Nsañu Yakulozana Yinakumwekana Mukaayi Kejima—Bayibolu Yahosha Nawudi?

MuJuly 2022, mukaayi kejima mwadiña kudiloza:

•  HaJuly 10, 2022, chipapilu chansañu chaThe Japan Times, chashimwini nawu, “kufwa kwamuntu wakuJapan elukawu nankashi [wadiña Prime Minister Shinzo Abe] kwaneñesheli antu mwituña nawa kwahayamisha antu mukaayi kejima, sweje-e muloña wakwila muJapan mwekala nankashi wanyi yikonkojola yakulozana nawa mwekala nshimbi jakaanisha antu kwikala namaata.”

•  HaJuly 4, 2022, akakushimuna nsañu atenañawu nawu Reuters, ahosheli nawu, “antu mwituña daDenmark anañeñi nankashi chela iyala wumu yajahi antu asatu heluña dakulndila yuma daCopenhagen shopping mall.”

•  HaJuly 10, 2022, The Guardian ahosheli nawu, “muSouth Africa: antu 15 afwili hanyima yakwila amayala anatachiki kuloza mwiluña dakulandishila walwa muSoweto township.”

•  HaJuly 5, 2022, chikuzulemba chaCBS News, chashimwini nawu “HaJuly 4, muUnited States antu akubadika ha 220 ayilozeli nakuyijaha, hefuku dakunooka.”

Komana kutama kwamuchidiwu kwakamana? Bayibolu yahosha nawudi?

Madombu Akamana

Bayibolu yatena mpinji yitunakushamamu nawu “mafuku akukuminina,” mpinji yakwila mudi antu asweja kuzuwa, atama nyichima nawa aluwankana. (2 Timotewu 3:1, 3) Antu amuchidiwu akojejaña antu kushakama nawoma. (Luka 21:11) Hela chochu, Bayibolu yashimuna mpinji yakamana madombu nawa antu “akashakama mumaluña awunda, mumaluña akiñewa akushakamamu nimumaluña amwena akunookela.” (Isaya 32:18) Indi madombu akamana ñahi?

Nzambi wakafumishahu antu atama nawa wakajilumuna yitwa yanjita yejima.

•  “Ilaña antu atama, akayifumisha hamaseki.”—Yishimu 2:22.

• “ “[Nzambi] nakumanisha majita heseki dejima. Wakotolaña wuta wamukunji nikuchika iyoña; wochaña makalu anjita nakesi.”—Masamu 46:9.

Nzambi wakufumishahu yuma yayileteshaña antu kwikala namadombu kuhitila mukuyidizisha chakwikala awunda.

•  “Kumpidi yami yajila yejima hiyakakatishanaña hela kujilumunaku, muloña iseki dejima dakenzala nakwiluka kwakumwiluka Yehova neyi chabutaña menji hakaluñalwiji.”—Isaya 11:9.

•  Nichayinu mpinji, Nzambi nakudizisha antu mukaayi kejima kuleka madombu niyitwa yejima, anakuyichila, ‘mpoku jawu jatubali anakujichila kwikala yitwa yakudima nachu nawa mayoña awu anakuyichila yitwa yakukunkula nachu.’—Mika 4:3.

Neyi munakukeña kwilukilahu jikwawu kutalisha hayuma yashika Bayibolu hetuña dadiha mwakabula woma, tañenu chibaaba chinakwila nawu “Freedom From Fear—Is It Possible?”

Neyi munakukeña kwilukilahu jikwawu kutalisha hachikamana madombu, tañenu chibaaba chinakwila nawu “Peace on Earth at Last!”