Kukwasha Antu Kukuyikwasha Kumanisha Wudi—Chahosha Bayibolu

Antu amavulu mukaayi anakukabakana nawudi nawa atiyaña neyi hiyakekalahu cheñi nawamabwambu akuhanjeka nawuku. Andotolu amakwawu ahoshaña nawu kukwasha antu diyi njila yimu yinateli kukwasha muntu kuleka kukabakana nawudi.

• “Kukwasha antu anakaankili kwakwashaña muntu kwikala namuzañalu nawa chafumañamu hatiyaña cheñi wudi hela kutiya neyi nashali nkawindiku.”—Dichahosheli mutayi waU.S. National Institutes of Health.

Bayibolu yatukwashaña kwiluka yuma yitwatela kwila hakwila nawu tukwashi akwetu. Kuzatisha yuma yashimuna Bayibolu kunateli kutukwasha nankashi kumanisha wudi.

Yuma yimwatela kwila

Ikalenu namuchima wakuhana. Ikalenuña nampinji yakuhanjeka nawantu, sweje-e kuhanjeka nawu mesu namesu. Ikalenu namuchima wakwinkahu akwenu yuma yimukweti. Chimwela mwenimu, chakadi nikujina akuyisakilila, nawa wubwambu wenu nawena wukukola hama.

• Chahosha Bayibolu: “Hanenuña, ninenu antu akuyinkaña.”—Luka 6:38.

Kwashenuña akwenu. Ikalenu nampinji yakukwasha akwenu anakukabakana. Munateli kwila mwenimu kuhitila mukuyitiyilila chinakuhoshawu hela kuyikwashaku kuzata tunyidimu.

• Chahosha Bayibolu: “Ibwambu walala wakwasha mukwawu mukukala kwejima.”—Yishimu 17:17, Bayibolu yaContemporary English Version

Neyi munakukeña kwiluka nsañu yayivulu yinateli kuyikwasha kukolesha wubwambu wenu nawakwenu, tañenu ichi chibaaba“ChaFamily Life and Friendships.”