Luka

1 Ji mang’eny osetemo choko weche mag adiera ma ogen chuth e kindwa, 2 mana kaka ne ochiwnwagi kokalo kuom joma nyaka a chakruok noneno wechegi gi wang’gi kendo ne gibedo jorit mag wechego. 3 An bende nikech asenono gik moko duto nyaka a chakruokgi adimba, aseng’ado mondo andiknigi e yo mochanore maler, in Theofilo, jaduong’ moluor moloyo, 4 mondo eka ing’e chuth adiera mag gik mosepuonji.

5 E kinde Herode ruodh Judea, ne nitie jadolo moro ma nyinge Zakaria moa e kidieny mar Abija. Chiege noa kuom nyi Arun to nyinge ne en Elizabeth. 6 Ji ariyogo ne gin joma kare e nyim Nyasaye, kendo ne giwuotho ma onge ketho ka luwore gi chike duto kod gik ma Jehova ne dwaro. 7 To ne gionge nyathi nikech Elizabeth ne en migumba kendo giduto koro hikgi noseniang’.

8 Koro e sama notiyo kaka jadolo e migawo mar kidienyne e nyim Nyasaye 9 ka luwore gi kaka tim mar tij jodolo nobet, sane nochopo mar chiwo ubani, mi nodonjo e hekalu mar Jehova. 10 Kendo oganda duto ne lemo oko e sa mar chiwo ubani. 11 Malaika mar Jehova ma ne ochung’ e dir kendo mar ubani korachwich nofwenyorene. 12 To chuny Zakaria nochandore bang’ nene, kendo luoro nomake ahinya. 13 Kata kamano, malaikano nowachone niya: “Kik iluor in Zakaria, nimar Nyasaye osewinjo kwayoni, kendo Elizabeth chiegi biro nyuoloni nyathi ma wuowi, mi inichake ni Johana. 14 Ibiro bedo gi ilo kod mor maduong’, mi ji mang’eny bende nobed mamor nikech nyuolne 15 nimar obiro bedo gi duong’ e wang’ Jehova. To ok obi madho divai ngang’ kata gimoro amora mimadho ma mero ji, kendo roho maler biro pong’e kata ka pok onyuole, 16 kendo obiro duoko ng’eny nyithind Israel ir Jehova Nyasachgi. 17 Bende, obiro dhi kotelo e nyim Nyasaye gi chuny kod teko mar Elija mondo oduok chuny wuone ir nyithindgi, kendo oduok joma tamore winjo wach ir rieko mar joma kare, mondo eka olos ne Jehova joma oseik.”

18 Zakaria nopenjo malaikano kama: “Ere kaka anyalo bedo gadier gi wachni? Nimar aseti kendo chiega koro hike oseniang’.” 19 Malaikano nodwoke niya: “An Gabriel, ma jachung’ e nyim Nyasaye, kendo oseora ni awuo kodi mondo alandni wach maberni. 20 To ne! ibiro bet momo, kendo ok ibi bedo gi nyalo mar wuoyo nyaka chop chieng’ ma gigi biro timoree, nikech ne ok iyie kuom wechena ma biro chopo e kinde moseketnegi.” 21 Gie kindeno, ji ne medo rito Zakaria, kendo ne giwuoro kaka nodeko ahinya e hekalu. 22 Sama nowuok oko, ne oonge gi nyalo mar wuoyo kodgi, omiyo ne gifwenyo ni oseneno hono moro e hekalu. Nosiko kotiyo gi ranyisi mag lwetene e wuoyo kodgi, kata kamano nodong’ ka en momo. 23 Koro ka ndalo mag tichne e hekalu norumo, nodok dalane.

24 Bang’ odiechienge moko, Elizabeth chiege nomako ich, kendo nosiko kar kende kuom dweche abich kowacho kama: 25 “Mani e kaka Jehova osetimona e ndalogi. Osepara mondo ogolna wich-kuot e kind ji.”

26 E dwe mare mar auchiel, Nyasaye nooro malaika Gabriel nyaka e taon moro mar Galili ma nyinge Nazareth, 27 ir nyako moro ma silili ma nosetimo singruok mar donjo e kend gi dichwo ma nyinge Josef moa e dhood Daudi, to nying nyakono ne en Maria. 28 Ka malaikano nodonjo, nowacho ne nyakono kama: “Misawa, in ng’at moguedh ahinya, Jehova ni kodi.” 29 Kata kamano, chunye nochandore ahinya kuom wechenego kendo notemo mondo ong’e tiend mos ma kamano. 30 Omiyo, malaikano nokone niya: “Kik ibed maluor Maria, nimar Nyasaye oseyie kodi. 31 To ne! inimak ich, kendo ninyuol wuowi, mi inimiye nying ni Yesu. 32 Jali nobed gi duong’ kendo enoluonge ni Wuod Ng’at Mamalo Chutho, kendo Jehova Nyasaye biro miye kom-loch mar Daudi wuon mare, 33 kendo obiro locho kaka Ruoth e wi od Jakobo nyaka chieng’, kendo Pinyruodhe ok norum.”

34 To Maria nopenjo malaikano kama: “Mano biro timore nade to pok ne anindo gi dichwo?” 35 Malaikano nodwoke niya: “Roho maler nobi kuomi kendo teko mar Ng’at Mamalo Chutho biro umi. Kendo nikech mano, jal mibiro nyuolono noluong ni maler, Wuod Nyasaye. 36 Kendo ne! Elizabeth ma watni bende osemako ich mar nyathi ma wuowi kata obedo ni oseti, kendo mani en dweye mar auchiel, dhako ma ji luongo ni migumba; 37 nikech onge gima Nyasaye wacho ma ok nyal timore.” 38 Eka Maria nowacho niya: “Ne! an misumba mar Jehova! We mondo otimrena kaka isewacho.” Bang’ mano, malaikano noweye.

39 Omiyo, e ndalogo Maria nowuok modhi mapiyo e piny motimo gode, e taon moro mar Juda 40 kendo nodonjo e od Zakaria mi nomoso Elizabeth. 41 Sama Elizabeth nowinjo ka Maria mose, nyathi ma ne ni ei Elizabeth notugo, kendo roho maler nopong’o Elizabeth 42 mi nokok gi dwol maduong’ niya: “In ng’at moguedhi e kind mon kendo nyathi manie iyi en moguedhi! 43 Omiyo, ere kaka ayudo thuolo moyiedh kama momiyo min Ruodha obiro ira? 44 Nimar ne! sama ne awinjo awinja ka imosa ni i, nyathi manie iya a otugo gi ilo. 45 En mor bende ne nyakono moseyie nimar weche duto mosewachne koa kuom Jehova biro chopo chutho.”

46 Eka Maria nowacho kama: “Chunya miyo Jehova duong’, 47 kendo ok anyal weyo bedo gi mor mogundho kuom Nyasaye ma Jawarna 48 nimar oseparo misumbane ma nyako ma jachan. Kendo ne! chakre sani tienge duto biro kwana kaka ng’at mamor 49 nikech Jal ma nigi teko osetimona gik madongo kendo nyinge iluongo ni maler, 50 kendo e tienge duto kechne bedo kuom joma oluore. 51 Osetimo gik madongo gi bade; osekeyo joma nigi kido mar ng’awruok e chunygi. 52 Osegolo joma nigi teko a e kombegi mag loch, kendo oseting’o malo joma ngimagi ni piny; 53 oseyieng’o chuth joma kech kayo gi gik mabeyo kendo oseriembo joma ne nigi mwandu mi gia gi lwetgi nono. 54 Osekonyo Israel jatichne kuom paro kechne 55 mana kaka nosingo ne kwerewa, ne Ibrahim kod kothe nyaka chieng’.” 56 Maria nodak kode kuom dweche adek kama eka nodok korgi.

57 Kinde koro nochopo ma Elizabeth ne onego nyuolie, mi nonyuolo nyathi ma wuowi. 58 Kendo joma nodak machiegni kode kod wedene nowinjo ni Jehova ne osekecho Elizabeth e yo maduong’, mi ne gibedo moil kode. 59 E odiechieng’ mar aboro, ne gibiro mondo giter nyathi matinno nyangu, kendo ne gidwaro miye nying mar Zakaria wuon-gi. 60 Eka min-gi nowachonegi niya: “Ooyo! to enoluonge ni Johana.” 61 Mi ne giwachone niya: “Onge watni miluongo gi nyingno.” 62 Eka ne gidhi penjo wuon-gi nying ma nodwaro ni oluongego, to ne gitimo kamano ka gitiyo gi ranyisi mag lwetegi. 63 Omiyo, nokwayo bao moro mi nondikoe niya: “Johana e nyinge.” Mano nomiyo ji duto ohum nono. 64 Gikanyono, dhoge noyawore kendo lewe nogonyore mi nochako wuoyo, kopako Nyasaye. 65 Kendo luoro nomako ji duto ma nodak e alworagi, mi ji nochako wuoyo kuom wechegi duto e gweng’ Judea mangima ma en piny motimo gode. 66 Eka ji duto ma nowinjo noketo wachno ei chunygi, kendo ne gipenjore niya: “Nyathi matinno nobed ng’at manade?” Nimar lwet Jehova ne ni kode adier.

67 Eka roho maler nopong’o Zakaria wuon mare, mi nokoro wach niya: 68 “Opak Jehova, Nyasach Israel nimar oseparo joge, kendo osekelonegi resruok. 69 Kendo osechungonwa tung’ mar warruok e od Daudi jatichne, 70 mana kaka nosewacho kokalo kuom dho jonabine maler chakre chon, 71 wach warruok kuom wasikwa, kendo koa e lwet ji duto ma nigi sigu kodwa; 72 mondo okechwa nikech kwerewa kendo paro singruokne maler, 73 ma en kuong’ruok ma notimo ne Ibrahim kwarwa 74 mondo omiwa thuolo mar tiyo tij Nyasaye ma onge luoro, bang’ ka osereswa e lwet wasigu, 75 ka wamakore kode kendo ka wanyiso tim makare e nyime ndalo duto. 76 To in, nyathi matin, ibiro luongi ni janabi mar Ng’at Mamalo Chutho, nimar ibiro dhi motelo ne Jehova mondo iik yorene, 77 mondo imi joge ng’eyo wach warruok kokalo kuom weyonegi richogi, 78 nikech Nyasachwa osekechowa. Kokalo kuom kechno, ler mar ru piny biro limowa koa malo 79 mondo ochiw ler ne joma obet e mudho kod tipo mar tho, kendo mondo ota tiendewa e yo mar kuwe.”

80 Kendo nyathi matinno nodongo mi nobedo motegno e pache kod e kite ma iye, kendo nosiko e thim nyaka nochopo chieng’ ma nonyisore e lela ne Israel.