Luka
3 E higa mar 15 mar loch Tiberio Kaisar, kane Pontio Pilato en gavana mar Judea, to Herode ne en jaloch mar Galili, ka Filipo owadgi to ne en jaloch mar piny Iturea kod Trakoniti, kendo Lusania ne en jaloch mar Abilene, 2 e ndalo ma Anas kod Kayafa ne gin jodong-jodolo, wach Nyasaye nobiro ne Johana wuod Zakaria ka en e thim.
3 Kuom mano, nodhi e alwora duto mar Jordan koyalo wach batiso ma en ranyisi mar loko chuny mondo owe ne ji richogi, 4 mana kaka ondik e buk moting’o weche janabi Isaya niya: “Nitie dwol ma kok e thim kama: ‘Ikuru ne Jehova yo! Miuru ndechene obed moriere tir. 5 Hoho ka hoho nyaka bug, kendo gode gi pidhe duto nyaka ket obed mopie; yore mogondore nyaka bed moriere tir, kendo yore motimo gogni nobed mapoth; 6 kendo ji duto none warruok mar Nyasaye.’”
7 Omiyo, Johana nochako wacho ne oganda ma ne biro mondo obatisgi niya: “Un koth thuonde, ng’ano ma osenyisou mondo uring mirima ma biro? 8 Omiyo, nyaguru olemo ma nyiso ni useloko chunyu ua e richo. Kik uchak wacho e chunyu uwegi ni, ‘Wan gi wuonwa ma en Ibrahim.’ Nimar awachonu ni Nyasaye nigi nyalo mar loso ne Ibrahim nyithindo koa kuom kitegi. 9 Adier, oseket le e tie yien. Kuom mano, yien duto ma ok nyag olemo mabeyo ibiro tong’ mi witgi e mach.”
10 To oganda ne penje kama: “Kare en ang’o monego watim?” 11 En to nodwokogi niya: “Ng’at ma nigi nengni ariyo mondo opog ne jal ma ongego, kendo ng’at ma nigi chiemo bende otim kamano.” 12 Kata mana josol osuru ne biro mondo obatisgi, kendo ne gipenje niya: “Japuonj, en ang’o monego watim?” 13 Nokonegi kama: “Kik usol gimoro mokalo chudo moket mar osuru.” 14 Bende, joma ne tiyo e lweny ne penje niya: “En ang’o monego watim?” Eka nowachonegi kama: “Kik uthag ng’ato ang’ata kata donjo ne ng’ato e yor miriambo, to gik ma uyudo mondo oromu.”
15 Koro ji ne kiyo biro mar Kristo, kendo ji duto ne penjore e chunygi kuom Johana ni, “Be dibed ni ma eri e Kristo?” 16 Johana nodwoko kowacho ne ji duto niya: “An to abatisou gi pi, to ng’at ma nigi teko moloya biro, ma an to ok awinjora gonyo tond wuochene. En obiro batisou gi roho maler kendo gi mach. 17 Rapiedh cham ni e lwete mondo obi oywe ka modinoe cham ma dong’ maler chuth, kae to obiro choko ngano mi okan-gi e dero, to mihudhi obiro wang’o gi mach ma ok nyal neg.”
18 Johana bende nopuonjo weche mamoko mang’eny, kendo nodhi nyime lando ne ji wach maber. 19 To Johana nokwero Herode ma ne en jaloch mar alworano e wach Herodia chi owadgi kendo e wi timbe maricho duto ma notimo. 20 Omiyo, Herode notimo kendo gima rachni: Ne otueyo Johana e jela.
21 Koro ka nosebatis ji duto, ne obatis Yesu bende. Sama nolemo, polo noyawore 22 kendo roho maler nobiro kuome e kit akuru, mi dwol moro noa e polo ka wacho niya: “In Wuoda ma ahero; aseyie kodi.”
23 Kane Yesu ochako yalo, ne en jahigni 30 kama. Ji nong’eye kaka,
wuod Josef,
ma wuod Heli,
24 wuod Mathat,
wuod Lawi,
wuod Melki,
wuod Janai,
wuod Josef,
25 wuod Matathia,
wuod Amos,
wuod Nahum,
wuod Esli,
wuod Nagai,
26 wuod Math,
wuod Matathia,
wuod Semein,
wuod Josek,
wuod Joda,
27 wuod Joanan,
wuod Resa,
wuod Zerubabel,
wuod Shelatiel,
wuod Neri,
28 wuod Melki,
wuod Adi,
wuod Kosam,
wuod Elmada,
wuod Er,
29 wuod Yesu,
wuod Eliezer,
wuod Jorim,
wuod Mathat,
wuod Lawi,
30 wuod Simion,
wuod Judas,
wuod Josef,
wuod Jonam,
wuod Eliakim,
31 wuod Melea,
wuod Mena,
wuod Matatha,
wuod Nathan,
wuod Daudi,
32 wuod Jese,
wuod Obed,
wuod Boaz,
wuod Salmon,
wuod Nashon,
33 wuod Aminadab,
wuod Ani,
wuod Hezron,
wuod Perez,
wuod Juda,
34 wuod Jakobo,
wuod Isaka,
wuod Ibrahim,
wuod Tera,
wuod Nahor,
35 wuod Serag,
wuod Reu,
wuod Peleg,
wuod Eber,
wuod Shela,
36 wuod Kainan,
wuod Apaksad,
wuod Shem,
wuod Noa,
wuod Lamek,
37 wuod Methusela,
wuod Enok,
wuod Jared,
wuod Mahalalel,
wuod Kainan,
38 wuod Enos,
wuod Seth,
wuod Adam,
wuod Nyasaye.