Iseki Anakudikisa—Bayibolu Yahosha Nawudi?

António Guterres, secretary-general waUnited Nations, wahosheli mpanji yindi haIntergovernmental Panel kutalisha haKuhimpika kwaYilaka mulipoti yahaniniwu haApril 4, 2022, nindi: “Katataka tuhu yilaka yihimpiki. Nyisumba yamaneni yikwinzelamu. Maluña amakwawu akutata nankashi. Mpepela yanvula yakutiyisha woma. Kubula menji mumaluña amavulu. Nyitondu nianyama amavulu chikupu akujiya. Bayi neyi iku hikulumbisha nsañu hela kuyilebumunaku. Dichinatulejiwu akasayansi nawu dichuma chikumwekana katataka.”

Chipapilu chansañu chaThe New York Times, June 15, 2022, hansañu yahosheleña nawu “Mabaji muYellowstone, Chinjikijilu chaYuma Yikukeña Kumwekana,” chahosheli nawu: “Asayantisiti anakusoñamisha nawu yaaka yinakwinza kuhimpika kwayilaka kukakisaña yuma yayivulu kwakwihi namaluña 423 [muUnited States], sweje-e maluña aswejaña kutata nankashi. Iyi nsañu yakuchinisha antu ayitañaña neyi nsañu yamuBayibolu yahosha ha: kesi nidibaji, kusuñunuka kwamenji adikwata, tuluñalwiji tunakwinzala nikutata nankashi.”

Komana kukala kwakuhimpika yilaka hamaseki kwakamana? Neyi kwakamana, hinyi wakakumanisha? Talenu chahosha Bayibolu.

Kukisika kweseki akushimwineñahu dehi

Bayibolu yahosha nawu Nzambi wakajilumuna “antu anakukisañana iseki.” (Chimwekeshu 11:18) Iyi vasi yatudizishaña yuma yisatu:

1. 1. Yuma yelañawu antu yikakisañana iseki.

2. 2. Hiyakatwalekahu kukisañana isekiku.

3. 3. Nzambi, bayi antuku, wakamanisha yuma yinakukisañana iseki.

Iseki dikekala chiwahi kumbidi

Bayibolu yahosha nawu “iseki datwalekañahu haya nyaaka.” (Mukwakutañisha 1:4) Antu akatwalekahu kushakamahu.

• “Aloña akaswana iseki, nawa akashakamahu haya nyaaka.”—Masamu 37:29.

Iseki akadiwahisha nakwikala dadiwahi cheñi.

• “Isaña niituña dominina jakazañalala, nichana chachinkalampata chakazañalala nawa chakakenuka neyi safuroni.”—Isaya 35:1.