Antu Anakuleta Madombu Muloña Anakukeña Kuhimpa Nfulumendi—Bayibolu Yahoshahu Nawudi?

Madombu anakusweja mukaayi muloña wakukeña kuhimpa jinfulumendi ichi chinakuletesha antu kwakana.

Chineli ajahili akulumpi 39 amumapolitiki nimadombu amwekeneña, chaletesheli antu amuMexico kukañanya kusakula chiwahi alomboli mu 2024.
Katataka muEurope mwadiña madombu amavulu nankashi, haMay 15, 2024 akeñeleña kumujaha mulopu wamwituña daSlovakia.
Antu muUnited States anakameni chikupu muloña wadiña kajiña mpata Donald Trump akeñeleña kumujaha haJuly 13, 2024.

Muloñadi akamapolitiki chinakuzuñilawu? Awa madombu akamana? Bayibolu yahoshahu nawudi?

Bayibolu yashimwineñahu dehi nawu antu akadambula muloña wamapolitiki

Bayibolu yashimwineñahu dehi nawu mumafuku etu, itwatenaña netu “mafuku akukuminina,” antu amavulu akekala nayilwilu yamadombu nikubula kutiyañana.

“Mumafuku akukuminina mwakekala mpinji jakala. Muloña antu akekala . . . abulaña kusakilila, abula kushinshika, . . . abulaña kukeña kutiyañana nawakwawu, . . . asweja kuzuwa, . . . akakufukejela akwawu, achinchika, akakudivwimba.”—2 Timotewu 3:1-4.

Bayibolu yashimwineñahu dehi nawu antu akadikañaña najinfulumendi nawa yikonkojola yakasweja mumafuku akukuminina. (Luka 21:9, tumazu twaheshina) Hela chochu, madombu nikudambula hikwakatwalekahuku.

Madombu awakamapolitiki chakamanawu

Bayibolu yashimuna nawu Nzambi wakafumishahu nfulumendi jawantu nakusinsishahu nfulumendi yindi yamwiwulu.

“Nzambi wamwiwulu wakashaku wanta. . . wakajilumuna nikujiyisha awa mawanta [amakwawu] ejima, nawa wena nkawawu diwu wakatwalekahu haya nyaaka.”—Danyeli 2:44.

Wanta waNzambi wakanuñañesha antu ejima nawa wakaleta kuwunda mukaayi kejima.

Nyuuli waniwu Wanta, Yesu Kristu, amutena nawu “Kalamba waKuwunda,” nawa wakazata nañovu kulonda ‘kuwunda kwakabuli kumana.’—Isaya 9:6, 7.
Nichayinu mpinji, antu akayuulawu kudi iwu wanta anakudiza chakushakama mukuwunda. Chikafumamu, Bayibolu yahosha nawu: “Mpoku jawu jatubali akajichila yitwa yakudima nachu nawa mayoña awu akayichila yitwa yakukunkula nachu. Muza hiwukanyamwina muza wukwawu mpoku yakabaliku, nawa hiyakadiza cheñi njitaku.”—Isaya 2:3, 4.

Neyi munakukeña kwilukilahu nsañu yikwawu, tañenu chibaaba chinakuhosha nawu “Yumanyi Yikela Wanta WaNzambi?” nawa talenu vidiyo yinakuhosha awu Wanta waNzambi hichumanyi?