December

Komana Yehova wukweti ñovu yakusañula antu afwa dehi? Eña! Yena diyi “Wañovu Jejima.” (Chim. 1:8) Dichi wukweti ñovu yakushinda chilumbu wudi wejima, kushilahu nikufwa. (1 Kor. 15:26) Chuma chikwawu chaleteshaña twiluki netu Nzambi nateli kusañula antu afwa dehi chidi chakwila nawu havulamenañaku. Watambikaña tutumbwa twejima hamajina. (Isa. 40:26) Cheñi, wanukaña antu afwa dehi. (Yoba 14:13; Luka 20:38) Nateli kushikena kwanuka yuma yejima kutalisha hadi owu antu akasañulayi, kushilahu mmwekenu yawu, yilwilu yawu, yuma yamweniwu muchihandilu niwuswa wawu wakwanuka yuma. Chakadi nikujina, tunateli kukuhwelela muchikaninu chaYehova chakusañula antu kumbidi muloña tuneluki netu wafwilaña kwilamu nawa wukweti ñovu yakushikija munakaniyi. Talenu chuma chikwawu chikuletesha tukuhweleli muchikaninu chaNzambi chahosha hakusañuka: Muloña Yehova wasañulahu dehi antu. Kunyima, wayinkeli amayala antesha ashinshika ñovu, kushilahu niYesu, yakusañula afu. w23.04 9-10 ¶7-9

Neyi tuhosha mukubabala nawa namuchima wawovu, antu anateli kwikala nampwila yakututiyilila nawa tukutwalekahu kuhanjeka nawu. Hela chochu, neyi muntu nakukeña hohu kutaadeka nanetu indi kwiji kusekesha yuma yitwakuhwelela, hitwatela kutwalekahu kuhanjeka nindiku. (Yish. 26:4) Ilaña antu amakwawu hiyanateli kwikala neyi iwuku; kafwampi, amavulu anateli kutiyilila. Mwamweni, mwafumaña yuma yayiwahi chikupu neyi tufwilaña kwikala ovwaha. Lombenu kudi Yehova ayinki ñovu yimunakukeña kulonda mutwalekihu kwikala ovwaha hampinji yimunakwakula antu anakwihula malwihu anateli kuleta ntaadi hela kuyinka nyiloña. Anukenu nenu neyi mwikala nachilwilu chakwovwaha, munateli kukañesha kwaambokelamu kwayitoñojoka yenu kuleteshi mataadi. Nawa neyi mwakula namuchima wawovu ninakalemesha, munateli kuletesha antiyilili amakwawu kuhimpa yitoñojoka yawu kutalisha hachatumonañawu nichamonañawu nsañu yamuBayibolu. “Mpinji yejima ikalenu adiloñeshela chadimu [kuhakwilaku]” yuma yimwakuhwelela, “mwileña mwenimu namuchima wawovu nikalemesha chikupu.” (1 Pet. 3:15) Dichi, mwekeshenu nenu mwakola kuhitila mukwikala ovwaha! w23.09 19 ¶18-19

Talenu yuma yiwana mutwatela kumwekeshela kudiwunjika. Chatachi, muntu wadiwunjika wazuwaña swayi wanyi. Wazataña nañovu kwikala wadiwunjika nikubula kufuntisha katama neyi anamuvuloki hela kubula kwila chuma chatama neyi kudi chuma chinakumwakamisha. (Kwid. 34:6) Chamuchiyedi, muntu wadiwunjika wachiñililaña nakudiwunjika. Neyi chuma chinakutalilayi chishimbula, muntu wadiwunjika watondolwelaña kwila yuma lufuchi hela kuhilashana. (Mukwa. 7:8) Chamuchisatu, muntu wadiwunjika helaña yuma mulufuchiku. Neyi muntu wadiwunjika wukweti mudimu walema wunakukeñayi kuzatilahu, hanyakalaña kuwutachika; hela kuwumanisha swayiku. Ilaña, wekalañaku nampinji yeneni yakutoñojokahu chakuwuzata. Kuhiñahu wazataña mudimu windi mumesu awunda. Chamuchiwana, muntu wadiwunjika wazataña nañovu kuumika kukala chakadi kutooba. Wazataña nañovu kutwalekahu kuumika chakadi kumwekesha nindi nakuhita mukukala. (Kol. 1:11) Etu akaKristu twatela kumwekesha kudiwunjika muniyi yuma yejima. w23.08 20-21 ¶3-6

Chuma chacheni chikuletesha tukiñeña muchima wetu wachifwikija, chidi chakwila nawu Yehova washinshikaña mumuchima wetu. Chumichi chatalisha mukwila nawu wamonaña yuma yakañanyañawu kumona antu hadi etu nawa watwiluka chiwahi chitwekala mumuchima. Wukutukeña neyi tutoñojokaña hamaana indi anateli kutukwasha kushakama haya nyaaka. (Yow. 4:14) Neyi twilaña mwenimu, hitwakamona kukala kwafumaña muyilwilu yatama nimumakudi aSatana nikaayi kindiku. (1 Yow. 5:​18, 19) Chitukuswinaña kwakwihi naYehova, tukuswejaña kumukeña nikumulemesha. Chineli hitunakukeña kumuneñesha Tata yetuku, tukuhela niyitoñojoka yakufwila kukoña nshidi. Muhela Marta wakuCroatia wadiña mukweseka kwakwila wuvumbi, wasonekeli nindi: “Chankalilileña kutoñojoka chiwahi nikukañesha yitoñojoka yakufwila kwila chuma chatama chakudiluñisha hohu hakapinji kantesha. Ilaña kumutiya Yehova woma dikwankiñili.” Kumutiya Nzambi woma kwamukiñili ñahi? Muhela Marta wahosheli nindi watoñojokeli hayuma yatama yinateli kufumamu neyi afuukula chatama. Ninetu dichitunateli kwila. w23.06 20-21 ¶3-4

Yesu welukili nindi nkeñelu yaYehova yekala yakujilika ijina Dindi, dikwila nawu kufumishahu makudi ejima amutwambilañawu. Dimuloña waweni Mwanta wetu chadizishililiyi akakumulondela nindi alombeña nawu: “Tata yetu wekala mumawulu, ijina deyi diikali dajila.” (Mat. 6:9) Yesu welukili nindi ichi dichuma chalema chatela kwila yileñaleña yejima. Kwosi muntu hela kañelu wajilikahu dehi ijina daYehova chikupu kubadika Yesuku. Hela chochu, Yesu chamukwatiliwu, muloñanyi wamutwikileñawu kudi ayilumbu jindi? Nawu himukakuhosha kasawuntu! Chakadi nikujina, Yesu watoñojokeli nindi kuzatisha chatama ijina Tata yindi dajila hela kuditwambila hinshidi yeneni chikupu. Wakameneni nankashi nindi akumutwambila nikumwinka muloña nawu himukakuhosha kasawuntu. Hadaha dichuma chacheni chaletesheli Yesu “[akabakani] nankashi nachikela” hikwashalili maora antesha nakumukasa.—Luka 22:​41-44. w24.02 11 ¶11

Mulufuchi lwetu lwakuwumi, twatela kumukeña Yehova niYesu kubadika antaña jetu. (Mat. 10:37) Hela chochu, chumichi hichinatalishi mukwila nawu twatela kudiwula nyidimu yitwatela kuzata muchisaka neyi kwiji iyi yuma yinakutukañesha kumutiyisha Nzambi niKristu kuwahaku. Kwambukaku, hakwila tumutiyishi Nzambi niKristu kuwaha, twatela kuzata mudimu wutukweti muchisaka. (1 Tim. 5:​4, 8) Neyi twila mwenimu, tukwikala namuzañalu chikupu. Kafwampi, Yehova weluka nindi yisaka yikwikala namuzañalu neyi eyala namumbanda adikeña nikudilemesha, neyi anvwali akeña anyanawu nikuyidizisha, nawa neyi anyana ovwahilaña anvwali jawu. (Efwe. 5:33; 6:​1, 4) Chili mudi iyala, mumbanda hela mwana, kuhwelelenu maana amuBayibolu chatela mushindameneña hayitoñojoka yenu, chisemwa hela hayuma yahoshaña antu adiza chikupu. Zatishenuña nyikanda yetu yashindamena haBayibolu. Muniyi nyikanda mwekala yuma yikuyikwasha kwiluka chakuzatisha yishina yamuBayibolu. w23.08 28 ¶6-7

Mumbanda mukaKristu watela kwiluka yuma yinateli kumukwasha. Yuma yikwawu yadizañayi kansi wamumbanda kuwansi yatwalekañahu kumukwasha muchihandilu chindi chejima. Chakutalilahu, ilukenu kutaña nikusoneka chiwahi. Muyisemwa yikwawu, amonaña nawu chalema wanyi ambanda kwiluka kutaña nikusoneka. Ilaña, chalema mukaKristu wejima kwiluka kutaña nikusoneka. (1 Tim. 4:13) Dichi bayi mwiteja chuma chidi chejima chiyikañeshi kwiluka kutaña nikusoneka chiwahiku. Yumanyi yayiwahi yinateli kufumamu? Kutaña nikusoneka chiwahi kukuyikwasha kuwana mudimu nikutwalekahu kuwuzata. Mukwikala kadizi nawa ntañishi Wezu daNzambi wamuwahi. Chasweja kulema, mukuswina kwakwihi naYehova hampinji yimukutañaña Izu dindi nikutoñojokahu chikupu.—1 Tim. 4:15. w23.12 20 ¶10-11

Mulombenuña Yehova ayikwashi mukaani kweseka. Chineli tudi antu abula kuwanina, twalwishaña nakweseka kwakukeña kwila yuma yatama. Satana nakuzata nañovu kulonda atuleteshi tufwileña chikupu kwila yuma yatama. Njila yimu mwafwilañayi kuluwañeshela yitoñojoka yetu hikuhitila muyisela yatama. Iyi yisela yinateli kutukojeja kutachika kutoñojoka hayuma yatama, yuma yatamishaña wuntu wetu wamukachi nawa yikutuletesha tukoñi nshidi yasweja. (Maku 7:​21-23; Yak. 1:​14, 15) Hakwila tukaani kweseka kwakwila yuma yatama, twakeñekaña wukwashu waYehova. Mukulomba kwachitalilu, Yesu wabombelelimu iyi yuma nindi: “Bayi wututwala mukwesekaku, ilaña twamwini kudi watama.” (Mat. 6:13) Yehova wakeñaña kutukwasha, ilaña twatela kumulomba hakwila atukwashi. Twatela cheñi kwila yuma kwesekeja nachitunalombi. w23.05 6-7 ¶15-17

Neyi adisumbula alemeshaña wubwambu wawu naTata yawu wamwiwulu, chayipelelaña kulondela kufumba kwindi, nawa chumichi chinateli kuyikwasha kutondolwela nikumanisha kukala kunateli kuletesha kukeña kwawu kukehi. Antu apama kuspiritu afwilaña cheñi kumwimbujola Yehova nikwikala nayilwilu yamwekeshañayi, chidi neyi luwi, kudiwunjika nikwanakena. (Efwe. 4:32–5:1) Adisumbula amwekeshaña yilwilu yamuchidiwu, kukeña kwawu kwaswejelañaku. Muhela Lena wunashakami muwulu hadi yaaka kubadika 25, wahosheli nindi, “Chekalaña chaswayi kukeña nikulemesha muntu wapama kuspiritu.” Talenu ichi chakutalilahu chamuBayibolu. Yehova hatondeleñayi adisumbula akekala anvwali jaMesiya, watondeli aYosefu naMariya hakachi kawantu amavulu akumutaña waDavidi. Muloñadi? Wejima wawu adiña nawubwambu wakola naYehova, nawa Yehova welukili nindi akumutwamijañaku muwulu wawu. w23.05 21 ¶3-4

Hela chakwila Nlomboli yetu, Yesu, wawanina, ana azatishañayi kulombola hanu hamaseki awanina wanyi. Chinateli kutukalila kuyovwahila, sweje-e neyi atuleja kwila chuma chitunakubula kukeña kwila. Kapostolu Petulu niyena mpinji yimu chamukalilili kwovwahila. Hampinji yamulejeleñawu kudi kañelu nawu yadii anyama amweneñawu nawu amajilu muNshimbi jaMosi, Petulu wakaanini, bayi neyi kamu hohuku, ilaña kapampa kasatu! (Yilw. 10:​9-16) Muloñadi? Nshimbi yayiha yamwinkeliwu yamulumbulukilili wanyi. Hela chochu, kapostolu Pawulu wovwahilili akulumpi akaKristu muYerusalema amulejeli nawu asendi amayala awana nakuya kutembeli kulonda akaditookeshi yomweni kwesekeja nanshimbi nakumwekesha nindi wadiña nakwovwahila Nshimbi. Pawulu welukili nindi akaKristu hiyakeñekeleña kwovwahila ayina Nshimbiku. Nawa hakoñelihu chiluwaku. Hela chochu, “Ifuku dalondelelihu, Pawulu wasendeli owu amayala nawa waditookesheli yomweni hamu nawu kwesekeja nanshimbi.” (Yilw. 21:​23, 24, 26) Pawulu chovwahililiyi, waleteli kunuñañana.—Rom. 14:​19, 21. w23.10 10 ¶15-16

Hadaha munateli kutoñojoka wanyi nenu woma hichilwilu chalema chimwatela kwikala nachu hakwila mwiikali amabwambu amawahi. Hela chochu, ana anakukeña kudikunda chikupu naYehova atela ‘kumutiya woma.’ Hichikweti muloña nakuvula kwayaaka yitunamukalakeli Yehovaku, wejima wetu twatela kutwalekahu kumutiya woma. Hanu dinu kumutiya Nzambi woma kwatalisha mudihi? Muntu wamutiyaña Nzambi woma munjila yayiwahi wamukeña nawa hakeñaña kwila chuma chidi chejima chinateli kuluwañesha wubwambu windi nayenaku. Yesu wadiña naniwu woma “wakumutiya Nzambi woma.” (Heb. 5:7) Hamuchiinineña Yehovaku. (Isa. 11:​2, 3) Ilaña, wamukeñeli nankashi nawa wafwilileña kumwovwahila. (Yow. 14:​21, 31) Kufwana Yesu, twamulemesha chikupu Yehova muloña wukweti kukeña, maana, wuñanji niñovu. Tweluka cheñi netu Yehova watukeña nawa wakamenaña nachitwelaña neyi tunatambwili nshimbi jindi. Tunateli kumuneñesha Yehova hela kuzañalesha muchima windi.—Mas. 78:41; Yish. 27:11. w23.06 14 ¶1-2; 15 ¶5

Mwanta Uziya chekaliliyi nawuswa, wavulameneni nindi Yehova diyi wamwinkeli wuswa wadiñayi nawu nawa diyi wamukwashili muyuma yejima yelileñayi. Chumanyi chitunakudizilaku? Tukwila chiwahi neyi tudanukishaña etu aweni netu, nkisu nikukooleka kutukweti jafuma kudi Yehova. Chatela tuditiyeña hayuma yituneli, twatela kumuhamekaña Yehova hayuma yejima yitwelaña. (1 Kor. 4:7) Twatela kudizoza nakwiteja netu twawanina wanyi nawa twakeñekaña kutubabesha. Manakwetu wudi nayaaka yamuma 60 wasonekeli nindi: “Nadizi kubula kuhila neyi akwetu anamoni chiluwa mudi ami. Neyi ananfumbi hatuyiluwa twanyanya tunakoñaña mpinji jikwawu, nafwilaña kuzatilahu nakutwalekahu kumukalakela Yehova kwesekeja nahanakumini ñovu jami.” Neyi tumutiyaña Yehova woma nikutwalekahu kwikala adizoza, tukwikala nachihandilu chamuzañalu.—Yish. 22:4. w23.09 10 ¶10-11

AkaKristu akusambila akeñekeleña kuumika. Hela chakwila amweneña kukala kwamweneñawu antu ejima, amweneña cheñi kukala kukwawu. Amavulu hakachi kawu ayikabishileña, bayi hohu kudi akulumpi jakwitiya kwawaYudeya niakawuswa amuRomaku, ilaña nikudi antaña jawu. (Mat. 10:21) Nawa muchipompelu, mpinji jikwawu adiña nakuzata nañovu kulonda abuli kuyiluwañesha kudi akakusekesha ninantañishilu yawu yakutwamba. (Yilw. 20:​29, 30) Hela chochu, awa akaKristu omikili. (Chim. 2:3) Omikili ñahi? Atoñojokeleña chikupu hadi antu ashimunawu muNsona, adi neyi Yoba. (Yak. 5:​10, 11) Alombeleña kulonda ayinki ñovu. (Yilw. 4:​29-31) Nawa ashili muchima hayuma yayiwahi yakafumamu neyi omika.—Yilw. 5:41. Ninetu tunateli kuumika neyi tudizaña nikutoñojoka chikupu hadi antu omikili ashimunawu Mwizu daNzambi nimunyikanda yetu. w23.07 3 ¶5-6

Yehova niYesu hiyamba katushiya nkawetuku. Hanyima yakumukaana Kristu, kapostolu Petulu wateleleli kufuukulahu chuma chalema. Komana wukuleka, tahindi wukutwalekahu kwikala kambanji kaKristu? Yesu walombeli nakulemba kudi Yehova nindi chikuhwelelu chaPetulu chakabuli kuzeya. Yesu wamulejelimu Petulu akuna kulomba nawa wamukuhweleleli Petulu nindi wakakolesha amanakwindi kumbidi. (Luka 22:​31, 32) Chatela chamukolesheleña Petulu chanukayi mazu aYesu! Neyi kudi chuma chalema chitunakukeña kufuukula muchihandilu chetu, Yehova nateli kuzatisha atubiña akamenaña kulonda atukoleshi tutwalekihu kwikala ashinshika. (Efwe. 4:​8, 11) Neyi chamwinkeleñawu Petulu niakwawu apostolu yuma yakumujimba kudi Yehova, ninetu wukutwinkaña yuma yitunakaankili neyi tutwamijañaku mudimu wakushimwina muchihandilu chetu. w23.09 24-25 ¶14-15

Yehova wamonaña nituyuma twanyanya tutwayililaña akwetu. Wamonaña nindi himulambu walema nawa himukudi wakafwetayi. Neyi mwadiñahu dehi nkoñi wakuzatila hela mukulumpi, Yehova wanukaña nyidimu yimwazatili nikukeña kwayisañumwini hakwila muzatiku oyu nyidimu. (1 Kor. 15:58) Wamonaña cheñi kukeña kumunatwalekihu kumwekesha. Yehova wakeñaña nindi wejima wetu tuswejeña kumukeña yena niakwetu antu. Tunateli kuswejelaku kumukeña Yehova neyi tutañaña Izu dindi nakutoñojokahu chikupu nikuhanjeka nindi mukulomba mpinji yejima. Tunateli kusweja kuyikeña amanakwetu neyi tuyikwashañaku munjila jashiyashana. Kukeña kwetu chikukuswejelañaku, tukuswina nankashi kwakwihi naYehova nikudi amanakwetu niahela. Nawa iwu wubwambu wetu wakatwalekahu haya nyaaka! w23.07 10 ¶11; 11 ¶13; 13 ¶18

MukaKristu wejima watela kudifuukwila njila yakumuukilamu. Nshimbi jantesha hohu jamuBayibolu, chidi neyi nshimbi jahosha hakutondolwela mashi nikupesha dijinateli kuletesha mukaKristu kutondolwela njila jikwawu jakumuukilamu. (Yilw. 15:20; Ñal. 5:​19, 20) Kutalisha hanjila jikwawu jakuukilamu, mukaKristu watela kudifuukwila yomweni. Hela chakwila tuneluki chikupu netu njila yimu yakuukilamu yayiwahi indi kwiji yatama, twatela kulemesha wuswa wawamanakwetu niahela wakudifuukwila njila yatela kuyuukilamu. Kutalisha haniyi nsañu, twatela kwanukaña iyi yikuma: (1) Wanta waNzambi hohu diwu wakooka antu chikupu. (Isa. 33:24) (2) MukaKristu wejima watela ‘kwiluka chikupu’ njila yakumuukilamu yinamoniyi nindi yayiwahi. (Rom. 14:5) (3) Hitwasompeshaña akwetu hela kusha chuma chakuyihukeshaku. (Rom. 14:13) (4) AkaKristu amwekeshaña kukeña nawa eluka nawu kunuñañana kwekala muchipompelu kwalema nankashi kubadika yuma yakeñañawu.—Rom. 14:​15, 19, 20. w23.07 24 ¶15

Komana mwalemesha wubwambu wumukweti naYehova? Chakadi nikujina, mwawulemesha! Kufuma tuhu kunyima, antu amavulu nankashi atiyaña neyi chimwatiyaña. (Mas. 104:​33, 34) Antu amavula adihanaña nakuleka kwilahu yuma yimu kulonda adifukuleña kudi Yehova. Dichelileña ninana adiña muIsarela wakushankulu ateneneñawu nawu aNaziri, hela muntu wunadihani. ANaziri adiña aIsarela adikita adihanineña kuleka kwilahu yuma yimu kulonda amukalakeleña Yehova munjila yadimena. Nshimbi jaMosi jetejeli iyala hela mumbanda kusanyika kudi Yehova kusanyika kwadimena kwakutondahu kwikala kaNaziri hakapinji. (Kuch. 6:​1, 2) Iku kusanyika hela kudikana kwajila mwabombeleli kwovwahila nshimbi jateleleli kubula kwovwahilawu aIsarela ejima. Hanu dinu, muloñadi kaIsarela chatondeleleñayi kusanyika kwikala kaNaziri? Iwu kaIsarela welileña mwenimu hadaha muloña wakumukeña Yehova chikupu nikumwekesha kusakilila hayuma yayiwahi yamwililiwu kudi Nzambi.—Kuhit. 6:5; 16:17. w24.02 14 ¶1-2

MuBayibolu, izu dachiHeberu dakwila nawu “kashinshi,” hela “kukeña kwakashinshi,” datalisha kukukeña kwabadika kwayimwekeshelañayi Nzambi ambuñindi. Izu dodimu adizatisha cheñi hakulumbulula kukeña kwadimwekeshelañawu ambuña aNzambi. (2 Sam. 9:​6, 7) Kashinshi ketu kanateli kuswejelaku mukuhita kwampinji. Tutalenu kashinshi kaDanyeli chikaswejeleliku. Danyeli wamweni kukala kwakuvulu muchihandilu chindi kwadi kuletesha abuli kwikala washinshika kudi Yehova. Ilaña kweseka kweneni kwamweniyi kwamwekeni hadiñayi muyaaka yamuma 90. Antu akuchota chamwanta amuheleli Danyeli nawa hiyamulemesheleña Nzambi kwadifukwileñayiku. Dichi akasili kafuta kakumujahilamu Danyeli. Ashiliku lushimbi lwakumweseka Danyeli neyi chakwila wukutwalekahu kwikala washinshika kudi Nzambi tahindi kudi mwanta. Chuma chadi kwilayi Danyeli chadi kumwekesha nawu washinshika kudi mwanta hikuleka kulomba kudi Yehova hadi mafuku 30. Danyeli wakaanini kufumpa kashinshi kindi kudi Yehova.—Dan. 6:​12-15, 20-22. w23.08 5 ¶10-12

Yehova wakeñaña nindi tutwalekeñahu kumwekeshela amanakwetu niahela kukeña. Neyi amanakwetu niahela atwila chuma chatama chinambukiku nachatela kwilayi mukaKristu, twatela kukuhwelela netu hiyelilamu hohuku, nawa netu anakufwila kwila chuma chahoshayi Yehova nindi chaloña. (Yish. 12:18) Nzambi wayikeña ambuña indi ashinshika hela chakwila aluwañeshaña. Neyi tunaluwañeshi hatushiyaña hela kutuhembela nkunyiku. (Mas. 103:9) Chalema nankashi ninetu kumwimbujola Tata yetu wanakenaña! (Efwe. 4:32–5:1) Anukenuña cheñi nenu, chineli kukuma kunakuswina kwakwihi, twatela kutwalekahu kudikunda chikupu nawamanakwetu niahela. Twatela kukuhwelela netu ikabisha dikuswejelañaku. Hadaha anateli kutukasa nimukaleya muloña wayuma yitwakuhwelela. Neyi chuma chamuchidiwu chitumwekena, twakakeñekaña nankashi wukwashu wawamanakwetu niahela.—Yish. 17:17. w24.03 15-16 ¶6-7

Munsona mwekala nsañu yahosha hadi atwansi aswinini kwakwihi naYehova, atiyileñayi kuwaha nawa adiña nachihandilu chamuzañalu. Davidi wadiña hakachi kawu. Hadiñayi kansi, watondelihu kwikala kukabadi kaYehova nawa nkumininaku, wekalili mwanta washinshika. (1 Anya. 3:6; 9:​4, 5; 14:8) Neyi mudizaña hadi Davidi, yuma yeliliyi yikuyikwasha kumukalakela Yehova nakashinshi. Hadaha munateli kudiza nsañu yayivulu yahosha hadi Maku hela hadi Timotewu. Mukwiluka nenu atachikili kumukalakela Yehova hadiñawu atwansi nawa Nzambi wayitiyileña kuwaha mumafuku akuhanda kwawu kwejima. Yuma yimwelaña chayinu mpinji diyamwekeshaña chakekala chihandilu chenu kumbidi. Neyi mumushindamena Yehova chatela mudishindameneña enu aweni, wukuyilombolaña. Mukwikala nachihandilu chamuzañalu nawa chachiwahi. Anukenu nenu, Yehova walemesha yuma yimwamwililaña. Kwosi njila yikwawu yimunateli kuzatishilamu wumi wenu kubadika kumukalakela Tata yetu wamwiwulu wukweti kukeñaku. w23.09 13 ¶18-19

Kapostolu Pawulu welukili nindi amanakwindi niahela akaKristu adiña antu abula kuwanina. Chakutalilahu, hatachikiliyi hohu kudikunda nachipompelu, amukuhweleleli wanyi. (Yilw. 9:26) Chimwahitili mpinji, amakwawu ahosheleña chatama hadi yena kumbadi kulonda atamishi ijina dindi. (2 Kor. 10:10) Pawulu wamweni mukulumpi wumu nakwila chuma chatama chadi kuhukesha antu amakwawu. (Ñal. 2:​11, 12) Nawa Maku ibwambu daPawulu adikundiliyi nindi nankashi, wamuneñesheli chikupu. (Yilw. 15:​37, 38) Muloña waniyi yuma yamwekeni, Pawulu wadi kutondahu kuleka kudikunda nawantu amuneñesheleña. Ilaña, watwalekelihu kulemesha amanakwindi niahela nikutwalekahu kumukalakela Yehova. Chumanyi chamukwashili Pawulu kutwalekahu kumukalakela Yehova? Pawulu wayikeñeli amanakwindi niahela. Chineli Pawulu wayikeñeli amanakwindi, washileña muchima hayilwilu yawu yayiwahi bayi hayiluwa yawuku. Kukeña kwamukwashili cheñi Pawulu kwila yuma Yinashimuniwu munsona yalelu. w24.03 15 ¶4-5

MuBayibolu mwekala nsañu yayivulu yamwekeshaña kwikala ovwaha chikwalemena. Talenu nsañu yahosha hadi Isaka. Chatachikiliyi kushakama mwiluña dawaFilisitinu daGerari, antuñinindi adiña nalwisu amukaanishili kuzatisha mashima apundiliwu kudi ambuña atata yindi. Chatela alwishi nakutambula mashima indi, Isaka wabuukishili chisaka chindi nakuya kwacheñi nawa wapundili mashima acheñi. (Kutach. 26:​12-18) Ilaña aFilisitinu ahosheli nawu menji adiña munidi iluña niwena adiña awu. Hela chochu, isaka welili yuma mukuwunda. (Kutach. 26:​19-25) Chumanyi chamukwashili kutwalekahu kwikala wovwaha hela chakwila antu atwalekelihu kumuvuloka? Chakadi nikujina, wamweni chelileña anvwali jindi, wadizilili chikupu kudi Abarahama chelilileñayi yuma mukuwunda nikudi Sara chadiñayi “[naspiritu] yakuwunda nikwovwaha.”—1 Pet. 3:​4-6; Kutach. 21:​22-34. w23.09 15 ¶4

Yehova watemesheli Mwanindi wawedi hamaseki nakudizisha antu haWanta nikuhana wumi windi kulonda atukuuli kunshidi nikufwa. Kuhiñahu, Yesu amusañwili nakufunta mwiwulu nakuyuula hamu neyi Mwanta waWanta waNzambi. Nsañu yayeni yahoshañahu Bayibolu yidi yakwila nawu ijina daYehova akadijilika hampinji yakashikijañayi chuma chafuukwilayi iseki kuhitila muWanta windi wakayuulañawu kudi Kristu. Kwosi wunateli kuhimpa nkeñelu yaYehovaku. Washiika nindi yuma yejima yakamwekana kwesekeja nachahoshayi. (Isa. 46:​10, tth.; Heb. 6:​17, 18) Mukuhita kwampinji, iseki akadibalumuna kwikala paradisa mwakashakamaña anyana kaAdama naEva awanina nawa aloña owu “[akadiluñishaña] nawumi haya nyaaka.” (Mas. 22:26) Ilaña, kudi chuma chikwawu chabadika chafwilañayi Yehova kwila. Chuma chacheni chafwilañayi kwila hikunuñañesha ambuñindi ejima mwiwulu nihamaseki. Nkumininaku, ejima akahandaña akamwovwahilaña Yehova hamu neyi Nyuuli yawu Wabadika. (Efwe. 1:​8-11) Komana chayihayamishaña wanyi hakwiluka njila yayiwahi yazatishañayi Yehova hakushikija nkeñelu yindi? w23.10 20 ¶7-8

AYudeya afumini muBabiloni chashikiliwu kuYerusalema, atachikili kukabakana muloña wakukala kwayuma muchihandilu, nsañu jamapolitiki kushilahu niikañesha. Dichi amakwawu chayikalilileña kusha muchima hakutuñulula tembeli yaYehova. Muloña wachumichi, Yehova watemesheli atuprofwetu indi ayedi, aHagayi naZekariya, kulonda asañumuni antu kwikala cheñi namuchima wakuzata mudimu windi, chumichi chakwashili chikupu antu. (Hag. 1:1; ZeK. 1:1) Hela chochu, chimwahitili yaaka kwakwihi na 50, ana aYudeya atachikili cheñi kuzeya. Ezera, mukakukopolola Nshimbi welukisha chikupu, wafumini kuBabiloni nakwinza kuYerusalema nakukolesha antu jaNzambi kulonda asambileña kulemesha kudifukula kwalala. (Ezera 7:​1, 6) Neyi chiwakwashileña wuprofwetu waHagayi niwaZekariya antu jaNzambi kunyima kutwalekahu kumukuhwelela Yehova mumpinji yamweneñawu ikañesha, ninetu wunateli kutukwasha kukuhwelela chikupu muwukwashu waYehova hela chakwila tunakumona kukala muchihandilu.—Yish. 22:19. w23.11 14-15 ¶2-3

Twayimwekeshelaña ñahi akwetu akakwitiya kukeña? Njila yimu yitwayimwekeshelañamu kukeña hikuyikundeja. “[Tukutwalekañahu] kudikundeja wumu namukwawu” neyi tuyitiyilaña akwetu wushona. (1 Tes. 4:18) Tunateli kutwalekahu ñahi kudikeña chikupu wumu namukwawu? Neyi tuzataña hakumina ñovu jetu kwanakena akwetu yiluwa yawu. Muloñadi chichalemena makonu kudimwekeshela kukeña chikupu wumu namukwawu? Talenu chuma chacheni chikuletesha chashimwiniyi Petulu, nindi: “Kukuma kwayuma yejima kunaswini dehi kwakwihi. Dichi, . . . dikeñenu chikupu wumu namukwawu.” (1 Pet. 4:​7, 8) Kukuma kwakanu kaayi katama chikunakuswina kwakwihi, kukalanyi kutwatela kukuhwelela kumona? Yesu wahosheleñahu dehi kutalisha hadi akakumulondela nindi: “Akayihela kudi nyuza yejima kukoola ijina dami.” (Mat. 24:9) Hakwila tutweshi kwimika mushindu iku kuhelañana, twatela kutwalekahu kwikala anuñañana. Neyi tuyimwekeshelaña amanakwetu niahela kukeña, Satana hakatwesha kutwambulaku, muloña kukeña dikwatunuñañeshaña chikupu.—Fwili. 2:​1, 2. w23.11 13 ¶18-19

Chalala chekala Mwizu daNzambi chikweti ñovu chikupu. Kuhitila mukuleja antu kulonda amwiluki Yehova nichekalayi, twamonaña yuma yayiwahi yafumañamu. Makudi aSatana aputishañayi nachu yitoñojoka yawantu, ayaña nakumana chovu-chovu nawa awa antu atachikaña kumumona Tata yetu wukweti kukeña neyi chitwamumonaña. Ahayamaña muloña wañovu yindi yabadika. (Isa. 40:26) Amukuhwelelaña muloña wanjila jindi joloka. (Kuhit. 32:4) Adizilañaku yuma yayivulu kumaana indi abadika. (Isa. 55:9; Rom. 11:33) Nawa akundejewaña hakwiluka nawu yena diyi kukeña. (1 Yow. 4:8) Hampinji yinakuswinawu kwakwihi naYehova, aswejelañaku kukuhwelela mukuchiñeja kwakushakama haya nyaaka neyi anyanindi. Kwenoku kukooleka kutukweti kwakukwasha antu kuswina kwakwihi naTata yawu! Neyi twila mwenimu, Yehova wukutumonaña nindi “tudi akakukalakala hamu [nindi].”—1 Kor. 3:5. w24.02 12 ¶15

Neyi munakudiza Bayibolu indi kwiji anvwali jenu ayihembaña hiyaYinsahu, komana munakutoñojoka kupapatishewa? Ichi hichuma chachiwahi nankashi chimwatela kwila! Hela chochu, henohu kanda mupapatishewi mwatela kusambila kudihana enu aweni kudi Yehova. Munateli kudihana ñahi kudi Yehova? Mukumukana mukulomba nenu mukudifukulaña hohu kudi yena nawa nenu mukutwamijañaku kwila nkeñelu yindi muchihandilu chenu. Mwamweni, munakumukana Yehova nenu mukutwalekahu kumukeña ‘namuchima wenu wejima, nawumi wenu wejima, nayitoñojoka yenu yejima ninañovu jenu jejima.’ (Maku 12:30) Mwatela kudihanina kwakankawenu, kumudi hohu enu naYehova. Kwambukaku, chipapatishu chekalilaña hadi antu amavulu, muloña chamwekeshaña kudi antu nawu munadihani kudi Yehova. Kudihana kwenu hichikaninu chajila, nawa mwatela kuchihemba neyi chakeñañayi Yehova nindi muchihembeña.—Mukwa. 5:4. w24.03 2 ¶2; 3 ¶5

Muwulu wejima mwekalaña kukala. Bayibolu yahosha hatooka nawu antu adi muwulu “akumonaña yihuñu.” (1 Kor. 7:28) Muloñadi? Muloña wulu waletaña hamu antu ayedi abula kuwanina, iwu wukweti yilwilu, yuma yakeñayi niyuma yahelayi yaambuka nayamukwawu. Antu ayedi anadisumbuli anateli kufuma kuyisemwa hela yitachi yaambuka. Hadaha mukuhita kwampinji, anateli kutachika kumwekesha yaaku yabulileña kumwekeshawu henohu kanda adisumbuli. Yuma yamuchidiwu yinateli kuletesha kubula kutiyañana muwulu. Chatela wejima wawu ayedi eteji nawu diwu anakuletesha kukala muwulu nawa azatili hamu nakukumanisha, akutachika kudinkamu nyiloña wumu namukwawu. Hadaha akutachika kumona nawu hakwila amanishi iku kukala atela kudaambula hela kudiseña. Komana kumanisha wulu dichuma chinateli kuyikwasha? Inehi. Yehova wakeñaña nindi antu adisumbula alemesheña ntanjikilu yawulu hela chakwila mwinikwawu wakalisha. w24.03 16 ¶8; 17 ¶11

Neyi munadihani nikupapatishewa, chimwatwalekelihu kudizilahu nsañu yikwawu nakupaminaku kuspiritu, mwaswejeleleñaku kukuhwelela chikupu muyuma yimwachiñejaña yahosha hakushakama haya nyaaka muparadisa hamaseki. (Heb. 5:13–6:1) Hadaha yuma yashimunawu haARoma 5:​2-4 yayimwekenahu dehi muchihandilu chenu. Mwamweni lukadi lwaluvulu, ilaña mwomikili nawa munamoni nenu Yehova wayitiyaña kuwaha. Chineli muneluki nenu Nzambi wayitiyaña kuwaha, ichi munaswejeliku kukuhwelela nenu mwakatambwila yuma yejima yakanayi. Munakukuhwelela chikupu muyuma yimwachiñejaña kubadika chimwakuhweleleli hakusambila. Ichi muneluki chikupu nenu, yuma yimwachiñejaña yakashikijewa. Chumichi chinakuyikwasha chikupu kuhimpa chihandilu chenu chejima nichimwelaña nachisaka chenu, chimwafuukulaña yuma, kushilahu nichimwazatishaña mpinji yenu. Kapostolu Pawulu wabombelelihu chikuma chalema nankashi kutalisha hakuchiñeja kumwekalaña naku hanyima yakuyitiya kuwaha kudi Nzambi. Wayikoleshaña nindi yuma yimwachiñejaña yakashikijewa.—Rom. 15:13. w23.12 12-13 ¶16-19

Neyi tunakuhita mukukala kweneni, hitunateli kutiya, kutoñojoka nikwila yuma neyi chitwelaña mpinji yejimaku. Tunateli kutiya neyi anakutulelujola kufuma kuniku kukala kweneni nakututwala kukukala kukwawu. Yehova watukwashaña ñahi neyi tutachika kukabakana nayitoñojoka yamuchidiwu? Watushiika nindi wukutukwashaña kwikala akiñewa. Neyi hakaluñalwiji hadi nvula yampepela, mbopolu yinateli kutachika kubenkañila. Hakwila akañesheña iku kubenkañila, mbopolu jajivulu ajituña natuyuma twakwashanaña twekala mumbanvu jejima jiyedi jambopolu nawa twajiyamaña mumenji. Itu tuyuma twaleteshaña mbopolu kubula kusweja kubenkañila, chumichi chaleteshaña antu adi muwatu kwikala akiñewa nikubula kwakama. Hela chochu, itu tuyuma twakwashaña mbopolu kubula kubenkañila, twazataña chiwahi neyi mbopolu yinakwenda. Munjila yoyimu, Yehova wukutukwashaña kwikala akiñewa neyi tutwalekañahu kumukalakela nakashinshi hampinji yitunakumona kukala kweneni. w24.01 22 ¶7-8

Neyi mutiya woma, dihulenu nenu, ‘Yumanyi yelayi dehi Yehova?’ Toñojokenu hayuma yaleñayi. Chakutalilahu, neyi ‘tushinshika chiwahi’ hachakamenañayi Yehova atuda ninkenu, yuma yabuliliyi kuleña muchifwanisha chindi nawa yabulaña kudifukula kudi yena, tukukuhwelela chikupu netu wukutwakamenaña ninetu. (Mat. 6:​25-32) Toñojokenu cheñi hayuma yayililayi dehi Yehova akakudifukula indi. Hadaha munateli kudiza hadi muntu ashimunawu muBayibolu wamwekesheli chikuhwelelu chikupu, indi kwiji munateli kutaña nsañu yayuma yamwekeni yakambuña aYehova wamakonu. Kubombelahu, toñojokenu hachayakamenahu dehi Yehova. Wayikokeli ñahi nakuyileta muchalala? (Yow. 6:44) Wakulaña ñahi kulomba kwenu? (1 Yow. 5:14) Mulambu waMwanindi akeñayi wunakuyikwasha ñahi hefuku-hefuku?—Efwe. 1:7; Heb. 4:​14-16. w24.01 4 ¶6; 7 ¶17