Luka

23 Omiyo, oganda duto noa malo, mi ne gitere ir Pilato. 2 Eka ne gichako donjone niya: “A wayudo ka ng’atni loko ogandawa, kokwero ji mondo kik chul osuru ne Kaisar, kendo owacho ni en owuon en e Kristo ruoth.” 3 Koro Pilato nopenje kama: “In e Ruodh Jo-Yahudi, koso?” Nodwoke kama: “In iwuon isewacho.” 4 Eka Pilato nowacho ne jodong-jodolo kod oganda niya: “Ok ayudo ketho moro amora kuom ng’atni.” 5 To ne giramo ka giwacho kama: “Okelo tungni e kind oganda kopuonjo e Judea duto, to kata mana chakre Galili nyaka kae.” 6 Bang’ winjo mano, Pilato nopenjo kabe ng’atno en Ja-Galili. 7 Bang’ ng’eyo ni ne owuok e alwora ma ne ni e bwo Herode, notere ir Herode, ma bende ne ni Jerusalem e ndalogo.

8 Ka Herode noneno Yesu, nomor ndi. Nikech kuom kinde nosedwaro neno Yesu nimar nosewinjo weche mang’eny kuome, kendo nogeno neno ranyisi motimo. 9 Omiyo, nochako penje weche mang’eny, to ok nochiwo dwoko moro amora. 10 Kata kamano, jodong-jodolo gi jondiko ne siko ka chung’ malo kendo donjone gi mirima mager. 11 Eka Herode kaachiel gi askechene notimone timbe achaya, kendo Herode ne ojare kuom rwakone nanga moro maber, kae to ne oduoke ir Pilato. 12 Herode gi Pilato nobedo osiepe e chieng’onogo, nimar motelo ne kanyo ne gisebedo gi sigu e kindgi.

13 Eka Pilato noluongo jodong-jodolo kod jotelo gi oganda kanyachiel 14 mi nowachonegi niya: “Ne ukelo ng’atni ira ni ojiwo ji mondo ong’anj. Koro neuru! asenone e nyimu to ok ayudo kuome ketho moro amora e weche mudonjonegogi. 15 To adier, kata mana Herode ok oyudo ketho e wechego nimar oseduoke irwa, to neuru! onge gimoro amora mosetimo mowinjore gi tho. 16 Omiyo, abiro kume kae to agonye.” 17 —— 18 To oganda duto nokok matek niya: “Tiek ng’atni, to igonynwa Baraba!” 19 (Ma e jal ma ne osewit e jela nikech tim ng’anjo ne sirkal ma nosetimore e taondno kendo nikech nek.) 20 Pilato nokoknegi kendo, nikech nodwaro gonyo Yesu. 21 Eka ne gichako goyo koko matek niya: “Gure e yath! Gure e yath!” 22 To mar adek, nopenjogi kama: “Nikech ang’o? En ketho ma ne ma ng’atni osetimo? Ok aseyudo gimoro kuome mowinjore gi tho; kuom mano abiro kume kae to agonye.” 23 Mi ne gichako ramo matek gi dwol maduong’ ka gidwaro ni mondo onege. Koko mar dwondgi ne ng’eny ahinya 24 mi Pilato nong’ado ni otimnegi kaka ne gidwaro. 25 Nogonyo ng’at ma ne gidwaro ma noyudo osewit e jela nikech ng’anjo ne sirkal kod nek, kae to nochiwonegi Yesu mondo gitimne kaka ne gidwaro.

26 Koro sama ne gidhi kode, ne gimako Simon ma Ja-Kirene ma noa e gweng’ moro mokiewo gi kanyo, kendo ne giketone yadh-sand mondo oting’ koluwo bang’ Yesu. 27 Oganda mang’ongo ne luwe, moriwo nyaka mon ma ne siko ka goyo korgi gi kuyo kendo ka gigoyo nduru nikech en. 28 Yesu nolokore kong’iyo mon-go mowacho niya: “Nyi Jerusalem, weuru ywak nikech an. Kar mano, ywaguru nikech un uwegi kendo nikech nyithindu; 29 nimar neuru! ndalo biro ma ji nowach ni, ‘Mon mamor gin mon ma migumba, gi iye ma ne ok onyuol, kod thunde ma ne ok odhodh!’ 30 Eka ginichak wacho ne gode ni, ‘Podhuru kuomwa!’ kendo ne thuche ni, ‘Umwauru!’ 31 Ka gitimo gigi e kinde ma yath pod numu, ang’o ma biro timore ka yath oner?”

32 Ji ariyo moko ma ne oyudo oseketho chik bende ne itero mondo odhi oneg kanyachiel kode. 33 To kane gichopo kama iluongo ni Hanga Wich, ne gigure e yath kanyachiel gi joma noseketho chikgo, achiel e bade korachwich to machielo e bade koracham. 34 To Yesu ne wacho kama: “Wuora, wenegi nimar ok ging’eyo gima gitimo.” E wi mano, ne gigoyo ombulu mondo gipogre lepe. 35 Kendo ji ne ochung’ ka ging’icho. To jotelo ne twenyo umgi ka gijare kendo ne giwacho niya: “Noreso jomoko; koro oresre ane owuon, ka en e Kristo mar Nyasaye, ma e Jal Moyier.” 36 Kata mana askeche ne jare ka gibiro ire, kendo ne gimiye divai mawach 37 ka giwacho niya: “Ka in e Ruodh Jo-Yahudi, resri ane iwuon.” 38 Bende, ne nitie ndiko moro gi ka wiye ma wacho kama: “Mani e Ruodh Jo-Yahudi.”

39 Eka achiel kuom joketho ma nong’aw kanyo nochako wachone e yor achaya niya: “In e Kristo, koso? Resri ane iwuon kod wan bende!” 40 Jaketho machielo to nodwoko ka kwere niya: “Bedo ni koro bura mong’adni e bura mong’ad ne ng’atni, ok diluorie Nyasaye kata matin? 41 Wan oseng’adnwa bura kare, nimar wayudo gima owinjore gi gik ma ne watimo; to ng’atni ok notimo gimoro marach.” 42 Eka nowacho niya: “Yesu, iparae e kinde midonjo e Pinyruodhi.” 43 Mi nodwoke niya: “Adier awachoni kawuononi, inibed koda e Paradiso.”

44 Koro ne en kar sa auchiel odiechieng’, to e ma mudho noimo pinyno duto nyaka sa ochiko 45 nimar ler mar wang’-chieng’ ne olal; eka pasia mar hekalu nobarore mopogore diere. 46 Kendo Yesu nokok gi dwol maduong’ niya: “Wuora, much ngimana aketo e lweti.” Ka nosewacho kamano, ne otho. 47 Bang’ neno gima nosetimoreno, jatend-askeche* nochako miyo Nyasaye duong’ kowacho niya: “Kuom adier, ng’atni ne en ng’at makare.” 48 To ka oganda duto ma noyudo ochokore kanyo kanyachiel nikech mano noneno gik ma notimore, ne gidok pacho ka gigoyo korgi nikech kuyo. 49 Kendo ji duto ma ne ong’ere kode ne ochung’ gi kama bor matin. Bende, mon ma noyudo oseluwe a Galili ne ni kanyo kendo ne gineno gigo.

50 To ne! ne nitie ng’at moro ma nyinge Josef ma ne ni e bura mar Sanhedrin, kendo ne en ng’at maber kendo makare. 51 (Ng’atno ok nogoyo ombulu koriwo lwedo chenrogi marach kod timgi.) Ne owuok Arimathea, ma en taon moro e piny Jo-Juda, kendo nosebedo korito Pinyruodh Nyasaye. 52 Jali nodhi ir Pilato kendo nokwaye ringre Yesu. 53 Mi ne olore piny kendo ne oboye gi law kitani maber, kae to ne okete e liel moro ma ne okuny e i lwanda kama ne pok oketie ng’ato ang’ata. 54 Koro ne en chieng’ Ikruok kendo Sabato ne chiegni chakore. 55 To mon ma noyudo osebiro kode ka gia Galili noluwe mi ne gineno liel kod kaka noket ringrene, 56 eka ne gidok mondo giik yien kod modhi ma nigi suya mamit. Kata kamano, ne giyueyo e chieng’ Sabato kaka chik ne dwaro.