahu kumwekesha kusakilila hayuma yejima yatwililañayi Yehova.—Luka 6:45. w23.05 4 ¶8-9

Chineli hiTata yetu wukweti kukeña, Yehova watiyaña kutama neyi amona tunakukabakana. (Isa. 63:9) Hela chochu, hatukiñaña kukweseka kwejima kutwamonaña kutunateli kwesekeja natuloña hela nyizuzuku. (Isa. 43:2) Ilaña watushiika nindi wukutukwashaña ‘kuhita’ muyumiyi. Nawa haketeja kukala kwejima kutwamonaña kutuzeyeshaku. Yehova watwinkaña cheñi spiritu yindi yajila yañovu kulonda yitukwasheña kuumika. (Luka 11:13; Fwili. 4:13) Chikufumamu, tunateli kukuhwelela netu mpinji yejima wukutwinkaña yuma yikutukwashaña kuumika nikutwalekahu kwikala ashinshika kudi yena. Yehova wakeñaña nindi tumukuhweleleña. (Heb. 11:6) Mpinji jikwawu kukala kutunakumona kunateli kumwekana neyi kunatubadiki muñovu. Hadaha tunateli kutachika kujinoka neyi chakwila Yehova wukutukwasha. Ilaña Bayibolu yatulejaña nawu nañovu jaNzambi “[tunateli] kukiluka mpwembu.” (Mas. 18:29) Dichi chatela tujinokeña, twatela kulomba nakukuhwelela chikupu netu Yehova wakakula kulomba kwetu.—Yak. 1:​6, 7. w23.11 22 ¶8-9

Kukeña kwalala anakulumbululi chiwahi chikupu! Awa mazu anakuyikolesha adisumbula: Munateli kudimwekeshela kukeña kwalala kudi wumu namukwawu. Adisumbula atela kuzata nañovu hakwila adimwekesheleña wumu namukwawu kukeña kwalala hampinji yinakuhandawu. Chakutalilahu, kesi kanateli kutwalekahu kubidima, chiña hohu neyi anakukisonsela. Neyi anakukisonsela wanyi, mukuya kwampinji kakujima. Munjila yoyimu, kukeña kwekala hakachi keyala namumbanda kunateli kutwalekahu kwikala kwakola chiña hohu neyi elaña yuma yikukoleshaña wubwambu wawu. Mpinji jikwawu, adisumbula anateli kumona nawu kukeña kwawu kunakuya nakukeha, sweje-e neyi anakumona kukala kwamali, yikatu, indi kwiji kukala kwakukulisha anyana. Dichi hakwila elishi ‘muzuzu waYa’ wutwalekihu kubidima, eyala namumbanda atela kuzata nañovu kukolesha wubwambu wawu naYehova. w23.05 20-21 ¶1-3

Hakwila twiikali ahamuka, yumanyi yitwatela kwila? Anvwali jetu anateli kutuleja nawu twiikali ahamuka, ilaña kwila atwilisha kwikala ahamuka nehi, hela chakwila wena ahamuka. Kwikala wahamuka kudi neyi kudiza mudimu. Njila yimu yikuyikwasha kwiluka mudimu, hikushinshika yuma yinakwilayi muntu wunakuyidizisha nikumwimbujola. Munjila yoyimu, ninetu twekalaña ahamuka neyi tushinshikaña chikupu hadi antu amwekeshaña ichi chilwilu, kuhiñahu tuyimbujola. Kufwana Danyeli, twatela kwiluka chiwahi Izu daNzambi. Twatela kukolesha wubwambu wetu naYehova kuhitila mukuhanjeka nindi kakavulu nawa mukukasunuka. Nawa twatela kumukuhwelela Yehova, nakwiluka chikupu netu watukwashaña. Chakafumamu, neyi chikuhwelelu chetu chidi mukweseka, twakekala ahamuka. Antu ahamuka kakavulu ayilemeshaña kudi antu. Anateli cheñi kuletesha antu akweti nyichima yashinshika kumwiluka Yehova. Mwamweni, kudi yuma yayivulu yikuletesha twiikali ahamuka. w23.08 2 ¶2; 4 ¶8-9

Izu dachiGiriki dabalumunawu nawu “esekenu,” adizatishili kulumbulula njila yazatishileñawu antu kwesekelamu yikuñu, chidi neyi wuru nisiliva kulonda amoni neyi yalala. Dichi, twatela kweseka nsañu yitwatiyaña hela yitwatañaña kulonda twiluki neyi yalala hela nehi. Chumichi chakasweja kwikala chalema kudi etu hampinji yinakuswina lukadi lwasweja kwakwihi. Chatela twitejeña nsañu yejima yahoshañawu antu, twazatishaña wuswa wetu wakutoñojoka kulonda twesekeji nsañu yitwatañaña hela yitwatiyaña nachahoshaña Bayibolu nikuloñesha kwaYehova. Neyi twila mwenimu, hiyakatuluwañesha nansañu yakutwamba yidi yejima yawandemoniku. (Yish. 14:15; 1 Tim. 4:1) Ambuña aNzambi akapuluka lukadi lwasweja hamu neyi izanvu. Hela chochu, hamuntu-hamuntu hituneluki yuma yikamwekana kumadikiku. (Yak. 4:14) Dichi, hela neyi twakashika kulukadi lwasweja indi kwiji twakafwa henohu lukadi lwasweja kanda, tuneluki netu akatwinka wumi wahaya nyaaka neyi tutwalekahu kwikala ashinshika. Dichi wejima wetu tushenu muchima hakuchiñeja kwetu kwakuwahi nikutwalekahu kwikala adiloñesha nefuku daYehova! w23.06 13 ¶15-16

Tweluka wanyi chakashikijewa wuprofwetu wukwawu wamuBayibolu. (Dan. 12:​8, 9) Ilaña neyi hituneluki chikupu wuprofwetu wumu chiwakashikijewaku, chinatalishi wanyi mukwila nawu hiwakashikijewaku. Chakadi nikujina, twatela kukuhwelela netu Yehova wakatukwasha kutiyishisha yuma yitwakeñaña kwiluka hampinji yatelela, neyi cheliliyi kunyima. Akabidika mbila “[yakuwunda] nikukiñewa.” (1 Tes. 5:3) Kuhiñahu, nfulumendi jamukaayi jakabalumukilamu kudifukula kwakutwamba nakukwijiyisha. (Chim. 17:​16, 17) Nkumininaku, akalukuka antu jaNzambi. (Ezek. 38:​18, 19) Iyi yuma yakamwekanaña yakaletesha njita yakukumishaku yaAmagedoni yakatachiki. (Chim. 16:​14, 16) Twatela kukuhwelela chikupu netu iyi yuma keña yimwekani. Henohu iyi mpinji kanda, tutwalekenuhu kumwekesha kusakilila kudi Tata yetu wamwiwulu wukweti kukeña kuhitila mukusha muchima kuwuprofwetu wamuBayibolu nikukwasha akwetu kulonda eleña mwomumu. w23.08 13 ¶19-20

Hampinji yahosheleñayi kapostolu Pawulu hachikuhwelelu, kuchiñeja nikukeña, wakunkulwili nindi “chabadika haniyi [yilwilu] hikukeña.” (1 Kor. 13:13) Chumanyi chaletesheli Pawulu ahoshi mwenimu? Kumbidi, hitwakakeñekaña cheñi kukuhwelela muyikaninu yaNzambi yahosha hakaayi kindi kakaha hela kuchiñeja netu iyi yikaninu yakashikijewaku, muloña yakekala yashikijewa dehi. Ilaña twakatwalekahu kumukeña Yehova niakwetu antu. Kafwampi, twakaswejelañaku kuyikeña haya nyaaka. Tukumwekesha cheñi netu tudi akaKristu alala. Yesu wayilejeli apostolu indi nindi: “Neyi mukeñañana, dihu hakuyilukilawu kudi antu ejima nawu mudi atumbanji twami.” (Yow. 13:35) Kubombelahu, neyi tudimwekeshelaña kukeña wumu namukwawu twekalaña anuñañana. Pawulu wateneni kukeña nindi “dikwanuñañeshaña chikupu.” (Kol. 3:14) Kapostolu Yowanu wayisonekeleli akwawu akakwitiya nindi: “Muntu wejima wamukeña Nzambi watela kukeña nimanakwindi nawa.” (1 Yow. 4:21) Neyi tudimwekeshelaña kukeña wumu namukwawu, tukumwekeshaña netu twamukeña Nzambi. w23.11 8 ¶1, 3

Bayibolu yesekeja chihandilu chanetu akaKristu nalufuchi. Akakutemuka lufuchi ashikaña kumufunda akatambwila wumi wahaya nyaaka. (2 Tim. 4:​7, 8) Twatela kuzata nañovu kulonda tutwalekihu kutemuka, sweje-e chineli tudi kwakwihi chikupu nakushika kumufunda. Kapostolu Pawulu washimwini chuma chikutukwasha kutemuka nakushika kumufunda. Watulejeli “[kunata] yuma yejima yalema . . . [nikutemuka] nakuumika lufuchi lunatuloñesheliwu.” Komana Pawulu watalishili mukwila nindi kwosi chisenda chatela kusendayi mukaKristu? Inehi, dimwatalishiliyi wanyi. Ilaña watalishili mukwila nindi twatela kunata chuma chejima chalema chamukunkulwayi. Chisenda chamuchidiwu chinateli kutukañesha kutemuka chiwahi nikutuzeyesha. Hakwila tutwalekihu kutemuka twatela kunyakala kwiluka nikunata chuma chalema chamukunkulwayi chejima chinateli kutukañesha kutemuka chiwahi. Hela chochu, hampinji yoyimu hitwatela kunata yisenda yitwatela kusendaku. Neyi nehi, tunateli kudifumisha etu aweni hamukanka wawantu anakutemuka lufuchi.—2 Tim. 2:5. w23.08 26 ¶1-2

Kwikala amwovu kwatukwashaña cheñi kulemesha yitoñojoka yawakwetu. Chakutalilahu, ahela jetu amakwawu akeña jakudipentapenta, ilaña amakwawu nehi. AkaKristu amakwawu anwaña walwa nakwesekeja, ilaña amakwawu afuukulahu kubula kunwa. AkaKristu ejima akeñaña kwikala akola kumujimba, hela chochu, afuukulaña njila jashiyashana jakuyuukilamu. Neyi tudimonaña kuloña mpinji yejima nikukanjikija akwetu muchipompelu netu eleña yuma yitunakukeña, tukuhukesha akwetu nikuleta chaambu. (1 Kor. 8:9; 10:​23, 24) Chakutalihu, chatela atwinki nshimbi hayuma yitwatela kuvwala, Yehova watwinka yishina yitwalondelaña. Twatela kuvwala yakuvwala yatelela akakumukalakela Nzambi, yinakumwekesha kwikala amwovu, kalemesha “nikutoñojoka mwamaana.” (1 Tim. 2:​9, 10) Dichi hitwavwalaña munjila yakwila antu atoñojokeña hohu hachitunakumwekanaku. Yishina yamuBayibolu yinateli cheñi kukwasha akulumpi kubula kushaku nshimbi kutalisha hayakuvwala ninsuki yatela kuyindawu hela kutewula antu amuchipompelu. w23.07 23-24 ¶13-14

Yehova watulejaña yuma yayiwahi yitwakadiluñisha kumbidi. Ana etejaña mutambi wamumbanda wasupa nawa waha mukanwa, ashaña muchima hakudiluñisha yuma ‘yatowala’ yelañawu mukuswamujoka. Ilaña aneluki wanyi nawu yuma yinakwilawu yakayiletela kukala kumbidi. Yakayiletesha akekali “Mwijamu dakunama.” (Yish. 9:​13, 17, 18) Ana etejaña mutambi ‘wamaana alala’ akamona chuma chaambukaku chikupu! (Yish. 9:1) Tunakudiza kukeña yuma yakeñayi Yehova nikuhela yahelayi. (Mas. 97:10) Nawa twatiyaña kuwaha kutambikaku niantu amakwawu kulonda enzi nakudizila ‘kumaana alala.’ Chidi tuhu neyi “[tunakutambikila] hamaluña ahewulu damusumba netu: ‘Wejima wasupa, eñili munu.’” Yuma yayiwahi yitwadiluñishaña etu niantu etejaña iwu mutambi, bayi neyi yakapinji kanteshaku. Yahaya nyaaka nawa yatukwashaña ‘kuhanda’ haya nyaaka hampinji “[yitunakuya] kumbidi munjila yakashinshi.”—Yish. 9:​3, 4, 6. w23.06 24 ¶17-18

Mwatiyaña ñahi neyi mukwenu mumwazatilaña indi kwiji mumwatañilaña ayihula kutalisha hayuma yimwakuhwelela? Komana mwatiyaña woma? Etu amavulu twatiyaña woma. Ilaña lwihu lwamuchidiwu lunateli kuletesha twiluki yitoñojoka yanowu muntu hela yuma yakuhwelelayi nawa chikutukwasha kumushimwina nsañu yayiwahi. Hela chochu, mpinji jikwawu muntu nateli kwihula lwihu kulonda tuditaadikishi nindi. Chumichi hichatela kutuhayamishaku. Muloña antu amavulu ayilejaña nsañu yakutwamba kutalisha hayuma yitwakuhwelela. (Yilw. 28:22) Kubombelahu, tunakushakama “mumafuku akukuminina,” mpinji yikudi antu amavulu “abulaña kukeña kutiyañana nawakwawu” nawa “asweja kuzuwa.” (2 Tim. 3:​1, 3) Hadaha munateli kutoñojoka nenu, ‘Nateli kwikala ñahi wamwovu nikwakula munjila yayiwahi neyi muntu nakutaadikisha yuma yamuBayibolu yinakuhwelela?’ Chumanyi chikuyikwasha? Hikwikala ovwaha. Muntu wovwaha hahilaña swayiku, ilaña wadiyuulaña neyi anamuvuloki hela neluki wanyi chakwakula. w23.09 14 ¶1-2

Mpinji jikwawu, twatambwilaña kufumba kwatukiñaña kuyuma yidi neyi kusweja kukeña maheta niyuma yikwawu yinateli kutwisha mukweseka kwakufumpa nshimbi jaNzambi. Nihampinji yidi neyi iyi, mwafumaña yuma yayiwahi neyi twovwahila wunlomboli waYehova. (Isa. 48:​17, 18; 1 Tim. 6:​9, 10) Chakadi nikujina, Yehova wakatwalekahu kuzatisha antu amwimenañaku kuhana nshimbi mumpinji yalukadi lwasweja, ndo-o nimuChiyuulu chaYaaka Ikombakaji. Komana twakatwalekahu kwovwahila iji nshimbi? Chakatupelela kwila mwenimu neyi twovwahilaña wunlomboli waYehova chayinu mpinji. Dichi, mpinji yejima twovwahileña wunlomboli waYehova, kushilahu niwunlomboli wawamayala atondawu nawu atuhembeña. (Isa. 32:​1, 2; Heb. 13:17) Nawa chitukwilaña mwenimu, tukwikala nawunsahu wejima wukutukwashaña kumukuhwelela Nlomboli yetu, Yehova, watulombolaña kufuma kuwubanji wakuspiritu nakututwala kutunakuya, dikwila nawu kuwumi wahaya nyaaka mukaayi kakaha. w24.02 25 ¶17-18

Kapostolu Pawulu wadiluñishileña mumudimu waYehova, ilaña wamweneña kukala kwakuvulu. Kakavulu Pawulu wadiña nakwenda maluña amalehi nawa ñendelu yadiña yakala munana mafuku. Hawenyi windi, mpinji yikwawu Pawulu wahitileña “muwubanji wahatuloña” nawa “akeñeleña [kumujaha] kudi atupondu.” Mpinji yikwawu cheñi adiña nakumweta kudi ayilumbu jindi. (2 Kor. 11:​23-27) Nawa amanakwindi akaKristu hiyamwekesheleña kusakilila mpinji yejima hachazatileñayi nañovu kuyikwashaku. (2 Kor. 10:10; Fwili. 4:15) Chumanyi chamukwashili Pawulu kutwalekahu kumukalakela Yehova? Pawulu wadizili yuma yayivulu kutalisha hachekalayi Yehova kuhitila muNsona nimuyuma yahitileñamu. Wenjili nakwiluka chikupu nindi Yehova Nzambi wadiña wamukeña. (Rom. 8:​38, 39; Efwe. 2:​4, 5) Nawa wamukeñeli chikupu Yehova. Pawulu wamwekesheli nindi wamukeña Yehova ‘nachayikalakeleleñayi akakujila nichatwalekeliyi nakuyikalakela.’—Heb. 6:10. w23.07 9 ¶5-6

Antu amavulu eteja nawu twakeñekaña wunlomboli wanfulumendi nawa nawu twatela kwovwahila nshimbi jikwawu jashaku awa antu “akweti wuswa wabadika.” Ilaña awa antu wowamu ashintajalaña kwovwahila nshimbi jabula kukeñawu hela jamonañawu nawu jidi chiwahi wanyi. Bayibolu yahoshaña nawu nfulumendi jawantu jaletaña makabi, ajiyuulaña kudi Satana nawa katatakichi ajikisañani. (Mas. 110:​5, 6; Mukwa. 8:9; Luka 4:​5, 6) Yatulejaña cheñi nawu “muntu wukudikaña nawakawuswa, nakudikaña nantanjikilu yaNzambi.” Chayinu mpinji, Yehova weteja jinfulumendi kuyuula kulonda yuma yendeña chiwahi nawa wakeñaña nindi tujovwahileña. Dichi, twatela “[kuyinka] antu ejima yuma yayitelela,” kushilahu nyisonku, kalemesha nikwovwahila. (Rom. 13:​1-7) Tunateli kumona oyu nshimbi netu yikuzatika wanyi, yayiwahi wanyi, hela yakala kwovwahila. Ilaña twamwovwahilaña Yehova, nawa watulejaña nindi twovwahileña awa akawuswa chakala hohu anakutuleja wanyi kufumpa nshimbi jindi.—Yilw. 5:29. w23.10 8 ¶9-10

Havwalikiliyi Samusoni, aFilisitinu diwu ayuulileña muza waIsarela nawa adiña nakuwukabisha. (Anso. 13:1) AIsarela akabakeneña chikupu muloña ayiyuulileña chatama. Yehova wamutondeli Samusoni kulonda “[ayamwini] aIsarela mumakasa awaFilisitinu.” (Anso. 13:5) Hakwila atweshi kuzata iwu mudimu wakala, Samusoni wateleleli kumushindamena Yehova. Mpinji yimu, amashidika awaFilisitinu enjili nakumukwata Samusoni kuLehi, hadaha muYuda. Amayala akumuchidi waYuda atiyili woma, dichi afuukwilihu kumuhana Samusoni kudi ayilumbu. Antu jaSamusoni amukasili chiwahi nanyonji yayiha yiyedi nawa amutwalili kudi aFilisitinu. (Anso. 15:​9-13) Hela chochu, “spiritu yaYehova yamwinkeli [Samusoni] ñovu” nawa wadikasunwini yomweni munyonji. Kufumahu “wawanini ifwaha dituuta dachibaña chachimbuulu wachizamba,” wadinoneli nawa wadizatishili kujaha nachu amayala aFilisitinu 1,000!—Anso. 15:​14-16. w23.09 2 ¶3-4

Yehova natwalekihu kumwekesha “[nkeñelu] yindi yahaya nyaaka” muBayibolu. Yehova nateli kuzatisha njila jamboka-mboka hakwila ashikiji nkeñelu yindi, nawa dichelañayi mpinji yejima muloña “nakojeji yuma yejima kuzatika muloña wankeñelu yindi.” (Yish. 16:4) Nawa yuma yafumaña muyuma yelañayi Yehova yikatwalekahu haya nyaaka. Chumanyi chakeñañayi Yehova kwila, nawa yumanyi yinahimpiyi hakwila eli chumichi? Nzambi walejeli antu atachi chuma chakeñeleñayi nindi eli. Ateleleli ‘kusemununa kulonda avuli, kwinzesha iseki nawa adiidimeña, ekali nawanta . . . hayileñaleña yejima yayumi’ hamaseki. (Kutach. 1:28) Chelili aAdama naEva adikañi, nakuletesha nshidi kwiñila mudi antu ejima, chumichi hichamukañesheli Yehova kushikija nkeñelu yindiku. Wahimpili njila mwatela kushikijilayi nkeñelu yindi. Hohenohu, wafuukwilihu kushaku Wanta wamwiwulu wakashikija yuma yafuukwiliyi dehi hakusambila kuyilila antu niiseki.—Mat. 25:34. w23.10 20 ¶6-7

Yehova nateli kutukwasha kubula kuzeya. Hadaha mpinji jikwawu chinateli kutukalila, sweje-e neyi tunatwalekihu kulwisha nakuzeyazeya kwokumu hadi mpinji yayilehi. Mpinji jikwawu, kuzeyazeya kwetu kunateli kumwekana neyi kunasweji kubadika kwadiña nakapostolu Petulu. Ilaña Yehova nateli kutwinka ñovu kulonda tubuli kuzeya. (Mas. 94:​18, 19) Chakutalilahu, manakwetu wumu welili wutumwa hadi yaaka yayivulu henohu kanda adizi chalala. Walekeli chikupu ayina yilwilu yatama. Hela chochu, mpinji jikwawu wakabakeneña nayitoñojoka yatama. Chumanyi chamukwashili kubula kuzeya? Walumbulwili nindi: “Yehova watukoleshaña.” Wabombelelihu nindi: “Spiritu yaYehova . . . , yinankwashi kwiluka nami tunateli [kutwalekahu] kwila yuma kwesekeja nachakeñañayi Yehova . . . Yehova natwalekihu kunzatisha, nawa hela chakwila naluwañeshaña natwalekihu kunkolesha.” w23.09 23 ¶12

Enu amanakwetu atwansi, himukushikena dakwikala iyala mukaKristu wapamaku. Tondenuña antu imwatela kwimbujola akweti yilwilu yayiwahi, ikalenu nawuswa wakutoñojoka chiwahi, ashindamenewa, ilukenu yuma yinateli kuyikwasha nawa diloñeshelenu chadimu kuzata nyidimu yimwakekala nayu kumbidi. Mpinji jikwawu, munateli kwakama neyi mutoñojoka hanyidimu yimwakekala nayu kumbidi. Ilaña munateli kutwesha kuyizata. Anukenu nenu Yehova nakufwila chikupu kuyikwasha. (Isa. 41:​10, 13) Hela chochu, amanakwenu niahela muchipompelu niwena akuyikwashaña. Neyi mushikahu chikupu kwikala iyala mukaKristu wapama, mukwikala namuzañalu muchihandilu chenu nawa yuma yikuyiwahilaña. Enu amanakwetu atwansi, twayikeña! Yehova ayikiswileña chikupu hampinji yimunakuzata nañovu kwikala amayala akaKristu apama. w23.12 29 ¶19-20

Fwikijenu munapompi hamu nawamanakwenu niahela nakudiila hamu. Munakudiluñishila hamu nawa mukwata nimwevulu wumudihu wejima wenu. Kuhiñahu, mukwatilahu nyevulu yikwawu yiyedi, hadaha mwevulu watachi wukuwaha wanyi. Ichi dinu munekali dehi nanyevulu yisatu. Ilaña hamwevulu wumu, mumona nenu manakwenu wumu natumbi chimwemweta wanyi. Dichi muwujima muloña mudi nanyevulu yikwawu yiyedi munatumbiwu antu ejima chimwemweta, kushilahu ninowu manakwenu. Kakavulu twanukaña mpinji jajiwahi jitwadiluñishili nawamanakwetu niahela. Ilaña twili netu mpinji yimu haniji mpinji, manakwetu hela muhela wahosheli hela kwila chuma chatuneñesheli. Chumanyi chitwatela kwila nanochu chuma chitunakwanuka? Tunateli kujima chumichi muyitoñojoka yetu neyi chitunateli kujima mwevulu wumu hakachi kanoyu nyevulu yitunakwati. (Efwe. 4:32) Tukutwesha muloña tudi nayuma yayiwahi yayivulu yitwatela kwanuka yitwadiluñishili nanowu manakwetu hela muhela. Iyi diyuma yitwatela kwanukaña nikulemesha. w23.11 12-13 ¶16-17

Mazu achiGiriki azatishawu haniyi nsona, amwekeshaña nawu mumbanda mukaKristu watela kuvwala yakuvwala yakavumbi nawa watela kutoñojokelaku akwawu chamonañawu yuma yavwalañayi. Twatiyaña kuwaha nankashi chavwalañawu nakalemesha ahela akaKristu apama! Chilwilu chikwawu chatela kumwekeshawu ahela akaKristu ejima apama, hichilwilu chakashinshi. Kashinshi hichumanyi? Hichilwilu chatukwashaña kufuukula chiwahi, dikwila nawu, hiwuswa watukwashaña kwaambula yuma yayiwahi nayatama, kuhiñahu dinu hitukutondahu kwila chuma chachiwahi. Talenu chuma cheliliyi Abigayili. Nfumwindi wafuukwili chuma chatama chadi kuletesha chisaka chindi chejima kwikala mukukala kweneni. Abigayili washikeneni kwilahu chuma. Chineli wafuukwili chiwahi, wamwinini mawumi amavulu. (1 Sam. 25:​14-23, 32-35) Kashinshi katukwashaña cheñi kwiluka mpinji yakuhosha nimpinji yakumwena. Nawa katukwashaña kwiluka mwakukumina hampinji yitunakudikunda nawantu amakwawu.—1 Tes. 4:11. w23.12 20 ¶8-9

Kapostolu Pawulu wasonekeleli chipompelu chamuRoma awa mazu. Amanakwetu niahela amunidi iluña amwilukili Yehova niYesu, ekalili nachikuhwelelu nawa ekalili akaKristu. Dichi Nzambi ‘wayiteneni nindi aloña muloña wachikuhwelelu,’ nawa wayiwayishili naspiritu yajila. (Rom. 5:1) Mwamweni, ekalili nakuchiñeja kwakuwahi. Mukuhita kwampinji, Pawulu wasonekeleli akaKristu awayishewa amuEfwesesa kutalisha hakuchiñeja kwayitambikililiwu. Iku kuchiñeja adiña nakukutambwila kudi “akakujila kwikala wuswana wawu.” (Efwe. 1:18) Nawa Pawulu wayilejeli cheñi aKolosi kwakatambwilawu kuchiñeja kwawu. Wakuteneni nindi “[kuchiñeja] kunayihembeliwu mwiwulu.” (Kol. 1:​4, 5) Kufuma hayina mpinji, kuchiñeja kwawakaKristu awayishewa kudi kwakwila nawu ayisañwilaña kuwumi wahaya nyaaka mwiwulu, mwakayuulañawu hamu naKristu.—1 Tes. 4:​13-17; Chim. 20:6. w23.12 9 ¶4-5

Izu dadeni kwafumishiliwu izu dakwila nawu “kuhemba,” adizatishileña hakutena amashidika ahembeleña musumba nakuwukiña kulonda abuli kuwulukuka. Antu adiña muniwu musumba wahembeleñawu akaamineña mukuwunda, muloña elukili nawu kwadiña amashidika ahembeleña kuyenzelu. Munjila yoyimu, neyi kuwunda kwaNzambi kuhemba nyichima yetu niyitoñojoka yetu, twekalaña awunda nanochu chituneluki netu twakiñewa. (Mas. 4:8) Neyi chamwekeni kudi Hana, hela chakwila kukala kutunakumona hikunateli kushikena kumana hohenohuku, tunateli kwikala nakuwunda. (1 Sam. 1:​16-18) Nawa neyi twikala nakuwunda, kakavulu chatupelelaña kutoñojoka chiwahi nikufuukula mwamuwahi. Chumanyi chitwatela kwila? Neyi munakuhita mukukala, mutambikenu Yehova ayihembi, neyi chamutambikileñawu nhembi kunyima. Munateli kwila ñahi mwenimu? Lombenuña sampu munatiyi nenu mudi nakuwunda kwaNzambi. (Luka 11:9; 1 Tes. 5:17) Neyi munakumona kukala kudi kwejima, lombenuña chakadi kuzeya, nawa mukumona kuwunda kwaYehova chikukuhembaña muchima wenu niyitoñojoka yenu.—Rom. 12:12. w24.01 21 ¶5-6

Hakwila ajiliki ijina daTata yindi, Yesu womikili makabisha ejima, kasawuntu ninsañu yamutwambilileñawu. Welukili nindi wamwovwahilili Tata yindi muyuma yejima, kwosi chuma chamutiyishili nsonyiku. (Heb. 12:2) Welukili cheñi nindi Satana wadiña nakumulukuka hatooka haniyi mpinji yakala. (Luka 22:​2-4; 23:​33, 34) Chakadi nikujina, Satana wakeñeleña kufumpa kashinshi kaYesu, ilaña wakañenyi chikupu! Yesu wamwekesheli hatooka nindi Satana hisakutwamba muneni nawa nindi Yehova wukweti ambuñindi ashinshika, atwalekañahu kwikala ashinshika hela chakwila anakumona kukala kwamuchidinyi! Munakukeña kumutiyisha kuwaha Mwanta wenu wunakuyuula? Twalekenuhu kushimeka ijina daYehova nakukwasha antu kumwiluka Nzambi yetu neyi chochekalayi. Neyi mwila mwenimu, dikwila nawu munakulondela mumahaji aYesu. (1 Pet. 2:21) Kufwana Yesu, munakumuzañalesha Yehova nawa munakumwekesha nenu mukankunyi Nindi, Satana, hisakutwamba wabadika! w24.02 11-12 ¶11-13

Hadi yaaka yitanu yinahitihu, antu amavulu nankashi anapapatishewi nakwikala aYinsahu jaYehova. Neyi mudihana enu aweni kudi Yehova, munafuukulihu kwikala kambanji kaYesu Kristu nikutwamijaku kwila nkeñelu yaNzambi muchihandilu chenu. Chumanyi chimwatela kwila hakwila mwiikali mukaKristu wadihana? Yesu wahosheli nindi: “Neyi muntu nakukeña kunlondela, adibondi yomweni.” (Mat. 16:24) Mazu achiGiriki abalumunawu nawu “adibondi yomweni” anateli kuyibalumuna cheñi nawu “kubula kudihandila eyi aweni.” Chineli mudi kambuña aYehova wadihana, mwatela kukaana yuma yejima yamuneñeshaña Yehova. (2 Kor. 5:​14, 15) Kwila mwenimu munabombeli kukaana “nyidimu yakumujimba,” chidi neyi wuvumbi. (Ñal. 5:​19-21; 1 Kor. 6:18) Komana kwovwahila iji nshimbi kukusha chihandilu chenu mumpompa? Kukusha chihandilu chenu mumpompa wanyi neyi chakwila mwamukeña Yehova nawa munakuhweleli nenu mukwovwahila nshimbi jindi mukufuma yuma yayiwahi.—Mas. 119:97; Isa. 48:​17, 18. w24.03 2 ¶1; 3 ¶4

Yehova wenkaña spiritu yindi yajila antu atiyañayi kuwaha. (Mat. 12:18) Tunateli kudihula netu, ‘Komana namwekeshaña yilwilu yanyikaabu yaspiritu yaNzambi muchihandilu chami?’ Komana munakumona nenu chayinu mpinji munakudiwunjika nankashi nawantu kubadika chimwadiña henohu kanda mumwiluki Yehova? Kafwampi, neyi mumwekeshaña chikupu nyikaabu yaspiritu yaNzambi, dihimukusweja kwiluka nenu Yehova nakuyitiya kuwaha! Yehova wamonaña kulema kwakuzatisha ifutu danyiloña hakukwasha antu atiyañayi kuwaha. (1 Tim. 2:​5, 6) Indi neyi tuchidi kutiya netu Yehova watutiyaña kuwaha wanyi, hela chakwila twakuhwelela mwifutu danyiloña nawa twapapatishewa? Anukenuña nenu, hitwatela kukuhwelela mpinji yejima chitwatiyañaku, ilaña twatela kumukuhwelela Yehova. Antu akuhwelelaña mwifutu danyiloña, wayimonaña nindi aloña kumesu indi nawa wayikana nindi wukuyikiswilaña.—Mas. 5:12; Rom. 3:26. w24.03 30 ¶15; 31 ¶17