Indi Bayibolu Yahoshahu Nawudi haChaaña Chasweja?

• “Ituña daChina dinashimuni nawu yinu nooña kunatati ‘nankashi’ nawa aka dikamuchisatu hichinamwekani.”—The Guardian, September 7, 2022.

• “Muchinu chaaka chamuchitanu matuña amakwawu muAfrica mukwikala chaaña chasweja nankashi.”—UN News, August 26, 2022.

• “Hadi yaaka 500 yinahitihu chinakumwekana neyi ichi mumatuña amavulu muEurope mukwikala chaaña chasweja nankashi chabula kumwekanahu dehi”—BBC News, August 23, 2022.

Akakusandujola amavulu anakuhosha nawu chaaña chidi neyi ichi chikutwalekahu nawa hadaha chikuswejelañaku. Komana iku kukala kwakamana? Indi Bayibolu yahoshahu nawudi?

Chahosha Wuprofwetu wamuBayibolu Kutalisha haChaaña

Bayibolu yashimwineñahu dehi yuma yikamwekana mumafuku etu nawu:

• “Mumaluña ashiyashana mwakakeha yakuda.”—Luka 21:11.

Kakavulu chaaña chaleteshaña yakuda kukeha. Kukeha kwayakuda, makabi nikufwa kwakojejañawu kudi chaaña, kwashikijaña wuprofwetu wamuBayibolu.—Chimwekeshu 6:6, 8.

Chuma chinakukojeja chaaña kuswejelaku

Bayibolu yashimuna chuma chacheni chinakuletesha chaaña kusweja. Yahosha nawu:

• “Muntu wunakwenda hakutwesha kwiluka nichakulombola ntampu jindiku.”—Yeremiya 10:23.

Dikwila nawu antu hiyakutwesha “kulombola ntampu [jawuku]” hela kudiyuula chiwahi awenawuku. Yuma yelañawu diyakojejaña chaaña nikukeha kwamenji.

• Asayantisiti amavulu etejaña nawu yuma yelañawu antu diyinakukojeja kutata nankashi mukaayi, chinakufumamu chaaña chinakuswejelaku.

• Nshimbi jakukeña kudihetesha aweni jiyashañaku chakadi kutoñojoka kukala kukenza kumbidi jakojejaña, nyitondu kukisika, mpepela kutama, kuzatisha chatama yileñaleña yaNzambi, nikutamisha menji.

Hela chochu, Bayibolu yashimunaña nawu iku kukala kwakamana.

Komana iku kukala kwakamana?

Bayibolu yashimuna nawu Nzambi wakamanisha kukala kwamenji kutunakumona. Wakakumanisha ñahi?

1. 1. Nzambi ‘wakajilumuna antu anakukisañana iseki.’ (Chimwekeshu 11:18) Wakafumishahu chuma chimu chakojejaña menji kukeha, antu atama, akweti lwisu akisañanaña yileñaleña.—2 Timotewu 3:1, 2.

2. 2. “Iseki dominina nankanza dakekala ijiya mudi mateti.” (Isaya 35:1, 6, 7) Nzambi wakawahisha yuma yejima yinakisiki nachaaña nawa wakabalumuna dinu iseki kwikala Paradisa yayiwahi mwakabulaña kuuma menji.

3. 3. “Eyi wakamenaña iseki, nakudiletesha disoñeña nankashi nikwikala nawushi.” (Isamu 65:9) Nzambi wakakiswila iseki nawa antu ejima akekala nayakuda yayivulu nimenji amawahi.