Bayibolu Yashimwineñahu Dehi Nawudi Hakutata Kunasweji muKaayi Kejima?

MuJuly 2022, ashimwini nawu kunakusweja kutata nankashi mukaayi kejima:

• July 25, 2022, CNN Wire Service, “Munyisumba yamaneni 70 muChina ashimwini nawu mwatata nankashi hepampa damuchiyedi mukanu kakweji hikwatatilili.”

• July 17, 2022, The Guardian, “Mwahita Europe mwadiña kesi kochaña masaña muloña wakusweja kutata.”

• July 24, 2022, The New York Times, “Nyisumba yayivulu muUnited States kanda yitateñahu dehi neyi chikwatatili hamulungu chelili mpepela yitata yishiki kuchikumu Kumusela nakutwala kukabeta kakuchidilu nikumujika chanti.”

Yuma yejimiyi yinatalishi mudihi? Komana Iseki dakabalumuka iluña dakwila antu kutwesha kushakamahu nehi? Bayibolu yashimunaña nawudi?

Komana Kutata kunakushikija wuprofwetu wamuBayibolu?

Eña. Kutata kudi mukaayi kejima kunashikija yuma yashimwineñahu dehi Bayibolu nawu yikamwekana munanu mafuku. Chakutalilahu, Yesu waprofweteli nindi twakamona “yuma yakutiyisha woma” hela “yuma yakala nawa yakutiyisha woma.” (Luka 21:11; Good News Translation) Kutata kunakumwekana mukaayi kejima kunaleteshi antu amavulu kutiya woma nawu antu akukisañana iseki.

Komana Iseki dakabalumuka iluña dakwila antu kutwesha kushakamahu nehi?

Inehi. Nzambi waleñeli iseki nindi hashakameña antu haya nyaaka. (Masamu 115:16; Mukwakutañisha 1:4) Waketeja wanyi antu kukisañana iseki, dichi “wakajilumuna antu anakukisañana iseki,” kwesekeja nachashiikayi.—Chimwekeshu 11:18.

Toñojokenu hawuprofwetu wuyedi wunakumwekesha yuma yikwawu yashiikayi Nzambi:

• “Isaña niituña dominina jakazañalala, Nichana chachinkalampata chakazañalala nawa chakakenuka neyi safuroni.” (Isaya 35:1) Nzambi haketeja iseki kwikala iluña dakubula kushakamamuku, ilaña wakawahisha maluña ejima anakisiwu.

• “Eyi wakamenaña iseki, nakudiletesha disoñeña nankashi nikwikala nawushi.” (Masamu 65:9) Nzambi wakakiswila iseki nawa dakekala paradisa.

Neyi munakukeña kwilukilahu nsañu yikwawu kutalisha hakushikijewa kwawuprofwetu wamuBayibolu wunakuhosha hakuhimpika kwanchilu, tañenu chibaaba chinakwila nawu “Climate Change and Our Future—What the Bible Says.”

Neyi munakukeña kwilukilahu jikwawu hayikaninu yamuBayibolu yakuwahisha yuma yejima talenu chibaaba chinakwila nawu “Who Will Save the Earth?”